Category: Silly Season

Nesti post diremos atropando les noticies que vaigamos recibiendo so la silly season d’esta temporada 2020, una silly season que, pa variar, yá ta iniciada dende mayu.

12 de mayu: Faise oficial que’l pilotu de Ferrari Sebastian Vettel nun va siguir nel equipu italianu en 2021. Pel momentu nun se sabe quién lu va sustituyir y au va compitir l’añu viniente’l pilotu alemán.

14 de mayu: Depués de la noticia de la marcha de Vettel de Ferrari, confírmase que va sustituyilu Carlos Sáinz, que dexa McLaren. L’asientu del pilotu madrilanu va ocupalu en 2021 l’australianu Daniel Ricciardo.

8 de xunetu: Renault confirma que Fernando Alonso va competir en 2021 con ellos al llau d’Esteban Ocon, ocupando’l güecu que va dexar Daniel Ricciardo al movese pa McLaren.

9 de setiembre: Sergio Pérez anuncia que nun va seguir como pilotu de Racing Point F1 pa 2021, pesie al so contratu pa dos años más col equipu.

10 de setiembre: Racing Point F1 confirma a Sebastian Vettel como pilotu pa 2021. L’alemán firma col futuru Aston Martin un contratu pa varios años.

22 d’ochobre: Haas confirma que nin Romain Grosjean nin Kevin Magnussen van seguir nel equipu pa 2021.

1 d’avientu: Haas confirma a Nikita Mazepin como pilotu pa 2021.

2 d’avientu: Haas confirma a Mick Schumacher como pilotu pa 2021.

A falta de carreres, bona ye una silly season. Ente grandes premios virtuales cola participación de dellos pilotos de la máxima categoría del motor y dalgún otru convidáu conocíu xunto a les noticies que diben saliendo sobre la temporada 2020, tuvimos cubiertos demientres estes selmanes d’enzarru forciáu. Colo que nun cuntábemos ye que la silly season diba entamar tan ceo. Namás tamos a mediaos de mayu y lo que de normal ye pel branu yá ta en plenu funcionamientu agora.

2020 va ser la última temporada, de momentu, de Sebastian Vettel en Ferrari. La noticia llegábanos el 12 de mayu y garraba de sorpresa a cásique tol mundu. Fálase de choques ente’l pilotu y l’equipu, apartaos eso sí del dinero o d’otros aspeutos más corrientes. El medrar de Leclerc en 2019 puede tener que ver na filosofía nueva de la Scuderia, dalgo que quiciábes nun convence al alemán. Queda por ver lo que pueda algamar enantes d’abandonar l’equipu, si ye que la temporada llega a entamase. Amás, nun tenemos noticies d’aú va dir o si tamos énte’l fin de la so carrera na F1.

El movimientu de Vettel activó darréu’l d’otros pilotos y los rumores siñalaron a Carlos Sáinz bien llueu. Lo que de primeres paecía más que nada especulación terminó confirmándose’l día 14 de mayu. El pilotu madrilanu va ocupar el sitiu de Vettel al llau de Charles Leclerc, per dos años en principiu. Con esti par de pilotos, Ferrari allinia’l so dúu más mozu dende va tiempu.

L’últimu en ser oxetu de noticia ye Daniel Ricciardo, que tres un añu bastante deceicionante en Renault, va movese a McLaren p’acompañar a Lando Norris nel equipu inglés. El contratu del australianu ye per dellos años. Entavía nun sabemos cómo va dir nesti 2020, pero paez que’l pilotu decidió que McLaren yera una meyor opción, sobre manera cola novedá de que van montar motores Mercedes a partir del añu que vien.

Nunos díes pondremos n’otru post toles novedaes no que cinca a pilotos pa 2021 como facemos davezu cada temporada. Sacante esti gran movimientu de pilotos, nun tenemos más noticies nesi aspeutu. Col parón pola pandemia, hai poques coses que cuntar nel mundu formuleru. Sicasí, tolo que vaiga saliendo podéis lleelo nesti otru post nel que vamos atropando lo que va saliendo hasta qu’entame la temporada dafechu.