Category: Carreres

El final d’una temporada de F1 siempre dexa sensaciones mecíes: per un lláu’l pensar en tolos díes que queden pa qu’entame una nueva temporada, per otru’l tastu del gran premiu que ta acabante de terminar, anque seya intrascendente como esti añu y el despidise de delles cares conocíes que dexen la competición. Abu Dhabi nun brilló como lo fexo l’añu pasáu: aterricemos en Yas Marina col mundial decidíu y con tol interés puestu nel subcampeonatu y la batalla d’Aston Martin con Alfa Romeo pol sextu puestu. El restu de batalles si non definitives paecíen yá remataes, como llueu se confirmó.

Sicasí, Abu Dhabi 2022 va quedar na memoria de les persones que siguimos esti deporte por ser l’últimu gran premiu de Sebastian Vettel na máxima competición del motor. Ye verdá que l’alemán llevaba años ensin ser competitivu, y que los sos cuatro campeonatos mundiales paecíen lloñe nel tiempu, pero tamién ye verdá que col pasu de les temporaes nun abultaba posible pensar nuna parriella de F1 na que nun tuviera presente. Y creyemos que nun somos los únicos en pensar esto viendo toles reaiciones a tolos niveles, tanto d’equipos como de compañeros pilotos y prensa pa despidir al alemán: un campeón dientro y fuera de les pistes.

Depués de la gran carrera que vivimos n’Interlagos va una selmana, abultaba complicao qu’Abu Dhabi pudiera superalo, más llegando como llegábamos con cásique too dicho. Y asina foi: Abu Dhabi nun algamó la intensidá del añu pasáu, anque sí tuvimos momentos entreteníos pendientes como tábemos de ver si Sergio Pérez diba ser segundu o si Leclerc sedría quien a maquiellar un pocu una temporada descafeinada pa Ferrari.

El sábadu nun hebo sorpreses reseñables na sesión de clasificación, más allá de que Vettel fuera quien a metese ente los diez primeros y Fernando Alonso non. No cimero, Max Verstappen consiguió sumar una nueva pole casi ensin esfuerciu, como cásique tola temporada, y Sergio Pérez sedría segundu, con Leclerc xusto detrás. Los Mercedes despistaron un pocu porque paecíen tener bon ritmu nos llibres pero nun fueron quien a traducilo tanto na sesión de clasificación.

El domingu quedaba por ver si Verstappen fadría daqué maniobra pa echar un gabitu al so compañeru d’equipu depués de la selmana de crítiques feroces escontra él pola so actitú en Brasil. Pero pronto vimos que nun diba ser el casu y que l’holandés nun diba desaprovechar la oportunidá de sumar otra victoria al so palmarés. Checo diba tener que trabayase la so posición y foi a dar con una bona estratexa de Ferrari que fexo valer una parada y una xestión de neumáticos meyor de lo que cuidaben. Nun foi’l casu en munches ocasiones nesti mundial, pero esti domingu Ferrari tuvo al altor de les circunstancies.

Nun foi una salida accidentada y lo que vimos sí foi intentos claros dende’l principiu de Pérez por tener pasar a Verstappen, ensin éxitu, y de Leclerc por pasar al propiu Checo, tamién ensin fortuna. Los Mercedes salieron bien anque Russell perdió la so posición con Lando Norris nel McLaren. Lo único reseñable d’estos primeros metros foi la batalla ente Hamilton y Sáinz qu’acabó col inglés saliéndose pola escapatoria presionáu pol madrilanu y dando un bote col coche que comprometió de dalguna manera la so carrera. L’inglés tuvo de devolver la posición a Sáinz y nun se penalizó a nengún de los dos. Dambos pilotos diben seguir dando espectáculu nos metros siguientes, mientres los d’arriba diben metiendo distancia con ellos y los d’atrás se-yos diben averando. Al mesmu tiempo qu’ellos, Esteban Ocon y Sebastian Vettel yeren protagonistes de la so propia batalla por ser octavos na clasificación.

Hamilton entamó a baxar un pocu’l ritmu y hacia la vuelta nueve, depués de que Sáinz lu dexara atrás, el so compañeru d’equipu, contrariáu por tar de repente tan averáu al inglés, foi’l siguiente en pasalu. Nun pintaba bien pa Hamilton. N’entamando’l baille de paraes, les coses fueron moviéndose na clasificación ente los que dedicidieron parar primero, los qu’allargaron la parada y decidieron una estratexa contraria al restu. George Russell tuvo un problema nel so primer pitstop, que lu retuvo de más y que llueu forzó que saliera de forma poco segura de la que pasaba Norris pol carril de pit, lo que traxo una penalización pal inglés de cinco segundos.

El primer abandonu de la carrera foi Fernando Alonso que terminó la so aventura con Alpine de la pior manera posible, ensin poder ver la bandera a cuadros: un problema de fuga d’agua acabó col gran premiu del asturianu enantes de tiempu, na vuelta ventiocho. Sedría Ocon l’únicu que sumaría p’Alpine y l’equipu francés pudo maximizar la renta de puntos que tinía con McLaren que n’Abu Dhabi sí puntuó con dambos pilotos pero que sedría insuficiente pa ponese cuartos. Nengún de los dos equipos tuvo una temporada brillante y a McLaren se-y suma’l fechu de tar puntuando casi cada carrera con namás un pilotu.

Na vuelta treinta y nueve Mick Schumacher y Nicholas Latifi veríanse envueltos nun incidente causáu pol pilotu alemán que causaría un pinchazu al canadiense y tamién el so abandonu. El pilotu de Haas sedría penalizáu con cinco segundos, anque él sí pudo continuar la carrera y ver la bandera a cuadros per delantre del so compañeru Kevin Magnussen y nel día de la so despidida de Haas.

La estratexa a dos paraes escoyida por Red Bull pa Checo Pérez obligaría al mexicanu a recuperar tarrén perdíu depués de la segunda parada cuando’l so rival Charles Leclerc rodaba cómodu en segundu llugar con namás trece vueltes pa terminar el gran premiu. La mala suerte del pilotu de Red Bull foi qu’en saliendo de boxes se fue llargu, perdiendo tiempu pa compensar esi erru y teniendo que pasar a pilotos faciendo la so propia carrera. Amás, Ferrari y más concretamente Leclerc taben xestionando mui bien les sos gomes, faciendo funcionar bien la estratexa escoyida a una parada coles gomes más dures.

Pesie al rendimientu del principiu, Hamilton diría recuperándose, y de fechu sedría ún de los que peliaría con Pérez pol tercer caxón del podiu nesti gran premiu pero’l futuru del inglés nun diba ser ver la bandera a cuadros. Na vuelta cincuenta y cinco l’inglés comunicaría por radio problemes colos cambios, a lo que l’equipu respondería que teníen dalgún problema hidráulicu que forzaría’l so abandonu.

Pocu más diba pasar depués d’esto: victoria númberu quince nesta temporada pa Max Verstappen, segundu puestu pa Leclerc, en carrera y nel campeonatu de pilotos y terceru pa Sergio Pérez, mesmo en carrera que nel campeonatu. Ferrari foi quién a caltener el segundu llugar tamién nel mundial de constructores y Mercedes tuvo de conformase col tercer puestu. Sáinz terminaría cuartu con Russell xusto detrás en quintu llugar. Sextu foi Norris siguíu d’Ocon, Stroll, Ricciardo y Vettel. Como yá diximos, pesie al abandonu d’Alonso, Alpine amarró’l cuartu llugar nel mundial de pilotos y Aston Martin empató con Alfa Romeo, pero queden sétimos por cuenta los otros resultaos de la temporada.

Per detrás, carrera deceicionante de los dos pilotos d’AlphaTauri y floxa de los d’Alfa Romeo, con Williams tamién cásique desapaecíos. Haas tampoco nun puntuó.

Y asina foi, asina remató la temporada 2022, ventidós carreres y munchos meses depués. Si miramos atrás y pensamos lo que fuimos viviendo toes estes selmanes de competición, quiciás nun pensemos nesti 2022 como ún de los memorables na historia, pero tuvo dellos momentos intensos ya interesantes. Sicasí, col telón baxáu, la mirada ponse agora nel 2023 y entama la pre-temporada. Nosotros recoyemos pero nun vamos dir mui lloñe: siguiremos pendientes de l’actualidá de la F1 y de toles novedaes que se vaigan produciendo. De momentu, vos remitimos otra vuelta al nuestru post de la silly season, que tenemos actualizáu coles noticies no que cinca’l mercáu de pilotos que, en principiu, yá taría zarráu. Vos dexamos tamién la información del calendariu 2023 pa que vaigáis faciendo planes pal añu que vien.

Alcordaivos que la F1 nun termina del too n’Abu Dhabi pues estos díes van tar faciéndose test nel circuitu de Yas Marina.

Xapón retornó al calendariu y fízolo con bien de coses pa comentar en tolos díes nos que l’eventu tuvo llugar. Depués de que nun se compitiera ellí dende 2019, la vuelta al circuitu xaponés yera una bona noticia pa tolos pilotos, los equipos y sobremanera los fans nun territoriu au la F1 se vive a otru nivel. Esti 2022 nun deceicionó, anque hebo delles coses que comentaremos que traxeron pantasmes del pasáu al trazáu de Suzuka.

La lluvia nun quixo perdese’l fin de selmana formuleru en Xapón y condicionó cásique toles sesiones del gran premiu, sacante la de clasificación, que siguió’l pronósticu de dominación de Max Verstappen, quien consiguió sumar otra pole que lu colocaba mui bien pal domingu consiguir el so segundu títulu mundial. Leclerc, xusto per detrás, vía como les sos opciones diben desapaeciendo, anque entavía quedaba la esperanza de que’l domingu apareciera otra vuelta l’agua y eso diera oportunidá a Ferrari de competir n’igualdá con Red Bull.

Pero non, nin les condiciones de moyao torgaron la victoria de Red Bull nin hebo nada que perturbara a Verstappen pa conducir camín del so segundu títulu. Y ye que nin siquier el fechu de que la carrera entamara con gomes intermedies pola cantidá d’agua en pista, nin el fechu de qu’una bandera colorada obligara a parar la carrera demientres un tiempu fueron impedimentu pa que Max Verstappen dominara’l gran premiu. Sólo’l repartu de puntos final pola obligación de recortar la carrera en tiempu paecía que podía ser una torga pa que l’holandés a la fin fuera campeón, pero nin eso foi causa.

Y ye que’l domingu entamó con muncho agua en pista y munches duldes sobre si’l gran premiu se diba cellebrar. Nun ye la primer vegada que Suzuka tien grandes premios en moyao, pero viendo les decisiones tomaes nel pasáu con respeutu a esti tema, nun yera d’estrañar el pensar nuna posible cancelación si’l tiempu nun permitía competir. Con too y con eso la carrera llegó a empezar, como diximos, con gomes intermedies, anque pronto quedó claro que quiciás la pista taba más pa gomes de lluvia estremo, porque l’agua nun paraba de cayer y yera imposible que secara l’asfaltu. La salida foi limpia, y casi tuvo Leclerc nes sos manes adelantar a Verstappen pero, como davezu, l’holandés aguantó la posición, la cual nun diba abandonar yá en tolo que quedaba de carrera. Per detrás hebo bastante tranquilidá y dellos adelantamientos y, eso sí, una visibilidá mui llimitada. De fechu, vimos a Vettel facer una bona salida adelantando dellos coches (depués d’un bon sábadu pal alemán en clasificación) pero viéndose afectáu poles condiciones de visibilidá y chocando con Alonso, anque ensin consecuencies pa nengún de los dos pilotos, más que la perda de posición pal alemán qu’acabó trompiando.

Sicasí nun tendríemos de dir muncho más allá pal primer incidente seriu de carrera. Por cuenta l’agua, el coche de Sáinz acabó escontra les barreres, rompiendo ún de los cartelos que les cubren, un cachu del que salió disparáu a pista y casi acaba impactando nel coche de Hamilton. Tábemos na primer vuelta de carrera y les condiciones diben siendo cada vegada peores a lo que se sumaron dellos incidentes que ficieron que munchos tascáramos la cabeza y cuestionáramos si la F1 nun deprendió nada d’erros del pasáu.

Derivao del accidente de Sáinz y del trozu de cartel que comentábemos enantes, Gasly tuvo d’entrar a cambiar el morru del coche porque él nun foi quien a evitar el cartel y de fechu tuvo que facer la so parada con un trozu engancháu nel coche que cásique nun lu dexaba ver. El francés foi’l primeru en parar, como ye lóxico. Demientres lu víemos dir a boxes, el coche d’Albon dexó de funcionar obligando al tailandés a aparcar el so monoplaza nuna escapatoria y dar por terminada la so aventura en Xapón. L’accidente de Sáinz provocó la salida del coche de seguridá y mientres los coches se diben agrupando detrás, l’agua siguía cayendo ensin tregua. Gasly taba acabante d’entrar y diba mui retrasáu con respeutu al restu del grupu, tentando de ponese al so altor. Foi nesi momentu cuando’l francés s’atopó con una grúa que transitaba camín del incidente de Carlos Sáinz p’ayudar a remolcar el coche.

El pilotu d’AlphaTauri foi mui claru na radio, el so enfadu manifiestu, y ye que tábamos nel circuitu nel qu’un accidente con una grúa acabó cola vida del Jules Bianchi hai unos años. Nesi momentu nun se supo de quién foi la culpa, pero ta claro que nun cuntaben con que Gasly diba con tiempu perdíu a muncha distancia del restu de pilotos. De fechu, ún de los comisarios taba operando col coche de Sáinz, casi na mitá del trazáu cuando Gasly pasó del so llau nuna situación mui peligrosa tanto pal comisariu como pal pilotu. Y ye qu’hebo munches coses que nun se ficieron correutamente nesti períodu de tiempu y que traxeron a la mente los peores momentos del accidente de Bianchi. Ye verdá que se comentó si’l propiu Gasly diba demasiao rápido en pista cuando pasó de llau del accidente en situación de coche de seguridá, y de fechu foi penalizáu por ello (un drive through (venti segundos añadíos al so tiempu final que lu fizo quedar nel puestu dieciocho en cuenta’l diecisiete nel qu’acabara orixinalmente) y puntos na so superllicencia) pero nada nun xustifica la presencia de la grúa cuando él tovía taba nel trazáu. Nun teníemos fecho nin tres vueltes cuando la bandera colorada asomó.

La carrera tuvo parada un ratu demientres el cual los equipos tentaron de pensar nuna estratexa pa lo que sedría una carrera distinta depués de la bandera colorada y fórmules pa tar entreteníos ellos y tamién el públicu asistente. L’agua diba y venía hasta que finalmente se permitió competir y declarose que la carrera diba terminar por tiempu, lo que supunxo que se correrieren un pocu más de la mitá de les vueltes totales.

Reinicióse’l gran premiu con salida llanzada, y asina foi que Max Verstappen nun tardó en poner distancia con Leclerc y Pérez, agrandándola cada vegada más hasta terminar con un marxe de ventisiete segundos. L’interés de la carrera quedó pa les posiciones de detrás, especialmente la batalla ente Leclerc y Pérez, que foi ganando tarrén al monegascu cuando les gomes d’ésti se fueron degradando hasta casi quedar lises. Un error nos últimos metros enantes de ver la bandera a cuadros lu obligaron a salise del trazáu, consiguiendo ganar della ventaya, dalgo que lu acabó penalizando. Pérez acabó, asina, segundu, con Leclerc y la so penalización terceru. Con estes blimes, el campeonatu nun yera pa Max Verstappen y la confusión reinó dellos momentos nel circuitu porque cásique tol mundu suponía que, como la carrera nun superara’l 75% de les vueltes totales, se repatíen menos puntos y eso facía que Verstappen entavía nun fuera matemáticamente campeón. El casu ye que la norma contempla que si una carrera s’acorta y se da por terminada por bandera colorada, los puntos que se reparten son menos, pero como equí depués de la bandera colorada volvimos a tener carrera, aunque fuera más curtia, repartiéronse toos. Verstappen precisaba ganar y la vuelta rápida pa ser campeón si Leclerc yera segundu, pero cola penalización que dexó terceru al pilotu de Ferrari, l’holandés nun precisó la vuelta rápida y proclamose campeón. De fechu, la vuelta rápida foi pa Zhou Guanyu, que consiguió la primera de la so carrera en F1.

Tamién hubo muncha intensidá na batalla ente Esteban Ocon, que terminó cuartu, y Lewis Hamilton, que foi quintu. L’inglés nun foi quién a pasar al francés, pesie a toles vegaes que lo intentó y la poca distancia qu’había ente ellos. Russell nun tuvo un gran premiu brillante, casi paeciera qu’estes últimes carreres perdió dalgo con respeutu a les primeres, pero foi quién a puntuar sicasí. Alonso foi l’últimu en parar pa cambiar unes gomes que yá taben estrozaes, y gracies a les nueves pudo remontar posiciones y tamién puntuar, dalgo que de mano paecía complicao poles condiciones d’agua nes que tovía taba la pista. Nun hebo naide que pudiera plantegase siquier montar gomes lises porque la pista nun dio tregua, anque sí que hubo pasu por boxes. Tolos pilotos salieron con gomes de lluvia estremo, pero a midía qu’avanzaben les vueltes fueron viendo que les intermedies yeren una meyor opción, y por ello apostaron Sebastian Vettel y Nicholas Latifi. Dambos diben no fondero de la clasificación y la so apuesta foi bona porque, de fechu, dambos puntuaron. Dende que’l restu d’equipos fueron viendo que los tiempos de Vettel y Latifi yeren muncho meyores, el baille de paraes entamó, anque hebo dellos pilotos como Mick Schumacher, Daniel Ricciardo y Fernando Alonso que decidieron siguir coles gomes de salida. L’alemán foi l’últimu en parar, dalgo que condergó dafechu la so carrera yá que les gomes dexaron de funcionar ya’l so coche terminó siendo’l más lentu en pista.

Depués de Hamilton en quintu lugar, terminó Vettel, faciendo valer la so estratexa de ser el primeru en parar y despidiéndose de Xapón con un gran fin de selmana. Per detrás Fernando Alonso y George Russell, siguíos de Nicholas Latifi, qu’a la fin consigue puntos, y zarrando la clasificación de los diez primeros, el McLaren de Lando Norris. Alpine devuelve a McLaren la pelota y colócase per delantre depués de que sólo Norris pudiera puntuar, siendo namás décimu. Trece puntos separen agora a Alpine, en cuartu llugar, de McLaren. Aston Martin caltién la posición que consiguiera en Singapur y abre un pocu más de brecha con Haas y AlphaTauri que nun puntuaron y siguen empataos a puntos.

Colamos de Xapón con Verstappen campeón del mundu y Red Bull a piques de consiguilo con cuatro carreres pa que termine la temporada. Colamos amás cola sensación de que sigui habiendo delles coses que nun tendríen que pasar y de que nun deprendimos nada de los erros del pasáu. Cuidamos que lo que vimos en Xapón nun vaiga tornar a vese nuna pista de F1 o de deporte de motor en xeneral. Hai ciertes coses que na máxima competición nun pueden permitise.

La F1 tornó al entornu de Singapur, una carrera y un eventu que nunca nun dexen a naide indiferente. Depués de dos años en blanco, esti 2022 les lluces del circuitu de Marina Bay tornaben a brillar nes carroceríes de los monoplaces qu’esta temporada tán en competición. La carrera yá prometía dende’l principiu cola amenacia d’agua pal fin de selmana y con unes sesiones d’entrenamientos llibres que nun aportaben muncho a los equipos pola diferencia de condiciones ente les últimes hores de sol y la nueche.

La sesión del sábadu dexonos una nueva pole pa Charles Leclerc y a Max Verstappen y George Russell fuera de sitiu. L’holandés nun tuvo la oportunidá de marcar una última vuelta que pudiera significar una nueva pole pa él porque l’equipu lu llamó pa qu’entrara a boxes pol riesgu a quedar ensin combustible, dalgo que sí supo xestionar el so compañeru Sergio Pérez qu’ocupó’l segundu puestu en parriella, siguíu por Sáinz. Tamién fuera de posición clasificó Russell, que nun pudo siquier pasar a Q3, dalgo a lo que nos tien avezaos dende’l principiu de la temporada. La carrera del británicu diba tar condicionada por esta situación tres la decisión, amás, d’entamar la carrera dende’l pitlane.

El domingu, la carrera tuvo de ser retrasada una hora por cuenta les condiciones climatolóxiques. Direición de carrera, nuna decisión que munchos xulgaron perconservadora, escoyó esperar a que la pista secara dalgo enantes de poner en marcha la carrera. Y la verdá ye qu’una cosa que llamó l’atención ye lo lento que secó l’asfaltu, más de lo normal, dalgo que marcó muncho les decisiones na escoyeta de gomes depués de que tolos pilotos tuvieran de salir de mano con intermedios.

La salida foi limpia, pero una vegada más vimos a Charles Leclerc perder la ventaya de la pole. El pilotu monegascu lleva nueve poles, de les que namás dos acabaron en victoria, unos resultaos en verdá probes si pensamos nel potencial que tiene el so coche. Ye verdá qu’en delles ocasiones nun pudo ser primeru por cuenta de la falta de fiabilidá del coche, pero abúltanos que nueve poles son abondes como pa namás tener sumaes dos victories. La realidá ye, sicasí, que’l monegascu nun abandonó la segunda posición que pasó a ocupar depués de la salida. Mesmo él que Lewis Hamilton tuvieron bones salides, pero dambos perdieron posiciones, nel casu de Hamilton tentando d’evitar tocase con Sáinz, lo qu’acabó dexándolu fuera de pista y perdiendo más tarrén. Nun foi una bona carrera pal inglés: a lo qu’ocurrió na salida súmense un par de momentos qu’acabaron por dexalu más atrás de lo que cuntábemos, con cambiu d’alerón delanteru incluyíu. Mercedes llegaba equí col potencial de consiguir la so primer victoria, y acabó puntuando namás con Hamilton y non en puestos de podiu. Russell tuvo una carrera bastante accidentada, incluyendo un pinchazu por toque con Schumacher, anque consiguió, como consuelu, la vuelta rápida de carrera o más bien consiguió quita-yla a Pérez pa que’l mexicanu nun sumara un puntu más que lu alloñase entá más na clasificación xeneral de pilotos.

Verstappen tampocu nun tuvo un gran premiu brillante. La salida foi mala, y anque foi quien a recuperar posiciones, l’ambición por querer adelantar enantes de tiempu lu acabó mandando al fondu de la clasificación: un intentu d’adelantamientu a Norris lu obligó a frenar de más, metese na escapatoria y depués d’eso, a visitar los boxes depués d’estropiar un xuegu de gomes que nun había muncho que montara. Depués d’eso l’holandés, dalgo más tranquilu, recuperó hasta colocase sétimu, lloñe de los primeros puestos pero muncho meyor clasificáu que lo que pintaba en dellos momentos de la carrera.

Si hai dalgo que marcó esti gran premiu foi la cantidá d’abandonos: hasta seis pilotos quedaron fuera de carrera por motivos distintos. Los dos primeros en facelo fueron Zhou y Latifi. El pilotu chinu tuvo d’abandonar depués d’un choque con Latifi qu’acabó cola carrera de dambos na vuelta siete. El pilotu canadiense recibió una penalización de cinco posiciones en parriella pal gran premiu de Xapón depués d’esti incidente.

El terceru n’abandonar foi Fernando Alonso, con problemes de motor. Mala suerte pal asturianu que cola carrera del domingu suma trescientes cincuenta y ye agora’l pilotu con más carreres de la hestoria. Alpine nun diba tener el so domingu yá que delles vueltes más tarde sedría Esteban Ocon el qu’abandonara, tamién con problemes nel coche. Enantes del francés, Alexander Albon chocaba contra les barreres, dexándolu tamién fuera. Esta primer mitá de les vueltes foi una sucesión de banderes amarielles, coches de seguridá virtuales y visites de les grúes a la pista. Y mientres, l’asfaltu siguía ensin secar y los pilotos con más velocidá víense taponaos por coches más lentos por nun poder arriesgase a adelantar pola zona moyada que podía comprometer la so carrera.

La llista d’abandonos diba sumar entá un nome más, el del pilotu d’AlphaTauri Yuki Tsunoda. Un pocu asomeyao a lo que pasara a Albon y Hamilton, el xaponés chocó frontalmente contra les barreres anque nel so casu con dalgo más de velocidá que los otros dos, lo que provocó la salida del coche de seguridá pa mientres s’arreglaben les barreres. Esti coche de seguridá benefició enforma al equipu McLaren. Cásique tolos equipos andaben midiendo cuándo yera’l momentu más afayadizu pa entrar a camudar gomes ensin tener mui claro cuáles montar. De fechu, foi George Russell quien paró’l primeru y quien sirvió de midía al restu d’equipos pa ver si se podía yá montar gomes lises o tovía yera temprano. Al principiu, l’inglés tuvo munchos problemes pa caltener el ritmu y foi perdiendo tiempu col pasu les vueltes, pero acabó faciéndoles funcionar y motivó qu’otros equipos tomaren la decisión de tamién montar gomes lises. McLaren tuvo la suerte de que nengún de los sos pilotos parara cuando salió’l coche de seguridá de Tsunoda, y gracies a ello dambos pudieron caltener les sos posiciones y montar gomes nueves ensin sacrificiu en pista, dalgo que llueu se traduxo nun gran resultáu, cuartu pa Norris y quintu pa Ricciardo. Col descalabru d’Alpine y l’abandonu de dambos pilotos, esti resultáu de McLaren lu pon per delantre del equipu francés, cuartu nel campeonatu de constructores.

Les últimes vueltes de carrera, que terminó por tiempu depués de toles interrupciones y la tendencia de Singapur a ser una carrera llarga, foron una pelea continua ente Pérez y Leclerc. Hebo momentos nos que paecía que’l pilotu de Ferrari podía pasar al mexicanu, pero nun foi posible y na última tanda de vueltes, el focu moviose a la distancia qu’había ente dambos. Demientres el coche de seguridá, Sergio Pérez incumpliera cola norma de dexar una distancia máxima de diez coches col coche de seguridá y había posibilidá de que fuera penalizáu con cinco segundos por ello. Dende que Red Bull vio que’l so pilotu tenía la victoria en pista, concentráronse n’abrir la distancia suficiente con Leclerc pa que, en casu de penalizar, nun afectara, como asina foi. Tres la carrera, Pérez foi sancionáu con cinco segundos pero nun perdió la so victoria porque la distancia con Leclerc yera mayor.

Ferrari tuvo un bon rendimientu pero inferior a lo que s’esperaba. Cásique tol mundu contaba con Leclerc o Sáinz pa la victoria y ye verdá qu’un doble podiu ye un bon resultáu, pero a estes altures, insuficiente pa les aspiraciones del equipu italianu. Verstappen yá tien el mundial nes sos manes pero de xuru nun va conceder munches victories d’equí al final. Ferrari va quedando sin oportunidaes de sumar dalguna más d’equí a Abu Dabi.

Tamién queremos destacar el resultáu d’Aston Martin: con dambos pilotos en puntos (Stroll sextu y Vettel octavu) supera por tres puntos a Haas y AlphaTauri, qu’empaten a puntos. La pelea neses posiciones nun dexa de tar interesante. En verdá, sacante les primeres posiciones, el mundial de constructores ta bien emocionante.

Ensin perder tiempu dexamos Singapur y ponemos rumbu a Xapón, otru circuitu que torna al calendariu y un clásicu que presta a tol mundu. Preparai los despertadores por tornen los madrugones y alcordaivos que siguimos actualizando’l nuestru post de la silly season coles novedaes que se van sabiendo de la temporada 2023 no que cinca a pilotos y equipos.

Llegábemos a Italia cola idea de que Red Bull diben dominar el gran premiu míticu de Monza de principiu a fin. Nes sesiones d’entrenamientos llibres pintaben bien pero foi Charles Leclerc quien ocupó la pole del gran premiu p’allegría de los tifosi. Ferrari, en teoría, nun tenía papeletes de ganar la carrera pero depués de ver al so pilotu no cimero de la parriella, cualquier cosa paecía posible.

Pero la realidá d’esti 2022 ye que da igual les circunstancies qu’arrodien a Max Verstappen, va ser quien a sobreponese a elles. Yá lo vimos hai unes carreres cuando saliendo dende bien atrás acabó ganando, o cuando ye quien a minimizar daños nun gran premiu que nun tien de cara. Equí, en Monza, partía sétimu depués d’una penalización de cinco posiciones por cambiu de pieces nel so monoplaza. De fechu nun foi l’únicu pilotu en penalizar y los resultaos del sábadu daben un pocu igual porque la parriella quedaría totalmente desvirtuada n’aplicando les penalizaciones. Asina, Carlos Sáinz clasificó terceru pero salió décimoctavu o Lewis Hamilton, que clasificó quintu y acabó saliendo décimonovenu. Aparte d’ellos dos y Verstappen, tamién penalizaron Tsunoda, Schumacher, Ocon, Magnussen y Bottas toos por cambios nún o otru componente de los sos monoplaces o direutamente por camudar motor. Ello ye, repitimos un pocu tamién como yá pasara en Spa, con munches penalizaciones que diben poner interesante la carrera del domingu.

Con Leclerc lliderando la parriella del domingu, tuvimos una salida limpia na que nun vimos nengún incidente reseñable y sí podemos destacar a pilotos como Daniel Ricciardo que tuvo una gran salida cola qu’adelantó delles posiciones nun circuitu au l’añu pasáu foi’l ganador. Esti añu, sicasí, nun diba tar pa él y veríase obligáu a abandonar. Como dicimos, tres una salida limpia, Leclerc quiso poner distancia ente él y los sos rivales y sobre manera con Verstappen, que saliendo sétimu tenía munches posibilidaes de dir escalando posiciones rápido pa ponese al so altor. Y asina foi, l’holandés nun tardó muncho en ser el coche persiguidor. Nel otru llau del garaxe Red Bull, Sergio Pérez facía una parada tempranera por culpa d’un planu nel so neumáticu que taba condicionando la so condución y que tinía los frenos casi a piques d’amburar. De fechu, na so parada pudimos ver cómo salía’l fumu y dalguna llamuca. Esto causó nerviu nel equipu y nel pilotu pero col pasu les vueltes foi arreglándose.

El primer coche de seguridá virtual lu provocó Sebastian Vettel, que nun pudo ver la bandera a cuadros nel circuitu au ganó la so primer carrera en Fórmula 1 con Toro Rosso. Esti eventu lu aprovechó Leclerc pa parar, de fechu foi l’únicu en facelo, y nun sacó tantu partíu como quixera al coche de seguridá virtual porque esti duró bien pocu. Sicasí, con gomes nueves, el monegascu pudo recuperar posiciones cuando los otros pilotos fueron parando, anque la so posición yá nun yera tan ventayosa como de primeres ni como Ferrari quería.

El pasu de les vueltes foi dexándonos adelantamientos bien interesantes, remontaes de Sáinz y Hamilton, el segundu con más trabayu del esperáu, y un George Russell enfotáu en siguir aumentando’l so númberu de podios. Carlos Sáinz aprovechó la salida pa dir remontando y puso mou ataque dende bien ceo. En poques vueltes yá taba colocáu en puntos y a piques d’averase al podiu nunes poques más. Hamilton tendría que trabayar más la so remontada, pero a la fin dambos pilotos replicaron l’orde nel que partieran en parriella, sólo que unos cuantos puestos más arriba: el madrilanu foi cuarto mientres que l’inglés acabó quintu.

Nun tardaríemos en ver otru par d’abandonos en carrera pero ensin consecuencies pa los demás pilotos. Fernando Alonso entrugaba por radio por la condición del coche, a lo qu’Alpine respondía que nun había problema dalu. Unes vueltes depués l’asturianu tinía d’abandonar el gran premiu. Lance Stroll sedría la siguiente víctima, dexando a Aston Martin sin pilotos a la fin del gran premiu. Ensin duldes, un resultáu mui negativu pal equipu.

Diba averándose la última tanda de vueltes de carrera y Verstappen llideraba ensin mayor complicación. La estratexa de Ferrari nun funcionara como ellos queríen y Leclerc abultaba condergáu a ser segundu con Russell per detrás con ganes de complica-y el llabor. Foi entós cuando vimos a Daniel Ricciardo aparcar el so coche en pista obligáu a abandonar a mui poques vueltes del final y provocando un coche de seguridá que removió a tolos equipos poles posibilidaes qu’abría d’un cambiu nel orde de carrera qu’había nesi momentu. Toles escuderíes movieron ficha pa parar a los so pilotos, pero’l ritmu al que se diba desenvolviendo la retirada del coche de Ricciardo de pista y una posible reanudación del gran premiu yera tan lentu que pocu a pocu fuimos decatándonos de les intenciones de direición de carrera de terminar la carrera detrás del coche de seguridá dexando a los tifosi cola dulda de si Leclerc tuviera ganao a Verstappen. Ye verdá que’l pilotu holandés merecía la victoria, pero tamién ye verdá que la forma na que se remató la carrera nun foi digna d’un campeonatu del mundu de F1.

Y asina foi, victoria, la númberu once nesta temporada, de Max Verstappen, siguíu de Leclerc y Russell que suma y sigui la so llista de podios. Per detrás, como yá diximos, Sáinz y Hamilton, seguíos de Pérez, Norris y Pierre Gasly. Hai que facer una mención especial a Nyck Devries, pilotu reserva de Mercedes, que fexo’l so debú en F1 al volante del Williams sustituyendo a Alex Albon. El sábadu foi quien a pasar a Q2 mientres que’l domingu atropó puntos, un par d’ellos, que son oru pa Williams. El so compañeru, Nicholas Latifi, quedó penúltimu.

Zarra la llista de pilotos en puntos Zhou, l’únicu Alfa Romeo en puntos. Mal gran premiu p’Aston Martin y Haas, y tamién mui negativu p’Alpine. McLaren sacó dellos puntos con Norris, anque nun son suficientes pa poner n’apuros el cuartu puestu de la escudería francesa que n’Italia nun entró en puntos.

Con Monza ponemos final a la ruta europea y la F1 pon yá rumbu a otres partes del planeta, con horarios y distancies estremaes. De momentu, vamos tener d’esperar tres selmanes pa ver otra vuelta los coches en pista, nel circuitu de Marina Bay embaxo les lluces na nueche del país asiáticu. Demientres llega y non, alcordaivos que nesti post vamos actualizando lo que va pasando na silly season d’esti 2022.

Pa ser campeón del mundu hai que tener talentu, un bon coche y tamién una migayina de bona suerte. Hai campeones del mundu con muncha bona suerte y otros que con un pocu yá faen muncho. Ensin querer desmerecer pa nada la victoria nesti gran premiu de Max Verstappen por una vegada tenemos que dicir que tuvo bona suerte y gracies a ello pudo ganar el gran premiu.

Y ye que, anque ya’l sábadu marcó la pole, el vienres nun rodó tolo qu’esperaba y almitía que l’equipu s’esforzara por poner el coche a puntu pa la sesión de clasificación qu’él llueu diba encargase de poner no cimero. Sicasí, nun vimos el dominiu absolutu que vimos en Spa. Ensin dexar de ser el favoritu, les miraes tamién taben puestes en los dos Ferrari ya en los dos Mercedes. El domingu, cuando supimos los compuestos que cada pilotu diba montar y vimos que Mercedes facía lo contrario a los d’arriba decatémonos de que tábemos énte una carrera bien interesante.

Mercedes nun pudo dar lo meyor de sí’l sábadu por una bandera colorada provocada por Sergio Pérez na Q3 qu’obligó a Hamilton y Russell, y a otros pilotos, a baxar la velocidá, perdiendo asina la oportunidá de poner n’apuros a los dos Ferrari ya, incluso, al propiu Verstappen. Por eso, el domingu tenía tol xacíu que fueran los únicos que buscaran daqué distinto. Si dalgo vien amosando Mercedes esta temporada ye que’l so fuerte son les carreres y qu’en clasificación dambos coches tienden a ser más floxos, salvando la pole de Russell hai unes carreres.

Ello ye que, cola estratexa estremada al restu de los d’enriba empezó la carrera y vimos un panorama bien distintu al qu’hebo en Spa. Verstappen diba lliderando, sí, pero nun yera quien a alloñase de los sos rivales como ficiera en Bélxica. La opción de montar gomes blandes obligaba a Verstappen a parar primero que los dos Mercedes, que cuntaben con allargar tolo posible la so parada ya incluso facer funcionar la estratexa a una parada, dalgo que naide cuidaba facer.

Y pudimos ver que la elleición de Mercedes yera la correuta, sobre manera porque tanto Russell como, sobre too, Hamilton, teníen un bon rendimientu y una bona xestión de les gomes. Dellos equipos tascaben la cabeza entrugándose si, a la fin, diba ser posible lo de facer una sola parada.

Pero nun foi too tan tranquilo como abulta. Ferrari dexó ensin opciones en carrera a Carlos Sáinz depués d’una parada en boxes mui lenta y mui desorganizada. Ye verdá que’l pilotu madrilanu nun yera tan rápidu como’l so compañeru, los Mercedes o Verstappen, pero cualquier posibilidá de tar delantre quedó torgada por esti eventu. Nun sedría esi l’únicu apuru de Sáinz, que foi penalizáu por una maniobra peligrosa al abandonar el so box que fizo a Alonso frenar pa evitar un choque. Eso sedríen cinco segundos de penalización pal pilotu de Ferrari que tuvo de conformase con ser octavu.

Retomando la estratexa a una parada de Mercedes, cuando tocó facela, Hamilton montó ruedes de goma dura, dexando claro qu’esa yera la idea del equipu, ya imitiando lo que primero fizo Fernando Alonso nel so Alpine, con perbonos resultaos pal asturianu. Les gomes dures tardaben en ponese a funcionar pero cuando lo facíen yeren una escelente elleición. En Red Bull fueron viendo que, quiciás por esta vegada, diba toca-yos pelear de más la victoria porque Max Verstappen entavía tenía una parada que facer cuando Hamilton yá ficiera la suya y diba hasta’l final.

Y nesi momentu, llegó la suerte. Yuki Tsunoda taba teniendo una carrera normal, ensin muncha complicación pero, al salir del carril de pitlane facer una parada, daqué llamó l’atención del pilotu xaponés que lu fizo parar el coche, diciendo por radio que les ruedes nun taben bien apertaes. Esti fechu provocó daqué de confusión ente los equipos, pues nun se sabía mui bien qué consecuencies diba tener: el coche de Tsunoda taba paráu en pista pero non nuna parte mui complicada pa retirar el coche rápido y per onde los coches podríen circular con coche de seguridá virtual ensin problema. Equí camudó la suerte de Verstappen. L’holandés fizo una parada, más barata de lo normal gracies al coche de seguridá virtual, mientres Hamilton siguió en pista. Con gomes nueves, anque dalgo más abaxo, Verstappen vía la carrera d’otra forma. Tsunoda acabó abandonando pero non ensin primero siguir en pista, volver a facer una parada y poner al so equipu pates parriba.

Y unes vueltes depués d’esto, abandonó Bottas. El finlandés vio cómo terminaba la so carrera enantes de tiempu por un fallu nel monoplaza que lu dexó paráu en plena recta de meta, obligando esta vez a sacar el coche de seguridá, oportunidá que munchos pilotos aprovecharon pa facer una parada de baldre, Russel incluyíu. Hamilton, nun paró. L’equipu tuvo la idea de facer estratexes estremaes con cada pilotu, y a Hamilton-y tocó la pior, porque ensin Russell detrás y con gomes más vieyes, Verstappen diba tenelo bien fácil pa pasalu en reiniciándose la carrera. Y asina foi. De fechu, vimos una maniobra de Hamilton que nos abultó mui de principiante, pegando’l tirón d’arrancar demasiao pronto y facilitando a Verstappen que lu adelantara nuna recta na que’l Red Bull tien una velocidá punta mui superior. Ello ye, Verstappen tornaba a ser llíder y equí sí yá nun diba apease de lo más alto.

Hamilton tuvo de conformase con ser cuartu, depués de perder posiciones col so compañeru d’equipu que foi segundu y con Charles Leclerc, que foi terceru. Per detrás del inglés acabó Sergio Pérez que tuvo una carrera más bien discreta, Fernando Alonso que foi protagonista de la remontada de la carrera y el meyor estratega del gran premiu, como yá diximos, aprovechando les paraes pa dir adelantando posiciones, y de Lando Norris, n’otra carrera na que sólo puntúa él pal equipu McLaren. Zarraron la clasificación de los diez primeros Sáinz qu’acabó octavu, Ocon y Stroll.

Nun atopamos grandes sorpreses pela parte medio-baxo de la tabla. Si acasu’l puestu de Mick Schumacher, qu’acabó décimoterceru depués de tener una gran sesión de clasificación el sábadu. Ensin embargu, l’alemán pasó polo mesmo que Carlos Sáinz, y les sos paraes pa cambiar gomes foron mui lentes, condergándolu a acabar fuera de los puntos.

Depués d’esti gran premiu, la diferencia de Max Verstappen col segundu pilotu (que ye otra vuelta Charles Leclerc anque empatáu con Sergio Pérez) ye de 109 puntos. Anque nun ye matemático, como yá diximos n’anteriores comentarios, abúltanos que la llucha pol campeonatu del mundu de pilotos ta más que rematada. Ta perinteresante sicasí saber quién lu va acompañar nos otros puestos del podiu, llugares qu’agora ocupen Leclerc y Pérez, pero que tienen a Russell, Sáinz y un pocu más lloñe Hamilton como posibles candidatos.

Nel casu del mundial de constructores cásique podríemos dicir lo mesmo con respeuto a Red Bull, y queda ver si Ferrari ye quien a aguantar la segunda posición o va ser Mercedes quien la ocupe, tando separtaos dambos equipos namás que por treinta puntos.

Ensin descansu ponemos rumbu a territoriu Ferrari, a Monza. En principiu Red Bull debería ser superior nesti circuitu pero yá sabemos lo que puede facer una afición como los tifosi por emburriar a los sos pilotos. Demientres llega’l día, nun perdáis la previa cola información del circuitu y los horarios y tamién podéis dir poniéndovos al día sobre la silly season d’esta temporada nesti post que tamos ellaborando y actualizando de siguíu.

Al empiezu d’esta temporada, Ferrari sorprendió col potencial del coche que montaren pa 2022 y cola posibilidá de, por fin, tornar a ganar un campeonatu del mundu. Y nesa tuvimos hasta que, pasín ente pasu, fuimos viendo que’l brillu del principiu entamaba a desapaecer y a tornase cada vegada más nun espeyismu. Esto al tiempu que Red Bull daba pasos de xigante na so evolución y se situaba con tola comodidá del mundu na primer posición de dambos campeonatos. La vuelta a les carreres depués del parón braniegu trayía de la mano la esperanza de ver a Ferrari lluchar por amenorgar la diferencia con Red Bull pero la realidá, como cásique siempre, impúsose.

Y ye que Max Verstappen dominó’l fin de selmana, ensin tregua dala y con Ferrari ensin rempuesta posible. El sábadu la sesión de clasificación tuvo un tastu distintu yá que dellos pilotos que clasificaron ente los diez primeros diben empezar la carrera’l domingu dende atrás por penalizaciones de cambiu de componentes del so monoplaza. Ente esos pilotos taben Verstappen y Leclerc. L’holandés marcó en Q3 el meyor tiempu amosando una superioridá tala que con dos minutos entá nel crono pudo baxase del coche y dar por terminada la so xornada del sábadu sabiendo que naide nun diba ser quien a superalu na llucha pola pole. Y asina foi. Nin Sáinz, nin Leclerc, nin siquier Sergio Pérez foi quien a ameyorar esi tiempu marcáu pol holandés. Con too y con eso, el pilotu de Red Bull empezó nel puestu décimocuartu con Leclerc xusto detrás. La salida podía determinar el restu de la carrera por salir dambos pilotos na mitá de la parriella, dalgo que siempre tien consecuencies por toques con rivales. Ensin embargu, la carrera del pilotu holandés foi tranquila de principiu a fin.

El propiu Christian Horner, jefe de Red Bull, comentó que Verstappen nun arranara y nun tuvo priesa de ponese alantre, si non más bien tuvo la paciencia necesario pa dir adelantando coches, aplicando bien la so estratexa hasta, a la fin, ocupar el primer puestu que nun diba a abandonar cuando entavía quedaba más de la mitá de la carrera. Demientres, metros depués de la salida, vimos los dos principales incidentes de la carrera. Per un llau, Hamilton y Alonso enriedábense nun incidente na que l’inglés zarró al asturianu y acabó montando perriba la rueda del pilotu d’Alpine, dañando’l so coche y siendo’l primer abandonu de la carrera. Alonso pudo continuar ensin problema nengún.

Per otru llau, Latifi perdió’l control del so coche depués de que se-y escapara d’atrás y pisar la grava, dalgo qu’obligó a otros pilotos a esquivalu, siendo Bottas el mayor perxudicáu. El pilotu finlandés d’Alfa Romeo evitó la colisión pero acabó na grava, y yá nun pudo salir d’ella. Esti incidente provocó’l coche de seguridá, momentu qu’aprovecharon dellos pilotos pa cambiar gomes, ente ellos Leclerc.

Dende esti momentu, la carrera foi una sucesión d’adelantamientos, xestión d’unes gomes que degradaben muncho más de lo esperao y recuperación de posiciones por parte de los pilotos que partíen, en principiu, fuera de sitiu, casu de Verstappen y Leclerc, pero tamién otros como yel’ casu d’Ocon o Gasly. Tanto Esteban Ocon como’l so compañeru Fernando Alonso, tuvieron una bona carrera y dambos puntuaron, dalgo que marcó la diferencia na llucha pol cuartu puestu nel campeonatu de constructores y sobre too depués de que nengún de los pilotos de McLaren pudieran puntuar. Norris partía d’atrás, penalizáu tamién por cambios nel coche y Ricciardo, anque tuvo dellos momentos de la carrera ente los diez primeros, a la fin terminó otra vuelta per detrás del so compañeru d’equipu, lloñe dambos de puntuar (Norris P12, Ricciardo P15).

Sí puntuó Williams, con Albon. El pilotu tailandés tamién tuvo una bona sesión de clasificación que tuvo recompensa’l domingu con un puntu que, anque poco, ye un pasín más pa la escudería inglesa. Tamién sumó Aston Martin, con Vettel. Mesmo él que’l so compañeru tuvieron una carrera bastante curiosa pesie a que la so sesión de clasificación nun foi brillante. Pierre Gasly foi otru que sacó bon partíu a la carrera yá que partió dende’l pitlane y acabó puntuando en octavu llugar. El so compañeru Tsunoda nun tuvo tanta suerte y acabó nel puestu P13. Hai que dicir que’l pilotu xaponés tamién partía de mui atrás por mor de los cambios nel so monoplaza.

Verstappen dominó y Sergio Pérez, anque nun foi quien a siguir el ritmu del so compañeru, acabó ocupando’l segundu llugar del podiu. Carlos Sáinz, que partía del primer llugar de parriella por mor de la penalización de Verstappen, nun pudo aguantar munchu tiempu a Pérez y tuvo de conformase col tercer llugar que cásique tuvo a piques de perder con Russell. El pilotu inglés amosó una perbona xestión de les gomes ellí onde otros degradaben muncho más rápido. Eso lu favoreció y lu ayudó a dir recortando tiempu con Sáinz, anque nun foi suficiente. Per detrás llegó Fernando Alonso, qu’en principiu diba ser sextu pero acabo siendo quintu por una penalización impuesta a Leclerc. Consciente de que lo más que podíen facer yera ser quintos, Ferrari pidió al so pilotu qu’entrara pa tentar de facer la vuelta rápida y asina, a lo menos, evitar que Verstappen sumara’l puntu estra. Coles prieses, Leclerc sobrepasó’l llímite impuestu nel carril de pit lo que supunxo una penalización de cinco segundos que fizo que Leclerc perdiera’l quintu llugar con Alonso y quedara, amás, ensin el puntu estra de la vuelta rápida.

Foi una carrera pa olvidar pa Ferrari pero tamién pa Mercedes, que nun tuvo nin cerca de lo que fizo n’Hungría. Haas nun tuvo bon rendimientu en nengún momentu del fin de selmana y quedaron no fondero la clasificación (Magnussen P16 y Schumacher P17) acompañaos del McLaren de Ricciardo (P15) y de Latifi (P18). Alfa Romeo namás vio la bandera a cuadros con Zhou, pero fízolo en P14, un resultáu bastante probe pal equipu. Bottas, como yá diximos, tuvo d’abandonar.

Pesie al dominiu de Verstappen, nun podemos dicir que fuera una carrera aburrida. Vimos un bon númberu d’adelantamientos, bones estratexes y dellos pilotos aprovechando les desgracies d’otros pa subir na clasificación. Sicasí, creyemos que la llucha pol campeonatu de pilotos ta más que decidida: con noventa y tres puntos de ventaya col so compañeru d’equipu, Sergio Pérez (que pasa per delantre de Leclerc pa ocupar agora’l segundu llugar, dexando al monegascu terceru con Sáinz cuartu a quince puntos) nun vemos posible que Max Verstappen pierda esti campeonatu. La cuestión ye saber cuándo va ser. De momentu, ponemos rumbu a Zandvoort, onde l’holandés cuerre en casa y tien toles papeletes pa sumar otra victoria pal so historial.

Ye sabío por toos que’l gran premiu monegascu nun ye’l más espectacular del calendariu y que, probablmente, habrá que pensar cómo facer del circuitu de Monaco un circuitu nel que les carreres seyan dalgo más que procesiones si queremos al empar que los coches aumenten de tamañu. Pero nun se pue poner la historia de la F1 per delantre d’esperimentos que nun ameyoren la competición nin s’asitien en llugares con tradición nes carreres. Llegamos a Montecarlo col discutiniu abiertu pola continuidá del eventu cuando quiciás el discutiniu tendría que ser más fondu y pensar en qué queremos pa la F1 y actuar en coherencia.

Espérase que lo más interesante nesti gran premiu pase na clasificación. Asina tuviemos una sesión delles banderes coloraes na que brilló Leclerc, intentando ser per una vez profeta na so tierra, cola tercer pole siguiday cola necesidá de rematar la xera en carrera per primer vez. Sedría una primer llinia de Ferrari magar qu’una bandera colorada provocada por Pérez al final de la Q3 dexaría al restu de pilotos ensin posibilidaes d’acabar l’últimu intentu. Mientres Pérez tocaba la barrera, daba con él Sáinz y llegaba xustu Verstappen pa nun llevalos nuna imaxe que se tornó icónica. El mexicanu y l’holandés ocuparíen per esti orde la segunda llinia mientres Norris llega’l primeru del restu siguíu per Russelly per Alonso que protagonizaría otru golpe contra les barerres simultaniamente al de Pérez.

El domingu vieno a visitamos l’agua y’l gran premiu entamó una hora más tarde tres el safety car nun conxuntu de decisiones que nun se llegaron a entender del too (en parte porque nun se tresmitieron tolo claramente que deberíen per parte de dirección de carrera) y que despliquen parcialmente el retrasu por problemes llétricos na salida.  Ello ye qu’asina, la carrera arrancó neutralizada ensin que parare de llover col oxetivu de dir sacando agua de la trazada, pero entendieron qu’habia agua demaisao y pararon la carrera con bandera colorada. Salieron 45 minutos depués cola mesma intención. Una vez se retiró’l coche de seguridá, reanudóse la carrera mientres dalgunos coches esnidiaben, otros probaben los neumáticos intermedios p’acabar como los primeros y otros intentaben calcular el meyor momentu pa poner unes gomes bien intermedies o de seco. Una vez los intermedios empezaben a suponer una ventaya, al pasar la decena de vueltes y dir faciendose’l carril, los coches que se la xugaron empezaron a intentar ganar posiciones al restu, pero nun yera quiciás el meyor escenariu pa ello. Asina fue que tres un cachu intentandolo Gasly foi quien a pasar a Zhou y, postreramente, a Ricciardo. Ello marcaba que yera’l momentu d’abandonar los neumáticos d’agua estremo y entamo’l baille en boxes. Los coches que cambiaben a intermedios teníen que facer por pasar lo enantes posible a los que siguíen en pista colos neumáticos d’agua y asina vieno’l toque ente Hamilton al intentar adelantar a Ocon y vese zarráu por esti. Los comisarios consideraron que’l francés yera merecedor de sanción por esa maniobra.

Y equí foi onde Ferrari garro’l protagonismu en términos d’estratexa y, nun ye la primer vez, non pa bien precisamente… Sáinz decidiría esperar pa pasar directamente a les gomes lises ensin pasar peles intermedies no qu’acabaría demostrándose una decisión bona, por embargu, Leclerc entraría a cambiar a intermedios por indicación del equipu pa entrar darréu a poner les ruedes de seco. Por si nun sonaba mal el plan, topóse col so compañeru en boxes y tuvo qu’esperar por él. Foi inútil l’intentu d’evitalo coles indicaciones del inxenieru que, cuando yá nun había opción de rectificar por parte del pilotu, dicia-y qu’esperare y nun entrase. El restu de la carrera del pilotu monegascu basóse en tragar la rabia pola maniobra que lu dexaba cuartu depués de tar dominando ensin nenguna problema la carrera. Nun s’equivocaron en Red Bull que , tres poner intermedios, entendieron que yera’l momentu precisu pa volver a entrar y asina dexar a Perez primeru y Verstappen terceru con Sáinz en medio. Carlos intentó atacar al pilotu mexicanu, pero una salvada pergrande foi la siñal de que nun yera’l momentu de siguir arriesgando.

Xusto tenía qu’entrar Kevin Magnussen na cochera p’abandonar la carerra cuando’l so compañeru d’equipu sufriría un accidente espectacular que partiría’l coche en dos. Una vez confirmao que Mick taba sanu, comenzaron les operaciones de reparación con otru coche de seguridá a pista.

El restu de la carrera tres la resalida veríase cómo, pesie los intentos per adelantar, el trazáu de Montecarlo nun permitia gran cosa y Perez ganaría una carrera qu’acabaría por tiempu en vez de por vueltes, con Sázin y Verstappen acompañándolu nel podiu. Leclerc habría resignase con ser cuantu y Russell sedría’l primeru del restu tres un adelantamientu a Norris que nun pudimos ver en direuto (y eso que nun tábemos sobraos d’adelantamientos…).  Alonso siguiría detrás faciendo una xestión agresiva de los neumáticos aprovechando que la dificultá d’adelantar yera patente y con un Lewis Hamilton que veríase tamién frustráu detrás del pilotu asturianu, siendo muncho más rápidu que él pero ensin oportunidá d’adelantalu. Siguiríalu Ocon, anque la sanción de 5 segundos qu’arrastraba dexaríalu’l docenu yá fuera de puntos. Bottas y Vettel complateríen la zona de puntos siguíos por Gasly. Posteriormente llegaríen los pilotos que más sufrieron sobre l’asfaltu: Ricciardo, Stroll, Latifi, Zhou y Tsunoda.

En definitiva foi una carrera que nun tuvo muncha historia una vez se normalizaron les posiciones y paró la lluvia y que se vio marcada pol error de Ferrari que tiró una carrera que podía haber ganao Leclerc. Primera carrera que Verstappen acaba y nun gana na estadística.