Category: Carreres

Hai delles coses que nun tán camudando pesie a la pandemia. Cambia l’orde de les carreres, les feches y los circuitos nos qu’hai eventos, pero caltiense una cosa: el dominiu de Mercedes. Esta vegada en Montmeló, nun circuitu ensin públicu como ye obligao estos díes, Lewis Hamilton tornó a ser el primeru en ver la bandera a cuadros. Amás, tolos pilotos sacante los cuatro primeros fueron doblaos, lo que fai un pocu la idea de cómo rinde’l Mercedes nesti 2020 y lo que ye quien a sacar Verstappen d’esti Red Bull. Foi segundu l’holandés, que nun pudo repetir resultáu, y Valtteri Bottas, que pasín ente pasu ve como les sos opciones d’algamar el campeonatu se compliquen, sobremanera agora col holandés un puestu per delantre d’él nel mundial de pilotos.

Nun hebo novedaes importantes na sesión de clasificación del sábadu. Pole pa Hamilton, con Bottas y Verstappen detrás. Bona actuación de Racing Point, que tán yá a un puntu de McLaren na clasificación de constructores, y de los pilotos del equipu de Woking, que siguen en puntos. Tolos güeyos taben puestos no que podía pasar el domingu, la xestión de gomes na que tanto insistimos na previa y en cómo diba aprovechase Verstappen de les posibles debilidaes de los Mercedes.

Sicasí el domingu namás hebo un Mercedes con debilidá: el de Valtteri Bottas, que perdió lo consiguío’l sábadu en pocos metros y llegó a tar quintu depués de salir segundu. Yá comentábemos qu’había dalgunos pilotos que nun taben aprovechando les posiciones del sábadu, y foi’l casu del finlandés qu’acabó en podiu pero que tuvo que lluchar dende bien ceo por recuperar les posiciones perdíes, dalgo que nun foi quién a facer con Verstappen.

Foi una salida llimpia, ensin nengún incidente y con bastantes adelantamientos, como’l doble de los Racing Point a Bottas. Hamilton tuvo una bona salida y pronto amarró la primer posición que nun diba soltar hasta ver la bandera a cuadros. Pela parte medio y baxo de la tabla, nun hebo nengún toque ente coches más allá de lo apertao de les curves, pero nengún sufrió como pa quedar fuera de carrera tan llueu.

Max Verstappen foi ún de los primeros d’arriba en parar, na vuelta 22, forciando a Mercedes, que diben controlando les gomes pa evitar sustos como los de selmanes pasaes, a vixilar la so estratexa de paraes. Dos vueltes tardaría Mercedes en parar a dambos pilotos, casi siguíos, con una parada un pelín más lenta de lo que quixeren nel casu del inglés, pero que nun punxo en peligru’l so llideralgu. Lo que nun pudieron evitar ye que Verstappen quedara per delantre de Bottas en saliendo’l finlandés de la so parada.

Nun foi un gran premiu abondo vistosu, pero tuvimos oportunidá de ver dellos adelantamientos interesantes pela parte medio la tabla, como vien siendo vezu. Los Haas tuvieron dellos momentos inspiraos en pista, pero nada de lo que vimos el vienres en los llibres, cuando dambos quedaron ente los diez primeros (Grosjean llegó a quedar quintu), pudo vese depués en carrera. Por exemplu, Magnussen foi adelantáu casi de siguío por Ocon, Albon y Sáinz na vuelta 28, cuando intentaba metese en puntos, ensin que’l pilotu danés pudiera evitalo. Grosjean acabaría l’últimu cuando, a falta de pocu pa rematar la carrera, fixo un trompu en pista. L’equipu estauxunidense paez, de momentu, condergáu a engarrase por nun acabar l’últimu esta temporada.

Racing Point y McLaren tuvieron un bon día. Yá comentemos que tán separtaos per un puntu nel mundial de constructores. Pérez tuvo una penalización de cinco segundos por nun facer casu a les banderes azules cuando rodaba quintu y pudiera acabar más arriba, pero tanto él como’l so compañeru fixeron una carrera curiosa. McLaren nun pudo facelo meyor anque sumó puntos con dambos pilotos. Sáinz rindió bastante meyor nesta ocasión de Norris, nun hebo problemes nes paraes y tovía los vimos ser protagonistes de dalgunos de los meyores adelantamientos del domingu. Anque a menor ritmu, McLaren siguen sumando puntos, dalgo que-yos interesa muncho nesi intentu de tornar a ser cuartos al final de la temporada.

Sedría na vuelta 37 cuando llegara’l primer abandonu: Charles Leclerc. Un fallu nel motor provocó un trompu que lu dexó travesáu en pista y ensin posibilidá de continuar más que cuatro vueltes. El domingu de Ferrari foi, en xeneral, pal escaezu. Nun paez que la rellación de Vettel cola so contorna tea ameyorando, a lo que sumamos falta d’entendimientu y d’enfotu, quiciás peles dos partes. L’alemán foi sétimu, una posición discreta pero que, sintiendo les sos declaraciones, foi un llogru pa él según como diba’l coche. Abultaba que col cambiu de chasis les coses ameyoraran, como vimos el vienres, pero en carrera l’asuntu foi bien distintu.

Alfa Romeo continua col baxu rendimientu col qu’entamó la temporada. Cuando más notamos la so presencia ye porque dalgo pasó en pista con dalgún adelantamientu axustáu o por dalguna visita a la grava, pero nun tán consiguiendo dar bones noticies sobre les sos actuaciones, lo mesmo Giovinazzi que Räikkönen. El so estáu de forma ye mui asemeyáu agora mesmo al de Haas. Williams tampoco nun ta muncho meyor, pero viniendo de lo negativo de 2019 paez que compensen un poco más los sos resultaos probes. Ye verdá que nun tán puntuando pero viendo lo que facíen la temporada pasada, ye más realista pensar que puedan facelo en dalgún momentu esti añu. Pa los tres equipos, esti gran premiu en Montmeló va quedar archivau rápido.

Alpha Tauri, pa lo último, consiguió puntos gracies a Pierre Gasly, que sigui empeñáu n’amosar que nun ye tan mal pilotu como lu quixeron pintar nel so tiempu en Red Bull. De fechu, Alex Albon, el pilotu que lu sustituyó, namás pudo ser octavu, xusto per delantre d’él.

Insistimos que nun foi una carrera mui vistosa, pero a vegaes la F1 precisa d’estes carreres más tranquiles pa garrar fuercia y trayenos eventos más interesantes. Sicasí, agora toca esperar dos selmanes, hasta l’últimu fin de selmana d’agostu, pa visitar otru circuitu, el míticu Spa-Francorchamps pal gran premiu de Bélxica d’esti 2020.

Esta vez nun hebo reventones pero sí xestión de gomes. El pilotu que supo manexase meyor nes condiciones qu’ufría Silverstone esti domingu foi quien salió victoriosu y, anque pudiera paecenos raro, esti nun diba nun Mercedes.

Y ye que la clasificación del sábadu, con pole pa Bottas y Hamilton segundu con un Hülkenberg inspiradísimu na tercer posición, facía albidrar otru gran premiu de dominiu platiáu. Pero yá avisemos: les gomes escoyíes pa esti gran premiu yeren más blandes, diben obligar a más paraes y a una xestión más intensa per parte de los pilotos. Hamilton suel amosar bones maneres nesti asuntu, Bottas nun lo fai mal tampocu, pero Verstappen fíxose cargu de pasar perriba los sos rivales con una bona estratexa sumada a un bon manexu de lo que Pirelli ufría pa esti gran premiu. Col so meyor estilu, el pilotu holandés ganó per primer vegada en Silverstone y suma yá nueve victories.

Nun foi un gran premiu de grandes momentos nin d’abandonos numberosos. De fechu’l primer y únicu foi Magnussen y porque diba últimu a muncha distancia del restu y arrastraba una penalización por un alcuentru con Latifi en pista que los comisarios consideraron sancionable. Nun foi tampocu un gran premiu d’adelantamientos imposibles, anque dellos vimos, como davezu na parte media de la tabla.

Sí foi’l gran premiu de les gomes, de l’ansiedá nes paraes en boxes, de controlar al milímetru lo que facía l’otru pa replicalu y de sacar tol rendimientu posible al coche. Dalgunos pilotos viéronse condicionaos poles paraes de los sos equipos, como ye’l casu de Sáinz o Vettel. Falando del alemán, per radio dexó claro que la relación equipu-pilotu nun ye bona, dalgo que pudiera desplicar el baxu rendimientu del coche y l’aparente falta d’enfotu del pilotu. El so compañeru Leclerc, nuna meyor estratexa qu’él, foi cuartu, puestu que nun duldó en celebrar como si fuere un podiu. Les coses nun pinten bien en Ferrari y yá nun ye sólo pol coche.

Hülkenberg nun foi quien a tornar esi tercer puestu na clasificación nun podiu, y el so sétimu puestu casi nos cai deceicionante polo qu’esperábemos d’él. Nun podemos escaecer la sanción que cayó sobre Racing Point tres la denuncia de Renault al so coche pa 2020 y que trai perda de puntos y multa económica. Sicasí, tanto l’alemán como’l so compañeru Stroll clasificaron ente los diez primeros, que ye dalgo que l’añu pasáu nun consiguieron hasta bien avanzada la temporada.

Per detrás, Williams ta pasando perriba Haas en dellos momentos. Ensin entavía pensar en puntos, sí ye verdá que l’equipu inglés ta aprovechando la baxa forma de los estauxunidenses pa dir, pasín ente pasu, superándolos en carrera. Haas nun da amueses de meyora y paez que tamos énte otru añu deceicionante y col peligru, esta vegada, de nun llegar a puntos en nenguna carrera. Entavía queda tiempu ya’l fechu de que vaigamos a visitar dellos circuitos nuevos puede favorecelos pero ye verdá que, de momentu, nun hai motivos pa ser optimistes.

Tampocu nun pueden tar contentos n’Alfa Romeo. Paez que nun son quien a dar cola solución pal so baxu rendimientu y otra vegada los vimos siendo de los más lentos de la parriella. Tienen regularidá, el coche nun da problemes, pero la velocidá nun ta ehí y ensin ella, nun tán los puntos. Dalgo más contentos tán n’Alpha Tauri, qu’anque pocos, van sumando puntos en casi toles carreres. Nesti eventu tocó-y a Kvyat sumar un puntu, pesie a que’l so compañeru Gasly tuvo gran parte de la carrera dientro de los diez primeros. Sicasí, la estratexa del equipu y la xestión de los gomes acabaron dexándolu nel puestu once.

McLaren tuvo una bona carrera, pesie a les paraes y la mala suerte de Sáinz, qu’atopó tráfico de la que salía de box y tuvo de frenar, dexando pasar a otru pilotu y perdiendo tiempu que lu dexó fuera de puntos. Norris tuvo una actuación discreta, pero sumó puntos. L’inglés ta quintu na clasificación de pilotos y l’equipu ye cuartu, a dos puntos de Ferrari.

Renault llevó una alegría nos entrenamientos cuando Daniel Ricciardo quedó terceru nuna de les sesiones. Pero nun duró y anque sumaron puntos foi namás con Ocon, que quedó octavu. Ricciardo tuvo un incidente en pista y acabó nel puestu décimocuartu, lloñe de les sos aspiraciones y de les promeses de los entrenamientos. Entavía tienen muncho que trabayar na escudería francesa.

Fueron dos grandes premios intensos por razones estremadas, pero dexamos Silverstone cola sensación de tener vivío dos carreres bien prestoses. El rumbu va agora hacia Barcelona. Nunos díes nel Circuit de Catalunya va celebrase’l siguiente gran premiu d’esta temporada y au cuidamos ver un dibuxu distintu de lo que vimos nes carreres pasaes.

Esti gran premiu presentaba bien de noticies como pa facelu yá interesante dende’l vienres. Como vos comentemos na previa, Nico Hülkenberg garraba los mandos del Racing Point de Sergio Pérez depués de que’l pilotu mexicanu diera positivu por COVID-19 y tuviera de retirase temporalmente hasta que pase la enfermedá. Yera una oportunidá inesperada pal alemán pa ponese al volante d’un F1 depués de la so salida l’añu pasáu al quedar ensin equipu y una preocupación más pal mexicanu que tien duldes de si va poder siguir en 2021 compitiendo.

Con Mercedes dominando, a naide nun sorprendió ver a Hamilton mandar el sábadu, faciéndose con otra pole más na so carrera, siguíu por Bottas y Verstappen. Per detrás, bona actuación de McLaren, con Norris quintu y Sáinz sétimu; Ferrari aprovechó’l tirón de Leclerc pa clasificar cuartos, pero Vettel namás pudo ser décimu. Hülkenberg tuvo de conformase con ser décimoterceru. Destacamos tamién a Renault, con un bon rendimientu tol fin de selmana.

La primer noticia del domingu tornaba a poner a Racing Point nel puntu de mira: problemes nel coche dexaben a Nico Hülkenberg ensin poder siquiera salir. El so coche quedó nel garaxe y a pocos minutos de que s’apagaren les lluces coloraes, el pilotu alemán, resignáu, siguía lo que pasaba en pista dende’l muru de pit. Nun sabemos entavía si va ser él quien compita en siete díes, otra vegada en Silverstone, o si pa esi momentu Sergio Pérez yá va poder facelo. Lo que ta claro ye que paez que la suerte nun acompaña enxamás al alemán.

La salida del gran premiu foi llimpia. Hamilton aprovechó la so pole pa imponese dende bien pronto, anque tuvo a piques de perder la so posición colos sos persiguidores, que tuvieron una meyor salida qu’él. Ensin embargu, l’inglés nun diba tardar en meter distancia col restu pa garantizase una carrera tranquila. Esa distancia diba desapaecer pronto por un primer coche de seguridá provocáu por un incidente ente Albon y Magnussen. Dambos pilotos chocaron, llevando’l danés la peor parte de los dos, magar que’l golpe dexólu na grava y fuera del gran premiu tres facer una gran primer vuelta. El pilotu de Red Bull foi quien a terminar en puntos pero yá se vio condicionáu per ello pal restu de la carrera.

Yá col coche de seguridá de vuelta en pit, la carrera continuaba, con Mercedes metiendo distancia con Verstappen y Leclerc faciendo por algamar al holandés, pero ensin munchu ésitu. Como vien siendo vezu en carreres pasaes lo más interesante vieno pela parte medio de la tabla: el Racing Point de Stroll intentando aguantar la so posición, colos McLaren y los Renault, especialmente inspiraos güei. Per primer vegada podemos dicir que tuvo un bon gran premiu Renault. Ricciardo rodó a bon ritmu cásique tola carrera, con dalgún sustu adelantando a Grosjean pero ensin presentar nengún problema como nos pasaos grandes premios. El so compañeru Esteban Ocon tuvo una actuación más discreta pero dientro de los puntos y con dellos bonos adelantamientos.

McLaren tampoco nun lo fixo mal, y de fechu Norris (que clasificó quintu) acabó quintu. Sáinz tuvo mala suerte nes vueltes finales de carrera y un pinchazu de la goma delantera izquierda obligólu a entrar, perdiendo asina la posibilidá de puntuar. Anque nun da puntos, el rendimientu del equipu de Woking foi positivu, y viendo lo bien que rodó güei Renault, tienen motivos pa dir con ganes abondes de siguir sumando dientro de siete díes .

Tuvimos otru coche de seguridá por un accidente de Daniil Kvyat que perdió’l coche y acabó escontra les barreres. Toles distancies tornaron a amenorgar, los pilotos aprovecharon pa parar y los más d’ellos punxo gomes dures pa rematar con ellos la carrera. La estratexa a una parada foi la gran protagonista y notóse al final, cuando gran parte de los pilotos tuviero problemes colos neumáticos. De fechu, foi gracies a esto que tuvimos ún de los finales más interesantes dende va tiempu. Ye verdá que foi un gran premiu relativamente tranquilu, con adelantamientos, dalgún incidente, pero en xeneral ensin muncho que ver, más estratexa y aguanta qu’espectáculu. Nun sabíemos que lo meyor diba quedar pal final.

Hamilton aguantaba, casi cola carrera en bolsu a falta d’unes poques vueltes pal final. Bottas, pel so llau, carecía problemes nes gomes y asina lo comentaba al equipu per radio, falando de vibraciones y de notales bastante gastaes. Nun abultaba que fuera pa tanto hasta que nes imáxenes víemos el so Mercedes perdiendo trazada y la goma delantera derecha pinchada. La mala suerte pal finlandés foi que tuvo de facer una vuelta entera con estes blimes pues facía unos metros que pasara la entrada a pit. Con esto, Bottas perdía la so segunda posición y quedaría fuera de puntos.

Pero esto yera namás que l’empiezu de lo que nos esperaba. Nun foi sólo Bottas quien pinchó: Sáinz, col mesmu problema qu’él, acabó tamién reventando y corriendo la mesma suerte que’l finlandés. Y si nun yera esto bastante, Lewis Hamilton, a falta d’una vuelta, tamién reventó una goma, la mesma que’l so compañeru, y tuvo de rodar esos últimos metros con ella pinchada y desgastándose pol contautu col asfaltu. Nada impidió que ganara pero de xuru qu’esa última vuelta va queda-y na memoria pa siempre.

Verstappen lamentaba que nun pudo aprovechar esos últimos problemes de los Mercedes y ye que l’holandés, nuna decisión que depués quedó claro que foi contraproducente, decidió parar pa montar gomes nueves ya intentar la vuelta rápida y lo que fixo que nun se puede aprovechar de los problemes de Hamilton.

Hubo delles penalizaciones a varios pilotos, ente ellos Albon y Giovinazzi, con castigosde tiempu (cinco segundos pa caún) y de banderes blanquinegres por superar los llímites del circuitu y por conducta poco deportiva (esta nel casu de Grosjean nuna de les vegaes que Sáinz lu taba tentando d’adelantar).

Alpha Tauri sumó puntos pesie al accidente de Kvyat. Gasly nun dexa de sumar pal so equipu, unviando mesaxes a Red Bull de lo inxustos que fueron con él, sobre manera agora que paez qu’Albon ta pasando pola mesma situación que’l francés en so día. Alfa Romeo nun ameyora y pasu ente pasu vese superao por Williams, qu’anque siguen en puestos de fuera de puntos, dan pasos alantre perimportantes na so llucha por sumar, anque seya, dalgún puntu d’equí a la fin del campeonatu.

Ferrari xubió al podiu con Leclerc, en tercer llugar, pero de Vettel supimos bien pocu en carrera. Puntuó, en décimu llugar, y tuvo abondos problemes tol fin de selmana col coche (malpenes fizo una vuelta’l vienres) no que ye otra carrera deceicionante pal alemán. La Scuderia continúa per detrás de McLaren nel mundial de constructores y saca namás un puntu a Racing Point.

En siete díes tornamos otra vuelta a Silverstone au va celebrase’l setenta aniversariu de la F1, qu’escueye’l circuitu inglés pa esta fecha tan importante y nel que, con gomes más blandes, taremos sollertes a lo que pueda pasar en pista depués de lo que vivimos nesta ocasión.

Tamos avezaos al sol n’Hungría, con daqué de tormenta, pero en xeneral ambiente braniegu. Por eso, el tener un vienres con agua y temperatures baxes pa esta época del añu foi lo primero que sorprendió en llegando al Hungaroring. Tres díes de tiempu más bien inestable, con munchu protagonismu del agua, equipos mirando al cielu y neumáticos pa moyao. La carrera, sicasí, foi en seco, anque la humedá de la pista fuerció a que gran parte de los pilotos llevaren gomes p’agua que nun tardaríen en camudar. Dalgunos, como los pilotos de Haas, incluso enantes de salir, en dando la vuelta de formación. Foi una opción arriesgada, que los fizo salir dende’l pitlane, pero que dio dellos frutos puesto que rodaron gran parte del gran premiu nes posiciones cimeres. Sicasí, nun diba ser dalgo que durara y anque Magnussen puntuó y Grosjean quedó fuera, recibieron una penalización que los movió un puestu atrás y teniendo que conformase col puntu del danés, que terminó en décima posición.

Entamó l’aición bien ceo’l domingu. Max Vestappen punxo a los sos mecánicos a trabayar enantes siquier de salir. Cuando rodaba pa dir ocupar la so posición na parriella, el pilotu holandés salióse de pista y estrozó l’alerón delanteru. L’equipu tuvo entós que trabayar escontra’l reló (quedaben alrodiu los quince-venti minutos pa qu’entamara la carrera) pa consiguir que’l so pilotu pudiera aniciar la carrera con garantíes. Y consiguiéronlo. Verstappen nun pudo con Hamilton, pero dende la salida yá casi se punxo a la gueta del inglés, dexando atrás a tolos otros pilotos. Red Bull nun tuvo un fin de selmana tranquilu y de fechu Verstappen salía dende la sétima posición. Mercedes, pel so llau, replicara la pole de Hamilton n’Estiria y con Bottas xusto per detrás.

Vettel tuvo un bon gran premiu. Non brillante pero sí lo suficientemente bonu como pa ser sextu y tomar decisiones sabies en pista, escontra’l criteriu del so equipu. Leclerc, pel so llau, nun acertó (o dexóse llevar polo que dictaben dende’l muru) y quedó fuera de puntos. Ta claro qu’esta temporada nun podemos contar con Ferrari, de momentu, pa llugar polos puestos cimeros y competir direutamente con Mercedes. Hungría diba ser au trayeran anovamientos que nun paez que tuvieran munchu efeutu.

Racing Point tornó a dar batalla no más alto. Lance Stroll fizo una clasificación mui bona, quedando terceru, mientres el so compañeru Sergio Pérez quedaba una posición más abaxo. Sicasí, dambos compitieron bien el domingu, aprovechando amás la debilidá de McLaren y apretando al Red Bull d’Albon. Finalmente, Stroll terminó cuartu, per detrás de Bottas, y Pérez sétimu. Albon tuvo una carrera curiosa, anque tranquila, defendióse bien de Stroll el tiempu que pudo, pero’l canadiente acabó por pasalu. El pilotu de Red Bull, qu’empezaba la carrera nel puestu catorce, acabó quintu.

Renault nun sal de la irregulariedá. Ricciardo puntuó y compitió bien. Ocon tuvo perdíu nes posiciones d’abaxo cásique tola carrera. L’equipu francés precisa recuperar rápido’l tarrén que tán perdiendo colos sos rivales si quieren tener dalguna oportunidá de pelear por posiciones interesantes nel mundial de constructores. La suerte pa ellos ye que n’Hungría, McLaren namás pudo conseguir dos puntos con Carlos Sáinz. Lando Norris tuvo mala suerte col tráficu al salir de les sos paraes, lo que condicionó la so carrera nun circuitu nel que ye mui complicao adelantar. L’inglés acabó décimoterceru.

Peles posiciones más baxes, Alpha Tauri, Alfa Romeo y Williams. Los primeros namás terminaron con un coche, el de Daniil Kvyat. Pierre Gasly tuvo munchos problemes yá dende’l vienres y anque entró na Q3 el sábadu, nun pudo nin facer una vuelta nella. El francés taba mui disgustáu col rendimientu del coche y terminó abandonando.

Los Alfa Romeo entavía nun apaecierón nin dieron amueses de poder consiguir dalgún puntu esti añu. Les sos clasificaciones tán siendo bastante probes, frente a les de Williams. L’equipu inglés entró na Q2 colos sos dos pilotos. El problema ye que nun tán sabiendo aprovechar esti puntu’l domingu, y nun salen de los puestos baxos. Aparte, Nicolas Latifi tuvo un pinchazu depués de que l’equipu lu sacara de la so parada al tiempu que pasaba Sáinz, lo que resultó nuna penalización y, como dicimos, nun pinchazu pal canadiense. Él y el so compañeru, zarraron la clasificación.

Ye verdá que Williams nun ta aprovechando bien lo que consiguen el sábadu. Pero al tiempu, paez que son los que quiciás puedan llegar a sumar dalgún puntu de los equipos d’abaxo. Haas estrenóse esti domingu con Magnussen, pero namás con un puntu. Nun sedría raro ver a Russell o a Latifi nesa situación, atropando dalgún puntu con una décima posición o incluso dalgún más.

Dicen que segundes partes nun son bones. Nel casu d’Austria, puede dicise que la so segunda parte nun foi tan bona como la primera, pero tuvo coses prestoses sicasí. El resultáu na parte alto nun dio pa sorpreses, pero tovía tuvimos cosines interesantes que ver, una sesión de clasificación con agua y la confirmación de qu’esti añu la parte medio de la tabla va tar bien entretenida.

Como vos dicimos, el sábadu asomó l’agua. Les predicciones yá avisaben el vienres de que quiciás les sesiones del día siguiente diben vese afeutaes poles nubes y de fechu, la tercer sesión de llibres nun llegó a celebrase. Por esi motivu, lo que se ficiera de vienres diba ser más importante porque, de nun haber clasificación, los tiempos de la segunda tanda d’entrenamientos marcaríen la parriella del domingu. Al final pudimos ver los coches en pista, con agua abondo, pero compitiendo pol meyor sitiu pa la carrera.

Nun hebo munches sorpreses na pole: Hamilton amosó que ye ún de los meyores pilotos en moyao y nin Bottas nin Verstappen pudieron batilu, anque l’holandés tuvo a piques d’ello. El que sí sorprendió foi Carlos Sáinz, terceru, dexando claro tamién que’l pasu alantre de McLaren nun yera casualidá. El so compañeru Lando Norris, qu’algamó’l podiu la selmana pasada, namás pudo ser sestu y una penalización dexólu nel novenu llugar. En Ferrari sumaron otra deceición, ocupando Vettel la décima posición y Leclerc nun entrando en Q3. Racing Point foi quien llevó la pior parte del sábadu magar Pérez nun pasó nin a Q2 y Stroll nun pasó de Q3. George Russell tuvo una actuación mui sólida y clasificó nel puestu doce. Pel so llau, Grosjean tuvo de salir dende’l pitlane y Giovinazzi foi penalizáu con cinco posiciones.

El domingu esperábase carrera en seco y asina foi. La salida foi limpia pero non tanto como la del eventu anterior y foi nestos primeros momentos del gran premiu cuando se decidió la suerte de Ferrari. Dambos pilotos topáronse en pista y Leclerc tentó de pasar per un güecu demasiao estrechu pal so monoplaza. El que pilotaba a la so manzorga yera Vettel, al que’l monegascu pasó perriba y destrozó l’alerón traseru, rematando asina la so carrera. El mesmu Leclerc tuvo d’abandonar un pocu depués. Otru desastre a sumar pa Ferrari, que nun paez que s’enteraren entá de que yá ta la temporada entamada.

Per delantre, Hamilton nun tardó en dominar, y anque hebo un coche de seguridá, el so llideralgu enxamás tuvo en peligru. Verstappen foi quien más fizo por alcanzalu, pero decatándose rápido que nesta ocasión Hamilton nun diba vender barato la posición. Mientres l’holandés facía por acortar distancies, degradando les gomes, un Bottas mui paciente foi trabayándo la distancia que lu separtaba del Red Bull p’acabar pasándolu, anque non ensin retruque per parte de Verstappen. La batalla ente dambos foi ún de los momentos más prestosos del gran premiu.

Per detrás, Sáinz nun tardó en baxar posiciones y una parada más llarga de lo normal condicionó-y’l restu de la carrera. El so compañeru Norris xugó tamién la carta de la paciencia y a poquitinos foi escalando posiciones. Pero si tenemos que destacar a un pilotu del gran premiu esti ye Pérez. Recordemos que salía nel puestu diecisiete. Cola salida del coche de seguridá yá rodaba décimu y dende ehí nun fizo más qu’escalar posiciones, acortar distancies y, en pocu tiempu colocase a la cola d’Albon. El pilotu tailandés foi quien a aguantar y tuvo una carrera más bien tranquila, ensin munchu sobresaltu, rodando cásique tol tiempu en cuartu llugar.

Per detrás de Pérez, Ricciardo tomó-y la midida a Lance Stroll, que nun foi quien a pasalu nun coche con muncha más velocidá y meyor rendimientu. Dambos pilotos víen como, pali que pali, Norris s’averaba a ellos, con muncha más velocidá y gomes menos gastaes. Nun tardó l’inglés en pasalos, aprovechándose de la batalla ente ellos. Hebo un momentu de contactu ente’l Renault y el Racing Point, pero nun hebo penalización pa nengún de los pilotos.

Norris nun tuvo bastante col sextu puestu y, viendo que Pérez entamaba a tener problemes tres tener un toque con Albon, apuró tolo que pudo y llegó a adelantar al mexicanu na última curva enantes de ver la bandera a cuadros. De fechu, Pérez tamién perdió puestos con Ricciardo y entró a la par del so compañeru.

Per detrás, entró Sáinz en novenu lugar y Kvyat, atropando l’últimu puntu. Fuera de puntos yá, el restu de pilotos tuvieron una carrera bastante tranquila. Los Haas nun fueron quien nin a averase a puestos altos, mesmo que Gasly, que tuvo una carrera un pocu menos tranquila qu’otros. Williams nun acabó mui arriba pero hai motivos pa ser optimistes: especialmente George Russell ta teniendo bones actuaciones que dexen claro que’l coche ye meyor que lo que teníen l’añu pasáu. Sí que ye verdá que nesti gran premiu tuvo una salida de pista que nun ayudó pa nada al so resultáu. El pilotu inglés quexábase de que, nesta ocasión, el coche diba dalgo lentu. Los pilotos d’Alfa Romeo, Räikkönen y Giovinazzi, tuvieron carreres discretes.

Hebo tres abandonos. Aparte de lo que yá se comentó de Ferrari, Ocon sumóse a la llista, con un problema de refrixeración asomeyáu al qu’afeutó al so compañeru hai siete díes. La vuelta rápida sumóla Carlos Sáinz, un consuelu pequeñu pal pilotu madrilanu, que creyía que podía tener quedao muncho más arriba.

La F1 nun para. Dexamos la comarca d’Estiria y pegamos un saltu hasta tierres húngares pal gran premiu d’Hungría d’esti 2020. Tres ésti, tenemos un parón de dos selmanes y tornamos, esta vegada a Silverstone. Vos recordamos que yá hai confirmaes dos carreres más: entra Mugello nel calendariu, y sumamos Sochi. Podéis ver toles feches nesti enllaz.

Nun foi un gran premiu al estilu avezáu, nin les condiciones fueron les mesmes que nel pasáu, incluso daquién podría dicir que se vía daqué descafeinao coles grades vacíes, los protocolos ente pilotos y equipos y la sensación de que nun se taba viviendo dalgo normal. Pero sí foi un gran premiu de los qu’amarren al asientu casi dende l’entamu al final.

Aniciar una temporada ye siempre motivu pa ilusionase, anque siempre miremos de regüeyu a Mercedes sabiendo que, probablemente, tornen a ser los primeros en too. Y de fechu asina foi’l vienres, au Hamilton marcó’l ritmu, ya’l sábadu, onde’l que lu marcó foi Bottas faciéndose cola primer pole de la temporada, dalgo que nun nos debiera sorprender yá que lleva trés dende qu’Austria tornó al calendariu. Sicasí, el domingu la hestoria foi bien distinta.

Sí, foi un Mercedes quien ganó la carrera, pero vimos amueses de vulnerabilidá y nun hai cosa que más entretenga al espectador, sobremanera confináu, que ver a los equipos grandes n’apuros. A la fin ye una victoria más pa les fleches platiaes y pa Valtteri Bottas, pero nun foi un paséu y eso tien un efeutu quiciabes balsámicu. Amás, Hamilton, que rodó per detrás del so compañeru tol gran premiu ensin ser quien a pasalu, foi penalizáu per dos vegaes, en díes distintos y por motivos estremaos (el sábadu por nun baxar de velocidá con banderas amarielles y el domingu por un incidente con Albon), dalgo que nun tamos de ver.

El sábadu mandó Bottas. Con una vuelta temprana que lu puso no más alto dende bien ceo de la última sesión de clasificación, nun tuvo de facer munchu esfuerciu p’algamar el primer puestu na parriella. Per detrás Hamilton y Verstappen, un convidáu avezáu nesti circuitu nos puestos d’arriba. Un poco más abaxo, Norris, Albon y Pérez, que diben ser protagonistes el domingu.

La sorpresa foi, ensin dulda, Ferrari. Podríemos dicir que Sebastian Vettel nun punxo munchu enfotu na sesión de clasificación y habría quien dixera que ye normal pensando que nun va siguir en La Scuderia pa 2021, pero ye que Leclerc nun lo fizo muncho meyor, de fechu, sólo unes poques décimes a favor del pilotu monegascu marcaron qu’él sí pasara a Q3 mientres que Vettel non. Quedaba pal domingu ver si, simplemente, yera una circunstancia de clasificación o en verdá Ferrari venía un pasu per detrás de Mercedes y Red Bull.

La salida del domingu foi llimpia, anque hebo dalguna qu’otra salida de pista nos primeros metros pa evitar colisiones. Bottas foi quien a abrir espaciu rápido ente él y Hamilton, que tuvo de pegase con Verstappen y los sos inmediatos persiguidores Norris, Albon y Pérez. Los Racing Point sacaron un rendimientu perbonu tol fin de selmana, y anque Stroll nun pudo rematar la carrera, Pérez llegó a ser sestu y tuvo posibilidaes reales de tar nel podiu, anque la so estratexa de carrera nun funcionó y foi penalizáu a última hora por dir demasiao rápido nel carril de pit.

Munches estratexes de carrera esbarrumbaron pol dir y venir de coches de seguridá provocaos por una montonera d’abandonos. El primeru n’abandonar la carrera foi ún de los favoritos pa ganala, Max Verstappen, que por un problema de sensores tuvo d’aparcar el coche enantes de tiempu. Anque la so historia sedría distinta, Albon tamién careció los problemes de Verstappen a falta de dos vueltes pa terminar el gran premiu. El pilotu tailandés tuvo a piques de consiguir el so primer podiu, si non de ganar la so primer carrera, pero un incidente con Hamilton (que nos fizo alcordanos de Brasil 2019) provocó un trompu que lu dexó en la grava y condergó la so carrera. El pilotu inglés foi depués penalizáu con cinco segundos, asina que, anque vio la bandera a cuadros en segundu llugar, acabó siendo cuartu.

Al abandonu de Verstappen diben sumase una montonera más y ye que la fiabilidá dio bien de guerra en dellos casos: Stroll con un sensor, los dos Haas colos frenos, Räikkönen con una rueda mal colocada que salió disparada, Ricciardo con problemes mecánicos, Russell teniendo tamién qu’abandonar y Kvyat otru tanto. Hasta trés coches de seguridá tuvieron d’apaecer, un respiru y al tiempu una pesadiella pa Bottas que vía como, cada vegada, amenorgaba la distancia que tenía colos sos rivales pero que, al tiempu, podía dar un descansu al coche.

Fueron munchos los pilotos con problemes por pasar perriba los pianos del circuitu, abondo agresivos colos baxos de los coches. Los dos pilotos Mercedes recibieron instrucciones d’evitalos, torgando dafechu’l so ritmu de carrera, que pasó a ser más lentu. Per detrás, vimos batalles bien prestoses ente Leclerc, Albon, Pérez, Norris y Sáinz. Les diferentes estratexes que tomaron aprovechando los coches de seguridá, beneficiaron sobre manera a Norris que cola penalización de Hamilton consiguió’l so primer podiu, una nueva alegría pa McLaren depués del que consiguiera Sáinz la temporada pasada y que vien a dicir que la escudería inglesa va, pasín ente pasu, reencontrando’l camín de los puestos cimeros. El pilotu madrilanu foi nesta ocasión quintu, lo que suma un bon númberu de puntos pa los de Woking nesti primer eventu. Amás, Norris suma un puntu estra por facer vuelta rápida de carrera, un llogru que pon un bon remate a una gran carrera del inglés.

Nun falemos entavía de Ferrari y paga la pena facelo porque los dos pilotos tuvieron carreres bien distintes. Taba claro qu’esti nun yera’l fin de selmana de Vettel y cuando lu vimos trompear en pista por un toque con Sáinz y baxar posiciones hasta salir de puntos pudimos confirmalo. Sicasí, nun foi too malo pal equipu italianu. Leclerc foi quien a sacar beneficiu de les desgracies d’otros y, ensin munchu ruíu, foi xubiendo posiciones, aprovechando bien les oportunidaes de los coches de seguridá (dalgo que nun suel facer mui bien Ferrari) y remató la so carrera en segundu llugar, gracies tamién a la penalización de Hamilton.

Hai que rescamplar tamién el llabor de Gasly con Alpha Tauri. Kvyat nun pudo ayudar a sumar puntos pal equipu por tener qu’abandonar, pero’l pilotu francés fizo bien el so trabayu, anque almitió que tuvieron a piques de tener que retirar el coche enantes de ver la bandera a cuadros. Ocon y Latifi fueron los otros dos pilotos que pudieron terminar. El pilotu Renault, de vuelta en pista, puntuó n’octavu llugar mientres que’l rookie d’esta temporada, el canadiense de Williams quedó a piques de consiguir sumar un puntu valiosu pa Williams, que precisa dende yá de bones noticies. Tamién Giovinazzi entró en puntos, foi novenu per delantre de Sebastian Vettel qu’a la fin pudo a lo menos consiguir un puntu.

Nun hai duldes de que, como carrera inaugural, Austria cumplió con muncho. El domingu que vien repitimos, col mesmu horariu y mesmos protagonistes, y esperamos que cola mesma intensidá. Nun sabemos si Mercedes atoparán la sienda de la fiabilidá y tendrán un gran premiu más tranquilu o si, polo contrario, los d’atrás siguirán apertando y sedrá un Red Bull, con ganes de venganza, quien xuba a lo cimero del podiu. Mientres que llega’l momentu de sabelo, equí vos dexamos tolos númberos que dexó esti fin de selmana:

Resultaos