Category: Carreres

A vegaes la vida métese pel mediu la Fórmula 1 y dellos meses depués tornamos a esti espaciu pa reflexonar sobre lo que foi la temporada 2024 y asina pone-y al ramu a un añu que nos dexó bien de titulares, momentos intensos y munches ilusiones anovaes.

Y ye que si nos lleguen a dicir a primeros d’añu que Red Bull nun diba ser l’equipu dominador de la F1 esti 2024 y que Max Verstappen diba tener qu’amosar que nun ye namás bon pilotu cuando’l coche va bien, nun lo creyíamos. Partíemos cola creyencia de qu’otru añu más Verstappen diba cásique a pasiase pelos circuitos como pudo facer en 2023 y, de fechu, asina foi siendo nes primeres carreres onde Verstappen s’impuso con comodidá. Foi gracies a esi colchón del principiu que, llueu comprobemos, nun tuvo problemes pa caltener el so llideralgu nel campeonatu de pilotos cuando les coses se complicaron pa él y pal equipu.

Red Bull pasó de dominar a ver cómo pasín ente pasu diba perdiendo puntos que sí sumaben los sos rivales. La decisión d’anovar a Sergio Pérez a mitá de la temporada aportó con munches duldes y cuestionamientos dende cásique tolos puntos del paddock, y foi una oportunidá que’l mexicanu nun foi quien aprovechar. Nes últimes carreres de la temporada Max Verstappen yera práuticamente’l que sumaba puntos pa Red Bull con un Sergio Pérez peliando contra los sos rivales ya consigo mesmu. El costo pal equipu de la so falta de rendimientu foi qu’en faltando tovía delles carreres pal final de la temporada yá dexáramos de cuntar con ellos pa competir pol mundial, quedando Ferrari y McLaren como candidatos únicos. El costo pal mexicanu ye la decisión de Red Bull de desdicise hai unos díes y acabar col so contratu pa los dos vinientes años.

Na llucha pol campeonatu de pilotos hai que rescamplar la figura de Lando Norris. El británicu tuvo nes sos manes el poder poner n’apuros al campeón d’anguaño, pero los errores a estos niveles de competición nun se perdonen y Norris sumó bien d’ellos. Sicasí, l’inglés puede sacar muncho d’esti añu tar a piques de ser campeón y de tornase ganador de grandes premios depués de bien de podios ensin victoria. Con Oscar Piastri de llau amosando que tamién sabe competir, Norris va tener xera pa 2025 si quier ser campeón. Eso sí, la combinación de dambos pilotos dio a McLaren un mundial depués de na menos que ventiséis años. Dende 1998 (descontamos 2007 nel que McLaren foi descalificáu pol casu de espionaxe a Ferrari) nun víamos al equipu facese col trunfu nel mundial de constructores y foi nesti 2024 y depués de dos años de trabayu tremendu nes manes de Zack Brown y Andrea Stella, que l’equipu de Woking torna a ser campeón. Cuesta creyer la situación na qu’entamaben l’añu pasáu la temporada y cómo termina esta.

Ferrari tamién tuvo oportunidá de complica-y les coses al equipu inglés, tornándose n’antagonista en dexando Red Bull el camín llimpiu pa dambos. Los dos pilotos consiguieron victories nesti 2024 pero n’Abu Dabi, la última carrera de la temporada y au llegaben tovía con posibilidaes, nun pudieron consiguir el premiu grande. El cambiu con respeutu a 2023 déxanos un equipu Ferrari que convence nes carreres. La temporada pasada yeren mui rápidos a una vuelta pero’l rendimientu nes carreres taba lloñe de ser dignu de ganar un campeonatu. Esti 2024 sacrificaron los sábados pa tener domingos más competitivos, como quedó claro bien pronto. Les perspeitives pa 2025 son interesantes, con Lewis Hamilton aportando al equipu con tolo qu’eso supón. Sáinz pudo despedise con bones sensaciones depués d’un añu bien competitivu pela so parte y col enfotu de poder atopar en Williams un futuru afayadizu.

Nun foi l’añu de Mercedes magar tanto George Russell como Lewis Hamilton tuvieron oportunidá de vese no cimero del podiu más d’una vegada. Abúltanos qu’esti añu Russell consolidose como’l llíder necesariu pal equipu de cara al futuru inmediatu, sobre manera cola marcha de Hamilton y la llegada del debutante Antonelli. Hamilton tuvo un añu mui irregular con momentos mui altos y otros mui baxos nos que’l propiu pilotu llegó a duldar de la so capacidá pa pilotar como nos tien avezaos. Nun creyemos que seya’l casu, pero sí que precisa un horizonte estremau y competitivu nel que pueda tornar a rendir como lo fizo n’años pasaos. L’escenariu que se presenta énte él en Ferrari ye esperanzador pola situación na que la Scuderia termina l’añu y va ser interesante ver cómo se combinen dos mundos tan estremaos pa dar cola fórmula que devuelva a dambos a lo más alto.

Ver a Aston Martin nel quintu puestu del mundial de constructores ye engañoso si pensamos nel rendimientu que vimos a dambos coches. Fernando Alonso foi rascando los pocos puntos que pudo, con dalguna esceición en carreres puntuales y ayudáu dacuando por Stroll que tuvo un papel bastante más discretu. La esperanza del equipu ta puesto nel fichaxe d’Adrian Newey pa ser quien dea vida al coche de 2026 nel qu’Aston Martin quier marcar la diferencia. La dulda tenémosla nel futuru d’Alonso, col que nun sabemos si cuntar pa esi añu.

Alpine entamó l’añu con munches duldes, un rendimientu mui probe y claros problemes siquier pa clasificar fuera de la Q1. Pero na F1 nunca nun se puede dar por muertu a nengún equipu y ye que un mecigayu de suerte, bona estratexa y tar nel sitiu xustu nel momentu perfeutu permitió a Esteban Ocon y Pierre Gasly, pilotos d’Alpine, acompañar nel podiu de Brasil d’esti añu a Max Verstappen. Esi fechu significó un enorme númberu de puntos colos qu’Alpine nin suañaba n’entamando la temporada y que colocó al equipu sextu per delantre d’aquellos colos que’l restu de carreres tuvo de siguir compitiendo. L’equipu Haas, al qu’Ocon va dir en 2025, vio como’l trabayu del añu por situase ente los meyores de la parte baxo se vía superáu nuna bona carrera de los franceses.

L’equipu Haas entamó la temporada con necesidaes, con falta de bonos resultaos y cola marcha del icónicu Guenther Steiner. Hülkenberg superó en munches ocasiones al so compañeru Kevin Magnussen, sobre manera nos sábados, pero ente dambos fueron quien a sacar al equipu de lo fondero de la clasificación. Sicasí, como tamos acabantes de dicir, vieron como Alpine se-yos colaba per delantre a falta de poques carreres pa rematar la temporada y tando los puntos tan caros como tán pa los equipos de la parte baxo. En 2025 anoven la so plantiella de pilotos ya xunten a Esteban Ocon con Oliver Bearman, promesa de Ferrari y pilotu que yá dexó dellos bonos momentos en pista cuando se-y dio la oportunidá.

L’equipu RB tuvo un añu bien intensu marcáu pola salida temprana del equipu de Daniel Ricciardo, que vió asina desapaecer la so oportunidá de tornar a Red Bull nel futuru inmediatu. Como yá pasó en 2023, el so puestu ocupolu Liam Lawson con un bon rendimientu, dalgo que-y valió ser escoyíu p’acompañar a Max Verstappen en Red Bull pal viniente añu. Tsunoda yera l’otru candidatu que Red Bull taba considerando ya’l xaponés tuvo un bon añu nel qu’amosó madurez y capacidá pa sobreponese a los problemes que-y van xurdiendo en carrera. Sicasí, nun foi suficiente pa ser escoyíu pal primer equipu. Nel momentu d’asoleyar esti artículu nun sabemos quien va ser el so compañeru d’equipu pa 2025.

Williams zarró un añu complicáu cola esperanza puesto nel futuru con Sáinz al volante. Depués de la salida de Logan Sargeant y la entrada pa cubrir el so puestu de Franco Colapinto, l’equipu ganó competitividá, pero ye verdá que los problemes nunca nun desapaecieron del too y los costes por accidentes superaron lo que l’equipu podía permitise. N’acabando 2024, Colapinto queda ensin asientu nel equipu inglés onde sí se queda Alexander Albon pa competir xunto a Carlos Sáinz. Nun sabemos qué foi lo que James Vowles prometió al madrilanu pa convencelu de xunise a ellos pero abúltanos importante y necesario pal deporte’l tornar a ver competir al equipu Williams como nun hai muncho facía.

Kick Sauber zarra la clasificación d’esta temporada con dos puntos que sumó Zhou Guanyu nel gran premiu de Catar, penúltima carrera de la temporada. Hasta entonces abultaba imposible que l’equipu fuera quien a consiguir camudar el 0 del so casilleru. Dafechu últimos cásique toles carreres de la temporada y con munchos problemes pa pasar a Q2 los sábados, hai munches duldes sobre lo qu’esti equipu puede ufrir como Audi nel futuru. Les noticies que van aportando nun nos emocionen precisamente, anque ye verdá que’l fechu de que Nico Hülkenberg decidiera xunise a ellos dexa espaciu a la especulación. L’alemán va tar acompañáu del debutante Gabriel Bortoleto, campeón de F2, y a les órdenes de Mattia Binotto.

Con esti llargu resume de la temporada ponemos-y’l ramu a una temporada entrenida y que nos dexó con ganes de más. Naguamos por un 2025 la mitá d’entreteníu qu’esti 2024 que tamos a piques de despidir. Tai sollertes a esti blogue y tamién a les nuestres redes au diremos asoleyando información y actualizando tolo que sabemos hasta agora sobre la temporada viniente.

Hai dellos fines de selmana que, según entamen, yá paez que se puede predicir lo que va pasar cásique dende’l vienres. Y ye que yá dende los primeros entrenamientos llibres podíemos albidrar que Lando Norris taba perriba del restu. Dominó nos llibres y tamién na clasificación y, como yera d’esperar, na carrera.

En 2023, el rendimientu de Red Bull foi bastante probe, pero nun foi’l casu esti fin de selmana. Ye verdá que Verstappen tuvo de peliar col coche más de lo que nos tien avezaos, como vien siendo normal nes últimes carreres, y que Sergio Pérez nun pasó nin a Q3, pero l’holandés foi quien a minimizar daños quedando clasificando segundu y quedando segundu per detrás de Norris en carrera.

La carrera foi tranquila, con una salida mui llimpia. Dellos coches tuvieron d’esquivase nel primer xiru pero ensin consecuencies. De fechu, nun tuvimos nin coche de seguridá y los dos abandonos fueron por problemes aisllaos y non por accidentes. Foi más bien una carrera estratéxica, na que Mercedes nun foi quien a sacar lo meyor de sí depués d’una gran clasificación per parte de Hamilton y Russell que llueu nun fueron quien a maximizar, viéndose dambos superaos por Piastri, que clasificó quintu pero quedó nel podiu per delantre d’ellos el domingu.

Ferrari fueron quiciás la deceición del fin de selmana puesto que dambos pilotos tiníen potencial pa desafiar a McLaren pola primer posición y nel podiu pero nengún de los dos pudo clasificar bien, con Sáinz incluso teniendo un accidente en clasificación que lu dexó ensin oportunidá pa peliar polos primeros puestos en parriella. Leclerc nun tuvo tampocu una actuación brillante’l sábadu, dalgo que lu condicionó pal domingu pesie a que dambos fueron quien a compensar un pocu la mala actuación y quedar per delantre de Hamilton, que nun tuvo mui contentu coles gomes y nun pudo caltener la posición de podiu que tinía’l sábadu.

La carrera de Norris nun tuvo munchu secretu: el coche yera rápidu, él mostrose muncho más centráu qu’otres vegaes sobre too na salida, el so puntu débil, y pudo xestionar gomes y distancia con Verstappen dende’l principiu. Pudo permitise incluso arriesgar dellos momentos pasando mui cerca de la muria ensin consecuencies. Dambos McLaren yeren los únicos que podíen pasar con confianza perriba los pianos del trazáu de Singapur, dalgo que’l restu de pilotos evitaben na midía que-yos permitíen los sos monoplaces.

Pela parte media tuvimos interesantes momentos ente Alonso, Sáinz y Pérez, col pilotu d’Aston Martin tornando a sumar puntos con un coche claramente inferior a los otros dos. Nico Hülkenberg tuvo una gran actuación de sábadu que-y permitió acabar nos puntos el domingu. L’alemán yá nos tien avezaos a facer bones vueltes de clasificación, y esti sábadu nun foi esceición. Pérez zarró los diez primeros con una actuación bastante discreta que, una vegada más confirma la importancia de la posición más que de la rapidez del coche nel trazáu de Singapur.

