Gran Premiu de Brasil 2017

Los que nun vieran lo que pasó’l sábadu na sesión de clasificación y sólo se quedaren colos resultaos de los llibres del vienres, podíen pensar que Brasil diba ser un paséu pa Hamilton. Pero’l pilotu inglés sigue siendo humanu, como diz elli, y un erru cometíu a dos minutos d’empezar la Q1 dexábalu fuera dafechu de la clasificación y facíalu salir del pitlane’l domingu. De xuru que muncha xente fan de Ferrari pensó en qu’esto mesmo podía tener pasao en carreres anteriores, enantes de que’l mundial tuviera decidíu.

De toles formes, nun foi una carrera de debilidaes pa Mercedes, nin tampoco lo foi la sesión de clasificación onde Bottas fexo la pole. Hamilton consiguió remontar posiciones hasta ponese cuartu al final, y quiciás tuviera sío terceru con más vueltes. De toles formes, quedónos claro otra vuelta más que Mercedes tán un pasu per delantre del restu tanto no mecánico como no mental.

Ferrari aprovechó la debilidá de Bottas nel primer xiru dempués de la salida, y Vettel consiguió ganar dempués de delles carreres ensin consiguilo, siendo acompañáu nel podiu amás de por Bottas, pol so compañeru d’equipu Kimi Räikkönen que terminó terceru, sumando un bon númberu de puntos pa Ferrari y dexando a Vettel más cerca de ser matemáticamente segundu na clasificación de pilotos.

Amás, ye importante destacar l’actuación de Felipe Massa na so última carrera en Brasil (polo menos de momentu…) que terminando séptimu llogró zarrar el so capítulu na Fórmula Uno de la meyor forma posible.

Al final nun apaeció nin una gota lluvia, pero sí vimos coses en pista que trestocaron un pocu los planes que los equipos teníen pa les sos estratexes, con coche de seguridá incluyíu na vuelta trés que fexo que los pilotos adelantasen les paraes previstes y aquellos que tiníen daños pudieran entrar a compensalos.

Como dicíemos, Mercedes nun dexó d’amosar una vegada más que son mereceores de dambos campeonatos. Pesie al erru de Hamilton el sábadu, trabayaron n’un coche que diba salir dende’l pitlane con partes previstes pa 2018, lo que nos fai albidrar que van siguir mandando o a lo menos no más alto na temporada que vien. Anque Bottas nun foi quien a facer de la so pole una victoria, nun dexó de lluchar por ponese al altor de Vettel anque nun foi suficiente. Hamilton terminaría cuartu, un puestu algamáu a base d’adelantamientos en pista que dexaben n’evidencia les carencies del restu de coches comparaos col Mercedes.

Ferrari, anque tarde, foron los trunfadores del gran premiu. Yá nun-yos sirve más que pal arguyu de ganar n’un circuitu icónicu y terminar la temporada con optimismu. Vettel fexo una salida perbona que-y permitió atopar el sitiu xustu p’adelantar a Bottas nel primer xiru y nunca nun vese amenazáu por elli o por Hamilton. Räikkönen tamién fexo una carrera sólida, terminando terceru.

Red Bull llegaben con torgues a Brasil. Aparte de nun ser un circuitu que se-yos dea bien, Ricciardo tinía una penalización de diez posiciones. La so salida na mitá de la parrilla foi bona, pero los incidentes de la primer curva afectáronlu de manera que llegó a tar penúltimu en pista dempués de facer un trompu. Ensin embargu, n’otra exhibición d’adelantamientos del pilotu australianu, consiguió remontar posiciones hasta terminar sextu. El so compañeru Verstappen tuvo una carrera más tranquila, anque siempre pendiente de les gomes ya’l so desgaste. Terminó quintu.

