Category: Temporada 2020

Nun hebo sorpreses no cimero, pero a lo menos el gran premiu de Portugal dexonos l’escenariu d’un circuitu que había tiempu nun percorríen los F1. Hamilton algamó les noventa y dos victories, lo que lu pon como’l pilotu con más victories de la historia de la F1, dexando yá en segundu llugar a Michael Schumacher. El pilotu de Mercedes desenvolvió una carrera al estilu que nos tien avezaos, anque per un momentu paeció que podía ser Bottas quien camudara les tornes. Sicasí, el finlandés sigue amosando qu’entá nun dio cola clave pa poder batir al so compañeru d’equipu.

Hamilton salía de la pole y tuvo una salida bona, anque tamién la tuvieron los sos rivales, sobre manera Carlos Sáinz que pudo llegar a ponese en zona de podiu dende bien ceo. El futuru de la carrera, sicasí, nun diba ser tan bonu pal pilotu madrilanu que nun fizo una mala carrera pero quedó fuera de los tres primeros puestos. McLaren nun pudo aprovechase de la debilidá de Racing Point, que nun pudo rematar la carrera más que con Stroll y que vio cómo Pérez tenía un incidente con Verstappen bien ceo nel gran premiu. Carlos Sáinz acabó sextu pero los dos Renault puntuaron mientres que McLaren namás lo fizo con Sáinz, siendo Norris décimoterceru. La llucha polos puestos cimeros del mundial de constructores ta cada vegada más disputada.

Hai que rescamplar el resultáu de Charles Leclerc, que foi cuartu con un Ferrari al que continúa sacando más rendimientu del real. El so compañeru Sebastian Vettel entró en puntos pero sólo pudo ser décimu. Sabemos que la so cabeza yá ta puesta na temporada viniente, pero de xuru l’alemán echa de menos tar no cimero de les clasificaciones.

Tamién foi reseñable l’actuación de Pierre Gasly, que nun dexa de reivindicase carrera tres carrera, quedando les más de les vegaes per delantre del que foi’l so sustitutu Alexander Albon con un coche, en teoría, superior al del francés. El futuru del tailandés ta cuestionáu yá que nun ta siendo capaz de ponese al altor del so compañeru y munches vegaes nin siquier de los dos compañeros del equipu filial.

Dexamos yá atrás les tierres portugueses pa emprender el camín a Italia, a ún de los circuitos más míticos de la historia de la F1. Caminamos agora pa Imola.

Yá dende bien ceo, el gran premiu d’Alemaña dio que falar. El vienres el borrín yera tanto que nun se pudo correr nenguna de les dos sesiones de llibres, y dexóse too pal sábadu. Nesti fin de selmana, iguóse un récord, tornó al podium dalguién qu’había tiempu nun lu pisaba y un pilotu acabó faciendo una sesión de clasificación y un gran premiu cuando’l vienres nin siquier sabía que diba montar nel coche. La carrera tuvo dellos momentos interesantes y too xunto dexó un bon tastu nel retornu de la F1 al Nürburgring.

Un vieyu conocíu tornó a montar nun coche de F1, dalgo que yá vimos hai delles carreres. Lance Stroll tuvo de ceder el so volante a Nico Hülkenberg, qu’esti añu ta teniendo más protagonismu del que de xuru cuidaba tener cuando quedó ensin asientu hai unos meses. Sicasí, tuvo un llabor complicáu. El sábadu nun pasó de ser últimu, anque’l domingu nun lo fizo mal.

D’Alemaña quedámonos col bon rendimientu amosáu demientres un tiempu por Bottas, qu’acabó, sicasí en deceición cuando tuvo d’abandonar por un problema col MGU-H. Hamilton nun desaprovechó la oportunidá de sumar otra victoria que lu pon a la par con Michael Schumacher con noventa y ún. El pilotu inglés, que nun salía de la pole, tuvo una bona actuación que lu colocó no cimero del podiu.

El restu de la carrera trescurrió con muncha batalla nes posiciones medies de la tabla. McLaren tuvo a piques de tornar al podiu, pero Norris tuvo d’abandonar por problemes col so coche. L’equipu inglés entama a perder tarrén colos sos rivales, sobre manera con Renault, que por fin xubió al podiu con Ricciardo, que foi terceru nesta carrera. Red Bull ocuparía’l segundu llugar.

