Category: Previes

Estos son los datos y los horarios pa esti Gran Premiu d’Azerbaixán 2022

Dicen que cuando tas pasándolo bien, el tiempu vuela. Que nun te decates que los minutos van pasando y que, cuando lo pienses, yá llegó’l momentu de colar. N’AsturiesF1 abúltanos que ye lo que podemos dicir pa entamar la última previa de la temporada. Tuvimos una temporada tan intensa en tolos senes que paez mentira que yá teamos escribiendo la última previa, que tornemos a Abu Dhabi.

Nun ye vezu que lleguemos al circuitu de Yas Marina col campeonatu de pilotos y de constructores ensin decidir y tan apertáu. La última vegada foi cuando Nico Rosberg foi campeón pero hasta nesi añu el pilotu alemán tinía ventaya sobre Lewis Hamilton. Nesti 2021, tanto l’inglés como’l so rival Max Verstappen lleguen empataos a puntos y con too, absolutamente too, por decir y decidir baxo les lluces del desiertu.

Hai munches coses que sí tán decidíes, como’l tercer puestu de Ferrari nel mundial de constructores, mesmo que’l restu d’equipos. Ye cosa llamatible que tampoco nun sepamos quién ye campeón del mundial de constructores, dalgo que nos últimos años Mercedes confirmaba con tiempu abondo pa cellebrar. Esti añu, too acaba n’Abu Dhabi.

Depués de la carrera en Jeddah hai munchos comentarios acerca les maniobres de Verstappen en pista, sobre les penalizaciones, sobre si ye o non “necesario” (como dicía’l so inxenieru) lo que fai pa defendese del so rival nesta competición. Lo que tenemos claro ye qu’Abu Dhabi nun va ser, de xuru, una carrera aburrida como davezu nos pasó nel pasáu. Con too por decidir y Verstappen con necesidá de llimpiar un pocu la imaxe que dexó hai una selmana, too puede pasar. Hamilton ta, quiciás, nel so meyor momentu de forma. Verstappen continúa siendo un pilotu mui complicáu de batir. La carrera del domingu, y tamién lo que vaiga pasando, yá dende’l vienres, pinta interesante.

De momentu, equí vos dexamos tola información d’horarios que precisáis pa nun perdevos nada:

Y éstes son les gomes que van llevar los equipos pa esti últimu gran premiu de la temporada 2021:

Equí vos compartimos la información de los horarios del gran premiu d’esti fin de selmana:

Y estes son les gomes que van usar los equipos pa esti fin de selmana:

Llegamos a la tanda final de carreres, después de dos siguíes en México y Brasil, toca aterrizar nel desierto pal gran premiu de Catar. Entramos yá nel tiempu de descuentu, con namás tres carreres en disputa y muncho que decidir. Siendo un circuitu nel que nunca se corrió, nun hai previsión posible, cosa qu’esti añu tampocu nun valía pa muncho viendo’l cambiu nel rendimientu de Red Bull comparao con otros años pasaos. ¿Siguirá Mercedes col ritmu de Brasil? ¿Sedrá quién Verstappen a facese cola victoria? Nestos momentos son too duldes que tenemos ganes de resolver.

Ente pleitos y batalles ideolóxiques, llegamos a Catar con Mercedes nun bon momentu, dalgo que tamién sabe Red Bull. Con dellos puntos de ventaya nel mundial de pilotos y per detrás nel de constructores, nun puede durmise si quier ganar en dambos. Tamos nes últimes carreres del campeonatu y agora cualquier erru cuesta’l doble.

Estos díes confirmóse, amás, que pa 2022 vamos tener un nuevu pilotu na escuderia Alfa Romeo p’acompañar a Valtteri Bottas: el pilotu chinu Guanyu Zhou qu’agora ta na categoría F2. Ye un palu grande pa les aspiraciones de Giovinazzi, del que tovía nun sabemos el futuru, y una oportunidá d’oru pal Zhou de reivindicase y ser referente del automovilismu en China.

Aparte de les lluches no cimero de la tabla, quédanos por ver quién triunfa na batalla ente Alpine y AlphaTauri, agora mesmo empataos a puntos na clasificación. Colos puestos de Ferrari y McLaren yá decidíos (non matemáticamente pero l’equipu inglés tienlo complicao pa superar a la Scuderia), ye’l siguiente escalón el que nun ta entavía decidíu.

Entamamos pues el tour pel ermu catarí y facémoslo con estos horarios:

Ya estes son les gomes que van llevar los equipos pa esti debú del circuitu de Losail na F1:

El reló de la F1 nun apara y yá tamos en México depués d’un añu d’ausencia. Nun hai muncho tábemos viendo los coches facer los test de pretemporada y agora yá tamos n’ún de los escenarios favoritos d’equipos y pilotos, y tamién d’espectadores. Ello ye que, nel pasáu, México tamién foi donde se decidieron los mundiales de pilotos, pero esti añu entavía nun vamos saber quién va facese con esi llogru. Depués d’EEXX, Verstappen ta per delantre, pero la llucha ente él y Hamilton nun ta rematada. Hai munchos puntos entá por repartir y munchos escenarios que percorrer.

De lo que más se ta falando agora mesmo no que cinca al mundial ye si sedremos testigos d’otra rivalidá a lo Senna-Prost, dalgo que los pilotos protagonistes nesti 2021 nun quieren nin sintir falar. Ye verdá que falamos d’un enfrentamientu ente dos pilotos míticos, pero nun paez que Verstappen nin Hamilton tengan pensao replicalo, a lo menos a posta. Nunca nun sabemos lo qu’una carrera y les sos posibilidaes puede trayer.

Per detrás, la siguiente gran batalla ye ente McLaren y Ferrari. En teoría l’equipu italianu debería ser más fuerte en México y con tres puntos y mediu de diferencia con McLaren, l’interés ye máximu. Ensin rivales cercanos de lo que preocupase (Alpine ta a ciento cuarenta y seis puntos y mediu de Ferrari en quintu llugar), dambos equipos tienen cinco carreres nes que dalo too pa facese col tercer llugar qu’anguaño ocupa McLaren y que l’equipu inglés cuida mantener no que queda de campeonatu.

A la parte media de la tabla nun-y falta interés tampocu, Alpine llidera con diez puntos sobre AlphaTauri, una diferencia qu’abulta poca con cinco carreres per delantre. Ta Aston Martin en sétimu llugar, pero yá descolgaos d’esa llucha, asina que lo más emocionante va tar nesi duelu Alpine-AlphaTauri d’estes últimes carreres. El restu de puestos casi podemos dalos por decidíos, anque nunca nun ta mal siguir sumando puntos, sobre manera si yes ún de los equipos d’abaxo.

Retornarmos al trazáu mexicanu con munches ganes de volver a sintir la emoción de les grades y les curves d’esti circuitu tan especial. Si nun queréis perdevos nada del fin de selmana, equí vos dexamos la información que precisáis:

Y estes son les gomes escoyíes pa tol fin de selmana:

Aterrizamos en Turquía y facémoslo entá comentando munches coses del pasáu gran premiu. Anque yá queden nel pasáu, ensin duldes munchos de los pilotos van siguir con ello na cabeza cuando’l semáforu s’apague’l domingu, tentando de nun facer los mesmos erros o de repetir los aciertos.

L’añu pasáu foi un gran premiu bien entreteníu’l de Turquía, con Lance Stroll consiguiendo la so primer pole y Lewis Hamilton siendo campeón del mundu por sétima vegada. Esti añu les coses son mui estremaes, y nun cuntamos con Stroll no cimero de la parriella nin Hamilton tien posibilidaes de sumar el so octavu títulu del mundu. Lo que sí creyemos ye que, pa nun desmerecer, tendremos un gran premiu con munches coses a les que tar atentos.

Empezando por Ferrari. Leclerc yá cumplió la so sanción pol cambiu de la unidá de potencia y esti gran premiu tóca-y a Sáinz facelo. El pilotu monegascu nun lo fizo mal pa recuperar nel gran premiu pasáu y espérase qu’en Turquía, el so compañeru pueda facer lo mesmo. McLaren van tener esto mui en cuenta, sobre manera depués de la deceición de perder la victoria en Rusia cuando yá casi la podíen tocar coles manes. Nun va ser fácil colocase no cimero nesta ocasión. Sergio Pérez vien con necesidá de sumar puntos depués de dellos grandes premios bastante discretos. El so compañeru, Max Verstappen, salvó lo meyor que pudo la penalización de cambiar unidá de potencia, y agora namás tien que pensar en sumar otra pole y otra victoria si quier ponese per delantre de Hamilton. Namás dos puntos los separen.

En Mercedes nun pueden permitise erros nin abandonos no que queda de temporada, o eso ye lo que piensa Toto Wolff. L’éxitu d’esta campaña pa Lewis Hamilton vien de la mano de la regularidá y de tentar de ser meyores que Red Bull, dalgo que ta costando sobre manera. Pesie a la victoria en Rusia, col so principal rival en segunda posición, poco pudo afondar na brecha que los separa, que ye bien pequeña.

La parte media de la tabla tien munchos frentes abiertos que de xuru en Turquía van dar bon entretenimientu. Tenemos ganes de ver a los Alpine y AlphaTauri tentando de meter presión a McLaren y Ferrari, y a los equipos de la parte más baxa buscando ser la sorpresa de la sesión del sábadu y, por qué non, del domingu.

Turquía suel ser escenariu de campeonatos del mundu, yá ganó Vettel y Hamilton l’añu pasáu. Esti añu, ensin embargu, la emoción ta bien repartida per dayuri. Anque abulta que Mercedes tien amarráu’l mundial de constructores, esta temporada nada nun sal como s’espera, asina que ye conveniente esperar y ver cómo va avanzando lo que queda de 2021, que cada vegada ye menos.

Los horarios pa esti fin de selmana son los siguientes. Apuntai:

Y les gomes que van montar son les que veis na imaxe:

Pasín ente pasu vamos averándonos a ochobre y a les carreres que marquen la recta final d’esta temporada. Entavía tenemos bien d’elles y nada decidío, pero cada vegada van quedando menos puntos y les tensiones nun dexen de medrar. Depués d’un gran premiu d’Italia que tornó a dexanos un incidente ente los dos competidores pol títulu y la primer victoria de McLaren depués de munchu tiempu, aterrizamos en Sochi, nel circuitu rusu nel que, nos últimos años, tien dominao Mercedes. Ye verdá que nun ye territoriu Hamilton y que Bottas tien bien garrada la midida a esti trazáu, pero tamién ye verdá, que tando como tán les coses, sacante un abandonu de Hamilton, abúltanos difícil que Mercedes quiera que gane Bottas si puede facelo l’inglés. Y ye qu’agora mesmo, los puntos que van quedando pel camín son cada vegada más valiosos tanto pa Verstappen como pa Hamilton, polo que sabemos que da un pocu igual si Mercedes dominaba en Sochi, de xuru vamos ver a un Red Bull tentando d’acabar con esi dominiu. Nun podemos escaecer que Verstappen parte con penalización de tres posiciones pol incidente con Hamilton en Monza, dalgo que pa dar un pocu más d’emoción a la carrera.

Tenemos delles noticies que vamos actualizando nel nuestru artículu de la silly season que nun dexa de medrar. Per un llau la confirmación oficial de qu’Aston Martin va competir l’añu que vien con Sebastian Vettel y Lance Stroll como pilotos. Tamién Haas confirmó que tanto Mick Schumacher como Nikita Mazepin van continuar otra temporada con ellos. Nel casu de la escudería Aston Martin, anque nun ta siendo una temporada brillante, sí que tán teniendo momentos interesantes, como les dos segundes posiciones de Vettel n’Azerbaixán ya Hungría, anque esti últimu a la fin quedara en descalificación.

Ferrari nun pudo contener a McLaren en Monza, y agora atópase per detrás na clasificación de pilotos y ensin munchu enfotu en poder facer daqué en Sochi p’amenorgar la distancia. Charles Leclerc va tener penalización por cambiu d’unidá de potencia, polo que’l so fin de selmana yá nun entama en positivu. Sicasí, la posibilidá de qu’haiga lluvia puede, como yá sabemos, alteriar les coses. Ye fácil que llueva’l sábadu, y hai delles posibilidaes pa vienres y domingu, anque paez que, como dicimos, lo más probable ye que si llueve seya pa la sesión de clasificación.

Kimi Räikkönen torna al trabayu depués de tres selmanes alloñáu de les pistes por cuenta’l coronavirus. Tando yá na recta final del campeonatu, el finlandés va sumando los que van ser los sos últimos grandes premios na F1, polo que de xuru va tar contentu de ponese otra vuelta al mandu del so monoplaza. Antonio Giovinazzi, pel so lláu, entavía nun sabe qué va ser del so futuru pa 2022, pero cuida facer una bona actuación de Sochi, con dalgo más de suerte qu’en Monza, pa poder xustificar la so presencia na parriella del añu que vien.

Aterrizamos pues en Rusia, nesti circuitu soleyeru y nel que Mercedes vien reinando dende 2014. Taremos sollertes a lo que pueda facer Max Verstappen dende la so posición de penalización, asina como de lo que puedan facer equipos como McLaren frente a Ferrari, y Alpine, qu’en principiu deberíen dir bastante meyor equí qu’en Monza.

Nun perdáis detalle d’horarios y tola información que precisáis pa esti fin de selmana formuleru:

Y estes son les gomes que van montar los equipos demientres esti fin de selmana:

Entá tamos recuperando de lo que foi’l gran premiu d’hai menos d’una selmana en Zandvoort y yá tenemos la vista puesta n’Italia, nel míticu circuitu de Monza. Casi podemos sintir el glayar de los tifosi, deseyando ver la solombra colorada del Ferrari pel trazáu italianu. Aterrizamos con munches noticies en forma de cambios pa 2022 que vos tamos detallando y actualizando nesti artículu, pero tamién con otra edición de la clasificación al sprint que yá vivimos hai delles selmanes en Silverstone. La so primer vegada recibió crítiques tanto bones como males, asina que nesta segunda toca ver si ye en verdá dalgo que convence o si quedara como una prueba más nun intentu por innovar na F1.

Por si nun vos alcordais, esti viernes vamos tener una sesión de llibres, como davezu, y depués la clasificación pal sprint del sábadu. Esti día, vamos tener otra sesión de llibres y más tarde el sprint, que va decidir les posiciones de partida de la parriella del domingu. El sprint son cien kilómetros de recorríu y lleven puntos los tres primeros (3, 2 y 1). El domingu, finalmente, tendremos la carrera.

Como novedá más importante pa Monza tenemos la presencia de Robert Kubiça a los mandos del Alfa Romeo. Como yá comentemos, Kimi Räikkönen nun pudo competir en Zandvoort por dar positivo en coronavirus y pola mesma razón entá nun puede facelo en Monza. Ye otra oportunidá d’oru pal polacu pa tener dellos kilómetros nel bolsu.

No que cinca a la carrera, esperamos tornar a ver competición no cimero, con Verstappen de vuelta nel llideralgu del campeonatu pero por un marxe bien pequeñu. L’holandés precisa d’una bona carrera, de sumar tolos puntos que pueda, y de dalgún fallu nel llau de Mercedes que-y permite facer medrar esa distancia qu’agora lu separa de Hamilton. Ferrari tien necesidá de facer un bon gran premiu énte’l so públicu, aprovechando amás la debilidá amosada nes carreres pasaes por McLaren, que ta agora cuartu per detrás del equipu italianu.

Va ser un gran premiu de munches alcordances p’AlphaTauri y sobre too pa Pierre Gasly. Hai un añu conseguía la so primer victoria na F1 depués de pasar un añu nel que lu echaron de Red Bull y perdió a ún de los sos meyores amigos y tamién pilotu Anthoine Hubert. En condiciones normales ye difícil que’l francés pueda facese con otra victoria equí, pero ta diendo a bon ritmu, como vimos en Zandvoort, asina que tien posibilidades de facer un bon trabayu.

En Williams yá saben que nun cuenten con George Russell pa 2022, pero sí con Alex Albon, que va formar pareya con Nicholas Latifi. El canadiense, que ta casi siempre a la solombra del so compañeru d’equipu, paez que convence a los dueños del equipu inglés. Sicasí, tamos entá en 2021 y, viendo como fueron les carreres hasta güei, nun podemos descartar que Williams sume más puntos de los que tien, complicando entá más a Alfa Romeo y Haas el poder alcanzalos.

Nun son bonos tiempos pal equipu estauxunidense. A les actuaciones probes, súmense les crítiques esternes que ciertamente nun ayuden a la moral d’un equipu que paez qu’esta temporada ta condergáu a zarrar la clasificación de constructores y pilotos. Sicasí, nun 2021 con carreres tan abiertes, nun podemos dar nada por zarrao hasta’l final.

Llegamos pues al gran premiu d’Italia con ganes de sintir l’atmósfera única d’esi entornu, la velocidá de los monoplaces y la intensidá de les diverses batalles que tenemos en distintos puntos de la parriella. Los horarios pa esti fin de selmana son los siguientes:

No que cinca a les gomes, esto ye lo que vamos a ver en pista: