Paez que sorprende qu’a les puertes d’unu de los grandes premios más importantes del calendariu y con too por decidise nel campeonatu de pilotos, se tea falando muncho más de lo que tien pasao fuera y de los movimientos nes escuderíes que del campeonatu y la carrera que tenemos delantre en sí. Pero asina ye a vegaes la Fórmula Uno.
El casu ye qu’aterrizamos en Brasil, penúltima carrera del campeonatu, una de les grandes, símbolu del deporte del motor ya escenariu de grandes carreres que decidieron campeonatos. Pue ser, de fechu, que la d’esti domingu seya otra d’elles, anque col bon momentu de forma nel que llega Hamilton, too paez albidrar que vamos dir cola dulda hasta Abu Dabi.
Fuera de pista, esti par de selmanes falóse muncho de Vettel y lo que fexo ya dixo en México, de Verstappen y la so forma de plantase en pista, de la marcha de Magnussen de Renault a Haas, de que Palmer queda en Renault, de qu’Ocon va movese a Force India y de los pilotos de Williams pa 2017. Como siempres, los diarios especializaos en motor enllenen páxines y ringleres con información de fuera de pista, anque, como nesti casu, entá nun sepiamos quien va ser el nuevu campeón del mundu.
Nun hai motivos pa creyer que Hamilton nun vaiga ganar otra vegada, pero tampoco pa pensar que Rosberg nun va intentalo. El fechu de qu’al alemán-y valga ser segundu nes dos carreres que queden pa ganar pue ser sinónimu de dir a conservar y conformase con ser segundu, anque tol mundu sabe qu’eso de ser segundu nun entra nel vocabulariu de los pilotos.
Con un escenariu tan cambiante y prestosu como ye la pista d’Interlagos, sólo queda espera que la del domingu seya una carrera que nos faga alcordanos de por qué siguimos esti deporte.
Embaxo podéis atopar información sobre les gomes que van usase nesti gran premiu y equí tenéis tolo que hai que saber sobre Interlagos.
