Pesie a los intentos de Catar por tornase nun circuitu y un eventu míticu nel calendariu, la realidá ye que son munches les razones que piden que nun se corra nun trazáu preparáu pa les motos y nes qu’esti fin de selmana viviéronse momentos bastante vergoñosos.
Entamando pola necesidá d’establecer un llímite de vueltes con un mesmu xuegu de ruedes a los pilotos pol miéu a daños y reventones de les gomes por cuenta los pianos agresivos del circuitu. Siguiendo poles condiciones d’humedá y calor que ficieron que los pilotos tuvieran compitiendo al límite de lo que ye necesario y saludable pa un ser humanu. Hai delles dómines del añu nes que la calor ye un problema grave en ciertes partes del mundu, cuando más nun desiertu. Poner a competir a persones poniendo en riesgu la so salú abúltanos innecesario nun deporte que tien de tentar de marcar exemplu coles decisiones que toma con respeutu a los sitios au los que compite.
Ente clasificación, carrera al sprint y carrera del domingu, vimos a Max Verstappen proclamase campeón el sábadu depués de que la victoria fuera pa Piastri. Tornamos a ver a dambos McLaren nel podiu’l domingu y a Lewis Hamilton cometer un error y arruinar la so carrera, dexando al so compañeru d’equipu tamién nuna situación delicada que Russell supo, sicasí, endrechar. Verstappen tornó a dominar, yá cola tranquilidá de sabese campeón. Los llímites de pista y la presión minaron al so compañeru d’equipu que recibió delles penalizaciones que lu alloñaron del podiu, ocupáu polos homes de Woking.
Pero lo que sobre too vimos ye a pilotos salir de los sos monoplaces n’acabando la carrera a piques de cayer desmayaos, con unos niveles de deshidratación ablucantes y preocupantes y la sensación de tener fecho un esfuerciu más allá de lo humano.
En resume, campeonatu pa Verstappen, polémica coles gomes ya’l trazáu, y un gran premiu que precisa de muncho ameyorar o adautar si quier tornase en dalgo más qu’una carrera nuecherniega nel calendariu. Equí vos dexamos tolos númberos del fin de selmana.