Gran Premiu d’Austria 2023

La F1 tien coses mui bones y mueve munches persones en tol globu. Pero a vegaes enriédase nos sos propios reglamentos y acaba tornando una carrera interesante nuna socesión de penalizaciones qu’asolombren tolo bono que pudimos ver en pista.

Ye d’entender que los comisarios nes carreres quieran que los pilotos seyan respetuosos colos llímites en pista y que, como se fai en dellos circuitos, haiga penalizaciones si dalguién nun cumple. Otra cosa ye tornar un gran premiu nun esperpentu de penalizaciones que tiníen a fans, equipos ya pilotos esperando por decisiones de comisarios sobre si una vuelta val o nun val.

N’Austria hai dos puntos específicos, les curves nueve y diez, nos que los pilotos, si se salen, ganen ventaya. Son dos puntos marcaos en colorao polos comisarios y podríemos dicir que con razón porque cásique tolos pilotos en dalgún momentu acaben pasando la raya blanca reglamentaria coles cuatro ruedes. Nun fin de selmana nel que sólo una sesión ye de llibres y toles otres impliquen vueltes cronometraes más o menos importantes, vos podéis imaxinar la relevancia que tien el salise o non y una penalización. Que-yos lo digan a Sergio Pérez o a Lewis Hamilton.

VIENRES

La sesión de clasificación del vienres decidía la parriella del gran premiu del domingu y anque nun tuvimos novedá na pole, sí que tuvimos delles sorpreses. En primer llugar, la de los dos Ferrari acompañando a Verstappen nel podiu de la clasificación. L’equipu italianu trayía meyores a Austria y confirmose que funcionen en dambos pilotos. Había tiempu que nun los víemos a dambos con confianza al volante y siendo quien a competir n’igualdá colos equipos cimeros. Sicasí, nun foi suficiente pa evitar que Verstappen tornara a facese con otru primer puestu. Otra de les sorpreses foi Sergio Pérez. El mexicanu quedó elimináu na Q2 y tuvo de salir décimoquintu porque, depués de facer una vuelta que-y valió’l segundu llugar y, poro, el pasu a la Q3, ésta foi eliminada por llímites de pista. La gran torga pa los pilotos nesti circuitu yera que, en casu de salise, non sólo quedaben ensin la vuelta fecha fuera de los límites si non tamién la siguiente, porque s’entendía qu’aprovechaben el xiru de la 10 pa garrar puxu na siguiente vuelta. Ello ye que Checo viose ensin vuelta y ensin tiempu pa facer otra que lu metiera na Q3.

Sobre too nes dos primeres sesiones, vimos una montonera de vueltes eliminaes por llímites de pista, dalgo que dexó de pasar na Q3, suponemos tamién porque los pilotos pasaron a tener dalgo más d’espacio, menos tráfico y menos falta d’apretar en ciertes partes por tar la pista más lliberada.

Rescampla tamién el cuartu puestu de Norris, que confirmó que les meyores de McLaren son un pasu alantre mui importante. Hai que destacar tamién que, otra vuelta, Nico Hülkenberg entró ente los diez primeros y ye bona pena que l’equipu nun tea pudiendo o sabiendo aprovechar lo bien que-yos suel dir de sábadu, sobre manera al alemán, pa treslladalo a carrera.

SÁBADU

La sesión de clasificación pa la carrera al sprint nun dexó sorpresa na pole, otra vuelta pa Verstappen, pero sí permitió a Sergio Pérez desquitase de lo que viviera na clasificación del vienres y a Lando Norris confirmar que’l so puestu nesa clasificación nun fuera un espeyismu. Aston Martin tuvieron bastante desapaecíos tol fin de selmana. Stroll tuvo per delantre d’Alonso na clasificación del vienres, dalgo que nun suel ser vezu, pero na del sprint l’asturianu quedaría per delantre, pero nun discretu sétimu puestu.

Insistimos otra vuelta col papel de Hülkenberg que clasificó cuartu, esta vegada acompañáu de Magnussen nel décimu llugar y confirmando lo que tamos acabantes de dicir del equipu Haas. Les sos sesiones de clasificación tán siendo bastante meyores que les carreres y aparte Austria ye un circuitu que se-yos da bien a los dos pilotos.

Si’l vienres los llímites de pista dexaran fuera de la Q3 a Sergio Pérez, el sábadu el mayor perxudicáu por esto foi Lewis Hamilton que nin siquier pasó de la Q1 depués de que-y anularan la so vuelta “bona” y quedase ensin tiempu pa facer otra. Nun foi’l sábadu de Mercedes na clasificación yá que Russell nun diba pasar a Q3 y diba salir nel puestu 15 por cuenta d’un problema hidráulicu que l’equipu foi quien a solventar enantes de la carrera.

Na memoria coleutiva de la F1 les carreres al sprint suelen quedase no más alloñao de les bones alcordances por nun suponer un espectáculu interesante. Sicasí, hai una esceición que ye Interlagos 2022 a la qu’agora sumamos Austria 2023. Con unes condiciones cambiantes y l’agua dexando’l trazáu como una pista de patinaxe entamó la segunda carrera al sprint de la temporada. Norris pronto perdió posiciones al quedar atrapáu nuna llucha ente Sergio Pérez y Max Verstappen na que’l mexicanu llegó a adelantar y ponese per delantre del so compañeru d’equipu con intercambiu de maniobres delicaes ente dambos. Sicasí, l’holandés diba imponese y yá nun abandonaría’l primer puestu hasta ver la bandera a cuadros.

A partir d’esti momentu y sacante dellos intentos d’adelantar que col DRS paecíen imposibles foron pasando les vueltes hasta que, nun tardando muncho, los pilotos fueron viendo que la pista se taba secando y que les gomes intermedies coles que salieran yá nun yeren la meyor opción. Recordamos que la carrera al sprint da puntos a los primeros ocho clasificaos polo qu’había pilotos fuera d’esos puestos que decidieron arriesgase a montar gomes de seco ensin nada que perder y muncho que ganar si éstes entamaben a funcionar meyor que les intermedies. Russell foi’l primeru y depués d’él un bon númberu de pilotos, como por exemplu Hülkenberg que partía cuartu pero foi perdiendo posiciones por cuenta la mala xestión de les gomes. Otros decidieron nun parar y aguantar, como ye’l casu de Norris, que recuperara puestos gracies a les paraes de los que taben per delantre y que rodaba nos puntos a falta de dos vueltes pero que pocu a pocu vio como la distancia colos que viníen con gomes de secu desapaecía y acabó siendo novenu. Los pilotos de lo más alto nun tuvieron problema pa llegar al final colos intermedios y gracies a la duración curtia del eventu, si non tamos seguros que’l cambiu tuviera sío xeneral.

Al final, podiu pa dambos Red Bull y pa Sáinz, que tol fin de selmana tuvo un rendimientu altu y dalgo perriba del so compañeru d’equipu, que partía novenu por penalización al estorbar a Piastri na clasificación y namás pudo ser décimosegundu.

DOMINGU

El domingu la victoria tornó a ser pa Max Verstappen, qu’otra vuelta tuvo de defender la so posición pero qu’en nengún momentu la vio en peligru y yá supera a Ayrton Senna en númberu de victories. Charles Leclerc lu acompañó nel podiu depués de que l’equipu Ferrari decidiera priorizalu a él en cuenta d’a Carlos Sáinz que rodaba con munchu meyor ritmu pero que recibió delles penalizaciones, una d’elles cuando yá terminara la carrera, por llímites de pista. El madrilanu solicitó que lu dexaran pasar, pero l’equipu prefierió caltener l’orde ya’l monegascu ocupó’l segundu caxón del podiu per delantre de Sergio Pérez que foi protagonista d’una gran remontada dende’l puestu quince que yá nos recuerda más a lo que nos suel tener avezaes.

Foi una carrera en seco coles gomes dures y medies como principales. Tuvimos batalles por posición bien interesantes en tolos puntos de la carrera y en cásique toles posiciones, pero tamién tuvimos un númberu innecesariu de penalizaciones que condicionaron enforma la carrera ya’l posterior resultáu. Val dicir que los dos únicos pilotos que nunca nun recibieron avisu por llímites de pista fueron Alonso y Russell. De fechu, n’acabando la carrera, dellos pilotos tovía recibieron penalización por una revisión de vueltes que solicitó Aston Martin y que foi la ruina pa Sáinz, que yá sirviera una penalización y sumó otra, pasando asina de ser cuartu a quedar sextu, per detrás d’Alonso y Norris, qu’acabó siendo cuartu. Tamién recibió una penalización en pista ya otra a posteriori Lewis Hamilton, qu’acabó octavu. Foi un fin de selmana complicáu pa los Mercedes nel que nun brillaron especialmente.

Pero si falamos de penalizaciones, abúltanos que’l protagonista dafechu ye Esteban Ocon que recibió una en pista y otres cuatro depués. A la fin, tolo visto en carrera de les batalles por posición y los intentos d’adelantamiento quedaron cásique nun segundu planu a cuenta de toles xestiones posteriores y les penalizaciones impuestes depués de que la carrera yá terminase.

L’únicu abandonu de carrera foi Nico Hülkenberg. Foi un domingu mui negativu pa Haas, porque Magnussen tampocu nun pudo acabar la carrera más que décimoctavu. AlphaTauri nun lo fizo muncho meyor y los sos pilotos tamién acabaron bien abaxo, Tsunoda últimu y de Vries decimosétimu. Dambos pilotos tamién recibieron penalizaciones por llímites de pista y Tsunoda amás tuvo un incidente al entamu de la carrera que lu obligó a parar enantes de tiempu y condicionó enforma la so carrera.

Nin Alfa Romeo nin Williams puntuaron nesti gran premiu, anque tuvieron momentos interesantes de batalla en pista. Piastri quedó perdíu neses posiciones más retrasaes, nel puestu dieciséis. La verdá ye que l’australianu tuvo daqué desapaecíu tol fin de selmana anque lu vimos tomando parte d’eses batalles por posición de les que falamos.

Foi una carrera intensa ya interesante que quedó un pocu descafeinada por cuenta les múltiples penalizaciones que nun permitíen enfotase na posición d’un pilotu nin nes batalles que víemos por cuenta de que’l so resultáu podía camudar depués por decisión de los comisarios. Son munches les voces qu’esti fin de selmana comentaron la necesidá de poner solución a esti asuntu que dexa nun segundu planu la competición deportiva qu’a la fin ye lo importante. Los propios comisarios demandaron que se tomen midíes pa solventalo, ente otres coses porque la cantidá imposible de vueltes que tuvieron de revisar ya eliminar fai invidable que pueda poner atención a otros momentos de carrera que seyan más relevantes. Hai quien plantega que se camuden les escapatories por graviella que nun permita l’erru a los pilotos. Lo que queda claro, y más depués d’esti gran premiu, ye que dalgo se tien de facer. Nun creyemos qu’Austria pueda resistir otru añu asina.

Nunos díes tamos yá en Silverstone pal siguiente gran premiu, pero demientres llega’l día, equí vos dexamos tolos númberos del fin de selmana.