Category: Carreres

Hai dellos grandes premios nos que más que falar de quién ganó o de quién fizo qué, centrámonos más n’aspeutos d’estratexa o d’actitú de los pilotos. Nesti casu, Ferrari lleva selmanes de protagonista de los titulares gracies al so rendimientu, sobre manera nel casu de Leclerc, y en Rusia tamién fueron protagonistes, pero por otros motivos.

SÁBADU

Tol fin de selmana, la Scuderia tuvo garrada la midida al circuitu. Pesie a que’l rendimientu de Mercedes y Verstappen nun pintaba mal, nun paecía que fuera ser bastante pa quita-yos la pole, como asina vimos. La sesión de clasificación allargose de más por un accidente protagonizáu por Albon que provocó bandera colorada. Kvyat nin siquier se vistió pa intentar clasificar, sabiendo que diba salir d’atrás coles penalizaciones. Tolos pilotos Honda tiníen dalguna penalización poles actualizaciones que trayía’l motorista xaponés (preparándose pa nun tener nenguna na prósima carrera en casa, Suzuka).

El parón nesta primer parte de la clasificación condicionó les vueltes de dellos pilotos, sobre manera Vettel que, sicasí, acabo entrando na siguiente fase depués de que too s’iguara y los coches tornaran a pista. En realidá, foi una sesión de clasificación bastante normal, siguiendo un pocu lo visto nes sesiones de llibres y con Hamilton namás siendo quien a pasar a Vettel pa facese col segundu puestu na parriella. Con Leclerc nun pudo y ye que’l monegascu clavó les dos vueltes que fexó na Q3 ameyorando la que ficiera de primeres cuando casi abultaba complicao siquier imitala.

Destacamos, otra vegada, a McLaren, con dambos pilotos ente los diez primeros. Tienen munchos motivos pa tar contentos pues esti fin de selmana confirmóse que pa 2021 van trabayar otra vuelta con Mercedes, terminando asina’l so compromisu con Renault. Coles pieces nel tableru, llegamos al domingu.

DOMINGU

Y la salida del domingu nun sorprendió a naide porque ye dalgo que tenemos visto nel pasáu en carreres en Sochi. Los pilotos tienen énte sí una recta perllarga na que los coches que salen nel llau izquierdu (esto ye los impares) suelen tener meyor salida que’l restu y asina lo vimos con Ferrari. Lo que nun sabíemos ye que los dos pilotos de la Scuderia tiníen que caltener les posiciones y nun adelantase aprovechando’l rebufu (nel casu de Vettel), compromisu que paez dambos pilotos adoutaron enantes del entamu de la carrera. Dende bien ceo taba claro que yera Vettel el Ferrari más rápidu y amosolo metiendo distancia al so compañeru y dexando a Mercedes llonxe tamién y a Leclerc llamentándose per radio de qu’aquello nun yera lo que s’acordara de mano. Pronto sintimos al equipu dicir que Vettel devolvería la so posición más alantre, faciendo medrar les duldes sobre lo que taba pasando. La insistencia del equipu facía que les ceyes se llevantaren más entá y les rempuestes negatives del pilotu alemán tamién ayudaben.

Pero Mercedes nun sólo tuvo de preocupase de Ferrari, tamién de McLaren, que tuvieron una de les meyores salides (y carreres) de la temporada con dambos pilotos. Anque finalmente les fleches platiaes caltuvieron la so posición énte Sáinz y Norris, foi ún de los momentos llamatibles del gran premiu. Per detrás, vimos a varios pilotos afeutaos por choques, perdes de morru de coche y pinchazos: Giovinazzi, Ricciardo y Grosjean tuvieron ún de los primeros accidentes y foi’l francés el primer pilotu n’abandonar. El xiru depués de la gran recta fexo qu’hubiera munchu contautu ente pilotos y foi equí au’l Haas salió pior. Sicasí, Ricciardo tuvo de pasar por boxes pa cambiar gomes porque pinchó una rueda.

A too esto, hai qu’añadir una penalización de drive through pa Kimi Räikkönen por adelantase a la salida. El pilotu finlandés intentó correxir l’erru pero viose claro nes imaxes que punxo’l coche en movimientu enantes de que les lluces del semáforu s’apagaren. Alfa Romeo en xeneral y Kimi en particular nun tán teniendo muncha suerte depués del parón braniegu.

Charles Leclerc foi’l primer pilotu Ferrari en parar, siguiendo un pocu lo visto en Singapur y alterando’l vezu de que seya quien va delantre’l primeru en pasar per boxes. Dos vueltes depués, el so compañeru d’equipu tresmitía por radio que les sos gomes traseres yá casi taben acabaes y que tinía falta de parar anque creyemos que l’alemán taba pensando en parar pa que nun-y pasara como a Leclerc en Singapur de salir per detrás. La vuelta ventisiete foi la escoyida pa la parada y la llercia de Vettel víase confirmada, salía per detrás del so compañeru d’equipu. Sicasí, nun diba dar más pues na vuelta siguiente a la so parada, l’alemán vio terminar la so carrera por un problema col coche, provocando un coche de seguridá que diba beneficiar enforma a los Mercedes, gracies a la parada de baldre que esta situación de carrera daba.

Col abandonu de Vettel sumábemos yá tres, con Ricciardo nun pudiendo tampoco ver la bandera a cuadros depués del accidente de la primer vuelta y pesie a la parada. A piques d’acabar el coche de seguridá pa Vettel, Russell acabó nel muru después de que dalgo rompiera nel so coche y al pocu’l so compañeru d’equipu tuvo d’abandonar. Un doble abandonu de Williams que nun viéramos entavía nesta temporada.

Depués de toos estos eventos, la carrera resumióse en Leclerc faciendo por compensar la estratexa del so equipu depués de la mala suerte del abandonu de Vettel y de que too se desdibuxara col coche de seguridá, pero nun valió pa muncho y Mercedes tornó a lo cimero del podiu con Hamilton primeru y Bottas segundu.

Enantes de rematar la carrera, tuvimos batalles interesantes ente los dos Toro Rosso, Magnussen (que recibió penalización de cinco segundos) y Sáinz y Albon. Foi en resume, una carrera entretenida en conxuntu, decidida por esi abandonu de Vettel que xugó a favor de Mercedes. Hamilton ta cada vegada más cerca del so sestu campeonatu y l’equipu de repitir otru añu más como campeón de constructores.

La siguiente cita ye Suzuka, un circuitu míticu y mui apreciáu por tolos pilotos. Honda retorna a casa y tol mundu sabe lo especial que ye eso pal equipu nipón. Tornen tamién los madrugones pero mientres llega esi momentu, equí vos dexamos los númberos d’esti gran premiu de Rusia:

Clasificación

Carrera

El domingu en Singapur tuvimos emoción nel podiu pero non tanto en pista. Un podiu ensin pilotos de Mercedes y con un pilotu de Ferrari no cimero, el más cuestionáu del par. Quiciás nun foi’l meyor eventu de la temporada, pero a lo menos sorprendió en dellos aspeutos. Ensin muncho descansar yá aterrizamos en Rusia.

Pesie a nun ser un circuitu que dea carreres vistoses, siempre ye un trazáu que presta visitar. Sicasí, llegamos equí con munches disputes por resolver, sobre manera na parte medio la tabla. Sochi suel ser un talismán pa Mercedes, polo que nun sedría raro velos no más alto demientres tol fin de selmana, eso sí, con permisu Ferrari. Bottas nun va mal equí, asina que tampoco nun lo sedría velu a él como ganador el domingu. Lewis Hamilton lleva delles carreres ensin coronase, asina que probablemente llegue equí con ganes de pasar perriba los sos rivales como tien fecho nel pasáu. Güeyos y quinieles apuesten poles fleches platiaes.

De toles formes, nun podemos descartar a Ferrari anque sólo seya porque ganaron les tres últimes carreres y paeza que toparen esi “dalgo” más. Nun paez que vaigan recortar la distancia con Mercedes en nengún de los dos campeonatos, pero la racha positiva que lleven puede que nun faiga tan evidente la victoria de Mercedes en Sochi. Leclerc nun quedó conforme col resultáu en Singapur y cuestionó un pocu la estratexa del equipu de parar primero a Vettel qu’a él, polo que tará naguando con ponese otra vegada al volante pa desquitase. L’alemán, pel so llau, tovía tien munches voces negatives qu’apagar y que cuestionen el so rendimientu esti añu, polo que ye tamién ún de los pilotos que tener en cuenta.

Y Red Bull, anque discretos, ehí siguen. Verstappen foi terceru en Singapur, cuando naide nun cuntaba con él depués de lo que se vio’l sábadu. Albon sigui deprendiendo carrera a carrera y anque inda nun ta al altor de Verstappen, sí que ta faciendo lo que s’espera d’él. Dende que “xubió” a Red Bull nun aparó de sumar puntos. Curiosamente, paez que’l “descensu” de Gasly tamién benefició al pilotu francés porque ta teniendo un rendimientu meyor en Toro Rosso.

McLaren ta sabiendo aprovechar les debilidaes de Renault pa meter distancia nel campeonatu. El bon puestu de Norris en Singapur significó un puñáu de puntos vitales na llucha pol cuartu puestu. Renault puntuó con Hülkenberg, pero nun puestu más baxu. Paez que ta claro que van ser estos dos equipos los que disputen d’equí al fin de la temporada’l puestu de best of the rest.

Sicasí, nun podemos escaecer que’l restu d’equipos tamién tán na engarrada por quedar lo más arriba posible. Toro Rosso foi recuperando posiciones, pero Alfa Romeo y Racing Point van recuperando, sobre manera nel casu del segundu equipu, anque entavía la suerte nun mire pa ellos davezu. Haas y Williams siguen somorguiaos nos sos problemes que los tienen atrapaos nos dos puestos más baxos de la clasificación de constructores.

Averámonos a Sochi pa disputar otru gran premiu coles duldes de si Mercedes dominará o si Ferrari caltendrá’l rendimientu qu’amosó hasta’l momentu, ensin dexar fuera a cualquier otru protagonista que quiera sumase a la fiesta. Demientres llega’l vienres, equí podéis consultar los horarios pal fin de selmana y la información básica del circuitu:

Y equí podéis atopar tola información de Pirelli sobre les gomes que se van usar nel gran premiu:

Tamién podéis siguir consultando les novedaes de la silly season nel nuestru post, onde vamos actualizando tola información sobre la temporada 2020 no que cinca a pilotos.

Quiciás llegue un pocu tarde. Quiciás tuviera fecho falta primero. Ello ye que Ferrari despertó y lleva tres carreres siguíes mandando nes clasificaciones tanto’l sábadu como’l domingu. Hai munches entrugues tovía ensin rempuesta tocante a decisiones dientro del equipu, pero la emoción ye continío porque ta claro que la distancia con Mercedes abulta enforma grande. Sicasí, Singapur foi escenariu d’otra victoria colorada y del resucitar d’un pilotu alemán al que muchos queríen ya retirar.

Pero vamos mirar primero a lo que vimos el sábadu.

SÁBADU

Nun había falta  albidrar muncho pa entender que Ferrari tiníen tomada la midida a esti circuitu. Anque cuntábemos más con Red Bull de lo que dieron depués, la Scuderia entraba en toles quinieles. Sebastian Vettel paecía especialmente motiváu y de fechu llideró les sesiones del sábadu, anque non la más importante: foi Leclerc quien consiguió la pole y Vettel nun pudo más que ser terceru. Si echamos la vista a los grandes premios pasaos, podemos dicir que pal alemán esti resultáu, salir terceru en Singapur, yera dalgo bono, pero sabemos que los pantasmes de la F1 a vegaes medren en cuenta facese más pequeños. De fechu, nun consiguir la pole esti sábadu yá se taba dando como fracasu de Vettel, que taba pasando perriba del restu en sesiones previes y vio como dellos errores lu penalizaben nel últimu intentu.

Nun hebo sorpreses nos puestos baxos: Williams, Grosjean, Stroll y Kvyat fueron los primeros en quedar fuera. Tampoco nun les hebo na mitá de la tabla. Pérez partía con penalización por un accidente en la última sesión de llibres pola que tuvo de camudar la caxa cambios y nengún de los Alfa Romeo entró ente los diez primeros, mesmo que Gasly y Magnussen.

Los cinco primeros equipos na clasificación colocaron a los sos pilotos na Q3. Ricciardo foi descalificáu por irregularidaes nel coche n’acabando la xornada del sábadu. Naide nun pudo siquier ponese a tiru de Ferrari, anque Mercedes con Hamilton sí pudo colase nel segundu puestu de la parriella. Verstappen pasó per delantre de Bottas pa ser cuartu mientres que’l restu de puestos quedaron repartíos con Albon, Sáinz, los dos Renault y Norris completando la llista. Una sesión de clasificación que nun dexó muncho que falar sacante esa pole que nun foi pa Vettel. L’alemán nun pudo rematar una vuelta ensin errores, dalgo que sí fizo’l so compañeru d’equipu pa consiguir la so tercer pole siguida.

DOMINGU

Como vien siendo vezu esta temporada, la salida’l domingu nun foi mui accidentada. Sí tuvimos delles víctimes, como Russell y Sáinz, que pronto tuvieron d’entrar a facer paraes, el primeru a cambiar el morru, el segundu con un pinchazu, sumando otru día de mala suerte pal pilotu de McLaren. Leclerc tuvo una bona salida y rápido punxo distancia con Hamilton, que tenía a Vettel mui cerca, dexando claro que’l Ferrari rindía muncho meyor nes cais de Singapur. Sicasí, nun hebo cambiu de posiciones nes primeres vueltes, tampoco per detrás. Verstappen caltuvo la so cuarta posición y Bottas tamién siguió quintu.

Foron unes primeres vueltes más aburríes de lo que nos teníen avezaos les carreres pasaes, con muncha distancia y respetu entre pilotos y muncho mirar poles gomes. Pela parte media y baxa de la tabla sí víemos dalgo d’actividá, con pilotos como Ricciardo faciendo por recuperar posiciones depués de ser descalificáu, o Sergio Pérez. Tamién Hülkenberg, que tuvo una parada temprana pol incidente con Sáinz, tuvo qu’entrar llueu, dalgo qu’al tiempu diba beneficialu según como foi desenvolviendo la carrera.

Leclerc tinía totalmente controlada la carrera, pesie a que Hamilton diba acortando distancia. Sicasí, Ferrari tomó la decisión de parar a Vettel primero, dalgo que nun gustó muncho al so compañeru d’equipu y nun tardaríemos n’entender el motivu. Con Hamilton acechando, Leclerc finalmente fizo la so parada, una vuelta depués que’l so compañeru, dexando al inglés llíder pero saliendo de pits per detrás de Vettel, incluso teniendo una parada más curtia.

Cada pilotu qu’entraba a boxes y salía con gomes nueves, marcaba vuelta rápida en pista, y yera fácil ver que, una vegada que garrara ritmu, el rendimientu de Vettel diba ser meyor que lo que Leclerc podía alcanzar. Hamilton tamién paró al pocu, pero nun pudo aprovechar la estratexa y salió per detrás de dambos pilotos. Tres una sucesión de paraes, tuvimos a Giovinazzi, anque temporalmente, lliderando la carrera na vuelta treinta y ún. Quedaba un pocu menos de la mitá del gran premiu.

A partir d’esti momentu, vivimos dellos accidentes en pista. El primeru con Giovinazzi y Ricciardo de protagonistes, del que salió más perxudicáu l’australianu que tuvo d’entrar en boxes depués d’una maniobra d’adelantamientu que nun foi tan llimpia como cuntaba. Na vuelta treinta y seis apaeció’l primer coche de seguridá: el Williams de Russell acabó escontra les barreres mientres lluchaba por posición con Grosjean. El pilotu de Haas pudo siguir cola so carrera.

Na vuelta cuarenta y dos, Lance Stroll sufrió un pinchazu que lu obligó a parar y na siguiente’l so compañeru d’equipu quedaba paráu en pista. Ensin duldes, un fin de selmana pal escaezu en Racing Point. El coche del mexicanu provocó’l segundu coche de seguridá. El relanzamientu de carrera tres esti momentu foi bastante intensu, con tolos pilotos mui xuntos y faciendo por pasase, sobre manera na parte media de la tabla. Perriba, Vettel continuaba llíder, siguíu de Leclerc y Verstappen. Pero nun diba ser esti l’últimu momentu nel que Maylander saliera a pista: un adelantamientu de Kvyat a Kimi Räikkönen acabó col finlandés fuera de carrera cola suspensión del coche rota. El rusu pudo continuar en pista.

Les posiciones altes nun diben a variar nestes últimes vueltes, y Vettel por fin sedría’l primeru en ver la bandera a cuadros depués de tantes carreres y tantos errores. Ferrari llevaba dende 2008 ensin encadenar tres victories siguíes nun campeonatu, dalgo que diz muncho del motivu pol que nun ganen campeonatos. Atópense agora nun bon momentu de forma, nun hai duldes, pero quiciás, como reflexonábemos al entamu d’esti post, llega un pocu tarde. Hamilton y Bottas nun entraron ente los tres primeros.

Singapur nun tuvo’l ritmu nin la emoción de carreres pasaes, pero valió pa ver rexurdir a Vettel. Ye verdá que la decisión del equipu de paralu primero lu benefició, pero tamién lo ye que pasó tol fin de selmana rodando mui rápido y quiciás merecía esta victoria. Paeznos lóxico qu’haiga duldes sobre él viendo lo que ta dando de sí nesta temporada y los errores de rookie que ta faciendo dacuando, pero paez que ta lloñe de tar acabáu como pilotu.

La Fórmula Ún nun descansa y en siete díes viaxa a Rusia. Demientres aterrizamos nel circuitu de Sochi, equí vos dexamos tolos númberos del fin de selmana:

Clasificación

Carrera

El tour asiáticu ta entamáu y aterrizamos na primer parada: Singapur. Anque lleva relativamente pocu tiempu nel calendariu si lu comparamos con otros grandes premios, la verdá ye que ta afitada como una de les carreres más esperaes temporada a temporada. El fechu de que se cuerra de nueche (anque yá salieran imitadores), de lo estrecho del trazáu y de l’atmósfera que siempre arrodia al eventu fai d’ello ún de los puntos importantes del añu.

Llegamos equí cola resaca del gran premiu d’Italia en Ferrari. Tres celebrar una victoria en casa depués de tantu tiempu, la Scuderia torna al trabayu. Eso sí, el planteamientu sigui siendo’l mesmu, y nun hebo nenguna novedá sobre’l futuru de los sos pilotos, pero sabemos que nada nun ye lo mesmo dende hai dos selmanes. Charles Leclerc llegó pa deprender y medrar en Ferrari, pero naide nun cuntaba (o quiciás dalguna persona sí) que diba facelo tan rápido como p’asombrar el llabor del so compañeru Sebastian Vettel. ¿Quién ye’l númberu ún agora? La lóxica fainos albidrar que tol enfotu sigui puestu en Vettel anque sólo seya por caltener un poco de coherencia, pero ta claro que naide nun ye indiferente a lo que ta faciendo Leclerc esti añu.

Pesie al historial de victories nes últimes carreres, en Mercedes nun tienen motivos pa esmolecese, nin nel campeonatu de constructores nin nel de pilotos. La ventaya que saquen a Ferrari ye bultable y Hamilton tien práuticamente amarráu’l campeonatu anque nun queramos resignanos a que yá tea too dicho. Sicasí, la naturaleza ganadora del equipu fai que siempre quieran ocupar lo primero del podiu. En Singapur puede que tengan de pidir permisu a Red Bull, equipu que suel dir bien equí.

Siguiremos mui de cerca lo que vaiga pasando pela parte templao de la tabla. Esti circuitu vien siendo escenariu de carreres nes que son los d’abaxo los que meyor aprovechen les oportunidaes, y yá nel pasáu vimos a equipos puntuando depués de carreres de seca. Nesi sen Singapur torna nuna especie d’oasis, tipo Mónaco, nel que los equipos de la parte baxo tienen otra oportunidá d’atropar puntos. Por ello tenemos los güeyos puestos no que puedan facer en Williams y Haas, los dos equipos más febles agora mesmo, pero tamién el restu d’equipos. Racing Point suel facer bones carreres nesti llugar, asina que tamién sedrá un referente en pista.

Nun escaecemos que la silly season continúa. Esta selmana conocimos el futuru de dos de los pilotos de la parriella de 2019: Romain Grosjean va siguir siendo pilotu pa Haas en 2020 y Robert Kubiça nun va selo en Williams, rematando asina’l so añu de retornu a la F1 y buscando otres esperiencies fuera de la categoría. Destinos estremaos pa dos pilotos que nun tán teniendo una temporada brillante por motivos qu’a vegaes nun tán nes sos manes. Podéis consultar como tán les coses nel nuestru post sobre la silly season que vamos actualizando coles novedaes que recibimos selmana a selmana.

Singapur supón un retu en tolos senes: pa los pilotos pol cambiu horariu ya’l fechu d’adautase a correr de nueche. Pa los equipos polos requerimientos del circuitu al coche y pal públicu porque pasen tantes coses en pista que casi ye imposible cubriles toes d’una vegada. Y la calor, dalgo que d’una forma o d’otra siempre influi nel fin de selmana. Sicasí, tamos preparaes pa vivilo y pa ello, equí vos dexamos tolos horarios ya información que precisáis pa nun perder nada:

Y equí, tola información de Pirelli sobre les gomes pa esti fin de selmana:

Había nueve años que nun víemos Monza tremar de la forma que lo fexo’l domingu. Nueve años d’espera de los tifosi pa tornar a ver a ún de los suyos no cimero del podiu. Cuando les quinieles previes al fin de selmana daben a Vettel como favoritu, Leclerc rompió con toes elles pa coronase, non namás el sábadu si non tamién el domingu.

SÁBADU

Davezu tenemos sesiones de clasificación que nos dexen ablucaos pol so resultáu: una pole inesperada, un rookie que se mete ente los tres primeros o ún de los equipos cabezaleros que queda fuera na Q1. Esta vegada, les cares de sorpresa provocáronles tolos pilotos que lluchaben na Q3. Ye conocida la importancia del rebufu en Monza, onde’l to compañeru se coloca delantre de to pa facilitar que salgas con más puxu nes rectes. Ello ye que na última vuelta pola pole naide nun quería ser el coneyu d’Indies del restu, y tolos pilotos diben afloxando, dexando pasar al restu, colocándose más atrás… Tanto foi asina que, sacante Sáinz, tolos pilotos del grupu de los diez primeros quedaron ensin tiempu pa marcar una vuelta (quedaba un minutu aprosimáu nel reló) y a los equipos con cara de circunstancies. A la fin, cuntaron los tiempos daos na primer parte de la sesión y la vuelta de Leclerc valió pa la pole, la vixésimoprimera de Ferrari en Monza y primer gran allegría del fin de selmana pa la Scuderia.

Plantegóse una investigación pa tolos pilotos, y de fechu hai precedente en categoríes inferiores (F3) de penalización coleutiva por esti tipu de aiciones, pero too quedó nuna reprimenda. Creyemos (y esperamos) qu’anque sólo seya polo ridículo de la situación, nun va tornar a repitise más, a lo menos esta temporada.

Destacamos l’actuación de Renault, con Ricciardo y Hülkenberg per detrás de Vettel en quintu y sestu llugar, mui asomeyao a lo que vimos hai unos meses en Canadá, onde Renault tamién rindió perbién na sesión de clasificación. Nun cuntábemos con que Verstappen ficiera muncho’l sábadu, sabiendo que diba salir d’atrás anque sí pensábemos qu’entraría na Q3. L’holandés sufrió un problema nel coche que lu dexó fuera bien ceo na Q1. Esperábemos dalgo más, eso sí, del so compañeru Alexander Albon, que foi ún de los pilotos ensin tiempu na Q3. Sorprende tamién la presencia de Stroll ente los diez primeros, depués de tolos problemes que ta teniendo pa siquier pasar de Q1. El so compañeru nun tuvo tanta suerte y quedó fuera na Q1 provocando bandera colorada depués de que’l so coche quedara ensin potencia.

Lando Norris dedicóse a facilitar que’l so compañeru entrare en Q3, cuntando cola penalización del domingu. Podemos dicir que fueron l’equipu que meyor aplicó’l rebufu en pista si lo comparamos colo que ficieron el restu. Protagonista de la Q3 foi Kimi Räikkönen qu’acabó col coche nes proteiciones a falta de seis minutos pal final de la sesión. Nada que ver coles sensaciones del añu pasáu cuando fexo la pole nun Ferrari.

