Gran Premiu de Bélxica 2023

El gran premiu de Bélxica 2023 nun dexó muncha emoción pero sí munchu estrés pa equipos y pilotos que tuvieron de véseles col agua, les condiciones cambiantes y una pista mui desixente pa les gomes.

Teníemos el vezu de que Spa fuera’l primer gran premiu de la vuelta de les vacaciones, o lo que ye lo mesmo, de que se corriera n’agostu. Pero los recientes cambios nel calendariu, con más carreres, fuerciaron que Bélxica pasara a ser la última carrera enantes del parón, ello ye, a últimos de xunetu. Pa les que tamos avezaes a qu’orbaye nesti mes como si fuere ochobre, nun foi mui sorprendente alborecer col agua en Spa, un territorio mui húmedu, mui de ñube y con munchu verde. Sí foi estresante pa los equipos que dende bien ceo tuvieron de tomar decisiones pa tentar d’abordar les condiciones de la meyor manera posible, sobre manera cuntando con que tábemos en fin de selmana de carrera al sprint.

VIENRES

CLASIFICACIÓN

El vienres, los equipos tuvieron d’afrontar una sesión de clasificación ensin casi rodar en pista por cuenta l’agua que torgó los únicos entrenamientos llibres del fin de selmana. Esto añadía incertidume a les estratexes anque casi asegura que les gomes tiníen que ser intermedies porque la pista asina lo pidía. Pelo cimero nun hebo sorpreses, con Verstappen lliderando ya’l podiu completáu por Charles Leclerc y Sergio Pérez. Sicasí, Verstappen partía’l domingu dende la sexta posición por cuenta’l cambiu de caxa de cambios que vos comentemos na previa y que lu penalizó con cinco posiciones en parriella. Yera una torga pa la carrera del holandés pero nada que nun fuera capaz a solventar como veremos más alantre.

Nun hebo grandes sorpreses nesta sesión de clasificación. Bon rendimientu de Tsunoda con respeutu a Ricciardo. Paez que’l xaponés ta dispuestu a contradicir los comentarios que lu coloquen per detrás del so nuevu compañeru d’equipu y a confirmar que nun taba per delantre de de Vries namás por que l’holandés tinía un rendimientu mui baxu. La clasificación foi deceicionante tamién p’Alpine depués de convertise n’oxetu de comentariu perdayuri pola confirmación de que Otmar Szafnauer y Alan Permane diben dexar l’equipu n’acabando’l gran premiu de Bélxica.

SÁBADU

CLASIFICACIÓN PA LA CARRERA AL SPRINT

La clasificación del sábadu si dexó dalguna sorpresa más, como’l segundu puestu d’Oscar Piastri, que tuvo un pasín per delantre de Norris tol fin de selmana pesie a nun obtener el meyor resultáu’l domingu, ya’l terceru de Carlos Sáinz. La pista a la que s’enfretaron los pilotos taba moyada pero secando con relativa velocidá. L’únicu que decidió arriesgase a montar gomes de seco pa probar la so suerte ya tentar d’entrar en Q3 foi Lance Stroll, qu’acabó contra la muria y tamién cola clasificación del so compañeru d’equipu, Fernando Alonso. L’asturianu taba décimoquintu, ensin tiempu, nesi momentu y como l’accidente de Stroll provocó una bandera colorada y namás quedaben trenta segundos de tiempu pa rematar la sesión, les coses quedaron como taben. Señalar tamién la mala xestión del tiempu, y del gatu, del equipu Haas con Nico Hülkenberg que lu dexó ensin tiempu pa facer una vuelta curiosa y metese na Q2 Sí foi un bon sábadu de clasificación p’Alpine, con dambos pilotos entrando na Q3. McLaren, aparte del segundu puestu de Piastri, tendría a Norris en P5. La pole, como davezu esta temporada, foi pa Max Verstappen.

CARRERA AL SPRINT

La carrera al sprint sufrió dellos retrasos por cuenta l’agua y entamó dafechu col coche de seguridá y tolos equipos con ruedes de moyao. Sicasí, dende que’l coche de seguridá marchó, munchos pilotos entraron a quitar les gomes d’agua pa montar les de seco, casu de Piastri, que nun foi quien a pasar a Verstappen na salida pero sí se colocó primeru cuando ésti entro, na segunda vuelta, a quitar les sos gomes. Sicasí, el ritmu del holandés yera demasiao pal McLaren y nun tardó en recuperar la posición que nun diba abandonar yá hasta’l final. Pierre Gasly ocupó’l tercer caxón del podiu del sábadu, atropando una bona y necesaria cantidá de puntos pal equipu. Ocon foi novenu, pero nun sumó puntos. Nel apartáu d’abandonos tenemos a Alonso, que nun error metió la rueda na zona moyada, perdió’l coche y acabó na graviella ensin posibilidá de sacar el coche. Tamién abandonó Sergio Pérez que nun lance con Lewis Hamilton sufrió daños nel coche y tuvo de retirase. L’inglés foi penalizáu con cinco segundos que lu baxaron del cuartu al sétimu llugar y ayudó a subir un puestu a Sáinz, qu’ocupó la cuarta posición, a Leclerc, que foi quintu y a Norris que foi sextu. Russell nun pudo beneficiase por pocu y acabó xusto detrás de Hamilton. Tsunoda nesta carrera quedó mui per detrás de Ricciardo qu’entró ente los diez primeros, pero ensin puntos.

DOMINGU

GRAN PREMIU

El domingu, yá ensin agua, la decisión de los equipos tuvo ente partir con gomes blandes o medies. Gran parte usaron goma blando pa empezar la carrera mientres qu’otros, como Lando Norris, escoyeron el mediu. Foi una mala decisión pal pilotu inglés que nun foi quien a meter les gomes en temperatura y tornose nun enemigu fácil pa tolos sos rivales que viníen per detrás. Fizo una primer parada pa montar gomes dures, que tovía fueron dalgo pior que les medies y a la fin, con más de la mitá de la carrera entá por disputase, montó les gomes blandes pal períodu final que funcionaron y lu permitieron esguilar a la sétima posición. Menos suerte tuvo’l so compañeru d’equipu, Oscar Piastri, que partía segundu y que na primer curva tuvo un accidente con Carlos Sáinz nel que’l madrilanu nun dexó suficiente espaciu al australianu al vese presionáu por Hamilton pela izquierda y acabó cola carrera de dambos. Piastri retiraríase al pocu, Sáinz aguantó dalgo más en pista pero acabó retirándose tamién.

Nun foi una carrera de munchu espectáculu pero sí de xestión de gomes ya estratexa. Bon rendimientu d’Alpine, que paez que despertaron depués del vienres tan negativu. Ocon tuvo a piques d’alcanzar a Norris pa ser sétimu pero faltó-y tiempu, mientres que Gasly quedó a les puertes de los puntos, pero tinía muncha meyor pinta que lo que vimos n’otres ocasiones y xestionó mui bien les sos gomes sobre too na primer parte de la carrera. Tsunoda sumó un puntu vital na so llucha por salir del fondu de la clasificación dexando a Ricciardo per detrás nel puestu dieciséis.

N’otra amuesa de bona xestión de gomes, los Mercedes sacaron mui bon partíu a les sos elleiciones, sobre too nel casu de George Russell, que yá nos tien avezaos a sacar el másimu a les gomes en cada carrera. Quintu puestu mui peleáu d’Alonso. Los Aston Martin nun acaben de despertar o a lo menos de recuperar la forma qu’amosaron al entamar la temporada y que-yos dio tantos podios. Alonso foi quintu pero nun foi un quintu cenciellu y tuvo de batallar muncho pa consiguilu. Stroll acabó novenu.

Alfa Romeo nun tuvo una mala carrera pero sigui ensin averase a los puntos y si AlphaTauri entama a sumar, pueden vese apuraos. Podríemos dicir lo mesmo de Williams, anque nesti gran premiu tuvieron per detrás d’Alfa, asomeyaben tener un meyor rendimientu, anque nun tuvieron suerte coles paraes nin la xestión de gomes. Amás, Sargeant recibió una penalización de cinco segundos por superar el llímite de velocidá nel carril de pit. Los dos pilotos de Haas tuvieron práuticamente desapaecíos tol fin de selmana, nin siquier Hülkenberg fizo dalgo curioso nes sesiones de clasificación. Mal fin de selmana pa ellos.

Nel podiu, Max Verstappen que dominó’l gran premiu de principiu a fin, como davezu; Sergio Pérez que recuperó depués d’una clasificación un tanto floxa anque non desastrosa como otres, y Charles Leclerc, contentu por rematar la primer parte de la temporada con un bon resultáu tan necesariu pa él y pal equipu.

Asina pues la F1 toma unes selmanes de descansu enantes de volver a la aición a finales d’agostu nel circuitu de Zandvoort, en Países Baxos. Demientres llega esi día, equí vos dexamos los númberos del fin de selmana y vos diremos actualizando, como ye vezu, la silly season de la temporada. Tai sollertes.