Category: Previes

Nun añu con tantos cambios, tantes novedaes, tanta incertidume, llegar a poner el ramu a cualesquier proyeutu ye un motivu d’aplausu. Pasa tamién coles temporaes para los equipos d’estremaes disciplines deportives. La F1 nun ye una esceición. Yá pasaron bien de selmanes dende aquel vienres nel que naide nun sabía que diba pasar colos entrenamientos llibres del gran premiu d’Australia. Pasaron bien de selmanes de circuitos nuevos, cancelaciones y munches, munches duldes de si los equipos diben poder competir. Pero ficiéronlo, y esti fin de selmana rematen la xera, como suel ser vezu en condiciones normales, nel circuitu de Yas Marina, nel gran premiu d’Abu Dhabi.

Yá tenemos campeón del mundu de pilotos y tamién de constructores. Nun hebo sorpreses ehí. Sicasí, entavía queden coses que resolver y que cuidamos van dar una migayina d’espectáculu a una carrera que, de normal, nun suel ufrir muncho. Son poques les vegaes nes que llegamos a Yas Marina ensin tenelo too resuelto yá.

Tres un buen garrapiellu de carreres que nos dexaron apegaos al asientu y la novedá de ver a pilotos que nun son de Mercedes o Red Bull no cimero del podiu, llegamos al desiertu d’Abu Dhabi pa la tercer ya última carrera de les tres siguíes d’esta tanda. Racing Point dio un golpe na mesa mui fuerte la pasada carrera y paez que, a la fin y si McLaren y Renault nun lo remedien, va ser el tercer meyor equipu na clasificación d’esta temporada. Les coses anden revueltes sicasí pel paddock, y anque en teoría Sergio Pérez nun tien asientu pa 2021, acontecimientos recientes en Haas pudieren camudar esti asuntu. La verdá ye que naide nun entiende que’l mexicanu nun vaiga poder competir l’añu que vien, sobre manera si pensamos na bona temporada que fizo, con victoria incluyida.

Entavía nun sabemos de xuru si Hamilton va tar de vuelta o si Russell va tener otra oportunidá de brillar y ganar nun Mercedes. Amás, vamos ver a dellos pilotos probadores (como Sato y Vips con Alpha Tauri y Red Bull) y Pirelli va probar les gomes que vamos ver en 2021 como yá fizo en carreres pasaes. Nun cuntaremos con Romain Grosjean, dalgo que dexa un tastu amargu pues nun creyemos que’l francés vaiga tener güecu na parriella del añu que vien. Mercedes ufrió al francés la oportunidá de trabayar con ellos nel futuru.

Anque paeza que non, esti 2020 entavía tien delles coses poles que paga la pena sentase a esfrutar. De momentu, vos dexamos tola información que precisais pa esti últimu gran premiu del añu n’horarios y gomes:

Nun nos movemos del desiertu esta selmana y repetimos circuitu anque non trazáu. Baḥréin sumóse a la llista de países qu’allugaben dos grandes premios nesti 2020 tocáu pola pandemia pero va ufrinos una esperiencia distinta pa esti domingu, un trazáu más rápidu. Entavía tenemos delles imaxes na cabeza de lo que vimos hai siete díes, ensin duldes lo que nun se nos va esborrar enxamás de la memoria ye l’accidente tan terrible de Romain Grosjean que, afortunadamente, quedó namás qu’en delles mancaúres que bien poco paecen depués de lo que vimos.

Pero dexando lo que foi l’anterior gran premiu atrás, tenemos bien de coses pa les que mirar nesta ocasión. Paeciera que yá tamos nesa fase de la temporada na que nun hai nada que vaiga sorprendenos, pero, pa empezar, va facelo l’alliniación de pilotos de Mercedes. Lewis Hamilton dio positivu esta selmana pasada y poro tien de guardar cuarentena. Nel so llugar va tar George Russell qu’acaba de vese cola oportunidá d’amosar que los sos resultaos en Williams nun espeyen de lo que ye quien en verdá. Tamos naguando por velu al volante del coche más rápidu de la parriella y tamién de ver cómo xestiona Bottas esta situación que puede dexalu n’evidencia si nun ye quien a tar al altor d’ella. El sitiu de Russell en Williams va ocupalu Jack Aitken, que va debutar na F1.

