Gran Premiu de Baḥréin 2023

Y a la fin s’apagaron les lluces del semáforu y entamó la temporada 2023. El primer gran premiu de la temporada 2023 yá ye historia y equí tamos pa repasar los momentos más importantes d’esti gran premiu y del fin de selmana.

El vienres nel circuitu de Sakhir foi realmente un cuartu día de test, nel que los equipos aprovecharon pa pulir delles coses pendientes depués de los tres díes d’entrenamientos de la selmana pasada. Yá pudimos dir viendo si lo que vimos esos tres díes yera lo qu’había o si los equipos guardaben dalgo. Mercedes, por exemplu, tinía daqué más de velocidá escondida qu’anque nun valió pa lliderar un gran premiu sí que valió pa tenelos en cuenta pal podiu. McLaren tamién dexó claro que tien muncho que llaborar si quier ponese al altor del resto. O Williams que sí paez que dio un pasu alantre en rendimientu y posibilidaes. Y por supuesto, Aston Martin, que confirmaron que lo que vimos en pista los díes de test nun yera una ilusión: ye verdá qu’esti añu tienen un coche competitivu.

CLASIFICACIÓN

El sábadu, la sesión de clasificación foi interesante y casi nos dio la sensación de que quiciás Red Bull nun taba tan lloñe como pensábemos. La pole foi pa Verstappen, segundu foi Pérez y terceru Leclerc. El monegascu tuvo un bon rendimientu’l sábadu, pero quiso dar prioridá a la carrera y a falta de cuatro minutos pa terminar la Q3 se baxó del coche, renunciando a tentar de facer una pole. Carlos Sáinz nun pudo aprovechar esa oportunidá pa colocase per delantre d’él o incluso na pole, y quedó cuartu siguíu de Fernando Alonso en quintu llugar. Deceición de Piastri que nun pasó a Q2 cuando Norris foi quien a clasificar na posición once. Tamién deceición de Pierre Gasly que quedó fuera en Q1 cuando Ocon acabó ente los diez primeros. Hai que rescamplar la posición de Nico Hülkenberg el sábadu, metiéndose en Q3 y clasificando nel puestu décimu cuando Magnussen nun pasó de Q1. Los dos Mercedes, Russell per delantre de Hamilton, clasificaron ente los dos Aston Martin, yá que Lance Stroll pudo ser octavu. Nun escazáis que’l canadiense competía operáu recién de la moñeca drecha y ensin tener participao nes sesiones de test.

GRAN PREMIU

El domingu había munches ganes de ver si se confirmaben les alarmes sobre la superioridá de Red Bull y la rempuesta ye que sí. Nun tardó muncho n’escapase Max Verstappen, hasta del so compañeru Sergio Pérez, que tuvo una mala salida y perdió posiciones que llueu tuvo de recuperar. L’únicu que tuvo más averáu a ellos foi Charles Leclerc, que fizo una bona salida pero al que, otra vuelta, la fiabilidá de Ferrari traicionaría. Sáinz tuvo a piques de pasar a Pérez na salida y Fernando Alonso perdió posiciones colos Mercedes. Per detrás, salida limpia de tolos pilotos, ensin incidentes grandes sacante’l toque ente Ocon y Hülkenberg, qu’al tiempu acabó condicionando la carrera del alemán. Sacante esto, l’únicu incidente nos primeros metros foi el toque ente Stroll y Alonso. El canadiense diba tentando d’adelantar a Russell, que taba per detrás de Hamilton, tardó en frenar y chocó contra’l so compañeru d’equipu, pero ensin consecuencies pa nengún de los dos.

Les vueltes siguientes hasta les primeres paraes, casi tola aición tuvo centrada na pelea d’Alonso por pasar al Mercedes de Russell, al qu l’asturianu terminó pasando. Munchos equipos optaren por entamar la carrera con gomes blandes y alrodiu la vuelta trece dalgunos d’ellos, por exemplu Lewis Hamilton, Logan Sargeant, Esteban Ocon o Zhou Guanyu, pararon pa camudales nos más de los casos poles gomes dures. Namás Magnussen montó esti compuestu pa entamar la carrera, tentando de buscar una estratexa estremada del restu. Col pasu del blandu al duru en cásique tolos casos, dellos equipos atoparon el puntu de rendimientu óptimu, como ye’l casu del Aston Martin.

Bottas aprovecharía la batalla ente Russell y Alonso pa ponese per delantre d’ellos na parada, pero pronto tendría de ceder la posición, anque non ensin dexar claro que l’Alfa Romeo d’esti 2023 ta bien plantáu en pista y ye quien a pelear con otros n’igualdá.

Tou esti tiempu, Verstappen siguía metiendo segundos a Leclerc, que lu seguía en segundu llugar, y a Pérez que tentaba de recuperar la so posición de salida, cosa qu’a la fin consiguió na vuelta ventiséis. Dende esti momentu, la brecha ente los Red Bull ya’l restu d’equipos foi enanchándose y anque Leclerc nunca nun s’alloñó muncho, ye verdá que la superioridá del equipu de Milton Keynes yera más qu’evidente.

La parte quiciás más interesante de la carrera protagonizáronla Alonso y Hamilton na so pelea pol quintu llugar qu’ocupaba l’inglés na vuelta treinta y siete. Pesie a que Hamilton vendió cara la posición, la velocidá del Aston Martin yera mui superior, y Alonso acabó faciéndose con esi quintu llugar con rumbu al cuartu qu’ocupaba’l Ferrari de Carlos Sáinz. El pilotu madrilanu tuvo una carrera relativamente tranquila hasta qu’Alonso llegó al so altor y lu acabó adelantando na vuelta cuarenta y seis, dalgo que pasaría depués del abandonu de Leclerc na vuelta cuarenta y ún. El pilotu monegascu yá cambiara dellos elementos de la batería enantes del gran premiu por precaución, pero’l coche acabó quedando ensin potencia y aparcáu nun llau de la pista provocando un coche de seguridá virtual.

Les últimes vueltes fueron más tranquiles, con cásique tolos puestos d’arriba decidíos y delles batalles pola zona templada. Hai que rescamplar l’actuación de Gasly, que clasificó novenu depués d’entamar la carrera dende l’últimu puestu. Tamién señalar el puntu de Williams, que sumó con Albon y quedando Sargeant nel puestu doce nel so debú. De fechu, Logan Sargeant foi’l meyor rookie del gran premiu. Nyck De Vries quedó nel puestu catorce, per detrá del so compañeru d’equipu y Oscar Piastri tuvo d’abandonar por un problema lletrónicu. La carrera de McLaren en xeneral foi bastante deceicionante pese al puestu once de Norris el sábadu. En nengún momentu l’inglés tuvo oportunidaes reales siquiera de pensar en puntuar y acabó zarrando la clasificación de carrera.

Nun lo tuvieron muncho meyor en Haas. Hülkenberg tuvo una bona actuación el sábadu pero too desapaeció’l domingu tres los problemas derivaos del toque con Ocon. Magnussen quedó per delantre d’él, pero fuera de los puntos y mui lloñe del resultáu deseyáu. Ocon foi otru qu’abandonó y foi protagonista de carrera por recibir hasta tres sanciones de tiempu. La xestión de les mesmes per parte d’Alpine ya’l pilotu foi deficiente y acabó condergáu a lo fondero de la clasificación y al final al abandonu.

Equí vos dexamos la información del resultáu de la carrera. En dos selmanes torna la F1, nel circuitu de Xida, un trazáu estremáu al de Sakhir, más reviráu y que probablemente nos aclare un pocu más au tán los equipos.