Category: Análisis

L’añu pasáu yá ficimos un “De lo meyor…” pa ensalzar lo que nos paeció lo meyor de la temporada. Nesti 2019 que yá muerre, repitimos y equí vos dexamos lo que p’Asturies F1 foi lo más destacable d’estos meses de competición.

MEYOR PILOTU: D’un tiempu a esta parte paez difícil (o inxusto) nun escoyer a Lewis Hamilton como’l meyor pilotu de la temporada. Ser campeón del mundu otra vegada debiera ser xustificación suficiente pa ser el meyor pilotu de la temporada y por tanto quedámonos col inglés. Sicasí, queremos rescamplar el llabor de Charles Leclerc nel so primer añu en Ferrari. El pilotu monegascu foi quien a sacar del so sitiu a Vettel, poniéndolu al llímite y faciendo que tol mundu se cuestionara si l’alemán sigui tando al altor de la competición. Tamién hai que sorrayar lo fecho esta temporada polos rookies. Los tres dientro de les posibilidaes que tuvieron demientres esti añu amosaron que nun tán ehí por nada.

MEYOR EQUIPU: Una vegada más, Mercedes. En conxuntu como equipu son imbatibles. Los plantegamientos que faen de les carreres, que llueu presten más o menos a los sos fans, dexen claro qu’entiende de qué manera hai que lleeles y plantegar les estratexes, dalgo que nun pueden decir otros equipos como Ferrari, qu’esti añu otra vuelta foi protagonista negativu poles sos decisiones.

Nun podemos, sicasí, escaecer a McLaren. L’añu pasáu nun lo ficieron mal pero taben lloñe de suañar colos cuartos puestos y podios qu’algamaron esti añu. Ye verdá qu’entá-yos queda muncho que rodar pa rivalizar colos tres primeros equipos, pero les blimes yá tán ehí ya’l pasáu negativu con Honda yá ta (casi) escaecíu.

MEYOR COCHE: Como yá pasara en 2018, paeznos que Ferrari cuntaba col meyor coche de la parriella pero diverses circunstancies ficieron que nun valiera pa facese col campeonatu. Nos test de pretemporada yera casi imposible nun creyer que diben ganar el mundial, pero la lóxica suel imponese y los errores ya indecisiones nun perdonen.

MEYOR CARRERA: Nesti casu tenemos dos opciones: per un llau Austria, porque foi’l cambiu de torna dende una carrera aburrida como foi Francia a una carrera intensa como foi ésta. Quiciás podemos marcala como’l puntu de partida d’una parte de la temporada muncho más prestosa. Per otru llau Alemaña foi la sorpresa del calendariu puesto que nun solía dexar carreres particularmente interesantes pero la d’esti 2019 foi pa enmarcar.

MEYOR MOMENTU: La victoria de Leclerc llévase esti honor. Los tifosi llevaben cuantayá naguando por ver otra vegada a un pilotu del so equipu no cimero del podiu y Charles Leclerc encargose de facer el suañu realidá. La esplosión de color y ruíu que ye la ceremonia del podiu de normal nel circuitu de Monza triplicose nesti 2019.

MEYOR EVENTU: En rellación colo anterior, tuvimos una carrera bona en Monza y l’ambiente creau en torno a les carreres n’Italia fai qu’esti añu nos mereza el premiu a meyor eventu. Yá dicimos, non sólo polo visto en pista si non tamién pol ambiente, pola atmósfera que crean los tifosi ya’l restu de fans qu’acuden a esti eventu. Otros años ta compitío con Silverstone, qu’esti añu tampoco nun lo fizo mal, pero pa esti 2019 Monza sobresalió.

Equí ponemos el puntu final a esti 2019 d’emociones, aburrimientos y munches esperances puestes nos años futuros pa ver un cambiu real na competición. 2020 va ser un añu de transición polo que taremos sollertes a los pasos que se dean tanto dientro como fuera de la pista. Naguamos por ver munchu espectáculu dende la primer carrera n’Australia y hasta la última allá n’avientu.

La temporada 2019 dio pa bastantes cosines qu’analizar y equí llegamos cola segunda parte de too ello. Na primer parte repasemos l’actuación de los cinco primeros clasificaos y toca agora echar un güeyu a los cinco últimos equipos.

Como yá dicíemos, Renault consiguió ser quintu na clasificación de constructores pero nun lo tuvo fácil. De fechu, Toro Rosso peleó hasta’l final pa poder facese con esi quintu puestu. La primer parte de la temporada con Kvyat y Albon, la escudería hermana de Red Bull rindió bastante bien: el rusu tornó con otra actitú y muncha más seguridá en pista y Albon debutaba dexando bones actuaciones. El cambiu d’Albon por Gasly na segunda parte, lloñe de desestabilizar al equipu, foi un extra pues el francés nun s’arrugó y tuvo meyores carreres que con Red Bull. Sicasí, esi arreón d’última hora nun foi suficiente p’adelantar a Renault na clasificación.

Racing Point tuvo un iniciu de temporada mui probe. Entamar asina una temporada pa un equipu de la parte medio de la tabla pon les coses mui complicaes pal restu del añu. Ye verdá que Racing Point suel medrar muncho col pasu de les selmanes y sacar el másimu rendimientu a les meyores que van llegando, pero esti añu foron insuficientes ya’l so efeutu menor en comparanza col restu de rivales. De toles maneres, ser sétimos na clasificación nun ta mal si cuntamos con tolos aspeutos negativos que tuvieron de dir enfrentando. Cola situación más estable agora que nel pasáu, cuidamos que pa 2020 puedan iguar tolos problemes d’esti añu y tener asina un iniciu de temporada más curiosu.

Alfa Romeo tuvieron l’efeutu contrariu. El so iniciu de temporada foi mui positivu, sumando puntos casi regularmente y con Kimi Räikkönen en puestos altos de la clasificación. Giovinazzi tardó n’arrancar, pero tuvo actuaciones decentes. Ensin embargu, el parón de branu supunxo un baxón de forma del equipu, que poques vegaes tuvo en puntos nesa segunda parte de la temporada. Ello desplica que se fundieran na clasificación y quedaran sólo por delantre de Haas (con milenta y ún problemes en tolos grandes premios) y Williams.

Falando de Haas podemos describir la so temporada como una incertidume continuo. La confusión de nun ser quien a entender el coche nin les gomes foi la tónica de tola temporada y por ello los tenemos penúltimos esti añu. Foron capaces d’actuaciones brillantes el sábadu, nes sesiones de clasificación, pero los domingos (salvo esceiciones) desapaecíen nos puestos baxos. La situación foi tan dramática como pa que llegara un puntu nel que l’equipu tuviera d’optar por reaniciar tol procesu y ponese a trabayar col coche de la primer carrera y entamar tol trabayu dende cero. En temporaes pasaes vímoslos rindiendo a un bon nivel que precisen recuperar, depués de superar toles torgues, pa 2020.

Y zarramos esti repasu a 2019 con Williams. Lleven dos años nel fondu de la tabla ensin munches esperances de recuperación. Esti añu, anque malu en términos de clasificación, el rendimientu nun foi malu y podemos falar de regularidá. La velocidá nun ta pero sí la fiabilidá, dalgo tamién importante pa los equipos. Los abandonos fueron pocos, y cásique se concentraron nes últimes carreres de la temporada, lo cual ye dalgo importante pensando nel desarrollu futuru de los monoplaces. El puntu consiguíu ye muestra de lo insuficiente de la temporada pero nun son too coses negatives. George Russell tuvo un debú bien positivu, casi siempre per delantre del so compañeru, más veteranu, Robert Kubiça. El retornu del polacu a la F1 depués de dellos años fuera y del so accidente nun foi tan bona como cuidábemos que sedría. Anque seguirá venceyáu al deporte, nun va siguir como primer pilotu de Williams pero naide nos quita’l prestu de tornar a velu al volante depués de tantu tiempu.

Esti resume intenta poner un pocu en perspeitiva tolo que foi esti 2019 nunes cuantes ringleres. Foi un añu bastante densu de coses, colos güeyos eternamente puestos nos cambios pa 2021, con un baille de pilotos más tranquilu de lo que tamos avezaos y en xeneral cola intensidá propio de una temporada de F1.

Pal añu que vien, la F1 estiende’l so calendariu otra vegada, y lo que puede suponer una allegría pa la xente que siguimos toos y caún de los eventos, nun lo ye tanto pa los equipos. Hai que rescamplar los esfuercios de tol personal envueltu na competición pa enfrentar la demanda creciente de más carreres. Nel 2020 vamos tener dos circuitos nuevos, Zandvoort y Hanoi y perdemos el gran premiu alemán. Sumamos un total de 22 carreres que van poner, otra vuelta, a los equipos nel llímite de les sos posibilidaes.

Enantes de rematar dafechu esti 2019, tornaremos con un post atropando lo meyor y lo pior del añu na másima competición de motor.

Yá pasaron delles selmanes dende l’últimu gran premiu d’esti 2019 y, a piques de zarrar l’añu, paeznos que toca facer un pocu de resume sobre cómo lu vivimos, les coses que nos prestaron, les que non y les qu’echemos en falta.

Quiciabes la primer parte del añu foi la que más emociones variaes nos traxo. Carreres prestoses pero non hasta’l puntu de ser de les que queden na memoria pa años y años xunto a otres mui mui aburríes. Ye probable que Francia fuera’l puntu altu d’esti sintir, cuando entamaron les voces crítiques cuestionando l’interés de la competición. Y entós sí, entós vinieron les bones carreres, de les que nun dexen despegase del asientu o llevantase cada pocu por cuenta la emoción. Y asina una tres otra, con dalgún descansu, pero práuticamente hasta’l final del añu. Y yá nun hubo más voces crítiques, salvo dalguna qu’otra nes carreres menos interesantes.

Dende hai dellos años, Mercedes tien tomada la midida al restu d’equipos. Anque nesti 2019 partíemos con un Ferrari supuestamente superior a les fleches platiaes, la Scuderia nun foi quien a aprovechar esa superioridá que foi evidente en delles carreres pero que quedó na solombra por cuenta los numberosos errores de pilotos y equipu. La llegada de Leclerc desestabilizó mentalmente a un Vettel avezau a ser el primer pilotu. Anque yá nel pasáu lu vimos sufrir con pilotos como Ricciardo, la realidá ye que Leclerc foi quien a sacalu de la comodidá del tenelo too fecho, dexando n’evidencia la necesidá que tien l’alemán de reconeutar col pilotu que yera nel pasáu. Toes estes debilidaes aprovechóles Mercedes como lleva faciendo nel pasáu. Entamó la temporada con victoria tres victoria, sumando los dos pilotos victories mientres el restu de la parriella facía por entender cómo lo taben faciendo si nun tiníen el meyor coche.

El trabayu de formiga del equipu alemán acabó pagando la pena al final de la temporada, con otra victoria en dambos campeonatos y un Valtteri Bottas más crecíu. El finlandés entá nun pudo ponese al altor de Hamilton (nun sabemos si sedrá quien en dalgún momentu) pero ye verdá qu’esti añu dio un pasu alantre y notose nel so rendimientu en pista. Y asina, otru campeonatu pa Mercedes y el sestu pa Hamilton.

Red Bull apostó por Verstappen y Gasly como pilotos pa esti 2019. Nun sorprendió muncho qu’escoyeran al francés porque, en verdá, nun tiníen munches más opciones. Sí que munches persones cuntaben con un retornu de Kvyat, pero que fuera Gasly l’escoyíu entraba tamién nes quinieles. Pronto se vio, sicasí, que la presión pudo más qu’él y nada de lo que tiníemos visto nel pasáu valió p’asegurar l’asientu, qu’ocupó Albon na segunda parte de la temporada. Verstappen ye un compañeru duru de vencer y ser un recién llegáu al primer equipu de xuru nun foi nada cenciello. Nun hai más que ver que, dende que tornó a Toro Rosso, el so rendimientu ameyoró y consiguió hasta un podiu.

Albon aprovechó la oportunidá que-y dieron en Red Bull y caltién el so asientu pa 2020. Nun yera la elleición más obvia (otra vuelta, tol mundu confiaba más en Kvyat que nun rookie) pero hai qu’almitir que nun lo fizo mal y tuvo actuaciones bien dignes. Insistimos: tener a Verstappen de compañeru d’equipu nun tien de ser cenciello pa quien llega nuevu pesie a qu’Albon nun ye de los que s’achanten.

La temporada del toru coloráu foi de menos a más, pero foi definitivamente bona pa ser el so primer asaltu con Honda. Amosó que la decisión de camudar de Renault al xigante xaponés nun foi mala y mandó dellos mesaxes al garaxe de McLaren, que pela so parte fizo una gran temporada. En Red Bull precisen, en 2020, otru pasu alantre más decidíu y, sobre manera, más temprano. Suelen espabilar muncho na segunda mitá de la temporada, faciendo la primera más floxa y eso fai que Mercedes y Ferrari tengan tiempu d’escapase nel mundial de constructores (el de pilotos suel ser otru asuntu).

Podemos dicir que McLaren foi quien quiciás tuvo una meyor temporada en comparación coles pasaes. La recuperación de forma del equipu inglés, de la mano de dos pilotos tan mozos (nun escaecemos que Norris ye un rookie) nun fai más qu’ayudar a ser optimistes ente les files de Woking. Anque nun tuvieron tola suerte de so parte y hubo demasiaes carreres con abandonos, cuando puntuaben, tanto Sáinz como Norris solíen facelo ente los diez primeros, un gotéu de puntos qu’ayudó a amarrar el cuartu puestu bien ceo na temporada y a nun soltalu hasta’l final.

Renault peleó hasta’l final por amenorgar la distancia con McLaren, pero los numberosos problemes de fiabilidá, la falta de puntos en munches carreres y el meyor rendimientu del equipu inglés nun lo fizo posible. Sicasí, un quintu puestu ye bien meritoriu nuna temporada na que’l mayor interés tuvo pela parte medio de la tabla. L’equipu francés quiciás nun rindió lo que s’esperaba por diverses razones, pero sigue siendo equipu col que cuntar dientro de los puntos. Agora, cola marcha de Hülkenberg y la llegada d’Ocon, diremos viendo si pa 2020 pueden aportar esi puntín de meyora que precisen pa poder pasar a McLaren.

Hasta agora echemos un güeyu a lo que ficieron nesti 2019 los cinco primeros equipos de la tabla. N’otra entrada qu’asoleyaremos estos díes repasaremos a los otros cinco, que tamién dieron coses interesantes qu’analizar.

Nun hai temporada de Fórmula Ún ensin una bona dosis de silly season. Añu tres añu, sobremanera nesta época del añu, el branu y más entá aprovechando’l parón, sucédense los rumores y los comentarios sobre’l futuru de los pilotos y los equipos pensando nel añu viniente. Anque entavía queda muncho que dicir nesta temporada na parte media de la tabla, la silly season sigui los sos propios ritmos, alloriantes como’l so propiu nome indica, y nun hai nengún equipu nin pilotu que nun seya protagonista nella. Dacuando, los rumores terminen cuayando; otres veces, nun queden más que neso, polvu. Por eso, queremos insistir que tolo que se comenta equí nun ta confirmao y pa eso vos encamentavos qu’aguantéis a que saquemos el nuestru post añal colos pilotos que se vaigan confirmando pa la viniente temporada, qu’asoleyaremos cuando la temporada tea a piques d’acabar. Vamos dir equipu a equipu:

MERCEDES

Hamilton hai tiempu que nun ye oxetu de rumores, anque tol mundu sabe que la hora de la so retirada ta cada vegada más cerca. Ye ún de los veteranos de la parriella y paez que yá nun-y queda cásique nengún récor que frayar. Sí ye verdá que munches persones coinciden en que l’inglés tien como meta consiguir igualar (o superar) los siete mundiales de Michael Schumacher. Paez que ta a piques de facese col sestu esti añu, asina qu’en teoría quedaríen-y dos más, cuntando con que gane los que vienen. De momentu, el so futuru nun se ve lloñe de Mercedes.

Nun podemos dicir lo mesmo de Bottas. Pesie a que nun ta faciendo una temporada mala, y les anteriores tampoco nun fueron males, el fechu de ser compañeru d’equipu d’un campeón del mundu pon n’él una presión qu’otros pilotos nun tienen. Nes temporaes que lleven compitiendo xuntos se pide al finlandés que seya quien a facer lo que non munchos son a facer, que ye superalu en pista. Sí qu’esti añu empezó bastante meyor la temporada, pero la forma nun cuayó. Fálase de que Mercedes nun va aguantalu un añu más, y de fechu Wolff comentó que’l so futuru diba decidise esti branu, dando a entender que’l finlandés nun les tien toes en Mercedes. Piquen a la puerta Esteban Ocon, esti añu fuera de competición pero dientro del equipu y ún de los firmes candidatos a xubir a la flecha platiada. Hailos que piden qu’Alonso vuelva a competir en Mercedes, pero nun paez que vaiga ser daqué factible, a lo menos na temporada que vien.

ACTUALIZACIÓN 29/08/2019: Valtteri Bottas va siguir en Mercedes pa 2020.

FERRARI

Leclerc siguirá en 2020 en Ferrari, pero los rumores arrodien a Vettel. La so forma esti añu y l’añu pasáu y la falta de resultaos (esto ye, campeonatos y victories) son motivu suficiente pa facer que l’alemán seya tamién protagonista d’esta silly season. Conociendo a Ferrari, que nun son de cambios mui arriesgaos (que ficharan a Leclerc tan llueu foi una sorpresa) sedría raro que nun caltuvieran a los dos pilotos pero tamién tenemos que cuntar con que’l propiu pilotu quiera colar. Lo que nun sabemos ye aú diría si eso pasare.

RED BULL

Gasly taba nel puntu de mira dende bien ceo esta temporada. La irregularidá y la bona temporada del so compañeru d’equipu teníenlu casi sentenciáu nel equipu del toru coloráu. Ye verdá que les comparaciones son inxustes, pero tamién que’l francés nun taba rindiendo como s’esperaba d’él y nun taba justificando la so elleición. Con Kvyat y Albon faciendo tan bon trabayu, paecía difícil que viéramos al francés acabar la temporada con Red Bull. Yera probablemente’l rumor que más taba dando de sí, pero ensin concretase dafechu hasta’l 12 d’agostu cuando Red Bull confirmó qu’Albon va ser el so pilotu pa lo que queda de temporada. Cuntamos con Verstappen pa 2020 y, suponemos, qu’Albon quedará otru añu más dependiendo del so rendimientu a partir d’agora.

ACTUALIZACIÓN 12/11/2019: Alexander Albon va siguir siendo piloto de Red Bull pa 2020.

McLAREN

Na escudería de Woking respiren tranquilos. Con dambos pilotos confirmaos pa 2020, la silly season esti añu pasa de llargo.

RENAULT

Nun sedría lóxico que Renault dexare escapar a nengún de los sos dos pilotos. Ricciardo acaba de llegar y Hülkenberg ye garantía de bonos resultaos. Sí que ye verdá que suel ser ún de los pilotos que siempre ta na boca de toos nesta época, siempre a la gueta d’un sitiu más competitivu pero nun tenemos claro cuál sedría esa opción viendo como ta la parriella agora mesmo.

ACTUALIZACIÓN 29/08/2019: Renault da anuncia de que pa la temporada 2020 Esteban Ocon va sustituyir a Nico Hülkenberg.

TORO ROSSO

Una de les calterístiques de Toro Rosso ye que, como bon equipu “filial” los sos pilotos nun aguanten munchu tiempu, puesto que’l so oxetivu ye dar el saltu al “primer equipu”. Kvyat yá sabe qué significa eso y tenía munches posibilidaes de ser quien sustituyera a Gasly. Sicasí, el primer equipu decidió escoyer a Alexander Albon que taba faciendo tamién un gran trabayu pesie a ser un rookie y tener munchu marxe de meyora. Hai que dicir que nun sorprende tampocu que lu escoyeren pesie a que la lóxica facíanos pensar que diba ser Kvyat el qu’ocupara l’asientu de Gasly, que torna al “filial”.

ACTUALIZACIÓN 12/11/2019: Gasly y Kvyat siguirán siendo pilotos de Toro Rosso pa 2020.

ALFA ROMEO

Kimi Räikkönen ye’l pilotu más veteranu de la parriella. Siempre dixo que cuando nun-y prestara yá lo que facía pilotando, que lo dexaría. De momentu, nun tenemos sintío nada de que quiera dexalo pa 2020 y la llibertá que-y tán dando nel equipu paez que lu fai esfrutar, asina que cuntamos con él. Tamién con Giovinazzi, anque nun conocemos de momentu les espeutatives que tinía l’equipu puestes n’él. Ye verdá que nun ta rindiendo al altor del finlandés, pero yá sumó dalgún puntu y nes sos actuaciones, anque discretes, nun suel cometer munchos erros. Igual-y falta forma, rendimientu o velocidá, pero siendo la so primer temporada completa, paeznos que ta faciendo méritu pa siguir un añu más.

ACTUALIZACIÓN 14/11/2019: Alfa Romeo confirma qu’Antonio Giovinazzi va siguir como pilotu pa 2020.

RACING POINT F1

Con so pá como dueñu del equipu ye poco probable que veamos a Stroll salir de Racing Point pa 2020. Anque ta faciendo una temporada meyor que la pasada, entavía hai munchos aspeutos de meyora. Sergio Pérez, mesmo que Hülkenberg, tamién suel ser oxetivu de la silly season. Igual que nos pasa col alemán, nun vemos claro aú podría dir el mexicanu si sal del so equipu actual.

ACTUALIZACIÓN 30/08/2019 Racing Point F1 confirma a Sergio Pérez como pilotu pa 2020.

HAAS

Dambos pilotos tienen pinta de querer siguir pa 2020 y l’equipu paez querer caltenelos. Sicasí, tamién hai rumores de cambiu na escudería estauxunidense asina que taremos sollertes a les novedaes que nos lleguen dende ellí.

ACTUALIZACIÓN 19/09/2019 Haas confirma que Romain Grosjean va siguir siendo pilotu del equipu acompañando a Kevin Magnussen otra temporada.

WILLIAMS

Nun paez que Kubiça vaiga siguir pa 2020. El retornu que tanto prometía nun ta siendo’l suañu que s’esperaba y anque sólo’l fechu de tar de vuelta na parriella yá ye un méritu, nun paez que’l polacu tea esfrutando d’esta temporada. Russell pela so parte sí paez tener futuru en Williams, a lo menos otru añu. Nun creyemos que naide lu vaiga mover al so equipu, asina que probablemente un añu más curtiéndose na escudería de Grove seya la so meyor opción.

ACTUALIZACIÓN 19/09/2019 Williams confirma que Robert Kubiça nun va siguir en 2020 col equipu.

ACTUALIZACIÓN 28/11/2019 Williams confirma a Nicolas Latifi como pilotu pa 2020.

Hai un númberu de pilotos qu’agora mesmo tán fuera de la parriella y que tienen posibilidaes d’entrar: el yá mentáu Esteban Ocon, Pascal Wehrlein y Fernando Alonso son dellos de los nomes que suenen. Nicolas Latifi tamién podría tener la so oportunidá y de xuru que col pasu de les selmanes, dalgún más dirá apaeciendo. Siguiremos actualizando tolos rumores que vaigan formándose nesta silly season 2019.

El branu avanza y cada vegada tamos más cerca del retornu de les carreres. Ye’l tiempu de descansu y reflexón, y pa nós, d’analís de la primer parte de la temporada. Yá echemos un güeyu equí a los cinco primeros equipos clasificaos y agora vamos a rematar colos otros cinco, los que pel momentu tán deceicionando un pocu más.

Falábemos na otra parte del resume, que Renault tien cerca a Toro Rosso y puede ponese per delantre si cuayen bones carreres. El casu ye qu’esto nun ta siendo tan cenciello pal equipu francés magar que les promeses de ser el meyor equipu dempués de los tres grandes paez que nun van cumplise esti añu y cada vegada son más les voces que cuestionen la temporada que ta faciendo. Cuenten con dos pilotos como Ricciardo y Hülkenberg que son garantía de sumar puntos, ya incluso de dalgún podiu, pero’l coche col que trabayen nun ta dando-yos esa posibilidá de momentu. Muncho tienen que camudar les coses na segunda parte de la temporada pa que Renault tenga siquiera oportunidá d’allegase a McLaren. Paez, de momentu, que van batallar con Toro Rosso por esi quintu puestu del mundial.

Nesa mesma ecuación podemos meter a Alfa Romeo y Racing Point. Anque nengún de los dos equipos ta teniendo una temporada regular nel sen de sumar puntos en toles carreres, la distancia que los separa de Renault y Toro Rosso nun ye bultable. Namás hai un puntu ente dambos, asina que nun pueden tar les coses más apretaes. Alfa Romeo suma puntos gracies a les actuaciones de Kimi Räikkönen, que suel ser visitante común de los diez primeros. Sicasí, sumar de forma unillateral nun ye la meyor manera d’escalar posiciones nel mundial y fadría falta que Giovinazzi ameyorara un pocu’l so rendimientu pa dar a Alfa Romeo la oportunidá de competir con Renault. Sicasí, l’italianu nun ta faciendo una temporada desastrosa anque sí con un rendimientu insuficiente.

Racing Point nun ye nin la sombra de lo que yera Force India hai unes temporaes. Solíen ser l’equipu que meyor aprovechaba les meyores demientres la temporada y nun hai muncho ocupaben el cuartu puestu nel mundial, siendo’l meyor equipu de la mitá de la tabla. En 2019, tres el cambiu de dueñu y cola entrada de Stroll, nun hai munchos motivos pa ser optimistes. Sí que ye verdá qu’en dellos grandes premios tienen atropao un buen númberu de puntos como pasó, por exemplu n’Alemaña col cuartu puestu del canadiense. Pero nun ta siendo bastante y ello queda claro cuando vemos que l’equipu ta terceru pelo último. Precisen tamién ameyorar muncho nes sesiones de clasificación, puesto que Stroll nun pasó de Q1 más que nuna ocasión y por deméritu de Vettel. Pérez ta teniendo meyores actuaciones pero non al altor de lo que lu tenemos visto en temporaes pasaes. Muncho tienen que trabayar na segunda parte de la temporada si quieren remontar puestos na clasificación.

Haas ta siendo quiciás quien más titulares negativos xenera nes últimes selmanes. Naide de fuera nin de dientro del equipu entiende qué ye lo que pasa. Montaron un coche bien competitivu que n’Australia dio un resultáu mui bonu y que prometía grandes coses. Sicasí, d’un tiempu a esta parte, sucédense los problemes nos que, por exemplu, los pilotos son quien a clasificase quintos nes sesiones del sábadu pero’l domingu nun pasen de ser décimocuartos. L’equipu nun paez tener rempuestes y los dos pilotos, anque faen por entender la situación, amuesen impaciencia y, lóxicamente, daqué impotencia por saber que tienen un bon coche pero que nun son a sacar el so potencial a pista. Puede que la clave tea nel manexu de gomes colo que Haas vien teniendo problemes como yá tuvo nel pasáu, sobremanera con Grosjean. Esti añu afeuten tamién a Magnussen y asina ye que los vemos a dambos no fondero la tabla y al equipu penúltimu.

Nun ayuda tampocu que cada vegada que s’atopen en pista nun seyan quien a respetase y terminen tocándose o incluso fuera de carrera, como pasó en Silverstone. El xefe del equipu, Guenther Steiner, yá tien falao con ellos una y varies vegaes, puesto qu’esti tipu de situaciones nun faen más qu’afondar na firida del equipu y nun ayuden en nada nel so llabor. Dambos pilotos insisten en que faen tolo que pueden por evitalo, que nun hai mala rellación ente ellos y que se respeten, pero lo que vemos en pista diz lo contrario. Na segunda parte de la temporada van tener que facer más si quieren evitar ser la mayor deceición d’esti 2019.

Zarramos con Williams. Entamaron la temporada con muncha ilusión. De la so mano Robert Kubiça retornaba a la F1 dempués de munchos años, y al tiempu teníemos la oportunidá de ver al campeón de F2, George Russell, compitiendo con él. Ye obvio que nun tán teniendo la temporada ya’l rendimientu que nagüaben, anque ye verdá que dende l’entamu cuidaben que diba ser una primer parte de 2019 bastante complicada pa ellos. Nun son too coses negatives de toles formes. Na sesión de clasificación del sábadu n’Hungría, Russell tuvo cerca de metese na Q2 y la distancia ente él ya’l primer clasificáu foi menor que la que había ente él ya’l so compañeru d’equipu nel últimu llugar. El rookie ta teniendo un rendimientu escelente pal monoplaza que tien y lo que s’esperada d’él, sobremanera teniendo a un pilotu esperimentáu al llau. Lo irónico ye que’l puntu que suma Williams de momentu consiguiólu Kubiça, anque ye verdá que Russell ta xustificando día tres día por qué l’equipu lu escoyó como pilotu. Nun sabemos hasta aú van poder llegar no que queda d’añu, pero cuidamos que nuna carrera en moyao o en dalguna que nun trescurra pol calce normal, pueden tener oportunidá de sumar otra vegada, un llogru pa una temporada que prometía muncho menos.

Rematamos esti resume de la primer parte de la temporada con ganes de que llegue Spa pa ver cómo evoluciona la segunda parte d’esti 2019. Paez casi seguro que Mercedes van sumar otru añu de victories en dambos mundiales, pero col pasu alantre de Red Bull y la esperable reaición de Ferrari, más tolo que se ta cociendo na parte media de la tabla, paeznos que tenemos blimes de sobra pa que pague la pena. Y nun escaezais que la silly season ta en marcha y nun dexamos d’enriedar la madexa de 2020 colos pilotos que van o nun van tar na parriella pa la temporada viniente. ¿Quién dixo que la Fórmula Ún ye aburrida?

Col gran premiu d’Hungría d’hai unos díes, zarramos una primer parte del 2019 que trexo un pocu de too:. a les primeres carreres nes que Mercedes amosó un dominiu casi insultante y onde se sucedieron les victories y los segundos puestos pa les fleches platiaes, siguieron otres carreres, quiciás dende Mónaco o Canadá, nes que’l restu d’equipos dieron un pasu alantre, culminando esti na carrera d’Austria cola victoria de Max Verstappen.

Los test d’iviernu dexaron un tastu interesante puesto que paecía que teníemos énte nós una temporada na que Ferrari podía poner n’apuros a Mercedes dende bien ceo. Foi too una ilusión y n’Australia, onde tol mundu cuidaba que la Scuderia daría’l so primer guelpe na mesa, foi Mercedes quien trunfó. Amás, nun yera sólo Hamilton quien sobresalía, sinon que’l Bottas 2.0, como lu llamaron dellos periodistes, vinía con una actitú nuevo y preparáu pa nun dexar al inglés tener una temporada prestosa.

A estes altures, tenemos la sensación de qu’hai pocu más que dicir no que cinca a lo cimero de les dos clasificaciones. Nel mundial de pilotos, Hamilton tien una ventaya de sesenta y dos puntos col so compañeru d’equipu, qu’al tiempu-y saca siete a Verstappen. Ferrari asítiense per detrás, pero llueñe de siquier ser una amenaza pa los tres primeros, yá que Vettel tien una diferencia con Verstappen de venticinco. Onde paez qu’otros equipos van avanzando col pasu les carreres, en Ferrari paecen tar más centraos en correxir errores ya estratexes y pendientes d’evitar que la rivalidá ente los sos pilotos nun torne en problema.

Somorguiaos neses histories, pocu tienen qu’ufrir pa disputar el campeonatu a Mercedes y agora a Red Bull no que cinca al mundial de pilotos. Munches voces falen d’una posible salida de Vettel n’acabando esta temporada, nun sabemos si por iniciativa del equipu o pola del propiu pilotu, pero paeznos que ye más un rumor productu de los malos resultaos ya’l baxón de forma del equipu en delles carreres. Dempués d’Alemaña na que’l pilotu remontó dende la última posición y acabó segundu, y Hungría na que foi terceru, esos rumores paez que desapaecieron, anque de xuru la silly season fará por revivilos. Ferrari saca cuarenta y cuatro puntos a Red Bull nel mundial de constructores, gracies en parte al probe rendimientu de Gasly en comparanza colo que faen tanto Vettel como Leclerc. Sicasí, sedría un error entender que cuarenta y cuatro puntos son suficientes y la Scuderia nun debe despistase nin relaxase si nun quier tamién quedar nel tercer llugar del mundial.

La escudería del toru coloráu tardó en despertar, anque ye verdá que Verstappen entamó la temporada a un bon ritmu, insuficiente pa competir con Mercedes, pero bastante pa facelo con Ferrari. Nestos momentos, Verstappen suma dos victories y una pole, la primera de la so carrera deportiva, dalgo colo que nin siquiera podía suañar viendo l’aniciu de la temporada. Sicasí, nun son too cares sorrientes nel equipu. Pierre Gasly aterrizó esti añu pa suplir el güecu que dexó Ricciardo cola so marcha a Renault. En Toro Rosso diera motivos suficientes pa cuntar con él pal primer equipu y a falta de dalgún otru candidatu más convincente, fio l’escoyíu p’acompañar a Verstappen. Sicasí, el francés entavía nun dio cola clave que lu faga rendir como s’esperaba d’elli. La fama de Red Bull de someter a muncha presión a los sos pilotos yá dexó a munchos dellos nel camín que depués ganaron otros campeonatos nel deporte de motor (por exemplu Vergnè o Buemi, esti últimu en dos categoríes diferentes). Gasly paez nun tar cómodu, dalgún fala de falta d’entendimientu col so inxinieru, pero la realidá ye que la temporada pasa y los sos resultaos son probes. Lo peor pa él ye que Verstappen ta dando munchísimo más de lo que s’esperaba, con victories y pole, ya’l pilotu francés nun ta siquier suañando con ello. Sí lu tenemos visto compitiendo bien, mesmo en Silverstone, pero nun ta siendo bastante. La silly season garra forma col parón braniegu y son munches les persones qu’opinen que Gasly nun va tar sentáu au ta pa Spa y que Kvyat pudiera ser el so reemplazu*.

Una de les coses que tenemos clares ye que la xuntanza Red Bull/Toro Rosso y Honda foi un aciertu. El motorista xaponés tornó a la sienda del trunfu tres unes temporaes bien negatives con McLaren que dexó a dambes compañíes engarriaes y nel fracasu más absolutu. Agora, Honda gana carreres y fai podios con dambes escuderíes y McLaren, con Renault, son el meyor equipu de la mitá de la tabla. Ye mui conveniente dicir agora, cola ventaya de saber el resultáu que dio, dicir que McLaren precisaba a Renault. Naide nun tinía mui claro l’añu pasáu que fuera a resultar, y los resultaos tampoco nun fueron nada del otru mundo. Pero esti 2019 ta siendo daqué distinto. Ensin tar faciendo un añu brillante, saquen casi’l doble al quintu equipu clasificáu nel mundial de constructores. Sáinz lleva varies carreres clasificando o quintu o sestu, y Norris, cuando lu respeten los problemes del coche, poques veces queda fuera de puntos. Nun escaezamos que falamos d’una de les combinaciones de pilotos más moces y que Norris ye rookie. Con estes blimes, McLaren suma y suma, pasín ente pasu. Ta llueñe, muncho, de ponese al altor de Red Bull, pero saca una distancia interesante a Toro Rosso y, de siguir asina’l restu de la temporada, nun sedría raro qu’acabaren cuartos, pasu de xigante si pensamos nos puestos nos qu’atopábemos al equipu en temporaes pasaes. Con dambos pilotos confirmaos yá pa 2020, la escudería de Woking nun tien otra cosa que facer que nun sea pensar en siguir sumando.

Toro Rosso nun prometía muncho al iniciu de la temporada. Col retornu de Kvyat ya’l rookie Alexander Albon, paecía que pocu díbemos poder desixir a la escudería hermana de Red Bull. Sicasí, les coses fueron desenvolviendo nuna direición que nun esperábemos. Daniil Kvyat nun tien nada que ver col pilotu que foi descartáu hai unes temporaes pol so equipu. Él mesmu almite que precisaba esi parón, esi reflexonar pa tornar a tener la oportunidá d’amosar lo que puede facer al volante. Xunto a Albon, tienen al equipu en quintu llugar nel mundial de constructores, perriba de Renault, que prometía un arreón importante nesta temporada que nun termina de llegar.

El pilotu rusu consiguió’l so primer podiu nesta nueva etapa, el segundu na historia de Toro Rosso y que ye un pocu espeyu del so bon estáu de forma. Pel otru llau, Alexander Albon nun ta quedando atrás. El prexuiciu de ver a un pilotu tan mozu nun equipu de Fórmula Ún yá ta superáu y velu en pista competir ensin vergoña dala con pilotos de toles talles, seyan de Mercedes o un Williams, ye un bon motivu pa tenelu ente los venti pilotos d’esta categoría. En xeneral, Toro Rosso tán completando bones carreres, con un rendimientu muncho mayor de lo que s’esperaba dellos pa esta temporada. Kvyat, de fechu, ta ente los diez primeros na clasificación de pilotos, nel puestu novenu.

Los cinco primeros equipos del mundial de constructores sumen un bon puñáu d’aspeutos positivos que xustifiquen la so posición na clasificación. Sicasí, y más nel casu de Toro Rosso, nun hai sitiu pa relaxase. La segunda parte de la temporada puede camudar totalmente l’estáu actual de la clasificación. Con una parte alta casi casi decidida, l’interés céntrase agora no que pase na mitá de la tabla ya en ver si dalgún equipu ye quién a ponese a tiru de McLaren.

La selmana que vien repasamos a los otros cinco equipos y lo que tienen fecho hasta’l momentu nesta temporada 2019.

*ACTUALIZACIÓN: Al pocu d’asoleyase esti post saltó la noticia de qu’Alexander Albon va sustituyir a Gasly nel Red Bull pa lo que queda de temporada mientres que’l pilotu francés torna a Toro Rosso, dexando les pareyes de pilotos asina:

RED BULL: Verstappen, Albon
TORO ROSSO: Kvyat, Gasly