Foi una carrera bien interesante, con dellos abandonos, pero en xeneral bastante competición ente tolos pilotos. El Nürburgring nun deceiciona. Cuidamos que’l so retornu valga pa poder convencer a los que manexen los filos de la F1 de que precisa tar ente les carreres del calendariu. La siguiente parada va llevanos a otru circuitu nuevu, pero eso va ser dientro de dos selmanes.

El de Rusia nun ye un circuitu especialmente llamativu, y les carreres ellí tampoco nun son, de normal, d’eses que queden na memoria p’años y años. Sicasí, siempre ye quien a dexar dalgo que nos permite esfrutar demientres los coches rueden pel so trazáu. Amás, el fechu de que la pole nun seya garantía de victoria, tamién ayuda a crear más espeutatives. 2020 tampoco nun deceicionó.

Con un sábadu que siguió un pocu lo previsto, Hamilton en pole, Verstappen detrás y Bottas terceru, confirmándose que Ferrari nun llevanta cabeza y que la parte medio de la tabla ye la que nos da tola emoción esti añu, partimos un domingu soleyeru nel que podría ser el gran premiu nel que Hamilton igualara en victories a Michael Schumacher.

Sicasí, el domingu yá empecipió mal pal pilotu inglés, pues recibió una penalización de diez segundos por facer una salida nun sitiu que los comisarios xulgaron que nun yera adecuáu. Esta penalización diba condicionar la so carrera dende bien ceo y anque entá fue quien a quedase col podiu, tuvo de ser nel tercer escalón. De la so desgracia aprovechóse Bottas, que salía terceru pero que, como comentemos na previa, tien bastante bona mano en Rusia. La so victoria, que yá vagaba, priva a Hamilton de seguir atropando victories y dexa pa más alantre l’igualar al Schumacher. Sicasí, Mercedes como equipu nun falla y ye posible que nel prósimu gran premiu yá seyan campeones del mundial de constructores. Pal de pilotos vamos tener d’aguantar un pocu más.

La salida del gran premiu foi bastante intensa pa lo que nos tienen avezaos les últimes carreres. Hamilton y Bottas salieron bien, dexando atrás a Verstappen, qu’aguantó los ataques de Ricciardo que salía per detrás y tamién de Sáinz. Sicasí, hai una probabilidá del 80% de que salga un coche de seguridá na primer vuelta en Sochi, y esti domingu nun foi esceición. Per un llau, Sainz, que nun intentu de respetar les indicaciones con bolardos que pon direición de carrera, acabó chocando contra una de les barreres, atravesáu en pista y fuera de carrera. Per otru, Lance Stroll, que tamién acabó viendo de cerca les barreres pero esta vegada depués de recibir un golpe per detrás del coche de Leclerc. Fueron los dos únicos abandonos que vimos esti domingu que concentró tolos incidentes nel principiu de carrera. Hebo dalgún otru sustu, pero nada que provocara más qu’un coche de seguridá virtual.

Dende la parada de Hamilton, na que tuvo que servir la penalización Bottas nun diba abandonar el primer puestu hasta ver la bandera a cuadros. Podemos dicir que tuvo una carrera relativamente tranquila pa lo que suelen ser les sos victories, que tienden a ser bastante peleaes. Nun sabemos si, ensin penalizar Hamilton, el finlandés tuviera ganao tamién. Nes entrevistes él dicía que sí, puesto que’l coche rodaba mui bien.

Per detrás de los tres primeros, acabó Pérez, con una carrera discreta pero mui correuta y siempre cola vista puesta nel so futuru na F1. De xuru que si sigui sumando como’l domingu, nun va dexar de tener ufiertes pa 2021. Renault prometía más de lo que foi quien a dar, anque hai que reconocer que Ricciardo tuvo penalización de cinco segundos por nun respetar les indicaciones de los comisarios. L’australianu foi quintu y Ocon terminó sétimu. Les bones noticies pa ellos ye que McLaren nun puntuó y Racing Point sólo con Pérez.

Ferrari tuvo un fin de selmana, en xeneral, pa olvidar. La clasificación del sábadu foi un desastre pa dambos pilotos, anque foi más llaceriante lo de Vettel que quedó fuera por un accidente. Leclerc nun pudo nin pasar a Q3. Sicasí, el pilotu monegascu tuvo una actuación bastante curiosa y quedó sextu, esprimiendo al másimu un coche que nun dexa de dar dolor de cabeza al equipu italianu. Vettel, pel so llau, acabó nel puestu décimoterceru.

Más allegría hebo en Toro Rosso, que puntuó con dambos pilotos (que quedaron per delantre d’Albon) y suma y sigui. Menos suerte hubo en Alpha Romeo que quedó fuera de los puntos con Giovinazzi nel puestu once y Räikkönen nel catorce, mesmo que Haas, que terminó nel doce con Magnussen y nel diecisiete con Grosjean. Malos tiempos pa los motores Ferrari.

Pa zarrar, comentar que pesie a que los resultaos probes, Williams nun fizo una mala carrera. Russell continua siendo la referencia del equipu, pesie a que nesta ocasión quedó per detrás de Latifi. Entavía queda muncho que trabayar, y les futures carreres en circuitos nuevos pueden ser una esperanza pal equipu inglés.

Recoyemos too en Rusia y ponemosnos en marcha pa dir hasta Alemaña, al míticu circuitu de Nürburgring pal siguiente gran premiu. Esta vegada va tocar esperar otres dos selmanes mientres los equipos van pensando n’afrontar la siguiente tanda de carreres.

Paecía complicao igualar lo que vimos en Monza hai siete díes. Pero Italia ta empeñada en pasar a la historia de la F1 nesti 2020 dándonos dos bonos espectáculos en dos entornos estremaos. Mugello estrenóse na categoría reina del deporte de motor y trunfó.

El resultáu nun dexa ver quiciás la bona carrera que tuvimos el domingu. Sí, ganó Hamilton, sí depués d’él llegó Bottas. Pero lo que asocedió ente la vuelta 1 y la 59 da pa muncho. Dos banderes coloraes, accidentes múltiples, adelantamientos y más adelantamientos, y un circuitu con dalgunos tifosi nes grades a los que Ferrari nun pudo contentar tampoco nesta ocasión.

Bottas dominó nes tres sesiones de llibres y apuntaba pole pal sábadu pero, como davezu, mostrose insuficiente énte la vuelta que fixo Hamilton. Terceru foi Verstappen y pintaba que la carrera nun diba ser mui distinta de dalgunes que tenemos visto nel pasáu, con estos tres pilotos mandando no cimero de la parriella. Hai que facer notar el quintu puestu de Leclerc, qu’esprimió’l so Ferrari nuna fecha importante pal so equipu: el so gran premiu númberu mil.

El domingu vimos hasta tres salides: la primera, ganóla Bottas y perdióla Hamilton, que salió mal y perdió posiciones, anque nun tardó en recuperase. Otru que tuvo una mala salida foi Verstappen. L’equipu tuvo de trabayar nel so coche hasta dellos minutos primero de ver les lluces coloraes del semáforu y nun foi raro velu perden puestos na salida. Quiciás lo que nun esperábemos, nun añu que ta siendo bastante tranquilu nes salides, yera l’apelotonamientu de la primer vuelta, na que Verstappen y Gasly quedaron fuera (la grava, vieya conocía que cásique escaecieramos yá), y otros pilotos sufrieron daños, como Vettel o Räikkönen. Esti primer incidente provocó que saliera’l coche de seguridá, momentu que dellos pilotos aprovecharon pa parar a cambiar gomes ya iguar daños.

La primer bandera colorada vieno n’entrando’l coche de seguridá de vuelta al garaxe. Bottas llideraba la carrera y, como suel ser vezu, quien ta no cimero marca l’arranque de la carrera cuando marcha Maylander de pista. Tamién suel ser vezu que’l primeru aguante tolo posible y arranque darréu, faciendo por pillar a quien lu sigue ensin posibilidá de siguilu. Foi lo que’l pilotu de Mercedes tentó de facer. El problema foi que los pilotos que rodaben más atrás, en viendo la bandera verde, aceleraron de más, provocando un accidente múltiple nel que munchos pilotos se vieron envueltos y quedaron fuera: Giovinazzi, Latifi, Sáinz y Magnussen vieron ehí terminada la so carrera nun momentu de caos énte’l que naide, nin siquier los pilotos, daben creitu. La bandera colorada nun tardó n’apaecer por cuenta de los restos que dexaron los coches qu’amás tuvieron de ser retiraos de la recta de meta.

Segunda salida. Seis pilotos menos. Tolos güeyos tán puestos enriba de George Russell y la música de los posibles puntos, cada vegada más cerca de Williams. Nesta segunda salida, Hamilton yá nun tuvo problemes y adelantó a Bottas rápido, poniendo distancia ente él ya’l so compañeru d’equipu, que tuvo cásique tol gran premiu buscando la forma de derrotar al inglés, ensin ésitu. Nel so primer tramu de carrera tuvo munchos problemes coles gomes. En tou esti tiempu, perdimos a otru pilotu, Esteban Ocon, por cuenta d’un sobrecalentamientu de los frenos.

Bottas naguaba por un coche de seguridá que-y diera una parada de baldre pa camudar les gomes que llevaba y que taben dando-y problemes cuando, na vuelta 43 Lance Stroll tuvo un pinchazu y acabó na grava y chocando contra les barreres. Otra bandera colorada, esta vegada pa iguar les proteiciones. Nesti momentu namás Ferrari y Mercedes teníen a dambos pilotos entá en pista. Tercer salida. Hamilton gana otra vuelta a Bottas y yá nun diba dexar el primer puestu hasta ver la bandera a cuadros. Quedaben doce pilotos y George Russell tinía una posibilidá real de puntuar. Sobre manera, depués d’una penalización a Kimi Räikkönen por una maniobra peligrosa a la hora d’entrar nel carril de pit. El finlandés recibió cinco segundos de penalización, que se diben sumar al final de la carrera y demientres les últimes vueltes, George Russell fizo por quedar a menos de cinco segundos del pilotu de Alfa Romeo pa poder llegar a punto. Sicasí, nun foi posible ya’l pilotu inglés quedó nel puestu once, per delantre de Grosjean y cerca de Vettel, que foi décimu.

Alex Albon sumó a la fin el so primer podiu depués de munchos intentos y munches duldes, aprovechando la oportunidá de tener fuera al so compañeru y resistiendo los ataques del Renault de Ricciardo, que tuvo de conformase con ser cuartu. Racing Point foi quintu con Sergio Pérez y McLaren sextu con Norris. Per detrás, Kvyat en sétimu puestu, Leclerc octavu, sumando puntos importantes anque insuficientes pa Ferrari, Räikkönen, qu’en verdá quedara per delantre de Leclerc anque llevó penalización como yá diximos.

Dexamos Italia con un bon tastu na boca depués de dos grandes premios mui especiales, ya’l primeru con xente de vuelta nes grades. La siguiente parada ye Rusia, el circuitu de Sochi. Tornen los circuitos conocíos y taremos sollertes a lo que pueda facer Valtteri Bottas nel asfaltu rusu que tan bien se-y da. Pero eso va ser dientro de dos selmanes.

2008. Nun circuitu de Monza moyáu, Sebastian Vettel gana la so primer carrera en F1 col equipu Toro Rosso.
2020. Nun circuitu de Monza secu pero vacíu de tifosi, Pierre Gasly gana la so primer carrera en F1 col equipu Alpha Tauri, enantes nomáu Toro Rosso.
La historia repítese.

Y si dalgo tenía falta la F1 yera d’una historia asomeyada a la qu’en 2008 protagonizó Vettel. Si amás el protagonista ye ún de los pilotos que más necesitaba reivindicase depués de tolo que tien pasao nos últimos meses, tenemos los ingredientes perfeutos pa una gran carrera. Podemos añadir que nengún de los tres grandes equipos subió al podiu y qu’esta tamién foi la ocasión na que los equipos de la parte medio de la tabla daben un puñetazu na mesa pa dicir qu’ellos tamién pueden ganar carreres y subir a podios.

Pudiera paecer que la carrera foi intensa de principiu a fin. Lo cierto ye que la primer mitá foi bastante discreta, casi tirando a aburrida, y cásique podíemos ver yá a Hamilton no cimero del podiu. Bottas tuvo una salida mui floxa y andaba perdíu pol sextu puestu con Verstappen faciendo por rondar a Hamilton y Carlos Sáinz aprovechando’l tirón de clasificar terceru’l sábadu, pero consciente de que contra Mercedes y Red Bull diba tenelo complicao. Ferrari, n’otru sábadu negru, andaben entavía más abaxo. De fechu, el primer abandonu protagonizolu Vettel que quedó ensin frenos. El suma y sigue del equipu italianu nun paez tener fin.

Otru de los qu’abandonó y desencadenó involuntariamente lo que diba venir depués en carrera foi Kevin Magnussen. Un problema col motor del coche lu dexó tiráu casi a la entrada del carril de pit y provocó un coche de seguridá que Hamilton rápidamente aprovechó pa parar. Diose la circunstancia de que’l coche de Magnussen, al tar au taba, obligó a zarrar el carril de pit, y asina se marcó a los pilotos con señales luminoses (en forma de cruz colorada) en pista. Nin Hamilton nin Giovinazzi fueron avisaos polos sos equipos de la prohibición y tuvieron que ser penalizaos, con un stop & go de diez segundos.

Enantes de que se decidiera la penalización d’estos dos pilotos, Charles Leclerc perdía’l coche d’atrás nuna curva y acababa nes proteiciones con un gran accidente del que salió ensin mayor problema pa él, anque les proteiciones tuvieron de reparase. La reparación provocó una bandera colorada qu’obligó a tolos pilotos a entrar en el carril de pit y aliniase n’orde de posición. Nesi momentu súpose la penalización de Hamilton y Giovinazzi que ponía yá en duldes esa victoria tan folgada de la que falábemos enantes.

De fechu, tres la bandera colorada, tuvimos una carrera totalmente distinta. Non sólo penalizó Hamilton, que foi quién a recuperar y acabar en puntos. También esta bandera colorada perxudicó a Red Bull, a dambos pilotos, que nun fueron a puntuar. Y no cimero tres protagonistes: Pierre Gasly, Carlos Sainz y Lance Stroll. Ellos tres diben tener tola atención el restu de la carrera: el francés por tar peleando pola so primer victoria en F1 nun gran premiu nel que Red Bull nin siquiera taba en puntos; el madrilanu tamién por llegar a ganar una carrera que yá pintaba bien dende’l principiu anque quiciás non tanto como pa suañar cola victoria. Y Lance Stroll, que foi quien a xubir al podiu y tuvo na so mano dalgo más, pero acabó desinflándose.

Les últimes vueltes fueron tenses pa los dos pilotos d’arriba, y de fechu, con un par d’elles más, ye fácil qu’en cuenta de Gasly fuera Sáinz el ganador. Pero’l francés pudo y supo imponese con un coche lixeramente inferior, nun circuitu nel que nun tinía nada que perder pero too que ganar. La gran pena foi que, siendo Alpha Tauri un equipu italianu, tuviera de celebrase ensin públicu. A falta de Ferrari, buenu ye un Alpha Tauri y de xuru la filial de Red Bull diba agradecer l’apoyu de los fans italianos.

El domingu non sólo ganó Gasly, ganó tamién la F1. Ganemos toos. Porque aparte d’una gran carrera, vimos a un pilotu que yá merecía una alegría algamar lo cimero del podiu, y éstes son les histories que presten. Mercedes ta mereciendo les victories y tar no más alto de les clasificaciones, pero ye verdá que cuando tenemos carreres nes que los protagonistes son otros, la F1 respira y dexa atrás los rumores d’aburrimientu o monopoliu de les fleches platiaes. Axallá nun seya esta la única carrera na que podamos celebrar novedaes como les d’esti eventu en Monza.

Nun vos despisteis. Tamos metíos nuna tanda de tres grandes premios n’Italia que nos lleva agora a la Toscana, al circuitu de Mugello.