Category: Carreres

De xuru que son munchos los qu’al entamu de la temporada 2024 albidraben que díbemos ver más de lo mesmo, una repitición de 2023. De fechu, les primeres carreres de la temporada asina nos lo amosaben. Sicasí, dalgo ta camudando y anque esti fin de selmana’l vencedor ye un vieyu conocíu, les victories yá nun vienen daes.

Les condiciones meteorolóxiques tornaron a ser protagonistes en Canadá como suel ser vezu. Nun fueron condiciones regulares, polo que los equipos tuvieron de tar un pocu a veles vinir, calculando cuando diba llover y cuando non, cuánto tardaba en secar la pista y cuándo montar les gomes más afayadices pa cada momentu. Foi asina dende’l vienres pero mui especialmente’l domingu.

El sábadu la sesión de clasificación dexó claro que Mercedes aterrizaran en Canadá con fuercia y cola capacidá de desafiar el llideralgu de Red Bull, que quedaba fuera de Q1 con Pérez y tinía problemes con Verstappen. Con too y con eso, l’holandés sedría quien a igualar la vuelta de pole de George Russell, que foi primeru na sesión de clasificación porque tamién foi quien primero fizo la vuelta. Los McLaren de Lando Norris y Oscar Piastri escoltaron a los dos pilotos y Ferrari nun pudo nin competir pola pole por quedar fuera de la Q3. D’esta situación aprovecháronse pilotos como Tsunoda y Ricciardo, que metieron los sos coches en bones posiciones de partida pal gran premiu.

El domingu la carrera entamó con agua pero ensin coche de seguridá lo que nos ufrió una salida mui llimpia pero mui tensa onde en verdá pudimos ver les habilidaes de los pilotos pa ser quien a caltener los coches no negro y ensin provocar incidentes. Los dos pilotos de Haas fueron los únicos que montaron gomes de lluvia estremo, y gracies a eso, tando la pista bien moyada al principiu, esguilaron abondes posiciones na clasificación, mientres el restu de pilotos tentaben de facer funcionar bien los intermedios ya esperaben que la pista fuera secando.

Como dicimos, la salida foi llimpia pero tensa y Russell consiguió mantenese primeru pero con muncha presión dende atrás. La so ventaya yera dir llibre de spray que torgara la so visión, como pasaba a los pilotos más abaxo, y durante bien de tiempu puedo lliderar la carrera. Sicasí, per detrás, Verstappen nun lu dexaba escapase mesmo que Norris y Piastri.

Podemos dicir que la carrera acabó ganándola quien menos erros cometió a tolos niveles. Red Bull partía con problemes pero Verstappen tuvo una bona estratexa, paró nel momentu necesariu y anque tuvo dalguna escursión per fuera la pista, nun tuvo munches consecuencies. Ensin embargu, Russell tuvo dellos momentos que lu condergaron a perder primero’l llideralgu y llueu la segunda posición con Verstappen y Norris, y cásique tuvo a piques de nun xubir al podiu. Sicasí, les sensaciones en Mercedes son mui bones. Hamilton nun clasificara especialmente bien el sábadu, pero’l so rendimientu’l domingu foi bastante meyor y acabó cuartu, daqué molestu por nun tener sío quien a xubir al podiu polos erros cometíos.

Tuvimos dos coches de seguridá por dos accidentes: el primeru de Logan Sargeant, que provocó una estampida de pilotos entrando a camudar les gomes intermedies que, cola pista cada vegada más seca taben pidiendo un cambiu. McLaren decidió nun parar a Norris, qu’adelantara en pista a Russell y Verstappen y tinía muncho más ritmu qu’ellos. L’inglés sufrió entós la suerte contrario a la que-y sorriera en Miami. Por cuenta la reduición de velocidá col coche de seguridá, nun pudo abrir más marxe con Verstappen y por cuenta de que la salida de boxes taba entavía mui moyada perdió munchu tiempu que permitió al holandés pasalu.

El segundu coche de seguridá provocolu Alex Albon. El pilotu tailandés tuvo la mala suerte de chocar escontra’l coche de Carlos Sáinz que depués d’un trompu quedó atravesáu na pista. El de Williams tentó d’esquivalu pero nun foi quien y acabó escontra’l muru, provocando’l segundu coche de seguridá. La pista siguía tentando de secar depués de les gotes que tornaran a cayer y obligaran a los pilotos a siguir con gomes intermedies hasta que pocu a pocu fuimos viendo les dures y les medies. Ferrari madrugó demasiao pa monta-yles a Leclerc, que partía con un problema nel coche y nunca nun tuvo posibilidaes reales d’averase al podiu. Depués de ver el resultáu de la so apuesta, l’equipu decidió paralu. Ye’l primer doble abandonu de Ferrari dende 2022. Tamién tuvo d’abandonar Pérez por un accidente nel qu’acabó contra’l muru. El mexicanu ta acabante de firmar una estensión de dos años del so contratu con Red Bull pero de xuru que nun ta contentu col so rendimientu esti fin de selmana.

La emoción caltúvose hasta’l final y, como dicimos, el pilotu que menos erros cometió acabó trunfando. Sicasí, foi una victoria trabayada y emocionante, que nun permitió a naide relaxase nin dar les coses por feches. Xusto lo que la xente pidi que seyan les carreres de F1.

De Canadá volamos a Catalunya pal viniente gran premiu en Montmeló. Mientres llega’l momentu, equí vos dexamos tolos númberos de la carrera del pasáu fin de selmana en Canadá.

Tamos avezaos a que Mónaco nun dea carreres emocionantes y tamién a qu’haiga quien diga que pinta pocu nel calendariu de F1. Sicasí, la verdá ye que nun dexamos d’emocionanos cada vegada que los coches percuerren les cais de Montecarlo y los sábados tán tornándose n’eventos bien interesantes. Ye verdá que sí, que les carreres tán perdiendo ganchu pero, a la fin, el conxuntu sigui pagando la pena.

Y esti sábadu nun foi esceición. Les primeres sorpreses llegaron na Q1 cuando Sergio Pérez y Fernando Alonso quedaron fuera de la siguiente sesión. Anque ye cierto que too ye posible en Mónaco, nun cuntábemos con estes dos sorpreses tan pronto nel fin de selmana. L’equipu Haas clasificó con dambos coches pasando a Q2 pero fueron descalificaos por irregularidaes col so alerón traseru.

Les tres sesiones fueron bien emocionantes y vimos como Albon, Tsunoda y Gasly pasaben a Q3 aprovechando les ausencies del Aston Martin ya’l Red Bull, fechu que’l francés cellebró como una victoria. Ta claro qu’Alpine va progresando nesta temporada pero qu’entavía tienen muncho que trabayar. Leclerc vinía fuerte tol fin de selmana y por eso nun foi sorpresa velu facese cola pole. Tuvo dos sesiones previes bastante más discretes de lo que s’esperaba, de fechu faciendo que la xente se cuestionara si en verdá diba ser capaz de batir a Verstappen (el favoritu equí por defeutu) pero cuando fizo falta’l pilotu monegascu respondió con una gran vuelta que lu colocó no cimero. Acompañáronlu Piastri, que tuvo mui cerca del Ferrari y por Sáinz que remató un sábadu redondu pa la Scuderia. Max Verstappen nun pudo más que ser sextu, per detrás de Lando Norris y George Russell. El pilotu neerlandés nun tuvo cómodu col coche en nengún momentu y anque nunca nun ye sabio descartalu de la pole, esta vegada nun tinía pinta que fuera quien a sacar dalgo bono de la clasificación.

El domingu, la carrera entamó llimpia nos segundos inmediatos a la salida, pero pronto tuvimos bien d’eventos que torgaron el so aniciu. Per un llau, Piastri y Sáinz tuvieron un toque que provocó un problema al pilotu madrilanu dexándolu nel puestu dieciséis y condergando asina la so carrera. Per detrás, na curva 1 Sergio Pérez y los dos Haas tuvieron envueltos nun accidente bastante espectacular nel que los tres pilotos quedaron fuera. Kevin Magnussen tentó de colocase a la derecha del mexicanu, buscando güecu p’adelantar. Nuna maniobra quiciás optimista, provocó que Pérez, que probablemente nun lu vio, perdiera’l coche llevando con él tamién a Nico Hülkenberg. Zhou, que partía últimu, tuvo de negociar el trazáu enllenu de restos del coche de Pérez pa poder alcanzar al grupu. La bandera colorada nun tardó n’apaecer.

Con too y con eso, nun foi esti l’únicu incidente y a la entrada del túnel vimos un choque entre Gasly ya Ocon, compañeros d’equipu n’Alpine, na que’l segundu estranguló al so compañeru contra’l muru provocando que Gasly, al xirar, llevantara’l coche d’Ocon. Esti acabó col coche dañáu, teniendo qu’abandonar y amás con una penalización de cinco posiciones pal viniente gran premiu en Canadá.

Demientres s’arreglaben les valles y s’acondicionaba otra vuelta la pista, los pilotos pararon nel pitlane y se colocaron nel orde nel que diben partir na nueva salida. Sáinz pudo recuperar la so posición porque’l momentu nel que salió la bandera colorada, Zhou nun pasara pola zona de midición y nun se pudo establecer un orde nuevu distintu al de partida.

Depués d’un ratu, el gran premiu de Mónaco entamaba otra vuelta, esta vegada ensin incidentes na salida nin nos metros posteriores. Leclerc diba entós a entamar una carrera de precisión y xestión de gomes que lu diba conducir a la victoria. Con namás una vuelta disputada, los más de los pilotos (sacante Sargeant) montaron gomes nueves, camudando la opción de partida. Los que salíen con medios montaron duros, buscando nun parar más en tola carrera. Foi por eso que fuimos viendo una carrera más bien lenta, con presión pero tamién con muncha xestión y na que pronto s’abrió güecu ente los cuatro primeros ya’l restu.

Les distancies que se fueron abriendo llegaron a permitir paraes de baldre, como ye’l casu de la que ficieron Hamilton ya inmediatamente depués Verstappen. El neerlandés foi quién a pasar a Hamilton gracies a una parada rápida y púnxose a la caza de Russell, que nun cuntaba parar y que diba con gomes medies muncho más vieyes y medies, qu’en teoría nun deberíen aguantar hasta’l final. Pero la bona xestión demientres la primer parte de la carrera del pilotu británicu tuvo de resultáu que Verstappen nun fuera quien a pasalu, por más que tuviera más velocidá y gomes más nueves. Per detrás, Hamilton foi averándose, anque tampocu nun foi quien a pasar al pilotu Red Bull.

Pelo cimero, Leclerc nunca nun vio amenaciada la so victoria, gracies a una bona estratexa y xestión de gomes. Ente Piastri, Sáinz y Norris sí qu’hebo más emoción, pero a la fin, les posiciones de partida foi les que quedaron. Per detrás de Hamilton, que foi sétimu, quedó Tsunoda, que suma y sigui dexando cada vegada más n’evidencia a Daniel Ricciardo; Alex Albon que suma los dos primeros puntos de Williams y Gasly, que sumó ún. Queda Sauber zarrando la clasificación de constructores ensin sumar nengún entavía.

Alonso tuvo a piques d’entrar ente los diez primeros, dalgo que tuviera sío bien meritorio teniendo en cuenta la so posición de partida. Bona parte de la carrera dedicola l’asturianu a ayudar a Stroll a metese en puntos, pero depués d’un pinchazu del canadiense, Alonso entamó a facer la so carrera aprovechando la cayida de dellos pilotos na clasificación.

Ricciardo quedó xusto per detrás, siguíu de Bottas, Stroll y Sargeant. Zarró la clasificación Zhou certificando que Sauber son agora mesmo l’equipu más floxu de la parriella.

Yá son tres los pilotos distintos a Max Verstappen que consiguien ganar un gran premiu esta temporada, dalgo qu’al entamar 2024 abultaba imposible d’imaxinar. Ta claro que’l pasu alantre de Ferrari y McLaren ye evidente y que Red Bull esti añu nun atopó la fórmula máxica del añu pasáu. Sicasí, tanto Verstappen como l’equipu son llíderes en dambos campeonatos. Eso sí, les distancies cada vegada son más curties.

Dexamos Mónaco pa poner rumbu a Canadá ya’l viniente gran premiu. Eso va ser en dos selmanes. Mientres llega’l fin de selmana, equí podéis consultar tolos númberos que nos dexó’l gran premiu nes cais de Montecarlo.

Si echamos la vista atrás al entamu la temporada, vamos alcordanos de como, en viendo l’empiezu d’esti 2024 albidrábemos que díbemos tener más de lo mesmo: un dominiu absolutu de Red Bull nes manes de Max Verstappen. Y anque ye verdá que’l pilotu neerlandés nun aparó de ganar carreres, la superioridá tan bultable que tinía l’añu pasáu desapaeció n’esti. Yá escribimos hai dellos díes sobre les victories de Carlos Sáinz y Lando Norris y de cómo pasín ente pasu les distancies amenorgaben. Nel circuitu d’Imola, volvimos a vivir otru episodiu.

Y ye que yá dende los entrenamientos del vienres, Verstappen nun taba mui a gusto col coche y anque’l sábadu foi quien a sacar una vuelta meteórica que-y dio la pole, nun taba mui lloñe del cronu marcáu polos dos pilotos de McLaren con Oscar Piastri a la cabeza, qu’acompañaron a Verstappen nes tres primeres posiciones. L’australianu entamaría sicasí la carrera na quinta posición por una penalización de tres posiciones al torgar a Magnussen na Q1 cuando ésti facía la so vuelta rápida.

Esto dexaba abierta la posibilidá a Ferrari, que clasificaran xusto per detrás depués de desinflase un pocu con respeutu a les sesiones de llibres, d’atacar na salida y poder quiciás suañar con una victoria en suelu italianu. Sicasí, nengún de los dos pilotos llegó amenaciar la posición de Verstappen, y tampocu nun abultaba que lo fuera facer Norris. El pilotu inglés salió bien, muncho meyor que n’otros eventos pero nun pudo pasar al pilotu de Red Bull, que pocu a pocu foi metiendo distancia con él mientres Norris tinía la vista más puesto nos retrovisores con Leclerc al acechu que no que tinía delantre.

Les paraes, sobre manera la segunda (a la fin los más de los pilotos escoyeron la opción a dos paraes), supunxo un cambiu y Norris entamó a recuperar un ritmu que creyía perdíu y que punxera mui cerca a Leclerc. El pilotu monegascu entamó a descolgase pero lo más sorprendente foi que Verstappen tamién entamó a perder tiempu col inglés, que llegó a la bandera a cuadros a siete décimes del so rival. Verstappen quexárase por radio de problemes coles gomes que lu facíen perder tiempu y amás taba alvertíu de posible sanción por superar llímites de pista. Ello ye que’l neerlandés salió victoriosu d’una carrera pa la que tuvo de trabayar más de lo que nos tien avezaos y que, de durar un par de vueltes más, quiciábes nun tuviera ganao.

Nel podiu, xunto a él, Lando Norris que se llamentaba d’una primer parte de la carrera na que nun pudo siguir el ritmu de cabeza, y Leclerc que pesie a la felicidá del podiu énte’l so públicu, quedó con ganes de más. Piastri quedó a les puertes depués de pasar bona parte de la carrera persiguiendo a Sáinz primero y ganando-y llueu posición nes paraes, y a Leclerc depués, pero ensin ésitu con ésti últimu. Sextu y sétimu fueron los dos Mercedes, con un llabor sólido d’equipu, minimizando daños y col puntu de vuelta rápida pa George Russell, siguíos de Sergio Pérez, que tentó una estratexa estremada al restu pero ensin munchu ésitu. Novenu sedría Lance Stroll, l’únicu Aston Martin en puntos y décimu Yuki Tsunoda.

Vimos dellos adelantamientos, que ye mui d’agradecer nun circuitu nel que ye casi imposible velos, pero la verdá ye que foi una carrera más bien tranquila, ensin incidentes nin problemes pa cásique nengún pilotu (si nun cuntamos a Albon que paró hasta cuatro vegaes y acabó teniendo de retirase) y mui deceicionante pa otros, como’l casu de Fernando Alonso, que partía últimu na parriella depués d’un erru na clasificación del sábadu. L’asturianu tentó d’esguilar posiciones na clasificación pero viendo que nun yera posible, acabó faciendo del gran premiu un esperimientu pa ver qué árees de meyora precisa’l coche. Les actualizaciones que trayera l’equipu ta claro que nun funcionaron bien.

Na segunda mitá de la tabla nun vemos munches novedaes, más allá de la bona posición pa los dos Haas, anque daqué deceicionante pa Hülkenberg tres otra gran sesión de clasificación el sábadu. Alpine prolonga la so racha negativa mesmo que Sauber, que nun ye quien atopar la lluz a la fin del túnel. Ricciardo tampocu nun tuvo la meyor de les sos carreres y sigui siendo superáu por Tsunoda. Logan Sargeant foi quien nesti gran premiu de nun zarrar la clasificación nun añu que yá se-y ta poniendo mui complicáu al pilotu estauxunidense.

Ensin descansu ponemos rumbu a Mónaco pal viniente Gran Premiu de Montecarlo. Mientres llega’l día, podéis consultar equí tolos númberos que dexó’l fin de selmana de carreres nel míticu circuitu d’Imola.

Cuando entamamos la temporada 2024 díbemos cola idea de ver un pocu una repitición de lo que foi 2023: dominiu absolutu de Red Bull. Sicasí, depués de seis carreres, esi dominiu yá ta daqué cuestionáu y son dos los pilotos que batieron a Verstappen. Mientres el primeru foi Carlos Sáinz n’Australia depués del abandonu del holandés, en Miami llegó la segunda ocasión, esta vegada pa un pilotu qu’a la fin vio’l so suañu cumplíu depués de munchos intentos fallíos y pa un equipu que ta nel so camín de retornu a lo cimero de la competición de F1.

Anque a priori una carrera al sprint nel circuitu de Miami nun abultaba interesante, la verdá ye que vimos bastante más de la que cuntábemos, sobremanera na parte de Kevin Magnussen que dio batalla tolo que puedo, según él trabayando pal so equipu y qu’acabó penalizando con hasta treinta y cinco segundos pola so conducta en pista y con una llamada a comisarios pa comenta-y la necesidá de nun repetir eses aiciones. El pilotu danés ye conocíu por vender cara la so posición en pista pero tamién ye verdá que lo que vimos esti sábadu foi un pocu más allá del llímite que de normal nun supera anque lu toque.

El domingu tuvimos un guión al que nun tamos avezaos. Yá comentemos na crónica del gran premiu de China qu’anque Red Bull siguía dominando, esi control yá nun yera tan absolutu como en 2023 y la prueba tuvímosla otra vegada en Miami. El pilotu neerlandés llideró la carrera dende l’entamu, cola pole del sábadu, pero les circunstancies de carrera lu llevaron a quedar segundu. Podríemos dicir que Lando Norris, qu’ocupó esa posición depués de la salida del coche de seguridá provocáu por un incidente en pista y de poder parar y aprovechase de la circunstancia, tuvo más que suerte y por eso ganó. Pero la verdá ye que cuando n’otres carreres esto mesmo tien pasao, a Verstappen nun-y cuesta recuperar el llideralgu y ganar. Pero en Miami vimos a un Verstappen al que-y costaba siguir el ritmu del McLaren, que nun dexaba d’agrandar la so distancia col pasu les vueltes.

Ello ye que la victoria foi pal McLaren de Lando Norris, qu’a la fin y depués de munchos podios se fai cola victoria, siguíu de dambos Red Bull. Per detrás vimos abondes batalles ente pilotos que ficieron de la carrera una de les más interesantes de lo que llevamos de campeonatu, dalgo que ye muncho dicir pa Miami que nes dos ediciones que llevaba nun ufriera nada del otru mundu.

Ponemos agora rumbu a Italia, al circuitu d’Emilia Romagna ya entamamos la travesía pelos circuitos europeos.

Depués de cinco años d’espera, tornaba’l circuitu chinu al calendariu de Fórmula 1 col añadíu de ser un fin de selmana de carrera al sprint que dexó delles coses interesantes que vamos dir analizando nes prósimes ringleres.

Y anque nun tuviemos munches sorpreses, sí qu’a lo menos vimos dalgo d’aición en pista y la promesa de que les coses nun van ser tan cencielles pa Red Bull d’equí n’adelantre. Y ye que la escudería dominadora nos últimos años, nesti 2024 ta amosando dalgo más de debilidá (o dalgo de debilidá meyor dicho) en comparación colo que víemos l’añu pasau y pesie al dominiu indiscutible de Max Verstappen, los marxes que manexen yá nun son tan bultables.

Una prueba d’ello ye qu’al vixente campeón del mundu cuesta-y más abrir distancia na salida colos sos rivales, como vimos na de China na qu’Alonso tuvo na so mano la oportunidá de pasalu mientres per detrás el restu de pilotos tamién salíen a la gueta. Nun ye raro tampocu ver a los McLaren peliar ente los primeros puestos nes salides, pesie a que na sprint d’esti fin de selmana, Norris por exemplu acabó perdiendo abondes posiciones que yá condergaron la so carrera y lu dexaron más abaxo de lo qu’él quería.

Hamilton tuvo una clasificación desastrosa que lu relegó al penúltimu puestu de la llista de pilotos namás per delantre de Logan Sargeant col Williams. L’inglés sicasí, foi capaz de compensar esi mal sábadu pa sacar dalgo positivo’l domingu, anque non ensin dificultaes. El so compañeru tuvo dalgo más de fortuna, y nes primeres vueltes rodaba sextu, anque ensin asomu del brillu qu’esperábemos de Mercedes esti añu. Nun foi tampocu un sábadu provechosu pa Ferrari pero la Scuderia foi pocu a pocu remontando posiciones, anque siempre lloñe de peliar pola victoria y replicar el bon resultáu d’Australia.

Alonso tentó de facer valer la so bona posición en clasificación pero pronto quedó claro que nun tenía’l rendimientu suficiente p’aguantar per delantre de Sergio Pérez, que nun tardó en pasalu, nin de los McLaren que tinía per detrás. L’asturianu buscaba asina olvidase un pocu de la carrera al sprint del día anterior na que nun pudo atropar nengún puntu.

Valtteri Bottas foi’l primer abandonu de carrera, na vuelta 21 por un problema col so coche que provocó un coche de seguridá virtual del que s’aprovecharon dellos pilotos como Lando Norris, pa dir consolidándose nes posiciones de cabeza y qu’acabó siendo un coche de seguridá pola dificultá pa retirar el coche del finlandés de la pista. Esta circunstancia foi aprovechada pol equipu Red Bull pa parar a los dos pilotos, anque Pérez llegó a perder posición con Norris y Leclerc por esti fechu.

La reanudación de la carrera nun vieno ensin incidentes yá que Stroll y Ricciardo tuvieron un toque con consecuencies pa dambos., sobremanera pal australianu que diba terminar abandonando. Nun diba ser el día pa la escudería RB qu’al pocu del mentáu incidente vía como Tsunoda facía un trompu por un toque con Magnussen y quedaba fuera de competición. Ye importante señalar que’l sábadu, Ricciardo brilló na carrera al sprint pero paez ser qu’agotó tola suerte o tol rendimientu del coche nesi eventu.

Nel últimu tramu de carrera Alonso, con gomes fresques y blandes foi esguilando posiciones hasta pasar al Ferrari de Sáinz y colocase quintu. Foi nesti tramu tamién au vimos muncha aición en pista con adelantamientos tanto no más baxo de les posiciones como no cimero, ente Pérez y Leclerc, por exemplu, buscando ocupar l’últimu caxón del podiu. La estratexa de blandos del asturianu taba condergada a nun durar, sicasí, y na vuelta 44, a doce del final, el pilotu d’Aston Martin tuvo de parar otra vuelta pa, una vegada más, tornar a pista a tentar de subir les posiciones perdíes hasta ocupar la sétima cola que diba ver la bandera a cuadros.

El podiu ocupáronlu Verstappen, Norris y Pérez, que foi quien a caltener la posición a Leclerc, quien acabó cuartu, per delantre del so compañeru d’equipu y de George Russell en sextu llugar. Sétimu foi Alonso, como yá diximos, y les tres posiciones últimes con derechu a puntos ocupáronles, nesti orde, Piastri, Hamilton y Hülkenberg.

Como dicimos, pesie a la victoria de Max Verstappen, pocu a pocu vamos viendo como’l restu d’equipos van siendo quien a baxar les grandes diferencies qu’enantes consiguía’l pilotu neerlandés y averándose un pocu más a él.

Dexamos China pa poner rumbu a los EEXX ya’l gran premiu de Miami, au vamos tener otra vegada, fin de selmana con carrera al sprint. Equí vos dexamos los resultaos del gran premiu en Shanghai.

