Category: Carreres

Monte Carlo foi testigu esta fin de selmana d’un de los homenaxes más merecíos a Niki Lauda. Nun vieno de cellebraciones pomposes o alcondances llarimoses, si non con otra victoria, la sesta, pa un pilotu de Mercedes. Vamos cola fin de selmana día tres día:

SÁBADU

A estes altures de la temporada y cola clasificación como ta, la tentación de dar a Mercedes como ganador en dambos campeonatos ye pergrande. Sobre manera si Ferrari sigui na so dinámica de complicase les coses. Yá tenemos falao na previa de lo importante que yera esti gran premiu pal so pilotu Charles Leclerc. Correr en casa siempre ye una motivación extra pa los pilotos. Sicasí, el pilotu monegascu nun tuvo más que pesadielles ente’l sábadu ya’l domingu.

Dempués de lliderar la tercer sesión d’entrenamientos llibres, otra decisión estratéxica equivocada del so equipu lu dexó fuera en Q1. Los cálculos del equipu fallaron y una suma de coses ficieron que fuera’l propiu Vettel quien dexara fuera al so compañeru. Ferrari consideró que Leclerc taba salvau y decidió non sacalu nun circuitu que tol mundu sabe evoluciona col pasu de les vueltes, mesmo que los pilotos qu’arriesguen más y cada vegada tomen meyor cada curva. De fechu, Vettel tuvo de salir a última hora pa nun quedar fuera. Naide entiende que nun se ficiera lo mesmo con Leclerc.

Col envís de guardar gomes pa la carrera, Leclerc ya’l so equipu vieron nes pantalles como quedaben fuera na primer sesión de clasificación. A too esto súmase que’l propiu pilotu saltara la visita a la zona de pesaxe y l’equipu tuviera que facelu recular pa nun llevar sanción. La suma de too resultó nel pilotu de Ferrari fuera xiringando la cabeza ensin entender nada, y la so oportunidá de siquiera suañar con ganar en casa desaniciada.

Nada asemeyao pasó nel garaxe de Mercedes. Anque nun foi una pole cenciella pa Hamilton, el so valor ye doble dempués d’una selmana dura pa tol equipu. Bottas púnxolu n’apuros y de fechu pudo facese con esi naguáu primer puestu, pero foi finalmente l’inglés el que s’impuso. Per detrás, Verstappen y un desinfláu Vettel que tuvo más d’un toque colos muros del circuitu.

Tamién dientro de los diez primeros tenemos de destacar el sestu puestu de Magnussen que taba percontentu col rendimientu del coche demientres la fin de selmana ya Ricciardo con otra bona sesión de clasificación pa elli. Nel llau negativu, otra clasificación desperdiciada pa Stroll que diz nun ser quien a sacar tol potencial al coche nuna vuelta, dalgo que queda espeyao en que seya vezu velu fuera ya na Q1.

DOMINGU

Cola amenaza d’agua que nun llegó a asomar na carrera, entamó’l gran premiu de Mónaco d’esta temporada. La salida foi llimpia, daqué llamador si pensamos en cómo ye’l circuitu y nel fechu de que venti coches salen buscando’l so güecu ente muros que s’estrechen pa nun dexalos pasar. Hamilton caltuvo la so ventaya, mesmo que Bottas y Verstappen. Vimos un pocu más d’actividá nes posiciones d’atrás, como ente Räikkönen y Stroll, y onde Leclerc empezó dende bien ceo la so remontada.

Hai que destacar la primer parte de la carrera gracies al pilotu monegascu. Pasín ente pasu y casi siempre nel mesmu puntu foi adelantando pilotos. Sicasí, la maniobra sobre ún de los pilotos de Renault nun foi tan bona ya Leclerc tocó la barrera ya terminó travesáu pel trazáu. El resultáu foi un pinchazu y visita a pits, provocando amás un coche de seguridá.

Los pits fueron un de los escenarios de más actividá en tol gran premiu y Verstappen foi sancionáu con cinco segundos de penalización porque’l so equipu dexólu salir de la so posición de forma peligrosa. El pilotu holandés tuvo a piques de chocar escontra Bottas, que salía nesi momentu de la so parada. Esta penalización diba condicionar la posición del pilotu de Red Bull, que nes vueltes finales de la carrera sedría l’únicu pilotu con posibilidá de quita-y la victoria a Hamilton.

Mesmo que vimos na primer carrera de F2, y tovía nes primeres vueltes de la carrera, Russell quedó travesáu dempués de que Giovinazzi lu tocara y fixo un tapón que per un ratu tuvo a dellos coches bloqueaos. El pilotu d’Alfa Romeo llevó una penalización pola so aición. Pa cuando’l pilotu de Williams foi quien a enderechar el coche, yeren cinco los pilotos qu’esperaben pa continuar la so carrera, ente ellos Leclerc, que siguía enfotau nel so suañu de facer un bon trabayu en Monte Carlo.

Sicasí, na vuelta dieciocho, dempués de tresmitir al equipu les sos quexes sobre’l manexu del coche, el pilotu monegascu retiróse. La deceición yá vien dende’l sábadu, pero’l resultáu del domingu ye namás furar na firida. Demientres esti momentu pasaba, Räikkönen y Stroll tiníen el so momentu. El pilotu canadiense chocó contra’l finlandés y terminó penalizáu con cinco segundos sobre’l so tiempu. Pesie a tolos cambios nel equipu, tanto Stroll como Pérez tuvieron una carrera bastante probe, peleando polos puestos baxos de la tabla ya ensin muncho que facer equí.

Los doblaos fueron protagonistes abondo nes últimes vueltes de la carrera. Con Vettel y Bottas daqué descolgaos, Verstappen nun daba respiru a Hamilton, qu’amás tinía una degradación pergrande nes gomes. Dambos pilotos llegaron a tocar, pero’l pilotu inglés nun cedió’l so puestu y dambos vieron la bandera cuadros con una diferencia mínima. Sicasí, Verstappen arrastraba la penalización de cinco segundos que lu fexo cayer al cuartu puestu na clasificación final.

Falamos munches vegaes de la facilidá con que Mercedes gana les carreres y ye verdá les más de les veces son bien superiores al restu. En Mónaco tuvieron de trabayar la victoria igual que la pole y quiciábes por eso tien más méritu. Sintir el mesaxe de radio de Hamilton n’acabando el gran premiu ye una muestra del esfuerzu que-y llevó consiguilo.

Anque Verstappen foi protagonista xunto col pilotu de Mercedes de bona parte de la carrera, el so compañeru Pierre Gasly terminó nel quintu puestu y amás consiguió’l puntu que da la vuelta rápida. A pasinos pequeños, el francés va medrando dientro del equipu, ensin facer munchu ruíu pero garrando sitiu y ameyorando col pasu de les carreres. Xunto a elli, vieron la bandera a cuadros dientro de los puntos Carlos Sáinz, nel sestu puestu, nuna bona carrera del pilotu de McLaren. La escudería de Woking tinía bastante enfotu en llograr daqué granible equí, y anque Norris nun foi a puntuar (acabó nel puestu once) el resultáu ye espeyu de la evolución del equipu.

Toro Rosso puntuó doble colos sos dos pilotos dientro de los diez primeros. Albon yá dende’l xueves dexó claro que se-y da bien Mónaco, clasificando nos puestos altos en toles sesiones y Kvyat amuesa carrera tres carrera que ta más centráu y que puede ufrir puntos al so equipu davezu. Un perbón resultáu ensin duldes pa la escudería.

Renault nun pudo puntuar más que con Ricciardo. Nun foi’l puestu ideal pero a lo menos ye un puñáu de puntos que-yos val pa siguir trabayando ya medrando. Hülkenberg nun pudo entrar nos puntos y tuvo de conformase cola décimocuarta posición. Les decisiones d’estratexa condicionaron la carrera de dambos y’l pilotu australianu almitía que nun fuera la correuta y que tiníen bastante más que pa ser novenos. Zarrando la clasificación de los diez primeros atopamos al Haas de Grosjean que tuvo una carrera bastante más discreta que’l so compañeru d’equipu, que nun pudo aprovechar el puxu del sábadu ya namás pudo terminar nel puestu doce. Amás el pilotu francés tuvo penalización por un incidente en pista. Esperábemos bastante más de Haas sobre manera dempués de ver la sesión de clasificación del sábadu anque tampoco nun nos estraña porque ya vien siendo vezu que tengan meyores sábados que domingos.

Les grandes deceiciones d’esti gran premiu fueron, sacante Leclerc, tanto Alfa Romeo como Racing Point. Nengún de los dos equipos puntuó ya tuvieron carreres bastante probes, con munchos problemes ya choques ente ellos. Alfa Romeo tinía motivos pal optimismu dempués de les sesiones de llibres del xueves, pero desapaeció tol sábadu y’l domingu. Paez que nestos últimos grandes premios el so rendimientu ta baxando daqué y quiciábes seya Mónaco’l puntu dende’l qu’abordar meyores nel coche pa facelu otra vuelta competitivu. Lo mesmo podríemos dicir de Racing Point, que tienen bona falta d’un cambiu qu’ayude a reenganchar colos equipos de la parte medio de la tabla.

Williams nun consiguió puntos pero Russell terminó nel puestu quince y l’equipu sigue sumando carreres nes que dambos pilotos ven la bandera a cuadros. Kubiça acabó décimoctavu.

La Fórmula Ún pega agora un saltu pa dir hasta Canadá en dos selmanes, pal sétimu gran premiu de la temporada y ún de los favoritos del calendariu. Mientres esperamos que llegue’l día, equí vos dexamos tolos númberos de la carrera en Mónaco:

Clasificación

Carrera

Nun llevamos nin un terciu de les carreres d’esti 2019 y la F1 yá quedó güerfano dos vegaes. Al entamu d’esta temporada’l mundu formuleru aterrizaba n’Australia cola noticia del de la muerte de Charlie Whiting. Esta selmana, allegámonos a Mónaco dempués de saber que Niki Lauda yá nun ta ente nós. Yá s’escribió muncho y mui guapo sobre dambos, pero dende equí queremos sumanos a l’alcordanza de dos persones clave na F1 tanto enantes como agora.

Colo murnio d’esta noticia, llega’l gran premiu de Mónaco, ún de los clásicos del calendariu, nel míticu circuitu que percuerre les cais de Montecarlo. Arrodiáu de glamour dientro y fuera de la pista, ye una de les cites más esperaes del campeonatu anque non siempre nos dexe carreres interesantes. De fechu, suel ser la sesión de clasificación la que más intensa ye por cuenta de lo estrecho del circuitu y de la necesidá de facer too bien pa nun acabar pa colos muros enantes de tiempu. Siempre se diz que la pole ye clave nes cais monegasques y esti añu nun ye esceición.

Tal paez que nun hai nada que pare a los Mercedes esti añu yá que, ensin querelo, empezamos a poner el focu más na llucha ente ellos agora que Bottas paez que ta dispuestu a complicar les coses a Hamilton. Sicasí, equí nun queremos descartar a nengún equipu y sobre manera a Red Bull que suel tener en Mónaco una de les sos carreres favorites del calendariu. Cuntando col papel tan bonu que ta faciendo Verstappen hasta agora, nun ye raro pensar que pueda facese cola so primer victoria de la temporada, si Mercedes lo permite. Como yá diximos, la pole equí da munches posibilidaes de ser el primeru en ver la bandera a cuadros ya esti añu Mercedes ta vendiéndola cara.

En Ferrari tienen una oportunidá perbona de por fin consiguir la naguada victoria y naide más enfotáu nello que Charles Leclerc que cuerre’n casa. Facese col gran premiu de Mónaco nel so añu de debú en Ferrari de xuru que ye dalgo colo que suaña’l pilotu monegascu y si en dalgún sitiu puede la Scuderia entamar a camudar la direición del campeonatu ye equí.

Mónaco ye siempre un gran premiu d’esperances pa los equipos que tán teniendo una mala temporada o, ensin ser mala, non tan bona como cuntaben. Suel ser vezu que l’equipu que va últimu ya ensin puntos sume equí, asina que ye bon motivu pa Williams pa partir cola ilusión de poder algamar anque seya’l décimu puestu y sumar un puntu qu’anque poca cosa puede valir p’allegrar un pocu un garaxe qu’anda, con razón, bien murniu dende l’entamu de la temporada.

El restu d’equipos tarán afilando los dientes porque saben que ye en Montecarlo onde pueden facer la diferencia y onde les distancies curties del campeonatu pueden desapaecer o agrandase. Un bon puñáu de puntos en Mónaco puede dar puxu pa les carreres vinientes ya neso tán pensando equipos de la parte medio de la tabla como McLaren, Renault, Toro Rosso, Racing Point F1, Haas y Alfa Romeo.

Les posibilidaes de coche de seguridá son mui altes, con visites avezaes a los muros tanto nes sesiones de clasificación (ya entrenamientu) como na carrera, asina qu’esi aspeutu va ser clave nes estratexes que planteguen los equipos. Tolos güeyos van tar puestos enriba Ferrari nesi sen a cuenta de les decisiones estratéxiques de grandes premios pasaos que condicionaron enforma les carreres de los sos pilotos.

Una vegada más llega la F1 a Mónaco y, como siempre, failo dende’l xueves. Esta ye tola información d’horarios y del circuitu que precisais pa esta fin de selmana:

Y equí vos dexamos la información sobre les gomes de Pirelli que vamos a ver nesti gran premiu:

Ente rumores sobre’l so futuru, el Circuit de Catalunya dexónos una carrera que, anque nun va pasar a la historia como una de les meyores de la temporada, tuvo dellos momentos interesantes. Siéntense poques voces dispuestes a defender la importancia d’esti gran premiu nel calendariu, pesie a lo que pueda paecer siendo’l sitiu al que los equipos van a facer los sos test de pretemporada. Cuidábemos qu’esta fin de selmana díbemos aclarar a qué anda Ferrari y si lo de Mercedes foi una coincidencia y paez que lo consiguimos: Ferrari nun sabe a qué anda y non, lo de Mercedes nun foi coincidencia.

SÁBADU

Anque les sesiones de llibres nun fueron mal pa Ferrari, el dominiu foi de Mercedes na clasificación y más específicamente de Bottas, con una pole de más de mediu segundu perriba’l so compañeru d’equipu Lewis Hamilton que clasificó segundu. Vettel tuvo de conformase con ocupar el tercer llugar na parriella, con Leclerc desinfláu en quintu y Verstappen aprovechando, otra vegada más, la desgracia de la Scuderia pa colase nel cuartu. Zarraron la parriella de los diez primeros los dos Haas, el Red Bull de Gasly, el Toro Rosso de Kvyat y un Ricciardo que nun apuntaba a poder metese tan arriba. Nun hebo munches sorpreses nel restu, anque sí pensábemos que McLaren diba tar con dalgún de los sos pilotos na Q3. Ye verdá que Norris quedó a piques d’entrar y clasificó undécimu. Fuera na primer ronda quedaron Stroll, que sigui la so rutina y Hülkenberg que nuna escursión pela grava quedó ensin alerón delanteru. Sicasí, el pilotu alemán de Renault tuvo d’entamar la carrera dende’l pitlane porque’l so equipu nun informó a la FIA del cambiu del alerón. Russell tamién llevó penalización, de cinco posiciones, por cambiu de caxa de cambios. Pal pilotu inglés supunxo salir últimu na parriella.

DOMINGU

La pole nel Circuit de Catalunya suel ser sinónimu de victoria. Enantes d’esti gran premiu, 21 de les 29 victories ganáronse dende’l primer puestu de la parriella. Amás, pintaba que Bottas podía ponese fácilmente como llíder de la carrera y llueu nun tener mayor preocupación que tirar y meter distancia. Esa ye la teoría y de xuru lo que’l pilotu finlandés tinía en mente. Pero la teoría nun funciona siempre y muncho menos na F1. Quiciábes podemos dicir que na salida quedó decidíu’l resultáu final del gran premiu. Bottas quedó clavau mientres que Hamilton yá se ponía per delantre, y anque tuvo a piques de recuperar la posición, convirtióse nel rellenu del sandwich ente Vettel y Hamilton onde’l pilotu inglés foi quien s’impuso. L’alemán bloqueó les ruedes y eso permitió a Bottas conservar la posición, pesie a un estrañu que-y fexo’l coche pero que nun pudo aprovechar Vettel. Los dos Mercedes yá tiníen les sos posiciones tomaes pero’l pilotu de Ferrari tovía perdería otra con Verstappen qu’aprovechó un momentu lentu del alemán pa ponese per delantre.

Leclerc pel so llau fundió un pocu na salida anque pudo dir recuperando posiciones y de fechu l’equipu llegó a imponer órdenes pa que Vettel lu dexara pasar ya intentar alcanzar a los d’arriba, pero nun valió pa muncho y les posiciones tornaron al so estáu orixinal pocu dempués. La estratexa de parada del equipu coloráu tampoco nun ayudo muncho. Intentaron ganar la partida a Mercedes per ehí, pero dos paraes lentes condicionaron muncho’l restu del gran premiu. Ye imposible ganar a Mercedes si nun yes superior a ellos y Ferrari esti domingu nun lo foi.

Dempués de les primeres vueltes, y una escursión de Räikkönen pela grava, la carrera asentó y tolo más que vimos foi adelantamientos de Kvyat pa dir subiendo posiciones que lu metieron ente los diez primeros. Ricciardo tuvo una batalla interesante con Sainz pero pocu a pocu foi desinflándose y terminó fuera de los puntos. Los dos Haas tamién fueron protagonistes, ente ellos y con otros pilotos, de batalles perprestoses en pista, anque Grosjean salióse hasta tres vegaes del trazau y tuvo de dir per la escapatoria, el camín llargu.

L’únicu incidente del gran premiu con consecuencies protagonizáronlu Lance Stroll y Lando Norris. El pilotu inglés taba intentando adelantar al canadiense que lu zarró de más y acabó con dambos na grava, Stroll cola parte trasera del coche escontra les proteiciones y Norris col coche dañáu y ensin poder continuar. Esti eventu provocó un coche de seguridá que desarmó les estratexes de los coches pero nun camudó’l resultáu final. Hamilton féxose cola victoria, siguíu de Bottas y Verstappen. Vettel namás pudo ser cuartu, siguíu pol so compañeru Leclerc.

Gasly nun tuvo al altor de Verstappen, y dexó’l so Red Bull nel sextu llugar. Sicasí, el pilotu francés va pasín ente pasu ameyorando. Haas terminó la carrera con dambos pilotos en puntos, con Magnussen sétimu y Grosjean zarrando’l grupu de los puntos nel décimu. McLaren compensó un pocu la deceición del sábadu con Sáinz puntuando ya sigui dando pasinos alantre na so recuperación. Toro Rosso entró en puntos con Kvyat, que foi ún de los meyores pilotos de la carrera y quedó novenu, pero non con Albon, que quedó a les puertes nel puestu once. Alfa Romeo tuvo una carrera mui floxa, con dambos pilotos lloñe de los puntos y con munchos problemes. Podemos dicir lo mesmo de Renault, que siguen ensin llevantar cabeza. Racing Point, aparte del incidente de Stroll, nun pudo facer muncho más con un Pérez desapaecíu tola carrera. El pilotu mexicanu namás pudo ser décimoquintu. De Williams cabe dicir pocu: terminaron el gran premiu con dambos pilotos, dalgo a rescamplar, pero siguen mui lloñe del restu.

La F1 ponse en camín a Mónaco onde, en dos selmanes, va disputase’l sextu gran premiu de la temporada. Les conversaciones sobre’l futuru del Gran Premiu d’España siguen y taremos sollertes énte cualquier cambiu anque paez que vamos tener que dir mirando pa Zandvoort nun tardando. Demientres, equí vos dexamos tolos númberos de la fin de selmana nel Circuit de Catalunya:

Clasificación

Carrera

L’espectáculu de la Fórmula Ún aterriza n’Europa dafechu. El trazáu de Montmeló va ser testigu de la que puede ser la última carrera d’esta competición hasta dientro un tiempu, dempués de que los organizadores del eventu decidieran nun siguir por falta de sofitu económicu. Cuerren malos tiempos pal deporte de motor y los países qu’acueyen grandes premios cada vegada tienen qu’invertir más dinero, daqué qu’a vegaes nun compensa o nun cuadra colos númberos que se faen d’entrada. Asina les coses, de momentu cuntamos qu’esti va ser l’últimu gran premiu de F1 que se faga en Barcelona, pero imaxinamos que los test sigan siendo una cita obligada de la pretemporada dalgo, sicasí, qu’entavía nun tenemos confirmao.

Pa equipos y pilotos llegó’l momentu nel que’l campeonatu se pon seriu. Les carreres que vimos hasta agora dexaron claro que Mercedes tán meyor entá de lo que se suponía al entamu la temporada y que Ferrari, al contrariu, nun dan cola fórmula pa ponese al so altor. Equí tienen quiciábes una de les últimes oportunidaes de nun dexalos escapar. Foi en Barcelona onde vimos al Ferrari amosar un rendimientu que nos fexo creyer qu’esta temporada diben ser ellos los que mandaren, asina que tenemos la oportunidá de comparar agora, col campeonatu yá en marcha.

Amás, Montmeló suel ser sinónimu de meyores nos coches, el puntu de partida más marcau de les evoluciones de los coches. De fechu, Ferrari anunció que diben a introducir una meyora na so unidá de potencia, anque primero de lo que cuntaben. Lo mesmo pasa con Haas, que llega al circuitu catalán col enfotu de facer valer toles meyores que trai y coles que cuida dexar atrás los malos resultaos de carreres pasaes. Sicasí, nel equipu estauxunidense nun quieren emocionase de más si non dir a puquitinos, clave nesta temporada tan llarga.

Anque Ferrari ta siendo oxetivu de toles crítiques y duldes, hai dellos equipos que nun terminen de dar los resultaos que s’esperaben. Ye’l casu de Renault que sacante los puntos de hai un par de carreres, la verdá ye que nun ta teniendo un empiezu de temporada nada provechosu. Ricciardo nun termina les carreres (de momentu namás una) y Hülkenberg nun ta en meyor situación. Pa un equipu col que cuntábemos como cuartu meyor equipu, la deceición ta siendo, de momentu, bastante grande. Sicasí, la escudería francesa llega a Montmeló col convencimientu de que pueden recuperar la competitividá pa evitar que se-yos escape esi cuartu puestu nel mundial.

Otru equipu que tamién trai meyores, anque discretes, al circuitu de Montmeló ye Red Bull. Ensin facer muncho ruíu, Verstappen ta terceru nel mundial de pilotos y Red Bull tien a tiru a Ferrari (dalgo que la Scuderia nun puede dicir de Mercedes) y paez que la estratexa de dir carrera a carrera esti añu ta funcionando. La suerte nun acompaña de momentu al otru llau del garaxe y Gasly entavía tien munches coses qu’amosar. Barcelona puede ser un bon escenariu pa ello.

Ta desenvolviéndose una llucha bien guapa ente los equipos de metá de la tabla que tenemos ganes de ver nel asfaltu esta fin de selmana. McLaren, Toro Rosso y Racing Point, col permisu de Haas y Renault, tán siendo los que más provechu tán sacando a les miseries d’estos últimos. McLaren ta cuartu nel mundial, pesie a nun tar puntuando regularmente, y Racing Point paez que va garrando ritmu carrera a carrera. Toro Rosso, con Albon amosando un rendimientu perbonu, tamién tán reivindicándose y eso ye siempre bono pal espectáculu nes carreres. Si hai una cosa que tenemos clara nesta temporada ye que los rookies nun tienen nin llercia nin nervios a ponese al volante incluso cuando ye en circuitos que nun conocen.

Williams sigui col pasu cambiau pero calteniendo una racha que non siempre se tien en cuenta y ye que l’equipu inglés, con tolos problemes ya’l so baxu rendimientu, acabó toles carreres con dambos coches. Esti fechun nun los saca del pozu nel que tán metíos pero sí puede servir de motivación. La fiabilidá ta ehí, agora fai falta que’l coche corra dalgo más.

Con too preparao pa otra fin de selmana más de Fórmula Ún, equí vos dexamos tola información sobre’l circuitu, los horarios y les gomes coles que los equipos van competir en Barcelona:

Bakú nun foi l’escenariu d’una carrera memorable esti domingu y cumplió cola llei tantes vegaes repitida na F1 de que, cuando esperes muncho d’un gran premiu, ye mui posible que te faga vociar.

Foi otru suma y sigui pa Mercedes ya un nuevu tascar la cabeza pa Ferrari qu’entá nun son quien a responder a lo que tol mundu esperaba d’ellos viendo los test de pretemporada en Montmeló. Vamos per partes:

SÁBADU

Les calterístiques de Bakú faen que tengamos zones nes que les paredes pasen a milímetros de los monoplaces, mientres n’otres partes ye posible pasase ensin munchu riesgu. Ye quiciábes lo que fai qu’esta carrera seya tan interesante. Dempués de ver el fin de selmana completu casi podemos dicir que’l sábadu foi’l que decidió too. Leclerc tinía tomada la midida al restu de pilotos, dalgo que yá comentábemos que podía pasar, pero un erru al bloquiar les ruedes nuna de les partes más reviraes del circuitu fixolu acabar contra les protecciones na Q2 y quedar fuera de la llucha pola pole na Q3.

Pa facenos una idea del tipu de sesión de clasificación que tuvimos el sábadu, na primer sesión la bandera colorada apaeció por cuenta d’un accidente de Kubiça nel mesmu puntu nel que dempués terminaría Leclerc. El pilotu polacu terminó saliendo dende’l pitlane. Sicasí, nun tuvimos demasiaes sorpreses nos puestos cimeros,sacante la de Leclerc que nun pudo competir y salió décimu. El domingu pela mañana recibíemos la información de que Räikkönen fuera descalificáu por irregularidaes col so alerón delanteru dempués de clasificar nos diez primeros.

