Gran Premiu d’Arabia Saudita 2023

El tercer gran premiu d’Arabia Saudita cellebráu en Xida nun va pasar a la historia como’l más interesante o emocionante, pero dexó delles coses que vamos analizar nesta crónica de la carrera.

Yá dende’l vienres Red Bull avisaron de que diben con too y que lo que viéramos en Sakhir hai dos selmanes nun foi casualidá. Les sesiones d’entrenamientu dexaron claro qu’esti circuitu presta a dambos pilotos y qu’entamaron la temporada no cimero y nun tienen pensao baxase d’ehí. El restu d’equipu tentaron d’averase a los dos Red Bull, y demientres tol fin de selmana quedónos claro que’l segundu equipu per detrás d’ellos yera Aston Martin, dalgo que llueu se diba confirmar el sábadu ya’l domingu.

CLASIFICACIÓN

Sergio Pérez tien una bona estadística de poles nel circuitu de Corniche, pero’l sábadu nun cuntábemos tanto con él como con Max Verstappen pa ocupar lo más alto de la parriella de salida. Sicasí, la F1 nunca nun va dexar de sorprendenos, y a pocu d’entamar la sesión de Q2 les esperances del holandés de facese cola pole desapaecieron por cuenta la rotura d’un palier que nun pudo reparase enantes de que terminara’l tiempu de la sesión y cuando Verstappen entá nun marcara un tiempu curiosu. Ello ye que la llucha pola pole quedaba más abierta, anque Pérez llevaba tol fin de selmana con un rendimientu casi a la par del so compañeru. Nun yera un espeyismu. El mexicanu clavó una vuelta con un tiempu al que nin Leclerc nin Alonso pudieron arimase. El monegascu compensó un pocu la so penalización de diez posiciones pal domingu y tendría de salir doce. Como vos comentemos na previa, anque tovía nun yera oficial, sabíase que Leclerc diba facer un tercer cambiu de centralita, dalgo que significa penalización. L’equipu aprovechó pa camudar otros componentes anque éstos ensin sanción dala. Otros pilotos como’l propiu Checo Pérez o Lando Norris, tamién camudaron delles pieces.

Aston Martin llegaba a Xida con poques espeutatives, esperando replicar lo que ficieron hai dos selmanes pero sabiendo qu’esti trazáu nun yera pa ellos tan bonu como’l de Sakhir. Sicasí, Fernando Alonso clasificó terceru, y acabó saliendo segundu pola penalización de Leclerc, y Stroll ocuparía’l sextu llugar (quintu en parriella). Un bon resultáu de sábadu pal equipu de Lawrence Stroll.

Sáinz tuvo daqué desapaecíu, casi diendo al llímite pa entrar na Q2. Abúltanos que’l madrilanu nun tuvo cómodu nel coche en tol fin de selmana. Ésto sumao a la penalización de Leclerc pintaba un cuadru bien pocu agraciáu pa Ferrari’l domingu. Sáinz clasificaría quintu, anque ganaría una posición por cuenta Leclerc. Los Mercedes ficieron una bona sesión de clasificación, con Russell per delantre de Hamilton.

Destacamos tamién el llabor de Piastri que metió’l so McLaren en novenu llugar, mientres que Norris nun pudo nin pasar de la Q1 por un toque cola rueda nel muru del circuitu qu’arruinó la so clasificación. Deceición p’AlphaTauri, con dambos pilotos tamién fuera en Q1 y frustración pa Logan Sargeant por nun ser quién a marcar un tiempu que los comisarios aceutaren.

GRAN PREMIU

Cuando d’un gran premiu se fala más de lo que pasa depués o de les decisiones de comisarios, suel ser sinónimu de que nun hubo muncho que ver en pista. Sedría inxusto dicir que foi un gran premiu aburríu, pero tampocu nun podemos dicir que fuera perinteresante. Con Pérez en la pole y Verstappen nel puestu quince, l’atención taba puesto na salida d’Alonso ya en si podía pasar al mexicanu, que yá sabemos que nun ye’l meyor nes salides, y no que podía facer Verstappen dende la so posición en parriella.

Nun tardamos en confirmar la sospecha: Alonso pasó a Pérez pronto, anque’l mexicanu nun tardó en recuperar la posición. El pilotu asturianu foi quien a aguantar demientres bastante tiempu na primer parte de la carrera, ensin dexar que’l de Red Bull s’escapare, pero pocu a pocu, el ritmu del mexicanu foi imponiéndose. Y ye que si dalgo hai que destacar ye precisamente’l ritmu de Sergio Pérez en carrera, mui superior quiciás a lo qu’esperábemos, tanto nosotros como Verstappen qu’anque nun terminó la carrera mui lloñe d’él y foi quién a remontar posiciones, nun tuvo fácil recortar la distancia. L’holandés tardó bastante en pasar a los coches que tinía delantre, dalgo raro n’él que suel ser de lo que tenten de remontar rápido. Beneficióse d’un coche de seguridá provocáu pol coche de Lance Stroll y que los comisarios sacaron a pista cuando, en verdá, yá nun facía muncha falta. Sicasí, l’holandés tuvo de conformase cola vuelta rápida pa continuar lliderando’l campeonatu por namás un puntu (gracies a esa vuelta rápida) sobre’l so compañeru d’equipu.

Alonso recibió una penalización de cinco segundos por colocar mal el coche na parriella. Les imaxes amosaben que sí, l’asturianu colocara’l coche un cachín fuera del caxetín, polo que nun hebo discusión. Tuvo un rendimientu sólidu, contentu coles gomes y ensin mayor problema ya que la penalización nun condicionó muncho la so carrera porque la sirvió demientres taba’l coche de seguridá en pista. Sicasí, nes últimes vueltes de carrera y con Russell como’l so inmediatu persiguidor, sintimos a Mercedes comunicar al so pilotu que tentara d’acortar distancies col asturianu porque había posibilidaes de penalización pa él. La cosa quedó ehí ensin confirmación oficial de la FIA y de fechu Alonso subió al podiu. Foi demientres les entrevistes que se confirmó qu’había penalización de diez segundos pal asturianu, lo que lu colocaba cuartu, ente los dos Mercedes, pero nun tardaron n’echase atrás cola decisión depués de sintir los argumentos d’Aston Martin. Alonso recibió de vuelta’l so troféu y sumó asina, yá oficialmente, el so centésimu podiu.

Mercedes tuvo una carrera d’altibaxos con Hamilton faciendo una primer parte de la carrera bastante probe y peleando coles gomes, y un Russell tentando d’esguilar posiciones y topándose cola velocidá del Aston Martin. Fálase de que fueron ellos los que reclamaron qu’Aston Martin, demientres Alonso servía la penalización, tocara’l coche, dalgo que nun se puede facer y qu’implica otra penalización y mayor. Ello ye que tuvieron de conformase con quedar a les puertes del podiu pero por delantre de Ferrari, dalgo que, anque nun ye’l so oxetivu principal, sí que val p’animar y xubir la moral del equipu.

Leclerc nun pudo xubir más que cinco posiciones na clasificación y Sáinz, perxudicáu pol coche de seguridá, tuvo bastante con terminar la carrera per delantre del so compañeru d’equipu. Nun foi un bon fin de selmana pa la Scuderia que de xuru tará tascando la tiesta tentando de topar rempuestes al discretu rendimientu de los dos pilotos.

Per detrás, puntuaron los Alpine, con Ocon per delantre de Gasly y Magnussen peleó con Tsunoda l’últimu puntu del gran premiu. AlphaTauri deceicionó tamién el domingu. Abúltanos que De Vries nun acaba d’atopar la tecla col coche. Logan Sargeant tuvo una gran actuación, en batalla con dambos McLaren y siendo al final adelantáu por Piastri pero depués de pelealo. Foi tamién deceicionante l’actuación d’Alfa Romeo. Bottas comentaba por radio que creyía tener problemes nel coche pero l’equipu nun parecía atopalos. Zhou tampocu nun sumó puntos.

Los dos únicos abandonos del gran premiu fueron Lance Stroll y Alexander Albon. El pilotu d’Aston Martin por un fallu nel sistema de recuperación d’enerxía, y Albon por un problema colos frenos.

Equí vos dexamos el resultáu completu de la carrera y ponemos rumbu a Australia pal primer madrugón del añu. El circuitu d’Albert Park va acoyer el tercer gran premiu de la temporada 2023 en dos selmanes y ellí taremos cola previa y la crónica del mesmu.