Category: Carreres

Foi na cabera carrera de la temporada na que vimos cambiar les tornes y a Max Verstappen dirixir de forma dominante una carrera per delantre los Mercedes. Y ye que yá na clasificación llogró la pole con una vuelta mui bona per delantre del par de pilotos de Brackley. Dende 2014 venía siendo esi meyor tiempu d’un pilotu de Mercedes. Bona clasificación tamién de los McLaren con mención especial pa la vuelta de Lando Norris xusto darréu de Red Bull y Mercedes pa poner les blimes de lo que sedría’l tercer puestu nel mundial de constructores. Nun-y diríen les coses tan bien esta vez a Racing Point con Stroll últimu na Q3 y Pérez sabiendo que salía l’últimu por penalización tres cambiu de componentes del motor.

Yá nel día de la carrera poques novedaes en cabeza, con Verstappen aguantando bien a Bottas na salida y esti a Hamilton na mesma maniobra y nuna carrera na que nun tuvo muncho más problema’l pilotu holandés. Caltendríen tamién les posiciones de salida Bottas segundu y Hamilton terceru, imponiéndose esta vez el finlandés al so compañeru d’equipu mesmo en clasificación como en carrera. Caltendría tamién la cuarta posición Albon con cierta tranquilidá. Foi cruel la retirada de Sergio Pérez, que sigue ensin asientu pal añu que vien y cola única opción de que seya’l de Red Bull del pilotu que quedó xusto per delantre. Problemes na tresmisión ficiéronlu apartar el coche de pista y retirase. L’incidente fadría preciso intervenir al coche de seguridá y reducir les distancies otra vuelta.

Mui bon eventu pa McLaren, non solo pol quintu y sestu puestu de Lando y Carlos (con motor vieyu esti últimu) sinon porque con ello certificaríen la tercer posición nel mundial, dalgo que dexa un bon tastu de xuru depués de tolo qu’hebo que pasar estos años pasaos. Nun sobren les celebraciones en Woking. Sétimu sedría Ricciardo que nun pudo facer nada colos McLaren per delantre de Gasly ya’l so compañeru esteban Ocon confirmando d’esta forma la quinta posición de la firma francesa nel mundial. L’últimu en puntos sedría Stroll nun gran premiu mui discretu pa Racing Point. L’equipu quedaría cuartu nel apartáu de constructores.

Yá fuera de puntos siguiríen Kvyat y Räikkönen precederíen a los dos Ferrari nuna temporada pa olvidar (y van…). Leclerc foi décimu terceru per delantre de Vettel a pesar de que l’alemán lu adelantare na salida y zarraría d’esta forma’l so pasu pela Scuderia. De xuru que ta naguando por un nuevu comienzu con Aston Martin.

Sedría Russell quien comandaría’l furgón de cola, demostrando de vuelta nel Williams que puede facer coses si se-y da la ferramienta pa ello siguíu de Giovinazzi, Latifi y dambos Haas. Magnussen zarraría d’esta forma tamién la so participación col equipu estauxunidense tres evitar una colisión Pérez na primer vuelta y nun poder facer muncho más na carrera.

Zarramos asina esta temporada tan estraña y empezamos a pensar yá na temporada 2021 naguando porque seya una temporada normal y que, cola entrada de xente como Alonso o Schumacher Jr veamos más llucha que nesta temporada a la que ya-y ponemos el ramu.

Entamamos la cuenta atrás pa 2021 como nun podía ser d’otra forma.

L’ausencia de Hamilton dexaba un gran premiu con munchos puntos d’interés y munches entrugues que responder. Yá nos entrenos y na clasificación Russell, el so substitutu, dexaría claro que taba pa dar guerra y, pesie a ser el so primer contautu col W11, nun dexaría de facer sombra a Bottas clasificando nun segundu puestu que lu dexaba a 26 milésimes del finlandés. Nun diba a ser un eventu fácil pal pilotu nórdicu, si ya yera complicao competir con Hamilton de normal, que llegue una promesa nueva y se ponga al to altor dende’l primer momentu nun ye muncho meyor. Y ye que les coses taben apretaes colos 10 primeros en menos d’un segundu. Bien ye verdá qu’esti trazáu esterior del circuitu llimitaba la capacidá de facer diferencies a una vuelta. Verstappen que sigue siendo’l primeru del restu y un Ferrari que volvia a asomar pelos primeros puestos con Leclerc completaben los primeros puestos. Albon y Vettel que siguen ensin tar cómodos quedaron en Q2 y zarraba la clasificación Pietro Fittipaldi na so primer clasificación de F1. Jack Aitken quedó per delantre d’él y de Räikkönen xusto detrás del so compañeru d’equipu.

P’acabar de sembrar toles duldes posibles nel equipu de Brackley, Russel fizo una perbona salida y fíxose col primer puestu, Bottas fuese llargu na primer curva y Leclerc llevo per delantre a Pérez nun intentu de pasalu que tamién sacó de la pista a Verstappen. Pérez pudo siguir previu pasu per boxes mientres circulaba’l coche de seguridá, pero la maniobra dexaría fuera de carrera a los otros dos pilotos. Volvió llanzase la carrera con Russel comandando’l paquete y Sáinz subiendo dende l’octavu al tercer puestu. Tamién aprovechó pa suir del puestu decimonovenu al décimu’l so compañeru Lando Norris que salía más atrás de lo clasificao por mor d’una penalización por cambiar componentes na unidá de potencia.

Reaniciose al acarrera con Russell al frente y Sáinz dando-y guerra a Bottas, mientres Pérez empezaba a facer una escalada dende la posición decimuoctava. Entraría en puntos na vuelta 20. Siguió la carrera col control de Russell qu’aumentaba la so ventaya col so compañeru d’equipu a 8 segundos tres la parada en boxes.

Latifi quedaría fuera de carrera y un virtual safety car abriría una nueva ventana d’entrada en boxes, Mercedes fixo lo propio colos dos coches aprovechando la distancia colos coches que los siguíen. Pero equivocaríense de gomes al intentar faceser una parada tres d’otra obligándolos a volver a entrar y perdiendo asina posiciones en pista. La carrera de Bottas quedaría ensin opciones d’acabar nos primeros puestos al volver a los anteriores neumáticos, pero Russell tovía tenía opciones. Pérez llideraba’l grupu nuna remontada estraordinaria siguíu d’Ocon y Stroll. Mientres, Russell pasaría al so compañeru y pincharía xusto cuando diba a atacar al triu de cabeza. Perdiendo asina toa opción de ganar la so primera carrera, el trunfu sedría pa Checo Pérez siguíu por Ocon y Stroll. Un podium mui estremáu a los que tamos avezaos encabezáu por un pilotu que tovía nun tien asientu pal añu que vien y que yá nun sabe qué facer pa vindicase. Sáinz y Ricciardo siguiríen cuartu y quinto na llucha particular ente McLaren y Renault siguíos por Albon que cada vez ve peligrar más el so puestu, seguíu per Kvyat. Octavos y novenos sedríen les fleches platiaes encabezaes por Bottas (anque cola sensación de ser superáu pol so compañeru nesta carrera).

Per detrás d’ellos llegaría Norris tres lo so remontada particular siguíu por Gasly y Vettel. Los Alfa Romeo comandaos por Giovinazzi zarraríes la carrera per delante de Magnussen y los rookies Aitken y Fittipaldi.

Ábrense duldes en Mercedes, ábrense duldes alredor de Pérez y queda solo un gran premiu pa finalizar la temporada. Lleguen momentos de tomar decisiones o revisar les yá tomaes. De momentu, miramos pa Abu Dabi.

Llegamos a la primer de les carreres nel trípticu del desiertu cola corona de Campeón del Mundu entregada, pero con coses tovía por decidir y con un Hamilton intratable que dominó’l fin de selmana anque quixera asomar la cabeza Verstappen na tercer ronda d’entrenamientos llibres. Pole position pal inglés y primera llinia de parrilla pa Mercedes mientres que’l pilotu holandés de Red Bull sigue acercándose-yos pero ensin llegar a ser quien a muncho más. Paez qu’habrá d’esperar hasta 2021 pa que la escudería de Milton Keynes pueda facer los cambios precisos nel coche pa llograr garrar a les feches platiaes. Sergio Pérez encabezaría per parte de Racing point la llucha pol tercer puestu nel campeonatu de constructores con un Stroll que nun llegaría a pasar a Q3. Ferrari en Q2, lo mesmo qu’un Russel qu’esta vez sí que foi quien a llevar al Williams a la segunda ronda de clasificación mientres los McLaren sufríen suerte desigual siendo Norris l’únicu que llegó a Q3.

Los titulares de lo que viemos esti fin de selmana quedaronse, con razón, no que pasó na primer vuelta. Nesi momentu tolo deportivo pasó a un segun planu mientres víemos como’l Haas de Romain Grosjean diba derechu escontra la valla tres un toque y prendía fueu de secute. Fueron unos minutos que mos xelaron el cuerpu y fixeron saltar inmediatamente la bandera colorada mientres dibemos descubriendo a base d’un gotéu d’imáxenes que’l coche quedara partíu pela mitá. Cola parte del chasis qu’integra la xaula de seguridá atravesando’l quitamieos y en llames, toos alendábemos al ver que’l pilotu francés yera quien a salir del fueu cola ayuda de la rápida intervención de los servicios médicos y yera tratáu yá en zona segura. Quemadures nel dorsu de les manes y dalgunos golpes sedría’l resultáu d’un accidente que pudo tener un resultáu bien estremáu si nun fuere poles midides seguridá adoptaes nos últimos años na F1. Sicasí, pilotos como Vettel, pidíen entender lo que pasare coles vayes y cómo foi que’l coche pudo pasar p’ente elles.

Una vez asegurada la salú del pilotu y reparada la valla de la zona del accidente, volvió a llanzase la carrera un bon ratu depués, pero volvería a requirir la salida del coche de seguridá tres volcar el coche de Stroll. Yera un dia de muncho trabayu pa les asistencies.

Col restu de pilotos facíase la salida llanzada y, esta vez sí, que pudo dase-y continuidá la carrera. Victoria controlada de Hamilton a partir d’equí siguíu per un vertappen que nun pudo face-y muncha sobra pela carrera. Albon llograría el so tercer podium magar que fallare’l motor del coche de Perez cuando yá se vía terceru provocando la salidá d’un coche de seguridá que nun daría yá muncho más marxe de movimientu. Nun perdió la oportunidá McLaren colos abandonos de los pilotos de Racing Point y los estremaos eventos de carrera d’asegurase’l cuartu y quintu puesto faciéndose con unos puntos mui golosos pal mundial de constructores tamién per delantre de Ricciardo (sétimu) y Ocon (novenu).

Gasly fixo valir la estratexa d’una pareda colo qu’enfrentó la carrera llogrando un meritoriu sestu llugar y Bottas tuvo que conformase quedar octavu ente los dos Renault tres sufir un pinchazu na tercer vuelta de carrera. A partir d’ehí nun hebo muncha historia pal pilotu findandés que namás pudo intentar esguilar toles posiciones que pudo pa llograr el meyor resultáu posible.

Otru fin de selmana que nun ye pa Ferrari, Leclerc namás pudo quedar décimu y Vettel decimoterceru quedando ente ellos Kvyat que topo una carrera bien d’accidentada viéndose involucráu en casi tolos incidentes de dalguna forma y Russel que firmaba un bon gran premiu pero nel que tampoco pudo puntuar Williams otra vez. Tres el so compañeru, zarraríen los Alfa Romeo de Kimi y Giovinazzi tres una actuación bastante discreta.

Repetiremos la selmana que vien nesti mesmu escenariu na segunda y penúltima carrera nesti circuitu de Baḥréin. Esperemos topar nesa carrera más coses que cuntar dientro de lo deportivo y menos nel apartáu d’incidentes.

Siete. Siete vegaes campeones del mundu. Mercedes tardó bien pocu en marcar el ritmu esti añu y faltando cuatro carreres pa rematar la temporada yá son campeones. Nun hai agora mesmo na parriella equipu que pueda facelos tremar y pinta que l’añu que vien vaiga ser una réplica d’esti. Nun podemos facer otra cosa qu’aplaudir el so llabor entregáu nos últimos siete años y los previos a esti períodu d’ésitu.

Nel mundial de constructores entá tenemos d’esperar, pero quiciás seya pocu. Hamilton ganó otra vegada, ensin munchu problema, y amosando que nun tien rival en pista. Yá ye’l pilotu con más victories na historia de la F1 y pocos récords-y quedan por baltar. L’inglés concedió la pole’l sábadu, que llevó Bottas, ún de los pocos consuelos qu’entá tien el finlandés. Pero’l domingu, como davezu, foi quien mandó na clasificación. Vimos bones actuaciones en clasificación, pero’l gran premiu foi duru pa los pilotos. De fechu, namás quince terminaron la carrera.

Toles miraes taben puestes enriba de Gasly, que’l sábadu igualó’l so meyor resultáu en clasificación, siendo cuartu con Alpha Tauri. Sicasí, en carrera nun pudo atropar puntos y quedó fuera. Sicasí, el so llugar ocupolu’l so compañeru d’equipu, Daniil Kvyat, qu’había tiempu nun consiguía un resultáu tan bonu, siendo cuartu. Hebo vencedores pero tamién vencíos y Russell foi ún d’ellos. Tamos avezaos a ver al pilotu inglés facer unes sesiones de clasificación mui perriba de lo que s’espera del so Williams. Nun ta pudiendo treslladar esos resultaos a los domingos, y n’Imola vímoslu cometer un erru que lu dexó fuera del gran premiu y una imaxe desconsolada d’él llamentándose, sobre too pola oportunidá real que tinía de sumar el so primer puntu. Col so futuru aseguráu pal añu viniente en 2021, cuidamos que Russell entá tendrá tiempu d’atropar dalgún nes carreres que queden. Ta mereciéndolo.

Nun foi tampocu’l fin de selmana pa Verstappen. Rodaba nos puestos de podiu tres una parada y un pinchazu que lu dexaron en la graviella y fuera de carrera. Albon consiguió puntos, pero nun amosó’l rendimientu esperáu, y pesie a que nel equipu continúen respaldándolu, los rumores sobre’l so futuru siguen siendo grandes. Nun hebo allegría pa Racing Point tampoco, que nun acabó la carrera más que con Pérez. Sí tienen motivos pa sorrir en Renault, que repitieron podiu con Daniel Ricciardo y confirmen la bona evolución del equipu francés nes últimes selmanes. La batalla con McLaren, Racing Point y Ferrari ta más viva que nunca con Renault en tercer llugar sumando 135 puntos, McLaren (que nesta carrera puntuó con dambos pilotos en sétimu y octavu llugar) y Racing Point empataos xusto detrás con un puntu menos, y Ferrari en sextu llugar con 103. L’equipu italianu nun sal del pozu nel que ta, y un erru nuna parada condicionó la yá probe carrera de Vettel. Leclerc tuvo dalgo más de fortuna y pudo sumar puntos (foi quintu) que paez que saben a pocu sobre manera cuando son en casa. Alfa Romeo tuvo motivos pa tar alegre, con Räikkönen sumando en novenu llugar y Giovinazzi décimu. Anque de manera discreta, l’equipu ta sabiendo aprovechar les oportunidaes pa sumar tolo que pueda y dir metiendo distancia colos puestos caberos de la clasificación de constructores qu’agora ocupen Williams y Haas. La distancia con Alpha Tauri ye imposible, pero a lo menos saben que tienen la capacidá de nun acabar l’añu últimos.

Recoyemos los aperos y ponemosnos en camín hacia Turquía, otru circuitu que retorna al calendariu formuleru depués de dellos años d’ausencia.

Nun hebo sorpreses no cimero, pero a lo menos el gran premiu de Portugal dexonos l’escenariu d’un circuitu que había tiempu nun percorríen los F1. Hamilton algamó les noventa y dos victories, lo que lu pon como’l pilotu con más victories de la historia de la F1, dexando yá en segundu llugar a Michael Schumacher. El pilotu de Mercedes desenvolvió una carrera al estilu que nos tien avezaos, anque per un momentu paeció que podía ser Bottas quien camudara les tornes. Sicasí, el finlandés sigue amosando qu’entá nun dio cola clave pa poder batir al so compañeru d’equipu.

Hamilton salía de la pole y tuvo una salida bona, anque tamién la tuvieron los sos rivales, sobre manera Carlos Sáinz que pudo llegar a ponese en zona de podiu dende bien ceo. El futuru de la carrera, sicasí, nun diba ser tan bonu pal pilotu madrilanu que nun fizo una mala carrera pero quedó fuera de los tres primeros puestos. McLaren nun pudo aprovechase de la debilidá de Racing Point, que nun pudo rematar la carrera más que con Stroll y que vio cómo Pérez tenía un incidente con Verstappen bien ceo nel gran premiu. Carlos Sáinz acabó sextu pero los dos Renault puntuaron mientres que McLaren namás lo fizo con Sáinz, siendo Norris décimoterceru. La llucha polos puestos cimeros del mundial de constructores ta cada vegada más disputada.

Hai que rescamplar el resultáu de Charles Leclerc, que foi cuartu con un Ferrari al que continúa sacando más rendimientu del real. El so compañeru Sebastian Vettel entró en puntos pero sólo pudo ser décimu. Sabemos que la so cabeza yá ta puesta na temporada viniente, pero de xuru l’alemán echa de menos tar no cimero de les clasificaciones.

Tamién foi reseñable l’actuación de Pierre Gasly, que nun dexa de reivindicase carrera tres carrera, quedando les más de les vegaes per delantre del que foi’l so sustitutu Alexander Albon con un coche, en teoría, superior al del francés. El futuru del tailandés ta cuestionáu yá que nun ta siendo capaz de ponese al altor del so compañeru y munches vegaes nin siquier de los dos compañeros del equipu filial.

Dexamos yá atrás les tierres portugueses pa emprender el camín a Italia, a ún de los circuitos más míticos de la historia de la F1. Caminamos agora pa Imola.

Yá dende bien ceo, el gran premiu d’Alemaña dio que falar. El vienres el borrín yera tanto que nun se pudo correr nenguna de les dos sesiones de llibres, y dexóse too pal sábadu. Nesti fin de selmana, iguóse un récord, tornó al podium dalguién qu’había tiempu nun lu pisaba y un pilotu acabó faciendo una sesión de clasificación y un gran premiu cuando’l vienres nin siquier sabía que diba montar nel coche. La carrera tuvo dellos momentos interesantes y too xunto dexó un bon tastu nel retornu de la F1 al Nürburgring.

Un vieyu conocíu tornó a montar nun coche de F1, dalgo que yá vimos hai delles carreres. Lance Stroll tuvo de ceder el so volante a Nico Hülkenberg, qu’esti añu ta teniendo más protagonismu del que de xuru cuidaba tener cuando quedó ensin asientu hai unos meses. Sicasí, tuvo un llabor complicáu. El sábadu nun pasó de ser últimu, anque’l domingu nun lo fizo mal.

D’Alemaña quedámonos col bon rendimientu amosáu demientres un tiempu por Bottas, qu’acabó, sicasí en deceición cuando tuvo d’abandonar por un problema col MGU-H. Hamilton nun desaprovechó la oportunidá de sumar otra victoria que lu pon a la par con Michael Schumacher con noventa y ún. El pilotu inglés, que nun salía de la pole, tuvo una bona actuación que lu colocó no cimero del podiu.

El restu de la carrera trescurrió con muncha batalla nes posiciones medies de la tabla. McLaren tuvo a piques de tornar al podiu, pero Norris tuvo d’abandonar por problemes col so coche. L’equipu inglés entama a perder tarrén colos sos rivales, sobre manera con Renault, que por fin xubió al podiu con Ricciardo, que foi terceru nesta carrera. Red Bull ocuparía’l segundu llugar.

Foi una carrera bien interesante, con dellos abandonos, pero en xeneral bastante competición ente tolos pilotos. El Nürburgring nun deceiciona. Cuidamos que’l so retornu valga pa poder convencer a los que manexen los filos de la F1 de que precisa tar ente les carreres del calendariu. La siguiente parada va llevanos a otru circuitu nuevu, pero eso va ser dientro de dos selmanes.

El de Rusia nun ye un circuitu especialmente llamativu, y les carreres ellí tampoco nun son, de normal, d’eses que queden na memoria p’años y años. Sicasí, siempre ye quien a dexar dalgo que nos permite esfrutar demientres los coches rueden pel so trazáu. Amás, el fechu de que la pole nun seya garantía de victoria, tamién ayuda a crear más espeutatives. 2020 tampoco nun deceicionó.

Con un sábadu que siguió un pocu lo previsto, Hamilton en pole, Verstappen detrás y Bottas terceru, confirmándose que Ferrari nun llevanta cabeza y que la parte medio de la tabla ye la que nos da tola emoción esti añu, partimos un domingu soleyeru nel que podría ser el gran premiu nel que Hamilton igualara en victories a Michael Schumacher.

Sicasí, el domingu yá empecipió mal pal pilotu inglés, pues recibió una penalización de diez segundos por facer una salida nun sitiu que los comisarios xulgaron que nun yera adecuáu. Esta penalización diba condicionar la so carrera dende bien ceo y anque entá fue quien a quedase col podiu, tuvo de ser nel tercer escalón. De la so desgracia aprovechóse Bottas, que salía terceru pero que, como comentemos na previa, tien bastante bona mano en Rusia. La so victoria, que yá vagaba, priva a Hamilton de seguir atropando victories y dexa pa más alantre l’igualar al Schumacher. Sicasí, Mercedes como equipu nun falla y ye posible que nel prósimu gran premiu yá seyan campeones del mundial de constructores. Pal de pilotos vamos tener d’aguantar un pocu más.

La salida del gran premiu foi bastante intensa pa lo que nos tienen avezaos les últimes carreres. Hamilton y Bottas salieron bien, dexando atrás a Verstappen, qu’aguantó los ataques de Ricciardo que salía per detrás y tamién de Sáinz. Sicasí, hai una probabilidá del 80% de que salga un coche de seguridá na primer vuelta en Sochi, y esti domingu nun foi esceición. Per un llau, Sainz, que nun intentu de respetar les indicaciones con bolardos que pon direición de carrera, acabó chocando contra una de les barreres, atravesáu en pista y fuera de carrera. Per otru, Lance Stroll, que tamién acabó viendo de cerca les barreres pero esta vegada depués de recibir un golpe per detrás del coche de Leclerc. Fueron los dos únicos abandonos que vimos esti domingu que concentró tolos incidentes nel principiu de carrera. Hebo dalgún otru sustu, pero nada que provocara más qu’un coche de seguridá virtual.

Dende la parada de Hamilton, na que tuvo que servir la penalización Bottas nun diba abandonar el primer puestu hasta ver la bandera a cuadros. Podemos dicir que tuvo una carrera relativamente tranquila pa lo que suelen ser les sos victories, que tienden a ser bastante peleaes. Nun sabemos si, ensin penalizar Hamilton, el finlandés tuviera ganao tamién. Nes entrevistes él dicía que sí, puesto que’l coche rodaba mui bien.

Per detrás de los tres primeros, acabó Pérez, con una carrera discreta pero mui correuta y siempre cola vista puesta nel so futuru na F1. De xuru que si sigui sumando como’l domingu, nun va dexar de tener ufiertes pa 2021. Renault prometía más de lo que foi quien a dar, anque hai que reconocer que Ricciardo tuvo penalización de cinco segundos por nun respetar les indicaciones de los comisarios. L’australianu foi quintu y Ocon terminó sétimu. Les bones noticies pa ellos ye que McLaren nun puntuó y Racing Point sólo con Pérez.

Ferrari tuvo un fin de selmana, en xeneral, pa olvidar. La clasificación del sábadu foi un desastre pa dambos pilotos, anque foi más llaceriante lo de Vettel que quedó fuera por un accidente. Leclerc nun pudo nin pasar a Q3. Sicasí, el pilotu monegascu tuvo una actuación bastante curiosa y quedó sextu, esprimiendo al másimu un coche que nun dexa de dar dolor de cabeza al equipu italianu. Vettel, pel so llau, acabó nel puestu décimoterceru.

Más allegría hebo en Toro Rosso, que puntuó con dambos pilotos (que quedaron per delantre d’Albon) y suma y sigui. Menos suerte hubo en Alpha Romeo que quedó fuera de los puntos con Giovinazzi nel puestu once y Räikkönen nel catorce, mesmo que Haas, que terminó nel doce con Magnussen y nel diecisiete con Grosjean. Malos tiempos pa los motores Ferrari.

Pa zarrar, comentar que pesie a que los resultaos probes, Williams nun fizo una mala carrera. Russell continua siendo la referencia del equipu, pesie a que nesta ocasión quedó per detrás de Latifi. Entavía queda muncho que trabayar, y les futures carreres en circuitos nuevos pueden ser una esperanza pal equipu inglés.

Recoyemos too en Rusia y ponemosnos en marcha pa dir hasta Alemaña, al míticu circuitu de Nürburgring pal siguiente gran premiu. Esta vegada va tocar esperar otres dos selmanes mientres los equipos van pensando n’afrontar la siguiente tanda de carreres.

Paecía complicao igualar lo que vimos en Monza hai siete díes. Pero Italia ta empeñada en pasar a la historia de la F1 nesti 2020 dándonos dos bonos espectáculos en dos entornos estremaos. Mugello estrenóse na categoría reina del deporte de motor y trunfó.

El resultáu nun dexa ver quiciás la bona carrera que tuvimos el domingu. Sí, ganó Hamilton, sí depués d’él llegó Bottas. Pero lo que asocedió ente la vuelta 1 y la 59 da pa muncho. Dos banderes coloraes, accidentes múltiples, adelantamientos y más adelantamientos, y un circuitu con dalgunos tifosi nes grades a los que Ferrari nun pudo contentar tampoco nesta ocasión.

Bottas dominó nes tres sesiones de llibres y apuntaba pole pal sábadu pero, como davezu, mostrose insuficiente énte la vuelta que fixo Hamilton. Terceru foi Verstappen y pintaba que la carrera nun diba ser mui distinta de dalgunes que tenemos visto nel pasáu, con estos tres pilotos mandando no cimero de la parriella. Hai que facer notar el quintu puestu de Leclerc, qu’esprimió’l so Ferrari nuna fecha importante pal so equipu: el so gran premiu númberu mil.

El domingu vimos hasta tres salides: la primera, ganóla Bottas y perdióla Hamilton, que salió mal y perdió posiciones, anque nun tardó en recuperase. Otru que tuvo una mala salida foi Verstappen. L’equipu tuvo de trabayar nel so coche hasta dellos minutos primero de ver les lluces coloraes del semáforu y nun foi raro velu perden puestos na salida. Quiciás lo que nun esperábemos, nun añu que ta siendo bastante tranquilu nes salides, yera l’apelotonamientu de la primer vuelta, na que Verstappen y Gasly quedaron fuera (la grava, vieya conocía que cásique escaecieramos yá), y otros pilotos sufrieron daños, como Vettel o Räikkönen. Esti primer incidente provocó que saliera’l coche de seguridá, momentu que dellos pilotos aprovecharon pa parar a cambiar gomes ya iguar daños.

La primer bandera colorada vieno n’entrando’l coche de seguridá de vuelta al garaxe. Bottas llideraba la carrera y, como suel ser vezu, quien ta no cimero marca l’arranque de la carrera cuando marcha Maylander de pista. Tamién suel ser vezu que’l primeru aguante tolo posible y arranque darréu, faciendo por pillar a quien lu sigue ensin posibilidá de siguilu. Foi lo que’l pilotu de Mercedes tentó de facer. El problema foi que los pilotos que rodaben más atrás, en viendo la bandera verde, aceleraron de más, provocando un accidente múltiple nel que munchos pilotos se vieron envueltos y quedaron fuera: Giovinazzi, Latifi, Sáinz y Magnussen vieron ehí terminada la so carrera nun momentu de caos énte’l que naide, nin siquier los pilotos, daben creitu. La bandera colorada nun tardó n’apaecer por cuenta de los restos que dexaron los coches qu’amás tuvieron de ser retiraos de la recta de meta.

Segunda salida. Seis pilotos menos. Tolos güeyos tán puestos enriba de George Russell y la música de los posibles puntos, cada vegada más cerca de Williams. Nesta segunda salida, Hamilton yá nun tuvo problemes y adelantó a Bottas rápido, poniendo distancia ente él ya’l so compañeru d’equipu, que tuvo cásique tol gran premiu buscando la forma de derrotar al inglés, ensin ésitu. Nel so primer tramu de carrera tuvo munchos problemes coles gomes. En tou esti tiempu, perdimos a otru pilotu, Esteban Ocon, por cuenta d’un sobrecalentamientu de los frenos.

Bottas naguaba por un coche de seguridá que-y diera una parada de baldre pa camudar les gomes que llevaba y que taben dando-y problemes cuando, na vuelta 43 Lance Stroll tuvo un pinchazu y acabó na grava y chocando contra les barreres. Otra bandera colorada, esta vegada pa iguar les proteiciones. Nesti momentu namás Ferrari y Mercedes teníen a dambos pilotos entá en pista. Tercer salida. Hamilton gana otra vuelta a Bottas y yá nun diba dexar el primer puestu hasta ver la bandera a cuadros. Quedaben doce pilotos y George Russell tinía una posibilidá real de puntuar. Sobre manera, depués d’una penalización a Kimi Räikkönen por una maniobra peligrosa a la hora d’entrar nel carril de pit. El finlandés recibió cinco segundos de penalización, que se diben sumar al final de la carrera y demientres les últimes vueltes, George Russell fizo por quedar a menos de cinco segundos del pilotu de Alfa Romeo pa poder llegar a punto. Sicasí, nun foi posible ya’l pilotu inglés quedó nel puestu once, per delantre de Grosjean y cerca de Vettel, que foi décimu.

Alex Albon sumó a la fin el so primer podiu depués de munchos intentos y munches duldes, aprovechando la oportunidá de tener fuera al so compañeru y resistiendo los ataques del Renault de Ricciardo, que tuvo de conformase con ser cuartu. Racing Point foi quintu con Sergio Pérez y McLaren sextu con Norris. Per detrás, Kvyat en sétimu puestu, Leclerc octavu, sumando puntos importantes anque insuficientes pa Ferrari, Räikkönen, qu’en verdá quedara per delantre de Leclerc anque llevó penalización como yá diximos.

Dexamos Italia con un bon tastu na boca depués de dos grandes premios mui especiales, ya’l primeru con xente de vuelta nes grades. La siguiente parada ye Rusia, el circuitu de Sochi. Tornen los circuitos conocíos y taremos sollertes a lo que pueda facer Valtteri Bottas nel asfaltu rusu que tan bien se-y da. Pero eso va ser dientro de dos selmanes.

2008. Nun circuitu de Monza moyáu, Sebastian Vettel gana la so primer carrera en F1 col equipu Toro Rosso.
2020. Nun circuitu de Monza secu pero vacíu de tifosi, Pierre Gasly gana la so primer carrera en F1 col equipu Alpha Tauri, enantes nomáu Toro Rosso.
La historia repítese.

Y si dalgo tenía falta la F1 yera d’una historia asomeyada a la qu’en 2008 protagonizó Vettel. Si amás el protagonista ye ún de los pilotos que más necesitaba reivindicase depués de tolo que tien pasao nos últimos meses, tenemos los ingredientes perfeutos pa una gran carrera. Podemos añadir que nengún de los tres grandes equipos subió al podiu y qu’esta tamién foi la ocasión na que los equipos de la parte medio de la tabla daben un puñetazu na mesa pa dicir qu’ellos tamién pueden ganar carreres y subir a podios.

Pudiera paecer que la carrera foi intensa de principiu a fin. Lo cierto ye que la primer mitá foi bastante discreta, casi tirando a aburrida, y cásique podíemos ver yá a Hamilton no cimero del podiu. Bottas tuvo una salida mui floxa y andaba perdíu pol sextu puestu con Verstappen faciendo por rondar a Hamilton y Carlos Sáinz aprovechando’l tirón de clasificar terceru’l sábadu, pero consciente de que contra Mercedes y Red Bull diba tenelo complicao. Ferrari, n’otru sábadu negru, andaben entavía más abaxo. De fechu, el primer abandonu protagonizolu Vettel que quedó ensin frenos. El suma y sigue del equipu italianu nun paez tener fin.

Otru de los qu’abandonó y desencadenó involuntariamente lo que diba venir depués en carrera foi Kevin Magnussen. Un problema col motor del coche lu dexó tiráu casi a la entrada del carril de pit y provocó un coche de seguridá que Hamilton rápidamente aprovechó pa parar. Diose la circunstancia de que’l coche de Magnussen, al tar au taba, obligó a zarrar el carril de pit, y asina se marcó a los pilotos con señales luminoses (en forma de cruz colorada) en pista. Nin Hamilton nin Giovinazzi fueron avisaos polos sos equipos de la prohibición y tuvieron que ser penalizaos, con un stop & go de diez segundos.

Enantes de que se decidiera la penalización d’estos dos pilotos, Charles Leclerc perdía’l coche d’atrás nuna curva y acababa nes proteiciones con un gran accidente del que salió ensin mayor problema pa él, anque les proteiciones tuvieron de reparase. La reparación provocó una bandera colorada qu’obligó a tolos pilotos a entrar en el carril de pit y aliniase n’orde de posición. Nesi momentu súpose la penalización de Hamilton y Giovinazzi que ponía yá en duldes esa victoria tan folgada de la que falábemos enantes.

De fechu, tres la bandera colorada, tuvimos una carrera totalmente distinta. Non sólo penalizó Hamilton, que foi quién a recuperar y acabar en puntos. También esta bandera colorada perxudicó a Red Bull, a dambos pilotos, que nun fueron a puntuar. Y no cimero tres protagonistes: Pierre Gasly, Carlos Sainz y Lance Stroll. Ellos tres diben tener tola atención el restu de la carrera: el francés por tar peleando pola so primer victoria en F1 nun gran premiu nel que Red Bull nin siquiera taba en puntos; el madrilanu tamién por llegar a ganar una carrera que yá pintaba bien dende’l principiu anque quiciás non tanto como pa suañar cola victoria. Y Lance Stroll, que foi quien a xubir al podiu y tuvo na so mano dalgo más, pero acabó desinflándose.

Les últimes vueltes fueron tenses pa los dos pilotos d’arriba, y de fechu, con un par d’elles más, ye fácil qu’en cuenta de Gasly fuera Sáinz el ganador. Pero’l francés pudo y supo imponese con un coche lixeramente inferior, nun circuitu nel que nun tinía nada que perder pero too que ganar. La gran pena foi que, siendo Alpha Tauri un equipu italianu, tuviera de celebrase ensin públicu. A falta de Ferrari, buenu ye un Alpha Tauri y de xuru la filial de Red Bull diba agradecer l’apoyu de los fans italianos.

El domingu non sólo ganó Gasly, ganó tamién la F1. Ganemos toos. Porque aparte d’una gran carrera, vimos a un pilotu que yá merecía una alegría algamar lo cimero del podiu, y éstes son les histories que presten. Mercedes ta mereciendo les victories y tar no más alto de les clasificaciones, pero ye verdá que cuando tenemos carreres nes que los protagonistes son otros, la F1 respira y dexa atrás los rumores d’aburrimientu o monopoliu de les fleches platiaes. Axallá nun seya esta la única carrera na que podamos celebrar novedaes como les d’esti eventu en Monza.

Nun vos despisteis. Tamos metíos nuna tanda de tres grandes premios n’Italia que nos lleva agora a la Toscana, al circuitu de Mugello.

De normal, una carrera como la de Bélxica nun nos diría muncho del campeonatu teniendo per delantre la segunda parte de la temporada, sicasí, esti 2020 tráxonos un gran premiu más bien tranquilu pero del que podemos sacar dalgunes conclusiones: la primera ye que Hamilton paez tar camín del so sétimu campeonatu del mundu. La segunda, que Ferrari en vez de meyorar va a peor con cada gran premiu, yá nun ye sólo cosa de Vettel. La tercera, que Williams podía tar más arriba de lo que ta con un poco más de suerte.

Daben agua pal gran premiu pero nunca nun asomó, tampocu’l sábadu, polo que tuvimos una sesión de clasificación que namás tuvo como sorpresa que Ferrari quedaron fuera de la Q3. Si pensamos que na tercer tanda d’entrenamientos Vettel quedara últimu y Leclerc nun lo fixera muncho meyor, el sábadu foi daqué positivu pa la Scuderia. El domingu confirmemos que, pesie a tener la oportunidá de metese en puntos (Leclerc tuvo ente los diez primeros parte de la carrera), l’equipu italianu necesita un cambiu mui grande si quier aprovechar dalgo d’esta temporada.

El sábadu, Hamilton fíxose con otra pole. Bottas tuvo de conformase cola segunda plaza. El finlandés paecía relativamente contentu col so puestu y tuvo oportunidaes en carrera, pero la realidá ye que Hamilton sabe bien cómo tenelu controláu en pista. Verstappen acompañó, otra vegada más, a los Mercedes nes primeres posiciones de la parriella. Hai que rescamplar la bona sesión de Renault, con Ricciardo cuartu y Ocon sextu, perriba de dambos McLaren.

El domingu, ensin agua, tuvimos una salida bastante tranquila. Hamilton almitió tener una salida probe, pero eso nun foi impedimentu pa caltener la so posición, que nun diba abandonar en tola carrera. El pilotu inglés comentaba que nun foi una carrera tan simple como podía paecer a la xente, y que tuvo de trabayalo en pista. La verdá ye que yá suma cinco victories de siete carreres y yá tien una ventaya de cuarenta y siete puntos col segundu pilotu, Max Verstappen nel mundial.

Tres una salida, como comentemos, bastante tranquila, tuvimos d’esperar a más adelantre en carrera pa empezar a vivir momentos daqué más intensos. Tuvimos dos abandonos, el de Giovinazzi y el de Russell. Una rueda mal afitada del pilotu italianu d’Alfa Romeo fíxolu abandonar y la mala suerte acompañó a George Russell que se topó con ella en pista. Nengún de los pilotos sufrió nengún problema sacante’l fechu de quedar fuera de carrera.

Ún de los protagonistes del gran premiu foi, probablemente, Pierre Gasly que sigui empeñáu n’amosar que Red Bull equivocóse al quita-y el volante nel primer equipu y de momentu ta dexando bonos momentos pesie a conducir ún de los coches de la parte medio de la tabla. Si tenemos que falar d’un equipu protagonista, ensin duldes, tien de ser Renault. Ye verdá que ye la primer vegada que vemos a dambos pilotos con un bon rendimientu, dientro de los puntos ensin los problemes qu’otres vegaes los tenemos visto carecer. Queda ver si van ser quien a replicalo en siete díes en Monza.

Nun podemos escaecer a Carlos Sáinz. El pilotu madrileñu nun tomó la salida por un problema col escape, duru golpe pa los intereses de McLaren que namás sumó puntos con Norris, que quedó sétimu. Tampoco Racing Point lo tuvo meyor y anque dambos pilotos puntuaron, sólo pudieron ser novenu (Stroll) y décimu (Pérez). La pelea pol cuartu puestu nel campeonatu d’equipos sigui mui competíu y si Renault por fin despertó, ye posible que les prósimes carreres seyan bien emocionantes.

El resume d’esti gran premiu de Bélxica ye bien cenciellu: faltu de momentos intensos como en grandes premios pasaos, Hamilton gana, siguíu del so compañeru d’equipu, cada vegada más lloñe de cualquier posibilidá de ganar el campeonatu, y de Max Verstappen, quiciás l’únicu pilotu que nestos momentos pudiera desafiar a Hamilton nesa llucha. La realidá ye que, tan pronto como en cosa de dos selmanes, l’inglés podría zarrar esta temporada y sumar asina’l so sétimu títulu. Pero pa eso tendremos d’esperar siete díes y aterrizar en Monza pal gran premiu d’Italia.