Category: Previes

Ensin casi dar tiempu a tastiar lo que foi l’últimu gran premiu de Portugal, ponemos rumbu a Catalunya pal viniente gran premiu nel calendariu. Tornamos a un circuitu de los avezaos, a Montmeló, un vieyu conocíu pa tolos pilotos y equipos. Nuna temporada que ta prometiendo ser mui emocionante anque namás llevemos tres grandes premios vistos, llega mayu esperando siguir nes vinientes carreres cola espeutación que tuvimos hasta agora.

Anque Mercedes sigui mandando en pista, ye evidente que la so superioridá nun ye tan incuestionable como lo yera nos últimos años. Red Bull quiciábes precisa un pocu más pa ser quién a derrotalos en cualquier escenariu. Amás, el fechu de tener agora nes sos files a Sergio Pérez ye razón pa creyer que pueden conseguir más que n’años pasaos onde casi yera competencia esclusiva de Verstappen el sumar puntos pal equipu.

Montmeló tien el vezu de ser escenariu de meyores y anovaciones nos coches. Va ser el casu d’Aston Martin, que yá probara en Portugal delles novedaes aerodinámiques que van montar nel coche de Vettel pa esti fin de selmana. L’alemán ta teniendo un aniciu de temporada discretu, diendo de menos a más, pero ensin llamar muncho l’atención. Colos güeyos puestos nel añu que vien, l’equipu ya’l propiu pilotu tán casi más centraos en sintise cómodos trabayando en comuña que no que puedan consiguir nes carreres.

Como yá pasara en 2020, la zona templao de la tabla ta siendo bien interesante, con munchos equipos metíos na llucha por atropar un bon númberu de puntos cada domingu. De momentu, paez que McLaren ye quien ta mandando nesta zona, anque Ferrari tán muncho meyor de lo que taben l’añu pasáu y de xuru van dir medrando y ameyorando col pasu les carreres. Les bones posiciones de Lando Norris nestes tres primeres carreres dan motivos a los de Woking pa pensar en replicar lo que yá consiguieron en 2020 y ser terceros. Esti añu, con más equipos competitivos alcanzar esti puestu tendrá más valor entá.

Nun podemos tampocu quitar la vista de la parte baxo. Haas garró’l testigu de Williams pa tornase nel últimu de la filera dando más titulares poles coses que faen mal que poles bones. Williams a la fin ta dando pasos alantre y anque son pequeños y más bien discretos, la meyora ye evidente. Nel casu de Russell entá tien pendiente facer carreres tan bones como les sos sesiones de clasificación, nes que yá suel ser normal velu na Q2.

Nun podemos más qu’esperar que teamos énte otru gran premiu que nos faiga nun despeganos del asientu nin mirar pa otru llau. Si nun queréis perdevos nada, equí vos dexamos tola información que precisáis pa esfrutar d’esti fin de selmana nel Circuit de Catalunya:

Estes van ser les gomes que van montar los equipos demientres esti fin de selmana:

Llegamos por segundu añu consecutivu al Autodromo Internacional do Algarve, na contorna de Portimao nuna temporada que ta prometiendo unes espectatives que veremos si realmente pue cumplir. Yá nun falamos d’equipu dominador, les victories repartiéronse nes dos primeres carreres del añu y tien pinta de qu’esti patrón va siguir pel restu de campeonatu. Lo único que tenemos claro ye qu’esta temporada va a esixir lo meyor tanto de pilotos como d’equipos.

La FIA sigue coles sos pruebes y tres l’acuerdu de tolos equipos esta temporada tendremos les carreres de sprint de clasificación, una vuelta de tuerca más a lo que tábemos avezaos a ver el fin de selmana que tresllada la clasificación al vienres y apurre una carrera curtia’l sábadu na que puntuarán los trés primeros y que valdrá pa organizar la parriella del domingu. Nun habrá entrega de trofeos magar que se quier siguir dando la importancia del fin de selmana ya’l prestixu a la carrera del domingu, pero habiendo puntos pel medio ya influyendo  nel orde de salida de la carrera “grande”, tendrá la so importancia.  Nun sabemos tovía en qué circuitos vamos a poder ver esi formatu, anque suenen con fuercia llugares como Silverstone o Monza.

L’andanciu nun da tregua y, por mor de les sos consecuencies, el GP de Turquía va a reemplazar a Canadá onde se facía cada vez más difícil llevar al gran circu por cuenta de les sos restricciones de movimientu.

Con un campeonatu que promete tar apertáu, los puntos de les vueltes rápides pueden empezar a tenese en cuenta más de lo que se teníen hasta agora. Esa ye la distancia qu’hai nesti momentu nel mundial ente Lewis Hamilton y Max Verstappen. Pero ye que McLaren quier asomar la cabeza tamién pelos primeros puestos y Norris paez que ta dispuestu a dar el saltu que s’espera d’él p’avezamos a ver el so nome nos primeros puestos. Les sesiones clasificatories decídense agora por décimes y los fallos penalicen gravemente con unos cuantos puestos. Veremos si hai dalgún más que s’axunte a la fiesta viendo que Ferrari paez que va recuperando la forma pasu ente pasu.

Equi vos dexamos el programa horariu del gran premiu:

Pasó l’iviernu, entamó la primavera, pasaron los test y les pruebes, tamién les presentaciones de coches y pilotos y, a la fin, llegó la primer carrera de la temporada. Tamos avezaos a que seya Albert Park, el circuitu de Melbourne, el que nos dea por bienllegaos, pero esti añu, por mor de la COVID-19, tócanos averanos al circuitu de Sakhir, escenariu de los test de pre-temporada. Va ser un añu con bien de cambios en dellos senes y non tantos n’otros. Vamos tener un total de ventitrés carreres y novedaes na parriella con equipos renomaos y pilotos nuevos.

Como davezu, la temporada parte con Mercedes no cimero del llistáu de favoritos pa ganar el campeonatu. Anque nun dexen de xurdir les duldes, l’equipu de Brackley defende’l títulu y tien papeletes pa replicalu a final de temporada. Ye verdá qu’hai munches voces que cuestionen el comportamientu del coche en pista, pero la esperiencia de los últimos años fainos albidrar qu’eso nun va ser problema col pasu les carreres.

Si Mercedes carga cola etiqueta de favoritu, tanto Red Bull como Ferrari lleven la de rivales más direutos, anque nel casu de la Scuderia paez que van tener que pelealo muncho, sobre too si pensamos no que se vio na temporada pasada. Con Sáinz a bordo y paez qu’un equipu más estable, l’equipu italianu tien la obligación de ser competitivu yá dende Sakhir.

La parriella pela parte media va tar bien interesante, con un garrapiellu d’equipos con munchu puxu y que van dar guerra nesta temporada. McLaren, Alpine y Aston Martin asomen perriba’l restu, pero nun podemos dexar atrás a AlphaTauri, al que tenemos munches ganes de ver en pista esti añu y pue danos dalguna sorpresa.

Pela parte atrás nun va tar la cosa aburrida sicasí. Cuidamos que Williams va ser más competititu qu’en 2020, lo que significa que podrá competir con Haas y Alfa Romeo n’igualdá.

Hai munchos puntos a los que mirar demientres esti fin de selmana ya munches duldes que resolver. Les predicciones a estes altures, como davezu, son arriesgaes, sobre manera nun añu nel que vamos ver tantes carreres nel mesmu espaciu de tiempu. Nun hai más que ponese a ello y preparase pa una temporada nueva de F1. Pa que nun perdáis detalle, equí vos dexamos tola información sobre’l circuitu y los horarios:

Y estes son les gomes que van montar los equipos nesti primer gran premiu de la temporada 2021: