Category: Previes

Pasaran 36 años dende la última vegada que la F1 punxera un pie nel circuitu de Zandvoort, y tantos años y dellos retoques depués, aterrizaba esti fin de selmana ellí l’espectáculu del motor. Les sesiones de llibres dexaron munches banderes coloraes, salíes de pista y demás problemes pa los pilotos, lo que nos facía albidrar que la sesión de clasificación y la carrera diben ser mui intenses. Sicasí, podemos dicir que la clasificación dexó delles sorpreses pero en carrera ganó quien tenía que ganar.

Y ye que’l sábadu, Sergio Pérez nun pasó de la Q1 y con él Sebastian Vettel, yá que dambos fueron estorbaos polos Haas de Mazepin y Schumacher. Nun ye que penalizalos fuera solucionar nada, pero dambos pilotos diben rodando bien y pa ellos, sobre manera pa Pérez, foi una gran deceición vese fuera tan ceo. La Q2 acabó enantes de tiempu, depués de que Latifi tuviera un accidente bastante grande que lu dexó fuera a él y al so compañeru d’equipu sin posibilidá de replicar lo que ficiera en Bélxica, pero tamién al McLaren de Lando Norris. La lucha pola pole nun tuvo muncho secretu, pues Max Verstappen nun dexó marxe nengún a los Mercedes, que tuvieron de conformase con escoltalu tres fallar nel intentu d’undercut que fizo a Hamilton salir en tráficu y nun poder recortar tiempu.

Hai qu’almitir que la carrera dio pa muncho menos de lo qu’esperábemos. Nun hebo bandera colorada nenguna, malpenes incidentes, y namás que dos abandonos que fueron por averíes. Amás, nun circuitu nel que ye tan abegoso adelantar, namás Sergio Pérez, necesitáu de puntos, s’atrevía a movimientos que lu ayudaren a xubir posiciones na clasificación. A la fin, el mexicanu foi octavu. Pero la llucha pol podiu, anque en dellos momentos tuvo interesante y reñida, cásique abultaba resuelta dende que s’apagaron les lluces colloraes del semáforu de salida. Vimos un bon rendimiento a los Alpine, con Fernando Alonso sextu con una mui bona salida y xestión de les gomes y Ocon novenu. Tamién toca señalar el cuartu puestu de Pierre Gasly, que yá clasificó mui bien el sábadu, tamién cuartu con un bon rendimientu’l domingu. El so compañeru, ensin embargu, acabó’l gran premiu enantes de tiempu.

Ferrari tinía munches posibilidaes d’atropar puntos y pasar a McLaren nel campeonatu de constructores. Diben muncho meyor que l’equipu inglés nos entrenos, ya’l revés de la clasificación con Norris, abrió la puerta a sumar bastantes puntos más que’l so rival. Anque l’inglés de McLaren acabó siendo décimu, quedando per delantre del so compañeru d’equipu aun clasificando dellos puestos per detrás, esi únicu puntu nun valió pa muncho frente al quintu puestu de Leclerc y al sétimu de Sáinz. Ferrari tien agora una ventaya d’once puntos y mediu con McLaren y Lando Norris perdió’l so tercer puestu nel mundial de constructores con Bottas, que foi terceru. Asina, continua la batalla por esi tercer puestu qu’agora ta nes manes del equipu italianu y que va correr en casa nunos díes, nel circuitu de Monza.

La deceición más grande del fin de selmana ye, probablemente, Aston Martin. Vettel tuvo condicionáu pol bloquéu del Haas de Mazepin, pero amás l’alemán tuvo un trompu en pista en carrera que yá lu dexó fuera de les opciones de sumar dalgún puntu esti domingu. El so compañeru Lance Stroll, tampoco nun pudo facer muncho. Fuera de puntos acompañáronlos Daniel Ricciardo, que quedó undécimu y sigui ensin dar cola tecla que lu ponga al nivel al que nos tien avezaos; los dos Alfa Romeo: anque Giovinazzi tuvo una bona sesión de clasificación el sábadu, la realidá y la mala suerte del domingu pesó más perdiendo posiciones na curva 3 na primer vuelta y con un pinchazu xusto tres cambiar los neumáticos. Nel otru Alfa Romeo tuvimos tol fin de selmana a Robert Kubiça que tuvo de ponese a los mandos del Alfa porque Kimi Räikkönen dio positivu por coronavirus. Los dos Williams quedaron lloñe de los suaños que fueron Bélxica ya Hungría y zarró la clasificación el Haas de Mick Schumacher, que foi l’únicu que vio la bandera a cuadros depués del abandonu del so compañeru.

Como comentemos, nun foi un gran premiu que vaiga pasar a la historia polo entreteníu que foi, anque sí tenemos de rescamplar l’atmósfera creada nel circuitu. Depués de tantu tiempu de restricciones y poca xente nes grades, lo que vimos en Zandvoort trai de vuelta los tiempos enantes de la pandemia, que tan llonxanos abulten agora. Cuidamos que nunos díes en Monza, viviremos daqué asomeyao.

Y ye que la F1 nun descansa y suma otra carrera siguida, de circuitu míticu en circuitu míticu. La prósima cita ye, como dicimos, Monza, templu de Ferrari y de los tifosi. L’añu pasáu foi una carrera bien entretenida. Esperamos qu’esti añu tamién lo seya. Hasta que llegue la previa, vos dexamos equí col artículu de la silly season, que yá, a la fin, arrancó dafechu.

Yá tiníemos ganes de tornar a Zandvoort. Depués de l’intentu fallíu de 2020 que, por mor de la pandemia, nun nos permitió visitar el circuitu neerlandés, aterrizamos equí con más ganes que nunca de ver una carrera. Y ye que tres les escenes que vimos en Spa y la deceición de la decisión final de nun correr más que dos vueltes, llegar a un circuitu nuevu, en teoría favoratible a Max Vertappen por tar acompañáu del so públicu, nun dexa de ser una bona noticia.

Falando de noticies, esta selmana dio pa bien poco. Más allá de los comentarios y decisiones a posteriori sobre cómo abordar una situación asomeyada a la de Spa si se volviera a repitir. Ta claro que’l gran premiu nun xeneró munchos comentarios pola carrera en sí, si non poles decisiones que se tomaron, y con tan pocu espaciu ente carreres, les novedaes son poques. La silly season, que tamos actualizando equí, sigue tando bastante tranquilina. Sicasí, el miércoles enterémonos de que Kimi Räikkönen nun va siguir na F1 pa 2022, dexando asina un sitiu llibre nel equipu Alfa Romeo que, de xuru, en breve sabremos pa quién va ser.

Si dalgo tenemos claro ye que hai munchos pilotos que quieren ponese en pista pa tentar de compensar lo malo que-yos dexó Spa. Nun paez que naide quedara contento col resultáu, anque sumar puntos ensin arriesgar nuna carrera en moyáu casi paez un regalu, y ye evidente que Zandvoort va servir a muncho pa desquitase de lo que pasó hai unos díes en Bélxica, mesmo pilotos qu’equipos.

Atopámonos énte un circuitu curtiu y mui rápidu, dalgo que contrasta col llargor de Spa. Un circuitu que los pilotos aprecien pol retu que supón y nel qu’un de los principales enemigos de Lewis Hamilton na so batalla con Verstappen pola victoria va ser, como yá diximos enantes, el públicu. Correr en casa nun ye garantía de primer puestu pero ye un estra de motivación que nengún pilotu s’atreve a refugar.

Preparamos pues la información que precisáis pa nun perder nada esti fin de selmana y ponemos la vista y la cabeza yá en Zandvoort. Estos son los horarios d’esti fin de selmana:

Y estes son les gomes que trai Pirelli pa esti gran premiu:

Si echamos la vista atrás, nun paez que pasara yá la mitá del campeonatu de 2021. Vivimos munches carreres mui intenses y una llucha por dambos campeonatos qu’había tiempu nun víemos. Tres el parón braniegu bien merecíu pa toos, la F1 torna a poner los coches en pista, esta vegada nun de los sos iconos, el circuitu de Spa-Francorchamps.

Cásique tol mundu coincidi en que la segunda parte de la temporada, de xuru, va ser tan bona o meyor que la primera, sobre manera pensando que s’avera’l so final y que cualquier fallu o cualquier abandonu puede ser definitivu. Aterrizamos en Bélxica con tiempu inestable, al puru estilu Spa, y colos campeonatos apertaos per au quiera que miremos. Lóxicamente, tola atención ta puesta enriba los dos principales competidores pola victoria a final d’añu, pero la verdá ye que la temporada ta siendo intensa en tolos sentidos y pa cásique tolos equipos. Como yá vos despliquemos nes nuestres reflexones de branu (que podéis lleer equí y equí) hai dellos equipos que precisen un pasu alantre si quieren algamar los sos oxetivos, como ye’l casu de Ferrari. La pelea con McLaren ta siendo mui apertada, muncho más que l’añu pasáu, pero l’equipu italianu nun puede cayer na confianza de dir meyor, pues el so mayor rival nestos momentos tampoco nun va facelo. Per detrás, tolos equipos quieren situase nesi deseyáu tercer puestu.

Pero non sólo ta interesante la parte media-alta de la tabla. Cola suma de puntos de Williams, dalgo colo que naide nun cuntaba, a lo menos non tanta cantidá, preséntase una situación mui interesante pa lo que queda de temporada. Quiciás l’equipu de Grove tenga oportunidá de sumar dalgo más pero lo que ta claro ye que la ventaya garrada colo fecho n’Hungría da un colchón abundante con Alfa Romeo y Haas, que casi paecen condergaos a quedar onde tán.

A estes altures del añu, de normal, tendríemos yá material abondo pa escribir nel artículu que solemos dedicar a la silly season y que vamos actualizando coles nueves que nos lleguen. Esti añu, esti artículu entavía tien bien poca información qu’ufrir porque la situación de lo que va pasar en 2022 ta anormalmente tranquila. Sí que tenemos delles noticies, que podéis dir lleendo equí, como la confirmación de que Fernando Alonso va siguir n’Alpine pa 2022, dalgo qu’en realidá yá sabíemos yá que la idea del asturianu yera competir cuando entraran les nueves regulaciones n’aición.

Nun hai noticies del futuru de Bottas y Russell, qu’entrugaos esti xueves dixeron que nun tiníen nada nuevo que dicir sobre los sos futuros. Lóxicamente tola atención ta puesto enriba d’ellos dos porque son el cambiu de cromos más probable pa 2022. Sicasí, nun ta claru’l retornu de Bottas a Williams y tamién se fala de que pueda acabar n’Alfa Romeo ocupando’l sitiu que, en teoría, va dexar Kimi Räikkönen n’acabando 2021. Son too especulaciones, pero nenguna ta confirmada, polo que de momentu l’artículu sobre la silly season va tener qu’aguantar. El finlandés va tener oportunidá de probase otra vegada más en Bélxica, au amás tien una penalización de cinco posiciones na salida por cuenta l’accidente que provocó n’Hungría. El mesmu númberu de posiciones de penalización tienlu Lance Stroll, tamién polo acontecío n’Hungría.

Spa va ser amás escenariu esti fin de selmana d’alcordanza d’Anthoine Hubert cuando se cumple’l segundu aniversariu del so fallecimientu nun accidente na F2 nesti mesmu circuitu en 2019. Tolos pilotos y equipos aprovecharon p’alcordase del pilotu francés quien yera una de les promeses del deporte.

La F1 retorna a la rutina y failo con un clásicu, con promeses de tiempu cambiante y una llucha pol campeonatu que va entrar nuna etapa perinteresante de la que vamos ser testigos. Pa que nun perdáis nada d’esti fin de selmana, equí vos dexamos tolo que precisáis saber:

Y como davezu, la información sobre les gomes que se van usar pa esti gran premiu:

Cuando aterrizamos nel Hungaroring sabemos dos coses: per un lláu que tamos énte ún de los circuitos más esperaos del calendariu y ún de los que siempre suel dar espectáculu, y dos que tamos a piques d’entamar el parón braniegu. Ensin duldes, esti mes que los equipos y los pilotos van tomar de descansu va valir pa reflexonar, pa mover ficha y sobre manera pa preparase pa la segunda mitá de la temporada y l’esperáu 2022 y los sos cambios.

Les dos selmanes que separen el gran premiu que vivimos en Silverstone y el d’esti fin de selmana, tuvieron ocupaes casi n’esclusiva polos comentarios, reaiciones y vueltes de tuerca a lo que pasó’l domingu nel gran premiu. Red Bull insistió nuna revisión del incidente y, con ello, de la penalización impuesta a Lewis Hamilton, pero los comisarios refugaron el xueves revisar l’asuntu.

Si hai dalgo que quedó claro ye que, onde ya taba interesante’l campeonatu, esti incidente nun fai más que sumar a esa emoción. Con ocho puntos de diferencia, cualquier erru n’Hungría puede ser determinante pa ún o l’otru, y dir de vacaciones per delantre na clasificación da muncha tranquilidá. Ye por eso que la batalla ente Mercedes y Red Bull, o meyor, ente Hamilton y Verstappen continúa, con Bottas y Pérez d’escuderos. Nun sabemos entá nada del futuru del finlandés, pero yá se fala de que l’equipu ta buscando les meyores opciones pa él en casu de que tuviera de colar. Alfa Romeo podría ser un destín futuru pa él.

Pero la emoción nun vamos tenela namás nos puestos cimeros. Ferrari vienen con too, dispuestos a ser meyores que McLaren, equipu que paez destináu a ocupar esi tercer llugar qu’antaño ocupaba la Scuderia. Depués de sorprender en Silverstone con un segundu puestu de Leclerc, l’equipu italianu confía no que puedan facer nel trazáu húngaru.

Puestos a fixanos, tamién taremos sollertes a lo que fagan dende AlphaTauri, con un Gasly motiváu y decidíu a nun dexar que’l gran premiu de Silverstone se repita n’Hungría. El francés quier colar de vacaciones con un bon puestu pa desquitase de los momentos de baxón que tuvo no que llevamos de temporada.

Hungría ye un trazáu favoritu pa munchos, pilotos y equipos incluyíos, y como vos dicimos, marca la fin de la primer parte de la temporada. Tornamos al formatu avezáu, ensin sprints nin coses del estilu. Estos son los horarios pa la fin de selmana:

Y éstes son les gomes que vamos ver estos tres díes de competición nel Hungaroring:

L’añu 2021 ta siendo ún de sorpreses na F1. El vezu que teníamos del dominiu de Mercedes desapaeció por obra de Red Bull, que con Max Verstappen ocupa esi llugar qu’antaño ocupaba Lewis Hamilton. Nun paez haber preocupación nel equipu alemán, anque ye verdá qu’almiten que nun son quien a dar cola clave que los coloca per detrás del equipu del güe coloráu. Llegaos a Silverstone, reinu de Hamilton, too fai albidrar que vamos ver otra carrera difícil pal inglés.

Sicasí, nun tamos énte una carrera en Silverstone al usu. Nun intentu de dinamizar lo que ye’l fin de selmana formuleru, la F1 quier introducir cambios. Si vos alcordais, hai unos años tentó de camudar el sistema de clasificación por ún nel que’l reló diba descontando tiempu y aquel pilotu col pior tiempu quedaba elimináu. El sistema nun cuayó (ente otres coses porque nun convencía a naide) y la cosa siguió como si nada hasta estos últimos meses. Esti fin de selmana, Silverstone va ser escenariu d’una prueba que pretende dar mayor entretenimientu al conxuntu del fin de selmana. Quienes sigáis les otres categoríes de motor, como la F2 o la F3, taréis avezaos a les que se conocen como carreres sprint. Esta ye la principal novedá que se pretende introducir nel fin de selmana y que va probase estos díes nel circuitu inglés cola F1.

Ello ye: los vienres vamos tener una sesión de libres al usu, d’una hora de duración y envede tener una segunda delles hores más tarde, vamos tener una sesión de clasificación pal sprint de clasificación del sábadu. El sábadu, vamos tener otra sesión de llibres y en cuenta d’una clasificación normal, tendremos el sprint de clasificación. Ye un formatu reducíu (la F1 nun quier se-y nome carrera como tal anque lo seya) que va cubrir l’equivalente a 100 km y nel que los pilotos van tener llibertá na elleición de gomes y van organizase en parriella en función de lo que ficieran el vienres. El resultáu d’esti eventu va conformar la parriella del domingu, el gran eventu. La idea de fondu ye dar más vitalidá al fin de selmana introduciendo otres variables, pero dexar que’l domingu seya l’absolutu protagonista como davezu. Insistimos que ye sólo una prueba, nun hai garantíes de que vaiga aplicase y de fechu de momentu nun hai previsión de que vaiga facese más allá de Silverstone, pero en principiu nun tien mala pinta.

Aparte d’esto, ente les novedaes del fin de selmana tenemos la estensión del contratu de Sauber con Alfa Romeo, qu’afianza a la escudería na parriella. Ye verdá qu’esti añu nun tán teniendo un bon rendimientu, pero al mesmu tiempu tamos viendo coses interesantes que nos permiten albidrar que l’añu que vien pueden tar preparaos pa dar guerra na mitá de la tabla.

Mercedes aporta con meyores nel so coche, que nun sabemos si valdrán pa frenar a los Red Bull. L’equipu ta envueltu en rumores sobre l’anunciu de George Russell como pilotu pa 2022, que dende Mercedes nin confirmen nin desmienten. El mesmu pilotu dixo que nun se diba saber nada sobre’l so futuru nesta carrera, anque hai munches persones que cuiden que nun ye asina y que nun se va demorar más.

Llega Silverstone, una cita perimportante nel calendariu qu’esti añu tien una dimensión nueva con toles novedaes que tamos acabantes de desplicar. Nun sabemos si vendrán pa quedase, pero de momentu, equí vos dexamos los horarios d’esti fin de selmana de cambios nel circuitu inglés:

Y éstes son les gomes que vamos ver utilizar a los pilotos demientres el fin de selmana:

Mesmu circuitu. Memos protagonistes. Distintu nome. Esto ye lo qu’estrema’l gran premiu d’esti domingu del que vivimos hai unos díes. ¿Veremos el mesmu resultáu o sedrá distintu? El dominiu de Red Bull sobre’l restu d’equipos ye esti añu mui real y tres varies victories siguíes, les más d’elles pa Verstappen, toca yá ponese serios y almitir que son claros candidatos al títulu en dambos campeonatos. Ye verdá que nada nun ye hasta que ye matemático, y los númberos nun son definitivos, pero per primer vegada en munchu tiempu vemos a un Mercedes que nun ye quién a reaicionar y sobreponese inmediatamente. Austria ye un trazáu qu’en teoría ye bonu pa Bottas, y de fechu’l finlandés fexo un bon trabayu, insuficiente pero bonu, el domingu. El so futuru ta debatiéndose estos díes, y nun puede ser cenciello pa él montar nel coche sabiendo que puede que seya’l so últimu gran premiu nel Red Bull Ring como pilotu de Mercedes. Pero, ¿qué opciones tien? Ye verdá que tuvo un aniciu de temporada más bien floxu, y que les sos temporaes como compañeru de Lewis Hamilton nun-y permitieron espoxigar porque nun yera lo que s’esperaba d’él, anque tuvo dellos momentos inspiraos que nos ficieron supone que tien más de lo que ta ufriendo. Pero la F1 tien una paciencia llimitao y tal paez que la que tien con él ta a piques d’acabase. Si 2022 ye l’añu nel que too camude, quiciás a Mercedes-y interesa más un pilotu que sepa adautase a eses circunstancies. O quiciás lo que precisa ye dalguién veteranu, que lleve tiempu nel equipu, pa que seya quien a trabayar meyor qu’ún nuevu. Ta claro que’l nome de Russell cada vegada suena más fuerte y que’l pilotu británicu ta faciendo carreres interesantes magar les llimitaciones propies de conducir ún de los coches más lentos de la parriella. ¿Ye’l pilotu que precisa Mercedes? Nunes selmanes suponemos que’l propiu equipu responderá a esta cuestión.

Tenemos munches ganes de tornar a Austria pa ver si hai cambios o si vamos a tener otru gran premiu d’adelantamientos y estratexes como’l pasáu. Esti circuitu suel ufrinos bones carreres ya’l campeonatu nun puede tar más interesante per dayuri, seya en pilotos o n’equipos.

Nun queremos escaecer comentar que dientro d’unes selmanes va tornar el gran premiu de Turquía. Si vos alcordais, Singapur ye ún de los circuitos qu’esti añu nun vamos visitar por mor de la pandemia, y pa cubrir eses feches que dexa llibres vamos viaxar a Turquía, que yá suma dos años siguíos apareciendo nel calendariu de F1 depués de dellos d’ausencia. Ta claro que lo que ta quitando la pandemia per un llau ta poniéndolo per otru.

Tai sollertes porque nun nos movemos d’Austria, del valle de Spielberg, del trazáu del Red Bull Ring y esta ye la información que precisáis pa nun perdevos nada:

Y les gomes que van usar los equipos son les siguientes:

Creyíemos que 2020 diba ser únicu no que cinca al tipu de calendariu que díbemos tener y qu’aquello de repitir escenariu pa les carreres namás yera cosa d’una temporada. Sicasí, equí tamos, n’Austria, más concretamente en Spielberg, a piques d’entamar dos selmanes de grandes premios nel circuitu Red Bull Ring. Anque con nome estremáu, nun salimos del mesmu recintu, ya’l Gran Premiu d’Estiria namás ye distintu pol so nome.

Aterrizamos nun circuitu que pudiera favorecer a Red Bull, que cuerre en casa, más qu’a Mercedes, pero viendo cómo se ta plantegando la temporada, cásique les previsiones podemos dexales aparcaes. L’optimismu percuerre al equipu del güe coloráu y vense quien a ganar a Mercedes en cualquier escenariu depués de derrotalos hai unos díes en Francia. La verdá ye que’l rendimientu que tán amosando en Red Bull con dambos pilotos ye mui importante y ta sorprendiendo a munchos que cuidaben que’l dominiu de Mercedes diba ser infinitu, o a lo menos infinitu hasta 2022.

Circuitu curtiu y mui rápidu, el Red Bull Ring tien tolos ingredientes pa ufrinos una carrera entretenida. Si amás cuntamos con una bayura de lluches ente equipos d’enriba abaxo la parriella, paez qu’hai garantíes de que vamos pasalo bien. Y ye que nun tenemos d’enfotanos namás no que faigan Red Bull y Mercedes. McLaren y Ferrari peleen dende bien ceo pol tercer puestu qu’agora ocupa l’equipu inglés, y anque los italianos esti añu tienen un coche con un meyor rendimientu, entavía tán lloñe de poder dominar y pasar per delantre de McLaren. Pela so parte l’equipu de Woking suma puntos carrera tres carrera, les más de les vegaes ente les primeres posiciones. Tamos esperando pol espoxigue definitivu de Ricciardo qu’entá nun amosó de lo que ye quién.

Un pocu más atrás, pero no mui lloñe, tenemos a AlphaTauri, Aston Martin y Alpine. Los dos últimos lleven delles carreres en puntos y con munchu meyor ritmu y trabayu en pista. Alpine son quiciás el meyor equipu no que cinca a evolución dende qu’entamó la temporada y, anque tienen muncho que facer tovía, tienen motivos pa ser optimistes. AlphaTauri tien falta de que Tsunoda asiente un pocu y seya daqué más regular magar que tán consiguiendo bonos puntos con Gasly. Aston Martin tamién medra y anque va a pasos curtios, la evolución ye evidente. Mesmo Stroll que Vettel sumaron puntos na carrera en Francia, y anque Stroll nun pudo acabar Bakú, el podiu de Vettel dio vida al equipu.

Pel cabu de la parriella, Alfa Romeo, Williams y Haas, peleen por nun quedar últimos. Yá comentemos n’otros posts que ye fácil qu’esi puestu vaiga quedar pa Haas, que nun tán ameyorando dende que s’anició la temporada. Ye verdá qu’esti sábadu pasaron a Q2 con Mick Schumacher, pero foi más bien por coincidencia que por bon rendimientu. L’equipu estauxunidense precisa d’un bon emburrión si nun quieren quedar últimos cuando veamos la última bandera a cuadros n’avientu. Estos tres equipos tienen n’Estiria otra oportunidá de tentar d’aprovechar los errores o mala suerte de los equipos d’enriba pa entrar en puntos y marcar la diferencia col restu.

Ensin descansu, llegamos a Spielberg con estos horarios. La previsión del tiempu anuncia posibilidá d’agua pa cásique tol fin de selmana coincidiendo coles hores de competición, por si nun tiníemos emoción de sobra. Nun perdáis detalle:

Con tolos güeyos puestos no que fagan les gomes de Pirelli nesti gran premiu, estos son los compuestos escoyíos polos equipos:

Cásique tolos circuitos del calendariu, cuando se ven dende arriba, úfrennos vistes bien guapes, pero si hai ún que puede presumir de ser el más vistosu de toos esi ye’l Paul Ricard, l’escenariu del viniente gran premiu. Cola temporada nun gran momentu, abúltanos qu’hasta en Francia, au les más de les carreres son tranquiles, puede ser emocionante. Depués de nun pasar per ellí en 2020, la F1 torna a ún escenariu míticu.

Y ye que, depués de lo que vivimos hai dos selmanes en Bakú, les coses siguen apertaes perdayuri, pero sobre manera no cimero onde Verstappen sigui mandando. Paeznos que naide nun entendió entá cómo Hamilton nun foi quién a aprovechase del abandonu del holandés pa ponese otra vuelta primeru nel mundial, pero too ye bono si ye pa continuar viviendo emociones intenses carrera tres carrera. Lo que sí ye verdá ye que nun tamos avezaes a que Mercedes acumule erros (aunque Hamilton fala más d’un problema col frenu “un botón máxicu” que d’un erru) y lleva dos carreres deceicionando. ¿Sedrá Francia la tercera? Lo que ta claro ye que Francia ye un circuitu nel que Hamilton yá brilló nel pasáu y ye fácil que, si too sal como otres vegaes, tamién lo faga nesta temporada.

Estos díes, ún de los focos de la competición tuvo nes investigaciones de Pirelli pa conocer qué foi lo que provocó los pinchazos de Stroll y Verstappen. Tamién na renovación d’Ocon pa tres años más con Alpine aprovechando que dambos, pilotu ya equipu, cuerren en casa. Ferrari ye otru de los focos, depués de dos carreres perbones pal equipu, ye fácil qu’en Francia veamos el so verdaderu estáu de forma.

Hai cambios tamién en Williams, au Jost Capito va ser el nuevu xefe d’equipu. Nel equipu de Grove tán teniendo una temporada discreta pero estable y muncho más regular que nel pasáu. Quiciás lo que-yos queda ye sumar dalgún puntu que remate’l bon trabayu que tán faciendo. George Russell ta clasificando ente los quince primeros cásique tolos sábados, pero los domingos nun son quien a treslladar eso a los puntos. Haas nun va ser obstáculu pa ellos, y ye fácil que seya l’equipu qu’ocupe l’últimu llugar na clasificación esti añu.

Delles posiciones más arriba, en zona más tranquila, hai munchos candidatos a facer coses interesantes nes carreres que vienen. Xente como Gasly, qu’amás equí cuerre en casa, o’l so compañeru Tsunoda, que tien falta de reivindicase un pocu depués de dellos problemes n’anteriores carreres. Daniel Ricciardo ye otru pilotu que precisa una carrera bona y a poder ser per delantre del so compañeru Lando Norris, que de momentu ta siendo’l meyor del equipu. Tenemos énte nos una batalla perinteresante nen McLaren.

Ye’l momentu de preparase, porque tamos a piques de sumar otru gran premiu a la temporada. Nun perdáis detalle de les hores y les gomes cola información que tenéis más abaxo:

Dexemos atrás les cais de Montecarlo pa perdenos nes de Bakú, que mesmo que Mónaco nun tuviera presencia na temporada 2020 pero retorna nesti 2021 cola promesa de danos bon espectáculu. Pesie a que’l gran premiu na ciudá entamara con una bona cantidá de duldes, la verdá ye dende’l principiu tolos eventos tuvieron ente los meyores de cada temporada. Esti añu tenemos amás más razones pa ver emoción nes cais de la histórica ciudá pensando no apertaes que tán les coses perdayuri.

Y ye que Mónaco foi un golpe d’autoridá de Red Bull, que llevaba bien de tiempu queriendo lliderar yá non sólo’l campeonatu de pilotos si non tamién tornar a les temporaes de gloria cuando yeren el meyor equipu de la parriella. Anque entavía queden munches carreres y les distancies nun son bultables, había tiempu que nun teníemos tanta emoción no cimero de dambos campeonatos. La debilidá amosada por Mercedes en Mónaco valió pa que Red Bull se punxera per delantre pero de xuru va valir tamién pa que l’equipu alemán nun repita nengún de los errores del pasáu domingu. Tamos avezaos a la capacidá de recuperación y deprendizaxe de Mercedes, y tamos seguros qu’en Bakú la debilidá de fai unes selmanes yá nun va tar.

Pero non sólo tenemos emoción no más alto. La temporada ta dexando bien d’emoción, equipos que van ganando tarrén y aperten entavía más les coses. Yá tiníemos en 2020 una mitá de la tabla bien interesante, pero ye que’l pasu alantre de dellos equipos fainos albidrar qu’hai munchos candidatos a sumar puntos y, por qué non, dellos podios. McLaren y Ferrari nun van dexar pasar les oportunidaes que dexen Red Bull y Mercedes. La Scuderia dio un pasu alantre esti añu, nun ye nin la solombra de lo que foi 2020, pesie a qu’entavía rumien la mala suerte de Charles Leclerc que nun pudo nin salir el domingu. Sicasí, la bona posición de Sáinz da motivos al equipu pa ser optimistes pa Bakú. McLaren, pel so llau, entamaron bien l’añu, y yá repitieron podiu. Nun sabemos si van ser quién a ganar dalgún gran premiu esti añu, pero sedría ún de los candidatos, ensin duldes.

No más baxo de la tabla, Haas nun dan señales de meyora y paez que tán condergaos a quedar arrequexaos no fondero de la parriella. Williams, pasín ente pasu, va recuperando la forma, pero entá ta lloñe de lo que yeren. De momentu, tienen la xera de facer bones carreres y aprovechar meyor les clasificaciones de George Russell.

Llegamos, pues, a Bakú, un gran premiu consolidáu por méritu y nel que tenemos puestes munches esperances. De momentu, equí vos dexamos tolos horarios de la fin de selmana y les gomes que van montar los equipos:

Llega una de les cites clásiques de tolos calendarios, con permisu del andanciu.  Non por avezáu dexa de ser esperáu per parte de los aficionaos el momentu de ver los monoplaces rodando pel asfaltu monegascu.  El trazáu urbanu nun da una tregua a los pilotos, ver les barreres tan allegaes al coche y un marxe d’error inesistente que va a penalizar a los coches con peor conducción.  Sicasí, equilíbrase la cosa en cuestión de velocidá asina que preparámonos pa ver les coses más apretaes. De fecho, Ferrari paez que quier asomar la cabecina con mui bones actuaciones nes primeres series d’entrenamientos ¿sedrá dalgo que recample’n carrera? Nun hai cosa que más mos pueda prestar a los aficionaos que se sigan uniendo equipos a la fiesta de Mercedes y Red Bull.  Lando Norris de xuru que vuelve a intentar tar lo más cerca posible depués de firmar el so anovamientu col equipu que va a usar un diseñu de colores especial pa esti gran premiu.

La xente nuevo tien que demostrar tamién l’arte que tienen sobre’l circuitu, ensin cásique rectes pa descansar y ensin poder permitise un fallu siquiera. Ye lóxico que veamos a bastantes d’ellos “besar” les muries, hai que buscar los llímites y, nesti casu, son físicos y tienen un coste.

Hai que recordar que s’alteren les axendes siempre que llegamos al Principáu magar que les dos primeres tandes d’entrenamientos fáense de xueves pa descarsar el vienres y retomar cola axenda avezada de los fines de selmana de carrera’l sábadu.  Asina que dexámovos equi los horarios pa que nun perdáis nada.