DOMINGU

Ensin l’agua pol que naguaba Verstappen, comencipió otru gran premiu nel clásicu circuitu de Monza. Y fíxolo como nos tienen avezaos les últimes carreres: ensin munchos incidentes, sobre manera en cabeza. Leclerc aguantó bien la so posición frente a los ataques de los dos Mercedes y del so compañeru d’equipu, y tamién de los dos Renault, que salieron bastante enchufaos. Per detrás, vimos dellos coches usando la escapatoria de final de recta énte la imposibilidá de facer la chicane ensin evitar l’accidente. Siempre ye un xiru apertáu sobre manera cuando los coches tán entavía tan xuntos. Dos de los pilotos protagonistes d’incidentes al principiu sedríen Pérez y Verstappen, que tuvo d’entrar a parar pa camudar el morru delanteru del so coche depués de chocar col del mexicanu. Vimos bien ceo batalles entreteníes ente Hülkenberg y Vettel, ente Albon y Sáinz y ente dambos Renault que fixeron que les primeres vueltes de carrera fueren bien entreteníes.

Na vuelta seis Vettel foi protagonista negativu del gran premiu depués d’un trompu que lu dexó atravesáu en medio d’una de les escapatories, mui cerca del trazáu. A la hora de reincorporase a pista fíxolo ensin mirar nin ver que Stroll vinía per detrás. El pilotu canadiense tuvo d’esquivalu, lo que provocó qu’él tamién ficiera un trompu que lu dexó, metros más allá na mesma posición que Vettel unos minutos primero. Y como si tuvieren viviendo realidaes paraleles, el pilotu de Racing Point tamién se reincorporó a pista de manera insegura, con Gasly de víctima anque ensin consecuencies pa él. El resultáu foi que dambos pilotos perdieron posiciones y fueron penalizaos. Nel casu de Vettel con diez segundos de stop and go y nel de Stroll con un drive through. Pal alemán esto foi quiciás el remate final pa un fin de selmana que prometía muncho más de lo que dio.

Col pasu de les vueltes, como pasara yá en Spa, la carrera nos primeros puestos foi quedando llimitada a los dos Mercedes y Leclerc. Y como tamién pasara en Spa, nenguna de les fleches plateaes foi quien a pasar al pilotu monegascu que con cada carrera va perdiendo inxenuidá en pista (de fechu, vio una bandera prieta y blanca pa llama-y l’atención poles maniobres que facía con Hamilton) y poniendo más complicaes les coses a los sos rivales. De fechu, la estratexa de Mercedes foi intentalo con Hamilton y viendo que l’inglés nun yera quien y que Bottas diba con gomes más fresques, dexalu a él que lo intentara. Pero nengún de los dos superó al pilotu de Ferrari. Lo que sí tenemos d’aplaudir una y milenta vegaes ye’l gran espectáculu que dexaron los tres en pista.

Yá avanzada la carrera, tuvimos el primer abandonu. La mala suerte sigui cebándose con McLaren y esta vegada con Carlos Sáinz. El pilotu madrilanu rodaba novenu y taba acabante de facer el so cambiu de gomes cuando tuvo de parar el coche al final del carril de pits porque una de les ruedes taba mal afitada. Poco depués, vinía’l segundu abandonu de la carrera, na vuelta treinta, Daniil Kvyat acababa col coche aparcáu nun de los llaos del trazáu. El pilotu rusu tamién taba acabante de parar pero nel so casu quedó ensin potencia nel coche. Los motores Honda esti fin de selmana dieron bastantes disgustos a los equipos del toru coloráu.

Na vuelta cuarenta y dos una salida de pista ensin consecuencies pa Hamilton fexo que’l pilotu inglés perdiera’l so segundu llugar en beneficiu del so compañeru d’equipu. Nun sabemos si foi un erru provocáu adréi por Hamilton pa que nu se fale d’ordes d’equipu pero foi nesti intre cuando Bottas se punxo a trabayar pa intentar pasar a Leclerc, a falta de once vueltes. El finlandés tuvo momentos de tar mui cerca del pilotu de Ferrari y con dos vueltes pal final casi lu tinía nes sos manes, pero un erru nun xiru onde foi un pocu llargu féxolu perder tiempu lo que dio aire a Leclerc pa lo que quedaba de carrera. Mientres dambos pilotos lluchaben pola victoria, Kevin Magnussen tinía de retirar el so Haas por problemes hidráulicos. Una vegada más, deceición nel equipu estauxunidense, que nun puntuó (Grosjean tamién fexo un trompu y acabó nel puestu dieciséis) y sigui nos puestos fonderos de la clasificación.

L’últimu xiru en la Parabolica enantes de la bandera a cuadros foi un auténticu glayíu de los tifosi al decatase de que depués de nueve años un pilotu de Ferrari tornaba a lo cimero del podiu. Tres la so allegría, la deceición de Vettel que nin siquier pudo puntuar depués del so erru na vuelta seis y que fai medrar los rumores sobre’l so estáu de forma ya’l so futuru nel equipu.

Acompañaron a Leclerc nel podiu los dos Mercedes, contentos con sumar puntos pero obviamente deceicionaos por nun ser quien a facese cola victoria. Hamilton, eso sí, consiguió la vuelta rápida, otru puntu estra pa él nel campeonatu. En cuartu y quintu dambos Renault, nuna gran carrera de los dos pilotos con un rendimientu al que nun tamos avezaos esta temporada pero que depués de la desgracia del fin de selmana pasáu arrancó munches sorrises. Aparte, sumen un bon puñáu de puntos, vitales na llucha del campeonatu de constructores. Albon foi sestu con Verstappen octavu, depués de salir últimu. Nun foi una bona carrera pa nengún de los dos, nunca nun tuvieron opción al podiu, pero a lo menos compensó nel casu de Verstappen, depués d’una salida bastante probe.

Pérez sumó los puntos pa Racing Point y foi sétimu. Stroll tampoco nun pudo recuperarse del incidente con Vettel y foi décimosegundu. L’equipu nun pinta mal nesta segunda parte de la temporada, anque necesiten llibrase d’incidentes pa poder asegurase puntos carrera tres carrera. Giovinazzi consiguió dos puntos que saben perbién pa él y pal equipu. Correr en casa siempre da una motivación estra, dicen, y nesti casu paez que se cumplió col pilotu italianu. Kimi acabó nel puestu quince.

L’últimu puntu foi pa Norris que tamién salía de les posiciones d’atrás y a lo menos foi quien a atropar un puntín bien valiosu pal so equipu. Anque entavía tienen distancia col quintu, los de Woking, como venimos diciendo, nun pueden despistase nes carreres vinientes si quieren acabar cuartos esta temporada. Por suerte pa ellos, pesie a la bona carrera de Renault, Gasly quedó a les puertes de los puntos y con Kvyat fuera Toro Rosso nun puntuó.

Pa rematar, aplaudimos l’actuación de George Russell que foi décimoterceru y sigui dando motivos al so equipu pa tar en 2020 na parriella. Kubiça tuvo dalgún problema más qu’él y acabó nel puestu décimosetimu, pero dambos continúen acabando carreres y amosando que’l coche, a lo menos, ye fiable.

Acabamos asina’l ciclu de carreres n’Europa y ponemos agora la vista n’Asia. El prósimu gran premiu de Singapur, carrera que ta camín de facese un clásicu de la Fórmula Ún. Mientres llega la fecha, equí vos dexamos tolos númberos del fin de selmana n’Italia:

Clasificación

Carrera

Ta tornando vezu’l dir dando noticies nueves con cada previa o crónica qu’escribimos. Yá sabéis que podéis dir siguiendo tolos cambios en pilotos nel nuestru especial de la silly season equí pero estes nueves tamién afeuten a los circuitos. Esti miércoles supimos que Monza va siguir como parte del calendariu de F1 hasta, polo menos, 2024. Los tifosi van siguir teniendo’l so templu de velocidá onde animar al coche coloráu col puxu col que nos tienen avezaos. Siempre ye bono cuando se confirmen circuitos d’estos que nomamos “clásicos” porque pesie a que nengún ta llibre de carreres aburríes les bones suelen selo muncho.

Con esta confirmación aterrizamos en territoriu italianu col ecu de la victoria de Leclerc en Spa entavía frescu, el pilotu monegascu yá tuviera oportunidaes pa coronase en pasaos grandes premios pero nun foi hasta Spa que lu pudimos ver no cimero del podiu. Coincidió amás que lo fixo nel fin de selmana nel que perdió a ún de los sos amigos dientro y fuera de los circuitos, Anthoine Hubert que, como comentábemos na crónica de Spa, finó nun accidente na primer carrera de F2. Nun creyemos qu’heba meyor homenaxe pa un pilotu que muerre, como ellos dicen faciendo lo que-y presta, que dedica-y una victoria tan trabayada como la del domingu en Spa.

Esperamos daqué asemeyao en Monza. La Scuderia tien la obligación moral de facer bones carreres nesti circuitu y sabemos lo que pasa cuando ye un coche coloráu’l que fai la pole o gana’l domingu (nun hai más qu’alcordase de la última vegada que lo fixo Kimi Räikkönen). Con esi estra de presión tifosi, tanto Leclerc como Vettel van tar nel centru de l’atención del fin de selmana. Al alemán vímoslu facer llabor d’equipu na carrera pasada, quiciás una siña de que quier o cuida con siguir en Ferrari pa 2020. Tovía nun hai confirmación del so futuru pero la lóxica, que sabemos que nun suel funcionar na silly season, diría que sigue. Tamién ye verdá que son munches les voces que dicen que non, que Vettel yá escosó’l so tiempu en Ferrari y que cola llegada de Leclerc la so lluz ta dafechu apagada ellí. La Scuderia suel facer anuncies en Monza, asina qu’esperamos saber dalgo nuevo demientres el fin de selmana.

Anque l’atención tea enriba de Ferrari, el restu de protagonistes tamién nagüen por correr equí. Monza ye, ensin duldes, ún de los circuitos preferíos por bien d’ellos pola velocidá y pol ambiente que se vive, seyas o non pilotu Ferrari. Por eso nun ye raro lleer o sintir a los pilotos, dende Mercedes a Williams almitir que correr en Monza-yos da una motivación que vien, simplemente, de lo que se vive nes grades.

Nes fleches platiaes tán inda tascando les cabeces pa entender un poco meyor por qué nun pudieron facese cola victoria en Spa. Anque en teoría nun yeren favoritos, cuntaben con que diben ser quien a presionar a Leclerc más de lo que lo fixeron. En principiu Monza nun ye un circuitu pa ellos pero sabemos que la teoría rara vegada funciona, asina que cuntamos con ellos pa la pole y la victoria’l domingu. Lo mesmo facemos con Red Bull. Depués de la deceición de Spa, Verstappen llega a Monza cola necesidá de ponese al altor de les carreres anteriores al parón braniegu y Albon cola motivación añadida de tar nel primer equipu y de tener fecho un gran trabayu nel anterior gran premiu. Sicasí, l’holandés va camudar motor equí, asina que lu vamos a ver entamar dende atrás na parriella, dalgo qu’en principiu ye un problema pero que de xuru va danos momentos interesantes d’adelantamientos en pista.

McLaren ta teniendo una temporada perbona y nun dexamos de pensar en cuántos puntos llevaríen si la suerte acompañara. En Spa dambos pilotos quedaron fuera de carrera, más llaceria nel casu de Norris, que foi quintu tola carrera y na última vuelta quedó fuera. Anque’l so puestu nel campeonatu nun peligra en principiu, los baxones de forma suelen ser malos amigos pa la segunda parte de la temporada y en Woking nun pueden despistase. Sobre manera porque, viendo lo visto en Spa, Renault y Racing Point vienen con fuercia. Los primeros namás puntuaron con Hülkenberg pero nun dieron mala imaxe en pista y los segundos atroparon puntos con dambos, dalgo que yera raro na primer parte de la temporada. Racing Point yera tradicionalmente ún de los equipos que se desinflaben na segunda parte del añu por cuenta de la falta de recursos que permitiera siguir evolucionando’l coche. ¿Pasará lo contrario esti añu?

Nun paez que suene raro dicir que Pierre Gasly amosó meyor rendimientu en Toro Rosso na pasada carrera que lo que vimos en Red Bull. Ye verdá que’l so compañeru sigui sumando puntos y que quedó per delantre, pero’l francés paecía sintise más seguru al volante del so nuevu coche y nun dexamos de pensar que, quiciábes, vamos a velu resurdir depués de la deceición que supunxo’l so cambiu de Red Bull a Toro Rosso.

Alfa Romeo tampoco nun tuvo un bon gran premiu en Spa, pero equí cuerren en casa. Siempre dicimos que, anque paeza que non, a munchos equipos y pilotos correr en casa val-yos p’atopar esi estra de motivación que nun atopen n’otros eventos. Nesti casu tamién ye carrera llariega p’Antonio Giovinazzi, mui necesitáu de tornar a los puntos depués del accidente de la última vuelta en Spa que lu dexó fuera. De Kimi realmente podemos esperar cualquier cosa. Si’l coche responde, nun sedría raro velu en puntos, compitiendo quizá por ser quintu o sestu incluso.

Coméntase pel paddock que Romain Grosjean tien un pie fuera de Haas y que’l so asientu va ocupalu Hülkenberg. Sabiendo la rellación, digamos, tensa qu’hai ente l’alemán y Kevin Magnussen nun sabemos hasta qué puntu va resultar bona esa mezcla, pero sí ye verdá que’l francés esta temporada nun ta consiguiendo atopase a gusto nel coche. Cásique podemos dicir lo mesmo de dambos, porque’l monoplaza lleva repitiendo’l mesmu patrón casi tola temporada: rápidu a una vuelta, desastrosu en carrera. Les gomes, el coche, los pilotos… naide atopa a quien echar la culpa, les carreres avancen y Haas ve como’l restu d’equipos sumen mientres ellos siguen atrapaos no baxo la tabla.

Ye vezu zarrar les previes con Williams por ser l’últimu equipu na clasificación. Sicasí, nun nos paez que seyan los que peor imaxe tán dexando. Les llimitaciones qu’acompañen a los pilotos en tolos grandes premios siguen ehí y anque pasín ente pasu van amenorgando, nun paez que vaigan desapaecer dafechu no que queda de temporada. Sicasí, l’equipu ta dexando una bona imaxe de trabayu, de regularidá en pista y de compromisu cola evolución del so coche. Tando como tán les coses paeznos que nun hai muncho más que podamos pidir de momentu.

Llega’l gran premiu d’Italia con amenaza d’agua pal sábadu ya’l domingu, asina que les cabeces tornarán a mirar al cielu. Los horarios, como davezu, los que tuvimos nes últimes carreres:

Y estes son les gomes que vamos ver usar a los equipos demientres el fin de selmana en Monza:

El retornu de la F1 a l’actividá nun dexó un gran premiu mui interesante, pero sí con dalgunos aspeutos que comentar y cola primer victoria de Charles Leclerc en Ferrari. Sicasí, la carrera del domingu quedó tapecida pol accidente tremendu del sábadu na carrera de F2 nel qu’un de los pilotos, Anthoine Hubert, protexíu de Renault, dexaba la so vida. Tolos equipos y tolos pilotos, el mundu del motor en xeneral, quedaron murnios cola noticia y los homenaxes nes carreres de F3 y F1 (la segunda carrera de F2 nun se cellebró por respetu) fueron mui sintíos. Dende esti blogue sumámosnos al pésame a familiares y collacios del pilotu, un talentu de la F2 que, como tantos otros, namás diba a la gueta del suañu de ser un día pilotu de F1.

SÁBADU

Un accidente de Hamilton na tercer sesión de llibres dexaba duldes de si podría competir na sesión de clasificación, sicasí l’inglés nun tuvo problema nengún pa tomar parte. Lo que nun pudo facer foi, esta vegada, sumar otra pole pala so coleición. Nel so llugar, Charles Leclerc completó la vuelta perfeuta pa ser quien ocupara esi primer llugar de la parriella’l domingu. Sebastian Vettel ocupó’l segundu puestu colos dos pilotos de Mercedes terceru (Hamilton) y cuartu (Bottas).

El fechu de qu’un gran númberu de pilotos tuvieran penalización nun dio una sesión de clasificación demasiao intensa y de fechu altó l’orde orixinal de tiempos. McLaren, Red Bull, Toro Rosso y Renault, arrastraben penalizaciones asina que nun yera sorpresa ver a los sos pilotos con actuaciones discretes el sábadu. Amás, Kubiça nun llegó a marcar tiempu asina que foi decisión de los comisarios el que pudiera competir el domingu.

DOMINGU

Como avezamos esti añu, la salida nun presentó munchos problemes. Si acasu podemos falar de Verstappen qu’una vegada más nun brilló nesi momentu tan importante y quiciábes foi por eso que la so carrera terminó tan pronto. Viose retrasáu en posiciones y a la gueta d’un espaciu nel qu’adelantar a Kimi Räikkönen, acabó dando col finlandés y chocando coles barreres provocando’l primer coche de seguridá. Räikkönen pel so llau nun tuvo una carrera tranquila dende esi momentu, por daños nel baxu del so coche que lu mantuvieron nes posiciones baxes el restu del gran premiu.

Leclerc mantuvo la so posición ensin problema, Vettel tuvo d’aguantar más a Hamilton y esti a Bottas, pero en xeneral les posiciones d’arriba nun variaron. Norris tuvo otra bona salida que lu diría colocando no alto llueu. Pronto entendimos que la carrera, a diferencia d’otres vegaes, diba tar ente trés contendientes y que quiciás les estratexes de parada diben a decidir quién sedría’l ganador. Al primer coche de seguridá nun tardó en seguilu otru depués de que Sáinz tuviera de salise del trazau por cuenta d’una pérdida de potencia que supunxo’l so abandonu. La deceición ye grande pues el pilotu madrilanu llevaba penalización precisamente por cambiu en pieces del coche ya’l so abandonu tempranu nun ye bona señal.

Col pasu les vueltes, los puestos fueron estabilizando, quedando bien marcada la cabeza de carrera y la llucha polos puntos, onde como casi siempre esti añu tuvo lo más interesante. Lleguemos a ver adelantamientos triples, un Sergio Pérez especialmente inspiráu, mesmo que’l so compañeru d’equipu Lance Stroll. Al tiempu, vimos a los Haas lluchando por mantener la posición con un coche que nun yera quien siquiera a plantar cara a rivales inmediatos. Nin Magnussen nin Grosjean podíen casi competir colos pilotos que los adelantaben y de fechu’l francés foi mui esplícitu nel so mesaxe de radio al equipu diciendo que-yos faltaben a lo menos 20 km/h de velocidá pa poder siquier suañar con entrar en puntos, respondiendo asina a un mesaxe d’ánimu dende’l muru.

Ferrari fixo funcionar la so estratexa parando a Vettel primero y dexando a Leclerc en pista, dalgo que provocó que, al parar el pilotu monegascu delles vueltes más tarde, l’alemán quedara per delantre. De mano paecía que l’equipu taba regalando a Vettel la carrera pero pronto descubrimos que, pa variar, la estratexa de Ferrari funcionara y que Vettel namás taba faciendo llabor d’equipu, la cual remató cuando, orde d’equipu mediante, dexó pasar al so compañeru. Dende esi momentu pa Leclerc foi too tirar y engrandar el güecu colos sos persiguidores y pa Vettel facer por parar a Hamilton que parara un pocu depués de Leclerc.

L’inglés nun dexó d’intentar averase al pilotu de Ferrari, pero esta vegada Leclerc tinía tomada la midía a esta carrera y nun diba vender baratu’l so primer puestu. Sicasí, Hamilton nunca nun llegó a ponese tan cerca como pa intentar adelantar y la carrera del monegascu, anque trabayada, nun-y dio demasiaos problemes nesi sen.

Depués de les paraes del so compañeru y de Hamilton, Sebastian Vettel nun pudo durar muncho más en pista y resignáu a nun quedar en podiu, decidió entrar otra vuelta a cambiar gomes, quedando dende esi momentu per detrás de dambos Mercedes. Recibió’l consuelu, sicasí, de sumar un puntu pola vuelta rápida de carrera. Per detrás, pero a una distancia bultable, rodaba Norris que fexo una carrera perbona hasta que na última vuelta la unidá de potencia xugo-y una mala pasada y dexolu atravesáu na llínia de meta. Les sos esperances de consiguir el so meyor resultáu de la temporada con McLaren desapaecieron y anque clasificó pa la carrera, féxolo fuera de puntos nel puestu once. Al empar casi, Giovinazzi acababa na muria.

Vimos un Alexander Albon que pali que pali foi faciendo sitiu pa terminar quintu na so primer carrera pa Red Bull. Tamién vimos enforma inspiráu a Pierre Gasly que depués del cambiu a Toro Rosso consiguió entrar en puntos, anque Kvyat clasificó per delantre d’él. Yá diximos que Sergio Pérez taba especialmente motiváu y asina lo confirma’l so sestu puestu al final de la carrera, con Stroll rascando l’últimu puntu en décimu llugar. Nun foi un gran día, sicasí, pa Renault. Dempués de la terrible noticia del sábadu, los sos dos pilotos diben con penalización y anque Hülkenberg sí sumó puntos, acabando octavu, Ricciardo nin siquier s’averó a ellos, terminando décimocuartu.

Haas, como yá diximos, nun ven la lluz al final del túnel y quedaron nos puestos doce y trece n’otra carrera deceicionante pal equipu estauxunidense y col futuru de Grosjean en dulda. Pa zarrar esti resume, destacamos el llabor de George Russell col so Williams, qu’acabó nel puestu quince, per delantre del Alfa Romeo de Räikkönen con munchísimos problemes depués del accidente con Verstappen y, otra vegada más, del so compañeru d’equipu Robert Kubiça.

Entavía coles coraes encoyíes, ponemos direición a Monza, al templu de la velocidá, pal Gran Premiu d’Italia nunos díes. Demientres llega, equí vos dexamos tolos númberos del fin de selmana nel circuitu de Spa-Francorchamps:

Clasificación

Carrera

Cásique llega setiembre y pa la xente formulero eso ye sinónimu de retornu de la F1 de les sos vacaciones y del Gran Premiu de Bélxica nun de los circuitos preferíos por fans, equipos y pilotos en xeneral. Les condiciones cambiantes que faen que mientres ta lloviendo nun llau nel otru tea faciendo sol, suelen ser garantía de bon entretenimientu y si hai daqué que precisa la F1 ye siguir na llínia que quedó marcada nes últimes carreres.

Tenemos un puñáu de novedaes nes manes. La primera y que yá conoceréis si lleistis el nuestru post de la silly season, ye que Pierre Gasly va competir dende Spa en Toro Rosso y nel so llugar en Red Bull vamos a tener a Alexander Albon, pilotu hasta agora de la escudería hermana. La decisión sorprendió a munchos y a otros non tanto pol fechu de que’l rookie taba faciendo una perbona temporada en Toro Rosso. Sicasí, paecía más obvio que diba ser Kvyat quien diera’l pasu alantre. Lo que ta claro ye qu’esti ye un golpe duru pa Gasly anque albidramos que nun ye dalgo que nun viera venir.

Tolos pilotos dedicaron estes selmanes al descansu y a los compromisos que les marques patrocinaores precisaren, pero en xeneral a recuperar enerxía pa enfrentar la segunda mitá de la temporada. Supimos demientres esta selmana que vamos tener carrera en Barcelona pa 2020. Dempués d’especular sobre la so salida del calendariu, paez que s’iguó la situación y Montmeló va allugar un gran premiu na temporada viniente. Ello dexa un calendariu con ventidós carreres qu’estos díes yera presentáu como borrador pendiente de facese oficial. El campeonatu de 2020 entamaría’l día 15 de marzu n’Australia, como davezu, y remataría’l 29 de payares nel circuitu de Yas Marina, n’Abu Dhabi. El futuru de Monza nesi calendariu ta pendiente de l’anovación del so contratu que, esperamos, seya la selmana que vien coincidiendo col eventu en tierres italianes. Tai sollertes a les nuestres redes au compartiremos el calendariu cuando seya oficial.

No que cinca a los equipos, ún de los que va llevar muncha de la nuestra atención, sobre manera nesti primer gran premiu depués de les vacaciones, ye Haas yá que dende l’equipu confirmóse que los dos pilotos van dir con too yá dende Spa, dexando de llau esperimentos y rodando coles últimes meyores a la gueta de los puntos naguaos. Nun va tenelo cenciello. Esti añu tenemos quiciás ún de los grupos de mitá de la tabla más apertaos y con más posibilidaes, pesie a que paez que McLaren yá tien ventaya sobre’l restu.

Aparte, y con razón, tolos güeyos tarán puestos enriba de Max Verstappen y de lo que pueda facer a partir d’agora pa poner n’apuros a Hamilton. Bottas debiera tamién dar un pasu alantre, pa xustificar otra vegada la confianza del so equipu n’él yá que Mercedes confirmó esti xueves que cuntaba col finlandés pa 2020. Dambos pilotos encargaránse de frenar a un Hamilton que yá casi toca’l so sestu campeonatu de Fórmula Ún. Amás l’equipu aterriza nel circuitu belga con meyores na so unidá de potencia, motivu sobráu pa siguir de cerca lo que vaigan faciendo en pista.

Cuidamos que Ferrari aprovechara’l parón pa poner les coses n’orde y salga a competir con tolo que tenga, pesie a que ye bastante complicao que seya quien a iguar la temporada, con Mercedes bien lloñe en dambos campeonatos y Max Verstappen pel mediu. Sicasí, pola salú de la competición, sedría interesante tener a los dos pilotos de la Scuderia tamién dando guerra yá dende Bélxica. Toles posibilidaes tán dafechu abiertes pa la pole del sábadu y, sobre too y viendo les últimes carreres, pa la carrera del domingu. Vettel lleva ensin ganar un gran premiu precisamente dende Spa del añu pasáu, asina que de xuru tará pensando n’acabar esa mala racha esti domingu.

Con Albon agora en Red Bull y depués de ver el so rendimientu en Toro Rosso, nun podemos más qu’esperar a velu en pista y ver si ye quien a competir pol so primer podiu na Fórmula Ún pesie a qu’en Spa va entamar dende los últimos puestos de la parriella poles penalizaciones del so coche. Un podiu pa él nestes circunstancies sedría ensin duldes un pasu de xigante na so carrera y tamién un golpe más a la de Gasly, que nun pudo dar tol potencial que paecía que tinía. Xunto a él, ponemos l’enfotu nos dos pilotos de McLaren, sobre manera en Carlos Sáinz, fiándonos un pocu de que ta teniendo más suerte en carrera que’l so compañeru Lando Norris. Sicasí, el pilotu madrilanu tuvo poco ésitu nel pasáu nesti circuitu.

Lo que puedan facer los pilotos de Renault y Force India tamién nos paez que puede ser interesante, pola necesidá que tienen dambos equipos de quitar l’ósidu de la primer parte de la temporada, onde nengún de los dos rindió como s’esperaba d’ellos. La silly season yá llegó a ellos y el xueves supimos qu’Esteban Ocon va ser el sustitutu de Nico Hülkenberg pa 2020. El pilotu alemán quedaría ensin asientu, asina qu’onde yá tiníemos interés por velu competir en Spa, con esta noticia esti interés medra porque sabemos que va tar tamién corriendo pol so futuru na F1.

Alfa Romeo precisa que Giovinazzi eche un gabitu a Räikkönen y se xuna a él a sumar puntos pal equipu con regularidá. L’equipu nun ta nel puntu de mira de la silly season, anque los rumores de qu’Ericsson sigui esperando pola so nueva oportunidá paez que espoxigaron un pocu esta selmana. Nun escaecemos al yá mentáu Haas, que llega con un coche téunicamente meyor que en carreres pasaes y que suel dir bien en Spa.

Zarramos con Williams que llega a Bélxica ensin espeutatives pero a la gueta de dalgún puntu que quede sueltu si la carrera se descontrola, dalgo que yá funcionó nel pasáu.

Torna la Fórmula Ún y siguimos colos horarios europeos, ello ye, nun hai que madrugar:

Y pa esti gran premiu, estes son les gomes escoyíes:

Paecía complicao algamalo pero sí: n’Hungría tuvimos otra bona carrera. Nun foi tan intensa como la d’hai siete díes pero tuvo lo suficiente pa ser un gran premiu de los que presten. Munchos destaquen sobremanera la sesión de clasificación del sábadu, una de les meyores que tenemos visto en tiempu.

SÁBADU

Y ye que’l sábadu fuimos testigos de la primer pole de la carrera de Max Verstappen. Paez mentira que col ésitu que vien teniendo esti añu y n’años pasaos, tovía nun algamara una. El sábadu, nuna actuación perfeuta onde los cinco primeros teníen posibilidaes de facese con esi primer puestu, l’holandés pasó perriba de los sos rivales.

Depués d’un vienres ensin muncha actividá por cuenta del agua, el sábadu presentóse secu pa la sesión de clasificación. Ensin grandes sorpreses, la Q1 vio fuera a dellos protagonistes davezu: Stroll y Pérez, nun pasaron d’esa sesión. El pilotu mexicanu echó un pocu de la culpa a Ricciardo a cuenta d’una maniobra d’intentu d’adelantamientu que fixo que dambos perdieran la oportunidá de pasar a la sesión siguiente. Russell tuvo a piques d’entrar nella amosando qu’en verdá Williams ta progresando y, sobremanera’l pilotu inglés, ta esprimiendo’l coche al másimu.

Pela mitá de la tabla, deceición p’Alfa Romeo con Giovinazzi y Haas con Magnussen, que clasificaron bien abaxo y sábadu mui positivu pa McLaren, que vio a dambos pilotos na Q3 otra vegada más. Toro Rosso nun dio pa muncho, asumiendo dende l’entamu de la fin de selmana qu’esti gran premiu nun diba tener nada que ver con Alemaña.

Nos primeros llugares, la deceición ye quiciás Gasly. Clasificó sestu a 0.9 del so compañeru d’equipu na pole. Tamién tenemos de mentar a Ferrari, que nun pasaron de cuartu y quintu, dempués de que Leclerc casi quedara fuera de Q1 por un choque contra’l muru de recta de meta nun erru del pilotu monegascu que l’equipu pudo iguar a tiempu.

Con estes blimes, llegó’l domingu.

DOMINGU

Pesie a les amenacies de tormenta de tol fin de selmana, el domingu alboreció soleyero nel Hungaroring y asina quedó pa tol gran premiu, dalgo que de primeres facía albidrar que la carrera podía ufrir pocu espectáculu.

La salida foi limpia: Verstappen escapó rápido con Hamilton y Bottas apegaos a él nos primeros metros. Dambos pilotos de Mercedes ficieron por nun dexar a Verstappen escapar y por imponese l’ún al otru na segunda posición, batalla que terminó ganando Hamilton. De fechu, pasín ente pasu y depués d’un toque con Leclerc qu’afeutó al so alerón delanteru, el finlandés perdió posiciones que nun foi quien a recuperar más tarde. Vettel nun tardó n’adelantalu tamién y pronto vimos al alemán peleando con Sáinz por el quintu llugar.

Na vuelta dieciocho vivimos una de les munches batalles en pista que calterizaron el gran premiu y que nos tuvieron entreteníos. Los dos pilotos de Toro Rosso que, pesie a dir con desventaya nun dexaron de facer por metese en puntos, fueron protagonistes d’una d’eses lluches ideales nes que dambos pilotos respeten al otru y sólo el más rápidu consigui ganar, ensin choques nin momentos más tensos de lo normal pero compitiendo ensin vergoña. Los dos pilotos de Haas tendríen muncho de deprender viéndolo.

La vuelta venticinco foi la escoyida por Red Bull pa parar, mientres qu’en Mercedes pidíen a Hamilton que entrara en mou hammertime. Na treinta y dos, para Hamilton y la situación sigui igual, con Verstappen lliderando y l’inglés detrás. Los dos pilotos de Ferrari yeren terceru y cuartu y diben alternando posiciones ente ellos. Na vuelta treinta y ocho, el tráficu entama a ser un problema con coches doblaos y fuera de sitiu poles paraes. Verstappen pierde ritmu y distancia con Hamilton y ye esti ún de los momentos qu’aprovecha l’inglés pa pasar al holandés, pero ensin ésitu. Hamilton llega a salise de pista nel intentu, dando a Verstappen la oportunidá de tornar a recuperar la distancia que perdiera.

Con nada que perder y la segunda posición protexida de los Ferrari, Mercedes decide parar a Hamilton pa montar medios na vuelta cuarenta y nueve. El pilotu cuestionó la decisión, considerando que yera un erru que fadría que perdieran la carrera dafechu. Ensin embargu, delles vueltes más tarde, na sesenta y tres, Verstappen fexo saber per radio al so equipu que tinía les gomes desfeches dempués de treinta y ocho vueltes rodando con elles. Un pocu más tarde, na sesenta y siete, Hamilton adelántalu pa ponese llíder y nun abandonar esi puestu hasta la bandera a cuadros. Per detrás Vettel adelanta tamién a Leclerc, que pasa la carrera tamién con problemes de gomes, pa facese col tercer puestu del podiu.

Asina pues, nueva victoria pa Hamilton que lu alluga con sesenta y dos puntos de ventaya col segundu nel mundial de pilotos. Verstappen fexo vuelta rápida y acabo segundu dempués d’un gran fin de selmana que lu vio consiguir la so primer pole. Vettel foi terceru, nuna carrera onde Ferrari nun foi’l centru d’atención.

Per detrás de Leclerc, que foi cuartu, Sáinz terminó quintu. McLaren tornó a sumar con dambos pilotos, dempués de que Norris, que nun tuvo una carrera tan bona como la clasificación del sábadu, acabara novenu. La escudería inglesa amarra’l cuartu llugar, del que paez que naide va ser quien a baxalos. Nel puestu sestu llegó Gasly, otra vegada cuestionáu per tolos llaos pola so probe actuación en comparanza col so compañeru. Col parón de branu taremos sollertes pa ver qué pasa col so futuru. Los Alfa Romeo nun brillaron demasiao: Kimi sumó otra vegada los puntos pal equipu nel puestu sétimu. Giovinazzi namás pudo ver la bandera a cuadros en décimooctavu llugar.

Bottas tuvo de ver como’l so compañeru d’equipu sumaba otra victoria dende l’octavu llugar. Tuvo problemes dende’l vienres asina que lo visto’l domingu igual ye un pocu la continuación dellos treslladada a la carrera. Per detrás d’él y de Norris, en décimu llugar, tenemos a Alexander Albon, que consiguió l’últimu puntu en disputa. Kvyat, depués de l’allegría de xubir al podiu n’Alemaña, tuvo de conformase con acabar décimoquintu equí.

Fuera de puntos tenemos tamién a dambos Racing Point, con Pérez nel puestu once. El pilotu mexicanu perdió la so batalla personal con Albon por esi últimu puntu del décimu llugar y dambos llegaron a chocar, pero ensin consecuencies. Stroll tuvo una carrera bastante más probe, acabando nel puestu dieciesiete.

Renault tampoco nun tuvieron una carrera brillante. Hülkenberg tuvo problemes col coche que nun pudo rendir al máximo por quedase atascáu no que llamen mou seguru, que restaba al coche hasta 0.3 por vuelta. Terminó nel puestu doce. Ricciardo nun lo tuvo muncho meyor, y acabo nel puestu catorce. Haas acabó’l gran premiu nel puestu trece con Magnussen y Grosjean como únicu abandonu de la carrera con un problema de presión d’agua. L’equipu estauxunidense entavía nun tien rempuestes a les milenta entrugues que surden gran premiu tres gran premiu. Por exemplu, el rendimientu del coche de Magnussen que lu fai ser cuartu na Q1 y décimoquintu na Q2. O’l de Grosjean, que ye bonu pa clasificar novenu pero lu dexa perdíu en carrera.

Williams zarró la clasificación con Kubiça nel últimu llugar pero con Russell nel puestu dieciséis. Marchen de vacaciones col optimismu de saber que tán ameyorando y que, nun tardando, van poder averase a los equipos que pior lo tán pasando nestos momentos. Ye casi esperable que si tenemos otra carrera n’agua puedan suañar con sumar puntos otra vegada.

La Fórmula Ún para agora demientres tres selmanes hasta l’últimu fin de selmana d’agostu col gran premiu de Bélxica en Spa, ún de los míticos. Ye tiempu de silly season, de reflexón y meyores. Nós siguiremos asoleyando coses estes selmanes pa compensar esti vacíu de carreres.

Demientres, equí vos dexamos tolos númberos del fin de selmana n’Hungría:

Clasificación

Carrera

Tovía cola resaca del últimu gran premiu de la temporada na que vimos a Max Verstappen coronase otra vegada como’l más rápidu y a Williams ganar el so primer puntu de la temporada, llegamos al circuitu de Hungaroring, última cita enantes del parón braniegu.

Hungría ye un escenariu de contrastes: el calor y l’agua suelen ser protagonistes, mesmo que les tormentes, les más de les vegaes nel mesmu gran premiu y a lo llargo de la fin de selmana, suponiendo esto un retu pa los pilotos que tienen de dir adautándose a lo que la climatoloxía dicte. Tenemos visto un bon númberu de grandes premios perinteresantes, na llínia de los últimos trés d’esti 2019, pero tamién otros con muncha menos intensidá y que naide nun recuerda. La realidá d’esti añu ye que, pesie a qu’a Hamilton se-y da bien esti circuitu y amás ye ún de los que-y presta competir, Max Verstappen vien enchipáu depués de ganar dos de les últimes trés carreres y Valtteri Bottas tampoco nun quier descolgase. Amás, Sebastian Vettel pegó un puñetazu enriba la mesa n’Alemaña pa recordar a la xente que sigui siendo cuatro vegaes campeón del mundu y que cuerre con ún de los meyores equipos de la parriella. Con estes blimes, y si’l tiempu acompaña (esto ye, si l’agua asoma) paez que tenemos otra vuelta énte nós un gran premiu bien interesante.

Pa esta carrera, tenemos ganes de ver lo que dan de sí los Toro Rosso. Dambos pilotos tuvieron un rendimientu perbonu n’Alemaña, anque Kvyat foi quien sacó más premiu d’ello. Dempués del tuit con dedicatoria d’Honda pa cellebrar esti resultáu, quedamos con ganes de siguir viendo lo que pueden facer non sólo Red Bull si non tamién los dos “guaḥes”, que naguen por dar el saltu al primer equipu. Pierre Gasly tien motivos pa tar preocupáu: avérase’l parón de branu, que suel ser momentu de movimientos y confirmaciones, y los dos pilotos de Toro Rosso tán faciendo méritos pa sustituyilu. Anque ye verdá que nos últimos grandes premios el pilotu francés tuvo un rendimientu más positivu, entavía nun ta al altor de lo que se demanda d’él en Red Bull, y tanto Kvyat como Albon yá tán llamando a la so puerta.

Alfa Romeo fueron protagonistes n’Alemaña por ser descalificaos cuando dambos pilotos entraren nos puntos. Tres d’esa deceición, Hungría ye una oportunidá nueva pa dir xubiendo na clasificación. McLaren paez que tienen aseguráu’l cuartu puestu del mundial de constructores, mesmo que Renault lo tuviera l’añu pasáu, con un colchón bastante folgáu de puntos. Sicasí, el retu de la escudería de Woking ye acabar carreres con dambos coches, faciendo por iguar los problemes de fiabilidá que tán atopando los sos pilotos. Lo mesmo podríemos dicir de Renault, a un nivel mayor, porque yá son munches les carreres nes qu’a lo menos ún de los sos pilotos queda fuera, cuando non dambos, como vimos n’Alemaña. La promesa de ser competitivos nesta temporada entavía nun ta cumplida y muncho tienen qu’ameyorar les coses pa que lo faga esti añu.

Repasando tolos equipos de la parte medio de la tabla decatámosnos de que nun hai nengún qu’a estes altures de la temporada tea destacando dafechu nin que tea llibre de problemes nin faciendo les coses muncho meyor que’l restu. McLaren, como diximos, nun son quien a meter a dambos pilotos en puntos davezu, mesmo que Renault. Alfa Romeo tampoco nun son regulares nesi sen, siendo casi n’esclusiva Räikkönen l’encargáu de sumar pal equipu. Pero si pensamos nos otros equipos (con Toro Rosso agora nun momentu más dulce) toos lleguen con dalgún tipu de mancadura. Racing Point sumó un perbón resultáu con Stroll n’Alemaña, qu’amás por fin foi quien a pasar a Q2. Sicasí, Sergio Pérez nun pasó de la vuelta dos en carrera. Haas cuayaron un bon resultáu, con dambos pilotos en los puntos. Ensin embargu, otra vegada tuvieron un momentu en carrera que punxo nerviosos a los miembros del equipu y que de xuru motivó otra charra del so xefe. Hungría va suponer otra oportunidá pa toos estos equipos d’axustar, aplicar meyores a los sos coches y facer por apretar entavía más la distancia en puntos que los separa.

Williams merez capítulu aparte porque, dientro de les sos miseries, continúa rematando los grandes premios colos dos coches, con una diferencia bultable col restu, sí, pero con garantíes de fiabilidá. De xuru que nel equipu preferiríen menos fiabilidá y más velocidá y rendimientu, pero a lo menos agora yá pueden dicir que consiguieron sumar un puntu, anque fuera por descalificación d’otros, y nun van acabar la temporada en blancu. Si llueve n’Hungría, tornaremos a tar sollertes pa ver si esta vegada son quien a ponese en puntos por méritu propiu.

Tamos preparaos pues pa vivir l’últimu gran premiu d’esta primer parte de la temporada, ún d’esos grandes premios polos que siempre naguamos puesto que suelen regalanos eventos intensos. Abaxo podéis atopar tola información sobre ún de los circuitos míticos del calendariu y los horarios pa esta fin de selmana:

Les gomes escoyíes pa esti gran premiu son les siguientes: