Si lleistis el nuestru artículu sobre la carrera en Brasil, yá tendréis una idea de lo que dio de sí, pero agora queremos paranos a analizar lo que fexo cada equipu porque nun fueron flores pa toos ellos:
– Mercedes: Rosberg sigui na dinámica de “quedar segundu valme” y anque lu vimos sufrir con Verstappen y, de fecho, ser pasáu por elli, otra vuelta más fexo los deberes. Hamilton foi dueñu ya señor de la carrera (con permisu del agua) y en toles vegaes nes que se rellanzó la carrera, llogró dexar clavaos a los sos persiguidores. Les victories que sigui acumulando paecen saber a pocu cuando la distancia con Rosberg ye entá de catorce puntos y tamos llegando a la última carrera del añu.
– Red Bull: esti fin de selmana tien un nome propiu y esi ye Max Verstappen. Tenémoslu cuestionao nesti blogue por considerar qu’a vegaes el so ímpetu ta lloñe de ser encamentable en pista, pero la verdá ye que fexo un carrerón esti domingu pasáu, non solo poniendo n’aprietu a Rosberg, sinon faciendo valer la estratexa d’última hora p’algamar el podiu que tol mundu daba por perdíu pa elli. Ricciardo sufrió milenta vegaes más, y namás pudo ser octavu. Red Bull convirtióse oficialmente nesti gran premiu nel segundu clasificáu del mundial de constructores.
– Force India: nun hai duldes que, con condiciones cambiantes, los Force India van tar ehí, non sólo pol coche si non polos dos pilotos que tienen. Sergio Pérez féxose col cuartu llugar dempués d’una carrera ensin más errores que los normales al tar conduciendo n’agua, y Hülkenberg quedó séptimu y tuvo la suerte de nun dañar de más el morru del so coche al topase con restos del Ferrari de Kimi. Yá casi tienen nes sos manes el cuartu puestu del mundial de constructores.
– Ferrari: anque nun foi una mala carrera pa Vettel teniendo en cuenta les condiciones en pista, quedar quintu nun debiera ser una alegría pal equipu italianu. Muncho menos quedase fuera, como-y pasó a Kimi Räikkönen dempués de perder el control del Ferrari lo que fexo que s’estrellare na recta de meta. La suerte foi que tolos pilotos que viníen detrás d’elli tuvieron los reflexos a punto pa esquivalu ya evitar un mal mayor.
– Toro Rosso: ta claro, y dende yá va tiempu, que’l pilotu nel que se pue enfotar Toro Rosso ye Carlos Sáinz. Otra vez en condiciones meteorolóxiques complicaes diolo too y foi quién a terminar sextu. Ye verdá que Kvyat tuvo un choque, ensin culpa d’elli, con Palmer que lu llevó per delantre por falta visibilidá, pero nun dexamos de tener que buscar escuses pal pilotu rusu dende va meses.
– Sauber: dempués de diecinueve carreres, Sauber algamó’l so oxetivu, consiguiendo puntuar de la mano de Nasr (en casa) que consiguió ser novenu. Nun se-y pue negar al pilotu brasileñu la bona carrera que fexo, xugando perbien les sos cartes y aprovechándose de que n’agua toles diferencies s’igüen un pocu. Ericsson nun tuvo tanta suerte y acabó estrellándose a la altura de la entrada al pitlane, quedando fuera. Gracies a los dos puntos de Nasr, Sauber pasa a Manor nel mundial de constructores.
– McLaren: premiu de consolación pa la escudería, que consiguió sumar un puntu con Alonso. Pesie a tener dos de los pilotos más capaces n’agua, lo cierto ye que pa Button foi más una tortura qu’un gran premiu que disfrutare. De fechu, namás pudo ser últimu. El so compañeru d’equipu, anque décimu, tampoco nun tuvo un gran premiu pa esfrutar.
La escudería ta amás nel puntu mira dempués de que s’anunciare que Ron Dennis va dexar el so sitiu nel equipu. La batalla que llevaba hai tiempu lluchando pa conservar el so poder na escudería terminó cola so salida. Queda ver qué movimientos van producise nes selmanes qu’entren y nun podemos dexar d’entruganos de qué manera afeuta esto al contratu a tres firmáu colos pilotos pa 2017-2018.
– Williams: quedaron a les puertes de los puntos con Bottas y foi gracies a Massa que vivimos unu de los momentos más emocionantes de la hestoria recién de la F1: el fechu de correr per última vegada en casa y de terminar esti gran premiu con un accidente que lu dexaba fuera, fexo que fuéremos testigos del amor del públicu brasileñu pol so pilotu y d’una despedida cola que munchos pilotos suañen. Esi momentu nun va devolve-yos los puntos perdíos, pero ta claro que foi dalgo bien prestoso de ver. Ye obvio que’l públicu va echar de menos a Felipe Massa.
– Manor: demientres bona parte de la carrera, cuntábamos con ver un Manor otra vuelta nos puntos (de fechu, n’un momentu dambos lo tuvieron) pero nos últimos momentos del gran premiu esa certeza desapaeció. Ocon nun consiguía frenar nin a Alonso nin a Bottas, que lu pasaben a falta de bien poco pa terminar, faciendo esfumase la oportunidá de Manor de sumar otru puntu y d’Ocon de puntuar per primer vegada na Fórmula Uno. L’amargor vieno de la mano del novenu puestu de Nasr, que fai que Sauber tea agora un puntu perriba Manor dempués de más de la mitá del campeonatu col suañu de ser décimos.
– Renault: nun foi un gran premiu bonu pa la escudería francesa: Palmer nun calculó bien la distancia con Kvyat, un pocu enantes del accidente de Räikkönen y llevo per delantre a Kvyat, que sí pudo acabar. Magnussen tampoco nun tuvo brillante nin aprovechó les circunstancies, y namás foi décimocuartu.
– Haas: el desastre cebóse colos pilotos de Haas. Primero con Grosjean que nin siquiera pudo empezar el gran premiu por tener un accidente na vuelta de reconocimientu. Dempués, con Gutiérrez que tuvo de retirar el coche por problemes lletrónicos nel coche. El mexicanu nun foi quién a controlar la so frustración y víemoslu tener dalgo bronca dientro los boxes con Guenther Steiner, jefe de Haas. Situaciones como estes nun ayuden a la imaxe de Gutiérrez, del que yá sabemos que va tar fuera del equipu en 2017 y busca sitiu n’otru.
Prósima parada (ya última…) Abu Dhabi dientro de menos de dos selmanes.