Nun hai duldes que Massa corría con una marcha más: yera la so (segunda) última carrera en casa dempués de que s’anunciara que va dexar la Fórmula Uno al final de la temporada. Na mente de tol mundo ta’l so retornu dempués del anunciu sorpresa de la retirada de Nico Rosberg y los movimientos que vinieron con ello, pero paeznos que d’esta va dir la definitiva. Ye por eso que nun nos sorprende velu terminar séptimu n’un circuitu nel que yá ganó tres vegaes nel pasáu y onde’l públicu nun dexaba de cantar el so nome. Williams consiguió aprovechase de los problemes de Force India y de les dificultaes de McLaren pa rodar al so ritmu, y consiguieron un puñadín de puntos que cásique confirma’l so quintu puestu nel mundial de constructores. Pero nun foi too bueno, Stroll tuvo una sesión de clasificación bastante floxa y una carrera mui probe, terminando nel puestu dieciséis.

McLaren consiguió puntuar con Alonso, qu’adelanta a Vandoorne nel mundial de pilotos a falta d’una carrera pal final de la temporada. El pilotu belga foi víctima d’un accidente con Ricciardo y Magnussen y onde nun pudo facer nada pa evitalo. El ritmu del McLaren foi bastante bonu tol fin de selmana. De fechu, Alonso fue quien a clasificar séptimu’l sábadu, anque gracies a la penalización de Ricciardo empezaría sextu. Tuvo delles batalles en pista con Pérez y Massa, y vio la bandera a cuadros en octavu llugar.

Force India tuvo una carrera decepcionante si pensamos no que nos tienen avezaos dende’l principiu la temporada. Ocon viose fuera bien temprano por un choque con Grosjean que perdió’l coche y golpeólu nel lláu drechu, quedando dambos fuera de pista. Anque Grosjean pudo siguir en carrera, nun tuvo la mesma suerte Ocon qu’acaba asina con una racha perbona de carreres finalizaes ya en puntos. Pérez, pela so parte, tampoco nun tuvo demasiao inspiráu, y anque lu vimos dar guerra en dellos momentos de la carrera, namás pudo terminar novenu.

Renault paecía que podía dar muncho más de lo que finalmente vimos nel gran premiu. Sáinz namás pudo ser undécimu y Hülkenberg, un pilotu al que Brasil suel dase-y bien, féxose col últimu puntu en disputa. Nun ta siendo un fin de temporada brillante pa Renault, que ta en boca de toos, especialmente polos fallos socesivos de los motores que monten Toro Rosso y pol baxón de rendimientu que tán amosando. De toles formes, consiguieron recortar un puntu a Toro Rosso, que nun pudieron sumar nengún.

Toro Rosso yá tuvo problemes el vienres con dambos pilotos: nun pasaben diez minutos de la primer sesión de llibres cuando víemos el coche de Hartley echar fumo y quedar aparcáu n’un de los llaos del circuitu. Otru problema más pal pilotu de Toro Rosso que nun ve forma de tener un fin de selmana ensin problemes. Gasly pel so lláu tamién tuvo problemes que ficieron a los mecánicos de Toro Rosso trabayar muncho más de lo que cuntaben. Hartley tuvo de retirase de la carrera y Gasly namás pudo terminar nel puestu doce.

Ericsson llegó a tar cerca los puntos n’un momentu de la carrera, pero la realidá de Sauber ye la que ye y la lóxica terminó imponiéndose con dambos pilotos nos últimos puestos namás per delantre de Stroll y Grosjean. Na so batalla particular, el pilotu suecu quedaría per delantre de Wehrlein, que tuvo dellos problemes col coche y nun rodó a bon ritmu.

Haas tuviera una sesión de clasificación bastante decente, pero perdiólo too nos primeros metros del gran premiu: Magnussen chocaba con Vandoorne y quedaba fuera y Grosjean con Ocon, anque pudo continuar. Ensin embargu, el francés diba ser penalizáu con diez segundos, dalgo que nun alteró muncho la so posición que yá yera últimu. Anque siguen teniendo oportunidaes d’adelantar a los dos equipos que tienen per delantre, namás una bona carrera con un bon puñáu de puntos pue ayudalos y viendo lo visto en Brasil, nun tenemos claro que vaigan ser quien a ello.

La última carrera de la temporada va ser Abu Dhabi dientro dos selmanes. Demientres llega esa fecha, éstos son los númberos que nos dexó’l gran premiu de Brasil 2017:

Clasificación

Carrera