Category: Previes

De normal, esti fin de selmana marcaría’l retornu de les vacaciones de la F1 con esti mesmu escenariu: Spa. Sicasí, esti añu nun ta siendo normal y anque coinciden les feches, aterrizamos en Spa depués de namás dos selmanes de parón. El ritmu de carreres sigui medrando y yá tenemos otres cuatro nel calendariu (que podéis consultar equí). De momentu, siguimos n’Europa pal gran premiu de Bélxica 2020.

Va ser una fecha d’alcordanza. Fai yá un añu del fatal accidente qu’acabó cola vida d’Anthoine Hubert, pilotu de F2 con un gran futuru nel mundu del motor. Tolos equipos y pilotos van llevar dalgún mesaxe nos coches o cascos n’alcordanza del pilotu francés. Va ser, ensin duldes, un gran premiu mui emotivu.

No que cinca a lo deportivo, el retornu del branu siempre trayía dalgún cambiu, voluntariu o non dientro de los equipos: meyores nel rendimientu, renovación de pilotos y dalguna qu’otra novedá. Esti añu, cola silly season yá entamada y les duldes de cómo va dir avanzando la pandemia, hai poques coses segures pal 2021.

Mercedes tien en Red Bull esti añu al so principal enemigu. Les actuaciones probes de Ferrari dexaron al equipu de Milton Keynes como la única opción frente a la escudería alemana. Leclerc ta siendo quien a sacar dalgún resultáu bonu del so coche, pero Vettel tiende a tar desapaecíu en los grandes premios ya empezamos a albidrar que quiciás les condiciones nes que tán dambos pilotos nun son esautamente les mismes, dalgo que puede tar siendo otru de los motivos polos que l’equipu italianu, nestos momentos, nun suaña con una victoria.

Per detrás, como vien siendo vezu esti 2020, hai una batalla intensa por algamar el cuartu puestu, con munchos candidatos. Sabemos que Renault retiró l’acusación escontra Racing Point, lo que paez que calma un pocu la situación, anque quede posu de tensiones ente los equipos. Sabemos que nun se compite namás qu’en pista, anque seya esto lo que más nos interesa a nós.

Los equipos qu’agora ocupen la parte más baxo de la tabla tamién anden a la gueta de los puntos que los saquen d’unos puestos nos que naide quier tar. Cuntando con que Bélxica nun marca esti añu la mitá de la temporada, polo que les prieses y agobios por sumar puntos entavía nun llegaron. Sicasí, el fechu de qu’haiga menos espaciu de tiempu ente carreres y que’l ritmu seya más grande puede tamién perxudicar a los que nun terminen de ver la lluz. Otros años tiníemos la vista puesta en Williams nesi sen, pero esti l’equipu inglés nun ta teniendo piores actuaciones qu’otros equipos como Haas o Alfa Romeo. Les evoluciones d’estes trés escuderíes ta siendo bastante asomeyáu y anque Haas yá tien puntos, nun tán nin cerca de lo que fueron los sos primeros años compitiendo.

Aterrizamos nún de los circuitos clásicos del calendariu y facémoslo nel siguiente horariu:

Y les gomes pa Bélxica son un pocu más dures que les que s’escoyeron pa España pero siguen la llínia de les de otros grandes premios:

Nun hai descansu. Entavía tamos alcordándonos de les coses que pasaron les dos selmanes pasaes en Silverstone y yá tamos nun circuitu nuevu. Ye’l turnu del Circuit de Catalunya. Aterrizamos equí bastante más tarde de lo que tamos avezaos (los grandes premios en Montmeló son en mayu y los entrenamientos en febreru-marzu) y con temperatures altes, propies del mes d’agostu, dalgo que de xuru afeutará al rendimientu de los monoplaces más fechos a otres condiciones nesti circuitu y tamién a la xestión de les gomes.

Hai delles coses poles que tar sollertes. Per un llau, Sergio Pérez torna a Racing Point depués de pasar la covid-19 y tar yá recuperáu dafechu pa competir. Esto quier dicir que Nico Hülkenberg tornará a tar na solombra, esperando por otra oportunidá pa garrar un volante de F1. Racing Point sigui tando en boca de tol mundu poles denuncies d’otros equipos a los sos conductos de frenu. Yá comentemos que Renault fueron los primeros en facelo, y la decisión de la FIA fuera 15 puntos de penalización y una multa económica. Sicasí, esto nun-yos valió a otros equipos como McLaren o Ferrari que nun entienden que se permita a Racing Point siguir compitiendo con esi elementu nos sos monoplaces que-yos daría ventaya en futures carreres. Paez que’l tema nun tien pinta d’arreglase pronto, asina que taremos sollertes a toles novedaes.

Otru aspeutu a comentar que yá conocíemos la selmana pasada ye la renovación de Valtteri Bottas, per otru añu más, con Mercedes. Con una silly season más silly de lo que vien siendo costume, paez que la lóxica de sumar otru añu col pilotu finlandés pon un pocu de tranquilidá al mercáu de pilotos y dexa la dulda del posible asientu que pudiera ocupar Sebastian Vettel en 2021. L’alemán va tener un chasis nuevu nesti gran premiu depués de que Ferrari atopara un fallu nel qu’usaron en carreres pasaes.

Centrando un pocu na carrera del domingu, destaca la posibilidá de que Red Bull repita no cimero del podiu, cosa que yá fixera nel pasáu. Max Verstappen ye ún de los candidatos a trunfar nel Circuit de Catalunya, replicando lo que vimos en Silvestone hai siete díes. Mercedes tendrán de dar cola estratexa que permita a los sos pilotos una xestión meyor de les gomes que proporciona Pirelli y de les paraes nes que montales, dalgo no que Red Bull ganó la partida la selmana pasada.

Les carauterístiques del circuitu, onde pasar a otru coche nun ye tan cenciello como paez, van facer la sesión de clasificación clave. Son munchos los pilotos que nun tán sabiendo aprovechar les sos posiciones de salida consiguíes de sábadu y puede ser equí u más falta faga faceles valer. Tola parte medio de la tabla tien posibilidaes, anque cabilamos que pa equipos como Haas esti gran premiu va ser más una pena qu’una alegría. Na so llucha con Williams tentarán de minimizar el dañu y acabar la carrera lo más alto que puedan. Van tener competencia abondo con Alpha Romeo qu’entavía nun dio cola tecla pa poder pensar nos puntos esta temporada.

Un pocu más arriba, McLaren buscará ayudar al so pilotu madrilanu, Carlos Sáinz, a tener una bona actuación en casa, sobremanera depués de dos carreres con problemes nes paraes. Dambos coches tienen potencial pa quedar en bona zona de puntos, sólo falta qu’igüen la irregularidá nes paraes. Renault tampoco nun pueden durmise. Con McLaren y Racing Point perriba dellos y con dificultaes pa puntuar con dambos pilotos, toca-y yá ponese en marcha pa nun dexar escapar el cuartu puestu nel mundial de constructores. Nun podemos tampoco escaecer que, anque con actuaciones más discretes, Alpha Tauri tamién tien posibilidaes d’entrar ente los diez primeros y continuar sumando puntos.

Garramos fuercia y preparámonos pa otru gran premiu enantes d’un descansu de dos selmanes. Equí tenéis los horarios pa esti fin de selmana en Montmeló:

No que cinca a les gomes, tornamos a la elleición xenérica pa tolos circuitos:

Yá que tamos repitiendo carreres, los que manden na F1 decidieron que nun yera guapo repitir tamién los nomes d’elles. Asina, n’Austria tuvimos el GP d’Austria ya’l d’Estiria, que ye la comarca au s’asitia’l circuitu y agora, nel Reinu Xuníu tuvimos el GP de Gran Bretaña y esti fin de selmana el del 70 aniversariu de la F1. Aprovechando la efemérides del deporte de motor, la segunda carrera en Silverstone va celebrar que los monoplaces lleven yá setenta años compitiendo. Ye irónico que coincida xusto agora cuando entavía la covid-19 ta presente nes nuestres vides, cada vegada con más impautu. Va ser un aniversariu descafeináu pola falta de públicu y pol saber qu’hai que siguir los protocolos sanitarios estrictos, pero va ser una celebración sicasí.

Con una selmana de diferencia, poca novedá podemos aportar. Sí se puede confirmar que Hülkenberg tornará a Racing Point, mientres Sergio Pérez continua n’aisllamientu por coronavirus. Cuidamos qu’esta vegada l’alemán pueda xubise al coche’l domingu. Tamién podemos confirmar que Pirelli trai a esti segundu eventu unes gomes más blandes que les del pasáu, lo que fai albidrar que la xestión d’elles va ser clave depués de lo que vimos el domingu coles de los Mercedes y Sáinz, por exemplu.

Nun hai duldes de que Mercedes son favoritos pa replicar la victoria en Silverstone y asina abrir entá más distancia col restu d’equipos, pero yá vimos que ganar la primer carrera nun significa que vaigas a ganar tamién la segunda y anque Ferrari tán lloñe entavía, nun podemos descartar a Red Bull nin a nengún de los otros equipos que quieran aprovechar eventos asomeyaos a los que vimos na última vuelta del gran premiu pasáu.

Taremos sollertes a les batalles na mitá de la tabla y la llucha nos puestos d’atrás. Williams soltó yá la etiqueta d’últimos y les bones actuaciones en clasificación y en carrera, anque entavía ensin puntos, prometen un futuru más bonu que n’años pasaos.

L’horariu pa esti fin de selmana nun camuda:

Y como yá diximos, les gomes van ser más blandes que les del gran premiu d’hai una selmana:

Depués d’un descansu de dos selmanes y con delles novedaes, torna la F1 a los circuitos y failo esta vegada a un míticu, el circuitu de Silverstone. La d’esti domingu va ser la primera de dos carreres que van celebrase nel Reinu Xuníu depués de la igua que se fizo al calendariu orixinal.

Enantes d’analizar un pocu lo que podría ser esti gran premiu, hai que comentar que s’añadieron tres feches más a la temporada 2020: Nürburgring, Portimão ya Imola. Amás, yá ta confirmao qu’esti añu la F1 nun va viaxar a América, polo que nun vamos tener los GPs de México, EEXX, Canadá y Brasil. Desconocemos entavía qué más feches y circuitos van añadise a la llista pero, pel momentu, hai F1 hasta’l 1 de payares. Podéis consultar equí toles feches d’esta temporada.

Silverstone ye ún de los circuitos que se marquen en colorao nel calendariu, anque esti añu, mesmo que pasa n’otros llugares, va vese priváu del ambiente que-y da la montonera de xente que, añu tres añu, lu visita. Aterrizamos equí un pocu más tarde de lo que ye vezu, con feches braniegues dafechu y con Mercedes dominando dambos campeonatos. Nun nos paez qu’en Silverstone vaigamos a ver una historia mui estremada cuidando amás que’l tiempu va ser soleyeru y nun aparenta que l’agua vaiga asomar nos tres díes de gran premiu.

N’eventos pasaos, el gran entretenimientu vieno de la mano de los equipos de la mitá de la tabla, con Racing Point en cabeza. Anque paez que Mercedes va midise con Red Bull porque Ferrari nun tien pinta de dir a xunise a la llucha dientro de pocu. Sicasí, toca ver hasta ú puede llegar Red Bull, y si Albon va ser quien a romper por fin y xubir al podiu que tanto se-y resiste.

La útima hora pa Racing Point ye que Sergio Perez dio positivu’l xueves por COVID y nun va a correr (a lo menos) en Silverstone. Les posibles opciones pa reemplazalu paecen ser Gutierrez, Vandoorne o Hülkenberg. Taremos atentos a cuala ye la decisión.

Va ser interesante ver qué puede facer McLaren, que nun tuvo una bona actuación n’Hungría anque brilló n’Austria. Tamién taremos sollertes a Renault, que tovía nun dio siñales de poder ponese per delantre de la escudería de Woking nin de Racing Point. Los equipos de más abaxo, como los dos Alfa/Alpha, Haas y Williams, tán más cerca unos d’otros de lo que pasaba n’años pasaos y anque nel casu de Williams, Russell avisa de que Silverstone puede ser negativo pa ellos, taremos al quite pa ver si pueden llograr equí’l so primer puntu de 2020.

Embaxo podéis atopar los horarios pa esti fin de selmana:

Esta fin de selmana hai un lixeru cambiu nes gomes usaes en Silverstone. Yá vos comentemos, que pa les ocho primeres carreres, los pilotos diben llevar les mismes. Sicasí, pa la primer carrera en Silverstone hai un cambiu y va optase por gomes más dures. La segunda carrera va siguir coles escoyíes al principiu. Esto ye:

Cásique nun ta dando tiempu a dixerir los resultaos de los grandes premios nin a esfrutar les sensaciones que nos dexen. Yá tamos cola mirada puesta n’otru: Hungría. L’Hungaroring recíbenos unos díes primero de lo que ye vezu nel calendariu pero coles mesmes espectatives. Por fin vamos saber si Ferrari tien solución, si lo de Racing Point ye pa tanto como pinta y si Mercedes va a siguir mandando nes carreres.

Ferrari va trayer anovamientos pa esti gran premiu y de verdá que tán necesitaos d’ellos. Estes dos primeres carreres dexaron claro les grandes carencies de La Scuderia. El podiu de Leclerc ye una combinación de suerte y del bon llabor del pilotu, pero nun ye espeyu de nada de lo que podamos esperar del equipu, a lo menos de momentu. Vettel nun paez tar a gusto col coche, anque la so actitú nun paez negativa pa con ello, suponemos qu’un pocu cola resignación de quien se sabe fuera d’esti entornu n’acabando la temporada.

Racing Point ta nel focu de munchos equipos, tanto pa bien como pa mal. El so coche, que ye un calcu del Mercedes del añu pasáu, ta amosando un rendimientu bien altu hasta’l momentu y promete siguir asina. Ye verdá que les posiciones de dambos pilotos nun son ablucantes, pero sí lo que se ve en pista. Nun ye novedá qu’equipos como Renault plantegaren la llegalidá del coche: Racing Point pinta un rival mui duru pal equipu francés, que yá ve cómo McLaren se ta escapando na clasificación. Renault tán siendo los más activos a la escontra de Racing Point, pero cásique tolos equipos tán pendientes de lo que pueda salir de too esto.

Mercedes nun va mal n’Hungría, ye un circuitu qu’a Hamilton nun se-y da mal, asina que podemos quiciás esperar una réplica de díes pasaos. L’equipu alemán yá llidera les dos clasificaciones, como ye vezu nestos últimos años, pero ye Bottas quien, pel momentu, ta delantre na de pilotos. El pilotu finlandés precisa caltener l’actitú que vimos n’Austria, sobre manera la paciencia del segundu gran premiu, porque ye sumando tolo posible como va poder enfrentar a Hamilton. El consuelu de ser segundu vien de la mano de la posibilidá de replicar más victories nel futuru, y namás midiendo muncho los movimientos en pista y evitando incidentes que namás valen pa quitar puntos, va poder el finlandés sumar más y meyor que’l so compañeru.

La parte medio de la tabla ta perinteresante, yá lo vinimos comentando munches vegaes nes anteriores entraes del blogue. Aparte de lo que dicimos de Racing Point, son munchos los candidatos a puntos esti añu y eso ye un aporte grande pa una temporada como esta. McLaren lleven la delantera, con dos gran premios nos que’l so rendimientu tuvo perriba del restu. El reflexu d’ello ye’l fechu de que tán segundos na clasificación de constructores y Lando Norris ye terceru na de pilotos. Ye importante dende agora lo que puedan facer el restu d’equipos. Ye d’esperar que Red Bull y Ferrari nun tarden en pasar a la escudería de Woking, y que la batalla de los ingleses pase a ser col restu d’equipos. Por eso toca poner los güeyos en Renault y los Alfa/Alpha.

A la cola siguimos dexando a Haas y Williams, esperando que seya n’Hungría onde espabilen y solucionen los sos problemes los primeros y onde consigan dalgún puntu los segundos. Russell yá apuntó maneres n’Austria y nun vemos por qué nun vaiga poder facelo llueu. Si va ser n’Hungría ye dalgo que veremos nunos díes.

Hungría ye un escenariu que presta enforma y que suel poner fin a la primer parte de la temporada. Esti añu les circunstancies tornáronlu nel tercer eventu del calendariu y, anque ensin públicu, cuidamos que siga na llínia de les dos carreres pasaes.

Los horarios pa esti fin de selmana son los siguientes:

Alcordaivos que les gomes pa esta temporada son les mismes pa cada gran premiu:

La nueva normalidá trainos de vuelta a Austria, esta vez baxo’l nome de Gran Premiu d’Estiria, l’estáu austriacu onde se desenvuelve la prueba. Ello ye que nun va nin una selmana qu’entamó la temporada y yá tamos otra vuelta en pista, nel mesmu circuitu y esperamos que col mesmu resultáu d’espectáculu que nel primer gran premiu.

Sicasí, l’actualidá d’estos díes pasa más peles novedaes nel fichaxe de pilotos pa 2021 y ye que’l miércoles, l’equipu Renault fizo oficial lo que yá tol mundu sabía: Fernando Alonso va tornar a la F1 y va facelo cola escudería francesa. Ye la tercer vegada que l’asturianu compite con Renault, depués de dos esperiencies de resultáu estremáu, y torna agora cola vista puesto sobremanera en 2022, col cambiu de regulaciones y les posibilidaes qu’eso ufre a equipos como’l francés. En principiu, Alonso va tar en Renault en 2021 y 2022, con opción a siguir en 2023. Esteban Ocon, que siguirá en 2021, va ser el so compañeru d’equipu.

Pero tornando a Austria, que ye onde ta l’atención d’esti fin de selmana, sedría lóxico pensar n’otra carrera cenciella pa Mercedes, pa cualquier de los dos pilotos (alcordaivos qu’a Bottas se-y da mui bien el Red Bull Ring) pero cuidamos qu’en Red Bull quedaron con ganes de ponelos d’apretalos y facese ellos cola victoria. Nun sabemos qué esperar de Ferrari, magar lo que se vio’l sábadu ya’l domingu pasáu y los comentarios dende l’equipu nun esclarien muncho nin inviten a ser optimistes, anque nel fondu cuntamos con ellos anque seya pa facer como Leclerc y colase nos puestos cimeros ensin munchu ruíu.

Hai munchos güeyos puestos en McLaren y Racing Point, los dos equipos que, paez, van tar compitiendo por ser los “meyores del restu” nesti 2020. La carrera pasada Racing Point nun tuvo muncha suerte con Stroll y Pérez pudo quedar meyor de lo qu’acabó, polo que podemos esperar que nun repitan los mesmos errores, que tengan dalgo más de suerte y puedan lluchar por podiu.

Tampocu pinta mal la llucha más abaxo: Alpha Tauri yá tien puntos, dalgo que nun tien por exemplu la so escudería hermano Red Bull y que ye una motivación pa esti gran premiu. Renault, anque puntuó namás con Ocon, tampoco pintaba mal, y quiciás nesta ocasión puedan aspirar a más. Haas muéstrense optimistes col coche d’esti añu. Pesie a los problemes colos frenos qu’afeutaron a dambos coches demientres tol fin de selmana, paez que’l ritmu del monoplaza ye bonu, polo qu’en solucionando’l problema, pueden ser candidatos a puntos. Williams tampoco nun tien mala pinta esti añu, a lo menos comparándolo col anterior, y anque nun tienen puntos, nun nos abulta tan difícil qu’esti añu puedan atropar dalgún. Obviamente, nun paez que vaigan a poner n’apuros a los sos rivales más inmediatos, de momentu, pero vese una evolución na bona direición.

Los horarios pa esti fin de selmana son calcaos a los de l’anterior, y recordamosvos que les gomes que van montar los pilotos tamién son les mismes, sicasí, equí vos dexamos tola información pa que nun vos perdais nada:

A estes altures de la temporada, de normal, yá tendríemos fecho un garrapiellu de previes y otres tantes cróniques de carreres, yá más o menos podríemos dicir quién va bien y quién non, y taríemos quiciás perfilando les batalles futures pa los meses vinientes.

Pero non. Esta ye la primer previa oficial (la d’Australia que preparemos cuantayá nun cuenta) d’esta temporada 2020 que, a la fin, va entamar esti fin de selmana. Yá vos cuntamos que’l calendariu, de momentu, tien namás feches europees, con circuitos que se repiten, como ye’l casu d’Austria y del Reinu Xuníu. Hai bien de carreres cancelaes dafechu y otres qu’entá nun confirmaron la so situación. La evolución de la pandemia nesos llares va decidir, pémeque, si la F1 esti añu salta l’Atlánticu. Podéis atopar nesti post tolo que foi pasando estos meses.

Ello ye qu’aterrizamos n’Austria, depués d’un parón impuestu de varios meses y munches duldes pa tolos equipos, con ERTES, ventes, rumores y una silly season aniciada enantes de tiempu (recordai que podéis lleer tolo que foi pasando equí). Nun podemos valorar a los equipos nesti primer gran premiu porque nun sabemos cuánto de lo que se vio nos test va quedar.

Podríemos aventurar l’ésitu de Red Bull por correr en casa y por nun esistir nengún condicionante na clasificación, ye dicir, la temporada entama equí, nun se da la situación de dir per detrás de Mercedes o Ferrari, si non que bien pueden ponese llíderes dende esta primer carrera y paeznos que pa ellos, anque seya ensin públicu, nun hai meyor escenariu. Lóxicamente, too esto con permisu de Mercedes y Ferrari, y un pocu de cualquiera que quiera sumase a esta primer carrera. Recordamos que cuando Australia ye la qu’entama’l campeonatu se diz que nun ye representativa de la forma de los equipos, que los sos resultaos nun espeyen lo que se va poder ver el restu de la temporada. Quiciás Austria pueda cuntar otru cuentu.

De xuru, sicasí, que muncha de l’atención van llevala los nuevos protocolos que tolos que tán metíos nel circuitu van tener de siguir nos díes vinientes: va haber menos personal pa los equipos, nun hai hospitalities y los test y les mazcarines pa controlar que naide col virus entre nel círculu formuleru van tornar dalgo normal estos díes.

Nun escaecemos qu’ún de los puntos que más dieron que falar nos test d’hibiernu foi’l sistema novedosu que traxo Mercedes, el famosu DAS, que n’Australia nun paecía que fuera a tener muncho impautu pero que n’Austria puede cuntar una hestoria distinta. Lo mesmo puede dicise de los distintos anovamientos que s’incorporen a los coches gradualmente y que vamos viendo col pasu les carreres. Con esti calendariu atípicu, munchos equipos yá tienen estos anovamientos totalmente desendolcaos ya incorporaos a los sos coches, siguiendo’l ritmu que de normal siguiríen. Mercedes, Renault y Red Bull, por exemplu, yá van cuntar con ellos mientres que Ferrari confirmó que nun va trayer nada nuevo hasta, a lo menos, Hungría.

Nun podemos dexar fuera tampocu’l futuru de Williams. Anque munchos equipos tuvieron de tirar d’ERTE pa enfrentase a la pandemia y les sos consecuencies llaborales y económiques, la situación d’años pasaos del equipu inglés nun ayudó especialmente, y tán buscando un comprador afayadizu qu’ayude al equipu a reconstruyise.

Tamién queremos rescamplar la posibilidá de que, nuna situación atípica como la que tamos viviendo, nuna temporada igual d’atípica, dalgún de los equipos de la parte media de la tabla pueda dar un saltu de calidá inesperáu. Quiciás McLaren o Renault son los primeros equipos que nos vienen a la cabeza al pensar nun escenariu asina, pero ye verdá qu’Alpha Tauri (Toro Rosso, alcordaivos) o Racing Point, de xuru van tener dalgo que dicir. El mesmu Sergio Pérez víase enfotau en qu’un podiu seya posible esta temporada.

Queda por ver qué pasa con Haas, si esti añu pueden aprovechase de les circunstancies, d’Alfa Romeo col futuru de Kimi Räikkönen nel aire y, en xeneral, de tolos equipos, magar qu’una situación como la que tamos viviendo ye difícil de predicir en conxuntu. De momentu, de lo que sí tamos seguros ye de los horarios d’esti fin de selmana:

Tocante a les gomes, les circunstancies tamién influyen na so elleición y, de fechu, toles carreres van tener les mesmes y n’igual númberu pa cada pilotu. Van ser les siguientes:

Pasín ente pasu, ensin muncho ruíu y cola atención puesto n’otros asuntos que tán afeutando a gran parte de los países qu’acueyen el campeonatu de Fórmula 1, aterrizamos n’Australia pal primer gran premiu d’esti 2020. Avezaos como tamos a qu’esti momentu llegue con munches ganes, esta temporada les sensaciones son bien distintes, y les duldes sobre la cellebración de dellos eventos ocupen más portaes y titulares de lo que quixéramos.

El domingu, en principiu, tornaremos a ver a los monoplaces compitiendo nuna nueva edición del campeonatu. Con munches entrugues tamién no que cinca al rendimientu de los equipos y tamién con munches espeutatives llega por fin el momentu de dir resolviendo unes y comprobando otres. Taremos sollertes, sicasí, énte cualquier cambiu de planes a lo llargo d’esti fin de selmana mesmo que nes selmanes vinientes.

Ello ye que por fin les lluces coloraes van apagase delantre d’una veintena de coches preparaos p’abordar el primer asaltu d’un nuevu añu. Mercedes son en teoría favoritos, anque na segunda tanda de test dexaron espaciu pal cuestionamientu d’esta afirmación: quiciábes nun tán tan bien como albidramos. Ferrari semó duldes na primer tanda y tampoco nun acabó de recoyeles na segunda. Ye posible que teamos avezaos a la sensación de que Ferrari llega siempre un pasu per detrás de Mercedes, asina que nada meyor que velos el domingu pa responder a toles entrugues que nos surden estos díes.

Red Bull va ser clave, paeznos, esti añu. Pinta que tienen dao un pasu alantre en comparanza con otros años, y lleguen con motivaciones anovaes. Sí ye verdá que suel pintar asina siempre hasta que, col pasu de les carreres, nos decatamos que nun taben tán bien como pensábemos. Sicasí, l’equipu del güe coloráu siempre ye candidatu al títulu.

Yá comentemos qu’esti añu pinta  perinteresante pela parte medio de la tabla. Racing Point amosaron un rendimientu escelente (si lu comparamos colo que viemos l’añu pasáu) y McLaren tamién tien munchos motivos pal optimismu. Pero nun podemos escaecer que tamién Renault llega con fuercia y que tanto AlphaTauri como Alfa Romeo van tener la so voz y muncho que dicir. Nun podemos dexar de llau a Haas. L’añu pasáu tuvieron una temporada bastante desastrosa y de xuru van querer replicar un pocu l’aniciu de 2018 nel que yera normal velos dientro de los puntos en cásique toles carreres.

Williams progresa. Les sesiones de test fueron bien positives pal equipu británicu. Queda ver si nun ye más ilusión que realidá, pero pinta qu’esti añu pueden tar na amarraza, anque nun seya dando un pasu de xigante. Lo importante nesti equipu yera recuperar l’enfotu y pasín ente pasu eliminar les duldes y les torgues pa poder dir recuperando la so posición na tabla.

Hai poques coses que podamos afirmar enantes de la dispuesta d’esti gran premiu, yá que son munches les informaciones qu’atropamos, les duldes, los plantegamientos y teoríes que nun van tardar en desapaecer dando pasu a otres. Lo que sí sabemos ye que tamos énte otra temporada nueva y otra oportunidá d’esfrutar de la máxima categoría del deporte de motor. Los coches tán preparaos, tamién los equipos y los pilotos. Los escenarios nagüen por acoyer el so eventu y nós taremos equí pa cuntavos tolo que vaiga pasando.

De momentu, esta ye tola información que precisáis pa nun perder nada d’esti primer asaltu de la temporada:

Y estes son les gomes que vamos ver usar a los pilotos esti fin de selmana: