Gran Premiu de Canadá 2023

Hai munches coses que cuntar sobre’l gran premiu de Canadá, ente otres, que tanto da si hai agua o si hai sol, agora mesmo Red Bull nun tien rival pola victoria.

O cásique meyor diba ser dicir que Max Verstappen nun tien rival pola victoria porque Sergio Pérez nun ta sabiendo sacar partíu al coche como l’holandés y d’amuesa tenemos les últimes carreres. Pero vamos dir por partes.

El vienres la primer sesión d’entrenamientos llibres quedó dafechu suspendida, anque con bandera colorada, por un problema col circuitu internu de cámares del recintu. La bandera saliera por cuenta’l coche d’Ocon, que tuvo de ser retiráu de la pista, pero continuó cuando esto yá se tenía fecho. Esto nun permitía que se rodara y a pocos minutos dende qu’entamara la sesión ésta quedó parada y nun pudo volver a reanudase. De fechu, la segunda sesión de llibres allargóse media hora pa permitir a los pilotos tener esti tiempu del que nun dispusieran na primer sesión. Los pilotos atoparon na pista en condiciones mui cambiantes por cuenta l’agua que cayera demientres los díes pasaos y esi mesmu.

SÁBADU

Enantes de comentar daqué del sábadu, vos presentamos el podiu de la clasificación pero tenemos d’aclarar que Nico Hülkenberg acabó penalizáu con tres posiciones por infrinxir les normes de bandera colorada demientres la Q3, polo que na parriella del domingu, los tres primeros fueron Verstappen, Alonso y Hamilton (1:27.627). Per otru llau, tamién hebo penalizaciones pa Sáinz, Tsunoda y Stroll por estorbar a otros pilotos demientres estos facíen la so vuelta rápida. Caún recibió tres posiciones de sanción.

La sesión de clasificación entamó con agua y terminó con agua, y pente medio los pilotos tuvieron de decidir estratexes pa consiguir la so vuelta rápida enantes de que les condiciones cambiaran otra vuelta. Hai que rescamplar, ensin duldes, el llabor de Nico Hülkenberg pa poner el so coche segundu, pesie a la sanción posterior, y tamién el d’Alex Albon, que trayía meyores importantes nel so monoplaza que dieron un bon rendimientu yá non sólo na clasificación, au entró na Q3 depués de lliderar la Q2, si non tamién en carrera.

Tuvimos delles deceiciones al volante del Ferrari de Leclerc, que clasificó undécimu, depués de que l’equipu nun atendiera la so petición de montar gomes de seco cuando otros pilotos yá lo taben faciendo. Tamién foi deceicionante la clasificación de Sáinz, qu’anque sí entró na Q3 namás pudo ser octavu y cola penalización de tres posiciones por estorbar a Gasly na Q1 acabó saliendo per detrás de Leclerc. Tampoco nun tuvo un bon sábadu, otra vuelta, Sergio Pérez, que quedó fuera de la Q3 nel puestu doce. Aprovecháronse d’estes desgracies ayenes los dos pilotos de McLaren, qu’entraron en Q3 y clasificaron sétimu (Norris) y novenu (Piastri). L’australianu protagonizó un accidente que lu diba dexar fuera de la competición pero qu’igualmente-y valió un novenu puestu, per delantre d’Albon en décimu. Tanto Piastri como Albon beneficiáronse de la penalización a Sáinz y xubieron un puestu na parriella de salida.

Abúltanos importante tamién el trabayu d’Ocon pa clasificar sextu col so Alpine depués de que nun entamara mui bien el fin de selmana pal equipu (Gasly provocaría la primer bandera colorada del vienres por problemes nel so coche). Destacamos tamién a dambos Mercedes que nun paecíen tar a gusto col coche pero que clasificaron en cuartu (Hamilton, que llueu foi terceru na parriella) y quintu (Russell, que llueu foi cuartu).

Probe rendimientu de Stroll y Magnussen, que yá nun sorprende porque nel casu del danés suel tener el so fuerte en carrera, y tamién d’AlphaTauri y Alfa Romeo, perdíos nos tiempos y nes posiciones más baxes. Zhou sedría l’encargáu de zarrar la clasificación d’esti gran premiu.

A la fin pole pa Verstappen per delantre d’Alonso y Hamilton na parriella del domingu. Nico Hülkenberg, tres la so penalización, partiría quintu.

DOMINGU

Lo primero que llama l’atención del podiu d’esti gran premiu ye ver que la distancia ente Verstappen, que ganó, y Alonso que foi segundu nun ye tan grande como nos grandes premios pasaos. Por exemplu, la distancia ente l’holandés y Hamilton nel pasáu gran premiu en Barcelona foi de más de venti segundos y nun foi l’únicu con eses diferencies de tiempu tan abultaes. Ensin embargu, en Canadá nun vimos esa superioridá tan manifiesta de Verstappen que pesie a ganar tuvo tamién de xestionar la carrera y peliar coles gomes, sobre manera les dures, que nun furrulaben como a él-y prestaba. Si xuntamos eso a les meyores que trayía Aston Martin a esti gran premiu, quiciás podamos desplicar que la diferencia ente dambos fuera de más de nueve segundos “namás”.Ensin agua pero con condiciones más fresques y nun circuitu que suel degradar muncho les gomes, Verstappen tuvo de trabayase la victoria, anque duldamos que naide nun tuviera claro que la tenía nes manes dende casi l’arrancada.

La salida foi bien entretenida con Max Verstappen saliendo mui bien y dexando atrás a Alonso y Hamilton. L’inglés acabaría pasando al asturianu na salida y Alonso tuvo de defendese de Russell que vinía per detrás cola intención de replicar lo que ficiera’l so compañeru d’equipu, anque ensin consiguilo. Alonso acabaría recuperando la posición más alantre na carrera amosando que nesta ocasión l’Aston Martin tinía un puquitín más que Mercedes, como depués almitiría Hamilton.

Nun foi un gran premiu mui accidentáu anque sí tuvimos dellos momentos. George Russell acabó golpeando el muru cola rueda trasera drecha y reventó la goma, anque tuvo la suerte de poder llegar a parar demientres el coche de seguridá qu’él mesmu provocara pa tornar a la carrera. Sicasí, l’inglés nun tendría la fortuna del so llau y delles vueltes depués tuvo d’abandonar por cuenta’l desgaste los frenos, mui altu nesti circuitu.

Alonso tuvo de facer dalgo xestión de combustible demientres bona parte de carrera depués d’un problema qu’Aston Martin nun tien mui claro si yera tal o non. La distancia nesi momentu con Verstappen nun yera mui grande pero poquín a poco fuimos viendo que Hamilton per detrás diba acortando la so distancia con él y dende la radio del equipu quedó claro que tiníen falta d’esi lift and coast si queríen terminar la carrera nel podiu.

Davezu, cuando Ferrari decide dir contracorriente con respeutu a la estratexa que suelen escoyer los demás equipos, suel equivocase o nun ye quien a facela funcionar. Esti gran premiu de Canadá foi una esceición. La Scuderia optó por una estratexa a una parada con dambos pilotos montando na primer tanda de vueltes una goma medio a la qu’allargaron la vida casi cuarenta vueltes, y una segunda tanda con goma duro. El restu de pilotos escoyera dir a dos paraes (medio-duro-medio foi la opción más escoyida en xeneral). Esta temporada ún de los problemes que taben enfrentando en Ferrari yera’l desgaste escesivu de gomes y la mala xestión d’elles. En Canadá nun tuvieron que preocupase d’ello y pudieron tirar y facer valer la so estratexa, dalgo que-yos valió ser cuartu (Leclerc) y quintu (Sáinz). Si dambos tuvieran clasificao más arriba’l sábadu, tamos seguros de que diben a tar peleando con Alonso y Hamilton pol podiu viendo’l rendimientu qu’amosaron.

Sergio Pérez siguió una estratexa asomeyada, anque él paró a dos vueltes pal final pa montar un xuegu de blandos y facer la vuelta rápida. Sicasí, la carrera del mexicanu, como nes pasaes, nun foi brillante, y namás se pudo conformar con un quintu puestu que nun sabe a muncho a estes altures. Sí que-y val pa siguir segundu na clasificación de pilotos pero cada vegada más lloñe de Verstappen y más cerca d’Alonso, que ta terceru.

Alex Albon foi quiciás el meyor pilotu del gran premiu, con permisu del campeón del mundu d’anguaño, tres ser quien a terminar la carrera sétimu. Recordamos que hasta ayeri, Williams taba últimu na clasificación del mundial de constructores depués de sumar un puntu nes ocho primeres carreres del mundial. Canadá, ensin embargu, supunxo que l’equipu seya agora penúltimu pero a un puntu namás de Haas y a dos d’Alfa Romeo. Un bon pasu alantre, necesariu, pa siguir avanzando carrera tres carrera. Les meyores que trayía l’equipu namás les llevaba Albon, polo que na viniente carrera deberíemos ver una meyora tamién en Sargeant. Nesti gran premiu, sicasí, el rookie nun pudo ver la bandera a cuadros y foi’l primer abandonu de la carrera qu’amás provocó un coche de seguridá virtual.

Falábemos na clasificación del bon trabayu d’Ocon col Alpine y tenemos de repitinos en carrera, pues el francés terminó octavu mui presionáu por Lando Norris per detrás, pero a la fin foi quien a ver la bandera a cuadros primero que l’inglés. El so compañeru Pierre Gasly nun pudo entrar nos puntos. Partía dende mui atrás tres un fin de selmana bastante complicáu, y en carrera acabó nel puestu doce.

Per detrás d’Ocon terminó Stroll, qu’en verdá foi décimu pero aprovechó una penalización a Lando Norris pa sumar dos puntos que, mesmo que pasa con Pérez en Red Bull, saben a bastante pocu y más siendo’l gran premiu de casa. El canadiense nun ta teniendo bones clasificaciones últimamente y eso condiciona muncho les sos carreres.

Zarró los puntos Valtteri Bottas que mesmo que Stroll beneficiose de la penalización a Norris y sumó otru puntu p’Alfa Romeo que lu pon per delantre de Haas con nueve puntos. Zhou tuvo una carrera muncho más complicada que’l so compañeru d’equipu, condicionada tamién pola clasificación del sábadu na que, como diximos, foi últimu y acabó nel puestu dieciséis.

Fuera de puntos quedó Oscar Piastri n’otra bona carrera del australianu pero ensin recompensa. Dambos McLaren quedaron fueran de los diez primeros pesie a que clasificaran bien y de fechu Norris vio la bandera a cuadros en novena posición. Sicasí, l’inglés recibió una penalización de cinco segundos por conducta antideportiva demientres el coche de seguridá que provocó Russell al dexar muncha distancia col so compañeru d’equipu delantre d’él depués de que l’equipu-yos dixera que diben aprovechar el coche de seguridá pa facer les sos paraes. Los comisarios entendieron que Norris conduxo (demientres el momentu en que supo qu’había coche de seguridá y la so entrada en boxes) demasiao despacio polo que lu sancionaron con cinco segundos que significaron que, en cuenta de novenu, acabara nel décimotercer puestu, fuera de los puntos.

Tampoco sumó AlphaTauri y de fechu Nyck de Vries foi protagonista d’un momentu bastante torpe cuando peleaba con Magnussen por posición y que casi dexa a los dos fuera de carrera. El pilotu neerlandés ta teniendo munches dificultaes pa sacar les carreres alantre ensin problemes y pa xustificar la so elleición per parte d’AlphaTauri. Yuki Tsunoda, que tampoco nun pudo puntuar pero quedó per delantre del so compañer d’equipu, ta faciendo de llíder dafechu y eso ta condicionando tamién muncho’l rendimientu de de Vries que, con momentos como’l de Canadá, nun ayuda nada a la so causa. A la fin, dambos pilotos fuera de puntos y l’equipu últimu na clasificación de constructores.

Haas nun pudo aprovechar la bona clasificación de Hülkenberg que, incluso con penalización, partía mui arriba, en quinta posición. Sicasí, nin la carrera del alemán, nin la del so compañeru Kevin Magnussen fueron cencielles, nengún de los dos paecía tener bon ritmu y acabaron perdíos nes últimes posiciones de la clasificación, Hülkenberg décimoquintu y Magnussen decimosétimu. Col pasu alantre de Williams ya’l puntu d’Alfa Romeo, cada vegada s’apierta más esa zona baxa de la clasificación na que incluso consiguir un puntu yá marca la diferencia.

Dexamos Canadá y ponemos rumbu a Austria, al Red Bull Ring. La escudería de la bébora enerxético xuega en casa, asina que, si nada raro nun pasa, cuidamos que vamos tener otra fiesta de los del toru coloráu. Pero eso vamos descubrilo en dos selmanes. Demientres llega’l día y non, equí vos dexamos tolos númberos del fin de selmana.