Category: Carreres

Si teníemos dalguna previsión de lo que diba ser el gran premiu de Gran Bretaña ye fácil que nun coincidiera colo que vimos nestos tres díes d’eventu. Y ye que yá dende’l vienres tuvimos de tar sollertes a una sesión de clasificación treslladada a esi primer día nel circuitu y que valía pa decidir los puestos de partida nel sprint de clasificación del sábadu, que yera la verdadera novedá de tol fin de selmana. La sesión de clasificación del vienres nun sorprendió muncho. Quiciás podemos señalar el gran trabayu de George Russell, otra vuelta más, anque yá ye normal velu pasar a Q2 y empieza a selo velu ente los diez primeros o a les puertes. La sesión del sábadu, la non-carrera, constó de diecisiete vueltes, nes que Hamilton partía dende la cabeza. El vienres tornemos a velu recuperar esa primer posición que vinía ocupando Red Bull nes selmanes anteriores. Ello ye que una mala salida del inglés, dexolu ensin la oportunidá de ganar el sprint, dalgo que sí fizo Verstappen, más lentu nes rectes que los Mercedes, pero muncho meyor nes zones más lentes y les curves. Tres puntos más a sumar a Verstappen qu’abría un pocu más de brecha col so inmediatu persiguidor, Lewis Hamilton, que sumó dos puntos. Bottas, siempre a la solombra del inglés, quedó terceru y sumó un puntu.

Podemos dicir que foi interesante lo que se plantegó na carrera. La salida foi de les meyores coses, si non la meyor, y pudimos ver a pilotos como Fernando Alonso remontando posiciones col so Alpine, poniéndose quintu en pocu tiempu. La realidá foi poco a poco imponiéndose y anque l’asturianu acabó sétimu, el sprint acabó faciéndose-y un pocu llargu. Lo mesmo podemos dicir de Russell, qu’anque acabó novenu, un choque con Sáinz lu penalizó con tres posiciones y el domingu nun tuvo muncho que facer en carrera. Como vien siendo vezu, los Williams o más bien, el Williams de Russell, rinde mui bien a una vuelta, pero en carrera, el so rendimientu baxa abondo. Pérez foi quiciás el que más tuvo de perder. Un accidente mandólu al final de la parriella y, ensin ver la bandera a cuadros, tuvo de retirar el coche, lo que supunxo que pal domingu partía dende’l carril de pit. Sáinz foi otru que tuvo de bregar el domingu depués d’un resultáu más deceicionante’l sábadu, nel so casu deriváu del choque con Russell.

Como dicíemos enantes, en xeneral foi un eventu vistosu, pero quiciás echemos en falta daqué d’emoción, sobre too depués de la primer vuelta. Ye verdá que la llibre elleición de gomes dio daqué más d’emoción a les diecisiete vueltes, pero tamién pudimos ver dende bien ceo que Verstappen, en garrando la primer posición, yá tinía ganáu’l sprint salvo problema grave. Foi un pocu una montaña rusa, de mui emocionante al principiu hasta un pocu menos a midía que descontaben vueltes. Nun sabemos si la esperiencia va durar. Nunes selmanes va probase otra vuelta n’Italia, nel circuitu de Monza, y veremos de qué manera cambia dependiendo tamién del trazáu.

El sábadu llevó bien d’atención pola novedá del sprint, pero’l domingu ganó la partida a día más interesante de tol fin de selmana. Con grades estraes de xente esperando ver a Hamilton no más alto y un bon quefacer de los otros dos pilotos británicos, arrancó’l gran premiu de Gran Bretaña nel circuitu de Silverstone. La salida de Hamilton foi meyor que la del sábadu, pero non lo suficiente. Sicasí, la prudencia que vimos el sábadu desapaeció’l domingu y tanto él como’l so rival salieron decidíos a ganar esa carrera dende’l primer xiru. Siempre tenemos la sensación, cuando Verstappen se ve envueltu nuna llucha mui zarrada onde l’otru pilotu nun cede, que’l pilotu holandés nun sabe xestionar esos momentos. Por eso, yera d’esperar el desenllaz de la llucha de la primer vuelta con Lewis Hamilton. La culpa llevola’l pilotu inglés, que llevó una penalización de diez segundos por nun dexar espaciu bastante a Verstappen. Ensin embargu, enantes de llegar a esi puntu, vimos un Verstappen mui agresivu, como molestu polos ataques de Hamilton y la so capacidá pa ponese al so altor y casi quita-y la posición. El resultáu nun foi otru que’l Red Bull escontra les proteiciones, con un impautu bastante grande, y la llucha pol campeonatu abierta.

El accidente de Max Verstappen provocó una bandera colorada que permitió a tolos pilotos retocar los sos monoplaces y poner gomes nueves. La carrera reanudose, volviendo a salir los pilotos dende la parriella nes sos posiciones del momentu. El llíder de la carrera yera Charles Leclerc, que foi espeutador de lluxu de la batalla ente Hamilton y Verstappen y supo aprovechase d’ella p’adelantalos y colocase primeru. El pilotu monegascu tuvo un fin de selmana mui positivu, sobre too si pensamos que Ferrari nun yera candidatu a nada nesti circuitu. La penalización de Hamilton ayudólu a poner distancia ente él y el so persiguidor más cercanu que, ensin contar a Hamilton, yera Bottas. La penalización de diez segundos a Hamilton nun fizo más qu’añadir épica a la carrera. Corriendo en casa delantre de cientos de miles de persones y col so principal rival pol mundial fuera de carrera, al inglés nun-y quedaba otra que fundir l’acelerador. Y foi a lo que se dedicó en cumpliendo la so penalización, servida cuando tuvo de parar a montar gomes nueves. Con los Pirelli más duros, l’inglés salió varies posiciones más abaxo de la de partida y ensin muncha dificultá foi esguilando hasta colocase detrás del so compañeru d’equipu, que lu dexó pasar siguiendo órdenes d’equipu.

Leclerc pel so llau, tuvo dellos problemes con el coche, que parecía quedar sin potencia en determinaos momentos, como si fueren cortes puntuales que torgaben el so ritmu. Pocu a pocu la distancia trabayada con Hamilton foi menguando hasta que, a falta de dos vueltes, l’inglés pasólu y siguió p’alantre, metiendo enseguida distancia ente él y el Ferrari que taba acabante d’adelantar. El resultáu, un Hamilton que volvía a tastiar la victoria, non ensin polémica, y un podiu inesperáu pa Ferrari. Bottas, como davezu, zarraría’l podiu, depués de completar una carrera correuta anque, paeznos, insuficiente pa les sos aspiraciones de futuru. Nun se confirmó’l fichaxe de Russell por Mercedes, pero les voces que lo comenten cada vegada son más numberoses.

Non mui lloñe de les batalles polo cimero pasaron la totalidá de la carrera los dos McLaren. Norris rodó cuartu la mayor parte del gran premiu y Ricciardo tuvo que pelear más la so quinta posición. De fechu, una de les batalles de la carrera foi la que tuvo con Fernando Alonso, que tuvo una mala primer salida, pero que compensó cola re-salida y pudo terminar en puntos y casi pasar a Ricciardo. L’asturianu veríase llueu pasáu por Sáinz, que pudo sumar puntos y quedar sextu depués d’un fin de selmana complicáu pa él. El restu de puntos quedaron pa Stroll, Ocon y Tsunoda. Los Aston Martin tuvieron carreres complicaes y un abandonu nel casu de Vettel, que tuvo un bon sábadu pero nun pudo ver la bandera a cuadros el domingu.

Sergio Pérez foi el gran perdedor del fin de selmana. Tuvo una carrera complicada, siempre pendiente d’adelantar nun circuitu nel que ye daqué complicao anque vaigas con un coche más rápidu que munchos, y nin siquiera pudo entrar en puntos. La so estratexa nun funcionó, y cuando ya l’equipu vio que nun diba conseguir nada, fízolu parar pa cambiar gomes y tentar de facer la vuelta rápida, privando asina a Hamilton de sumar otru puntu. El mexicanu namás pudo ser décimosextu.

Pa los equipos de la parte baxo de la tabla foi una carrera complicada. Los Haas continúen peleando ente ellos, aprovechando cuando pueden les desgracies ayenes pa escalar puestos. Alpha Tauri sólo sumó puntos con Tsunoda en décimu llugar, mientres que Gasly foi undécimu. Un día floxu pal equipu hermanu de Red Bull. Alfa Romeo tampoco nun tuvo muncho que dicir, anque les so carreres son bastante regulares y tienen dellos momentos de brillu, nun ta siendo bastante p’averase a los puestos más altos, dalgo que tamién podríemos dicir de Williams.

Pasó Silverstone, pasó’l sprint de clasificación, y vamos tener d’esperar delles selmanes, con parón braniegu incluyíu, pa velo repetío n’otru circuitu. Cuidamos que les sensaciones en Monza van ser estremaes de les de Silverstone, poniendo más complicao a los xefes de la F1 decidir si ye un cambiu que vieno pa quedase o non. Demientres, volamos a Hungría pal viniente gran premiu, ún de los clásicos que marca la fin de la primer parte de la temporada.

Podríemos garrar el camín cenciellu y dicir que nun hebo novedaes n’Austria siete díes depués y que repitimos la hestoria. Pero nun sedría correuto. Ye verdá que tábemos nel mesmu escenariu, colos mesmos equipos y pilotos, colos mesmos horarios, el mesmu trazáu (anque con gomes distintes, eso tamién hai que dicilo) y que nun podíemos esperar más que tornar a ver lo mesmo otra vuelta. Eso sedría lo cenciello. Pero ye que, si dexamos de llau la victoria, de principiu a fin, sumando’l so primer Grand Slam, de Max Verstappen, tuvimos bien de cosines que ver demientres les setenta y ún vueltes que duró l’eventu.

Empezando pola sesión de clasificación na que Lando Norris foi segundu, dexando detrás a un Red Bull y dos Mercedes. Siguiendo pola actuación de Ferrari nesa mesma sesión, con dambos fuera de Q3. Y continuando cola penalización a Sebastian Vettel por un bloquéu en pista a Fernando Alonso que nun fexo muncha gracia al pilotu asturianu y que-y valió una penalización de tres puestos al alemán. Les disculpes del pilotu dende’l coche nun valieron pa muncho.

El domingu, con toles mires puestes no que pudiera facer Lando Norris, tolos d’arriba salieron bien y aguantaron posición. Tuvimos dalgún incidente de carrera, como’l que dexó a Esteban Ocon fuera na primer vuelta y a Gasly faciendo la primer parada del gran premiu. El pilotu francés d’Alpine lleva una racha bien negativa de carreres nes que o nun puntúa, o nun termina. Pocu depués del abandonu d’Ocon, Pérez y Norris diben ser protagonistes d’otru incidente de carrera con consecuencies pa Pérez que perdió posiciones y tamién pa Norris, que foi penalizáu con cinco segundos. Foi un domingu intensu pa los comisarios, que nun dexaron de repartir penalizaciones nin n’acabando la carrera. Pérez, foi más tarde protagonista per dos vegaes con Charles Leclerc, faciendo dalgo asomeyao, quiciás más penalizable, a lo que-y pasara a él con Lando Norris. El resultáu, diez segundos de penalización pal pilotu mexicanu, que sicasí foi quien a puntuar.

Pa Mercedes, lo único bono foi’l podiu de Bottas. El coche de Hamilton rodó con daños nel suelu demientres bastante tiempu, dalgo que condicionó la carrera del inglés, que namás pudo ser cuartu. Pa la memoria quedará’l comentariu que fexo so’l so compatriota Lando Norris, col que tuvo peleando pola segunda posición demientres un bon ratu, ensin ser quién a pasalu, y al que nun duldó n’afalagar diciendo que yera un gran pilotu. El pilotu de McLaren tuvo una actuación sobresaliente, que casi clisó’l dominiu de Verstappen polo aparentemente cenciello que lo tuvo l’holandés, que nunca nun vio amenazada la so victoria.

Tanto Carlos Sáinz como Charles Leclerc pudieron compensar un pocu’l mal resultáu del sábadu, y sobremanera nel casu de Sáinz, dexando una perbona imaxe en pista. La Scuderia ta lloñe de ser candidata a victories entavía, pero’l so potencial en carrera nun hai que desmerecelu. McLaren tien tomada la ventaya nel campeonatu de constructores, gracies tamién a una bona carrera de Daniel Ricciardo, dalgo que yá necesitaba l’australianu.

L’últimu puestu que da drechu a puntos foi pa Fernando Alonso, que nun tuvo fácil facese con él. La so llucha foi col Williams de George Russell n’otra gran carrera del pilotu inglés. Yá tamos avezaos a que tea en Q2 cásique en toles ocasiones, pero paeznos que nun vamos tardar n’avezanos en velu tentando de consiguir el so primer puntu col equipu de Grove. Ensin dulda fadría sorrir a más d’ún.

El zarru del gran premiu punxéronlu Sebastian Vettel y Kimi Räikkönen. El pilotu finlandés tuvo un gran premiu bastante intensu, con mesaxes al equipu demandando que-y dieren información sobre si taba o non dientro de los llímites de pista en ciertes zones del seutor (de nun facelo, sedría penalizáu) y remató la xornada con una maniobra que nos abulta foi cosa de la falta de visilibidá, y que dexó a Vettel fuera de carrera. Tampoco nun ye que l’alemán tuviera nesi momentu nuna posición de puntos, pero quedaben dellos metros pa ver la bandera a cuatros. El finlandés recibió una penalización de venti segundos.

La victoria foi, pues, pa Max Verstappen, al qu’acompañaron Bottas y Norris. El pilotu inglés llamentó la so penalización de cinco segundos pol incidente con Pérez yá qu’ensin ella tinía posibilidaes de terminar segundu.

Dicíamos que los comisarios nun pararon de repartir penalizaciones hasta termináu’l gran premiu y ye qu’aparte de les yá mentaes de Norris, Pérez y Räikkönen, tamién llevaron penalización Tsunoda (por saltase la llínia d’entrada a pit), Stroll (por dir mui rápido nel carril de pit), Mazepin y Latifi (estos dos últimos por nun respetar les dobles banderes marielles tres l’incidente de Räikkönen con Vettel).

Dexamos les montañes d’Austria y ponemos rumbu a Silverstone pal siguiente gran premiu que va vinir con novedaes que vos cuntaremos nel post de la so previa y que van dar una vuelta a los vienres y los sábados na categoría reina del motor.

¿Cuántes carreres son precises pa pensar qu’un equipu puede ser campeón del mundu en F1? ¿Cuántes p’almitir qu’un equipu ta en problemes? El gran premiu d’Estiria foi al tiempu sorpresa y normalidá. Sorpresa, si ye que se puede nomar asina, porque Red Bull rinde como nengún otru coche en pista. Normalidá porque ye dalgo que llevamos viendo dende casi l’entamu de la temporada. Nel Red Bull Ring venció Verstappen, n’otra lleición de dominiu de principiu a final. Mercedes tuvo de conformase con minimizar daños y ocupar los otros dos caxones del podiu.

Cola pole del sábadu, paecía que Verstappen tinía gran parte del trabayu fechu y que l’holandés nun tuvo nengún problema en caltener esa posición demientres tola carrera. Hamilton nunca nun foi un rival direutu, anque ye verdá que les carreres de los cuatro primeros cásique fueron más bien solitaries y que Pérez foi una amenaza pa Bottas nes últimes vueltes. Pero podemos dicir que’l podiu taba decidíu dende bien primero de llegar a la recta final de carrera.

Eso nun quier dicir que nun fuera una carrera emocionante. Los tres primeros amosaron un bon rendimientu, y nesta ocasión nun hai nada de qué acusar a Mercedes. Simplemente, nun pudo con Red Bull y fizo lo meyor que podía siendo segundu Hamilton y terceru Bottas. Per detrás, como yá diximos, un Pérez inspiráu y con gomes nueves na última parte de carrera. Si ésta tuviera durao unes vueltes más nun tenemos claro que’l finlandés tuviera aguantao al mexicanu, sobre too si pensamos que Pérez sufrió una parada bastante lenta que condicionó la so carrera dende esi momentu. Un pocu más atrás, anque con diferencies de tiempu bultables, Lando Norris. El pilotu inglés continúa siendo’l meyor del restu, aprovechando cuando puede les debilidaes de los de más arriba y si non tando siempre a la so vera, quedando quintu como nesta ocasión. Ferrari tuvo una carrera irregular, con momentos de bona velocidá con otros de mui baxu rendimientu, pero pueden tar contentos de tener puntuao con dambos coches, en sextu y sétimu llugar, dalgo que McLaren, qu’agora ta en tercer llugar, nun foi namás qu’a facer con Norris. Completaron el club de los diez primeros Lance Stroll, n’octavu llugar; Fernando Alonso, que suma puntos otra vuelta col so Alpine y que tuvo momentos de muncha velocidá nesti gran premiu; y Yuki Tsunoda, qu’aprovechó l’abandonu del so compañeru Pierre Gasly (un toque con Leclerc lu dexó fuera nes primeres vueltes de carrera) pa ser l’únicu AlphaTauri en sumar puntos.

Pela parte baxo, podemos rescamplar la posición de dambos Haas, que terminaron per delantre de Latifi, l’únicu Williams que vio la bandera a cuadros tres l’abandonu de Russell, que tuvo otra bona xornada de sábadu pero una deceición más de domingu. Nengún de los Alfa Romeo pudo entrar en puntos, magar que nun pintaben mal, de primeres, en clasificación. La realidá de los domingos golpea a los equipos pequeños, qu’a vegaes se llucen nes sesiones del sábadu, pero nun son quién a treslladar esi rendimientu al ritmu de carrera. Vettel tampoco nun pudo puntuar, tuvo una carrera complicada, condicionada pola so posición na parriella. Podríemos dicir lo mesmo de Daniel Ricciardo, que nun termina d’asentar bien en McLaren nin de ser el pilotu al que nos tien avezaos. La diferencia tanto nos sábados como nos domingos ente él ya’l so compañeru d’equipu llevante munchos interrogantes que nin l’equipu nin el pilotu paecen ser quien a resolver.

Quedamos n’Estiria ya en siete díes tornamos al Red Bull Ring pa vivir otru gran premiu nel trazáu austríacu. Nun sabemos si ésti sedrá una réplica de lo que vivimos esti domingu o si Mercedes dará cola solución p’amarrar al güé coloráu y tornar a lo cimero del podiu. Nun vamos tardar en sabelo.

Tiníemos marcáu 2022 como l’añu nel que’l dominiu de Mercedes podía dexar de ser tan grande y como l’añu nel qu’otros equipos diben dar un pasu alantre y desafiar al xigante alemán. Naide nun cuntaba con que yá dende 2021 dalguién fuera quien a desafiar esti dominiu. Sigue teniendo un coche poderosu pero lo qu’enantes yeren cásique paseos pelos circuitos, agora tán tornándose en carreres que nun son tan cencielles gracies per un llau a la meyora de Red Bull y tamién a los errores del propiu equipu alemán. Otra vuelta n’estratexa perdieron una carrera que podíen tener ganao. Ye raro nun ver a Mercedes deprender de fallos nel pasáu, lo normal ye que depués de momentos de debilidá fagan grandes carreres. En Francia, territoriu favorable a Mercedes en teoría, Red Bull amosó otra vuelta más el so bon estáu de forma con dambos pilotos, y que lo que vimos nes primeres carreres nun foi casualidá.

La salida nun foi bona pa Verstappen, que salía dende la pole, pero yera adelantáu por Hamilton depués de salise un pocu del circuitu. Sicasí, l’holandés siguió trabayando la so victoria, apostando col equipu por una estratexa a dos paraes que Mercedes nun supo replicar. Enfotáronse en poder aguantar coles gomes dures la segunda parte de la carrera depués de la parada, pero Verstappen con medios nuevos yera un misil. Hamilton tuvo per dellos minutos a Bottas d’escuderu, pero si les ruedes del inglés diben mal, les del finlandés entá taben peor. De fechu, quexábase al equipu de que nun-y tuvieran fecho casu cuando pidió facer una estratexa a dos paraes. Nun pudo nin con Verstappen nin con Pérez, que nes últimes vueltes de carrera adelantólu pa xubir al podiu otra vuelta. El mexicanu ta esperando saber si va continuar col equipu pa 2022, y viendo lo que tien fecho hasta agora, creyemos qu’hai motivos pa qu’apuesten por él otra temporada más.

Pero la carrera nun tuvo interesante namás no cimero. Alpine, de mano d’Alonso, trabayó muncho pa entrar nos puntos, amosando otra vuelta que’l coche ye ún de los que más ta ameyorando col pasu les carreres. Quiciás non al ritmu que quixeren, pero yá nun ye raro velos nes sesiones de Q3 los sábados. Lo mesmo podemos dicir d’Aston Martin, qu’anque nun tuvo una carrera tan bona como pa xubir al podiu como en Bakú, ficieron una carrera curiosa, sumando dambos pilotos.

McLaren ganó la partida a Ferrari, y asítiase terceru nel mundial de constructores. Anque los dos pilotos de la Scuderia partíen dende más arriba que Norris y Ricciardo, a la fin los dos pilotos del equipu inglés fueron quintu y sextu. El desgaste de les gomes nun ayudó a nengún de los dos pilotos del equipu italianu que nun fueron quien a sumar nin un puntu. AlphaTauri tamién aprovechó la debilidá de Ferrari p’atropar puntos con Gasly, que quedó sétimu. De momentu ye’l francés quien más ta sumando pal equipu, anque cuidamos que Tsunoda nun tardará en ponese al so altor.

Fuera de puntos atopamos al restu d’equipos, aparte de los yá mentaos. Alfa Romeo, Williams y Haas tuvieron carreres más bien grises, anque hai que rescamplar el puestu doce de Russell, del que se fala podría sustituyir a Bottas en Mercedes nun tardando muncho.

Tuvimos una carrera bien entretenida, con munchu adelantamientu, munchu desgaste de gomes, pero nengún abandonu nin coche de seguridá. Verstappen aumenta la so distancia con Hamilton, y Pérez pasa a Bottas nel tercer puestu del mundial de pilotos. Red Bull va abriendo güecu con Mercedes nel de constructores y McLaren asítiase agora nel tercer llugar, aprovechando’l gran premiu ensin puntos de Ferrari.

Dexamos rápido Francia pa viaxar a Austria, au vamos correr dos vegaes nel circuitu talismán de Red Bull, el RedBull Ring: el primeru d’ellos el 27 d’esti mes ya’l segundu’l 4 de xunetu. Tres selmanes intenses de carreres que de xuru van tar igual d’emocionantes (o quiciás más) que les últimes.

L’ausencia d’un añu nel calendariu nun tuvo efeutu dalu nel gran premiu que se cellebró esti domingu en Bakú y les cais de la ciudá, otra vuelta, tornaron a regalanos un eventu bien entreteníu dende l’empiezu al final. El sábadu, la pole foi pa Charles Leclerc, nuna xornada na que fueron munchos los que s’averaron de más a les proteiciones llaterales del circuitu y acabaron les sesiones llibres y de clasificación enantes de tiempu. El pilotu monegascu fízose con una pole que, en principiu, nun yera pa él, aprovechándose d’una bandera colorada provocada por Tsunoda, qu’acortó la tercer sesión de clasificación y torgó los planes del restu de pilotos. Taba claro, sicasí, que nun yera una primer posición que fuera a aguantar muncho nes manes de Leclerc, sobre manera pol fechu de qu’en Bakú nun ye tan importante como n’otres carreres la posición de salida.

Con estes blimes entamaba la carrera del domingu. Hamilton per detrás de Verstappen y dambos Red Bull per detrás de Leclerc. L’equipu del güe coloráu ta amosando qu’esti añu ye quien a desafiar a Mercedes en cualquier escenariu, dalgo que nun víemos cuantayá. Avezaos como tamos a que Verstappen seya un pilotu impulsivu, nesta ocasión vimos tolo contrario. Foi quien a aguardar el so momentu p’asitiase no cimero de la clasificación, posición que nun diba abandonar hasta los últimos momentos de la carrera. Y ye que, anque foi una carrera con munchu movimientu, paraes tempranes pa cambiar gomes y un abandonu nes primeres vueltes (el d’Esteban Ocon), les estratexes fueron protagonistes relativamente, si les comparamos con Mónaco, onde Red Bull foi mui superior nesi sen.

Equí, sicasí, nun diben ser les estratexes, nin les velocidaes punta, nin les rectes llargues les que fueran protagonistes. Diben selo les gomes. Había tiempu que nun comentábemos nada sobre Pirelli magar que nun taben teniendo problemas de reventones y los equipos paecíen tar conformes cola calidá de lo que-yos ufríen. Sicasí, nun foi’l casu esti domingu. Lance Stroll yera l’únicu pilotu que nun parara de tola parriella, y les sos gomes tiníen una antigüedä de trenta vueltes. Anque albidrábemos que nun diba tardar muncho n’entrar a facer la so parada, nun tuvo tiempu y diendo pela recta principal, una de les sos ruedes traseres reventó y aventólu pa contra la muria. Como ye lóxico, salió’l coche de seguridá pero zarróse’l carril de pit polo que naide nun pudo parar. Nun yera que dalguién tuviera previsión de facelo, yá que los pilotos montaben nesi momentu gomes dures col envís de rematar el gran premiu con elles.

En quedando limpia la pista, tornó l’aición, con Verstappen xestionando’l rellanzamientu mui intelixentemente. Paecía que la victoria taba nes sos manes y, si eso yera poco, el so compañeru Sergio Pérez taba faciendo un llabor perbonu bloquiando a Lewis Hamilton pa que nun lu pasara y pudiera tentar de facese cola victoria. Tábemos a piques del final, quedaben namás que tres vueltes pa la bandera a cuadros cuando vimos repitida la escena de Stroll d’unos minutos primero pero dende’l coche de Verstappen. El so accidente provocó una bandera colorada y los comisarios decidieron que les dos vueltes que quedaben diben disputase con salida dende la parriella nes posiciones que los pilotos tiníen nesi momentu. El sol salía asina pa Mercedes que taben teniendo un gran premiu mui probe, con Hamilton nun pudiendo con Pérez y Bottas perdíu pelos puesto baxos ensin munches esperances d’ameyorar.

Cuando les lluces coloraes tornaron a apagase, la salida de Hamilton foi bona y abultaba que diba poder ponese primeru, pero Pérez impúsose y, nuna maniobra que nun entendimos mui bien, el pilotu inglés tentólo otra vegada y acabó nuna de les escapatories, diciendo asina adiós a los puntos y a cualquier oportunidá d’aprovechar l’abandonu de Verstappen pa recuperar el llideralgu na clasificación del mundial. Igual que dicíemos enantes que tamos avezaos a la impulsividá de Verstappen, podemos dicir lo contrario de Hamilton, por eso nos abultó sorprendente que nun fuera más prudente cuando entá tinía posibilidá d’adelantar si aguantaba unos xiros. Ello ye que, con Hamilton fuera de puntos, Verstappen fuera de carrera, los pescadores en ríu revueltu fueron el propiu Sergio Pérez, que s’atopó con una victoria inesperada pero bien merecida; Sebastian Vettel, que tornaba a xubise al podiu depués de meses, nesta ocasión a los mandos d’un Aston Martin que va pintando cada vegada meyor, y Pierre Gasly, siempre a la gueta pa facese con un peldañu del podiu si los d’enriba nun lu quieren.

Vien siendo normal que los podios de Bakú seyan inesperaos pero abúltanos que nesti casu yelo entavía más. Nun cuntábemos con ver a Sebastian Vettel tan ceo tornar al caxón del podiu, nin que nengún de los tres pilotos fuera Verstappen o Hamilton. El 2021 ta afianzándose como ún de los años más interesantes d’época recién y entavía nos queda muncho que ver. La siguiente parada ye Francia, en quince díes.

Hailos que dicen que los grandes premios en Montecarlo son aburríos por mor de la dificultá de los adelantamientos y que nun hai qu’esperar gran cosa de los domingos, pero siempre hai carreres pa demostra-yos que s’equivoquen. Y ye que les sorpreses pueden venir de les situaciones que menos albidramos.

Paecía que’l fin de selmana de Mónaco diba a ser un bon fin de selmana pa Ferrari, pero un bon fin de selmana de verdá, de los de lluchar por victories y non de los d’amenorgar los daños pola falta de competitividá. Eso anunciaben a lo menos les primeres sesiones d’entrenos y nesi sen pintaba’l sábadu, colos coches coloraos lluchando pola pole con un Verstappen que paecía ser el principal enemigu y con un Bottas que s’asuntaba a la fiesta mientres hamilton comprobaba que los anovamientos que trayíen nun-y funcionaben especialmente bien.  Pero foi xusto al final de la Q3 cuando Leclerc foi direutu conta los quitamieos nun accidente qu’asemeya muncho al que tuvo Verstappen fai unos años. Y ehí acabó la clasificación con bandera colorada.

Quedaba la dulda de cómo afectaría’l golpe al coche, al que se-y via dañada a simple vista a lo menos la suspensión na parte delantera, anque la llercia venía más bien de la zona de la caxa de cambios y que-yos obligare a cambiala cola correspondiente sanción.  L’equipu anunció que nun diba a ser asina y que’l pilotu de casa saldría de la pole. Descansaben en Ferrari que colocare a Sáinz en cuarta posición amás.

Pero la suerte quixo que’l domingu, na vuelta d’instalación primero de la carrera Charles notare que dalgo nun funcionara como debiera obligándolu a meter al coche al garaxe p’acabar nun saliendo a disputar la carrera tres unos minutos de tensión nel que los mecánicos facíen tolo que podíen por intentar entender qué pasaba. Nun foi’l casu y’l pilotu monegascu tuvo qu’abandonar la parriella cola cabeza gacho. Daríase una salida cola primer posición vacante. Y too esto primero de que s’apagaren los semáforos…

Magar que la carrera se punxo en marcha propiamente, sí que tuviemos un gran premiu al estilu más clásicu nesti circuitu urbanu, onde los adelantamientos en pista tuvieron mui llimitaos y les opciones llevaben a los xuegos d’estratexes p’aprovechar l’únicu cambiu de neumáticos que s’esperaba na carrera. Y non, esta vez nun tuvo que salir el coche de carrera en nengún momentu, foi una carerra llimpia.

Marx verstappen mandaría en too momentu tres cubrir perfeutamente la salida a Bottas, qu’intentaba aprovechar la falta de Leclerc pa colase pela parte llimpio. Nun foi’l día de Mercedes: Bottas, qu’intentaba presionar al pilotu holandés pa forzar un error nun foi quien a pasar del cambiu de neumáticos, un problema a la hora de desmontar una de les ruedes obligolu a abandonar la carrera; de fecho, según Wolff, la rueda tovía sigue anclada al coche a la espera de que seyan quien a quitala na fábrica.  A partir d’ehí, el pilotu holandés de Red Bull llimitóse a controlar la carrera hasta que vio la bandera a cuadros na primer posición.  La sétima posición de Hamilton, que vio como l’intentu d’undercut-y salía torda, fai que’l pilotu de Red Bull llidere agora’l mundial.

Carlos Sáinz tenía ritmu de carrera, lo que sumao a los abandonos per delantre-y permitieran llogar un segundu puestu real y notable que pudo salvar un poco’l tastiu del fin de selmana pa la Scuderia. Norris pudo tamién sacar el ritmu necesariu pa zarrar el podiu y siguir sumando puntos pasu ente pasu anque tuvo problemes de conducción coles gomes más dures.

Al que sí que-y salío l’undercut y foi quien a adelantar un par de puestos na entrada en boxes foi a Sergio Pérez, qu’acabó cuartu faciéndose con unos puntos perimportantes pal mundial de constructores.  Vettel acabaría quintu siendo quien por fin a sacar dalgo potable del Aston Martin aprovechando una bona estratexa de carrera y Gasly llograría’l sestu puestu tres face-y tamién un undercut a Hamilton.

Siguiríen Stroll qu’aprovecho mui bien un stint de 58 vueltes coles gomes más dures y Ocon con otra bona actuación per delantre de los dos Alfa Romeo de Giovinazzi y Raikonen de los que solo llograría puntuar el primeru, el so primer puntu de la temporada.  Ricciardo sigue cola so adaptación al Mclaren y nun pudo puntuar tres perder un par de posiciones na salida y viose dobláu pol so compañeru d’equipu.

Alonso acabó perdelantre de Russell tres salise’l británicu en Sainte Devote, siguíos pol so compañeru Latifi. Tsunoda evitaria un choque con Latifi na Rascasse y acabaría xusto per detrás d’el. Pela cola, esta vez mazepin sedría quien a acabar per delantre de Schumacher, que nun pudo facer la clasificación tres estrellase contra les valles na última serie de llibres. Y ye que Mónaco nun perdona un error.

Llegaben les coses apretaes a Portugal y yá mostamos avezando a ver lluches nel asfaltu ente dos equipos a les que paez que se quieren dir sumando terceros en discordia pocu a pocu.  Si bien ye verdá que paez que la llucha polos grandes oxetivos ta reservada pa los pilotos de Red Bull y Mercedes la variedá de lluches en pista y lo xustes que tán les diferencies faen que cada fallu penalice y heba entretenimientu dayures.

El sábadu Bottas nun dexó que Hamilton sumare la centésima pole position de la so carrera y encabezó a la pareya de les fleches platiaes per delante los Red Bull. Sergio Perez va garrando los mandos del coche con más soltura y ta en disposición de cumplir col so papel nel equipu. Non solo confirmábemos que los Ferrari esti añu quieren dir asomando la cabeza pelos puestos cimeros y que Norris ta dando’l saltu de calidá que se-y esperaba, sinon qu’Ocon vino a dicir que los Alpine tamién taben equí y diben a dar guerra. Vettel llograría tamién metese en Q3 anque l’Aston Martin sigue lloñe de lo que se-y esperaba.

La carrera viose marcada pol toque na salida ente dambos Alfa Romeo que fixo que Raikkonen quedare fuera de carrera na primer vuelta y provocó un coche de seguridá que lanzó Bottas moviéndose perbién y pillando col pie cambiau a Hamilton que se vio superáu per Verstappen nun adelantamientu pela parte fuera que lu pilló despreveníu. Recuperó la posición cuatro vueltes depués demostrando que’l Mercedes tenía buena velocidá p’aplicar la mesma receta del adelantamientu per fuera nel primer xiru na vuelta 20 relegando a Bottas al segundu puestu.  A partir d’ehí Hamilton llideraría’l gran premiu cubriéndose de undercuts y con relativa tranquilidá, pero con una distancia que nun foi más allá de los cinco segundos en nengún momentu que nos demostró que la ventaya de los de Brackley nun ye tan grande como tábemos avezaos.  Bottas tuvo problemes con un sensor na parte final de la carrera y non solo nun foi quien a garrar al compañeru sinon que se vio superáu por Max nel segundu puestu teniendo que conformase con ser terceru. Lo mesmo Bottas como Verstappen entraron a boxes  pa intentar una vuelta rápida final qu’al final llevó’l pilotu holandés.

Sergio Perez foi cuartu acabando en tierra de naide pero faciendo una xestión perbona de les gomes que lu permitió aguantar en pista muncho más que’l restu de pilotu nel primer stint. Nun-y valió sicasí pa retener a Hamilton nin pudo aprovechase de dalgun safety pa ganar la posición a Bottas.

Lando Norris foi de sétimu a quintu demostrando qu’esti añu quier dexase ver y ser el meyor del restu, Leclerc nun foi quien a da-y la batalla mientres que los dos Alpine vinieron detrás, con ocon y un Alonso que volvió a ser él y que mos dexó un final de carrera sobresaliente que pue ser siña de qu’hai coses bones por venir.  Otru que recuperó en carrera lo que nun llogró en clasificación foi Ricciardo que llogro ser novenu tres salir decimosestu.  Sáinz tuvo que conformase con ser oncenu tres ser el primer pilotu n’entrar en boxes y nun garrar puntos tres vese perpasáu per Gasley nes últimes vueltes viéndose penalizáu poles gomes.

Giovinazzi llogro acabar nel puestu doce tres el toque na primer vuelta col compañeru siguíu por un Vettel que, anque acabó xusto per delantre de Stroll paez que nun acaba de volver a ser el que conocíemos.

Pela parte atrás Tsunoda acabaría nel puestu quince per delantre de Russell y tres d’ellos un notable Mick Schumacher que foi quien a adelantar a Latifi nal parte final anque llamentóse de nun poder tenelo fecho primero.  Zarraría Mazepin que sigue viéndose superáu notablemente pol so compañeru.

Asi mos dexa un gran premiu portugués que, ensín garrar alindu siquiera llévamos esta selmana yá a Montmeló, veremos qué nos espera ellí.

2021 foi nomáu añu de transición por munchos, añu de pasu, añu quiciás de trámite, enantes de 2022 y’l gran cambiu nes regulaciones. Cásique paeciera que tenía la etiqueta d’añu aburríu, añu nel que’l dominiu de Mercedes yá nun sorprendiera a naide y que casi podía entendese, mientres toles esperances tán puestes no que venga depués. Sicasí, paez qu’esti añu tien pensao danos motivos pa enganchar dende’l principiu y podemos echar la culpa a Red Bull.

Dende los test se vinía comentando que la escudería de Milton Keynes diba meyor que l’añu pasáu y que taba muncho más allegada a Mercedes que n’otres ocasiones. Había quien dicía qu’inclusive taba per delantre de les fleches platiaes. Empareyando a Hamilton con Verstappen y Bottas con Pérez, paez que tenemos dupla de batalla nes posiciones primeres de los grandes premios. Pero nun diba ser too tan cenciello.

Nun podemos escaecer que yera esti’l primer gran premiu de la temporada y aterrizamos nel desiertu primero de lo que ye vezu nel añu y con raches de vientu y arena perdayuri. Los cambios de temperatura ente sesiones d’entrenamientos siempre son un desafíu pa los equipos que ven como camuden los picos de rendimiento de les gomes a midida qu’avanza la nueche nel circuitu de Sakhir.

Teníemos munches espeutatives puestes en dellos equipos, como ye’l casu d’Aston Martin, que pesie a “debutar”, amosara daqué ritmu nos test. Sicasí, nun foi’l sábadu de Sebastian Vettel que protagonizó la deceición del fin de selmana, empezando por clasificar nel puestu diecisiete, nin siquiera pasando a Q2. El so compañeru féxolo daqué meyor, anque tenemos de señalar que l’alemán taba en vuelta cuando dos banderes marielles apaecieron en pista y acabaron coles sos posibilidaes de facer un tiempu válidu. A la fin el campeón del mundu tovía tendría una penalización por cuenta de la so velocidá escesivo nesi momentu de banderes marielles y saldría atrás del too.

Vivimos una sesión de clasificación bien interesante. Toles miraes taben puestes en Verstappen y Hamilton, los principales candidatos a facese con esi naguáu primer puestu na parriella del domingu. Pesie a qu’otros pilotos tamién tiníen mui bon ritmu, casu de Sáinz o Gasly, inclusive Norris y Bottas, la Q3 foi una batalla cásique centrada nel holandés y l’inglés. Y foi’l primeru’l que trunfó. Per detrás, Hamilton y Bottas, Leclerc y Norris. Tenemos que baxar hasta la posición oncena p’atopar a Sergio Pérez, que nun tuvo una bona actuación nesta primer clasificación de la temporada, anque compensaría daqué’l domingu.

Per detrás, Gasly; Sáinz, que tuvo una meyor Q2 que Q3; Alonso, que metió al so Alpine ente los diez primeros nel so retornu a la competición y Lance Stroll. El tableru taba dispuestu pal xuegu del domingu.

L’aniciu de la carrera foi intensu bastante. En primer llugar, el coche de Sergio Pérez apagóse de la que’l pilotu mexicanu diba na vuelta de formación. Nun tuvo mayor problema depués, pero foi un momentu tensu pal equipu ya’l pilotu y lu obligó a salir dende pitlane. Tres d’otra vuelta de formación, tolos coches ocuparon les sos posiciones. La salida foi bona pa los cuatro primeros, con llucha dende los primeros metros ente Hamilton y Verstappen y Leclerc, que salió dispuestu a pasar a Bottas dende bien llueu. Malpenes daben los pilotos la curva cuatro cuando Nikita Mazepin, pilotu de Haas, salía de pista y chocaba contra les proteiciones provocando un coche de seguridad. El pilotu rusu tuvo un fin de selmana bastante negativu, con munchos problemas de maneyu del coche y actuaciones mui probes en pista.

Los primeros xiros foron bien intensos, con tolos pilotos apretaos y adelantando y siendo adelantaos munches vegaes. Sacante Verstappen, que paecía dominar dende’l primer llugar, el restu de posiciones cambiaben toes d’un segundu pa otru. Leclerc tuvo especialmente inspiráu nesta primer parte de la carrera, anque nun diba durar pal restu. Otru Haas diba tener dalgún problema, el de Mick Schumacher, pero ensin provocar coche de seguridá. Paez que’l monoplaza estauxunidense ye mui sensible y una mala xestión del acelerador fai que’l coche se vaiga d’atrás como vimos en dambos pilotos.

Pierre Gasly nun diba tener muncha suerte en carrera pesie a la so bona actuación, en xeneral, tol fin de selmana. Perdió l’alerón delanteru por un toque con Daniel Ricciardo y eso, aparte de facelu perder posiciones, obligolu a entrar a facer una parada que nun taba prevista. La so carrera diba tar casi sentenciada dende esi mesmu momentu. Un pocu per detrás víemos a Fernando Alonso empareyáu con Lance Stroll peleando por puntos. L’equipu Alpine tuvo una actuación bastante decente esti gran premiu, pesie a que’l pilotu asturianu nun diba a ver la bandera a cuadros por tener que retirar el monoplaza con problemes nos frenos.

La vuelta catorce marcó la primer parada de Hamilton y el baile en pista. Verstappen precisaba una gran vuelta y replicar lo que ficiera l’inglés pa poder mantenese na primer posición. Sicasí, nun foi’l plan del equipu del toru coloráu, que siguió en pista col so pilotu marcando bon ritmu y tentando de sacar distancia col inglés. Finalmente, l’holandés entró na vuelta dieciocho, cuatro vueltes más tarde, perdiendo la posición con Hamilton, que yá llevaba delles vueltes en pista con neumáticos yá en funcionamientu.

Pela parte templada de la tabla atopamos a Sáinz, Alonso y Vettel. L’alemán tuvo momentos de tar en puntos, pero un choque posterior con Esteban Ocon na vuelta cuarenta y cuatro terminó col suañu. D’esto trés namás Sáinz diba sacar daqué bono en carrera, pues foi l’únicu que pudo sumar dellos puntos nel so debú con Ferrari.

AlphaTauri tuvo un gran premiu deceicionante si pensamos no que s’esperaba d’ellos pero hai que señalar los puntos sumaos pol so rookie Yuki Tsunoda, que protagonizó dellos adelantamientos en pista qu’asomeyaben a los que faría dalguien con muncha más esperiencia qu’él na categoría. De fechu, foi él quien sumó los puntos pal so equipu nun debú más qu’aceutable pal pilotu xaponés yá que Gasly nun pudo ver la bandera a cuadros.

Mercedes decidió camudar la so estratexa y parar a Hamilton otra vegada na vuelta ventinueve, esperando ver la reaición de Red Bull énte esi cambiu. D’esta forma, Verstappen tornaba a lliderar la carrera y diba preocupase de tirar tolo posible pa meter distancia ente él y l’inglés. Per detrás, seguíen les lluches, tamién ente los equipos de la parte baxo de la tabla, con un Russell valiente desafiando a Kimi Räikkönen nel so Alfa Romeo, tratando d’algamar l’últimu puestu que da puntos. Ye verdá que Russell finalmente nun diba a sumar, pero’l fechu de ver un Williams peleando en puestos más altos ye yá motivu pa ser positivos nel equipu. Ye verdá que Latifi nun pudo rematar el gran premiu, pero les sensaciones de dambos coches en pista son otres comparaes col añu pasáu.

Na vuelta cuarenta, Verstappen paró y Hamilton recuperó’l llideralgu. Nesti momentu empecipió a cocese la que diba ser la batalla final pola victoria nel desiertu: si quería pasalu, habría ser en pista. L’holandés foi recortando segundos a un Hamilton con gomes diez vueltes más vieyes y que diba al llímite faciendo por evitar que’l Red Bull se-y acercara. Lo inevitable llegó delles vueltes más tarde, na vuelta cincuenta y tres y con tres pal final. Na curva cuatro, el pilotu holandés consiguió pasar a Hamilton pero tuvo de devolver la posición por facelo pel esterior de la pista.

La FIA prohibiera a los pilotos usar esa parte del circuitu nes sesiones de clasificación y entrenos, el pilotu que sacara’l coche enteru na curva cuatro diba ser penalizáu quedando anuláu’l so tiempu de vuelta. Sicasí, en carrera decidióse que sí se podía usar esa parte pero siempre que nun se ganara ventaya con ello. Los comisarios entendieron que Verstappen, al adelantar a Hamilton sacando el coche completamente del trazáu ganara ventaya polo que tuvo que devolver la posición. Dende esi momentu Verstappen yá con menos rendimientu vio como se-y escapaba Hamilton y como se tinía de conformar con un segundu puestu que de xuru-y supo a bien poco.

Mientres tola atención taba puesta nestos dos pilotos, Valtteri Bottas ocupaba’l tercer puestu siguíu de Norris (el finlandés marcó amás la vuelta rápida); Pérez, que nun desmereció al so compañeru d’equipu remontando hasta la quinta posición depués de tener que salir dende’l pitlane; Leclerc y Ricciardo, siguíos de Sáinz n’octava posición y zarrando con Tsunoda y Stroll los diez primeros puestos.

A continuación terminaron los dos pilotos d’Alfa Romeo, primero Räikkönen siguíu de Giovinazzi. Ocon sedría décimuterceru con Russell, Vettel y Schumacher per detrás d’él. Pierre Gasly, Nicholas Latifi, Fernando Alonso y Nikita Mazepin, como yá comentemos, terminaríen abandonando.

Foi un bon aniciu de la temporada, quiciás inesperáu, pero mui intensu, con munches batalles en toles posiciones y con motivos pal optimismu. Nun sabemos si lo veremos replicar na viniente carrera, dientro de dos selmanes, n’Italia. Ye evidente’l pasu alantre de Red Bull, dalgo qu’agradecen tolos espeutadores d’esta competición, puesto que promete carreres como la de güei na que’l dominiu de Mercedes nun seya tan abultáu. Sicasí, como yá diximos, nun ye sólo interesante lo que pasa perriba. Hai muncho que ver pela zona templao de la tabla y tamién no más baxo. Sí, ye verdá, esti 2021 promete.