Depués del madrugón en Suzuka, paez que lo que viemos n’Australia foi un espeyismu y volvieron les coses un poco al so calce. Sicasí, siempre hai coses que cuntar de les carreres que se disputen nesti circuitu.

Depués d’una Q1 na que vimos quedar a un miembru de cada equipu (Zhou, Sargeant, Magnussen, Gasly, Stroll) dexando a les clares quien ta más fuerte y quien ta per detrás en clasificación, cola sorpresa del Aston Martin del pilotu canadiente y Ocon que sigue sacando lo poco qu’hai nesi Alpine. Irónica sedríen los compañeros de toos ellos sacante l’otru Aston Martin los que quedaríen fuera en Q2 uniéndose-yos Daniel Ricciardo que, anque esta vez foi quien a pasar la primer fase, sigue siendo’l más floxu del equipu. Nun sorprendería la pole posición de Verstappen nin la segunda llinia del so compañeru d’equipu. Colaríase Lando Norris esta vez na tercer plaza per delantre de Sáinz y un Fernando Alonso que dexaba l’Aston Martin nuna sesta plaza bien fuera de posición. Siguiríalos Piastri, Hamilton, Leclerc (que pagó’l mal momentu nel que salió a facer la vuelta nun aprovechando la mayora de pista), Russell (qu’esta vez nun yera a quedar per delantre del so compañeru d’equipu) y Tsunoda colándose otra vuelta en Q3.

Yá nel día de la carrera esperábemos que la salida fuera movida, sobre todo viendo qu’había estratexes disitntes en cuantes a les gomes escoyíes per dalgunos equipos. Y asina foi magar que la salida contra les protecciones d’Albon y Ricciardo provocaría una bandera colorada que xiringaría tovía más el baile d’estratexes na parriella. Reanudaríase la carrera con trés vueltes cuntaes, esta vez con un pocu más de respetu per parte de los pilotos pa evitar acabar tamién contra les protecciones. Leclerc ganaría darréu la posición a Hamilton que se la xugo col so compañeru cambiando a duros mientres la bandera colorada. Russell pela so parte ganaría la novena posición a Tsunoda dos vueltes más tarde pa colocase tres del so compañeru d’equipu.

La gran degradación que producía esti asfaltu provocaba que yá nel xiru docenu vieramos coches entrar a box a cambiar los neumáticos. Sedría Norris el primeru n’atrevese. A partir d’equi empezaba una carrera na que vimos más adelantamientos de los esperamos al comprobar que la diferencia de vueltes nos neumáticos facilitaba qu’asocedieran adelantamientos, de fecho vimos unos cuentos per fuera. Nun-y fizo falta adelantar al so compañeru a Russel magar que Hamilton yá entendía que tenía que dexalu pasar pola diferencia de ritmu y dalgún problema que notaba nel coche. Depués del so compañeru, daríen cuenta de Hamilton bien rápido Norris y Perez que veníen de cambiar les gomes. Darréu tocaría-y la mesma suerte a Russell y repetiríase la historia condambos Mercedes con Leclerc.

Un escenariu parecíu toparía Sáinz una vez saliera de Boxes y ye que les posiciones diben intercambiándose cola ventaya pal que salía colos neumáticos frescos del garaxe. Tres puestos ganaría Tsunoda na vuelta 23 na nel pit lane tres un cambiu rapidísimu del equipu de RB que lu permitió pasar na maniobra a Magnussen, Bottas y Sargeant (que volvería a estrozar les gomes nuna salida de pista na vuelta 42, anque foi a recuperase d’ella) qu’entraríen xunto con Stroll y Ocon que tamién sacaron ganacia al toos al empar pal cambiu. Tsunoda posteriormente aprovecharía la menor edá de los neumáticos pa pasar a Hülkenberg.

Leclerc fizo bien llargu’l stint de medios, hasta que na vuelta 26 lu pasó Pérez nun movimiento que delataba que yá nun yera quien a controlar el coche y tocaba cambiar los neumáticos. Mientres tantu, na vuelta 37 Sáinz entraría p’arrancar l’últimu stint que lu dexaría con gomes más nueves que’l restu de los que tenía delantre y opción real de podium. Una vez que Carlos dio cuenta de Norris, obviamente Leclerc nun diba a ser una torga pa ello y dexó pasar al compañeru p’asegurar la tercer plaza.

Mientres tantu los Mercedes funcionaben meyor colos neumáticos medios y diben allegándose, especialmente Russell, a Alonso y Piastri.

Nun falemos d’él, como vien siendo normal, pero Max Verstappen vería primeru la bandera a cuadros nuna carrera ensín más trámite pa él, siguíu pel so compañeru Pérez y con Sáinz zarrando’l podiu. Lecerc seguiría al so compañeru d’equipu mientres que Norris llograba la quinta posición. Alonso caltenía la sesta plaza en carrera y Russell llograría quita-y la sesta a Piastri na última vuelta. Nun tuvo tiempu yá Hamilton pa intentar ganar más posciones y Tsunoda zarró la zona de puntos nel gran premiu llariegu. La llucha pela parte baxa siguiría con Hülkenberg per delantre de Stroll y Magnussen qu’entraría con Bottas apegáu. Lloñe quedaben yá Ocon, Gasly y Sargeant.

Asina acabaría’l gran premiu xaponés y solo nos quedaríen quience díes pa siguir en China la xira asiática de la Fórmula 1. ¡Vémonos ellí!

Llegamos a Australia y agora sí que sentimos esi realcuentru añal cola F1 nun de los circuitos míticos. A deshora pa los europeos, valió bien la pena madrugar pa esfrutar de tolo que nos tuvo d’ufrir el gran premiu oceánicu.

Yá con novedaes dende los primeros llibres nos qu’Albon sufriría un golpe mui fuerte col coche que nun solo lu dexaría fuera de xuegu esi día, sinon qu’implicaría que Williams tuviera qu’enfrentar el fin de selmana solo con un coche al nun tener a tiempu el de repuestu y nun ser posible la reparación del monoplaza accidentáu. Esto ocasionaría que, si bien Logan Sargeant completaría los segundos llibres, Vowles tomara la decisión de cambiar a Sargeant por Albon nel coche que quedaba en competición nuna decisión discutía y discutible na que priorizaba los meyores resultaos del pilotu británicu-tailandés sobre facer que pagare los sos propios errores y dexare fuera a ún pilotu que nun había fecho nengún error como pa quedar fuera del gran premiu. Nin que dicir qu’esta decisión tamién da pie a les mermuraciones sobre’l futuru del pilotu americanu una vez acabada la temporada. Decisión complicada pa Williams non exenta de consecuencies.

Con esti condicionante na clasificación, la principal novedá na Q1 foi que Ocon y por primer vez un Alpine, pudiera llibrase de la eliminación a les primeres de cambiu. Tamién ayudó a ello los problemes de Ricciardo, que yá se veníen anunciando a lo llargo del fin de selmana, pa sintise cómodu col coche y que lu dexaríen tamién elimináu en Q1.

Precisamente’l so compañeru Tsunoda sorprendería al colase en Q3 mientres que Hamilton quedaría elimináu en Q2. Na llucha pola pole, Verstappen volvería llograr la primer posición, mientres un Sáinz que se reincorporaba esti gran premiu tres la operación d’apendicitis facía segundu, siguíu por Pérez y Norris. Leclerc quedaría nun discretu quintu puestu siguíu por Piastri, Russell, Tsunoda y los Aston Martin encabezaos por Stroll. Alonso tres un viaxe per fuera la pista nun llograría facer un tiempu que-y valiera pa ganar dalgún puestu. Pérez acabaría saliendo sextu por una penalización tres la clasificación.

Yá na carrera, Max Verstappen foi quien a defender la primer posición de magar s’apagaron los semáforos, el restu aguantaron bien les posiciones sacante Pérez que baxaría al sétimu puestu, Stroll ganaría una posición a Tsunoda y Hamilton, que salía con blandos, ganaría una posición a Alonso que salía con duros intentando caún estratexes distintes que-yos echaren un gabitu a subir posiciones.

Pero’l gran ritmu de Sáinz asoleyóse bien llueu y na segunda vuelta foi quien a ponese primeru con un Verstappen que nun acababa de notar finu’l coche. Ello ye que na cuarta vuelta empezaría a notase fumo salir de la parte trasero del coche del pilotu holandés obligándolu a abandonar la carrera. Una novedá que nun víamos per munches carreres nes que los Red Bull demostraben una enfotu técnicu que los facía acabar una carrera tres otra ensin casi incidencies d’esti tipu.
Asina, de repente topámonos con una carrera na que queda elimináu’l principar dominador de los últimos campeonatos (fuera de carrera por primer vez en dos años). Irónicamente esto pasa na primer carrera na que Ferrari daba sensaciones de poder lluchar de tu a tu cola escudería de la bébora enerxética. Un bloquéu nel frenu traseru derechu que lu fizo acabar en llames y destrozáu foi’l responsable d’esti fechu.

Pero nun sedría l’únicu abandonu notable. Lewis Hamilton tendría qu’apartar el coche na vuelta 17 por un fallu del motor que nun lu dexaba siguir. Esto causó un virtual safety car que xeneraba una circunstancia favorable pa Fernando Alonso ya que, anque dalgunos pilotos yá entraren a boxes pa poner neumáticos nuevos, el pilotu asturianu taba allargando’l so stint y aprovechó pa entrar nesta circunstancia pa perder menos tiempu en boxes y asina colocase quintu.

Una vez restablecíu l’orde col primer cambiu de gomes fechu per tolos coches, Pérez empezaba a recuperar posiciones y asina adelantaba Russell na vuelta 21 pa ponese sestu. El siguiente sedría Alonso, al que adelantaría 6 vueltes más tarde. Nesti casu, el pilotu asturianu llograría “garrase” al DRS que-y proporcionaba’l pilotu mexicanu aguantando una montonera de vueltes ehí y aprovechando pa ganar velocidá y meter distancia a Russell que sedría’l so siguiente problema.

Mientres tanto, anque Piastri había fecho un undercut na primer entrada en boxes al so compañeru d’equipu, na vuelta 29 intercambiaron posiciones pa nun lluchar ente ellos con dos estratexes estremaes. De fecho el segundu cambiu de neumáticos y les diferentes estratexes daríen un buen númberu de lluches y adelantamientos en pista nes vueltes siguientes a lo llargo de tola parriella.

Russell diría allegándose a Alonso poco a poco pa ponese a distancia de DRS na última vuelta, pero xusto nesta última vuelta veríamos cómo’l pilotu británicu perdería’l control del coche pa acabar col coche reposando nun llateral en medio la pista. Esta circunstancia, llamativamente, nun causó una bandera colorada. Posteriormente, sabríemos que los comisarios penalizaríen a Alonso con un drive-through que se tresformaría en 20 segundos de penalización y 3 puntos del carné por conducción peligrosa al demostrase que’l pilotu asturianu frenó de forma distinta nesi momentu que lo fizo’l restu de vueltes. Lo decisivo pa una sanción, que nun dexó de ser comparada con otres qu’acabaron con resultaos más leves, nun sedría tanto’l puntu de frenada sinon que volvió a acelerar pa volver a frenar pa garrar la curva.

Con too y con esto, Carlos Sáinz ganó un gran premiu que nun sabía si diba poder disputar solo unos díes enantes, col so compañeru completando les dos primeres posiciones. Norris sedría terceru tres nun ser quien a facer funcionar la estratexa siguíu por Piastri. Pérez nun podría ser más que quintu, lo que reafirma la idea de que los Red Bull probablemente nun tenien tanta diferencia col restu esta carrera. Stroll llograría la sesta posición per delantre de Tsunoda y Fernando Alonso quedaría octavu a pesar d’entrar sestu pola sanción mencionada. Nico Hülkenberg y Kevin Magnussen llograríen un perbón resultáu pa Haas, con dellos adelantamientos en pista.

Albon, n’oncenu llugar, nun llograría sumar nengún puntu echando más sal sobre la mancadura y les duldes que provocó la decisión del equipu. Ricciardo nun foi quien a pasar de la docena posición nel gran premiu de casa, per delantre de los sospechosos avezaos nes últimes places: Gasly, Bottas, Zhou y Ocon. Esti últimu nun pudo facer valir la posición en clasificación por un problema asemeyáu al de Verstappen al queda-y un tear-off del cascu garráu nel conductu de refrixeración del frenu nuna carrera qu’esperaba tar nos puntos.

Una carrera que nos dexa cola dulda de qué tuviere pasao de nun abandonar Verstappen y que nos dexa naguando pol siguiente eventu en Xapón pa confirmar o desmentir esta sensación de que sí que tenemos mundial y competencia pola primer posición esti 2024.

Nun pasó una selmana y yá tuvimos la segunda cita de la temporada, otra vuelta de sábadu, lo que fizo estes primeres carreres dalgo inusuales en comparanza colo que tábemos avezaos que yera un fin de selmana de Fórmula 1. Carlos Sáinz nun podría participar nesti eventu por cuenta una apendicitis y sustituyiríalu Oliver Bearman que llegaba a Jeddah pa correr les carreres de F2 y acabaría debutando na categoría cabezalera.

El vienres disputóse ensin novedá na pole que volvería a acaparar Verstappen, Leclerc sedría quien a metese ente los dos Red Bull y Alonso cuartu. Los Aston Martin muéstrense bien competitivos nes clasificaciones anque depués en carrera paez que-yos cuesta más. Depués, por pares clasificaríen los McLaren y los Mercedes encabezaos por Piastri y Russell respectivamente. Bearman llograría un meritoriu oncenu llugar tres Stroll y Tsunoda colocaríase octavu entrando en Q3. Zhou nun podría clasificar por mor d’un golpe bien fuerte nos últimos entrenamientos llibres que nun dio tiempo a que prepararen el coche de forma amañosa pa dar un tiempu na clasificación.

Yá na carrera del sábadu, Leclerc foi quien a caltener la posición nuna salida más llimpia de lo que podía esperase d’un circuitu ente muries. Max Vertappen empezaría a facer la so carrera construyendo la distancia dende la primer vuelta y los güeyos posaríense sobre Norris que foi investigáu por un posible jump start al movese’l coche primero de qu’apagaren los semáforos pero que foi descartáu por nun quedar rexistráu como movimientu suficiente pa ganar ventaya nel transponder. Gasly tendría qu’abandonar por problemes na caxa de cambios.

Nel momentu que se permitió l’usu del DRS na segunda vuelta empezaron a movese les posiciones, con Piastri adelantando a Alonso de secute. Costaría-y un poco más Sergio Perez que nun sedría hasta un par de vueltes más tarde cuando llograría pasar a Leclerc poniendo a los dos coches de la bebida enerxética comandando la carrera.

Foi na sesta vuelta na que tuvo llugar el choque de Lance Stroll al pegar cola rueda nel muru del interior de la curva rompiendo la suspensión y torgando cualquier manexu del coche que lu llevó directu escontra les protecciones na siguiente curva. Safety car, momentu pa cambiar gomes (nesti casu cambiar a dures) y xugar coles estratexes. Entraron tolos pilotos sacante Norris, Hamilton y Hülkenberg. El xaréu qus’entamó nel pit lane pola acumulación de coches acabaría nuna sanción de cinco segundos a Pérez por salir de forma insegura nel momentu qu’entraba Alonso. Rellanzaría la carrera entós Norris per delante de Vertsappen y Hamilton. Nes lluches por posición que se dieron, Magnussen llevaría una sanción de diez segundos por atrullar a Albon contra’l muru nel intentu de pasalu. Bearman llograría pasar a midida que diba deprendiendo los trucos de manexar un F1 a Tsunoda. Nel vueltes siguientes l’orde diría iguándose a midida que los pilotos qu’entraron a cambiar gomes llograben facer que los neumáticos duros empezaren a funcionar y podíen adelantar a los coches que llevaben gomes más vieyes. Asina Verstappen recuperaría’l primer puestu pasando a Norris, Perez pasaría a Hamilton primero y a Norris depués, pa llueu facer lo propio Leclerc tres dar cuenta tamién de Piastri y ponese terceru.

Una vez se fue estabilizando la clasificación, la emoción venía nes posiciones de la parte d’atrás- Magnussen llevaría otra sanción de diez segundos tres ganar ventaya al salir de pista y nun devolver posición nuna llucha con Tsunoda a la que s’uniríen Ocón y los Williams. De fechu, el pilotu francés aprovechó una mala defensa de Tsunoda de la posición con Magnussen pa robá-y la posición. Posteriormente Albon pasaría tamién al pilotu xaponés.

Piastri intentó pasar a Hamilton pero nun-y quedó otra que ver l’aleron del Mercedes per buena parte de la carrera. Yera perdificil adelantar al coche alemán pola velocidá punta que tenía nes rectes. Como almitió’l pilotu australianu tres la carrera, fízose un espertu nel alerón traseru del Mercedes de tanto velu. Intentólo sicasí un par de veces enantes de qu’entrare’l pilotu británicu a boxes, pero nun foi quien a aguantar el coche na frenada y salióse en dambes ocasiones.

Al final, Max Verstappen ganaría col dominiu al que mos tien avezaos, Sergio Pérez llograría distancia suficiente p’aguantar el segundu puestu pesie a la sanción y Leclerc completaría’l podiu siendo l’únicu que podía ver (anque fuere a cierta distancia) a los Red Bull. Per detrás, a daqué distancia, Piastri llograría la cuarta posición calteniendo a Alonso a raya que fadría lo propio con Russell, nun Mercedes que lo pasaba mal nel curves rápides como se pudo ver nos dos coches. Bearman, que llegó siendo un pilotu de F2 y llegó a meta titulándose como pilotu de F1 nuna permeritoria sétima plaza, foi deprendiendo a midida que pasaben les vueltes demostrando que hai un bon pilotu con muncho marxe de progresión y obligando a Ferrari a tenelu en cuenta d’equí p’alantre. Norris y Hamilton siguieron na clasificación ensin ser quien a facer que l’allargar el stint y montar el neumáticu blandu-yos valiere pa ganar posiciones en pista, la baxa degradación facía que nun se dieren en realidá les diferencies que daba Pirelli na teoría. Hülkenberg completaría los puntos pa Haas. Magnussen entraría darréu pero quedaría docenu por mor de la sanción que permitió que Albon lu adelantara. Nel puestu trece quedaría Esteban Ocon y Sargeant a continuación. Yuku Tsunoda nun podría dir más alló del puestu quince tres tola carrera bregando por posición. Tampoco foi la carrera del so compañeru Ricciardo que solo destacó por escapase-y el coche a falta de dos vueltes pal final pa quedar decimosestu. Zarraríen llista los pilotos de Kick Sauber encabezaos por Bottas.

Solo queda cuntar quince díes agora pa viaxar hasta les antípodes y llegar a la carrera que venía abriendo tradicionalmente los campeonatos: Australia. ¡Ellí mos vemos!

Entamó por fin la temporada 2024 en Baḥréin y, anque díbemos coles espectatives llimitaes, quedemos quiciás coles ganes de que l’añu nuevu viniera con más igualdá na parriella. Y eso que nos primeros entrenamientos, anque yera obvio que Red Bull taba escondiendo’l so potencial daba pie a pensar qu’otros equipos podíen nun tar tan lloñe. Pero llegó la clasificación a dexalo too claro: confirmar qu’Alpine entró col pie cambiáu y que, a los problemes de les persones clave que tán marchando a nivel técnicu axúntase-y un coche que paez destináu a pelear por nun ser l’últimu nes primeres carreres. Stake que paez que va a ser el so principal rival nel vagón de cola y la guerra qu’habrá ente Williams, RB y Haas por entrar en lluches un poco más arriba. Aston Martin descuélgase dientro de la zona media alta mientres los Mclaren yá llegaben sabiendo qu’esti nun diba a ser el circuitu onde más diben brillar y los Mercedes paecía que diben a competir colos Ferrari por ser los segundos coches per detrás de Red Bull. Les diferencies na clasificación, eso sí, fueron lo suficientemente axustaes pa que cualquier problema o error de manexu se pagase caru. Solo asina se desplicaben les diferencies ente compañeros como les que se dieron ente Russell (3) y Hamilton (9) per un llau y Verstappen (1) y Pérez (5) per otru. Completaben los Ferrari los primeros puestos de salida con Leclerc (2) y Sáinz (4).

Una vez s’apagaron les lluces del semáforu’l sábadu, fueron Stroll y Hülkenberg los mas perxudicaos por un toque na salida al pega-y per detrás l’alemán al canadiense que llimitó les sos posibilidaes dende la primer vuelta. Esti toque tamién afeutó a Bottas que nun foi quien a evitalo y vio cómo se dañaba parte d’un endplate delanteru. Poco a poco diben normalizándose les posiciones y los Mclaren fueron quien a adelantar a Alonso, a los que siguiría Hamilton un tiempu depués na décima vuelta. Nun hebo batalla esti añu. Mientres tanto, en cabeza, Russell tirábase-y a Leclerc qu’acusaba problemes nes frenaes por dalgún mal funcionamientu nel coche que facía que bloquiare unes cuantes veces la rueda y que tuviere problemes pa caltenese dientro de los llímites de pista. Nun acabaríen equí los problemes del monegascu yá que’l siguiente en pasalu sedría Pérez que venía con un diferencial de ritmu curiosu. Pero ye que, pa rematar, sólo una vuelta depués tuvo que ver como Sáinz,el so compañeru d’equipu, lu pasaba tamién. Eso sí, non ensin cierta llucha, Ferrari paez que mos quier tener entreteníos otra temporada.

Sicasí paez que la suerte cambió pa dalgunos nel segundu stint. Sobre too pa George Russell, al que nun-y valió entrar a cambiar les gomes primero que lo ficiera Sergio Pérez una vez qu’ésti lu tenía a mano. Nun desaprovechó’l pilotu mexicanu la oportunidá de pasalu en pista cuando volvió a dase. Depués sabríamos que’l británicu de Mercedes tuvo problemes cola unidá de potencia y la refrixeración que comprometieron la so carrera. Yá pintaba un primer y segundu puestu de Red Bull que volvía col dominiu col que zarró l’añu pasáu. Gracies a la estratexa, Leclerc foi quien a facer un undercut a Sáinz, pero esti repitió-y l’adelantamientu en pista y, nun siendo bastante, atacó a Russell llegando a quita-y el tercer puestu de la carrera.

Na vuelta 32, xusto cuando arrancaben a entrar los pilotos más madrugadores pal segundu cambiu de gomes, los mecánicos de Bottas tuvieron un problema cola tuerca y la rueda delantera izquierda que fizo que tuvieran una parada de 52 segundos, relegando dafechu al finlandés. Foi nesti cambiu de gomes nel que Hamilton foi quien a adelantar a Piastri gracies a facer el cambiu de ruedes más llueu y nun da-y opción na entrada en pista del pilotu australianu coles ruedes fríes tovía. Na vuelta 46 Leclerc devolvería-yla a Russell y recuperaría la posición tres un error del pilotu británicu que diba faciendo lo que podía col coche.

Y sí, anque nun lu mencionáremos pa nada, Max Verstappen ganó la carrera con poca más novedá que lliderala dende principiu a fin ensin nengún problema y con 22 segundos de diferencia col so compañeru. Sáinz llogró la tercer posición nuna carrera na que foi’l meyor del restu siguíu tamién pol so compañeru que pudo recuperase de los problemes del arranque de carrera. Russell nun podría ser más que quintu anque llegare a vese segundu nos primeros tramos de la llucha, siguíu por Norris, Hamilton y Piastri nuna llucha que daba a entender que les fleches platiaes taben más cerca de los McLaren que de los Ferrari nesta carrera. Siguiríen los pilotos d’Aston Martin encabezaos por Fernando Alonso y zarrando Stroll la zona de puntos. Diferentes estratexes fadríen que’l pilotu canadiense dexare pasar nes últimes vueltes al asturianu por tener más ritmu. Zhou llograría ser el primeru de la segunda mitá de la tabla, siguíu por Magnussen y los RB con Ricciardo primeru por cuenta unes órdenes d’equipu coles que Tsunoda nun se quitó de dexar claro que nun taba d’acuerdu. Detrás vendríen Albon, nun Gran Premiu bastante discretu y Hülkenberg, que fizo lo que pudo tres lo problemes na salida. Los dos Alpine d’Ocón y Gasly a continuación pa zarrar con Bottas y Sargeant, que tuvo problemes col volante y tuvo de cambialu en mitá de la carrera.

Nun dexamos nin una selmana pa dixerir l’empiezu del campeonatu y tolo que asocedió Baḥréin pa dir esta selmana de siguío hasta Arabia Saudí pa la siguiente carrera. Como siempre, vos esperamos per equí pa comentar lo qu’ellí pase.