Category: Temporada 2019

Paez mentira que yá teamos a cuatro carreres de rematar esti 2019 cuando hai non munchu tiempu tábemos arranando por ver a los coches otra vegada n’Albert Park. La temporada pasa igual de rápido que van los F1 y yá tamos nel gran premiu de México, ún de los grandes eventos del calendariu. Anque’l circuitu en sí mesmu nun seya de los más emocionantes, les carreres del pasáu y l’ambiente que se xenera yá faen que pague la pena. Aparte, yá foi delles vegaes l’escenariu au conocemos quien ye campeón del mundu. Esti añu, otra vegada, Lewis Hamilton tien nes sos manes consiguilo equí. Precisa sacar catorce puntos a Bottas, que ye l’únicu pilotu con posibilidaes de ser campeón xunto al inglés. El mesmu pilotu almite que ye dalgo complicao y que viniendo d’una victoria en Xapón, Bottas ye entá un rival difícil de batir. Sicasí, la realidá ye que si non en México, sedrá na siguiente carrera cuando’l pilotu de Mercedes consiga’l que yá ye’l so sextu mundial.

Con gran parte de los equipos yá enfotaos na preparación del coche de 2020, México supón ún de los grandes premios onde se combinen la posibilidá de ver grandes actuaciones de Red Bull y sobre manera Ferrari esti añu, y con Mercedes faciendo por compensar esa superioridá de los sos rivales. En Mercedes tán un pocu perdíos pola evolución de Ferrari col pasu los meses, la so recuperación que lu permite agora acumular poles cuando enantes nin siquier podíen averase a esi primer puestu. Ta claro que la meyora del equipu italianu llega tarde pero Vettel reconoz que ye positivo rematar asina l’añu pa garrar con fuercia la temporada viniente y na que yá toos piensen. Les rectes de México pueden ayudar a que la Scuderia, col alemán o col so compañeru, triunfen equí.

Sicasí, nun podemos descartar a Red Bull. Ye verdá qu’esti añu van con Honda y tovía nun conocemos el so rendimientu nestes condiciones. Nun podemos escaecer que son especiales, destacando sobre manera l’altura y la so influyencia nos coches. Vettel falaba de cómo la eficiencia y tener un bon coche ye equí quiciás menos importante en favor d’una bona preparación d’esti p’afrontar un circuitu tan peculiar. Siguiendo colos pilotos de Red Bull, Verstappen tien un bon historial equí, pero esti añu ye too una incógnita. Albon nun quier comprometese a la hora de xulgar la so actuación, puesto que ye’l so debú equí y anque nel pasáu Red Bull fuera bien, les coses son distintes agora.

Pela zona templada de la tabla de constructores, McLaren paez tener casi nes sos manes el cuartu puestu. Depués de la descalificación en Xapón de Renault (por usar un sistema de frenos qu’incumplía les regles) y la perda de los ocho puntos que sacara l’equipu francés, paez que los de Woking tienen cenciello conservar la so posición. De fechu, ye posible que fagan medrar la distancia col restu en México por cuenta del bon rendimientu que s’espera amosen dambos pilotos.

Per detrás d’ellos, tres equipos principales peleando por quedar perriba del restu: Renault, Toro Rosso y Racing Point. L’equipu francés tien la ventaya pero una bona carrera del restu puede camudar les coses. En Racing Point tán motivaos, sobre manera nel casu de Sergio Pérez, por correr en casa, anque son conscientes de qu’esti circuitu nun ye’l meyor pa ellos. Toro Rosso y Gasly en particular aterricen en México con ganes de replicar lo que ficieron en Xapón. Dende’l so “descensu” a Toro Rosso vemos al francés muncho más motivau y con meyores resultaos.

Pela parte baxo, Alfa Romeo nun se despista y sigui pasín ente pasu sumando y faciendo bones carreres, anque insuficientes pa ponese al altor de los de más arriba. Haas pel so llau cellebra el centésimu gran premiu de Magnussen en F1 col enfotu de facer un bon trabayu, pero siendo realistes de que les dificultaes qu’acarreten dende l’aniciu de la temporada siguen ehí.

Fálase nel paddock de que les coses en Williams con Kubiça nun van tolo bien que se piensa y que decisiones de los pasaos grandes premios nun tán ayudando a que la rellación ente pilotu y equipu vaiga bien. El fechu de que’l polacu vaiga salir de la escudería a final de la temporada tampoco nun ayuda. Sicasí, nun ye too malo pa Kubiça yá que Haas valora la posibilidá de contratalu como pilotu de simulador pala temporada viniente. Demientres, otru gran premiu complicau ente ellos. Na primer sesión de llibres Nicolas Latifi va a tar a los mandos del Williams.

Nun podemos escaecer que son varios los pilotos que debuten equí. Yá mentemos a Albon, pero tamién s’atopen nesa situación Norris, Russell, Giovinazzi (anque yá fexo debú oficiosu en sesiones de llibres) y, curiosamente (por ser veteranu) Robert Kubiça.

Anque nun seya’l trazáu más atractivu, les rectes llargues y la seición del estadiu siempre motiven y el fechu de que se tenga convertío nuna de les cites preferíes de los pilotos y los equipos yá diz muncho. Les vueltes equí, setenta y ún en total, nun son llargues, lo que da quiciás esi puntín d’emoción qu’a vegaes falta nos que tienen vueltes que cubren más distancia.

N’horariu de tarde, visitamos l’Autódromo Hermanos Rodríguez por sexta vegada na so reaparición nel calendariu (y con un futuru de tres más per delantre). Estos son los horarios y la información básica del circuitu:

Y equí vos dexamos tola información sobre les gomes que se van usar demientres esti gran premiu:

Pasó’l tifón Hagibis, dexando un sábadu ensin competición de F1 y pasó’l gran premiu de Xapón, dexando una pole que nun esperábemos y una victoria que, anque nun estraña, nun yera quiciás la que taba nes quinieles de la mayoría de nós. Aparte, pasó lo que sabíemos cuantayá, sobre manera col aniciu de la temporada, que diba pasar tamién esta temporada y por sexta vegada siguida: Mercedes yá son campeones del mundial de constructores. A Hamilton namás-y queda “desfacese” de Bottas p’algamar tamién él el so sextu mundial. Col resultáu de güei nin los pilotos Ferrari nin Verstappen tienen yá posibilidaes matemátiques, quedando fuera yá dafechu de la llucha por esi campeonatu. Y anque entavía Valtteri Bottas puede ser campeón, la lóxica diznos que’l so compañeru d’equipu va ser el que, nun tardando, se faga con esti títulu esta temporada.

CLASIFICACIÓN

Foi un domingu intensu. A les diez de la mañana hora llocal (tres de la mañana equí) tuvimos la sesión de clasificación, que foi cancelada’l sábadu por cuenta del temporal que s’averaba. Énte les previsiones tan negatives optose pola prevención y mover la clasificación pal domingu, hores primero del gran premiu, y por cancelar dafechu la sesión de llibres.

Les consecuencies d’esto fueron que dos de los pilotos que na clasificación sufrieron accidentes (y causaron banderes coloraes) esto ye Kubiça y Magnussen, tuvieron a los sos equipos trabayando contra’l reló pa poder tener los coches a puntu. Kubiça salió dende’l pitlane y Magnussen últimu por tener de camudar la caxa de cambios y penalizar. L’accidente del polacu foi, aparte d’aparatosu, tempranu. Nengún pilotu marcar tiempu cuando ocurrió. El del danés foi menos espectacular anque tamién foi pronto dientro de la Q1, lo cual, anque condicionó en parte les sesiones del restu de pilotos nun foi tan determinante como si tuviera sío más alantre. Destacamos dientro de la Q1 que Stroll pasó a Q2 y los problemes de Renault pa clasificar. Ricciardo nun pasó de la primer sesión y Hülkenberg foi últimu na segunda, con problemes bultables nel coche.

Pa compensar el desastre de Magnussen, Grosjean entró ente los diez primeros col so Haas, mesmo que dambos McLaren. La pole quedó pa Sebastian Vettel, mesmo que’l récor del circuitu. Como dicíemos enantes, foi inesperada por ser Mercedes quien marcara’l ritmu’l vienres. Sicasí, les condiciones del circuitu nun yeren les mesmes y fueron de fechu los dos Ferrari los qu’ocuparon los dos primeros puestos de la parriella en carrera, con Mercedes per detrás, Bottas per delantre de Hamilton. El restu de pilotos clasificó en pares, con los dos Red Bull xuntos, mesmo que los McLaren. Gasly y Grosjean zarraron la Q3.

CARRERA

Hores depués de la sesión de clasificación, entamaba la carrera. Tres la pole inesperada de Vettel asomaben les duldes por ver si’l cambiu nes condiciones de la pista diba beneficiar a Ferrari o si lo de la clasificación fuera namás qu’un fechu puntual. Hai que partir de primeres de que la carrera nun foi vistosa nin tan entretenida como les pasaes. Lo más interesante tuvo na salida y quiciás podemos dicir que nesi momentu quedó un pocu definida pues foi tolo que pasó nesos primeros metros lo que llueu cuayaría n’apaeciendo la bandera a cuadros.

La salida de Vettel foi mala. Llegó a movese enantes de que’l semáforu s’apagara pero los comisarios nun interpretaron que se beneficiara de dalguna manera d’ello. Ye más, perdió la posición con Bottas que reaicionó rápido p’adelantalu y ponese tamién per delantre de Leclerc. El pilotu monegascu deceicionó un pocu tamién cola so salida, y na primer curva taba terceru per detrás del so compañeru y peleando con Verstappen y Hamilton por posición. Col historial que tienen tanto Leclerc como Verstappen yera fácil que pasara lo que terminó pasando: a la gueta d’un espaciu que Leclerc nun dexó, Verstappen acabó saliéndose de pista depués de tocase col Ferrari. Leclerc acabó col morru dañáu. Verstappen perdió abondes posiciones que yá nun pudo recuperar como pa lluchar pol podiu. Leclerc tuvo d’entrar a cambiar el morru (aparte de pol dañu en sí porque nun dexaba de dexar restos de coche en pista y otros pilotos yá se quexaben d’ello), camudando dafechu la estratexa de carrera que l’equipu tenía plantegada pa él.

Pero non sólo ellos fueron protagonistes. Los pilotos McLaren fixeron bones salides, poniéndose al altor de los Red Bull (Sáinz rodó bona parte de la carrera en cuartu llugar) ya nel casu de Norris, peleó con Albon por más que posición, yá qu’un accidente nel que’l pilotu de Red Bull nun dexó espaciu dalu al de McLaren, acabó con esti perdiendo tola oportunidá de metese en los puntos. De fechu, nin siquier vería la bandera a cuadros. Na vuelta quince, el Red Bull del holandés entró nel box pa nun salir yá.

Tres una salida llétrica, la situación foi estabilizando y les pieces del gran premiu moviéndose. Bottas taba nuna situación cómoda, metiendo distancia con Vettel y Hamilton, consciente de la importancia de la so posición nun circuitu como Suzuka. Pero lo interesante siguía pola cola. La parada de Leclerc y l’incidente de la primer vuelta de Verstappen llevó a que dambos pilotos volvieran a topase en pista, esta vegada nos puestos dieciséis y diecisiete. Nesta batalla, yá ensin accidentes, triunfó’l Ferrari de Leclerc, que conseguiría compensar l’eventu de la salida col pasu de les vueltes. De fechu, una de les partes que más interés tuvo na carrera foi precisamente ver los adelantamientos del pilotu monegascu nun circuitu como Suzuka que nun se presta muncho a ellos.

Un de los condicionantes d’esta carrera foi’l desgaste de les gomes. Hamilton sufrió muncho más que los sos rivales d’ella, y la distancia tanto con Vettel como, sobre manera, con Bottas, nun dexaba de medrar hacia la mitá del gran premiu. L’equipu duldaba que viendo esi desgaste la estratexa a una parada fuera a funcionar pa ellos y optaron por facer dos. Mientres, pela mitá de la tabla, Leclerc siguía escalando y aprovechando’l baille de paraes pa recuperar les posiciones que perdiera na salida.

La carrera trescurrió tranquila pa Bottas y tamién relativamente pa Vettel hasta los minutos finales, cuando la distancia con Hamilton yera mínima y el pilotu inglés tuvo a piques d’adelantalu, con namás dos vueltes pal final, siendo’l tráficu un elementu determinante nel desenllaz de les últimes vueltes. Los pilotos doblaos tornáronse en protagonistes involuntarios d’esta última batalla pol segundu llugar nel podiu, que ganó’l pilotu alemán.

Quedaría pal final l’últimu abandonu y accidente del gran premiu. Na vuelta cincuenta y tres, la última, el coche de Sergio Pérez acabó nes barreres depués d’un coche con Gasly, nuna maniobra bastante asomeyada a lo que víemos al principiu con Leclerc y Verstappen. El peor paráu nesta ocasión foi’l mexicanu, que nun pudo ver la bandera a cuadros.

La victoria quedó pues pa Valtteri Bottas, necesitáu yá d’una bona carrera na que pudiera xubise a lo cimero del caxón del podiu. Vettel foi segundu, que nun ye un resultáu malu pensando na salida que tuvo y en que nun foi penalizáu por ello. Hamilton, anque de xuru poco conforme col resultáu, atropa puntos que lu lliberen de Vettel, Verstappen y Leclerc, pa ponelu entá más cerca del so sextu títulu.

Albon salvó un pocu la imaxe d’Honda en Xapón col so cuartu puestu, siguíu de Sáinz, qu’otra vegada foi l’únicu en sumar pa McLaren pol incidente de Norris con Albon que lu dexó fuera de puntos. Renault iguaron el desastre del sábadu puntuando con dambos pilotos y Pérez, pesie al accidente, tamién entró en puntos, xunto a Gasly.

Otru día más pal escaezu en Haas. Grosjean nun foi quien a facer dalgo col décimu llugar del que partía na parriella y Magnussen tuvo momentos d’averase a los puntos, pero la clasificación de dambos dexa la sensación d’un resultáu mui probe. Alfa Romeo tampoco nun pudo puntuar y los Williams, como davezu, zarraron la clasificación anque esta vegada dambos coches vieron la bandera a cuadros.

L’incidente ente Leclerc y Verstappen considerose de mano incidente de carrera, pero la decisión camudó y dexóse pal final del gran premiu. Finalmente, Leclerc acumuló unes cuantes penalizaciones. Per un llau cinco segundos sobre’l so tiempu y dos puntos na so llicencia pol incidente con Verstappen. Per otru, pola decisión de permanecer en pista col coche dañáu, poniendo en peligro al restu de pilotos colos restos de coche que se diben soltando del so monoplaza, aparte de diez segundos más sobre’l so tiempu tamién foi penalizáu l’equipu con una multa económica de 25000€. El resultáu foi la cayida del sextu al sétimu puestu del pilotu monegascu, pa beneficiu de Ricciardo.

Sicasí, la posición del australianu ta en duldes poles protestes de Racing Point y Renault podría tener tamién dalgún tipu de sanción relacionada col incumplimiento de les regles no que cinca’l sistema de frenáu. Nel casu de que Renault llevara sanción, el beneficiau sedría, precisamente, el pilotu de Racing Point Lance Stroll. Taremos sollertes a la decisión que se tome dende la FIA.

Nun foi Suzuka un eventu memorable, pesie a tolo qu’arrodia a esti gran premiu. Sicasí, munchos van alcordase d’esta carrera: Vettel por recuperar la pole, l’equipu Mercedes por ser yá campeones del mundial de constructores, Leclerc y Verstappen por sumar otru incidente al so historial, y en xeneral tolos espeutadores por ser el fin de selmana de F1 ensin sábadu.

Ponemos agora la vista en México, au viaxamos en dos selmanes pa otru de los eventos que nos devuelve a los horarios de tarde nel tour americanu. Demientres llega’l día, equí vos dexamos tolos númberos del domingu en Suzuka:

Clasificación

Carrera

Hai carreres qu’añu tres añu, y asina demientres munchu tiempu, nun tienen falta de ser brillantes pa que tol mundu nagüe por viviles. Xapón ye ún d’esos escenarios que siempre saquen suspiros tanto a pilotos como a equipos y espeutadores. Entra en munches de les preferencies de quien sigue la F1 y ye ún de los destinos más escoyíos incluso pa la xente europeo. Too ello vien a dicinos la importancia que tien nel calendariu Suzuka.

A naide nun-y da más el madrugar, nin que nun llueva, nin que haiga pocu que ver na pista. Ye simplemente l’ambiente del circuitu lo que lu fai especial, y la xente. Los milenta fans que se concentren tolos años nel míticu trazáu xaponés son responsables tamién de qu’esti gran premiu se viva d’esta manera. Nun ye la primer nin sedrá la última vegada que sintimos a los pilotos emponderar l’actitú de la xente, la orixinalidá de les sos pancartes d’apoyu y la igualdá cola que animen a tolos pilotos. Nengún equipu nin pilotu se siente abandonáu en Suzuka.

Centrándonos no deportivo, Lewis Hamilton tien equí una de les papeles del añu pa casi facese col campeonatu. Nun ye l’únicu, pero l’inglés tien una rellación especial con esti circuitu y les sucesives victories n’él vienen a desplicanos un pocu’l motivu. Amás, Mercedes tien motivos pa sintise optimista equí depués de la sequía de poles y les victories escases dende la vuelta del parón braniegu.

Sicasí, ye posible que nun seya too tan cenciello como pinta. Los partes meteorolóxicos, siempre importantes en Xapón nesta época del añu, pronostiquen agua y aire fuerte (falábase incluso de tifones) que podríen condicionar los eventos del sábadu. Ello significaría suspender la sesión de llibres y mover la clasificación al domingu pela mañana, cuando se cuenta tener meyor tiempu. Como siempre, ye too duldes, pero l’alerta ta prevista y nun tenemos claro tampoco cuánto vamos ver los coches rodar siquier el viernes.

Con ello y con too, como dicimos, la carrera’l domingu ta prevista que seya en seco (pesie a tolo malo que lo da pa los díes previos). Sebastian Vettel señaló qu’esti ye ún de los sos circuitos preferíos (si non el que más) anque abúltanos difícil que, en condiciones normales, pase per delantre de los Mercedes. Lo mesmo podríemos dicir de Leclerc. Sicasí, nun podemos zarrar ninguna puerta a la escudería italiana viendo’l so dominiu nes últimes cites.  Sí tenemos interés en ver el rendimientu de los motores Honda en casa, sobre manera agora que tienen a dos equipos en pista y conociendo la importancia que tien pa ellos esti gran premiu. Red Bull, y a so manera Toro Rosso, tán casi obligaos a ufrir un bon espectáculu en Xapón pa que s’escaezan los años pasaos con McLaren que tantu dolor de tiesta levantaron.

Con o ensin agua’l domingu, la batalla pela parte medio de la tabla va siguir siendo quiciábes lo más interesante pa ver no que cinca a los puestos qu’entavía nun tán decidíos. McLaren paez que yá tien casi nes sos manes esi cuartu puestu pero entá queden carreres y nengún despiste ye beneficiosu. El restu d’equipos con mayor o menor distancia ente ellos sí que nun pueden dar nengún pasu atrás si nun quieren vese relegaos na clasificación.

Damos el saltu a Xapón pa esfrutar ún de los clásicos pero, como davezu, va tocar madrugar. Equí vos dexamos tola información del circuitu y los horarios del gran premiu:

Y esta ye la información sobre les gomes que se van usar demientres el fin de selmana en Xapón:

Hai dellos grandes premios nos que más que falar de quién ganó o de quién fizo qué, centrámonos más n’aspeutos d’estratexa o d’actitú de los pilotos. Nesti casu, Ferrari lleva selmanes de protagonista de los titulares gracies al so rendimientu, sobre manera nel casu de Leclerc, y en Rusia tamién fueron protagonistes, pero por otros motivos.

SÁBADU

Tol fin de selmana, la Scuderia tuvo garrada la midida al circuitu. Pesie a que’l rendimientu de Mercedes y Verstappen nun pintaba mal, nun paecía que fuera ser bastante pa quita-yos la pole, como asina vimos. La sesión de clasificación allargose de más por un accidente protagonizáu por Albon que provocó bandera colorada. Kvyat nin siquier se vistió pa intentar clasificar, sabiendo que diba salir d’atrás coles penalizaciones. Tolos pilotos Honda tiníen dalguna penalización poles actualizaciones que trayía’l motorista xaponés (preparándose pa nun tener nenguna na prósima carrera en casa, Suzuka).

El parón nesta primer parte de la clasificación condicionó les vueltes de dellos pilotos, sobre manera Vettel que, sicasí, acabo entrando na siguiente fase depués de que too s’iguara y los coches tornaran a pista. En realidá, foi una sesión de clasificación bastante normal, siguiendo un pocu lo visto nes sesiones de llibres y con Hamilton namás siendo quien a pasar a Vettel pa facese col segundu puestu na parriella. Con Leclerc nun pudo y ye que’l monegascu clavó les dos vueltes que fexó na Q3 ameyorando la que ficiera de primeres cuando casi abultaba complicao siquier imitala.

Destacamos, otra vegada, a McLaren, con dambos pilotos ente los diez primeros. Tienen munchos motivos pa tar contentos pues esti fin de selmana confirmóse que pa 2021 van trabayar otra vuelta con Mercedes, terminando asina’l so compromisu con Renault. Coles pieces nel tableru, llegamos al domingu.

DOMINGU

Y la salida del domingu nun sorprendió a naide porque ye dalgo que tenemos visto nel pasáu en carreres en Sochi. Los pilotos tienen énte sí una recta perllarga na que los coches que salen nel llau izquierdu (esto ye los impares) suelen tener meyor salida que’l restu y asina lo vimos con Ferrari. Lo que nun sabíemos ye que los dos pilotos de la Scuderia tiníen que caltener les posiciones y nun adelantase aprovechando’l rebufu (nel casu de Vettel), compromisu que paez dambos pilotos adoutaron enantes del entamu de la carrera. Dende bien ceo taba claro que yera Vettel el Ferrari más rápidu y amosolo metiendo distancia al so compañeru y dexando a Mercedes llonxe tamién y a Leclerc llamentándose per radio de qu’aquello nun yera lo que s’acordara de mano. Pronto sintimos al equipu dicir que Vettel devolvería la so posición más alantre, faciendo medrar les duldes sobre lo que taba pasando. La insistencia del equipu facía que les ceyes se llevantaren más entá y les rempuestes negatives del pilotu alemán tamién ayudaben.

Pero Mercedes nun sólo tuvo de preocupase de Ferrari, tamién de McLaren, que tuvieron una de les meyores salides (y carreres) de la temporada con dambos pilotos. Anque finalmente les fleches platiaes caltuvieron la so posición énte Sáinz y Norris, foi ún de los momentos llamatibles del gran premiu. Per detrás, vimos a varios pilotos afeutaos por choques, perdes de morru de coche y pinchazos: Giovinazzi, Ricciardo y Grosjean tuvieron ún de los primeros accidentes y foi’l francés el primer pilotu n’abandonar. El xiru depués de la gran recta fexo qu’hubiera munchu contautu ente pilotos y foi equí au’l Haas salió pior. Sicasí, Ricciardo tuvo de pasar por boxes pa cambiar gomes porque pinchó una rueda.

A too esto, hai qu’añadir una penalización de drive through pa Kimi Räikkönen por adelantase a la salida. El pilotu finlandés intentó correxir l’erru pero viose claro nes imaxes que punxo’l coche en movimientu enantes de que les lluces del semáforu s’apagaren. Alfa Romeo en xeneral y Kimi en particular nun tán teniendo muncha suerte depués del parón braniegu.

Charles Leclerc foi’l primer pilotu Ferrari en parar, siguiendo un pocu lo visto en Singapur y alterando’l vezu de que seya quien va delantre’l primeru en pasar per boxes. Dos vueltes depués, el so compañeru d’equipu tresmitía por radio que les sos gomes traseres yá casi taben acabaes y que tinía falta de parar anque creyemos que l’alemán taba pensando en parar pa que nun-y pasara como a Leclerc en Singapur de salir per detrás. La vuelta ventisiete foi la escoyida pa la parada y la llercia de Vettel víase confirmada, salía per detrás del so compañeru d’equipu. Sicasí, nun diba dar más pues na vuelta siguiente a la so parada, l’alemán vio terminar la so carrera por un problema col coche, provocando un coche de seguridá que diba beneficiar enforma a los Mercedes, gracies a la parada de baldre que esta situación de carrera daba.

Col abandonu de Vettel sumábemos yá tres, con Ricciardo nun pudiendo tampoco ver la bandera a cuadros depués del accidente de la primer vuelta y pesie a la parada. A piques d’acabar el coche de seguridá pa Vettel, Russell acabó nel muru después de que dalgo rompiera nel so coche y al pocu’l so compañeru d’equipu tuvo d’abandonar. Un doble abandonu de Williams que nun viéramos entavía nesta temporada.

Depués de toos estos eventos, la carrera resumióse en Leclerc faciendo por compensar la estratexa del so equipu depués de la mala suerte del abandonu de Vettel y de que too se desdibuxara col coche de seguridá, pero nun valió pa muncho y Mercedes tornó a lo cimero del podiu con Hamilton primeru y Bottas segundu.

Enantes de rematar la carrera, tuvimos batalles interesantes ente los dos Toro Rosso, Magnussen (que recibió penalización de cinco segundos) y Sáinz y Albon. Foi en resume, una carrera entretenida en conxuntu, decidida por esi abandonu de Vettel que xugó a favor de Mercedes. Hamilton ta cada vegada más cerca del so sestu campeonatu y l’equipu de repitir otru añu más como campeón de constructores.

La siguiente cita ye Suzuka, un circuitu míticu y mui apreciáu por tolos pilotos. Honda retorna a casa y tol mundu sabe lo especial que ye eso pal equipu nipón. Tornen tamién los madrugones pero mientres llega esi momentu, equí vos dexamos los númberos d’esti gran premiu de Rusia:

Clasificación

Carrera

El domingu en Singapur tuvimos emoción nel podiu pero non tanto en pista. Un podiu ensin pilotos de Mercedes y con un pilotu de Ferrari no cimero, el más cuestionáu del par. Quiciás nun foi’l meyor eventu de la temporada, pero a lo menos sorprendió en dellos aspeutos. Ensin muncho descansar yá aterrizamos en Rusia.

Pesie a nun ser un circuitu que dea carreres vistoses, siempre ye un trazáu que presta visitar. Sicasí, llegamos equí con munches disputes por resolver, sobre manera na parte medio la tabla. Sochi suel ser un talismán pa Mercedes, polo que nun sedría raro velos no más alto demientres tol fin de selmana, eso sí, con permisu Ferrari. Bottas nun va mal equí, asina que tampoco nun lo sedría velu a él como ganador el domingu. Lewis Hamilton lleva delles carreres ensin coronase, asina que probablemente llegue equí con ganes de pasar perriba los sos rivales como tien fecho nel pasáu. Güeyos y quinieles apuesten poles fleches platiaes.

De toles formes, nun podemos descartar a Ferrari anque sólo seya porque ganaron les tres últimes carreres y paeza que toparen esi “dalgo” más. Nun paez que vaigan recortar la distancia con Mercedes en nengún de los dos campeonatos, pero la racha positiva que lleven puede que nun faiga tan evidente la victoria de Mercedes en Sochi. Leclerc nun quedó conforme col resultáu en Singapur y cuestionó un pocu la estratexa del equipu de parar primero a Vettel qu’a él, polo que tará naguando con ponese otra vegada al volante pa desquitase. L’alemán, pel so llau, tovía tien munches voces negatives qu’apagar y que cuestionen el so rendimientu esti añu, polo que ye tamién ún de los pilotos que tener en cuenta.

Y Red Bull, anque discretos, ehí siguen. Verstappen foi terceru en Singapur, cuando naide nun cuntaba con él depués de lo que se vio’l sábadu. Albon sigui deprendiendo carrera a carrera y anque inda nun ta al altor de Verstappen, sí que ta faciendo lo que s’espera d’él. Dende que “xubió” a Red Bull nun aparó de sumar puntos. Curiosamente, paez que’l “descensu” de Gasly tamién benefició al pilotu francés porque ta teniendo un rendimientu meyor en Toro Rosso.

McLaren ta sabiendo aprovechar les debilidaes de Renault pa meter distancia nel campeonatu. El bon puestu de Norris en Singapur significó un puñáu de puntos vitales na llucha pol cuartu puestu. Renault puntuó con Hülkenberg, pero nun puestu más baxu. Paez que ta claro que van ser estos dos equipos los que disputen d’equí al fin de la temporada’l puestu de best of the rest.

Sicasí, nun podemos escaecer que’l restu d’equipos tamién tán na engarrada por quedar lo más arriba posible. Toro Rosso foi recuperando posiciones, pero Alfa Romeo y Racing Point van recuperando, sobre manera nel casu del segundu equipu, anque entavía la suerte nun mire pa ellos davezu. Haas y Williams siguen somorguiaos nos sos problemes que los tienen atrapaos nos dos puestos más baxos de la clasificación de constructores.

Averámonos a Sochi pa disputar otru gran premiu coles duldes de si Mercedes dominará o si Ferrari caltendrá’l rendimientu qu’amosó hasta’l momentu, ensin dexar fuera a cualquier otru protagonista que quiera sumase a la fiesta. Demientres llega’l vienres, equí podéis consultar los horarios pal fin de selmana y la información básica del circuitu:

Y equí podéis atopar tola información de Pirelli sobre les gomes que se van usar nel gran premiu:

Tamién podéis siguir consultando les novedaes de la silly season nel nuestru post, onde vamos actualizando tola información sobre la temporada 2020 no que cinca a pilotos.

Quiciás llegue un pocu tarde. Quiciás tuviera fecho falta primero. Ello ye que Ferrari despertó y lleva tres carreres siguíes mandando nes clasificaciones tanto’l sábadu como’l domingu. Hai munches entrugues tovía ensin rempuesta tocante a decisiones dientro del equipu, pero la emoción ye continío porque ta claro que la distancia con Mercedes abulta enforma grande. Sicasí, Singapur foi escenariu d’otra victoria colorada y del resucitar d’un pilotu alemán al que muchos queríen ya retirar.

Pero vamos mirar primero a lo que vimos el sábadu.

SÁBADU

Nun había falta  albidrar muncho pa entender que Ferrari tiníen tomada la midida a esti circuitu. Anque cuntábemos más con Red Bull de lo que dieron depués, la Scuderia entraba en toles quinieles. Sebastian Vettel paecía especialmente motiváu y de fechu llideró les sesiones del sábadu, anque non la más importante: foi Leclerc quien consiguió la pole y Vettel nun pudo más que ser terceru. Si echamos la vista a los grandes premios pasaos, podemos dicir que pal alemán esti resultáu, salir terceru en Singapur, yera dalgo bono, pero sabemos que los pantasmes de la F1 a vegaes medren en cuenta facese más pequeños. De fechu, nun consiguir la pole esti sábadu yá se taba dando como fracasu de Vettel, que taba pasando perriba del restu en sesiones previes y vio como dellos errores lu penalizaben nel últimu intentu.

Nun hebo sorpreses nos puestos baxos: Williams, Grosjean, Stroll y Kvyat fueron los primeros en quedar fuera. Tampoco nun les hebo na mitá de la tabla. Pérez partía con penalización por un accidente en la última sesión de llibres pola que tuvo de camudar la caxa cambios y nengún de los Alfa Romeo entró ente los diez primeros, mesmo que Gasly y Magnussen.

Los cinco primeros equipos na clasificación colocaron a los sos pilotos na Q3. Ricciardo foi descalificáu por irregularidaes nel coche n’acabando la xornada del sábadu. Naide nun pudo siquier ponese a tiru de Ferrari, anque Mercedes con Hamilton sí pudo colase nel segundu puestu de la parriella. Verstappen pasó per delantre de Bottas pa ser cuartu mientres que’l restu de puestos quedaron repartíos con Albon, Sáinz, los dos Renault y Norris completando la llista. Una sesión de clasificación que nun dexó muncho que falar sacante esa pole que nun foi pa Vettel. L’alemán nun pudo rematar una vuelta ensin errores, dalgo que sí fizo’l so compañeru d’equipu pa consiguir la so tercer pole siguida.

DOMINGU

Como vien siendo vezu esta temporada, la salida’l domingu nun foi mui accidentada. Sí tuvimos delles víctimes, como Russell y Sáinz, que pronto tuvieron d’entrar a facer paraes, el primeru a cambiar el morru, el segundu con un pinchazu, sumando otru día de mala suerte pal pilotu de McLaren. Leclerc tuvo una bona salida y rápido punxo distancia con Hamilton, que tenía a Vettel mui cerca, dexando claro que’l Ferrari rindía muncho meyor nes cais de Singapur. Sicasí, nun hebo cambiu de posiciones nes primeres vueltes, tampoco per detrás. Verstappen caltuvo la so cuarta posición y Bottas tamién siguió quintu.

Foron unes primeres vueltes más aburríes de lo que nos teníen avezaos les carreres pasaes, con muncha distancia y respetu entre pilotos y muncho mirar poles gomes. Pela parte media y baxa de la tabla sí víemos dalgo d’actividá, con pilotos como Ricciardo faciendo por recuperar posiciones depués de ser descalificáu, o Sergio Pérez. Tamién Hülkenberg, que tuvo una parada temprana pol incidente con Sáinz, tuvo qu’entrar llueu, dalgo qu’al tiempu diba beneficialu según como foi desenvolviendo la carrera.

Leclerc tinía totalmente controlada la carrera, pesie a que Hamilton diba acortando distancia. Sicasí, Ferrari tomó la decisión de parar a Vettel primero, dalgo que nun gustó muncho al so compañeru d’equipu y nun tardaríemos n’entender el motivu. Con Hamilton acechando, Leclerc finalmente fizo la so parada, una vuelta depués que’l so compañeru, dexando al inglés llíder pero saliendo de pits per detrás de Vettel, incluso teniendo una parada más curtia.

Cada pilotu qu’entraba a boxes y salía con gomes nueves, marcaba vuelta rápida en pista, y yera fácil ver que, una vegada que garrara ritmu, el rendimientu de Vettel diba ser meyor que lo que Leclerc podía alcanzar. Hamilton tamién paró al pocu, pero nun pudo aprovechar la estratexa y salió per detrás de dambos pilotos. Tres una sucesión de paraes, tuvimos a Giovinazzi, anque temporalmente, lliderando la carrera na vuelta treinta y ún. Quedaba un pocu menos de la mitá del gran premiu.

A partir d’esti momentu, vivimos dellos accidentes en pista. El primeru con Giovinazzi y Ricciardo de protagonistes, del que salió más perxudicáu l’australianu que tuvo d’entrar en boxes depués d’una maniobra d’adelantamientu que nun foi tan llimpia como cuntaba. Na vuelta treinta y seis apaeció’l primer coche de seguridá: el Williams de Russell acabó escontra les barreres mientres lluchaba por posición con Grosjean. El pilotu de Haas pudo siguir cola so carrera.

Na vuelta cuarenta y dos, Lance Stroll sufrió un pinchazu que lu obligó a parar y na siguiente’l so compañeru d’equipu quedaba paráu en pista. Ensin duldes, un fin de selmana pal escaezu en Racing Point. El coche del mexicanu provocó’l segundu coche de seguridá. El relanzamientu de carrera tres esti momentu foi bastante intensu, con tolos pilotos mui xuntos y faciendo por pasase, sobre manera na parte media de la tabla. Perriba, Vettel continuaba llíder, siguíu de Leclerc y Verstappen. Pero nun diba ser esti l’últimu momentu nel que Maylander saliera a pista: un adelantamientu de Kvyat a Kimi Räikkönen acabó col finlandés fuera de carrera cola suspensión del coche rota. El rusu pudo continuar en pista.

Les posiciones altes nun diben a variar nestes últimes vueltes, y Vettel por fin sedría’l primeru en ver la bandera a cuadros depués de tantes carreres y tantos errores. Ferrari llevaba dende 2008 ensin encadenar tres victories siguíes nun campeonatu, dalgo que diz muncho del motivu pol que nun ganen campeonatos. Atópense agora nun bon momentu de forma, nun hai duldes, pero quiciás, como reflexonábemos al entamu d’esti post, llega un pocu tarde. Hamilton y Bottas nun entraron ente los tres primeros.

Singapur nun tuvo’l ritmu nin la emoción de carreres pasaes, pero valió pa ver rexurdir a Vettel. Ye verdá que la decisión del equipu de paralu primero lu benefició, pero tamién lo ye que pasó tol fin de selmana rodando mui rápido y quiciás merecía esta victoria. Paeznos lóxico qu’haiga duldes sobre él viendo lo que ta dando de sí nesta temporada y los errores de rookie que ta faciendo dacuando, pero paez que ta lloñe de tar acabáu como pilotu.

La Fórmula Ún nun descansa y en siete díes viaxa a Rusia. Demientres aterrizamos nel circuitu de Sochi, equí vos dexamos tolos númberos del fin de selmana:

Clasificación

Carrera

El tour asiáticu ta entamáu y aterrizamos na primer parada: Singapur. Anque lleva relativamente pocu tiempu nel calendariu si lu comparamos con otros grandes premios, la verdá ye que ta afitada como una de les carreres más esperaes temporada a temporada. El fechu de que se cuerra de nueche (anque yá salieran imitadores), de lo estrecho del trazáu y de l’atmósfera que siempre arrodia al eventu fai d’ello ún de los puntos importantes del añu.

Llegamos equí cola resaca del gran premiu d’Italia en Ferrari. Tres celebrar una victoria en casa depués de tantu tiempu, la Scuderia torna al trabayu. Eso sí, el planteamientu sigui siendo’l mesmu, y nun hebo nenguna novedá sobre’l futuru de los sos pilotos, pero sabemos que nada nun ye lo mesmo dende hai dos selmanes. Charles Leclerc llegó pa deprender y medrar en Ferrari, pero naide nun cuntaba (o quiciás dalguna persona sí) que diba facelo tan rápido como p’asombrar el llabor del so compañeru Sebastian Vettel. ¿Quién ye’l númberu ún agora? La lóxica fainos albidrar que tol enfotu sigui puestu en Vettel anque sólo seya por caltener un poco de coherencia, pero ta claro que naide nun ye indiferente a lo que ta faciendo Leclerc esti añu.

Pesie al historial de victories nes últimes carreres, en Mercedes nun tienen motivos pa esmolecese, nin nel campeonatu de constructores nin nel de pilotos. La ventaya que saquen a Ferrari ye bultable y Hamilton tien práuticamente amarráu’l campeonatu anque nun queramos resignanos a que yá tea too dicho. Sicasí, la naturaleza ganadora del equipu fai que siempre quieran ocupar lo primero del podiu. En Singapur puede que tengan de pidir permisu a Red Bull, equipu que suel dir bien equí.

Siguiremos mui de cerca lo que vaiga pasando pela parte templao de la tabla. Esti circuitu vien siendo escenariu de carreres nes que son los d’abaxo los que meyor aprovechen les oportunidaes, y yá nel pasáu vimos a equipos puntuando depués de carreres de seca. Nesi sen Singapur torna nuna especie d’oasis, tipo Mónaco, nel que los equipos de la parte baxo tienen otra oportunidá d’atropar puntos. Por ello tenemos los güeyos puestos no que puedan facer en Williams y Haas, los dos equipos más febles agora mesmo, pero tamién el restu d’equipos. Racing Point suel facer bones carreres nesti llugar, asina que tamién sedrá un referente en pista.

Nun escaecemos que la silly season continúa. Esta selmana conocimos el futuru de dos de los pilotos de la parriella de 2019: Romain Grosjean va siguir siendo pilotu pa Haas en 2020 y Robert Kubiça nun va selo en Williams, rematando asina’l so añu de retornu a la F1 y buscando otres esperiencies fuera de la categoría. Destinos estremaos pa dos pilotos que nun tán teniendo una temporada brillante por motivos qu’a vegaes nun tán nes sos manes. Podéis consultar como tán les coses nel nuestru post sobre la silly season que vamos actualizando coles novedaes que recibimos selmana a selmana.

Singapur supón un retu en tolos senes: pa los pilotos pol cambiu horariu ya’l fechu d’adautase a correr de nueche. Pa los equipos polos requerimientos del circuitu al coche y pal públicu porque pasen tantes coses en pista que casi ye imposible cubriles toes d’una vegada. Y la calor, dalgo que d’una forma o d’otra siempre influi nel fin de selmana. Sicasí, tamos preparaes pa vivilo y pa ello, equí vos dexamos tolos horarios ya información que precisáis pa nun perder nada:

Y equí, tola información de Pirelli sobre les gomes pa esti fin de selmana:

Había nueve años que nun víemos Monza tremar de la forma que lo fexo’l domingu. Nueve años d’espera de los tifosi pa tornar a ver a ún de los suyos no cimero del podiu. Cuando les quinieles previes al fin de selmana daben a Vettel como favoritu, Leclerc rompió con toes elles pa coronase, non namás el sábadu si non tamién el domingu.

SÁBADU

Davezu tenemos sesiones de clasificación que nos dexen ablucaos pol so resultáu: una pole inesperada, un rookie que se mete ente los tres primeros o ún de los equipos cabezaleros que queda fuera na Q1. Esta vegada, les cares de sorpresa provocáronles tolos pilotos que lluchaben na Q3. Ye conocida la importancia del rebufu en Monza, onde’l to compañeru se coloca delantre de to pa facilitar que salgas con más puxu nes rectes. Ello ye que na última vuelta pola pole naide nun quería ser el coneyu d’Indies del restu, y tolos pilotos diben afloxando, dexando pasar al restu, colocándose más atrás… Tanto foi asina que, sacante Sáinz, tolos pilotos del grupu de los diez primeros quedaron ensin tiempu pa marcar una vuelta (quedaba un minutu aprosimáu nel reló) y a los equipos con cara de circunstancies. A la fin, cuntaron los tiempos daos na primer parte de la sesión y la vuelta de Leclerc valió pa la pole, la vixésimoprimera de Ferrari en Monza y primer gran allegría del fin de selmana pa la Scuderia.

Plantegóse una investigación pa tolos pilotos, y de fechu hai precedente en categoríes inferiores (F3) de penalización coleutiva por esti tipu de aiciones, pero too quedó nuna reprimenda. Creyemos (y esperamos) qu’anque sólo seya polo ridículo de la situación, nun va tornar a repitise más, a lo menos esta temporada.

Destacamos l’actuación de Renault, con Ricciardo y Hülkenberg per detrás de Vettel en quintu y sestu llugar, mui asomeyao a lo que vimos hai unos meses en Canadá, onde Renault tamién rindió perbién na sesión de clasificación. Nun cuntábemos con que Verstappen ficiera muncho’l sábadu, sabiendo que diba salir d’atrás anque sí pensábemos qu’entraría na Q3. L’holandés sufrió un problema nel coche que lu dexó fuera bien ceo na Q1. Esperábemos dalgo más, eso sí, del so compañeru Alexander Albon, que foi ún de los pilotos ensin tiempu na Q3. Sorprende tamién la presencia de Stroll ente los diez primeros, depués de tolos problemes que ta teniendo pa siquier pasar de Q1. El so compañeru nun tuvo tanta suerte y quedó fuera na Q1 provocando bandera colorada depués de que’l so coche quedara ensin potencia.

Lando Norris dedicóse a facilitar que’l so compañeru entrare en Q3, cuntando cola penalización del domingu. Podemos dicir que fueron l’equipu que meyor aplicó’l rebufu en pista si lo comparamos colo que ficieron el restu. Protagonista de la Q3 foi Kimi Räikkönen qu’acabó col coche nes proteiciones a falta de seis minutos pal final de la sesión. Nada que ver coles sensaciones del añu pasáu cuando fexo la pole nun Ferrari.

DOMINGU

Ensin l’agua pol que naguaba Verstappen, comencipió otru gran premiu nel clásicu circuitu de Monza. Y fíxolo como nos tienen avezaos les últimes carreres: ensin munchos incidentes, sobre manera en cabeza. Leclerc aguantó bien la so posición frente a los ataques de los dos Mercedes y del so compañeru d’equipu, y tamién de los dos Renault, que salieron bastante enchufaos. Per detrás, vimos dellos coches usando la escapatoria de final de recta énte la imposibilidá de facer la chicane ensin evitar l’accidente. Siempre ye un xiru apertáu sobre manera cuando los coches tán entavía tan xuntos. Dos de los pilotos protagonistes d’incidentes al principiu sedríen Pérez y Verstappen, que tuvo d’entrar a parar pa camudar el morru delanteru del so coche depués de chocar col del mexicanu. Vimos bien ceo batalles entreteníes ente Hülkenberg y Vettel, ente Albon y Sáinz y ente dambos Renault que fixeron que les primeres vueltes de carrera fueren bien entreteníes.

Na vuelta seis Vettel foi protagonista negativu del gran premiu depués d’un trompu que lu dexó atravesáu en medio d’una de les escapatories, mui cerca del trazáu. A la hora de reincorporase a pista fíxolo ensin mirar nin ver que Stroll vinía per detrás. El pilotu canadiense tuvo d’esquivalu, lo que provocó qu’él tamién ficiera un trompu que lu dexó, metros más allá na mesma posición que Vettel unos minutos primero. Y como si tuvieren viviendo realidaes paraleles, el pilotu de Racing Point tamién se reincorporó a pista de manera insegura, con Gasly de víctima anque ensin consecuencies pa él. El resultáu foi que dambos pilotos perdieron posiciones y fueron penalizaos. Nel casu de Vettel con diez segundos de stop and go y nel de Stroll con un drive through. Pal alemán esto foi quiciás el remate final pa un fin de selmana que prometía muncho más de lo que dio.

Col pasu de les vueltes, como pasara yá en Spa, la carrera nos primeros puestos foi quedando llimitada a los dos Mercedes y Leclerc. Y como tamién pasara en Spa, nenguna de les fleches plateaes foi quien a pasar al pilotu monegascu que con cada carrera va perdiendo inxenuidá en pista (de fechu, vio una bandera prieta y blanca pa llama-y l’atención poles maniobres que facía con Hamilton) y poniendo más complicaes les coses a los sos rivales. De fechu, la estratexa de Mercedes foi intentalo con Hamilton y viendo que l’inglés nun yera quien y que Bottas diba con gomes más fresques, dexalu a él que lo intentara. Pero nengún de los dos superó al pilotu de Ferrari. Lo que sí tenemos d’aplaudir una y milenta vegaes ye’l gran espectáculu que dexaron los tres en pista.

Yá avanzada la carrera, tuvimos el primer abandonu. La mala suerte sigui cebándose con McLaren y esta vegada con Carlos Sáinz. El pilotu madrilanu rodaba novenu y taba acabante de facer el so cambiu de gomes cuando tuvo de parar el coche al final del carril de pits porque una de les ruedes taba mal afitada. Poco depués, vinía’l segundu abandonu de la carrera, na vuelta treinta, Daniil Kvyat acababa col coche aparcáu nun de los llaos del trazáu. El pilotu rusu tamién taba acabante de parar pero nel so casu quedó ensin potencia nel coche. Los motores Honda esti fin de selmana dieron bastantes disgustos a los equipos del toru coloráu.

Na vuelta cuarenta y dos una salida de pista ensin consecuencies pa Hamilton fexo que’l pilotu inglés perdiera’l so segundu llugar en beneficiu del so compañeru d’equipu. Nun sabemos si foi un erru provocáu adréi por Hamilton pa que nu se fale d’ordes d’equipu pero foi nesti intre cuando Bottas se punxo a trabayar pa intentar pasar a Leclerc, a falta de once vueltes. El finlandés tuvo momentos de tar mui cerca del pilotu de Ferrari y con dos vueltes pal final casi lu tinía nes sos manes, pero un erru nun xiru onde foi un pocu llargu féxolu perder tiempu lo que dio aire a Leclerc pa lo que quedaba de carrera. Mientres dambos pilotos lluchaben pola victoria, Kevin Magnussen tinía de retirar el so Haas por problemes hidráulicos. Una vegada más, deceición nel equipu estauxunidense, que nun puntuó (Grosjean tamién fexo un trompu y acabó nel puestu dieciséis) y sigui nos puestos fonderos de la clasificación.

L’últimu xiru en la Parabolica enantes de la bandera a cuadros foi un auténticu glayíu de los tifosi al decatase de que depués de nueve años un pilotu de Ferrari tornaba a lo cimero del podiu. Tres la so allegría, la deceición de Vettel que nin siquier pudo puntuar depués del so erru na vuelta seis y que fai medrar los rumores sobre’l so estáu de forma ya’l so futuru nel equipu.

Acompañaron a Leclerc nel podiu los dos Mercedes, contentos con sumar puntos pero obviamente deceicionaos por nun ser quien a facese cola victoria. Hamilton, eso sí, consiguió la vuelta rápida, otru puntu estra pa él nel campeonatu. En cuartu y quintu dambos Renault, nuna gran carrera de los dos pilotos con un rendimientu al que nun tamos avezaos esta temporada pero que depués de la desgracia del fin de selmana pasáu arrancó munches sorrises. Aparte, sumen un bon puñáu de puntos, vitales na llucha del campeonatu de constructores. Albon foi sestu con Verstappen octavu, depués de salir últimu. Nun foi una bona carrera pa nengún de los dos, nunca nun tuvieron opción al podiu, pero a lo menos compensó nel casu de Verstappen, depués d’una salida bastante probe.

Pérez sumó los puntos pa Racing Point y foi sétimu. Stroll tampoco nun pudo recuperarse del incidente con Vettel y foi décimosegundu. L’equipu nun pinta mal nesta segunda parte de la temporada, anque necesiten llibrase d’incidentes pa poder asegurase puntos carrera tres carrera. Giovinazzi consiguió dos puntos que saben perbién pa él y pal equipu. Correr en casa siempre da una motivación estra, dicen, y nesti casu paez que se cumplió col pilotu italianu. Kimi acabó nel puestu quince.

L’últimu puntu foi pa Norris que tamién salía de les posiciones d’atrás y a lo menos foi quien a atropar un puntín bien valiosu pal so equipu. Anque entavía tienen distancia col quintu, los de Woking, como venimos diciendo, nun pueden despistase nes carreres vinientes si quieren acabar cuartos esta temporada. Por suerte pa ellos, pesie a la bona carrera de Renault, Gasly quedó a les puertes de los puntos y con Kvyat fuera Toro Rosso nun puntuó.

Pa rematar, aplaudimos l’actuación de George Russell que foi décimoterceru y sigui dando motivos al so equipu pa tar en 2020 na parriella. Kubiça tuvo dalgún problema más qu’él y acabó nel puestu décimosetimu, pero dambos continúen acabando carreres y amosando que’l coche, a lo menos, ye fiable.

Acabamos asina’l ciclu de carreres n’Europa y ponemos agora la vista n’Asia. El prósimu gran premiu de Singapur, carrera que ta camín de facese un clásicu de la Fórmula Ún. Mientres llega la fecha, equí vos dexamos tolos númberos del fin de selmana n’Italia:

Clasificación

Carrera

Ta tornando vezu’l dir dando noticies nueves con cada previa o crónica qu’escribimos. Yá sabéis que podéis dir siguiendo tolos cambios en pilotos nel nuestru especial de la silly season equí pero estes nueves tamién afeuten a los circuitos. Esti miércoles supimos que Monza va siguir como parte del calendariu de F1 hasta, polo menos, 2024. Los tifosi van siguir teniendo’l so templu de velocidá onde animar al coche coloráu col puxu col que nos tienen avezaos. Siempre ye bono cuando se confirmen circuitos d’estos que nomamos “clásicos” porque pesie a que nengún ta llibre de carreres aburríes les bones suelen selo muncho.

Con esta confirmación aterrizamos en territoriu italianu col ecu de la victoria de Leclerc en Spa entavía frescu, el pilotu monegascu yá tuviera oportunidaes pa coronase en pasaos grandes premios pero nun foi hasta Spa que lu pudimos ver no cimero del podiu. Coincidió amás que lo fixo nel fin de selmana nel que perdió a ún de los sos amigos dientro y fuera de los circuitos, Anthoine Hubert que, como comentábemos na crónica de Spa, finó nun accidente na primer carrera de F2. Nun creyemos qu’heba meyor homenaxe pa un pilotu que muerre, como ellos dicen faciendo lo que-y presta, que dedica-y una victoria tan trabayada como la del domingu en Spa.

Esperamos daqué asemeyao en Monza. La Scuderia tien la obligación moral de facer bones carreres nesti circuitu y sabemos lo que pasa cuando ye un coche coloráu’l que fai la pole o gana’l domingu (nun hai más qu’alcordase de la última vegada que lo fixo Kimi Räikkönen). Con esi estra de presión tifosi, tanto Leclerc como Vettel van tar nel centru de l’atención del fin de selmana. Al alemán vímoslu facer llabor d’equipu na carrera pasada, quiciás una siña de que quier o cuida con siguir en Ferrari pa 2020. Tovía nun hai confirmación del so futuru pero la lóxica, que sabemos que nun suel funcionar na silly season, diría que sigue. Tamién ye verdá que son munches les voces que dicen que non, que Vettel yá escosó’l so tiempu en Ferrari y que cola llegada de Leclerc la so lluz ta dafechu apagada ellí. La Scuderia suel facer anuncies en Monza, asina qu’esperamos saber dalgo nuevo demientres el fin de selmana.

Anque l’atención tea enriba de Ferrari, el restu de protagonistes tamién nagüen por correr equí. Monza ye, ensin duldes, ún de los circuitos preferíos por bien d’ellos pola velocidá y pol ambiente que se vive, seyas o non pilotu Ferrari. Por eso nun ye raro lleer o sintir a los pilotos, dende Mercedes a Williams almitir que correr en Monza-yos da una motivación que vien, simplemente, de lo que se vive nes grades.

Nes fleches platiaes tán inda tascando les cabeces pa entender un poco meyor por qué nun pudieron facese cola victoria en Spa. Anque en teoría nun yeren favoritos, cuntaben con que diben ser quien a presionar a Leclerc más de lo que lo fixeron. En principiu Monza nun ye un circuitu pa ellos pero sabemos que la teoría rara vegada funciona, asina que cuntamos con ellos pa la pole y la victoria’l domingu. Lo mesmo facemos con Red Bull. Depués de la deceición de Spa, Verstappen llega a Monza cola necesidá de ponese al altor de les carreres anteriores al parón braniegu y Albon cola motivación añadida de tar nel primer equipu y de tener fecho un gran trabayu nel anterior gran premiu. Sicasí, l’holandés va camudar motor equí, asina que lu vamos a ver entamar dende atrás na parriella, dalgo qu’en principiu ye un problema pero que de xuru va danos momentos interesantes d’adelantamientos en pista.

McLaren ta teniendo una temporada perbona y nun dexamos de pensar en cuántos puntos llevaríen si la suerte acompañara. En Spa dambos pilotos quedaron fuera de carrera, más llaceria nel casu de Norris, que foi quintu tola carrera y na última vuelta quedó fuera. Anque’l so puestu nel campeonatu nun peligra en principiu, los baxones de forma suelen ser malos amigos pa la segunda parte de la temporada y en Woking nun pueden despistase. Sobre manera porque, viendo lo visto en Spa, Renault y Racing Point vienen con fuercia. Los primeros namás puntuaron con Hülkenberg pero nun dieron mala imaxe en pista y los segundos atroparon puntos con dambos, dalgo que yera raro na primer parte de la temporada. Racing Point yera tradicionalmente ún de los equipos que se desinflaben na segunda parte del añu por cuenta de la falta de recursos que permitiera siguir evolucionando’l coche. ¿Pasará lo contrario esti añu?

Nun paez que suene raro dicir que Pierre Gasly amosó meyor rendimientu en Toro Rosso na pasada carrera que lo que vimos en Red Bull. Ye verdá que’l so compañeru sigui sumando puntos y que quedó per delantre, pero’l francés paecía sintise más seguru al volante del so nuevu coche y nun dexamos de pensar que, quiciábes, vamos a velu resurdir depués de la deceición que supunxo’l so cambiu de Red Bull a Toro Rosso.

Alfa Romeo tampoco nun tuvo un bon gran premiu en Spa, pero equí cuerren en casa. Siempre dicimos que, anque paeza que non, a munchos equipos y pilotos correr en casa val-yos p’atopar esi estra de motivación que nun atopen n’otros eventos. Nesti casu tamién ye carrera llariega p’Antonio Giovinazzi, mui necesitáu de tornar a los puntos depués del accidente de la última vuelta en Spa que lu dexó fuera. De Kimi realmente podemos esperar cualquier cosa. Si’l coche responde, nun sedría raro velu en puntos, compitiendo quizá por ser quintu o sestu incluso.

Coméntase pel paddock que Romain Grosjean tien un pie fuera de Haas y que’l so asientu va ocupalu Hülkenberg. Sabiendo la rellación, digamos, tensa qu’hai ente l’alemán y Kevin Magnussen nun sabemos hasta qué puntu va resultar bona esa mezcla, pero sí ye verdá que’l francés esta temporada nun ta consiguiendo atopase a gusto nel coche. Cásique podemos dicir lo mesmo de dambos, porque’l monoplaza lleva repitiendo’l mesmu patrón casi tola temporada: rápidu a una vuelta, desastrosu en carrera. Les gomes, el coche, los pilotos… naide atopa a quien echar la culpa, les carreres avancen y Haas ve como’l restu d’equipos sumen mientres ellos siguen atrapaos no baxo la tabla.

Ye vezu zarrar les previes con Williams por ser l’últimu equipu na clasificación. Sicasí, nun nos paez que seyan los que peor imaxe tán dexando. Les llimitaciones qu’acompañen a los pilotos en tolos grandes premios siguen ehí y anque pasín ente pasu van amenorgando, nun paez que vaigan desapaecer dafechu no que queda de temporada. Sicasí, l’equipu ta dexando una bona imaxe de trabayu, de regularidá en pista y de compromisu cola evolución del so coche. Tando como tán les coses paeznos que nun hai muncho más que podamos pidir de momentu.

Llega’l gran premiu d’Italia con amenaza d’agua pal sábadu ya’l domingu, asina que les cabeces tornarán a mirar al cielu. Los horarios, como davezu, los que tuvimos nes últimes carreres:

Y estes son les gomes que vamos ver usar a los equipos demientres el fin de selmana en Monza:

El retornu de la F1 a l’actividá nun dexó un gran premiu mui interesante, pero sí con dalgunos aspeutos que comentar y cola primer victoria de Charles Leclerc en Ferrari. Sicasí, la carrera del domingu quedó tapecida pol accidente tremendu del sábadu na carrera de F2 nel qu’un de los pilotos, Anthoine Hubert, protexíu de Renault, dexaba la so vida. Tolos equipos y tolos pilotos, el mundu del motor en xeneral, quedaron murnios cola noticia y los homenaxes nes carreres de F3 y F1 (la segunda carrera de F2 nun se cellebró por respetu) fueron mui sintíos. Dende esti blogue sumámosnos al pésame a familiares y collacios del pilotu, un talentu de la F2 que, como tantos otros, namás diba a la gueta del suañu de ser un día pilotu de F1.

SÁBADU

Un accidente de Hamilton na tercer sesión de llibres dexaba duldes de si podría competir na sesión de clasificación, sicasí l’inglés nun tuvo problema nengún pa tomar parte. Lo que nun pudo facer foi, esta vegada, sumar otra pole pala so coleición. Nel so llugar, Charles Leclerc completó la vuelta perfeuta pa ser quien ocupara esi primer llugar de la parriella’l domingu. Sebastian Vettel ocupó’l segundu puestu colos dos pilotos de Mercedes terceru (Hamilton) y cuartu (Bottas).

El fechu de qu’un gran númberu de pilotos tuvieran penalización nun dio una sesión de clasificación demasiao intensa y de fechu altó l’orde orixinal de tiempos. McLaren, Red Bull, Toro Rosso y Renault, arrastraben penalizaciones asina que nun yera sorpresa ver a los sos pilotos con actuaciones discretes el sábadu. Amás, Kubiça nun llegó a marcar tiempu asina que foi decisión de los comisarios el que pudiera competir el domingu.

DOMINGU

Como avezamos esti añu, la salida nun presentó munchos problemes. Si acasu podemos falar de Verstappen qu’una vegada más nun brilló nesi momentu tan importante y quiciábes foi por eso que la so carrera terminó tan pronto. Viose retrasáu en posiciones y a la gueta d’un espaciu nel qu’adelantar a Kimi Räikkönen, acabó dando col finlandés y chocando coles barreres provocando’l primer coche de seguridá. Räikkönen pel so llau nun tuvo una carrera tranquila dende esi momentu, por daños nel baxu del so coche que lu mantuvieron nes posiciones baxes el restu del gran premiu.

Leclerc mantuvo la so posición ensin problema, Vettel tuvo d’aguantar más a Hamilton y esti a Bottas, pero en xeneral les posiciones d’arriba nun variaron. Norris tuvo otra bona salida que lu diría colocando no alto llueu. Pronto entendimos que la carrera, a diferencia d’otres vegaes, diba tar ente trés contendientes y que quiciás les estratexes de parada diben a decidir quién sedría’l ganador. Al primer coche de seguridá nun tardó en seguilu otru depués de que Sáinz tuviera de salise del trazau por cuenta d’una pérdida de potencia que supunxo’l so abandonu. La deceición ye grande pues el pilotu madrilanu llevaba penalización precisamente por cambiu en pieces del coche ya’l so abandonu tempranu nun ye bona señal.

Col pasu les vueltes, los puestos fueron estabilizando, quedando bien marcada la cabeza de carrera y la llucha polos puntos, onde como casi siempre esti añu tuvo lo más interesante. Lleguemos a ver adelantamientos triples, un Sergio Pérez especialmente inspiráu, mesmo que’l so compañeru d’equipu Lance Stroll. Al tiempu, vimos a los Haas lluchando por mantener la posición con un coche que nun yera quien siquiera a plantar cara a rivales inmediatos. Nin Magnussen nin Grosjean podíen casi competir colos pilotos que los adelantaben y de fechu’l francés foi mui esplícitu nel so mesaxe de radio al equipu diciendo que-yos faltaben a lo menos 20 km/h de velocidá pa poder siquier suañar con entrar en puntos, respondiendo asina a un mesaxe d’ánimu dende’l muru.

Ferrari fixo funcionar la so estratexa parando a Vettel primero y dexando a Leclerc en pista, dalgo que provocó que, al parar el pilotu monegascu delles vueltes más tarde, l’alemán quedara per delantre. De mano paecía que l’equipu taba regalando a Vettel la carrera pero pronto descubrimos que, pa variar, la estratexa de Ferrari funcionara y que Vettel namás taba faciendo llabor d’equipu, la cual remató cuando, orde d’equipu mediante, dexó pasar al so compañeru. Dende esi momentu pa Leclerc foi too tirar y engrandar el güecu colos sos persiguidores y pa Vettel facer por parar a Hamilton que parara un pocu depués de Leclerc.

L’inglés nun dexó d’intentar averase al pilotu de Ferrari, pero esta vegada Leclerc tinía tomada la midía a esta carrera y nun diba vender baratu’l so primer puestu. Sicasí, Hamilton nunca nun llegó a ponese tan cerca como pa intentar adelantar y la carrera del monegascu, anque trabayada, nun-y dio demasiaos problemes nesi sen.

Depués de les paraes del so compañeru y de Hamilton, Sebastian Vettel nun pudo durar muncho más en pista y resignáu a nun quedar en podiu, decidió entrar otra vuelta a cambiar gomes, quedando dende esi momentu per detrás de dambos Mercedes. Recibió’l consuelu, sicasí, de sumar un puntu pola vuelta rápida de carrera. Per detrás, pero a una distancia bultable, rodaba Norris que fexo una carrera perbona hasta que na última vuelta la unidá de potencia xugo-y una mala pasada y dexolu atravesáu na llínia de meta. Les sos esperances de consiguir el so meyor resultáu de la temporada con McLaren desapaecieron y anque clasificó pa la carrera, féxolo fuera de puntos nel puestu once. Al empar casi, Giovinazzi acababa na muria.

Vimos un Alexander Albon que pali que pali foi faciendo sitiu pa terminar quintu na so primer carrera pa Red Bull. Tamién vimos enforma inspiráu a Pierre Gasly que depués del cambiu a Toro Rosso consiguió entrar en puntos, anque Kvyat clasificó per delantre d’él. Yá diximos que Sergio Pérez taba especialmente motiváu y asina lo confirma’l so sestu puestu al final de la carrera, con Stroll rascando l’últimu puntu en décimu llugar. Nun foi un gran día, sicasí, pa Renault. Dempués de la terrible noticia del sábadu, los sos dos pilotos diben con penalización y anque Hülkenberg sí sumó puntos, acabando octavu, Ricciardo nin siquier s’averó a ellos, terminando décimocuartu.

Haas, como yá diximos, nun ven la lluz al final del túnel y quedaron nos puestos doce y trece n’otra carrera deceicionante pal equipu estauxunidense y col futuru de Grosjean en dulda. Pa zarrar esti resume, destacamos el llabor de George Russell col so Williams, qu’acabó nel puestu quince, per delantre del Alfa Romeo de Räikkönen con munchísimos problemes depués del accidente con Verstappen y, otra vegada más, del so compañeru d’equipu Robert Kubiça.

Entavía coles coraes encoyíes, ponemos direición a Monza, al templu de la velocidá, pal Gran Premiu d’Italia nunos díes. Demientres llega, equí vos dexamos tolos númberos del fin de selmana nel circuitu de Spa-Francorchamps:

Clasificación

Carrera