A les puertes de los puntos quedó Franco Colapinto. Williams tuvo un fin de selmana d’altibaxos y de fechu Albon tuvo d’abandonar bien pronto en carrera. L’equipu RB apuntaba maneres nos entrenamientos llibres pero dambos pilotos quedaron fuera de puntos. Nel casu de Ricciardo, el so llabor consistió en quita-y a Lando Norris el puntu de vuelta rápida que l’inglés tinía nes últimes vueltes, faciendo trabayu d’equipu pa Red Bull. Ye irónico que se tea falando de qu’esti gran premiu foi l’últimu del pilotu australianu al que podría reemplazar Liam Lawson pal restu de la temporada.

Otru día pal escaezu d’Alpine y Stake, lloñe de los puntos. Tampoco nun foi un bon fin de selmana pa Magnussen, qu’acabó abandonando, nin pa Stroll que quedó nel puestu décimocuartu, a un mundu del so compañeru d’equipu.

La F1 tómase otru descansu de tres selmanes enantes de ponese en movimientu otra vuelta nel circuitu d’Austin. Ellí veremos abondos equipos con novedaes y meyores, ente ellos Red Bull, que de xuru van apertar más les coses pola llucha en dambos mundiales. Mientres llega’l día, equí vos dexamos tolos númberos que nos dexó esti fin de selmana de carreres en Singapur.

A estes altures de la temporada abúltanos que podemos afirmar que 2024 ta siendo un gran añu pa la F1, non sólo polo que tamos viendo en pista si non, y sobre too, polo inesperao de les situaciones que se tán viviendo.

Por si tiníemos poco, Lando Norris encargose de poner un pocu más d’intensidá al domingu de competición en Bakú clasificando fuera de la Q2. Esta selmana previa a Azerbaixán, l’equipu McLaren decidió pidir a Piastri qu’ayudare a Norris na so gueta del títulu. Viendo la sesión del sábadu abultábanos que bien pocu diba poder facer l’australianu pol so compañeru, pero viendo’l resultáu, el so trabayu bien val un mundial, el de constructores. A la fin, Norris pudo recuperar, minimizar daños y quedar incluso per delantre de Verstappen, pero con una renta insuficiente de puntos si quier ser campeón.

Y ye que llegamos a la clasificación del sábadu ensin tener mui claro quien podía facer la pole por tener un bon númberu de pilotos que yeren candidatos a ello, incluyendo a Sergio Pérez, que tuvo mui inspiráu, más que’l so compañeru, demientres tol gran premiu. Sicasí, quien consiguió imponese al restu, una vegada más, foi Charles Leclerc, que ye’l meyor clasificador en Bakú magar la victoria se-y resiste. Esti domingu tinía una bona oportunidá d’acabar con esi particular historial de poles ensin victoria. Salía siguíu de Piastri y de Carlos Sáinz, que foi quien a meter el so coche na tercera posición nun trazáu que nun se-y suel dar bien. Sergio Pérez clasificó per delantre de Verstappen en cuartu llugar y siguiólu George Russell. El vixente campeón del mundu namás pudo ser sextu en clasificación y lu siguieron Lewis Hamilton, que’l domingu salió dende’l pitlane y aprovechó a camudar pieces que yá penalizaben, Fernando Alonso qu’esprimió tolo que pudo’l so Aston Martin y, pa rematar los diez primeros, dambos Williams, col debutante en Bakú Franco Colapinto superando al so compañeru d’equipu Alex Albon, que foi décimu. Tenemos que destacar tamién l’actuación de Oli Bearman, que competía col Haas de Kevin Magnussen (sancionáu esta carrera) y que quedó undécimu per delantre de Hülkenberg, que tuvo de conformase con ser décimoterceru.

El domingu, l’iniciu de carrera foi llimpiu en xeneral no más alto de la parriella, con Leclerc imponiéndose anque ensin ser quien a poner muncha distancia colos sos rivales. Sicasí, el monegascu foi quien a llegar en primer llugar a les paraes. Les estratexes variaron ente los qu’escoyeron dos paraes y los qu’entamaron con gomes dures y fueron a una, como foi’l casu de Norris o Albon. Na segunda tanda de vueltes de Leclerc, con Piastri cada vegada más cerca, un escesu de confianza resultó nel australianu atacando ensin que Leclerc lo esperara. Asina, Piastri púnxose primeru y nun abandonó esa posición hasta ver la bandera a cuadros. La frustración de Leclerc yera evidente pues vía que, otra vuelta, perdía’l beneficiu d’una gran vuelta de clasificación el sábadu. Nun podemos dicir que nun intentó superar al so rival, pero Piastri entamó una defensa mui fuerte que torgó tolos intentos del monegascu.

Per detrás de dambos taben llibrándose continues batalles ente Pérez y Sáinz pol tercer puestu na carrera. Russell vixilaba la carrera dende lloñe pero cada vegada más cerca. Verstappen, sextu, vía como Norris diba avanzando na clasificación, faciendo bonu’l rendimientu del so McLaren y tamién la xestión de gomes. L’inglés allargó la parada mucho más incluso qu’Albon y asina púnxose nuna situación de poder facer una tanda de vueltes corta con unes gomes muncho más rápides y nueves que les que llevaba Verstappen. Esto ayudó a que Norris pudiera dir acortando la distancia que recuperó l’holandés en parando’l pilotu de McLaren y que quedó en nada con delles vueltes pal final.

Tábemos a piques de rematar la carrera cuando llegó’l momentu que diba tener l’impautu más bultable na carrera. Pérez y Sáinz taben cada vegada más cerca, col español casi rozando’l tercer puestu del mexicanu. Sicasí, nuna maniobra d’adelantamientu ciertamente un pocu estraña, dambos pilotos acabaron na muria, arruinando les sos carreres y un bon númberu de puntos, aparte del emburrión moral pa Pérez d’acabar nel podiu y per delantre del so compañeru. Los beneficiaos d’esti incidente fueron Russell, qu’heriedó un tercer puestu col que nin siquier suañaba a dos vueltes del final; Lando Norris, qu’acabó cuartu depués d’empezar nel puestu décimoquintu; Fernando Alonso, que pudo meter el so Aston Martin nun meritoriu sextu puestu; los dos pilotos de Williams, que sumaron puntos; Lewis Hamilton, que depués d’entamar dende’l pitlane foi quien a quedar novenu y, finalmente, Oli Bearman, que sumó puntos pa Haas. El pilotu inglés suma más puntos que Kevin Magnussen y amás failo con dos equipos distintos, depués de tener que sustituyir en Xida a Carlos Sáinz en Ferrari al principiu de la temporada.

Pela parte baxo, Tsunoda y Stroll tuvieron d’abandonar bien pronto por un toque ente dambos que dañaría los sos monoplaces y acabaría n’abandonu. Sigui la frustración n’Alpine y Sauber mientres ven como Williams y Haas pocu a pocu van alloñándose d’ellos na clasificación. RB tampocu nun sacó gran cosa d’esti gran premiu col abandonu yá nomáu de Tsunoda y con Ricciardo nel décimotercer puestu. Sicasí, entavía tán perriba del restu d’equipos de la parte baxo de la tabla.

Y asina, dexamos Bakú pa poner rumbu a Singapur pal viniente gran premiu que yá se disputa esta selmana. Mientres llega’l día y la nuestra previa, podéis ver tolos númberos que dexó’l gran premiu n’Azerbaixán equí.

De vuelta de les vacaciones, la F1 retornó al circuitu de Zandvoort, nos Países Baxos, au nos últimos tres años Max Verstappen foi’l dominador absolutu de les carreres con poles y victories. Sicasí, esti 2024 ya confirmó na so primer parte que nun díbemos repitir patrones del pasáu y aportábemos al circuitu neerlandés con duldes de que’l pilotu de casa pudiera facer otra vuelta lo que fizo nel pasáu.

Y nun nos equivocamos. Con nueves meyores nos sos coches, McLaren foi bastante superior al restu demientres tol fin de selmana, nun circuitu con condiciones cambiantes no meteorolóxico y dalguna qu’otra bandera colorada que llimitaron el tiempu en pista. El sábadu, los entrenamientos llibres fueron en moyao pero la clasificación en seco, y un fuerte accidente de Logan Sargeant condicionó tola sesión por cuenta’l tiempu que llevó arreglar les proteiciones y dexar tol circuitu en bones condiciones. Con estes blimes aportábemos a la clasificación na que Lando Norris foi superior en tiempu yá non sólo a Max Verstappen, qu’entavía foi quien a ser segundu ensin tener el coche más rápidu, si non tamién al so compañeru d’equipu, Oscar Piastri, que tuvo de conformase col meyor tercer tiempu. Per detrás, suerte estremao pa los Mercedes, con Russell cuartu pero Hamilton nel puestu doce y sumando una penalización por bloquiar a Sergio Pérez que lu terminó dexando nel puestu quince. Ferrari fexo un pocu lo mesmo, con Leclerc partiendo sextu pero Sáinz nun siendo quien a entrar na Q3. El madrilanu malpenes tuvo tiempu de probar la pista en condiciones normales, depués de tener un problema cola caxa de cámbeos el vienres que lu dexó ensin rodar cásique tola segunda sesión de llibres, dalgo que tampocu nun pudo facer el sábadu na tercer sesión polo que yá comentemos. Sergio Pérez foi quien a clasificara nuna quinta posición que sigui sabiendo a poco pero que maquiella les posiciones de la primer tanda de carreres d’esta temporada y que’l mexicanu tien preciso escaecer ya superar. Aprovecharon la cayida en Q2 de Sáinz y Hamilton tanto Gasly como Albon, qu’acompañaron a los Aston Martin nes posiciones finales de la Q3 pero Albon foi descalificáu y tuvo de salir muncho más abaxo na parriella. El fin de selmana pintaba oscuru pa Williams. La posición dexada por Albon permitió a Sáinz acabar partiendo dende la décima posición.

El domingu les condiciones de carrera fueron en seco, ensin amenacia d’agua pa la carrera. La clave taba na salida que ficiera Lando Norris, dalgo que yá-y tien torgao la posibilidá de victoria en delles carreres pasaes. Con too y con eso, l’inglés tornó otra vuelta a tener una salida non mala pero sí pior que la de Verstappen, que nun tuvo problema dalu pa superalu ensin casi llegar a la primer curva. Coles dificultaes que, en principiu, presenta Zandvoort p’adelantar, albidrábemos que’l pilotu de Red Bull namás tendría de dedicase a xestionar bien la carrera y dir metiendo distancia col McLaren de Norris, que tinía a Russell xusto per detrás depués de que Piastri perdiera posición con él. Sicasí, la distancia nun llegaba y pasín ente pasu, el McLaren de Norris diba averándose al Red Bull de Verstappen y acababa por superalu cola mesma facilidá cola qu’enantes se viera sobrepasáu na salida. Dende esi momentu, la carrera de Norris llimitose a nun cometer errores y, él sí, dir metiendo distancia con Verstappen. Foi evidente dende bien temprano que’l McLaren tamién yera mui superior en carrera y vímoslo claro coles paraes, nes que Norris pudo permitise parar cuando-y vieno meyor ensin necesidá de reaicionar a les aiciones de Red Bull, dalgo que sí víemos n’otres carreres. Col gran premiu controláu, l’inglés foi agrandando la so distancia con Verstappen, mientres l’aición vinía per detrás con Piastri peliando con Russell y Leclerc por esi tercer güecu nel podiu. Russell nun pudo facer una bona xestión de les gomes y pronto se descolgó de la llucha ente Leclerc y Piastri, que’l monegascu acabó ganando. Foi un bon domingu pa Ferrari na que les estratexes funcionaron y el ritmu, anque non al altor de los dos primeros, foi lo suficientemente buenu como pa llevalos al podiu y colocar a Sáinz en quinta posición, per detrás de Piastri. L’australianu tuvo siempre dalgo per detrás del so compañeru d’equipu pesie a les meyores nel so coche, pero suma bonos puntos que coloquen a McLaren a namás trenta de Red Bull nel mundial de constructores.

Per detrás de Sáinz quedó Sergio Pérez, otru puestu discretu pa lo que se demanda d’él, pero que suma puntos pal equipu. Foi además quien a quedar per delantre de dambos Mercedes, que tamién tuvieron suerte estremao nesti gran premiu. Russell nun taba mui contentu n’acabando’l gran premiu mientres Hamilton, qu’acabó en puntos depués de salir dende bien atrás, comentaba tenelo pasao bien demientres la carrera. Per detrás d’ellos acabó Gasly, que suma dos bonos puntos p’Alpine nuna época de munchu cámbeu nel equipu francés y zarró Fernando Alonso. Aston Martin continúen a la gueta del rendimientu qu’amosaben l’añu pasáu y que nun terminen d’atopar nesti. De fechu, Lance Stroll namás pudo ser décimoterceru.

Nico Hülkenberg tuvo de conformase con ser undécimu mientres el so compañeru d’equipu acabó décimooctavu depués d’entamar dende’l pitlane por camudar pieces na so unidá de potencia. Nun foi un bon gran premiu pa Haas con abondes salides de pista y munchos problemes tanto dientro como fuera del circuitu. Per detrás, nel puestu doce, acabó Daniel Ricciardo, dellos puestos per delantre del so compañeru Yuki Tsunoda que namás pudo acabar décimosetimu. Nengún de los dos pilotos tien el so futuru aseguráu na escudería ya’l fechu de quedar fuera de puntos, anque seya per delantre del to compañeru d’equipu, nun abulta suficiente pa la maquinaria de Red Bull que yá entama a mirar pa otros llao a la gueta sustitutos.

Pocu que cellebrar tamién p’Albon, qu’al final nun pudo recuperar más qu’unes poques posiciones depués de la so descalificación y acabó per detrás de Stroll, siguíu d’Ocon que yá paez tar fuera d’onda colos intereses d’Alpine depués de la so anuncia de qu’en 2025 va correr con Haas. Logan Sargeant quedó per detrás del francés. El pilotu americanu ta nel puntu de mira depués del grave accidente del sábadu que torgó la so sesión de clasificación y que suma a la factura y los gastos extra de Williams que nun tán como facer desembolsos d’esa cantidá. Coméntase que Sargeant podría quedar fuera del equipu como primer pilotu yá dende la viniente carrera en Monza.

Zarraron la clasificación los dos Sauber, con Bottas per delantre de Zhou y otra carrera enllena de problemes y probe rendimientu que suma a les duldes sobre lo que pueda ser el futuru del equipu que dende 2025 va ser Audi. Como tán agora mesmo, van tener que camudar muncho les coses si quieren ser mínimamente competitivos en llegando 2026.

Ponemos el ramu a esti gran premiu dexándovos tolos númberos y resultaos que nos dexó y que podéis consultar equí. Nós ponemos rumbu a Italia, el míticu circuitu de Monza pa unu de los grandes premios más especiales de la temporada.

El añu pasáu cuando tiníemos una carrera atípica o un ganador inesperáu yera una gran sorpresa, como foi’l casu de la victoria de Carlos Sáinz en Singapur. Esti 2024 ta tornándose nun vezu lo de nun cuntar con Red Bull a lo menos pa ganar la carrera. Y ye qu’otra vuelta tuvimos otru ganador que nun ye Max Verstappen, anque esta vegada l’holandés tornó a ser el pilotu calculador al que tamos avezaes. Verstappen partía con una penalización de diez posiciones pa la carrera, pero eso nun impidió que fuera’l más rápidu’l sábadu. Sorprendió más ver a Leclerc en segundu llugar y más entavía a Pérez en terceru. Les condiciones de la pista, moyada, permitieron dellos cambios que, por exemplu, dexaron a McLaren dalgo más abaxo de lo que vien siendo vezu estes últimes carreres.

Sicasí, el domingu la hestoria foi bien distinta ya’l sol foi protagonista absolutu. Los equipos cuntaben con un bon númberu de gomes por nun tener usao nenguna’l sábadu demientres la sesión de clasificación y la degradación d’elles yera una preocupación de partida. Carlos Sáinz foi l’únicu de los diez primeros que tentó dalgo diferente al restu partiendo con gomes dures cuando’l restu lo facía con medios.

La salida foi limpia pero otra vegada volvimos a ver a Norris perdiendo posiciones. Esta vegada l’inglés diba dise llargu na primer curva, lo que permitió a Hamilton y Sáinz adelantalu. L’inglés acabaría recuperando la posición a Sáinz, pero non a Hamilton. Foi una carrera mui estratéxica en tolos garaxes, coles paraes siendo clave pa recuperar o perder posiciones. Verstappen foi ún de los primeros en parar, provocando una estampida de paraes al restu de pilotos que lu arrodiaben, sacante Sáinz que siguía cola so estratexa de partida, estremada del restu, y Norris, que foi a pie cambiáu demientres tola carrera y perdió dafechu la posición tamién col holandés.

Los más de los pilotos escoyeron una estratexa a dos paraes, hubo quien fexo más, pero George Russell, yá conocíu polo bien que xestiona gomes, decidió apostar pola parada única, dalgo que lu acabó colocando no más alto de la clasificación. Abultaba imposible que fuera quien a aguantar con eses gomes tantu tiempu, pero l’inglés foi’l primeru en ver la bandera a cuadros, siguíu mui de cerca pol so compañeru d’equipu Lewis Hamilton, que pocu a pocu foi averándose pero que nun lu pasó. El viernes les coses pintaben bien mal pal equipu alemán que tuvo de revertir los cambios qu’incorporara, tornando al coche qu’usaron en Silverstone y Hungría. Per detrás de dambos Mercedes, a pocu más d’un segundu llegó Piastri que foi aprovechándose de la batalla ente los Mercedes pa dir acortando distancies. Sicasí, l’australianu nun tendría tiempu siquier d’entrar en DRS de Hamilton enantes del final de la carrera.

Pero, el resultáu de los tres primeros diba camudar un pocu depués de la fin del gran premiu cuando conocimos la descalificación de Russell por nun llegar al pesu mínimu requeríu pola FIA en rematando’l gran premiu. Ello ye que’l ganador ye Lewis Hamilton, siguíu de Piastri y con Leclerc terceru, masimizando les oportunidaes de Ferrari nun gran premiu nel que nun cuntábemos muncho con ellos. Verstappen nun pudo alcanzar el podiu, poniendo otra vuelta sobre la mesa les carencies que ta teniendo esti añu’l Red Bull, o la meyora de rendimientu del restu, en comparación con 2023. Norris tuvo de conformase con ser quintu.

Otra deceición llevaría Pérez, que depués de partir segundu na parriella, sólo pudo sumar el puntu de la vuelta rápida, y foi sétimu. El so futuru, como yá vinimos diciendo, ta más que cuestionáu, y nun sedría raro que’l contratu que firmó a finales de xunu anovando por un añu con opción a otru quedara en nada. Per detrás d’él atopamos a Fernando Alonso y zarraron los diez primeros Esteban Ocon, que supo aprovechar bien la velocidá del Alpine y el bon rendimientu del coche esti fin de selmana, y Daniel Ricciardo.

L’únicu abandonu del gran premiu foi Zhou Guanyu qu’afonda nel mal momentu de forma del equipu Sauber esta temporada.

Parón braniegu y munches coses nes que pensar, ente descansu y descansu. Mientres torna la F1 n’Holanda, vos dexamos qu’echéis equí un güeyu a los númberos que dexó’l gran premiu de Bélxica.

Hungría ye un circuitu míticu que suel prestar a tol mundu pero que, ye verdá, carga col sambenitu de ser un trazáu nel qu’adelantar ye complicao y por eso los grandes premios nun suelen dar muncho de sí. Sicasí, esti domingu vimos daqué diferente y sumamos otru ganador a la llista de 2024. ¡Quién nos lo diba dicir cuando entamamos la temporada en marzu!

McLaren llevaron la delantera demientres tol fin de selmana y nun foi por eso sorprendente velos no cimero na sesión de clasificación del sábadu, con Lando Norris sumando otra pole más. Sicasí, l’inglés nun diba facer valer esi primer puestu, que perdería col so compañeru d’equipu al pocu d’entamar el gran premiu del domingu. Ye una de les debilidaes del pilotu de Bristol, el nun ser quien afinar les sos salides, perdiendo casi siempre posiciones y munches vegaes nun siendo quien a recuperales.

Lo que quedó claro dende l’entamu ye que la victoria, si too diba según lo previsto, diba ser pa un McLaren, porque nengún de los otros equipos yera quien a ponese siquiera al altor y de fechu, la batalla más intensa viviéronla precisamente los dos pilotos del equipu papaya por una mala xestión de paraes del equipu. McLaren quiso protexer a Norris de Hamilton, innecesariamente como llueu se vio, y lu paró primero qu’a Piastri, lo que favoreció al inglés colocándolu primeru y con bon ritmu. L’equipu nun quería torgar una victoria, la primera de la so carrera na F1, de Piastri, polo que pasó un bon ratu pola radio solicitando a Norris que devolviera la posición, dalgo que l’inglés acabó faciendo pero non ensin dar xera a los inxenieros y provocar más d’un apuru al equipu. La realidá yera que’l ritmu de Norris depués de la parada taba siendo meyor que’l de Piastri, pero l’equipu sentía, con razón, que-y tenía quitao’l primer puestu al australianu. A la fin, primer y segundu puestu pa McLaren, y tercer puestu pa Hamilton, que continua na sienda de la recuperación de Mercedes.

Quien nun tuvo un grna premiu tranquilu y asina s’encargó de facelo saber foi Max Verstappen. Nunca nun viéramos al holandés tan nerviosu y, anque suel ser un pilotu mui direutu na forma dirixise al so equipu per radio, lo del domingu yera pura frustración. Anque llidera’l campeonatu de pilotos ensin problema y Red Bull ta tamién relativamente tranquilu nel de constructores, la realidá ye que van socediénse les carreres nes qu’al equipu de la bébora enerxético y al so primer pilotu-y cuesta imponese como antaño. La situación interna del equipu nun debe ser tampocu la ideal, y too xunto ta dando un 2024 que tolos demás equipos tán queriendo, y sabiendo, aprovechar. Con Sergio Pérez tamién mui cuestionáu, ta claro que’l 2024 ta lloñe de ser l’añu tranquilu qu’esperaben en Red Bull.

Per detrás de los tres primeros, carreres más tranquiles del restu de pilotos, con Ferrari aprovechando la debilidá de Verstappen y quedando cuartu Leclerc y sextu Sáinz, delante y detrás del holandés respeutivamente. Siguiéronlos Pérez, Russell y Tsunoda siendo Stroll quien zarraría la llista de los diez primeros. El canadiense decidió desoyer les ordes d’equipu que-y pidíen que devolviera la posición a Alonso depués de que nun funcionara la so estratexa p’adelantar a Tsunoda creando della polémica depués de la carrera. Aston Martin continúa perdíu nes posiciones de la mitá de la tabla ya’l suañu d’un podiu esti añu cada vegada abulta más llonxanu.

Per detrás ensin novedaes, namás señalar l’abandonu de Gasly. L’equipu Alpine paecía tener atopao la sienda de los puntos pero nesti gran premiu tornaron a ser l’equipu floxu que vimos entamar la temporada.

Equí vos dexamos tolos númberos que dexó’l gran premiu d’Hungría y ponemos yá rumbu a Bélxica pal últimu gran premiu enantes del parón braniegu.

Esti 2024 ta empeñándose en facenos recuperar esi amor pola F1 que dalgunos perdieran n’años pasaos cola cierta monotonía de ver ganar siempre al mesmu pilotu. Aportar a Silverstone ye siempre especial, pero si pa enriba’l circuitu regala una de les meyores carreres de lo que llevamos de la temporada, ye complicao nun tonar a namorase d’esti deporte.

Foi un fin de selmana con condiciones adverses no meteorolóxico pero mui prestoses no deportivo pa los fans de la F1. Primero, el sábadu, na llucha pol primer puestu na clasificación au vimos a Mercedes imponese non sólo a McLaren, qu’abultaben ser los más rápidos del fin de selmana, si non tamién a Max Verstappen, que tuvo de conformase con ser cuartu na parriella. La pole foi pa George Russell, tercera de la so carrera. Siguiolu Lewis Hamilton, que siempre se crez cuando cuerre en casa, y Lando Norris en tercer llugar. El domingu apuntaba una carrera bien interesante.

Y asina foi cuando supimos, amás, qu’había amenacia d’agua demientres la carrera, dalgo que yá nun sorprende cuando corremos en Silverstone. Ello ye que la salida foi limpia pero intensa y pronto vimos tanto a Norris como a Verstappen tentar de dir superando a los Mercedes, qu’al principiu abultaben más vulnerables. De fechu, Norris llegó a lliderar la carrera, de la que’l cielu se diba oscureciendo y la climatoloxía diba camudando. Foi nesi puntu nel que Lewis Hamilton se colocó per delantre del so compañeru d’equipu, dexando claro otra vegada lo muncho qu’esfruta eses condiciones. Los pilotos de lo cimero de la clasificación allargaron la parada y yá non sólo tiníen de preocupase polos sos rivales si non tamién por nun tener una salida de pista por cuenta l’agua, que diba medrando n’intensidá pero ensin llegar a moyar demasiao’l trazáu.

Peles posiciones d’atrás sí qu’hubo quien decidió arriesgase y montar gomes intermedies cuando asomó l’agua, pero l’apueste foi mui precipitada y l’agua nun aportó en más cantidá hasta un ratu depués. Asina vimos a pilotos como Leclerc y Pérez estrozar los sos neumáticos y dir perdiendo posiciones, viéndose obligaos a facer otra parada cola que nun cuntaben. Naide que montara gomes intermedies nesi momentu consiguió saca-yos rendimientu y nun foi hasta más tarde cuando sí se pudieron montar.

La carrera abultaba bien encaminada pa McLaren nel volante de Norris, pero la segunda parada diba ser determinante. Los dos McLaren tuvieron mui bon ritmu na primer mitá de la carrera, y Verstappen, pela contra, mui floxo. Sicasí, too foi camudando, especialmente a partir de la segunda parada, na que Norris montó gomes blandes y Verstappen dures. Hamilton, que llideraba, tamién apostó poles gomes blandes, y foi quien a abrir distancia con Norris que pocu a pocu foi perdiendo tarrén con Verstappen que, en metiendo les gomes en temperatura, foi ameyorando ritmu. L’holandés acabó pasando al de McLaren y tentó de dir a por Hamilton, pero nun tuvo vueltes suficientes.

Per detrás, Piastri tamién rodaba a mui bon ritmu, anque ensin capacidá d’alcanzar a los del podiu, y Ferrari namás pudo ser competitivu con Sáinz depués d’arruinar cola so estratexa de gomes la carrera de Leclerc. Russell tuvo qu’abandonar por un problema hidráulicu qu’obligó al equipu a retirar el coche de la carrera. L’ausencia de Leclerc, Pérez y Russell nes posiciones de puntos aprovecháronla Nico Hülkenberg, qu’acabó sextu per detrás de Sáinz, siguíu de los dos Aston Martin, con Stroll per delantre d’Alonso. L’asturianu tentó d’esguilar posiciones cola estratexa de parar primero’l so compañeru qu’él, pero nun pagó la pena y acabó quedando per detrás, nel octavu puestu. Detrás d’él, sumando puntos otra vegada pa Williams, aportó Alexander Albon y zarró los puntos Yuki Tsunoda.

Amás del abandonu de Russell, tamién abandonó Pierre Gasly. Hai que señalar el puestu once de Logan Sargeant, que tuvo una carrera inspirada xusto cuando s’entama a falar del so futuru lloñe de Williams. Deceición otra vuelta pa Sauber, que nun terminen d’atopar la tecla que-yos permita salir de les posiciones baxes de la parriella.

Y asina, aportamos al final de la primer tanda de tres grandes premios siguíos d’esta temporada. En dos selmanes aporta Hungría, otru circuitu míticu y que, viendo lo que tamos viendo esti 2024, de xuru nos dexa muncho de lo que falar. Demientres llega’l día, equí vos dexamos tolos númberos de la carrera d’esti fin de selmana en Silverstone.

Les montañes d’Austria traxéronnos esti domingu ecos d’actitudes del pasáu, coses que vimos nun hai tanto y qu’agora vemos replicaes dellos años depués. Como vos vinimos cuntando en resumes pasaos, Max Verstappen sigue siendo’l candidatu más importante a ganar el títulu esti añu. Sicasí, nun ta teniendo un añu tan placenteru como lo foi 2022 nin por asomu 2023. Esti 2024 ta teniendo más d’un competidor anque’l que más lu ta apertando ye Lando Norris, confirmando la torna de McLaren a lo cimero de la F1.

Ello ye que pesie al dominiu nes sesiones de clasificación y na carrera al sprint del holandés, onde pesie a los intentos nengún pilotu pudo con él, el domingu viose na situación de tener que lluchar la so posición por una serie de problemes a los que nun ta avezáu. Yá nel pasáu vimos que cuando ta sometíu a presión negativa, ello ye cuando les coses nun salen necesariamente como él quier y amás tien a dalguién presionando per detrás con posibilidaes de pasalu, la xestión del holandés ye, cuando menos, deficiente. Vímoslo en 2021 na forma de xestionar los sos enfrentamientos con Lewis Hamilton, y vímoslo n’Austria esti domingu.

Entamó’l domingu con Verstappen saliendo bien y Norris, como davezu, teniendo de defendese de los de detrás pola so dificultá pa cuayar bones salides. Russell volvió a tener una salida inspirada y per detrás más d’un pilotu foi quien a adelantar posiciones con respeutu a la salida. Verstappen foi pocu a pocu poniendo tarrén pol mediu y Norris aguantaba, calteniendo a los demás per detrás.

Sicasí, coles primeres paraes, col baille de cambiu de gomes, entamamos a ver los primeros desaxustes en Red Bull. Verstappen nun taba cómodu coles ruedes, el coche nun reaicionaba como él quería y Norris cada vegada presionaba más. La entrada de Verstappen a boxes foi replicada por Norris por dos vegaes y que na primera tuvo de frenar un pocu pa dexar pasar al holandés ya evitar un choque ente ellos, dalgo que los comisarios nun consideraron punible. Sicasí, dende esi momentu, vimos dalgo a lo que nun tamos avezaos que ye a un Verstappen desconcentráu y preocupáu al volante. O más bien a un Verstappen incapaz de controlar al 100 por cien la situación de carrera. Pocu a pocu Norris foi clavando tiempos, recortando distancies, y Verstappen siendo más irregular. La segunda parada del holandés foi lenta y permitió a Norris averase dalgo más. EL pilotu de Red Bull siguía incómodu col coche, y tuvo dellos momentos de salise de pista, destrozando dafechu les gomes.

Foi nesos momentos de debilidá cuando Norris s’arrimó más ya tentó de pasar al so rival delles vegaes. Tuvo la oportunidá de facelo pero fuese llargu y tuvo de devolver la posición. Verstappen nun paecía dispuestu a permitir que Norris lu volviera a adelantar y asina s’aseguró d’ello acabando cola carrera del inglés cerrándolu na curva pa que nun pudiera pasalu y de pasu reventando los neumáticos de dambos nel choque dalgo que foi fatal pa Norris que terminó abandonando. Verstappen tovía tuvo la oportunidá d’entrar, poner gomes blandes y acabar la carrera en quinta posición, salvando los muebles d’una carrera na que partía como favoritu. Los comisarios sancionáronlu con diez segundos, pero l’efeutu nun foi importante porque la distancia col sextu, Nico Hülkenberg, yera mayor. Norris, ensin embargu, nun pudo ver la bandera a cuadros y recibió una sanción de cinco segundos por llímites de pista.

Fuera d’esti confliutu tenemos a los tres grandes beneficiaos: per un llau George Russell, qu’heriedó una victoria cola que nin suañaba al entamar el gran premiu viendo’l ritmu de Verstappen y Norris; per otru Oscar Piastri, que tuvo nes sos manes el ganar pero al que-y faltaron vueltes; y Carlos Sáinz, que compensó’l mal resultáu d’un Leclerc con problemes dende la salida por un toque con Pérez y Piastri. El cuartu sedría Hamilton, que nun pudo facer muncho más y quintu el yá mentáu Max Verstappen. Per detrás, mui bona carrera de Haas con Hülkenberg sextu y Magnussen octavu; Pérez namás pudo ser sétimu, n’otru fin de selmana más bien discretu del mexicanu. Los dos últimos puestos de puntos ocupáronlos Ricciardo y Gasly.

Fuera de puntos quedaron Leclerc, como yá diximos, depués d’un incidente con Pérez y Piastri que lu dexó fuera de la llucha pol podiu dende bien temprano. Alonso tuvo una carrera pal escaezu, otra más, na que depués de recibir una sanción de diez segundos por un choque con Zhou, sólo pudo acabar décimoctavu. Hamilton y Albon tamién recibirían sanción por cruzar la llínia d’entrada al pitlane al facer la so parada.

Nun perdemos el ritmu porque ponemos yá rumbu a Silverstone pal siguiente gran premiu de la temporada, nel tercer d’esta primer tanda de tres grandes premios siguíos programaos nel calendariu de 2024. Demientres aterrizamos, equí vos dexamos tolos númberos d’esti fin de selmana de carreres nel Red Bull Ring.

El desenvolvimientu de les últimes carreres de F1 de la temporada 2024 ta siendo talu qu’hasta les carreres qu’en teoría podríen ser más aburríes tán resultando ser, mínimo, interesantes. Ye’l casu de Barcelona, que nel papel nun ye un circuitu qu’emocione poles carreres que tenemos visto n’él, anque nos diga muncho del rendimientu de los equipos pa lo que queda de temporada.

Sicasí y anque la victoria la llevó’l de siempre nos últimos años, volvemos a sintir esa sensación de que les coses yá nun son tan cencielles como dicir que siempre gana’l mismu. Empecemos a notalo dende’l sábadu, cuando la pole foi pa Lando Norris. El británicu foi quien a facer una vuelta perfeuta como él mesmu almitía. La diferencia con Verstappen foi mínima, pero tornamos a ver al holandés na segunda plaza de la parriella de salida.

El domingu, Norris perdió tola ventaya de la pole na recta de salida. Mientres tentaba d’evitar que Verstappen lu adelantara, un Russell enchufáu fizo la salida más espectacular de lo que llevamos de temporada pa colocase primeru partiendo cuartu, pasando a Norris, a Verstappen y tamién al so compañeru d’equipu Lewis Hamilton que partía terceru. Nun diba durar muncho yá que, en desfaciéndose de Norris, Verstappen nun diba tardar en facese cola primer posición. Abultaba que l’holandés tinía muncho más ritmu que’l resto de los sos competidores, y asina foi nel primer tramu de carrera, pero col pasu les vueltes fuimos viendo que’l McLaren de Norris tinía potencial pa ganar en Barcelona.

Pero, como-y vien pasando en delles carreres yá al pilotu inglés, quedose curtiu en vueltes y Verstappen entró con namás un marxe de dos segundos con respeutu a él. Sicasí, l’holandés xestionó bien la carrera, les paraes y la estratexa, pesie a almitir que, agora mesmo, nun tien el coche más rápidu. Norris tentó de facer too distinto al restu y funcionó, pero non pa ganar.

Per detrás d’estos dos pilotos, llegó Lewis Hamilton, que retorna al podiu dempués de munchu tiempu y munchos altibaxos. El británicu taba percontentu col rendimientu del coche y col de so, y xunto a la cuarta posición de Russell permítenos dicir que’l pasu alantre de Mercedes nun foi un espeyismu nin cosa del gran premiu de Canadá. Igual ye pronto pa dicir que tán per delantre de Ferrari, pero les blimes paez que yá tán puestes.

Ferrari nun pudo facer muncho más que quedar quintu y sextu (Leclerc, Sáinz) nun fin de selmana daqué descafeináu pa dambos pilotos. Apuraron les meyores que trayíen pa más alantre pero nun paez que tuviera l’efeutu inmediatu deseyáu qu’esperaben. Xusto per detrás, Piastri tuvo de conformase con ser sétimu en carrera depués d’una Q3 desastrosa na que ni siquier pudo facer tiempu, teniendo que partir décimu. Siguiolu Pérez qu’anque esta vegada foi quien a entrar en Q3 volvió a tar mui per detrás del so compañeru d’equipu. Zarraron la clasificación de los diez primeros los dos Alpine, que van pocu a pocu esguilando na clasificación, yá son sétimos nel mundial de constructores, y tornándose en regulares dientro de los puntos.

Foi un fin de selmana pal escaezu n’Aston Martin. Fernando Alonso yá avisaba de que’l coche diba dir mal en Montmeló, pero lo que vimos en pista abultonos pior que lo qu’albidraba l’asturianu, que quedó nel puestu doce con Stroll nel catorce. Tampoco nun tienen motivos pa sorrir en RB que tuvieron desapaecíos demientres cásique tol gran premiu. Los dos Haas llevaron penalizaciones, Magnussen por adelantase na salida y Hülkenberg por dir demasiao rápido nel carril de paraes, sanción que tamién llevó Tsunoda. Les carreres de Sauber y Williams siguieron la llínia de lo que vinimos viendo hasta agora colos dos equipos, sacante delles esceiciones.

Ensin casi descansu ponemos yá la vista n’Austria, au viaxa la F1 pal viniente fin de selmana. Mientres llega’l momentu de que ruxan los motores de los F1 otra vuelta, equí vos dexamos tolos númberos d’esta carrera nel circuitu de Montmeló.