Vettel nunca nun paeció tar cerca de facese cola pole siendo’l so ritmu bastante inferior al de los dos Mercedes. Queda la dulda de lo que tuviera fecho Leclerc, anque nun duldamos que tinía munches posibilidaes d’ocupar el primer puestu de la parriella’l domingu. Ensin elli, Bottas consiguió la segunda pole de la so temporada, amosando como esti añu sí ta compitiendo a un nivel muncho más altu que los años previos en Mercedes.

Gasly nun punxo munchu enfotu na sesión de clasificación tres ser penalizáu con una sanción que lu obligaba a salir dende’l pitlane por ignorar les indicaciones pa dir a la zona de pesaxe del coche. Verstappen quedó cuartu per detrás del Ferrari de Vettel.

Haas tampoco nun tuvo una bona sesión con Magnussen décimocuartu y Grosjean clasificando décimosétimu, acompañando a los Williams y a Nico Hülkenberg, que nun termina d’atopase nesti circuitu. El pilotu alemán comentó que nun tien enfotu nel coche. Toro Rosso tinía munches posibilidaes d’entrar nel grupu de los diez primeros pero nun pudo ser nel casu d’Albon quedando fuera na Q2 anque Kvyat sí foi quien a ponese novenu. Lo mesmo podemos dicir de los pilotos de McLaren: Lando Norris clasificó sétimu mientres que Sáinz conformose col puestu once. Racing Point consiguió clasificar en quinta posición con Pérez mientres Stroll namás podía ser décimocuartu. El pilotu canadiense sigui sumando sesiones de clasificación bastante probes. Dambos Alfa Romeo entraron ente los diez primeros, dalgo que Giovinazzi entavía nun consiguiera, pero la descalificación de Räikkönen y la penalización del pilotu italianu por cambiu de motor empañó un pocu’l llogru.

DOMINGU

La salida’l domingu foi una d’eses que dexen ensin respiración demientres instantes. Hamilton salió muncho meyor que’l so compañeru anque ésti recuperose rápido y dambos regaláronnos momentos de competición rueda a rueda nos que nengún de los dos quiso ceder énte l’otru. Falando como falamos de les condiciones del circuitu de Bakú, la cercanía de los muros daba vértigu al ver los monoplaces competir ensin mieu dalu lluchando por posición dende bien ceo.

Sergio Pérez foi otru de los protagonistes del entamu de la carrera al adelantar a Verstappen y colocase xusto detrás del Ferrari de Vettel. Leclerc, pel so llau, perdió posiciones col Renault de Ricciardo ya’l McLaren de Sáinz. Pesie a tolos riesgos, la salida foi bastante llimpia y nun hebo casi incidentes.

Pasín ente pasu, adelantamientu tres adelantamientu, dellos pilotos fueron recuperando posiciones. Foi’l casu de Leclerc que pronto pasó a Sáinz, y de Stroll que fexo por compensar el probe rendimientu del sábadu pa, na vuelta cinco, ponese novenu. Nun ye daqué qu’abluque porque esti circuitu ye talismán pal pilotu canadiense. Viendo lo que vimos en carrera nun dexamos de pensar nes posibilidaes de lluchar polos puestos cimeros si tuviera fecho una bona sesión el sábadu. Los dos Toro Rosso tuvieron los sos momentos, con Albon poniéndose per delantre de Kvyat pesie a clasificar bastante más atrás.

Los güeyos taben puestos enriba de Charles Leclerc y lo que podía facer dende’l novenu puestu, perdíu na salida. Na vuelta diez yá yera terceru, dempués d’adelantar a Verstappen nuna maniobra que nos abultó mui cenciella pal pilotu de Ferrari, ensin muncha resistencia per parte del so rival, dalgo a lo que nun nos tien mui avezaos.

Una de les imaxes más repitíes d’esti gran premiu foi la de los coches diendo recto nes curves y terminando nes escapatories. Los Haas pasaron por elles más d’una vegada, dalgo que condicionó les sos posibilidaes de ponese en puntos al terminar la carrera. Paez que’l rendimientu del equipu estauxunidense sigui ensin ameyorar.

La estratexa xeneral yera una parada. En Ferrari optaron per esa opción pa Leclerc y abúltanos que d’esta manera condergáronlu al puestu nel que terminó viendo la bandera a cuadros. Na vuelta trenta y dos el Mercedes de Bottas primero y al pocu’l de Hamilton, dexaron terceru al pilotu monegascu qu’entavía nun parara y defendíase como podía con gomes medies y más vueltes que les de los dos Mercedes.

Demientres, nesa mesma vuelta, Kvyat y Ricciardo fueron protagonistes d’un de los incidentes del día: el pilotu de Renault intentó adelantar al pilotu rusu pero pasóse de frenada y terminó na escapatoria. Kvyat, por cuenta d’esti movimientu del australianu nun pudo completar el xiru, y acabó nel mesmu llugar. Nun intentu de salir d’au taben dambos, Ricciardo metió marcha atrás y terminó dando al pilotu de Toro Rosso maniobra que-y valió una penalización de tres posiciones pal gran premiu de Catalunya de dientro de dos selmanes y qu’acabó por facelu abandonar, mesmo que a Kvyat. Dempués de l’allegría de China les coses tornen a pintar mal en Renault.

Leclerc siguía na so particular batalla por averase al podiu a base d’adelantar coches en pista dempués de la probe estratexa escoyida pol so equipu. Una de les sos víctimes foi Pierre Gasly que partiendo del pitlane rodaba sextu cuando’l so coche quedó paráu y fuera de carrera, provocando un coche de seguridá na recta final de carrera. Grosjean tamién terminaría abandonando.

Nes últimes vueltes los dos protagonistes sedríen los Mercedes. Coles alcordances del añu pasáu cuando Bottas llideraba la carrera y un pinchazu terminó por dexalu ensin la victoria, Hamilton intentó ponese per delantre pero’l finlandés tuvo más suerte esta vegada y foi’l ganador d’un gran premiu que, anque tuvo dellos momentos d’intensidá, nun va pasar a la hestoria como’l meyor eventu nel circuitu de Bakú. Leclerc conformóse con facer la vuelta rápida de carrera, pocu consuelu pa una carrera que de xuru tuviera podío ganar con una meyor estratexa ya más fortuna’l sábadu.

Ye la cuarta vegada esta temporada (esto ye, en tolos grandes premios) que Mercedes termina una carrera colos sos pilotos nes dos primeres posiciones. Vettel namás pudo completar la carrera en tercer puestu col so compañeru quintu per detrás de Verstappen. Acompañándolos en puntos, el Racing Point de Sergio Pérez qu’anque nun consiguió podiu sí que confirmó que, definitivamente, esti circuitu dase-y  bien. Per detrás, Sáinz y Norris dexando claro que McLaren va, pasín ente pasu, avanzando y ameyorando y yá son cuartos na clasificación de constructores. Ye la primer vegada esta temporada que dambos pilotos sumen puntos. Zarrando la clasificación de los diez primeros, Lance Stroll novenu y Kimi Räikkönen décimu, compensando un pocu la deceición de la so descalificación.

Fuera de puntos, queden los dos Williams nes caberes posiciones y dempués d’un fin de selmana peraccidentau pa ellos. Aparte del accidente de Kubiça’l sábadu, Russell tuvo lo de so y na primer sesión d’entrenamientos llibres una tapa d’alcantariella que taba suelta destrozó la parte baxo del so coche, provocando una bandera colorada que duró toda la sesión. Dientro de tolo negativo que foi y del fechu de que siguen clasificando últimos, la carrera de Russell foi bastante decente.

Un pocu perriba Hülkenberg, qu’en nengún momentu dio signos de recuperación dende’l sábadu y Magnussen, que nun abandonó pero namás pudo terminar un puestu perriba que’l que clasificó’l sábadu. Completen la clasificación final Giovinazzi nel puestu doce y Albon a les puertes de los puntos nel once.

Ponenos rumbu a Catalunya pal siguiente gran premiu en dos selmanes onde Ferrari va tener que responder a lo que venimos viendo nel llau de Mercedes si quieren tener dalguna oportunidá de consiguir dalgún de los dos campeonatos esta temporada. Mientres llega esi día, equí vos dexamos tolos númberos del sábadu ya’l domingu en Bakú:

Clasificación

Carrera

Cuando nuevos circuitos entren nel calendariu de F1, suelen atopase con recelu pola falta de raigañu del deporte nel país onde se sitúen o pol tipu de trazáu que se diseña. Foi’l casu de Bakú cuando entró nel llistau de carreres del deporte de motor. Va pa tres años yá ya, por méritu propiu, tornóse n’un de los grandes premios más esperaos de la temporada. Nos dos años pasaos foi, ensin duldes, una de les carreres más interesantes ya intenses (si non la más) del añu asina que paez normal qu’agora, pesie a siguir siendo un circuitu onde l’afluyencia de xente ye pequeño en comparanza con otros, llegar a Bakú seya casi sinónimu de que nos espera un bon domingu. Una recta bien llarga y cais estreches prometen dar espectáculu un añu más.