Aparte, como ye lóxico Romain Grosjean nun va competir nesti gran premiu. El so sustitutu va ser Pietro Fittipaldi, nietu del míticu Fittipaldi y que tamién va debutar nesta carrera, col equipu Haas.

Amás, tenemos delles confirmaciones pa 2021 de dellos pilotos. Ún de los casos más sonaos ye’l de Mick Schumacher, que fai tornar el apellíu a la parriella de la F1 depués de dellos años. Xunto a él va tar el rusu Nikita Mazepin, que firma un contratu por varios años col equipu estauxunidense. Asina, Haas yá tien fecha la so alliniación pa 2021, si nun hai novedaes d’última hora.

No que cinca al gran premiu, hai munches espeutatives puestes n’él por dellos motivos: per un llau la novedá de que nun seya’l mesmu trazáu al que tamos avezaos. Per otru, el númberu de pilotos nuevos o “fuera de sitiu” que vamos tener na parriella, que casi asomeya al aniciu d’una nueva temporada.

McLaren aprovechó bien la oportunidá dexada por Racing Point nel caberu gran premiu y va buscar nesta consolidase como tercer meyor equipu de la parriella. Racing Point tien agora dos preocupaciones: garrar a McLaren y que Renault nun los garre a ellos. La llucha per esa zona ta entavía bien emocionante.

Tornamos pues a Sakhir pero con novedaes, tamién d’horariu, que podéis atopar equí:

Y éstes son les gomes escoyíes pa esti trazáu más rápidu del circuitu de Sakhir:

Siempre nos abulta qu’en habiendo yá campeón de pilotos y de constructores, la temporada pierde tol interés. Quiciás ye verdá, anque tamién lo ye qu’entavía tenemos muncho que ver nes carreres vinientes. Pesie a que Mercedes y Hamilton yá haigan algamao lo cimero, per detrás hai muncho que decidir, sobre manera no que cinca al tercer puestu del mundial de constructores au atopamos dellos equipos tentando de facese con esi puestu que la debilidá de Ferrari esti añu dexó valeru.

Turquía dexó dellos resultaos inesperaos pa esti 2020 como ye’l ver otra vegada a Vettel (quién lo diba dicir) nel podiu d’un gran premiu con un coche que nun ta cumpliendo les espeutatives dende’l primer momentu que pisó la pista en 2020. Sicasí, l’alemán tien posibilidaes de repitir nel desiertu, embaxo los focos del circuitu de Sakhir y llámanos l’atención esti fechu cuando taba práuticamente descartau de les quinieles nes carreres pasaes.

Hebo dellos perdedores en Turquía, ún d’ellos Lance Stroll. El pilotu canadiense recibió munchu aplausu’l sábadu de la so pole, pero nun foi quien a treslladar esi bon resultáu en clasificación a la carrera del domingu. Investigación posterior del equipu aclaró que’l coche tuvo dalgún problema col alerón delanteru, y eso condicionó’l so rendimientu, pero ye verdá que Stroll tien falta d’amosar que nun fai les coses de casualidá. El so compañeru Sergio Pérez que, recordemos, nun tien asientu aseguráu pa 2021, ta siendo quien a ser más regular nes sos actuaciones y dende que supo que nun cuntaben con él pal añu viniente, consiguiendo perbonos resultaos pal equipu Racing Point.

La F1 torna al desiertu, a escenarios cálidos frente al agua de carreres pasaes y al calor de los focos que van iluminar el trazáu artificialmente. Con casi too resuelto, namás queda ver que pueden facer Racing Point, McLaren, Renault ya incluso Ferrari, pa ser terceros. La diferencia ente Racing Point, que ta en tercer posición, ye de cinco puntos con McLaren, unos cuantos más con Renault (dieciocho) y venticuatro con Ferrari. Nun ye imposible, pero paeznos que tienen de dase munches circunstancies pa que podamos ver a Ferrari en tercer llugar. Ye por eso que creyemos qu’estes últimes carreres pueden ser bien interesantes por ver cómo xestionen los equipos los puntos que tienen, lo que queda de temporada y los trazaos vinientes en condiciones que se supón van ser meyores que nel pasáu.

No que cinca al mundial de pilotos, Verstappen entá tien oportunidá de ser segundu. Tien a Bottas a ventisiete puntos y la distancia con Sergio Pérez, que ye cuartu, ye bultable, polo que l’holandés puede centrase na so batalla particular col finlandés de Mercedes. Ta la cosa más apertada pela zona más templada, con Sainz y Norris separtaos por un puntu en sétimu y octavu llugar, y Albon cerca con cuatro menos que Norris.

Hai, como vemos, munches razones pa caltener l’interés polo que nos queda de temporada. Equí vos dexamos tola información que precisais pa esfrutar esti gran premiu nel circuitu de Sakhir, en Baḥréin:

Y estes son les gomes que van usar los equipos demientres esti fin de selmana:

Llegamos a Estambul a alcontranos con otra de les “cares nueves” d’esti añu con esti Gran Premiu de Turquía otra de les sorpreses que nos traxo esti añu tan estrañu a cuenta de la revisión del calendariu que se fixo por mor de la crisis de la COVID-19. Llegamos a un circuitu que, anque ye un vieyu conocíu, ta por ver como se porta colos coches de nueva xeneración. Veremos si realmente sedrán quien a facer a fondu la curva 8 como predicen dalgunos. De momento los pilotos tán preparandose pa la fuerza que va a soportar el so cuerpu en dicha parte del circuitu, especialmente’l pescuezu. Ponemos los güeyos nuna pista onde ye posible adelantar anque ta por ver cómo respuenden les gomes cola temperatura.

Hamilton vese na primer oportunidá d’igualar el record de mundiales de Michael Schumacher, dalgo que llogrará si nun ye nesti gran premiu en dalgún de los siguientes tal y como van les coses. Paez que’l so futuru con Mercedes va esclariándose pasu ente pasu, pero tovía nun acaba de dexar nada claro de lo que va pasar de magar d’esti añu.

Anque’l campeonatu de constructores tea ya aseguráu per parte de Mercedes y Red Bull tenga bien amarrada la segunda posición, ye na tercer plaza onde topamos una de les guerres más interesantes a siguir: Renault, Racing Point y McLaren siguen engarraos nun marxe d’un puntu, lo que ye abondo pa que salten chispes nes carreres que queden. Ferrari intentará allegase tolo que seyan quien pa maquillar un poco esta temporada pa escaecer. Per parte de los pilotos, Ricciardo tendrá que defender el cuartu puestu de la clasificación con permisu de Leclerc y Perez que de xuru-y darán bien de guerra.

Verstappen, pel so llau, confirmará si sigue optando a la segunda plaza del caxón del mundial o se va apartando seliquino d’esa opción, mientres que Bottas tendrá que pensar n’atar esa plaza al ver a Hamilton cada vez más dificil d’algamar. Tovía dan les matemátiques, pero ya la pista la que tien que facese cargu de decidir si se fai lo que cásique paez imposible a estes altures o non.

Nós ponemos tamién los güeyos nel cielu alemán y na tabla con tola información que precisáis sobre horarios del fin de selmana. Más abaxo teneis la información de les gomes escoyíes.

Ensin casi recuperar de lo que vivimos en Portugal, tamos yá n’Italia. Nun tamos en Monza si non n’Imola, un circuitu que tanta historia tien. Ente ella por ser l’escenariu de la muerta d’ún de los pilotos más lexendarios de la F1: Ayrton Senna. Con too y con eso, nun contestu como nel que tamos, va ser un gran premiu esceicional yá que los equipos nun van tener más qu’una sesión de preparación enantes de la sesión de clasificación, el sábadu.

Nesta selmana, conocimos el futuru de George Russell, confirmáu en Williams pa 2021 y zarrando puertes a otros pilotos qu’anden buscando asientu. Otros, intenten desplicar la situación del so 2020, como ye’l casu de Sebastian Vettel que tovía nun entiende por qué’l so rendimientu esta temporada ta siendo tan irregular por nun dicir baxu. Otros que confirmaron el so futuru fueron Kimi Räikkönen y Antonio Giovinazzi, que van continuar en Alfa Romeo pa 2021 zarrando asina les puertes a la promoción de Mick Schumacher pa la prósima temporada con ellos.

Con cada vegada menos oportunidaes, la misión de Bottas y Verstappen tien de ser atropar les posiciones cimeres pa intentar retrasar que Hamilton consiga el so sétimu campeonatu. Paez que l’inglés yá lo tuviera amarrao, pero con cinco carreres per delantre y muncho que percorrer, hai entavía emoción por ver quién puede ganar nes carreres vinientes. Sicasí, la emoción va tar, como davezu, no medio de la tabla, con cada vegada más equipos lluchando por puntos y puestos. Aterrizamos n’Imola y estos son los horarios y les gomes que van montar los equipos demientres esti fin de selmana de dos díes:

La pandemia que tamos careciendo ta teniendo un efeutu positivu nel calendariu de la F1. Gracies a ella tamos visitando circuitos qu’otra manera nun pisaríemos nuna temporada. Yá tuvimos en Nürburgring hai dos selmanes y agora toca viaxar a Portugal. Con seis carreres pa rematar esti 2020 en F1, casi podría dicise que ta too decidío nos primeros puestos, tienen que dase mui mal les coses en dambos campeonatos pa que Hamilton nun sume otru, lo mesmo que Mercedes. Pero como nunca nun sabemos si esti deporte nos tien daqué reservao pa sorprendenos d’equí a la última carrera, caltenemos la ilusión de ver un bon espectáculu.

Fálase muncho estos díes de Lance Stroll pol so positivu en COVID-19 que torgó la so presencia nel gran premiu d’Eifel. Hai munches duldes sobre la razón pola que nun supimos que yera coronavirus lo que lu obligó a ceder el so asientu a Hülkenberg el sábadu y el domingu, pero paez que’l canadiense nun va tener problema dalu pa tar en Portugal, tres recuperase dafechu y dar negativo nos siguientes test.

No deportivo, otru circuitu más nel que nun tenemos claro cómo van dir les coses. Hai tiempu que Portimão nun ta nel calendariu oficial, asina que tornar a un sitiu conocíu pero que llevamos tiempu ensin visitar siempre son bones noticies. Ferrari cuida qu’estes últimes carreres, empezando equí en Portugal, pueden ser quien a metese ente los seis primeros nes sesiones de clasificación depués de los anovamientos incorporaos. Cuidamos que seyan meyores que los últimos, que nun tuvieron tol efeutu que prometíen. L’equipu italianu de xuru nagua por rematar esti 2020 de la meyor manera posible, y dexar nel escaezu una temporada bastante negativa.

Mercedes andará colos güeyos puestos na fiabilidá de los sos coches depués del abandonu de Valtteri Bottas n’Eifel, que lu alloña de la llucha pol títulu que llidera’l so compañeru Lewis Hamilton, yá qu’amás los problemes cola MGU-H podríen llevar penalización. Paez difícil que’l finlandés pueda facer daqué pa evitalo, pero entavía siendo posible nun podemos descartar a naide.

La noticia que quiciás va dar más que falar nes prósimes selmanes ye l’abandonu de Haas de los sos dos pilotos: Magnussen y Grosjean nun van siguir nel equipu estauxunidense pa 2021. Nun debiera sorprendenos nengún de los dos casos, sobremanera nel de Grosjean. Nos díes vinientes diremos sabiendo qué pilotos van ocupar esos asientos que queden vacíos. Siguimos actualizando lo que va pasando na silly season nel nuestru post.

La parte media de la tabla atropa tola atención d’esta temporada. Nun hai un favoritu claro. Al entamu de la temporada, yera McLaren quien dominaba, agora Renault y Racing Point paez que pueden pasar per delantre y a la fin tolos equipos d’esta zona tán aprovechando meyor o peor la oportunidá que-yos dexó la mala actuación de Ferrari. Cuidando que seyan quien a recomponese d’equí al final, va tar interesante ver quién puede quedar nesi tercer-cuartu puestu pol que nagüen bien d’equipos.

Portimao va danos otra oportunidá de ver un circuitu al que los pilotos nun tán avezaos, lo que puede ser sinónimu d’una carrera interesante que apriete más entavía les coses nes vinientes. De momentu, equí vos dexamos tola información que precisais sobre horariu y gomes:

Nesti 2020 casi podíemos pensar que nun hai nada que pueda yá sorprendenos, menos entá no que cinca al deporte de motor. Munches cancelaciones, cambios d’escenarios, una silly season qu’empecipió primero de lo que ye vezu y que yá nun afeuta a pilotos namás. Agora tamién a los motoristes. Y ye qu’una de les noticies que recibimos nestes dos selmanes de parón ente grandes premios foi qu’Honda va dexar de participar na F1. Ello ye, Red Bull y Alpha Tauri tienen de ponese en marcha pa buscar a dalguien que suministre motores a los sos monoplaces. Nun yera dalgo que nós pudiéramos albidrar viendo la bona rellación deportiva ente marques. Pero na F1 poques vegaes les coses pasen porque sí y Honda tien, agora mesmo, la mente puesta n’otres metes qu’alloñen a la marca de la F1.

Per otru llau, aterrizamos n’Alemaña, pal renomáu gran premiu d’Eifel nel míticu circuitu de Nürburgring, l’infiernu verde, con un tiempu y unes temperatures qu’inviten pocu a salir col coche a pista y que prometen poner n’apuru a los equipos a la hora de xestionar les sos carreres. El branu yá quedó atrás, toca’l turnu al tiempu más inestable propiu d’estes feches y que puede determinar enforma los resultaos y rendimientu de los monoplaces nes prósimes carreres.

Eifel va ser escenariu de debú de dos pilotos, promeses de la F1. Ún d’ellos va facelo con Haas, na primer sesión d’entrenamientos, y ye Callum Illot, pilotu británicu de ventiún años y que ta dientro del programa de pilotos de Ferrari. De momentu, ta segundu na clasificación de la F2, plataforma de despegue pa munchos pilotos de F1 y ye esta una bona oportunidá pa ver qué ye lo que puede ufrir al deporte.

Per otru llau, toles miraes van tar puestes, de xuru, enriba del otru debutante. Ye llíder de la categoría F2 y va dar les sos primeres vueltes oficiales nun monoplaza de F1 con Alfa Romeo. Dicimos que l’atención va tar puesta n’él porque nun ye otru que Mick Schumacher. El pilotu alemán debuta nesti gran premiu con munches ganes d’amosar que nun ta au ta namás que pol so apellíu. Los sos resultaos en F2 y la so trayeutoria hasta agora falen bastante bien del so potencial. De momentu, vamos velu’l vienres nel coche.

Mientres avanza la temporada, avancen los rumores del futuru de dellos pilotos qu’entavía nun tienen aseguráu’l so asientu pa 2021. Ye’l casu de Sergio Pérez o de los dos pilotos de Haas, Magnussen y Grosjean. A los segundos nun los ta ayudando’l rendimientu del coche, con actuaciones bastante probes les más de les vegaes. El mexicanu sabe que cada gran premiu ye una tarxeta de presentación énte los demás equipos pa que vean hasta au puede llegar. Esti fin de selmana, amás, va cuntar con anovamientos nel coche que pueden ameyorar más el so trabayu en pista.

Los güeyos van tar puestos nel cielu del Nürburgring esti fin de selmana, y tamién nos termómetros, sobremanera en Williams, que pueden quiciás beneficiase d’estes condiciones. Precisen un pocu más pa poder metese en puntos. Cada carrera ye un pasu alantre, pero de momentu insuficiente pa llegar a puntuar. Ye verdá que la progresión ta siendo positiva anque nun fueron quien a sumar nengún puntu hasta agora. La diferencia col añu pasáu ye qu’esti añu nun sedría raro velos dientro de los puntos y, de fechu, yá tán mereciéndolo.

Nós ponemos tamién los güeyos nel cielu alemán y na tabla con tola información que precisáis sobre horarios del fin de selmana. Más abaxo teneis la información de les gomes escoyíes.

Pasen les selmanes y la F1 avanza a nuevos destinos. Nesti casu toca viaxar al circuitu de Sochi pal gran premiu de Rusia d’esti 2020. Va ser un gran premiu nel que Ferrari va llevar dellos anovamientos con un güeyu (o cásique los dos) en 2021, pero tentando d’iguar la situación actual na que s’atopa l’equipu.

Tamos en territoriu Mercedes. Casi podemos dicir, territoriu Bottas, pues al finlandés dase-y bastante bien esti trazáu. Ye verdá que nos últimos grandes premios ta pecando de falta d’ambición, dalgo que nun puede presentar si tienes de compañeru de Lewis Hamilton y quies derrotalu. Cuidamos qu’en Sochi podamos ver a Bottas quiciás más cómodu y siendo quien a algamar lo cimero del podiu. Empezamos a ver los pantasmes de la fin del campeonatu con una nueva victoria de Hamilton ensin munchu problema polo que cualquier carrera que pueda da-y emoción al campeonatu va ser bona pa la F1.

Vos recordamos qu’hai dos selmanes conocíemos el destín de Sebastian Vettel, que va ser pilotu d’Aston Martin pa 2021, y que Sergio Pérez ta, de momentu, pendiente d’atopar un equipu pa la viniente temporada. Les males noticies pal mexicanu ye que tamién Nico Hülkenberg nagua por tornar a la máxima competición de motor, polo que va tener gran competencia pal futuru.

Taremos sollertes tamién a Max Verstappen, que lleva dos grandes premios pal escaezu y paez que cai un pocu del puestu d’únicu pilotu que puede alcanzar a Hamilton na clasificación. Sigui siendo un bon candidatu, pero ye verdá que dos carreres siguíes en blanco nun ayuden.

Nun queremos escaecer qu’en Mugello yá vimos dellos fans nes grades, nun intentu de la F1 de dir normalizando la situación dientro de la pandemia. En Sochi podríemos ver imaxes asomeyaes, posiblemente con más xente, polo que paez que nun tamos tán lloñe de tornar a tener públicu, anque menos, nes grades de los circuitos. La competición tien falta d’ello.

Equí vos dexamos tola información de los horarios pa esti fin de selmana y les gomes que se van usar nel circuitu de Sochi

La pandemia traxo munches novedaes a la F1 como pasó col mundu en xeneral: carreres ensin públicu, muncho protocolu, eventos que camuden de fecha o cancelaos dafechu y, sobre too, circuitos nuevos nel calendariu. El d’esti gran premiu ye ún d’ellos: tamos nel gran premiu de la Toscana 2020 que va celebrase nel circuitu de Mugello, un vieyu conocíu de los aficionaos del motor pero que nun taba previsto que tuviera nel calendariu nel futuru próximu. La selmana pasada, col gran premiu que vivimos en Monza (del que podéis lleer la crónica equí), iniciamos una tanda de carreres n’Italia que nos lleva agora a Mugello.

Y ello ye que, con tola novedá que supón competir nun circuitu “nuevu”, nel que Ferrari va cumplir el millar de grandes premios (pal que yá tienen un nuevu diseñu pal so coche y celebración apropiada con Mick Schumacher al volante d’ún de los coches míticos que llevó so padre), de lo que más vamos falar, ensin duldes ye d’una de les noticies del fin branu formuleru: Sebastian Vettel yá tien asientu pa 2021.

Tres la sorpresa que recibimos cuantayá de que’l pilotu alemán abandonaba Ferrari pa 2021, el so futuru taba un pocu nel aire. Abulta que nengún sitiu yera lo suficientemente buenu p’acoyer a un cuatro vegaes campeón del mundu, y al tiempu, los cambios futuros nes regulaciones ya’l rendimientu amosáu esti añu dexa ver que quiciás dalgún equipu del medio la tabla ye potencial candidatu a faer les coses bien nos meses venideros. Esto último paez ser que ye lo que pasó col alemán que pal 2021 va ser pilotu en Racing Point F1, escudería que va pasar a ser Aston Martin F1 pal añu que vien con, posiblemente y siempre según los rumores, Adrian Newey a bordo. Nun hai muncho que falar el inxenieru ideólogu d’un coche que-y dio a Vettel cuatro campeonatos del mundu, anque sigue paeciéndonos un movimientu arriesgáu por ser Racing Point quien son agora mesmo: un equipu, como dicimos, de la mitá de la tabla. Ye verdá qu’esti añu tán consiguiendo podios y cúntase con ellos ente los diez primeros cásique en toles carreres y la inversión pel llau de Lawrence Stroll colo que pueda aportar Aston Martin ye atractiva, pero’l pasu de Ferrari a Racing Point nun dexa de ser llamatible. L’alemán firma pues un contratu pa varios años, empezando a partir del próximu 2021.

Sicasí, nun son too sorrises. Cuando hai movimientu de pilotos, y cuando esti inclui’l d’un pilotu de los más cotizaos, siempre hai dalguién que pierde. Nesti casu, el perdedor ye’l mexicanu Sergio Pérez, qu’anunciaba la so salida de Racing Point el miércoles, pesie a que firmara l’añu pasáu por tres años más. Les razones que daba pa colar dan a entender que nun lo vio vinir y que resentía un pocu, como ye lóxico, el cambiu por tolo que tinía dao al equipu. El mexicanu queda agora nesa tierra de naide a la que pasen los pilotos de menos postín, esperando que quede dalgún sitiu vacíu pa ocupar enantes de que termine esta temporada. Suponemos que d’equí a avientu, toles carreres de Pérez sedrán una forma de reivindicase como pilotu y d’amosar qu’hai motivos pa contratalu. Podéis seguir tolos movimientos de la silly season nesti post que vamos completando con novedaes dende que van saliendo.

Nun queremos escaecer qu’esti va ser el primer gran premiu ensin la familia Williams depués de tantes y tantes temporaes de F1.

Poques más novedaes tenemos con respeutu al gran premiu d’hai namás siete díes que tan bones sensaciones nos dexó. Cuidamos qu’un circuitu nuevu traiga emociones distintes ya inesperaes, por ser novedá pa toos. Nun descartamos una victoria de Mercedes por ser ellos los que manden agora mesmo nes clasificaciones pero, depués de lo de Monza, facémoslo cola puerta abierta qu’haya dalgo que nos ufra otru gran eventu. La F1 tien falta d’ello.

Embaxo dexamos tola información preciso sobre horarios, un vídiu del circuitu y les gomes que se van usar pa esti gran premiu:

Tovía resuenen los ecos del gran premiu de Bélxica y yá tamos camín d’Italia, del míticu circuitu de Monza, pal primeru de dos grandes premios en tierra de tifosi. Recordai qu’esti añu vamos tener dos carreres en Italia: la de Monza y la de Mugello. Equí vos dexamos el calendariu completu de la temporada 2020 pa que nun perdais fecha.

Ye irónico que xusto l’añu que peor lo ta faciendo Ferrari, tengamos dos grandes premios n’Italia. Lo bono, quiciás, pa los miembros del equipu ye que nun haiga públicu que pudiera espresar lo que piensen de la temporada de la Scuderia. Nun paez que la solución tea cerca, más bien abulta que pudiera dir a peor. De mano pensábemos que yera namás dalgo que namás carecía Vettel, que la so marcha produxera una reacción negativa hacia él y por eso los sos resultaos taben siendo más bien probes. Pero en Bélxica yá vimos que Leclerc tampoco nun podía facer nada col coche, más qu’espresar la frustración de nun poder saca-y más rendimientu. Un circuitu que demanda tanto del motor como Spa facía albidrar que diba ser complicao pa Ferrari. Sicasí, nun creyemos qu’en Monza’l pilotu monegascu vaiga repetir la so pole y victoria d’hai un añu.

De toa esta situación saquen provechu tolos equipos de la mitá de la tabla. Qu’ún de los grandes equipos patine ye una oportunidá que nun llega siempre, y ta claro que tanto Racing Point, como McLaren y Renault tán deseyando que la mala racha de Ferrari nun acabe enxamás (o a lo menos no que queda de 2020) pa poder ocupar esi tercer puestu nel mundial de constructores que ta en duldes. Tamos avezaos a que los tres primeros puestos tean repartíos ente los tres equipos que más dominen nestos últimos años, por eso un escenariu como esti ye novedosu y abre’l campu a qu’otru equipu ocupe esi llugar. De fechu, nestos momentos, McLaren ocupa esi tercer llugar con 68 puntos. A dos tien a Racing Point, con 66, en cuartu llugar. Ferrari ye quintu, con 61. Ye verdá qu’un par de bones carreres del equipu italianu puede acabar con esta situación, y si dalguién tien medios pa ello ye Ferrari, pero la realidá agora mesmo ye otra mui estremada. Aparte, Renault ta a dos puntos. Si Ricciardo y Ocon sumen puntos como en Bélxica, y Ferrari repite desastre, podríemos falar de velos nel sextu puestu.

Aterrizamos nel circuitu más rápidu del calendariu, ún de los míticos pol que munchos aficionaos nagüen y qu’esti añu de xuru nun va ser lo mesmo vacíes les grades y ensin ambiente tifosi. Tamos deprendiendo nestes selmanes qu’anque paeza que nun s’echa en falta porque les cámares enfoquen los coches y los garaxes, el vacíu que dexen los fans ye pergrande, muncho más grande de lo qu’abultaba de primeres. En dalgunes carreres nótase más, n’otres menos, pero en toes ye evidente que falta dalgo, falta’l motor d’esti deporte.

Sicasí, equí sumamos otra carrera más, nel templu de la velocidá, au cuidamos que vamos ver dalgo más espectáculu qu’hai siete díes nun descafeináu gran premiu de Bélxica. Tenemos munches ganes de continuar siguiendo al detalle lo que faen los equipos de la mitá de la tabla pa desafiar a Ferrari y pa llucha ente ellos por esos puestos que tantu valor tienen. Tamién de lo que puede facer Red Bull pa parar a Mercedes y torgar una posible victoria nel so suma y sigue. Y por supuesto, la parte baxo de la tabla ta siendo esti añu una de les más interesantes pol númberu d’equipos que tán peleando cada gran premiu por atropar puntos. La brecha ente la parte medio y la parte baxo márcala agora mesmo Alpha Tauri con venti puntos, cantidá abondo pa dir tranquilos a les carreres vinientes. Alfa Romeo suma dos y Haas, ún. Ensin puntos sigui Williams que, con un pocu de suerte y condiciones cambiantes en pista quiciás puedan ser a sumar dalgo. Puede que non n’Italia, pero entavía tenemos carreres bastantes per delantre. L’equipu inglés, amás, va poner nel coche nos llibres al pilotu Roy Nissany, pilotu reserva qu’agora mesmo forma parte del equipu Trident en F2. Va ser la segunda vegada que’l pilotu d’Israel xuba al coche depués del so debú en Montmeló.

Amás, yá vos comentemos que Williams atopara compradores pal so equipu, la parte de F1, pero había duldes sobre’l papel de la familia na direición de la escudería. El xueves supimos que la familia Williams decidió facese a un llau y nun van a tar a cargu de la dirección del so equipu depués del gran premiu d’Italia. El míticu de la F1 va quedar agora nes manes de Dorilton Capital.

Hai amás munches batalles ente pilotos que tán siendo mui interesantes, como la que tenemos en Mercedes, con Bottas siempre a la solombra de Hamilton, en quien echamos en falta dalgo más d’agresividá en pista pa poder echar el pulsu al inglés, o con Albon faciendo por confirmar que la so elleición foi correuta. De xuru, igual que los demás, el pilotu tailandés ye consciente de lo que-y pasó a Pierre Gasly, agora n’Alpha Tauri con actuaciones bastante curiosines. Son bastantes les persones que coinciden en qu’Albon entá nun foi quién a xustificar el so puestu en Red Bull en perxuiciu del francés. Ye importante tamién ver como avanza la situación en McLaren tres los problemes de Sáinz en Bélxica y los rumores que, inevitablemente, xurden énte los malos resultaos (los del equipu nel que ta (polos fallos mecánicos y nes paraes) y los del equipu al que va dir pal añu que vien, como ye’l casu del pilotu madrilanu).

Nun queremos escaecer que la selmana pasada, por fin, hebo alcuerdu ente los equipos y yá ta firmau’l pautu de concordia nel que toles escuderíes establecen los términos nos que van competir hasta 2025, no que s’inclui’l cambiu de regles pa 2022 (recordai por mor de la pandemia, envede en 2021 lo cambios vendrán en 2022) y la intención d’amenorgar les diferencies económiques ente equipos, faciendo asina que la F1 seya más igualitaria.

Equí vos dexamos los horarios pa esti primer gran premiu n’Italia, nel máxicu circuitu de Monza:

No que cinca a les gomes, equí vos dexamos tola información: