Llegamos al Gran Premiu de Miami 2025, sesta data del calendariu que llega nun momentu intensu de la temporada nel qu’hai dellos pilotos metios na llucha pol campeonatu col permisu de los que manexen el Mclaren, con Oscar Piastri liderando’l campeonatu tres dos victories siguíes. El fin de selmana foi de formatu sprint, lo que significó una sesión solo de llibres, na que Piastri volvió destacar, siguíu de cerca por Charles Leclerc y Max Verstappen. La sesión viose interrumpida por un accidente de Ollie Bearman, lo que impidió a dellos pilotos completar vueltes con neumáticos blandos polo que llegábemos a la clasificación de sprint con poques pistes de que quien diba siguir a los pilotos papaya nel orde de carrera.
La clasificación pa la sprint vieno cola sorpresa del meyor tiempu d’Antonelli (por llástima nun costará nos rexistros como la so primer pole), superando a los McLaren. La carrera al sprint, marcada por condiciones cambiantes, vio a Lando Norris irguise col trunfu siguíu de Piastri y Hamilton que supo tomar la iniciativa pa poner los slicks, Antonelli perdería les opciones de podium al nun poder realizar la so parada por un reiniciu de carrera peligrosu del coche de Max Verstappen a la hora de salir de boxes (una sanción por ello dexaría últimu al entrar el paquete en filera detrás del safety car a meta). Mientres que Fernando Alonso perdió la oportunidá de sumar el so primer puntu de la temporada por cuenta d’un golpe con Liam Lawson. Asina, la parrilla pa la carrera principal quedó definida con Max Verstappen na pole, siguíu de Norris y Antonelli, prometiendo una carrera emocionante.
La clasificación foi una de les más igualaes de la temporada. Verstappen llogró la so tercer pole del añu con un tiempu de 1:26.204, superando por poques milésimes a Lando Norris y al rookie Andrea Kimi Antonelli que siguía marcando’l ritmu de mercedes nesti eventu. Piastri y Russell completaron el top 5, mientres que Sainz llogró la sesta posición. Los pilotos de Ferrari nun pudieron pasar de la octava y duodécima plaza.
Yá na carrera habría guerra dende les primeres curves que veríen como Vertappen caltendría la posición mientres que se facía Antonelli cola segunda dexando detrás Piastri y cayendo Norris a la sesta posición tres un rueda a rueda con Max Verstappen que quedaría dientro de los incidentes de carrera que se dan na primer vuelta. Doohan tendría d’abandonar tres pinchar le sruedes y romper la suspensión nun golpe con Liam Lawson. Pero nun tardaríen muncho en mostrar los McLaren el so ritmu de carrera superior y dir elimiando a rivales: na vuelta 4 Piastri pasaría a Antonelli y Norris a Albon, que nun se descolgaba de cabeza de carrera tres una más que notable clasificación. Posteriormente sedría Sáinz el que pasaría al so compañeru de Williams al llegar con más ritmu qu’elli. Na sétima vuelta Norris adelantaría a Russell y na novena a Antonelli pa ponese terceru. Piastri llograría la primer posición tres una llucha rueda con rueda de dos vueltes con verstappen na vuelta 13 amagando con pasalu per fuera na primer curva pa metey el coche per dientro mientres el pilotu holandés se pasaba de llargo. Una batalla preciosa pa ver ente los dos pilotos. Pela so parte, Albon recuperaría-y la posición a Sáinz na vuelta 14. El siguiente n’intentar pasar a Verstappen sedría Lando Norris que lo llograría na vuelta 18 tres cásique cuatro vueltes d’intentos nes qu’incluso tendría que devolver la posición nuna ocasión pa evitar una posible sanción por nun dexar l’espaciu suficiente nel adelantamientu. A partir d’equí, los Mclaren taríen nun universu aparte.
La rotura del motor de Ollie Bearman y el virtual safety car que se declaró pa retirar el coche na vuelta trenta abrio una ventana pa entrar en boxes con pérdida reducida de tiempu lo qu’aprovecharíen dalgunos pilotos como George Russel que llograría a ponese terceru col neumáticu mediu tres tener dificultaes nel primer stint pa facer funcionar el coche col neumáticu más duru. El rendimientu extraordinariu de los Williams dexaríalu patente Albon al adelantar na vuelta 31 al Mercedes de Kimi Antonelli. Na vuelta 34 habría otru virtual safety car al tener problemes otru motor Ferrari, esta vez el del Kick Sauber de Bortoleto.
D’esta forma, Piastri llograría la so tercer victoria consecutiva y caltendría la primer plaza nel mundial. Completaríen el podium el so comaperu Lando Norris y Gearoge Russell mientres que verstappen solo llograría ser cuartu. Albon algamaría un meritoriu quintu llugar per delantre d’Antonelli y los dos Ferrari de Leclerc y Hamilton completando los puestos de puntos Sáinz y Tsunoda. Hadjar, Ocon, Gasly y Hulkemberg ocuparíen los puestos siguientes colos Aston Martin de Alonso y Stroll siendo los últimos en ver la bandera a cuadros. Dexámosvos equí l’enllaz a los resultaos mientres esperamos la llegada de los grandes premios europeos cola próxima parada n’Imola en dos selmanes.