Si añadimos a too esto que’l tiempu tien pinta de querer tener un papel importante tamién, les espectatives medren bastante. Tolos equipos lleguen con cambios nel alerón traseru p’adautase a les calterístiques del trazáu de Bakú, bien estremáu del de Shanghai.

Ferrari va con too. Esperen facer bon usu de la primer meyora que van introducir na temporada nel so coche y acurtiar la distancia que yá mete Mercedes ente ellos, dempués d’un aniciu de temporada cásique inesperáu pa dambes escuderíes. Les fleches platiaes, con tres victories nes tres primeres carreres, son protagonistes d’un de los meyores entamos de temporada n’años pero l’enfotu de Ferrari ye poner frenu a esta situación enantes de que se faga tarde. Les duldes, comprensibles, tán instalaes nel equipu ya una bona actuación nel circuitu d’Azerbaixán ye clave pa dexales atrás y ponese al altor de Mercedes. A Leclerc dase-y bien esti trazau, yá lo amosó en F2 ganando, asina que tolos güeyos van tar, una vegada más, puestos enriba d’elli.

Red Bull nun ta recibiendo tanta atención como los otros dos equipos, pero ta aprovechando les debilidaes de Ferrari. Gasly entamó la temporada col pie cambiau pero en China yá lu pudimos ver ocupando posiciones esperables del so equipu. Sicasí, les sesiones de clasificación entavía precisen meyora y Bakú va ser la clave. Tamién ellos van dir con ciertes meyores esperando averase un pocu más a los puestos d’arriba. Nun escaezamos que Verstappen ye agora mesmo terceru nel campeonatu de pilotos.

La batalla pol cuartu puestu nel mundial de constructores nun puede tar más interesante. Con cada carrera que vemos paez qu’hai un candidatu nuevu a ocupalu ya onde creyíemos que diba ser Renault el que dominara nesi sen l’equipu francés nun ta teniendo les coses de cara. Entavía nun pudo acabar una carrera con dambos coches, anque Ricciardo puntuó en China dempués de nun terminar nes otres dos carreres. Hülkenberg nun ye mui fan d’esti circuitu y nel pasáu los resultaos nun fueron los meyores pa elli, pero cuida qu’esti añu va poder ver la bandera cuadros y amás dientro de los puntos.

Haas prometíen más de lo que llueu amosaron. Dambos pilotos tán teniendo problemes p’algamar el puntu de les gomes sobremanera en carrera yá que nes sesiones de clasificaciones suelen colase ente los diez primeros. Quiciábes Bakú ye ún de los circuitos más desixentes nesti aspeutu pola cantidá d’aspeutos qu’hai que tener en cuenta, pero l’equipu estauxunidense, como otros equipos, vienen con meyores qu’espera qu’ayuden a compensar el dolor de cabeza que, pel momentu, ta dando’l manexu de gomes.

McLaren ta teniendo un aniciu de temporada que fai difícil predicir si va bien o non. Sáinz nun tuvo muncha suerte, mientres que Norris pudo puntuar hai dos grandes premios. China foi una deceición pa dambos pilotos, amás de ser un circuitu que nun s’axusta a les calterístiques del coche pero Bakú puede camudar un pocu la historia y dar la oportunidá al equipu inglés d’entrar en puntos con dambos pilotos. Necesita un bon resultáu pa caltener la motivación y l’optimismu pa les carreres vinientes.

Racing Point aterriza en Bakú con toles ganes. Sergio Pérez ye’l pilotu con más podios nesti circuitu ya Lance Stroll fexo una gran carrera nel so debú equí, quedando segundu. Anque pel momentu l’equipu nun ta teniendo tola suerte y la regularidá deseyada, si miramos al pasáu, tienen munchos motivos pa tener ganes de que llegue’l domingu y averase a esos puestos cimeros a los que tan avezaos nes cais de la capital d’Azerbaixán.

Alfa Romeo tamién tien razones pa ser optimista. Giovinazzi nunca nun compitió en F1 equí pero sí na F2 y con perbonos resultaos (de fechu n’una de les carreres salía últimu ya terminó ganando). Sicasí, nun va tenelo fácil porque parte con una penalización por cambiu de motor. L’equipu anda amás intentando compensar los errores en pasaos grandes premios nel pit stop, buscando eliminalos pal futuru.

Toro Rosso nun ta brillando escesivamente, pero Alexander Albon ta teniendo un entamu de temporada bastante curiosu pa ser el so debú. En Bakú va camudar lixeramente la so manera d’enfocar les sesiones de llibres pa cuntar con toles posibilidaes de puntuar el domingu. Nun podemos escaecer que, pesie a correr yá equí en F2, les coses camuden na F1 y les sesiones de llibres pa los rookies nun dexen de deprendizaxe.

En Williams siguen pasín ente pasu, faciendo por ameyorar no posible. Nel pasáu tuvieron resultaos positivos nesti circuitu, anque nun tien pinta que güei vaiga a replicase. Quiciábes seyan los que más puedan aprovechar de cualquier eventu en forma de lluvia o incidentes nos puestos cimeros.

Yá ta too preparao pa un nuevu capítulu d’esta temporada y l’escenariu nun podía ser más interesante. Embaxo podéis atopar tola información sobre’l circuitu, los horarios de llibres, clasificación y carrera amás de les gomes escoyíes pa esti gran premiu:

Una de les coses a les qu’una persona que siga la Fórmula Ún s’aveza rápido ye a carreres interesantes. Por eso, cuando un gran premiu ye más bien aburríu la deceición ye grande, y más cuando se cellebra’l númberu 1000. China 2019 nun va pasar a la historia como’l meyor gran premiu de la temporada, anque de xuru que nun va ser l’únicu d’esti añu.

Otra victoria pa Mercedes de la mano de Lewis Hamilton con Bottas segundu faen qu’esti aniciu de temporada seya’l meyor d’un equipu dende 1992 con Williams. Trés carreres ocupando les dos primeres places nuna temporada que, se supón, diba tar dominada por Ferrari dende bien ceo. La Scuderia anda revuelta poles estratexes probes en pista, poles ordes d’equipu que nun acaben de beneficiar a naide y qu’amás aprobecen les rellaciones internes, creando tensiones que faennos alcordanos de situaciones asemeyaes del pasáu. La realidá ye que Mercedes mete más distancia entá nel campeonatu de constructores y Hamilton yá llidera’l de pilotos.

SÁBADU

Na sesión de clasificación tuvimos poques novedaes en cuantes a los resultaos. Alexander Albon nun pudo participar por cuenta un accidente que tuvo na tercer sesión de llibres, la que se fai xusto enantes de la clasificación, y que fexo que fuera imposible pal equipu tener el coche llistu. A elli sumábase Giovinazzi que tampoco nun pudo siquier poner una vuelta pa intentar pasar de la Q1. A ellos tenemos qu’añader los dos Williams y un Lance Stroll que nun termina de garra-y el puntu al coche’l sábadu.

Pela parte alto, toca destacar la pole de Bottas, que tuvo dende’l vienres muncho más sólidu que’l so compañeru d’equipu, que clasificó per detrás con Vettel terceru. Un aspeutu llamador d’esta clasificación foi que los pilotos salieron empareyaos, esto ye los dos primeros Mercedes, siguíos de los dos Ferrari, los dos Red Bull, los dos Renault (bona clasificación del equipu francés) ya los dos Haas. Deceición nel garaxe de McLaren con dambos pilotos fuera de los diez primeros y de Kimi Räikkönen que namás pudo clasificar décimoterceru.

DOMINGU

Si n’Australia Hamilton quedaba claváu por falta de tracción na pole, esta vegada tocaba-y a Bottas sufrilo. El pilotu inglés pasó al so compañeru pa facese col primer llugar, puestu que nun diba dexar hasta ver la bandera a cuadros. Una vegada más el pilotu inglés tuvo una carrera tranquila, con bona xestión de neumáticos, una estratexa bien plantegada y cásique nenguna batalla en pista. Podemos dicir lo mesmo del so compañeru. Valtteri Bottas, pesie a ser segundu, tampoco nun tuvo muncha competencia y dexó claro que Mercedes taba n’otra lliga esti domingu. La superioridá yera tala que l’equipu fexo un pit-stop doble siguíu (dambos pilotos pararon al tiempu) que nun supunxo torga pa nengún de los dos.

Per detrás, Ferrari. Leclerc pasó a Vettel na salida pero nun foi quién a ponese al ritmu de los Mercedes. Na vuelta 11, dende’l muru pidieron a Leclerc que dexare pasar a Vettel porque ésti yera más rápidu qu’elli. El pilotu monegascu obedeció, non ensin cuestionar la decisión. Y ye que’l so compañeru tampoco nun abrió güecu y siguió dientro de DRS demientres un bon tramu de carrera dempués de la orde de cambiu. El pilotu alemán entró a cambiar gomes primero que Leclerc, al que l’equipu dexó más tiempu en pista nuna decisión estratéxica de Ferrari qu’ayudó a que Verstappen, que diba quintu, lu terminara pasando pa ocupar esi cuartu puestu que’l pilotu holandés yá nun diba dexar hasta’l final.

Red Bull ta avezándose esti añu a aprovechase de los erros de Ferrari. Equí l’equipu italianu regaló la cuarta posición y más tarde la vuelta rápida, que foi pa Gasly a falta de dos vueltes pa terminar la carrera. Hasta esi momentu, la vuelta rápida yera pa Vettel y con ella el puntu que recibi’l pilotu que la fai. Gasly nun tuvo tan finu como Verstappen, ya sigui tando cuestionáu por nun ser quien a tar al alto del so compañeru. Ye verdá que terminó un puestu per detrás d’elli y que fexo una parada a última hora, pero la distancia ente ellos demientres la carrera siempre foi bastante grande. El pilotu francés tovía tien muncho trabayu per delantre.

Ricciardo por fin foi quien a ver la bandera a cuadros. Dempués de dos grandes premios abandonando, el pilotu australianu terminó sétimu, una bona posición pero mui lloñe de los pilotos de la parte d’arriba. Amás, Hülkenberg tuvo otru abandonu por cuenta, paez, d’un fallu na unidá de potencia, lo que fai qu’esi sétimu puestu de Ricciardo nun sepa tan dulce. La fiabilidá de Renault tovía nun ta garantizada y na escudería sábenlo. Si quieren replicar el cuartu puestu del añu pasáu entavía-yos queda camín.

Racing Point ta teniendo que bregar muncho esti añu p’adautase a un coche con munchos cambios. Nun ayuda que los sos pilotos nun tean faciendo un bon trabayu los sábados. Sicasí, en carrera muéstrense bastante más sólidos y, de fechu, Sergio Pérez foi’l pilotu que fexo la meyor salida nesti gran premiu, colocándose en puntos nel primer xiru. El so compañeru Lance Stroll nun pudo entrar en puntos, pero tamién tuvo una salida bastante bona que lu fexo xubir de posiciones. Pasín ente pasu van sumando y ameyorando.

Alfa Romeo xeneró al principiu de la temporada unes espeutatives que de momentu nun tán espeyaes nos resultaos. Sí ye verdá que Räikkönen entró en puntos pesie a tener un sábadu bastante gris, pero Giovinazzi tuvo desapaecíu tola fin de selmana. Ye un fechu qu’al pilotu italianu nun se-y da bien esti circuitu así que, per esi llau, nun hai sorpreses.

Pa zarrar los diez primeros, Alexander Albon. Foi nomáu pilotu del día y con tol méritu. Dempués del accidente del sábadu y de nun clasificar siquier, partía dende’l pitlane. Ensin facer munchu ruíu y con una xestión de gomes excelente, acabó nel puestu décimu, sumando otru puntu na so cuenta particular. Nun foi too aplausu en Toro Rosso. Al entamu de la carrera, Daniil Kvyat protagonizó un incidente xunto a los dos McLaren onde Lando Norris foi quien llevó la peor parte. Al pilotu rusu cayó-y una penalización de drive-through, bastante dura pa lo qu’en realidá foi l’incidente y creyemos que más bien debida a la so fama nel pasáu. Foi precisamente esti incidente’l que provocó un coche de seguridá virtual, l’únicu de carrera, pa llimpiar los restos que quedaron en pista, pero que nun condicionó pa nada’l restu del gran premiu.

Cola carrera torgada pola penalización, la cosa nun ameyoró pa Kvyat que faltando unes poques vueltes pal final tuvo de retirase, siguíu al pocu por Lando Norris, que nun pudo recuperase del dañu del coche. Sáinz túvolo un pocu meyor, pero non lo suficiente como pa puntuar. McLaren equí viníen con poques esperances de consiguir sacar dalgo bono y asina foi. 0 puntos ya otru gran premiu ensin que dambos coches puedan ver la bandera a cuadros.

Nun sabemos mui bien como describir lo que ta pasando con Haas. En dos de los tres grandes premios que llevamos, clasificaron ente los diez primeros, sicasí sólo puntuaron n’ún d’ellos. La irregularidá pa entrar en puntos ta evitando lo que tinía pinta de ser un aniciu bien fuerte del equipu estauxunidense. Les sos llimitaciones pa con otros equipos son obvies y de fechu Grosjean pudo puntuar nesti gran premiu, pero nun pueden tar contentos cuando nun son quien a mantener el bon resultáu de los sábados. La realidá ye que dambos pilotos quedaron fuera de los puntos (Grosjean P11, Magnussen P13). Queda muncho que reflexonar y trabayar.

Nun queremos nesti gran premiu falar negativamente de Williams. Ye verdá que siguen siendo l’últimu equipu en velocidá pero tán teniendo una fiabilidá del cien por cien. De les tres carreres disputaes hasta agora, en les tres dambos pilotos terminaron, que ye bastante más de lo que podíen dicir n’años pasaos. Na máxima competición del motor onde prima munches vegaes la velocidá, nun podemos escaecer la importancia de cuntar con coches que seyan fiables y permitan a los pilotos dir esplorando llímites y al equipu dir ameyorando.

El gran premiu de China 2019 foi bastante sosu, con batalles cuntaes en pista (rescamplamos dos, una de Vettel con Verstappen y otra de Räikkönen con Magnussen) y si acasu un pocu más d’interés nes estratexes. Siguimos esperando ver esi dominiu de Ferrari que se nos prometía al principiu de la temporada, sobremanera viendo que Mercedes nun tán concediendo nada nin cometiendo erros. Nun sabemos si va pasar como’l cuentu del pastor ya’l llobu y que cuando naide cunte con ello nin crea nes sos promeses de meyora, Ferrari espabile y pase perriba de los sos competidores. Lo que nos paez que ta claro ye que Mercedes nun van quedase esperando a ver si llega esi momentu.

Ponemos yá la vista en Bakú, ún de los circuitos que meyores carreres nos dexó dende que ta nel calendariu. Esto va ser dientro de dos selmanes. Ente que llega esi día, equí vos dexamos tolos númberos de sábadu y domingu en China:

Clasificación

Carrera

1000. Un númberu redondu ya mui significativu pa esta fin de selmana de F1 que tenemos per delantre. Esos son los grandes premios que la máxima competición del motor lleva entamamos, una cifra bultable ya enllena de momentos intensos dientro y fuera de la pista.

China va ser l’escenariu de cellebración de la F1, un gran premiu de madrugones y carreres de les que queden na memoria. Col cambiu de feches nun tamos mui avezaos entá a tener esti gran premiu tán ceo na temporada (enantes facíase al tiempu del de Xapón) pero nun dexa de ser una de les carreres más prestoses aparte de la espectación d’esti añu pola facilidá (en teoría) d’adelantamientu que, coles rectes de Shanghai paez que va ser una de les claves del gran premiu.

Mercedes nun pudo suañar, al entamu la temporada, con un meyor aniciu d’ella: dos victories de los sos dos pilotos ya una distancia yá curiosa con Ferrari. Ye verdá que la Scuderia n’Australia nun amosó tolo que tinía yá cuntamos que nun va ser esa la so versión nel restu la temporada ya en Baḥréin la mala suerte cebóse con Leclerc y l’erru con Vettel. Ensin confiase de más, les fleches platiaes aterricen en China n’una posición cómoda nel campeonatu pero con muncho que disputar tovía.

Pensando nes dos temporaes pasaes nes que Ferrari mandaba nes primeres carreres, nun sabemos si quiciábes esti añu van camudar les coses y va ser la Scuderia la que pasín ente pasín vaiga espoyetando. Falta-yos fai si nun quieren ver a Mercedes alloñase. Viendo lo que vimos en Sakhir, con un Leclerc mui inspiráu, cuidamos qu’en China van querer desquitase de la mala suerte.

Red Bull ta teniendo, paeznos, más problemes de los que cuntaben. A lo menos nun de los llaos nel garaxe. Ye verdá que na pasada carrera dambos pilotos puntuaron, pero Gasly nun dio, de momentu, la so meyor versión. Llevamos namás dos carreres, pero nun equipu tán desixente como’l del toru coloráu, paeznos que’l pilotu francés va precisar meyores resultaos si nun quier que’l so asientu se ponga en dulda. Verstappen ta llevando, como s’esperaba, el pesu del equipu agora, y llega a China cola intención de dar otru pasu más alantre pa competir con Mercedes y Ferrari con más garantíes d’ésitu.

Pela parte medio de la tabla hai munchu baruyu, munches sorrises ya dalguna cara llarga. La mala suerte sigue pal llau de Ricciardo, que tovía nun vio la bandera a cuadros esta temporada. Namás fueron dos carreres, pero nel mundu de la F1 nel que too se cuestiona, estos dos eventos yá valieron pa cuestionar la decisión del pilotu australianu de movese a Renault. Nós nun queremos xulgar con tan pocu marxe ya esperamos que, por fin, esti domingu Ricciardo pueda esfrutar d’un gran premiu completu. Lo mesmo podemos dicir de Hülkenberg, qu’anque terminó n’Australia, tuvo problemes nel últimu gran premiu. La fiabilidá sigue poniendo nerviosu a Renault.

Toles persones qu’entienden un pocu de F1 yá afalagaron l’entamu de temporada de McLaren. Ye verdá que Sáinz tuvo mala suerte y nun pudo tampoco acabar les dos carreres disputaes, pero les blimes del equipu esti añu sí son fuertes. Lando Norris amosó que’l coche esti añu nun s’achanta ente nengún equipu, da lo mesmo quien vaiga al volante. Les notes positives son numberoses, pero mesmo que Renault, la fiabilidá sigui siendo la clave. Con ellos, Haas, Sauber y Toro Rosso, a la gueta los puntos en cada carrera y con muncha ambición en pista. De mano nun cuntábemos con que Giovinazzi, el pilotu de Sauber, fuera a dar muncho de sí, pero hasta agora lo que vimos d’elli foi bastante curioso y paez que tener al llau a un campeón del mundu nun lu achanta si non que lu motiva.

Racing Point ta teniendo un aniciu de temporada daqué irregular anque yá tien dellos puntos. La estabilidá económica entá nun dio estabilidá na maquinaria del coche pero paeznos que tienen potencial como pa enganchase al carru de los de más arriba.

Axallá pudiéramos dicir lo mesmo de Williams, pero la realidá ye que l’equipu inglés llega a China col enfotu de siguir acabando carreres y acurtiando distancies. Nun ye una situación ideal pero la verdá ye que, con eso y con too, los dos pilotos tán faciendo bones actuaciones.

En Shanghai tornen los madrugones. Equí vos dexamos tola información pa la fin de selmana:

Pesie a que nun ye ún de los grandes premios que destaque pola cantidá de xente que mueve na contorna, Sakhir suel danos bones carreres. Y nesti 2019 nun foi esceición, embaxo les lluces artificiales en mediu l’ermu vimos ún d’esos eventos que nos reconcilien cola máxima categoría del deporte de motor.

SÁBADU

Mesmo que pasara n’Australia, Ferrari mandó nos entrenamientos llibres. Sicasí, esta vegada sí tuvieron éxitu’l sábadu na sesión de clasificación y consiguieron ocupar les dos posiciones primeres de la parriella. L’orde nun foi, quiciás, el qu’esperábemos, anque paez que yera cuestión de tiempu que llegara’l momentu: Leclerc llogró la so primer pole como pilotu y pa Ferrari, y tornó nel segundu pilotu más mozu en consiguilo per detrás del so actual compañeru d’equipu, Sebastian Vettel, que’l sábadu foi segundu. Per detrás, los Mercedes. Les fleches platiaes tuvieron un fin de selmana gris ensin munchu enfotu no que se podía facer el domingu pa frenar a la Scuderia.

McLaren metió a los sos dos pilotos ente los diez primeros, dexando claro que sí, qu’esti añu’l McLaren funciona meyor anque’l so motorista  (Renault) nun fuera quien a metese con ellos nesi grupu. Hülkenberg nun pudo nin siquier pasar a Q2. El restu d’equipos siguieron más o menos lo que s’esperaba d’ellos, con dambos Haas otra vuelta nel grupu de más arriba, Racing Point bastante floxos y los dos Williams peliando ente ellos por nun zarrar la clasificación de salida del domingu. Tamién hai que rescamplar que Gasly nun pudo entrar na Q3.

DOMINGU

Con estes blimes entamó la carrera del domingu. La salida foi pa Vettel, que púnxose rápido en cabeza dexando al so compañeru engarráu colos dos Mercedes y siendo adelantáu bien ceo por Hamilton. Nun duró muncho la situación sicasí, y llueu’l pilotu monegascu recuperó les posiciones perdíes hasta tornar a ser primeru. Vettel siguiría gran parte de la carrera a la so busca.

Nun foi una salida bona pa tolos pilotos. Pela parte baxo vimos incidentes ente Grosjean y Stroll, que resultó con daños pal Haas y chispes na pista (d’estes vimos munches demientres la carrera) y una batalla interesante ente los pilotos por facese con bones posiciones pal restu de la carrera. Una de les primeres batalles que vimos foi la de Sáinz y Verstappen. El pilotu de McLaren tuvo una salida perbona y vióse lluchando rápido por posición col de Red Bull. Pero nun diba salir bien paráu d’esa amarraza y tres d’una maniobra d’intentu d’adelantamientu, el bloquéu de Verstappen fexo que se tocaren y que’l pilotu madrilanu tuviera d’entrar en boxes. La so carrera quedaba asina terminada. El pilotu holandés, pela so parte, nun se vio pa nada afeutáu por esti incidente.

El baille de paraes, les que nun viníen obligaes polos incidentes del principiu, arrancólu Pérez, y pasín ente pasín tolos equipos fueron faciendo les d’ellos. Ferrari paró a Leclerc mientres Mercedes paraba a Bottas, y al poco metió a Hamilton, lo que dexó a Ferrari y a Vettel nuna posición feble que fexo que’l pilotu inglés terminara pasándolu en pista cuando paró l’alemán. Otra vuelta más Ferrari condicionaba una carrera por cuenta la estratexa. Leclerc pel so llau siguía abriendo güecu con Bottas y Hamilton, mientres el restu d’equipos facíen camudar l’orde de la clasificación a cada poco. Les lluches taben presentes en toles zones del circuitu. De fechu, vimos un par de bonos adelantamientos de Lando Norris a Kimi Räikkönen. Estos rookies saben a lo que xueguen.

Mercedes tamién tuvo la so ración de tensión cuando los sos pilotos llucharon por posición. Esti añu, sicasí, esta batalla vióse d’otra manera porque Bottas vendió caru el so llugar en pista y anque Hamilton terminó imponiéndose, l’actitú del pilotu finlandés foi bien distinta a lo que nos tinía avezaos n’años pasaos. Hamilton tuvo otru momento intensu d’adelantamientu con Sebastian Vettel que condergó al pilotu alemán a vese pasáu, paez que coles ruedes bastante estrozaes, y a un trompu que terminó de rematar les sos opciones de victoria. Cola entrada obligada a boxes pa cambiar les gomes ya’l morru que perdió demientres circulaba ente los pilotos de la mitá baxo de la tabla (más chispes). Dende esi momentu, les aspiraciones del alemán, salvo desastre no cimero, yeren ponese quintu.

Cuando too paecía indicar que diba ser Leclerc quien ganara la so carrera, marcando un debú perbonu pela so parte, sintíemoslu per radio comunicar al equipu que’l coche perdía potencia. Nun tardemos muncho en decatanos d’ello al ver que la distancia que tinía col coche persiguidor, el de Hamilton, nun dexaba d’amenorgar hasta desapaecer. Quedaben menos de diez vueltes y la mala suerte (o falta de fiabilidá) cebábase col pilotu monegascu. Nun tardó muncho n’averase’l terceru hasta aquel momentu, Valtteri Bottas, que taba a trenta y ún segundos nesi momentu, y nun tardo n’atayar esi tiempu y pasar al pilotu de Ferrari. El siguiente yera Verstappen y les opciones de Leclerc de xubir al podiu siquiera paez que taben condergaes.

Pero non. Quedando cuatro vueltes p’acabar la carrera, recibimos la imaxe d’ún de los Renault paráu n’una escapatoria. Ricciardo facía por salir del so coche. Cuando pensábamos yá na mala suerte del pilotu australianu y la fiabilidá de Renault, descubrimos que nun yera sólo elli quien taba fuera de pista si non que tamién el so compañeru, paráu práuticamente a la mesma altura. Too fai albidrar que tuvieron el mesmu problema, un fallu na unidá de potencia, anque entá queda determinar exautamente cuála ye la causa. Doble abandonu de Renault y adiós a un fin de selmana nel que dambos pilotos tuvieron rodando dientro de los puntos per gran parte de la carrera.

Del so desastre beneficiáronse unos cuantos. El primeru, Leclerc, que respiró d’aliviu cuando salió’l coche de seguridá y cuando supo que la carrera diba terminar con elli. El so puestu nel podiu, anque amargu, yera suyu. Tamién se benefició de la desgracia de Renault otru rookie, Alexander Albon, que puntuó per primera vegada con Toro Rosso. Norris, que se fexo con un gran sestu puestu, los sos primeros puntos en F1 tres dos carreres mui sólides nel so llau del garaxe. Gasly arregló un pocu’l fin de selmana terminando octavu, pero entá tien muncho que trabayar pa ponese al altor del so compañeru qu’acabó cuartu, anque col podiu a tiru.

Alfa Romeo puntuó otra vuelta con Räikkönen, y quedó a les puertes con Giovinazzi, que tuvo una carrera bastante más sele que n’Australia anque con dalgún qu’otru toque con otros pilotos. Racing Point namás garró un puntu con Sergio Pérez zarrando’l grupu de los diez primeros ya Stroll décimocuartu. De xuru nun ye’l meyor entamu de temporada pal equipu.

Haas tien muncho de pensar sobre un gran premiu nel que pudo sacar muncho más de lo que sacaron. Grosjean tuvo d’abandonar y Magnussen nun pasó del décimotercer puestu, dalgo que contrasta cola so presencia’l sábadu na Q3. Nun tuvieron una carrera llimpia, sicasí, y viéronse condicionaos poles batalles en pista. Un gran premiu pal escaezu y a pensar yá en China.

Zarramos con Williams, qu’anque intentó facer por nun dexar que medrara la distancia ente ellos y los demás equipos, yá taben siendo doblaos na vuelta trenta. Entavía ensin dar cola tecla qu’ayude a ameyorar la situación, l’equipu sigui consolándose con terminar les carreres, anque seya nos últimos puestos.

Termina asina un gran premiu bien prestosu, con muncha aición en pista y un resultáu bastante inesperáu. Cuidamos que la victoria de Leclerc nun tardará en llegar, pero en Ferrari van precisar de dos selmanes de trabayu intensu p’asegurase que’l coche nun ye la causa de qu’ésta nun llegue. La siguiente parada ye China, en dos selmanes. Mientres llega’l día, equí vos dexamos tolos númberos del fin de selmana:

Clasificación

Carrera

Cola primer páxina de la temporada 2019 yá escrita, tócanos ponenos a pensar na segunda: Baḥréin. El circuitu de Sakhir yá se fexo un sitiu nel calendariu ente les carreres que la más espera xente, sobre manera dempués de correr n’Albert Park au los adelantamientos son enforma complicaos.

Singapur punxo de moda’l correr pela nueche y Baḥréin decidió que pagaba la pena la inversión en lluz artificial pa allumar l’ermu nel que s’atopa’l so circuitu. Sicasí, nun ye una carrera d’ensueñu como a vegaes suxeren les semeyes que nos ufren los fotógrafos dedicaos a esti mundu. La realidá ye que la calor del ermu ya’l sable compliquen la vida a los equipos davezu. A esto súmase’l fechu de que la carrera faise pela nueche, lo que fai que namás los segundos entrenamientos ayuden a pilotos y equipos a entender meyor les condiciones nes que van competir el domingu, con temperatures más fríes que les del día.

Mercedes empecipió la temporada no cimero, anque non col pilotu que tol mundo cuntaba. Valtteri Bottas impúnxose hai dos selmanes nel trazáu d’Albert Park ya equí en Sakhir buscará confirmar que lo del primer gran premiu nun foi una casualidá. Son munches les voces que falen d’un cambiu n’actitú del pilotu finlandés, con más determín ya decisión, ya quiciábes eso tuviera daqué influyencia nel domingu. Tolos güeyos tán puestos n’elli pa ver si ye verdá qu’esti añu va competir al altor de Hamilton. El pilotu inglés nun quixo enriedase nel fechu de que perdiera la so oportunidá d’entamar el campeonatu ganando. Dempués del gran premiu supimos que’l so coche tuvo daqué dañu nos baxos del coche que pudo condicionar la so carrera.

Ferrari nun cumplió colo que s’esperaba d’ellos n’Australia ya’l nuevu xefe Mattia Binotto esclarió que camudaron delles coses pa recuperar eses décimes de diferencia con Mercedes. ¿Foi cuestión de refrixeración, mala puesta a puntu? El casu ye qu’a Vettel dáse-y bien Sakhir, consiguió la pole yá tres vegaes (ye’l pilotu que más poles tien equí) y l’añu pasáu foi una d’elles. Leclerc nun andará mui lloñe del so compañeru n’un intentu de recuperar les bones sensaciones que se tiníen enantes del entamu del campeonatu.

Aprovechamos esti momentu falando de la Scuderia pa comentar que dempués del gran premiu vamos tener test nel circuitu de Sakhir y qu’un tal Mick Schumacher va tar al volante, trayendo a la memoria de munchos alcordances de bonos tiempos. El pilotu alemán va tar compitiendo en Sakhir nel so debú na categoría de plata del motor, la F2.

Red Bull tán enfotaos nun bon resultáu en Baḥréin. Dempués de lo llograo n’Australia, tienen munches esperances puestes no que los sos dos pilotos puedan facer en Sakhir. Anque ye bien temprano pa xulgar nada, Horner quixo refuerciar la confianza de Gasly falando de que de xuru va tener oportunidaes esti añu de rellumar al llau de Verstappen. Amás, tanto en Red Bull como en Toro Rosso, aliéndase muncho optimismu nel trabayu desendolcáu con Honda.

Otros que busquen dar un pasu alantre son Renault, que tamién cuntaben con dalgo meyor n’Australia. Equí esperen aprovechase de les meyores introducíes a les sos unidaes de potencia ya, sobre too, que la suerte acompañe a Ricciardo ya pueda tener una carrera ensin incidentes.

Al principiu de la temporada suelen ser too sorrises porque si les coses salen bien ye una motivación pero si salen mal tovía queda tiempu. Nel casu de Haas la razón pa tar confiaos y contentos ye’l rendimientu que se vio de dambos coches n’Australia. Anque Grosjean nun pudo atropar puntos, lo que vimos en pista tanto na so parte como nel casu de Magnussen, que foi sestu, desplica que na escudería tean bien motivaos pa siguir trabayando y lluchar por ser el cuartu meyor equipu de la parriella. Pinta tien de que Renault esti añu nun va tenelo fácil. Nesa llínia lleguen a Baḥréin au les posibilidaes d’adelantar pueden da-yos oportunidá de dir escalando puestos na clasificación.

Ensin dexar de mirar pa la parte media de la tabla, Alfa Romeo y McLaren fueron dos de los equipos que más convencieron na primer carrera de la temporada, pensando siempre no visto na temporada pasada. Sicasí, precisen daqué más si quieren metese en puntos en Sakhir. La sesión de clasificación de Lando Norris pa McLaren foi un gran plus pal equipu, pero la deceición del abandonu de Sainz el domingu trexo de vuelta delles pantasmes.

Tornando a los test de dempués del gran premiu, Fernando Alonso va retornar a los mandos del McLaren pa participar nellos dempués de retirase, temporalmente, de la F1.

Nel casu d’Alfa, los puntos consiguíos por Räikkönen nun saben a muncho pero son una bona base pa siguir sumando nel ermu de Sakhir. Giovinazzi nun fexo un mal trabayu nel pasáu gran premiu. L’equipu almitió que tuvieron a piques d’abandonar la carrera pol dañu que tinía’l coche pero decidieron dexalu terminar ya ensin duldes la so actuación foi una de les que más llamó l’atención de la carrera.

Col equipu suizu, Racing Point y Toro Rosso dispútense los puntos. A Toro Rosso dase-y bien esti circuitu, l’añu pasáu vímoslo, y Sergio Pérez tampoco nun lo fai mal equí. Ente estos dos equipos ya’l restu d’escuderíes de mitá de la tabla, de xuru vamos tener bastante entretenimientu’l domingu.

En Williams hai motivos pal optimismu yá que paez qu’atoparon au ta’l problema del probe rendimientu amosáu n’Australia. Ellí vimos a Bottas rebasar a Kubiça mui pronto cuando cásique nin se llegara a la mitá de la carrera y eses escenes manquen a un equipu que llucha por salir del sucu nel que lleva metíu yá dos temporaes. Cualquier signu de meyora que se vea en Sakhir va ser un pasín alantre y un motivu pa siguir trabayando.

Ensin más, ponemos yá los güeyos nel circuitu de Sakhir pal segundu gran premiu d’esta temporada. Nun vos preocupéis, nesti nun hai que madrugar. Embaxo podéis atopar tola información sobre’l circuitu, los horarios y les gomes pal gran premiu de Baḥréin 2019: