Category: Carreres

2021 taba destináu a ser ún de los meyores años de competición na F1. Con dos pilotos al más altu nivel compitiendo por ser campeones les más de les carreres fueron una sucesión d’eventos que diben aumentando la tensión ente dambos y tamién la desixencia. Nun yera sólo ganar si non les formes y tamién los escenarios.

Abu Dhabi, como yá comentemos na previa d’esta carrera, nun tien fama de ser un circuitu nel que veamos carreres memorables, de fechu, los últimos años cásique yera un trámite de zarru de temporada. Esti 2021 tuvo a bien caltener la emoción hasta lo último, y yá non sólo falamos de l’últimu eventu si non la última vuelta. Y ye que munches son les coses que pasaron nes cincuenta y ocho vueltes d’esti gran premiu.

Empezando pol sábadu. Un sábadu nel que Red Bull y sobremanera Checo Pérez, ficieron un gran llabor d’equipu que facilitó la pole a Max Verstappen, dexando a Lewis Hamilton segundu. Mercedes fueran mui fuertes demientres tola fin de selmana, pero l’holandés aprovechó bien el rebufu del so compañeru pa bordar una vuelta que-y valió una pole, la última de la temporada.

El domingu, col sol a piques de ponese nel horizonte, salíen los coches nel circuitu de Yas Marina. Hamilton salió mui bien y púnxose rápido per delantre de Verstappen que salió bastante mal. Los primeros metros fueron de persecución del holandés hasta llegar a un momentu d’adelantamientu onde Verstappen forzó a Hamilton fuera de pista, dalgo qu’ensin embargo nun supunxo que l’inglés perdiera posición. Entamó equí la polémica pola decisión de los comisarios de nun intervenir y namás pidir a Hamilton que devolviera la ventaya ganada, pero non la posición.

El ritmu de Hamilton foi mui altu demientres cásique tola carrera y el rendimientu de les gomes tamién. Tolos equipos diben monitorizando los tiempos de Fernando Alonso que, nuna estratexa arriesgada, decidiera montar gomes dures y dir a una parada. L’asturianu diba cuadrando bonos tiempos y rodando en puntos, dalgo que valió otros equipos pa copiar esa estratexa, como ye’l casu de Mercedes. Demientres bona parte de la carrera abultaba que Hamilton tinía too nel bolsiellu: bon ritmu, bon rendimientu de les gomes, Verstappen controláu a cierta distancia. Y eso que l’inglés tuvo de batallar con Sergio Pérez que, otra vuelta, fizo un llabor d’equipu excelente torgando l’avance del inglés tolo posible, con gomes más vieyes, y facilitando que Max Verstappen, acabante de parar, pudiera recortar distancia. A la fin Hamilton adelantó a Pérez, pero con menos distancia sobre Verstappen de lo que-y prestaría.

Per detrás les coses taben más bien tranquiles, anque teníemos batalles interesantes de Bottas tentando d’averase al podiu, y de los Ferrari tentando de pasar per delantre d’él. Norris foi terceru na parriella pero una salida de pista nos primeros metros de gran premiu torgaron la so carrera. L’interés cimeru taba, sicasí, no que pasaba ente los dos primeros. Nun sabemos si hai qu’echar la culpa a Mercedes o si daes les circunstancies ficieron lo que creyeron que yera lo meyor y nun hai más que pensar. Ello ye que, con un coche de seguridá virtual en pista por abandonu de Kimi Räikkönen, Hamilton continuó en pista mientres que Verstappen, obligáu a facer daqué distinto al inglés, entró a cambiar gomes. Les del inglés siguíen funcionando bien, pero la distancia diba amenorgando conforme pasaben les vueltes y el desgaste yera mayor. Sicasí, Hamilton seguía dominando a falta de poques vueltes pal final. Abultaba que too diba quedar como taba.

Nicholas Latifi ye un pilotu que pasín ente pasu foi consolidándose nel equipu Williams y va siguir ellí en 2021. Esti domingu convirtióse nel protagonista involuntariu del desenllaz d’esti mundial. Mientres peleaba con Mick Schumacher por posición en pista, tuvo un choque contra les barreres que provocó un coche de seguridá. Quedaben cinco vueltes pal final y Mercedes decidió que Hamilton tinía que seguir en pista. Verstappen, otra vuelta, fizo lo contrario y entró a montar gomes nueves, blandes, más rápides. L’equipu alemán alegó que había la posibilidá de que la carrera terminara col coche de seguridá, yá que Latifi dexara munchos restos na pista qu’había que llimpiar. Tamién que, en casu de parar, perderíen posición con Verstappen. Ello ye que Hamilton siguió con unes gomes de más de treinta vueltes, deseyando que’l coche de seguridá nunca nun colara. Pero coló. Y fízolo depués de que’l director de carrera Michael Masi decidiera nuna decisión polémica permitir a los coches doblaos recolocase en pista, pero sólo a aquellos que taben entre Verstappen y Hamilton y que’l coche de seguridá saliera de pista ensin esperar a que finalizare la vuelta. Asina, na vuelta cincuenta y siete de ciencuenta y ocho relanzose la carrera. Anque l’inglés aguantó lo que pudo, les gomes vieyes y dures de Hamilton nun fueron rival pa les nueves y blandes de Verstappen, qu’ensin muncha dificultá acabó adelantando al inglés y viendo la bandera a cuadros, proclamándose asina campeón del mundu.

En tercer llugar, convidáu discretu a la cellebración y llamentu d’unos y otros, quedó Carlos Sáinz, que con una carrera mui sólida foi quién a subir al podiu y amás facese col quintu puestu nel mundial de pilotos. Bottas nun llegó a alcanzalu depués de tar bien de tiempu per detrás y de fechu acabó per detrás de dambos AlphaTauri, con Tsunoda cuartu y Gasly quintu. Mercedes, sicasí, ye otru añu más campeón del mundu de constructores. Red Bull namás pudo ver la bandera a cuadros con Verstappen yá que’l gran llabor de Pérez nun tuvo recompensa y tuvo de retirar el coche.

Per detrás de Bottas, qu’acabó sextu depués de la decisión de los comisarios de los desdobles selectivos, quedaron Lando Norris, los dos Alpine con Alonso per delantre y Charles Leclerc. Nengún de los Alfa Romeo acabó la carrera, nun amargu final pa dos pilotos que nun van siguir na F1 en 2022. Aston Martin nun puntuó con nengún de los pilotos, mesmo que Ricciardo, qu’acabó duodécimu. Aparte de los yá mentaos, tampoco George Russell pudo ver la bandera a cuadros, la última de so como pilotu de Williams.

Y asina foi. Abu Dhabi punxo’l zarru a una temporada perinteresante como nun podía ser d’otra manera, con una gran carrera na que too acabó decidiéndose nos últimos metros con una polémica que fizo que Mercedes reclamase pola xestión del coche de seguridá nuna quexa que foi refugada polos comisarios, anque paez que la marca alemana quier siguir alegando na sisguiente instancia.  Una llástima qu’una gran temporada tanto de Verstappen como de Hamilton acabare col focu sobre les decisiones que tomó dirección de carrera. Agora toca ponese a pensar na temporada viniente, la 2022, con cambios nes regulaciones y muncha expectación por ver quién se fai col llideralgu d’estos nuevos monoplaces. Mientres tantu, queden noventa y cinco díes de reflexón, llectures, información y, sobre manera, descansu.

El circuitu de Xida tinía munches papeletes pa ser escenariu d’un bon eventu: debutaba nel calendariu, el so trazáu yera almiráu (y casi temíu) por pilotos ya equipos y colos campeonatos de pilotos y constructores tan apertaos, la tensión diba añadir emoción a la carrera. Y asina foi, anque esa tensión tiñose en determinaos momentos de maniobres duldoses pela parte de quien, hasta agora, llideraba’l campeonatu en solitario.

Xida ye un circuitu nel que los erros páguense doble. Con un trazáu con munches curves a fondu, mui rápidu y coles muries mui cerca, cualquier dulda o cualquier fallu puede acabar cola carrera. Viviólo Carlos Sáinz el sábadu, que con un mínimu contactu col alerón traseru nuna de les proteiciones acabó condergando la so sesión. Tamién lo vivió Max Verstappen, que nel so ansia d’aplastar los tiempos de Hamilton, perdió’l coche na última parte cuando yá taba acariciendo la pole y acabó chocando cola muria y quedando terceru na parriella del domingu.

El domingu esperábemos un gran premiu mui intensu, con munchos incidentes, con muncho que comentar. Sicasí, les primeres catorce vueltes fueron más bien tirando a aburríes. La salida foi mui llimpia, ensin práuticamente toques (los qu’hubo nun torgaron la carrera de naide). Casi abultaba que díbemos vivir otru gran premiu d’Abu Dhabi ensin muncho que ver. Pero…a partir de la vuelta quince empezó la folixa. Mick Schumacher tuvo un accidente y acabó contra les proteiciones, que resultaron daqué dañaes pol impautu. Salió’l coche de seguridá y munchos pilotos, ente ellos los dos de Mercedes que partíen primeru y segundu, entraron a facer cambiu de gomes. Nun lo fizo Max Verstappen y pasó a ser primeru demientres esi tiempu. Colo que naide nun cuntaba ye cola bandera colorada que se diba sacar al pocu, cuando ya entrare a box cásique la mitá de la parriella. Eso obligó a los coches a apartar nel pitlane y ufrió a los pilotos que nun pararan primero a camudar les gomes, ensin coste de posición aforrando asina una parada dalgo que, estratéxicamente, yera mui bono pa los sos intereses y daba la vuelta a la ventaya que buscaren los qu’entraron col coche de seguridá en pista.

Iguaes les proteiciones, la carrera tornó a entamar, otra vegada dende la parriella, pero con otres posiciones. Sicasí, esta vegada nun díbamos tener una salida tan tranquila, y nun tardamos en ver a Checo Pérez perder el control del so monoplaza y al Haas de Mazepin embestir al de Russell per detrás. El resultáu, otra bandera colorada. Pero mientres, per delantre Hamilton intentaba adelantar a Verstappen na primer frenada, pero l’holandés nun fadría demasiao por facer la curva espulsando de pista al pilotu inglés que se vio superáu por Ocon al perder la trazada na maniobra.

La carrera foi avanzando ente banderes, coches de seguridá virtuales, provocaos pola cantidá de debris que quedó en pista, ente otros por Sebastian Vettel, que con dellos choques foi perdiendo trozos de coche hasta qu’acabó abandonando. Nun foi un gran fin de selmana p’Aston Martin. Sí lo foi pa Ferrari, que puntuó con dambos pilotos y que se benefició de les banderes coloraes sobre too con Sáinz, que depués del desastre del sábadu foi quien a sumar bonos puntos. McLaren tamién sumó, Ricciardo foi quintu y Norris, mui perxudicáu poles banderes, namás pudo ser décimu. Alfa Romeo sumó puntos con Giovinazzi, mientres que Räikkönen tuvo dellos momentos en pista que nos recordaron a les sos carreres de rallye.

Pero, ensin duldes, tola emoción y tolos comentarios tuvieron enfocaos, como nun podía ser d’otra manera, no que pasó pela parte d’arriba y nes radios que dibemos oyendo. Nun dexamos de sorprendemos pola forma na que Masi “negociaba” con Red Bull la opción de que Verstappen saliere detrás de Hamilton nel próximu reaniciu de la carrera como “penalización” pola maniobra anterior, remitiéndose a los comisarios de nun aceptar la propuesta. Red Bull aceptó.  Esta vez Verstappen aprovecharia una bona salida y’l despiste de Hamilto que se preocupó más d’Ocon que d’él pa ganar la primer posición. Con gomes medies frente a les dures de Hamilton agora, l’holandés tinía más velocidá, pero tamién más desgaste y cuando les gomes dures del inglés empezaron a tener un meyor rendimientu, la distancia ente dambos yera mínima. Varies vegaes tentó Hamilton d’adelantalu pero ensin éxitu, ente otres coses porque Verstappen decidía dir rectu nes curves una vez más, ganando ventaya con ello. Foi penalizáu por direición de carrera, y obligáu a devolver la posición, dalgo que fizo de forma confusa y provocando que Hamilton chocara contra la so parte trasera faciendo-y un brake test nuna de les zones más rápides del circuitu tal y como confirmaría la FIA tres la carrera. Fueron momentos de tensión nos que dende Mercedes nun entendíen nada y en Red Bull comentáben-y a Verstappen per radio que delles maniobres que taba faciendo nun yeren necesaries. Nun queda clara cuala foi la intención, anque l’interés de dambos pilotos por nun pasar primeros pela zona de deteccción del DRS paez que tuvo dalgo que ver. A la fin, l’holandés dexó pasar a Hamilton, pero demasiao tarde pal gustu de direición de carrera. Recibió una penalización de cinco segundos, más otros diez que sumaría al final de carrera pola maniobra del frenazu anterior. Sicasí, Verstappen salvaría la so segunda plaza, yá que Bottas, que foi terceru, entró con munchu marxe per detrás. El finlandés tuvo peleando por esi últimu caxón del podiu hasta la mesma bandera a cuadros, dexando a Ocon cola miel nos llabios y teniendo que conformase con ser cuartu depués de rodar terceru cásique tol gran premiu ya incluso ser primeru en dellos momentos.

Aportamos a Abu Dhabi con empate de puntos nel mundial de pilotos y les coses ensin decidir nel de constructores, anque con ventaya pa Mercedes. Nun tenemos alcordanza de nengún mundial n’años recién que llegara asina hasta’l final y Abu Dhabi, que de normal suel ser un trámite pa pilotos y dellos equipos, va tornase na carrera decisiva d’esta temporada 2021. En menos d’una selmana sabremos quién ye’l nuevu campeón del mundu de la F1.

Había ingredientes abondos pa facer del gran premiu de Catar un eventu interesante: correr embaxo les lluces, en mediu del desiertu, nuna pista que cásique ningún pilotu probara primero y un campeonatu entavía ensin resolver. El resultáu paez que nun sorprende a naide pero lo que vimos en pista sí que foi entretenío. Hamilton sigue pali que pali recuperando tarrén, anque nun sabemos si yá va tarde. Ello ye qu’agora namás hai ocho puntos ente Verstappen y él y queden dos carreres namás. Les coses tán entavía más apertaes nel mundial de constructores, au Mercedes llidera pero namás por cinco puntos. Bottas nun tuvo un bon gran premiu anque sí tinía bon ritmu, y magar la victoria de Hamilton significó sumar un bon puñáu de puntos, el fechu de que’l finlandés tuviera de retirase nun ayudó al llabor d’equipu.

Ello ye que Hamilton partía de la pole, siguíu de Gasly y Alonso, convidaos d’honor pero atípicos. Verstappen recibió una penalización poles dobles banderes marielles a les que nun fizo casu, mesmo que Bottas. La carrera pintaba bien pal inglés, pero tratándose de Verstappen, yera fácil aldovinar que nun diba tardar en recuperar les posiciones. Y asina foi. Hamilton nun tuvo muncho no que pensar más que ser precisu, cuidar les gomes y tentar de caltener la distancia col segundu. La estratexa funcionó y Verstappen nunca nun foi una amenacia real. La salsa de la carrera tuvo un poquín más atrás, donde l’Alpine de Fernando Alonso rindió a ritmu d’aplausu. Recordonos momentos n’Hungría, y anque abultaba que Pérez diba poder pasalu pa facese col tercer puestu del podiu qu’ocupaba l’asturianu, un coche de seguridá virtual alivió la presión y la bandera a cuadros nun tardó n’asomar. Si hai que destacar una cosa ye, precisamente, el bon momentu de forma del equipu nesti gran premiu: empataos a puntos con AlphaTauri precisaben d’un bon golpe de puntos que los punxera per delantre. El sábadu Gasly clasificó per delantre xusto d’Alonso, el coche abultaba potente y con bon rendimientu pero, como davezu, los puntos danse’l domingu y ehí ye cuando AlphaTauri amosó debilidá frente a la superioridá d’Alpine. De fechu, pa empeorar les coses pal equipu filial de Red Bull, nengún de los sos pilotos sumó puntos, lo que significa que, faltando dos carreres, tienen mui complicau esi quintu llugar nel mundial. Ye verdá qu’en dos carreres tamién puede pasar cualquier cosa, sobre manera si pensamos que na siguiente tornamos a tener un circuitu desconocíu pa los pilotos, pero abúltanos difícil creyer qu’AlphaTauri vaiga sumar con dambos pilotos y bien per delantre d’Alpine.

McLaren perdió otra oportunidá tamién d’arañar puntos pa facese col tercer puestu que-y arrebatara nun hai muncho Ferrari y nel qu’agora l’equipu italianu ta consolidáu. Norris tuvo gran parte del gran premiu ne cuartu llugar, pero una parada al final casi de la carrera lu condergó a ser novenu. Ferrari amosó bon ritmu con dambos pilotos, pero non suficiente p’averase a los puestos de podiu y conformáronse con ser sétimu (Sáinz) y octavu (Leclerc), siempre per delantre de McLaren que namás sumó con Norris.

Otru equipu que tuvo un bon rendimientu nesti gran premiu foi Aston Martin. Dambos pilotos entraron en puntos (Stroll foi sextu y Vettel décimu) y sumen bones sensaciones nesta recta final del campeonatu. Nun ye que vaiga camudar muncho’l so destín nesti 2021, pero sí ye verdá qu’atropar puntos con dambos pilotos ye dalgo a lo que nun tán avezaos y siempre ye positivo pa la moral del equipu.

Protagonistes fueron tamién les gomes. Y ye que varios pilotos sufrieron pinchazos y cásique podemos dicir qu’arruinaron les sos carreres por cuenta d’ellos. Foron momentos tensos, puesto que les gomes que reventaben yeren aquelles con un percorríu d’alrodiu les treinta o treinta y ún vueltes, y aquellos pilotos que s’averaben a esi númberu al final de la carrera, con poques vueltes pal desenlace, tuvieron de cuidales muncho pa nun vese na mesma situación que Bottas, Latifi y Russell.

Queden namás dos eventos, ún del que nun sabemos qué esperar y otru que nun suel brindanos carreres demasiao emocionantes. Sicasí, si llegamos ellí col mundial abiertu, quiciás les coses camuden. De momentu, ponemos rumbu al siguiente gran premiu, penúltimu de la temporada.

Cuando dicimos que Brasil nunca nun deceiciona ye por dalgo. Yá nun ye sólo en carrera ye qu’hasta la clasificación al sprint foi perinteresante, al contrariu de lo qu’abultó nes dos sesiones anteriores en Silverstone y Monza. Ye verdá que parte de la culpa de que fuera tan interesante la tien Lewis Hamilton y la so descalificación por irregularidaes nel alerón traseru, dalgo que lu obligó a salir el sábadu últimu. Con estes blimes podríemos pensar que bono, de xuru l’inglés diba tenelo fácil pa dir remontando, pero a la fin son venticuatro vueltes lo que dura un sprint y pa enriba tamién arrastraba pal domingu una penalización de cinco posiciones por camudar elementos de la unidá de potencia. Nun pintaba bien pa Mercedes. Sicasí, yá non sólo Hamilton si non tamién Bottas, tuvieron inspiraos. El finlandés foi primeru nel sprint mientres que Hamilton foi adelantando col ritmu d’un reló hasta a quince coches, acabando quintu. Eso en venticuatro vueltes. Les decisiones de montar gomes blandes o medies condicionaron la carrera de munchos pilotos como ye’l casu de los dos de Red Bull, que fueron bastante conservadores y nun arriesgaron en nengún momentu. Nel casu de Verstappen, conformose con ser segundu, ensin apurar a Bottas más de lo necesario, y nel de Pérez con Sáinz, que tuvo una bona salida y ocupó’l tercer llugar, anque quedemos tamién cola sensación de que Pérez nun arriesgó tanto como en carrera.

El domingu, depués de lo visto nel sprint con Hamilton, nun podíemos menos qu’esperar ver otra remontada, saliendo dende’l décimu puestu, pero…¿diba ser quién a desafiar a Verstappen pola victoria? Bottas partía de la pole anque’l finlandés tuvo bien poco que facer nel momentu de la salida. Tentando de protexer la so posición con Verstappen escaeció que Sáinz y Pérez veníen per detrás, y anque l’español tuvo una mala salida y un toque con Lando Norris, el mexicanu pronto se punxo per delantre del pilotu de Mercedes. Mientres tanto Hamilton emprendía la so escalada hasta los puestos cimeros, y pronto lu vimos en podiu. El Mercedes tenía munchu más ritmu que los dos Red Bull, pero pesie a ello tentaron de superar al so rival al traviés de la estratexa. Depués d’un coche de seguridá por cuenta de los restos dexaos por Tsunoda nun toque con Stroll, y otru virtual pol debris dexáu por Schumacher n’otru toque con Räikkönen, les paraes quedaron retrasaes, pero Mercedes decidió adelantar la de so, buscando asina batir a Red Bull. Sicasí, los del toru coloráu reaicionaron rápido ya entraron la vuelta siguiente, evitando l’adelantamientu pero non que’l pilotu inglés s’averara más a Verstappen.

Les vueltes siguientes fueron una sucesión de metros y más metros de persecución con un Verstappen milimétricu, calteniendo a Hamilton fuera de zona de DRS demientres bastantes d’elles. Sicasí, el Mercedes paecía imbatible y pronto baxó esa distancia d’un segundu y l’inglés púnxose a tiru d’adelantamientu. Nún d’esos intentos, l’holandés fizo una maniobra qu’acabó con él y Hamilton fuera de pista y que los comisarios revisaron, anque ensin tomar decisión dala de penalización. Tres d’esti eventu, Hamilton nun paró d’intentar pasar a Verstappen, pero siempre con cuidáu de nun arriesgar más de lo necesario y acabar con dambos fuera. Sicasí, el final taba cerca y yera evidente que Hamilton, con munchu más ritmu que Verstappen, diba terminar pasándolu. Y asina foi. A falta de delles vueltes pa finalizar, l’inglés adelantó al pilotu de Red Bull y pronto punxo distancia ente ellos. Dende Mercedes animaron a Bottas pa que ficiera lo mesmo anque’l finlandés taba mui lloñe como p’averase a él. Tanto él como Hamilton fueron críticos coles decisiones estratéxiques del equipu que, según Bottas, costaron esi segundu puestu.

Cuando too esto taba pasando, per detrás Ferrari yera quién a superar con muncho a McLaren, confirmando casi definitivamente que van ser terceros nel mundial. Col incidente de la primer vuelta con Sáinz, Norris complicóse muncho la carrera, y anque entró en puntos, namás pudo facelo en décimu llugar. Ricciardo, pel so lláu, tuvo más ritmu que na sesión de sprint, pero tuvo d’abandonar. Los dos pilotos de Ferrari fueron quintu y sextu, con Leclerc dalgo más inspiráu que Sáinz nesta carrera que na del sábadu.

Tamién hubo puntos pa Gasly, que tuvo un mui bon fin de selmana, al contrario que’l so compañeru Yuki Tsunoda. Alpine puntuó con dambos pilotos y agora atopámoslos empataos a puntos con AlphaTauri nel mundial de constructores. Les vinientes tres carreres nel desiertu van ser mui interesantes ente estos dos equipos. Aston Martin nun tuvo’l día y anque Vettel rodó en puntos en parte de la carrera y tuvo un bon sprint, el domingu acabó undécimu. Los equipos qu’ocupen la parte baxo de la clasificación ordenáronse más o menos como davezu, con Räikkönen como cabezaleru del restu. Les oportunidaes d’Alfa Romeo de pasar a Williams nel mundial y de Haas de sumar dalgún puntu son cada vegada más pequeñes.

La F1 nun para y torna al desiertu pa les vinientes tres carreres. La primera d’elles, la d’esti domingu 21 va ser per primer vegada en Catar. Nun perdáis detalle na nuestra previa d’esti nuevu circuitu nel calendariu formuleru.

Abúltamos qu’a estes altures de la temporada yá podemos afirmar dalgo: non, lo que vimos hasta agora nun foi un espeyismu, ye verdá que Red Bull ta muncho más fuerte esti añu, lo suficiente como pa ganar a Mercedes au n’otres ocasiones yera dalgo impensable. Y ye que depués de la victoria de Max Verstappen, la so réplica en México dexó munches coses clares y un campeonatu que, si non entá resueltu, yá va esclariando lo qu’al entamu de la temporada paecía que yera namás qu’una coincidencia.

México foi yá en dos ocasiones escenariu de trunfu pa Mercedes y pa Lewis Hamilton. Nesti trazáu, el pilotu inglés proclamose dos vegaes campeón del mundu y les sos carreres equí cásique siempre foron bones, superiores al restu. Esti fin de selmana, Red Bull taba ehí, sumando’l puxu de la xente qu’animaba non sólo al so pilotu de casa, Sergio Pérez, si non tamién al so equipu. El mexicanu tuvo nel puntu de mira demientres tol fin de selmana, como ye lóxico, tamién porque había quien s’entrugaba si, en casu de posible victoria pa Pérez esti veríase obligáu a ceder énte’l so compañeru pensando siempre nel campeonatu de pilotos. El sábadu, Pérez llideró los llibres tres y tinía bona pinta pa la sesión de clasificación. Ensin embargu foi Mercedes con Bottas quien se fexo col honor de salir primeru’l domingu. L’equipu alemán y los sos dos pilotos tuvieron actuaciones discretes y de fechu paecía que nun diben ser quién a acurtiar el mediu segundu que tiníen con Red Bull. Foi na Q3 cuando Bottas descubrió que, escontra tolo que se pensaba de mano, Mercedes tiníen dalgo más, un dalgo que valía una pole.

Col pasu cambiáu, llegábemos al domingu, nun sabiendo yá qu’esperar depués d’una sesión de sábadu que sorprendió a tol mundu, incluso a los mesmos pilotos de Mercedes. Sicasí, les coses nun diben desenvolvese igual na xornada de gran premiu. Una salida maxistral de Max Verstappen, que se punxo en paralelo con Bottas y Hamilton enantes de frenar na primer curva y una frenada más tardía lu colocaron primeru, puestu que yá nun diba abandonar hasta ver la bandera a cuadros. Bottas pel so llau, depués de tentar de defender la so posición y ayudar al so compañeru d’equipu con más fe qu’ésitu, acabó trompeando y viendo como lu adelantaba tol mundu tres un toque con Ricciardo. La carrera del finlandés quedó ehí sentenciada y lo único que pudo facer pa compensala foi quita-y a Verstappen el puntu de la vuelta rápida.

Hamilton pel so lláu tuvo tola carrera en segundu llugar, ensin poder averase lo suficiente a Verstappen y siempre cola solombra de Pérez nel so retrovisor. El mexicanu tenía ritmu, pero nun foi suficiente pa pasar al inglés, que xestionó bien la so carrera pesie al desgaste de gomes, superior nel so casu comparáu col de Pérez. Foi una carrera nel que hubo una montonera de doblaos, que tamién xugaron el so papel nesta llucha por posición. Pesie a les banderes azules, cuando tas compitiendo na to propia carrera, a vegaes nun tienes la capacidá p’apartate y a la vez nun perder tiempu col que tienes delantre o detrás. Vimos batalles interesantes per detrás de los tres primeros. Pierre Gasly tuvo un gran premiu mui sólidu y de fechu foi cuartu, per delantre de los dos Ferrari y tamién de McLaren. El so compañeru Tsunoda foi ún de los accidentaos nel entamu del gran premiu xunto con Schumacher.

Ferrari tuvo un bon rendimientu, con dambos pilotos, y fueron quién a quedar per delantre de McLaren, dalgo qu’agora los coloca per delantre nel mundial. Norris pudo puntuar pero namás nel décimu puestu, un puntu que sabe a bien pocu, sobre manera por ser l’únicu que sumó l’equipu inglés, yá que Ricciardo quedó nel puestu doce.

Hai que rescamplar l’actuación de Vettel y Räikkönen. L’alemán foi sétimu, per detrás de dambos Ferrari y xusto per delantre de Räikkönen, que sumó puntos mui valiosos pa Alfa Romeo. Nun creyemos que vaigan ser bastante p’averase a Williams na clasificación de constructores, pero tolo que seya sumar puntos va ser bono pal equipu. Alpine sumó dos puntos con Alonso, que foi novenu, mientres qu’Ocon nun pudo más que ser décimoterceru. Col cuartu puestu de Gasly, agora mesmo AlphaTauri empata a puntos con Alpine na clasificación.

Si hai dalgo que quedó claro esti fin de selmana ye que naide dulda yá que nesti 2021 Red Bull tien capacidá de ganar en cualquier circuitu y coles carreres que nos queden, namás que cuatro, casi paez que Red Bull y Verstappen tienen too nes sos manes pa ser campeones. Sicasí, entavía queden cuatro carreres y munchos puntos que pueden camudar el cuadru qu’agora tenemos delantre. Nuna selmana viaxamos a Brasil, al circuitu d’Interlagos que, de xuru y como ye vezu, va dexanos una gran carrera con muncho que ver en pista.

Munches vegaes, l’atención mediática na F1 céntrase, como paez lóxico, nos pilotos que tienen más posibilidaes de ser campeones del mundu. De la que va pasando la temporada, esa atención va enfocándose cásique esclusivamente a los que son claros aspirantes, dexando atrás los que podíen selo pero, por resultaos, yá quedaron fuera. Sicasí, a vegaes son estos pilotos los que dan más que falar que los anteriores, como vimos en Turquía. Nestos momentos, tola atención ta puesta enriba de Lewis Hamilton y Max Verstappen, pero’l domingu en Turquía tuvimos otros protagonistes que dieron más que falar y ver qu’esti par.

Valtteri Bottas recuperó la senda de la victoria, depués de más d’una temporada (la última vegada que ganara fuera n’Azerbaixán) y fízolo dominando pero ensin munchu ruíu. Dende que vio apagase’l semáforu en verde’l domingu, partiendo del primer llugar de la parriella, nun paró hasta facer lo mesmo y ser el primeru en ver la bandera a cuadros. Ye verdá que nun consiguió la pole’l sábadu, que foi pa Hamilton, pero la penalización d’esti por camudar delles pieces del so monoplaza ficieron que’l finlandés saliera primeru en carrera. Max Verstappen tuvo tol fin de selmana a la sombra de Mercedes, y anque nun pudo ganar el domingu, quedar per delantre de Hamilton y qu’esti fuera quintu en carrera, ayudó a que l’holandés seya llíder del campeonatu agora con seis puntos perriba d’él y seis carreres por disputase.

Lewis Hamilton tuvo un rendimientu escelente demientres tol fin de selmana, pero nun pudo ganar. La pole, como dicimos, foi pa él, pero en carrera, saliendo undécimu, nun pudo facer muncho más de lo que vimos. Arriesgó coles gomes, que fueron intermedies pa tol mundu poles condiciones d’agua del trazáu, queriendo facer la carrera entera o la mayor parte d’ella ensin cambiales, dalgo que tuvo a piques de consiguir hasta que’l pilotu inglés tuvo d’entrar, dalgo que yá condicionó’l so final de carrera, ensin dexalu con posibilidá dala d’adelantar y ponese a tiru de podiu. Les gomes intermedies anque duren más nel tiempu precisen delles vueltes pa ponese a temperatura y amosar el so meyor rendimientu, dalgo que Hamilton nun tuvo tres la so parada.

Pero nun foi sólo cosa de les gomes que Hamilton nun pudiera subir al podiu. Pa ello tuvo a Sergio Pérez actuando d’escuderu del so compañeru, tentando de dexar al inglés lo más atrás posible pa que Verstappen pudiera sumar más qu’él. Y consiguiólo. De fechu, terminó subiendo al podiu xusto per detrás del so compañeru, acompañando dambos a Bottas, que tamién fexo’l so llabor de torgar la victoria de Verstappen. Como dicimos, el domingu fueron otros los que llevaron l’atención.

Per detrás del podiu, Charles Leclerc, qu’aprovechó la parada de Hamilton y los problemes d’esti pa poner en temperatura les sos gomes pa garrar el cuartu puestu y nun soltalu hasta ver la bandera a cuadros. Ferrari tien motivos pa cellebrar, pues esti cuartu puestu de Leclerc súmase al octavu de Sáinz, que partía dende bien atrás por cambiar la unidá de potencia y entavía pudo sumar puntos. L’equipu italianu cuntaba con facer un bon gran premiu y, ensin ser posiciones brillantes, sí que ye verdá que salieron refuerciaos de lo que podía tener sío un gran premiu más negativu pa ellos. McLaren namás sumó con Norris, que tuvo de conformase con ser sétimu per detrás de Pierre Gasly, que llevó una penalización por sacar a Fernando Alonso de pista nos primeros metros del gran premiu.

L’asturianu recibió tamién una penalización, nel so casu por un choque con Mick Schumacher qu’acabó col pilotu de Haas trompeando. Alonso nun pudo recuperar del incidente con Gasly y nun entró en puntos. Alpine namás sumó con Ocon, que sólo pudo ser décimu. Stroll fízose col novenu llugar, nun gran premiu nel que Vettel nun pudo facer más que ser décimoctavu. L’alemán foi’l coneyu d’Indies de la parriella al decidir montar neumáticos de seco, por facer daqué diferente que lu pudiera ayudar a xubir na clasificación. El problema foi que la pista nun secó no que duró la carrera, nin colos coches pasando demientres cincuenta y ocho vueltes nin col fechu de que parara de llover. Les intermedies fueron les grandes protagonistes, y sólo Vettel arriesgó (y falló, pagando l’erru con posiciones).

Foi un gran premiu ensin abandonos, y anque nun foi vistosu no que cinca a adelantamientos, sí que lo foi no estratéxico, na xestión de gomes y nes lluches entre pilotos, sobre manera la de Pérez y Hamilton. Colamos de Turquía con seis carreres pendientes, el mundial de pilotos entavía mui apertáu. Nel de constructores, manda Mercedes con una diferencia de treinta y seis puntos con Red Bull. McLaren caltién el tercer llugar, anque namás con siete puntos y mediu de diferencia con Ferrari.

Ponemos la vista nel otru llau del océanu y viaxamos a Austin pal gran premiu de los Estaos Xuníos dientro dos selmanes. Col mundial tán apertáu de xuru vamos vivir momentos intensos nel trazáu americanu.

Dalguién que namás viera’l gran premiu de Rusia del domingu hasta faltando alrodiu les diez vueltes pal so final, tendría na cabeza un resultáu mui distintu al qu’a la fin tuvimos. Y ye que, pa nun variar esti añu, tamién en Sochi tuvimos una bona carrera de la que nun pudimos perder nin un momentu. La primer novedá tuvímosla’l sábadu, cola suspensión de los terceros entrenamientos llibres y una sesión de clasificación en moyao. La siguiente, la pole de McLaren. Bien de tiempu llevaba l’equipu de Woking tentando de tornar a sumar victories y poles y nesti 2021, a la fin, pudieron facelo. Nesti casu l’encargáu d’ocupar el primer puestu na parriella del domingu foi Lando Norris, que batió a Carlos Sáinz y a George Russell, segundu y terceru. Sí, nin rastro de los Mercedes nes primeres posiciones. Y ye que los dos pilotos del equipu alemán clasificaron bastante abaxo, nun fueron quien a garrar temperatura nes gomes pa facer una vuelta curiosa, y los que sí pudieron, pasaron per delantre. Sicasí, Bottas diba arrastrar penalización y salir atrás acompañando a Max Verstappen que, como él, cambió unidá de potencia.

Con este blimes llegamos al domingu, nuna carrera en seco con sorpresa al final. Lando Norris nun pudo aguantar na salida, y Sáinz rápido lu pasó, pero l’inglés nun diba tardar en garrar ritmu y rodar, gran parte de la carrera, nel primer puestu y cola cabeza na victoria. Per detrás, Bottas cola misión de torgar a Verstappen tolo posible. L’holandés col retu de compensar tolo posible la penalización y clasificar perdiendo los menos puntos posibles. Hamilton cola idea de ganar na cabeza pesie a tener a Verstappen tan abaxo y nun tener urxencies, Sáinz col convencimientu de poder ganar y Leclerc faciendo como Bottas y Verstappen ensin munchu éxitu (a la fin acabó na décimoquinta posición).

Tuvimos tantos frentes abiertos que casi nun paecía que pudiéramos tener más nada qu’ameyorara la situación, pero entós…apaeció l’agua. De primeres yera poca cosa, pero foi faciéndose más intensa y provocó’l desfile de pilotos a montar gomes intermedies. Pero non de tolos pilotos. Ún de los que nun entró de mano foi Fernando Alons, qu’aguantó tolo que pudo nes gomes lises. Sicasí, nun diba ser l’únicu. Nesos momentos, nes últimes vueltes de carrera, Hamilton y Norris peleaben pola victoria. Col agua, dambos pilotos quixeron siguir en pista. Ente ellos nun había muncha distancia pero tiníen un colchón de segundos bultable col restu de pilotos que-yos permitía una parada ensin consecuencies. Sicasí, Lando Norris decidió que yera meyor quedase en pista. Hamilton quiso imitar al pilotu de McLaren, pero dende Mercedes nun lu dexaron, viendo los problemes que Norris taba teniendo pa caltener el coche en pista. Dende’l muru ficieron que Hamilton entrara, montara gomes intermedies y saliera detrás de Norris. El pilotu de Mercedes nun tardó malpenes un par de vueltes en recortar tola distancia necesaria pa pasar al so paisanu, que casi quedara fuera de carrera nuna salida de pista. A la fin, Norris tuvo d’almitir el so erru, que-y costó la victoria, el podiu y una bona cantidá de puntos. Tuvo d’entrar y perdió posiciones hasta quedar sétimu. Ricciardo, el so compañeru d’equipu, acabó cuartu.

Naide nun entendió la decisión de Norris, anque nun podemos culpar a un pilotu de nun querer parar cuando cree que tien bon ritmu. Lo que ye menos defendible ye l’actitú pasiva de McLaren que nun lu obligó a entrar como fizo Mercedes con Hamilton. Nun sabemos si diba valir pa ganar la carrera, pero a lo menos sí pa tener un podiu.

Los que sí aprovecharon la so oportunidá fueron Hamilton, qu’acabó ganando; Verstappen, que pasín ente pasu acabo adelantando y faciendo valer el potencial del so coche, minimizando daños nuna carrera na que tinía muncho que perder; y Sáinz, que nun pudo ganar, pero siendo terceru suma otru podiu na so cuenta personal.

Pesie a lo interesante visto tanto en pista como nes paraes, nun foi una carrera mui accidentada. De fechu, namás tuvimos dos abandonos, el de Latifi ya’l de Schumacher. No que cinca a los puntos, nengún de los Aston Martin sumó y sí lo fizo, otra vuelta, George Russell, que pasín ente pasu va sumando. Tampoco nun foi’l día d’AlphaTauri, que quedó fuera de los diez primeros colos dos pilotos. Quien sí sumó nel so retornu a la competición foi Kimi Räikkönen, que foi octavu. Dos puntinos que saben bien depués de tantu tiempu ensin sumar. Alpine sólo pudo atropar puntos con Alonso, qu’acabó sextu, mientres qu’Ocon tuvo de conformase col décimocuartu puestu.

Esta temporada nun podemos quexanos. Hasta les carreres que, en teoría, nun deberíen dar pa muncho, esti añu tán siendo bien prestoses ya interesantes. Tamos viendo batalles perdayuri, dos mundiales (constructores y pilotos) mui reñíos y que n’otres temporaes yá cásique taríen decidíos faltando siete carreres como agora. Paez que nun podemos pidir más a esti 2021. De momentu, ponemos la vista en Turquía pa, dientro unos díes, vivir otru gran premiu con, naguamos, tanto que ver como hasta agora.

Monza ta garrando’l vezu de ser una de les meyores carreres de la temporada. Si yá en 2020 nos sorprendía cola primer victoria de Pierre Gasly, nesti 2021 tampocu nun quiso quedase atrás. Nun foi una primer victoria pa naide pero sí pa dalguién que taba teniendo una temporada complicada y precisaba un arreón d’estos. Pero vamos dir pocu a pocu.

Esti fin de selmana tuvimos la segunda carrera al sprint (o sprint de clasificación) de la temporada. Si en Silverstone too yeren bones pallabres, en Monza paez que l’entusiasmu del iniciu yá desapaeció un pocu. Na clasificación impúsose Bottas, que tamién ganó la carrera, con Hamilton mui atrás y Verstappen aprovechándose d’ello. Sumaron puntos el finlandés, l’holandés y Lando Norris. Hamilton acabó quintu, anque diba partir cuartu’l domingu pola penalización de Bottas, que cambió unidá de potencia y salió últimu.

Sicasí, lo interesante, como davezu estos dos últimos años, pasó’l domingu. La salida foi relativamente llimpia, midiendo muncho les curves, anque Giovinazzi tuvo un toque col Ferrari de Carlos Sáinz pol que perdió l’alerón y casi cualquier posibilidá de facer dalgo importante delantre’l so públicu, provocando amás el primer coche de seguridá del día. Con Bottas fuera de xuegu tentando de remontar posiciones y una de les meyores salides de la so carrera, Daniel Ricciardo llideraba la carrera yá na vuelta doce, y diba ser complicao apealu d’ehí sobremanera colos acontecimientos que vinieron depués. L’australianu recordonos esti domingu a la so meyor versión nos sos años en Red Bull y bona falta tenía de recuperar esi estáu de forma. Dambos McLaren tuvieron un fin de selmana reondu, pero con Hamilton y Verstappen en pista, teníen complicao cualquier intentu de facese con una victoria o siquier ser segundos. La lóxica indicaba que diben tener que pelease pol tercer puestu. Sicasí, la suerte diba pasín ente pasu a dir poniéndose del llau papaya.

Les paraes de Verstappen primero y llueu de Hamilton fueron bastante lentes pa lo que suelen ser los dos equipos nestos asuntos, dalgo más que sumar pa McLaren. Mientres l’holandés facía la so parada, l’inglés tentaba de meter tola distancia posible con él pa salir, cuando-y tocara, delantre del so rival. Pa eso tuvo d’adelantar a Norris que nesi momentu nun parara entá. Como dicíemos, l’inglés diba sufrir tamién un retrasu na so parada, pero dalgo menos que la de Verstappen. Eso fizo que l’inglés saliera casi en paralelo col pilotu de Red Bull y tornaren a saltar chispes. Dambos pilotos tuvieron intentando dexar al otru atrás demientres delles curves pero a la fin, acabaron dambos fuera. Nun foi un accidente tan grande como’l de Verstappen en Silverstone, pero sí aparatosu, porque al pasar por un pianu, el Red Bull botó y acabó pasando cola so parte trasera perriba’l coche ya’l halo de Hamilton, dexando a dambos fuera de pista. Si dalguién entavía cuestionaba la utilidá del halo, abúltanos que dende’l domingu tien menos motivos. Con dambos llíderes del campeonatu fuera de carrera, la victoria quedaba nes manes de quien menos s’esperaba al iniciu del fin de selmana. Daniel Ricciardo tuvo dende esi momentu una carrera que nos recordó a Gasly en 2021, anque cola tranquilidá de tener a Lando Norris, compañeru d’equipu detrás, sabiendo que l’interés de dambos yera acabar nel podiu y sumar tolos puntos posibles na batalla con Ferrari nel mundial de constructores. Norris nun tardó en desfacese de Leclerc, pa ponese segundu y nun abandonar esa posición hasta ver la bandera a cuadros. Con ventidós vueltes pal final entavía podíen pasar munches coses, sobre too teniendo a Bottas y Sergio Pérez per detrás. El mexicanu, sicasí, tuvo una penalización de cinco segundos, por un incidente con Leclerc, que torgó cualquier oportunidá de sumar otru podiu.

Mientres tanto, los dos Haas teníen otru incidente en pista depués de que Mazepin chocara contra Schumacher mientres dambos lluchaben por posición. Otra tarde pal escaezu na escudería estauxunidense.

Na vuelta treinta y cuatro, Bottas yá taba cuartu, namás con Pérez per delantre que tenía una penalización que cumplir que lu situaba per detrás del finlandés. De toles maneres, Bottas quiso más pasalu en pista pero nun foi quien y tuvo d’aprovechar la penalización pa subir al podiu depués de partir dende l’últimu llugar na parriella.

Foi una carrera con momentos mui interesantes, con batalles intermedies y sobre too col incidente de los dos llíderes del campeonatu. Cuando estos dos pilotos fallen, que pasa dacuando, siempre hai que tar sollertes y aprovechar pa sumar cuando ellos nun lo faen. Daniel Ricciardo tuvo un gran premiu d’Italia increyible dende l’entamu, y como yá diximos enantes, tenía muncha falta d’ello. Amás, sumar con Norris un primer y un segundu puestu, ye un emburrión de puntos interesante, que pon a McLaren per delantre de Ferrari con catorce puntos y mediu de ventaya. La Scuderia sumó puntos con Leclerc cuartu y Sáinz sextu, pero nun fueron suficientes. Completaron los demás puestos del top diez Sergio Pérez en quinta posición, Lance Stroll en sétima, Fernando Alonso n’octava, George Russell, que vuelve a puntuar, en novena y zarrando, Esteban Ocon.

Abandonaron los dos AlphaTauri, que nun pudieron replicar lo que vivieron en 2020, amás de los yá mentaos Verstappen y Hamilton, y el Haas de Mazepin.

La siguiente parada ye Rusia, el circuitu de Sochi, qu’en teoría se-y da bien a Bottas. ¿Tornaremos a velu ganar? En dos selmanes saldremos de duldes.

Hai dellos grandes premios que pasen a la historia pol espectáculu visto na pista, pol bon facer de los pilotos o poles estratexes dende’l muru. Otres carreres, ensin embargu, recuérdense por otres coses, como por exemplu, l’efeutu del tiempu nelles. Spa asítiase nuna zona de Bélxica particularmente cambiante no que cinca al tiempu. Ye fácil que n’agostu veamos nubes y agua, mesmo qu’otres vegaes tenemos un sol perfeutu de branu. Esti 2021 va pasar a la historia por ser la carrera más curtia en vueltes pero más llarga n’espera.

Cásique tol fin de selmana l’agua quiso ser protagonista y llegó a selo. El sábadu retrasó la sesión de clasificación y tuvo un efeutu en dellos accidentes de pilotos como Norris, que na Q3 quedó fuera por arriesgar de más cuando l’asfaltu taba mui moyáu. Dellos pilotos, como por exemplu Sebastian Vettel, falaben de que la pista nun taba en condiciones pa competir, anque nun tuvimos d’esperar muncho a ver los coches otra vuelta nel trazáu dende’l momentu que paró de llover. Verstappen consiguió la pole y George Russell clasificó segundu, nuna xornada na que yá’l fechu d’entrar en Q3 yera motivu d’allegría pa Williams. Ello ye que l’inglés foi mui intelixente a la hora de pilotar y fexo una bona vuelta que naide más que Verstappen foi quien a ameyorar, nin siquiera Lewis Hamilton y muncho menos Valtteri Bottas, el pilotu col que se ta xugando’l futuru en Mercedes. El finlandés namás pudo clasificar octavu, y cola penalización de cinco posiciones partía muncho más atrás na parriella del domingu.

El domingu a les tres de la tarde, hora d’aniciu del gran premiu, les ñubes nun dieron tregua, y soltaron agua que dexó la pista de Spa-Francorchamps complicada hasta pal coche médicu que suel probala pa ver si ta en condiciones. El retrasu de la competición facíase evidente, y los equipos fueron tentando de pasar el tiempu demientres s’asocedíen los retrasos y los partes meteorolóxicos anunciando más agua. Y asina hasta les seis y diecisiete de la tarde cuando se tomó la decisión de sacar a los coches a pista a contrarreló. Yá nun se corría escontra l’agua si non tamién escontra la lluz. Y ye qu’a les seis de la tarde nun día con tantes ñubes y tantu agua, la lluz cada vegada diga amenorgando, faciendo que yá nun fuera sólo’l spray de los coches lo que complicara la visibilidá en pista.

Ello ye que dando un tiempu d’una hora como máximu (tres marear a tol mundu sobre cuando corria’l tiempu nel reló y cuando non), los coches dieron dos vueltes detrás del coche de seguridá, ensin posibilidá d’adelantamientu y tres eses dos vueltes, que permiten yá dar puntos a los diez primeros clasificaos, suspendióse la carrera con bandera colorada.  Una xugada burocrática que podía albidrase un par d’hores primero.  Asina, Max Verstappen suma otra victoria, anque non suficientes puntos pa ponese per delantre de Hamilton, que foi terceru, yá que namás se dieron la mitá. La noticia ye’l podiu de George Russell, meyor resultáu de Williams dende 2017, y que supón un gran revés pa los sos rivales Alfa Romeo y Haas, que nun puntuaron. Latifi tamién sumó, en novenu llugar.

Sergio Pérez tuvo la mala suerte d’accidentase na primer vuelta de formación, acabando coles sos posibilidaes en carrera. El mexicanu tuvo de salir últimu cuando los coches a la fin pudieron pisar la pista y asina terminó’l so gran premiu de Bélxica. Hubo munchos pilotos que nun entendieron que se concediera puntos en condiciones asina, ensin competición, detrás del coche de seguridá, y nuna carrera que dende’l primer momentu se supo que taba casi imposible de disputar. Entendemos qu’a la xente que foi a Spa a ver competir a los sos pilotos favoritos tampoco nun-y ficiera muncha gracia.

El campeonatu sigue mui abiertu y nuna selmana pegamos el saltu a Países Baxos, territoriu Verstappen, al circuitu de Zandvoort, que diba re-apaecer l’añu pasáu pero que, por cuenta la pandemia, tuvo de ser canceláu. Cuidamos qu’ellí’l tiempu seya meyor y nun tengamos una esperiencia como la que tamos acabantes de vivir nel circuitu de Spa-Francorchamps.

Hai circuitos que tienen fama de ser pocu interesantes y les carreres nellos, davezu, nun son de les que queden n’alcordanza. Hai otros que añu tres añu repiten emociones, intensidaes y aplausos per dayuri. Hungría ye un mecigayu de dambes situaciones. Partimos del pensamientu que, pol tipu de trazáu que tien l’Hungaroring, da pocu xuegu porque nun se puede adelantar y eso quita un pocu d’emoción a les carreres. Sicasí, raru ye l’añu nel que nun llueve o nun pasa dalgo que lo pon too pates parriba y rompe toles prediciones que se fixeron demientres la fin de selmana. La carrera de 2021 ye un exemplu perfeutu d’ello.

Yá dalgo tiníemos que tener albidrao cuando la pole del fin de selmana nun la llevó Verstappen, que nin siquier fue segundu, si non Lewis Hamilton, que fizo la vuelta perfeuta que lu colocó casi mediu segundu per delantre del so máximu rival. Bottas, sedría segundu, bloquiando asina la primer llínia de parriella. La deceición del sábadu foi, quiciás, Carlos Sáinz, que tuvo un accidente que lu llevó a la muria y lu dexó fuera de competir yá na Q2. Pero eso, foi’l sábadu.

El domingu alboreció moyao. Hungría nesta época del añu ye mui de calor pero tamién de tormentes, y yá lo tenemos visto n’años anteriores en F1. La salida, pues, con intermedios. Hamilton partió de la pole con una bona salida pero los güeyos rápido dexaron de posase n’él pa posase nos de detrás. Norris tuvo una salida escelente y pronto se punxo per delantre de Bottas. Foi’l finlandés el protagonista de la salida y, si queremos, el responsable de la carrera que tuvimos depués. Una mala frenada fizo qu’emburriara a Norris per detrás, provocando que l’inglés perdiera’l control del so coche y fuera a dar contra Max Verstappen que pasaba per ehí tentando d’evitar colisión. Pel so llau, Bottas, tamién ensin control, impautó contra l’otru Red Bull, dexando a Sergio Pérez dafechu fuera de carrera. Too esto aprovecháronlo xente como Esteban Ocon, que rápido se punxo segundu. Pero nun diba terminar ehí la cosa. Un pocu más atrás, Stroll perdía tamién el coche y acaba diendo contra Ricciardo, qu’al tiempu golpea a Leclerc, dexando al pilotu de Ferrari fuera de carrera. En resume, el caos y, consecuentemente, coche de seguridá y bandera colorada.

L’escenariu pintaba asina: la pista taba entamando a secar, anque los equipos duldaben de si salir yá con gomes de seco. Hamilton llideraba a Ocon, siguíu de Vettel y ente los diez primeros atopábemos invitaos poco avezaos como Latifi, que llegó a tar una parte de la carrera nel quintu llugar. Cuando la pista yá taba preparada pa correr otra vuelta, decretose salida en parriella, y esta foi otra de les imaxes del día. Namás Lewis Hamilton tomó la segunda salida. El restu de pilotos entró direutamente a parar pa quitar les gomes de moyao y montar les de seco. L’inglés, partió solu y sabiendo que diba tener qu’entrar porque los Pirelli que llevaba diben da-y problemes nun tardando. Asina ye qu’ensin completar la vuelta, entró a parar mientres el restu de pilotos lu diba pasando. L’inglés enviaba un mesaxe confusu per radio, ensin entender por qué taba últimu. Sicasí, hai qu’almitir que Mercedes nunca nun s’echó atrás cola so estratexa. Les duldes yeren bultables, y paecía qu’otra vuelta desperdiciaben una oportunidá de pasar a Red Bull en dambos campeonatos. Max Verstappen siguió en pista, pero col coche mui dañáu, enllenu de remaches, que ficieron de la carrera del holandés una especie de llucha por sobrevivir.

Ello ye que nesos momentos, el llíder yera Esteban Ocon, que nun diba apease d’esa posición hasta ver la bandera a cuadros. Pero nun lo tuvo fácil. Per detrás tuvo a Sebastian Vettel, que bona parte de la carrera tuvo apegáu a él tentando d’adelantalu, ensin éxitu. Demientres bien de tiempu, Carlos Sáinz, que fizo una bona remontada, aprovechando el caos de la primer vuelta, foi espeutador d’honor y un pocu más atrás, Fernando Alonso, que tuvo una gran carrera, amosando que los Alpine taban a plenu rendimientu. Hamilton tuvo que, pasu a pasu, dir remontando los puestos que perdiera pola decisión polémica de nun entrar cuando los demás, y siempre pendiente de Verstappen. La victoria abultaba difícil, anque foi dalgo que pudimos comprobar qu’entraba dientro de los planes del inglés poles batalles que tuvo con Fernando Alonso en pista, donde dambos pilotos fueron al llímite pero ensin toques nin incidentes.

Pela parte templada de la tabla, col pasu les vueltes, los puntos taben casi aseguraos p’AlphaTauri, con dambos pilotos aprovechando les desgracies de McLaren y Ferrari, y Pierre Gasly sumando la vuelta rápida a última hora, nun intentu de que Hamilton sumara menos puntos pal mundial.

Hai munchos protagonistes que señalar nesta carrera: Esteban Ocon, ensin duldes, pola so primer victoria, con un Alpine, depués de toles torgues coles que se vieno topando esta temporada nun coche que nun terminaba de rendir como él quería. Sebastian Vettel, tanto dientro como fuera de la pista. L’alemán a la fin perdió’l so segundu puestu por cuenta de nun poder los comisarios cuntar con una muestra suficientemente grande de gasolina pa los sos analís de depués de la carrera. Fernando Alonso porque lu vimos en pista como nos sos meyores años en Renault, trabayándose un cuartu puestu col que tuvo que pelear hasta col qu’agora mesmo ye llíder del campeonatu. Y, ensin duldes, los otros protagonistes del fin de selmana fueron los dos pilotos de Williams. Sabíemos que si sumaben tinía de ser gracies a dalgún incidente en pista, pero siempre dicimos que pa poder sumar puntos hai que tar nellos y tanto Russell como Latifi supieron aprovechar bien les sos posiciones depués del caos de la primer vuelta y pelear polos puntos. Aparte, sumaron un bon númberu d’ellos, dalgo que paeznos que da una tranquilidá nel mundial qu’había tiempu nun sintíen. Alfa Romeo y Haas van tener qu’emplegase muncho pa poder pasalos nel mundial.

Los grandes perdedores ensin dulda, aparte de los qu’abandonaron, l’equipu Red Bull y Max Verstappen. L’holandés pudo puntuar, pero obviamente nun foi suficiente pa evitar que Hamilton lu adelante nel mundial de constructores. Tamién Lando Norris. L’inglés terminó ayeri una racha de quince carreres puntuando (cuntando dende l’añu pasáu) pero sigue nel tercer puestu del mundial de pilotos, mesmo que McLaren. Ricciardo tampoco nun pudo facer muncho depués del so toque con Stroll y quedó fuera de puntos. Alfa Romeo sumó un puntu con Kimi Räikkönen gracies a la descalificación de Sebastian Vettel, que fizo a tolos pilotos subir un escalón nos sos puestos. Mick Schumacher tuvo un fin de selmana bastante negativu, con un accidente’l sábadu nos llibres 3, pero acabó décimoterceru, per delantre del otru Alfa Romeo y col so compañeru d’equipu fuera por un toque con Räikkönen en el carril de pit. Valtteri Bottas, pel so llau, va tener que cumplir una sanción de cinco posiciones na parriella de Spa pola colisión que desencadenó tol caos del entamu de la carrera.

Naguábemos pola llegada de los cambios nes regulaciones pa que la emoción tornara a la pista y nun cuntábemos con que díbemos a tenela toa nesta temporada. Partíemos del dominiu de Mercedes y nun pensábemos que diba ser Red Bull quien pisara más l’acelerador nesta primer parte del 2021. Llegamos al parón braniegu, poniendo’l ramu n’Hungría por tolo alto y con ganes yá de pisar Spa, la nuestra siguiente cita.