Category: Temporada 2018

Suel llevar tiempu qu’un circuitu se faga coles simpatíes de la xente que sigui los deportes de motor, porque son munches les espectatives que se ponen enriba d’ellos cuando debuten nos calendarios y porque les más de les veces les carreres que se cellebren ellí nun dan pa muncho. Cuando se presentó lo que diba ser el circuitu de Bakú entraron les duldes de si aquelles cais diben a ser anches abondo pa que pasaren los coches, llueu si’l trazáu sedría entreteníu y tamién si llevaría a la xente a dir velo. La verdá ye que los años pasaos foi precisamente esti gran premiu ún de los más entreteníos del calendariu. Siguen les cais estreches pero la perspeutiva camudó y agora ye muncho la xente que ta esperando que llegue esta fecha. Una fecha que vien adelantada con respeutu a pasaes edicione, cuando esti gran premiu yera en xunu.

Con toos estos ingredientes allegámonos a Azerbaixán pa la cuarta carrera de la temporada. Entovía hai munches entrugues que responder qu’afeuten a tolos equipos: ¿sedrá Mercedes quien a tener una carrera tranquila d’eses a les que nos teníen avezaos n’años pasaos? ¿Lo de Ferrari ye de verdá o van deshinchase llueu? ¿Va poder Red Bull repetir una carrera como la que vimos en China?

Pela parte medio de la tabla, la engarradiella paez nun tar definía pa nengún equipu: McLaren y Renault, separtaos por namás tres puntos, son los que lleven mayor ventaya pero si dalgo deprendimos en campeonatos pasaos ye que nesa parte de la tabla naide nun pue despistase, y menos entá en circuitos como Bakú. Viennos a la memoria’l podiu de Lance Stroll l’añu pasáu, la so meyor actuación nel so debú na másima categoría del motor. Nun nos paez qu’esti añu tea en condiciones de repitilo, pero tampoco lo tábemos l’añu pasáu. De toles formes, la situación na que s’atopa agora mesmo Williams ye bastante más negativa que la que taben l’añu pasáu, con más carreres acumulaes y cola esperiencia de Massa n’ún de los monoplaces.

Tres Renault y McLaren, Toro Rosso y Haas, dos de los equipos que más prometen pero que más altibaxos tán amosando, breguen por siguir sumando puntos. Si nun fuere que la carrera d’Australia terminó con desastre pa Haas, probablemente taríen más arriba con McLaren y Renault pensando nel rendimientu que taben amosando dambos pilotos. Pinten bastante meyor que n’años pasaos y dende que dambos pilotos entamen a puntuar regularmente, de xuru van poner n’apuros a la xente que tienen perriba.

Sauber gárrase a los dos puntos que consiguió Marcus Ericsson en Baḥréin como si fueren d’oru y nun ye pa menos si pensamos no complicao que ye pa ellos entrar nos diez primeros y lo caros que se vienden esos puntos pela parte baxo de la tabla. Consiguir sumar n’un circuitu que nun seya Mónaco ye vital pa estos equipos, porque ye la forma d’asegurar que nun van zarrar la clasificación cuando llegue la última carrera. Agora mesmo, esa posición ocúpala Williams, pero una bona carrera de los de Grove, podría facer qu’esos dos puntos quedasen en nada.

Nun esperábemos ver a Force India tan abaxo na tabla, con un solu puntu en tres carreres. Ta siendo un entamu d’añu complicáu pa ún de los equipos que meyor rendimientu amosó n’años anteriores y que l’añu pasáu fue quien a facese cola cuarta posición nel campeonatu de constructores. Nun pinta bien esti añu, de momentu, y ye evidente qu’hai una tecla cola que tovía nun dieron. Pol bien del campeonatu, esperamos qu’espabilen pronto y se metan a pelear por puntos col restu d’equipos de la parte media de la tabla.

Cuando s’apagaron los semáforos n’Australia nun albidrábemos que la temporada podía tener tantos frentes abiertos tan pronto, pero ye precisamente eso lo que necesitaba la competición. Quiciás nes carreres vinientes aposiente too y tornemos a la “tradición” de ver ganar a Mercedes, pero a piques de que empecipie la cuarta, tenemos munches coses a les que mirar y los equipos munches duldes que siguir resolviendo.

Tornen los horarios normales a la Fórmula Uno, y van quedase por un tiempu. Estos son los horarios pal gran premiu d’esta fin de selmana:

VIENRES 27/04/2018

LLIBRES 1: 11:00
LLIBRES 2: 15:00

SÁBADU 28/04/2018

LLIBRES 3: 12:00
CLASIFICACIÓN: 15:00

DOMINGU 29/04/2018

CARRERA: 14:10

Y pa que nun perdáis detalle, equí podéis atopar tola información sobre’l circuitu de Bakú, escenariu del gran premiu d’Azerbaiyán.  Por último, esta ye la elección de neumáticos pa esti Gran Premiu

Les voces más crítiques cola Fórmula Uno actual dicen que les carreres son aburríes, que casi nun s’adelanta, que siempre ganen los mesmos. Anque namás tamos nel tercer gran premiu de la temporada lo cierto ye que tamos viendo carreres bien vistoses y que faen qu’eses crítiques queden ensin fundamentu.

El vienres paecía que Mercedes recuperara la forma, dominando les sesiones de llibres Lewis Hamilton. El sábadu, ensin embargu, foi Ferrari quien se colocó no cimero de les tables clasificatories, incluyendo la pole del sábadu que foi pa Vettel con un marxe escasu col so compañeru Kimi Räikkönen y con más diferencia de lo esperao colos Mercedes. Hamilton tuvo desapaecíu y foi Bottas el que se colocó terceru na sesión de clasificación per detrás de los Ferrari.

Red Bull trabayó contrarreló pa consiguir que Ricciardo pudiera competir na sesión del sábadu dempués de que’l motor del so monoplaza prendiera fueu na tercer sesión de llibres. Con gran esfuerciu fueron quien a cambiar esi motor y sacar al pilotu australianu con dos minutos pa que terminara la primer parte de la sesión de clasificación, tiempu xustu pa marcar tiempu que lu permitiera siguir a Q2. Dambos pilotos terminaríen clasificando per detrás de Ferrari y Mercedes.

Nun hebo sorpreses nel restu d’equipos, con Williams otra vuelta ensin pasar de Q1, Haas na parte medio de la tabla y McLaren clasificando nes posiciones trece y catorce. Con estes blimes llegaba’l domingu, que facía albidrar que Ferrari podíen facese cola tercer victoria de la temporada.

Y asina foi na primer parte de la carrera: Vettel tuvo una bona salida, defendiéndose del so compañeru d’equipu que, pendiente del alemán, nun zarró la puerta al Mercedes de Bottas y vióse terceru pocos metros dempués. Hamilton tampoco nun tuvo mui finu ya foi superáu darréu por Verstappen. Nun pintaba mal pa que Red Bull diera guerra anque Vettel amosaba un bon ritmu y paecía que nun diba tener muncho problema pa defender la so pole. La salida foi bien llimpia, ensin nengún incidente nin perriba nin nes posiciones más baxes.

Pasín ente pasu, Vettel foi metiendo distancia ente elli y Bottas, que tamién tinía una distancia segura con respeutu a Räikkönen rodando terceru, que taba viéndose asediáu por Verstappen. Hasta equí la carrera siguió’l patrón esperáu, ensin sorpreses nin muncho que cuntar. Foi Red Bull quien s’encargó de poner l’espectáculu. Ensin nada que perder, decidieron parar a dambos pilotos primero que lo ficieran Mercedes y Ferrari, n’una doble parada onde l’equipu de mecánicos amosó la precisión cola que se traten los pitstop anguaño.

La lóxica obligaba a pensar que Mercedes y sobre too Ferrari nun tardaríen en reaicionar. Les fleches platiaes nun dexaron pasar munchu tiempu, parando a Bottas pa contestar a esa doble parada ya pocu dempués a Hamilton. En Ferrari, esperaron. Y asina foi como, cuando tomaron la decisión de parar a Vettel, esti saldría per detrás de Bottas y Räikkönen per detrás de Hamilton. Los pantasmes de les males estratexes qu’arruinen carreres tornaben a apaecer nel garaxe de Ferrari. Pasemos asina a una parte de la carrera onde’l control quedó nes manes de Mercedes, anque ensin la mesma contundencia qu’amosara Ferrari nes primeres vueltes de carrera.

Pela parte media de la tabla, la carrera foi un pocu más sosa, anque vimos delles lluches ente los Renault, Force India y Alonso. Vandoorne nun tuvo una bona carrera ya nin siquiera pudo suañar con entrar en puntos. Pela parte baxo, Williams siguía en tierra de naide, mesmo que Sauber, anque Stroll llegó a rodar novenu cuando los pilotos fueron entrando a cambiar gomes.

Los pilotos de Toro Rosso sedríen los siguientes protagonistes de la carrera dempués d’una maniobra bastante duldosa de Gasly, qu’esti gran premiu nun tuvo nada inspiráu y nunca s’averó a los puntos. N’un intentu de rebasar al so compañeru, aparentemente n’una decisión d’equipu que foi malinterpretada, Gasly terminaba chocando contra Hartley faciendo qu’esti quedara atravesáu en pista y con parte del coche dañáu. El neozelandés terminaría retirándose y Gasly con una penalización de diez segundos.

Los restos de coche que dexó Hartley provocaron la salida del coche de seguridad, oportunidá qu’en Red Bull aprovecharon pa repitir una doble parada de los dos pilotos qu’una vegada más solventaron col meyor de los resultaos. Ferrari y Mercedes nun supieron reaicionar y nun se vieron tán beneficiaos pola situación, ya decidieron siguir en pista, confiando que les gomes podíen aguantar ensin otra parada. Y duraron, pero nun resistieron el ritmu de los dos Red Bull con gomes nueves. Foi cuestión de vueltes hasta que Ricciardo, pasín ente pasu, pasó de tar terceru a facese col llideralgu n’una serie de maniobres d’adelantamientu qu’arrancaron aplausos n’audiencia.

Verstappen tamién vinía fuerte y énte la debilidá de los rivales, tamién punxo manes a la obra pa dir adelantando y lluchar col so compañeru pola victoria. Con una maniobra más llimpia qu’en Baḥréin, pasó a Hamilton. El siguiente oxetivu yera Sebastian Vettel, con un rendimientu bastante inferior al del pilotu holandés. Una vegada más Verstappen diba convirtise en protagonista negativu poles sos formes en pista y ye que l’adelantamientu a Vettel vieno de la mano d’un erru de xuiciu del pilotu de Red Bull, que buscando un espaciu que nun había intentó adelantar al alemán y terminó embistiéndolu y faciendo que trompiara. Al intentar xirar el coche, Vettel dañó enforma les gomes y terminó viendo como hasta’l McLaren d’Alonso lu adelantaba delles vueltes más alantre y tinía que conformase con ser octavu al final. Hamilton cedió una plaza ente Räikkönen por esquivalos y Verstappen foi penalizáu con diez segundos, que lu dexaría nel quintu puestu pesie a entrar el cuartu en meta.

Al marxe d’estos protagonistes, l’incidente de Vettel y Verstappen benefició a Hülkenberg y Alonso que, como yá dicimos, aprovecharon el deterioru de les gomes del alemán p’adelantalu y terminar sextu y sétimu. Per detrás del pilotu de Ferrari, dientro de los puntos, terminarían Sáinz y Magnussen, que n’esta ocasión nun pudo más que ser décimu. Per detrás, llegaríen los dos Force India, que vuelven a quedar ensin puntos (namás lleven ún en tres carreres) el McLaren de Vandoorne en décimotercer posición, namás una perriba de lo que clasificara’l sábadu. Detrás llegaron los dos Williams, el Sauber d’Ericsson que nun tuvo tán inspiráu como na carrera pasada ya’l Haas de Grosjean, que sigui ensin dar cola tecla del so monoplaza. Zarrando la clasificación Gasly y Leclerc sedríen los dos últimos, siendo Hartley l’únicu abandonu.

Foi una carrera d’altibaxos pa casi tolos equipos. Red Bull compitió a un nivel mui altu sobre too teniendo en cuenta que nun partíen como favoritos. Ferrari y Mercedes nun tuvieron al altor de lo que s’esperaba d’ellos, sobre too no que cinca a estratexa. Hamilton nun tuvo ritmu namás que’l vienres y Vettel, anque dominó, viose afeutáu por una serie de circunstancies de les que namás foi víctima. Toro Rosso xeneraren munches espeutatives pa esti gran premiu que nun se cumplieron y Williams sigui na solombra, ensin que paeza que vaigan a salir d’ella dientro de poco.

Pa dientro dos selmanes allegámonos a Azerbaiyán. De momentu Vettel sigui lliderando’l campeonatu de pilotos pero con un marxe más curtiu con Hamilton, al que tien nueve puntos per debaxo. En constructores, llidera Mercedes por un puntu a Ferrari.

Equí vos dexamos tolos númberos que dexó’l sábadu de clasificación ya los resultaos del domingu amás de los videos de los resúmenes de la clasificación y la carrera:

Clasificación

Carrera

Casi ensin tiempu pa dixerir lo que vivimos en Baḥréin, aterrizamos en China. Tornen los madrugones pal tercer gran premiu de la temporada pero de xuru naide nun se va quexar porque compensa col pocu tiempu que tuvimos d’esperar ente carrera y carrera.

Anque entá tamos mui al empiezu de la temporada, la verdá ye que vamos viendo un pocu en qué posición s’atopen los equipos. Cola esceición de Red Bull, que col resultáu de Baḥréin dexó les coses un pocu nel aire y con munches entrugues sobre’l problema del coche de Ricciardo, paez que más o menos los equipos van garrando sitiu. Enantes de la carrera d’Australia, los favoritos más claros yeren Mercedes, casi ensin discusión. Los test fueron mui positivos pa ellos y nun había por qué duldar de que nel campeonatu fueran a siguir asina. Agora, les voces tornen hacia Ferrari dempués de que Vettel se ficiera coles dos primeres victories d’esti 2018. La presión ta enriba del pilotu alemán yá que la última vegada qu’un pilotu de F1 nun ganó un campeonatu dempués de ganar les dos primeres carreres foi 1982. Y yá llovió. Quiciás apostalo too a Ferrari, dempués de lo visto la temporada pasada, nun seya tampoco lo más seguro pero sí que ye verdá que pinten bien y que-yos convien sumar tolos puntos que puean hasta que Mercedes torne a tar al 100% colos sos dos pilotos, sobre too con Hamilton.

Pela parte media de la tabla tamos deseyando ver cómo funcionen los Toro Rosso en China y si lo que vimos en Baḥréin foi namás un espeyismu. Si los motores Honda empiecen a funcionar bien y a amosar con regularidá’l rendimientu que vimos hai una selmana, más d’ún va entrugase si McLaren pudo tener más culpa de la que llevó na so relación con Honda. Falando de los de Woking, lleguen a China n’una posición onde hai tiempu nun los víemos, en posición de podiu nel campeonatu de constructores y con Alonso cuartu. Nun ye dalgo que vaiga durar, Red Bull tendría qu’ocupar, en teoría, esos espacios, pero a ríu revueltu…Lo que ta claro ye que les coses paecen furrular meyor colos motores Renault y les dos primeres carreres, con dambos pilotos en puntos, son bastante motivu pa dir confiaos de poder replicalo en China.

Tamién tenemos los güeyos puestos enriba Sauber, dempués del so progresu en dos carreres y no que puedan facer nesti gran premiu. El primer pasu yera tornar a sumar puntos, probablemente lo más complicao, asina que nun hai nada que nos impida pensar que puean facelo pronto. Igual non en China, pero si rinden como’l domingu pasáu, nun tardando. Ensin embargu, nun van tenelo fácil yá que hai munchos candidatos pa esos pocos puntos que tanto cuesta sacar. Renault, anque sumaron en dambes carreres, nun terminen d’arrancar. El futuru y les meyores que traen paecen positivos asina qu’esperamos d’ellos más de lo que vimos hasta agora. Podemos dicir lo mesmo de Force India: cuntábemos que diben dar guerra dende Australia y la verdá ye qu’entá nun despegaron. Cuiden que China seya por fin el gran premiu au puean tornar a sumar con dambos pilotos.

Si hai munches entrugues nel aire con dellos equipos, nun lo ye menos con Williams. Ye pronto, insistimos, pa sentenciar a naide, pero lo que vimos nos dos primeros grandes premios nun ye lo que cuntábemos ver. Cola marcha de Massa da la sensación de que’l equipu quedó güerfanu, y falten munches rempuestes. China va ser otra piedra de toque ya una na que Williams tien d’amosar que lo que vimos hasta agora foi namás un mal empiezu de la temporada y qu’entá puen alendar. Esperamos que nun se conviertan nel nuevu Sauber y consigan atopar y solucionar los problemes, yá que cuntar con tolos equipos con opciones de lluchar por puestos medios de la tabla tendríemos un campeonatu bien interesante de ver.

Como diximos al principiu, tornen los madrugones. Equí vos dexamos los horarios pa esta fin de selmana:

VIENRES 13/04/2018

LLIBRES 1: 04:00
LLIBRES 2: 08:00

SÁBADU 14/04/2018

LLIBRES 3: 05:00
CLASIFICACIÓN: 08:00

DOMINGU 15/05/2018

CARRERA: 08:10

Y equí podéis atopar tola información sobre’l circuitu de Shanghai pa esti gran premiu de China.

Dende’l vienres nes sesiones de llibres, pintaba que Ferrari diben facese cola victoria d’esti gran premiu ensin mayor problema. Ensin embargu, les realidaes de los domingos dacuando nun espeyen lo visto nos entrenamientos y anque Ferrari sí terminó ganando, nun foi el paséu que podía paecer primero.

La verdá ye que nesti gran premiu, la primer y tercer sesión de llibres suelen ser irrelevantes de cara a clasificación y carrera porque suelen dase cuando entá ye de día y les condiciones son bien distintes de lo que darréu se ve al atapecer que ye cuando se cuerre en clasificación y carrera. Hamilton partía con cinco posiciones de penalización por cambiu de la caxa cambios a resultes d’un problema qu’apaeció’l vienres. Too se ponía de cara pa Ferrari. Ya’l sábadu nun sorprendió pa nada ver a Vettel na pole y al so compañeru Räikkönen na segunda posición. Entá quedaba esperanza pa Mercedes yá que namás un pilotu ganara dende la pole nos cinco grandes premios que se teníen cellebrao hasta la fecha. Anque nun tuvieron una fin de selmana tranquila, Bottas tinía posibilidaes de ganar la carrera y Hamilton nun debiera tener problemes pa remontar n’un circuitu con grandes posibilidades d’adelantamientu.

Na mitá de la tabla, el Toro Rosso de Gasly ya’l Haas de Magnussen metíense ente los diez primeros y la deceición vinía con McLaren que nun pasaben del puestu trece. ¿Tornaben les pantasmes a Woking?

Llegáu’l domingu, la salida foi una d’eses relativamente tranquiles: Vettel salió bien, Hamilton arriesgó muncho pa intentar adelantar y vímoslu n’un determináu momentu en medio d’una montonera de coches lluchando por pasalu y Bottas consiguió pasar a Räikkönen. Gasly y Magnussen nun tuvieron problema pa caltener les sos posiciones de salida, anque sobre too nel casu del pilotu danés, tendríen que lluchar por ella’l restu la carrera. Los primeros metros de carrera dexaron al McLaren de Vandoorne últimu con una salida desastrosa y colos Force India teniendo dalgún qu’otru problema pa defender les sos posiciones.

Dempués de la salida y cuando les posiciones ya se diben estabilizando un pocu, con Vettel llíder, Verstappen sufría un pinchazu na rueda drecha trasera dempués d’un intentu arriesgáu d’adelantar a Hamilton que casi dexa fuera tamién al pilotu británicu. El resultáu foi una visita a pits que terminaría n’abandonu del pilotu de Red Bull. Al tiempu que víemos a Verstappen intentando tornar a pits con una rueda pinchada, Ricciardo dexaba aparcáu’l so coche por una pérdida de potencia del coche. Fin de selmana pa olvidar pa Red Bull qu’ensin duldes empezarán a picar na puerta de Renault pa ver cuála ye la causa del problema de Ricciardo.

Vettel namás se vio n’apuros al final de la carrera, dempués de la decisión del so equipu de dir a una parada pa nun ceder el llideralgu a Mercedes. Foi una apuesta arriesgada yá que Bottas tuvo na so mano la victoria nes últimes vueltes del gran premiu. Les gomes del Ferrari de Vettel baxaron rendimientu dempués de tantes vueltes cosa que quiso aprovechar Mercedes pa facese cola victoria. Ensin embargu, l’alemán supo xestionar la diferencia que tinía col pilotu finlandés y anque terminó a menos d’un segundu d’elli, foi’l primeru en ver la bandera a cuadros.

Nel otru lláu del garaxe non fueron les coses tan bien. Kimi rodaba terceru cuando la so parada en pits resultó na so retirada. El pilotu finlandés dexó’l box enantes de que los mecánicos siquiera tuvieren quitao toles ruedes y l’equipu tuvo d’obligalu a parar en mitá del carril del pitlane. Amás, la maniobra llevó a qu’un de los mecánicos resultase mancáu, con fractura de tibia y peroné. La FIA determinó posteriormente que Ferrari nun dexó marchar a Räikkönen en condiciones segures y multó a la escudería italiana con 50000€.

Con Red Bull fuera de carrera, surdió la oportunidá de garrar un bon puñáu de puntos pa los equipos de la mitá de la tabla. A ello sumaríase dempués, como yá comentamos, la retirada de Räikkönen. El primeru de los triunfadores foi Pierre Gasly que fexo un trabayu escelente demientres tol fin de selmana y acabó cuartu, dexando de pasu un recáu a McLaren de qu’ellos tamién puen lluchar col motor que lleven agora. Toro Rosso igualó asina lo consiguío la temporada pasada con Sáinz y llevó a Honda a consiguir el so meyor resultáu dende’l so retornu. Hartley nun tuvo tanta fortuna y con una salida bastante accidentada y una penalización de diez segundos por un choque con Pérez, terminó fuera de los puntos anque llegó a tar metíu n’ellos en determinaos momentos de carrera. Ensin duldes, esti gran premiu foi bastante más positivu pal equipu de lo que foi Australia.

Otru qu’arrancó aplausos foi Kevin Magnussen. Pesie a dellos momentos en pista col so compañeru d’equipu que lu fixeron criticar les decisiones del equipu de nun dexalu pasar a Grosjean cuando dambos pilotos taben n’estratexes distintes, fexo una carrera bien sólida y que nos recordó un pocu a la d’Australia onde tamién taba dientro de los diez primeros puestos hasta que l’incidente cola rueda lu dexara fuera. Grosjean deceicionó yá’l sábadu na clasificación nun pasando de Q1 ya’l domingu nun tuvo una actuación brillante anque en dellos momentos pudo metese en puntos.

Renault namás pudo puntuar con Hülkenberg yá que Sáinz quedó nel puestu once. El pilotu madrilanu tuvo un gran premiu bastante irregular, con dellos momentos dientro de los puntos y otros mui abaxo na tabla. El so compañeru foi protagonista de delles batalles tanto con Haas como colos McLaren pa terminar siendo sextu.

McLaren amosaron una vegada más que sí, que col Renault rinden meyor, anque la clasificación del sábadu dexara munches ceyes llevantaes poles semeyances colo que se vía l’añu pasáu con Honda. Clasificar nos puestos trece y catorce nun entraba dientro de les espectatives que se tiníen pa esti gran premiu nel equipu británicu, con delles meyores que debieren da-yos un plus con respeutu a lo que víemos n’Australia. Ensin embargu, el domingu foi otru asuntu. Alonso suel facer perbones salides demientres que’l so compañeru d’equipu, Vandoorne, nun suel tar tan inspiráu nesos momentos. La salida nel gran premiu de Baḥréin nun foi distinta y nos primeros metros de carrera, Alonso yá taba en puntos y Vandoorne yera últimu. Dempués d’ello, Alonso nun dexaría los puestos de puntos hasta ver la bandera a cuadros mientres que’l pilotu belga consiguía recuperase d’una salida bien probe pa terminar xusto por detrás del asturianu. Al final séptimu y octavu y un bon puñáu de puntos pa McLaren que los sitúa, gracies al desastre de Red Bull, terceros nel mundial de constructores y a Alonso cuartu nel de pilotos. Tiempu facía que nun víemos a McLaren neses posiciones.

Otra de les sorpreses tréxola Marcus Ericsson que consiguió terminar novenu per detrás de dambos McLaren y suma los dos primeros puntos de Sauber nesta temporada. El pilotu suecu vinía necesitando esti tipu de motivación p’acallar les crítiques y tamién pa dar al so equipu un pocu de consuelu y una base sobre la que trabayar de cara a futures carreres. Dos puntos nun son muncho pa grandes equipos pero pa ún que, como Sauber, lleva sumando deceición tres deceición en yá demasiaes ocasiones, saben a gloria. Lèclerc nun tuvo una mala carrera y terminó nel puestu doce. Pasín ente pasu dambos pilotos van acomodándose al coche ya’l coche a les desixencies d’esti añu. Tán nel bon camín.

Force India consiguió un puntu de la mano d’Ocon pero siguen ensin ser l’equipu del añu pasáu, anque pintaron meyor que n’Australia. Pérez tuvo perdíu fuera de los puntos les más de les veces, con una carrera bastante irregular sobre too dempués del trompu que fexo nos primeros momentos dempués de la salida. Ocon tampoco nun brilló muncho pero a lo menos consiguió sumar un puntín vital pa siguir alantre. Pérez almitía’l vienres que tovía nun fueren quien a entender el coche y por eso tábemos viéndolos tan floxos en carrera. En Sakhir paez que tampoco nun dieron cola clave. Por suerte, China ta namás a dellos díes de llegar y van tener otra oportunidá de probase.

Pa rematar esta crónica, Williams. Naide nun ye quien a entender qué ta pasando col equipu británicu. El so rendimientu nestos dos grandes premios foi baxísimu y nun hai lluces d’esperanza pa creyer que van recuperase pronto. Los motores Mercedes que lleven paez que nun son el problema, polo que les atenciones diríxense a dos aspeutos: el chasis y los pilotos. La segunda opción ye quiciás la opción fácil por ser dos pilotos mozos con esperiencia llimitada na categoría. Ensin embargu, ¿ye’l Williams d’esti añu un coche competitivu? Dempués de dos carreres ye obvio que non y anque seya pronto pa xulgar, la verdá ye que pinta que la escudería de Claire Williams tien munchísimu trabayu per delantre.

Ensin descansu yá tamos preparándonos pa China, gran premiu que vamos vivir dientro de menos d’una selmana. De momentu, equí tenéis tolos númberos que nos dexó la clasificación del sábadu y la carrera del domingu. Tamién podéis ver nestos enllaces oficiales los meyores momentos de la clasificación y de la carrera:

Carrera

Damos un saltu al desiertu y aterrizamos nel gran premiu de Baḥréin, un d’esos grandes premios de grades vacíes y lluces rellumantes a la hora del atapecer. Tornen los horarios asumibles y siguen les entrugues, reformulaes, que tiníemos al empezar la temporada.

Dempués de lo que vimos n’Australia, muncho se tien falao del problema que tuvo Mercedes col software que los fexo fallar nos sos cálculos demientres la parada de Vettel y que fexo que l’alemán terminare ganando la carrera. De xuru que nun ye un erru que vaigamos a ver repitíu, conociendo al equipu de Brackley, pero foi suficiente pa qu’empezaren la temporada un pasu per detrás del so máximu rival pa esta temporada.

Como yá se dixo, Australia nun ye sinónimu de nada y les más de les coses que víemos ellí de xuru nun dieron rempuesta a les munches entrugues coles que díbemos a Albert Park. Baḥréin debiera ayudanos a entender meyor en qué puntu vienen los equipos. Tenemos de tener bien de coses en cuenta, como les temperatures, el sable del desiertu que nun dexa de ser un engorru pa los coches y tamién les posibles duldes que tengan surdío dende hai dos selmanes.

Anque ellos nun quieren falar d’ello, Mercedes sábense dominaores (pesie a lo que diga la clasificación) y anque la pole nun seya mui útil de cara al domingu (sólo ún de los cinco grandes premios del pasáu se ganó dende ehí) nun creyemos que naide nun vaiga pensar nello cuando llegue la hora de la sesión de clasificación del sábadu. Y como vien siendo vezu, toles miraes tán puestes enriba Hamilton y nel so potencial a una vuelta. Quiciás llueu nun valga pa nada’l domingu pero la tranquilidá qu’aporta ye importante.

Ferrari ganaron un gran premiu col que, de primeres, nun cuntaben y eso fai que llegue equí cola ventaxa d’esa victoria y cola calma de que seya esti un circuitu que se-yos da bastante bien. Vettel foi bastante coherente colo que pasó n’Australia y sabe que ganar ellí nun quier dicir nada nin que tean en meyor momentu que’l so rival direutu, anque repitir victoria nel desiertu quiciabes ayudara a perfilalo meyor.

El debate Mercedes-Ferrari ta básicamente centráu nos sos dos primeros pilotos, pero nun podemos escaecer a los dos finlandeses que, munches vegaes na solombra, nun dixeron entá la so última pallabra. Bottas tuvo un gran premiu bastante deceicionante n’Australia, y nun creyemos que vaiga a salir a conformase colo que caiga equí en Sakhir, y Räikkönen nun suel facer munchu ruíu, sobre too cuando l’atención ta puesta nel so compañeru d’equipu y ye ehí d’au elli suel sacar les sos bones actuaciones. Nun hai falta que miréis pa elli he knows what he’s doing…

Red Bull destapáronse un pocu nos llibres del vienres n’Albert Park, pero deceicionaron un pocu’l domingu y sábenlo. La so meta ye recuperase y poder poner n’apuros a los d’enriba, faciéndose con una victoria que los metería dafechu nos puestos más altos. Ricciardo sigui necesitáu de bones actuaciones de cara a la firma d’un contratu con dalgún equipu de la parrilla, entá nun sabemos si quedará en Red Bull o ta mirando otres opciones, asina que de xuru va salir equí con esi oxetivu en mente. Y pa complica-y la tarea, ensin duldes, tará Verstappen, a la gueta d’una victoria que sumar a la so llista.

Pela parte media de la tabla hai munches coses que rescamplar. Demientres estes dos selmanes de descansu, hebo equipos que punxeron en dulda l’actuación de Haas n’Australia (alcordaivos que, enantes de quedar fuera con dambos coches, taben los dos pilotos en puntos y Magnussen yera cuartu) y suxiriendo que se tuvieran convertío n’un equipu B de Ferrari. Yá se sabe como funciona la Fórmula Uno, y los xuegos que se fai d’usar los medios pa criticar a otros equipos y asina desestabilizalos, pero paeznos que nesti casu nun se ta faciendo xusticia col equipu norteamericanu. Sí que ye verdá que foi sorprendente velos ehí enriba, sobre too nel casu de Magnussen que l’añu pasáu foi bastante irregular, pero la Fórmula Uno yá nos dio milenta exemplos d’equipos qu’empiecen temporaes con un rendimientu mui positivu y que ye inesperáu: tenemos el casu de Force India n’años pasaos, y quiciás el más obviu de la hestoria recién de la Fórmula Uno: Brawn GP.

Llegaos a Sakhir, Haas vien col enfotu de repitir lo vivío n’Australia y de metese nesa llucha pol cuartu puestu del campeonatu que l’añu pasáu nin siquiera pudo suañar. Pero nun van tenelo fácil. Anque Force India y Williams tuvieron un gran premiu d’Australia bastante probe, nun son pa nada descartables, y a ellos tenemos de sumar Renault, que cada vegada tien meyor pinta, y McLaren, que va despertando pasín ente pasu del so lletargu con Honda. Ye pronto p’anunciar si Toro Rosso y Sauber van tar ehí dando guerra, y sobre too dempués de lo visto hai dos selmanes.

Cuidamos que Force India puen volver al sitiu que nun dexaron en temporaes pasaes nesti gran premiu, pero nun tamos tán seguros nel casu de Williams. La dupla Stroll-Sirotkin sigui paeciéndonos demasiao arriesgada y nun tenemos claro que vaiga dar los resultaos esperaos. Pero como na Fórmula Uno delles vegaes pasen coses inesperaes, sedrá cuestión de dexar pasar les carreres pa ver hacia qué direición evoluciona l’equipu.

Nel casu de Toro Rosso, los problemes col motor Honda ficieron salta l’alarma nel equipu: esti añu les escuderíes namás disponen de tres motores pa tola temporada y qu’ún d’ellos funda na primer carrera nun ye la situación más conveniente. Anque caltienen l’optimismu, les sorrises tán lloñe de ser tan brillantes como yeren demientres los test de Catalunya hai un mes.

Sauber nun tuvo una carrera brillante n’Australia, pero les sensaciones paez que fueron positives y, como diximos nel pasáu, ye dalgo que necesiten, tornar a creyer nes sos posibilidaes de facer coses. Quiciás pensar en puntos agora mesmo seya daqué aventurao, pero los pasinos alantre son los únicos que garanticen que puean llegar ehí. Tienen munchu llabor per delantre, pero la pinta ye bastante meyor que la del añu pasáu.

Nun queremos dexar de comentar que, demientres esti gran premiu, diremos conociendo novedaes acerca del futuru al que camina la Fórmula Uno de la mano de los sos nuevos dueños. Pocu a pocu vamos sintiendo y viendo la fuelga de Liberty Media nes decisiones que se tomen alrodiu’l funcionamientu internu de la máxima categoría del deporte de motor, y esti gran premiu va dexanos más información sobre lo que nos espera pa dientro unos años. Vos diremos informando sobre ello a midía que vaigamos conociendo más coses.

De momentu, equí vos dexamos los horarios pa esti fin de selmana, nel que nun toca madrugar:

VIENRES 06/04/2018

LLIBRES 1: 13:00
LLIBRES 2: 17:00

SÁBADU 07/04/2018

LLIBRES 3: 14:00
CLASIFICACIÓN: 17:00

DOMINGU 08/04/2018

CARRERA: 17:10

Y si queréis más información sobre’l circuitu de Sakhir, podéis atopala equí.

Nos primeros minutos enantes de que s’apaguen les lluces colloraes na primer carrera del añu, empiecen tamién a volar les predicciones y los deseyos de que ún o l’otru pilotu ganen o terminen bien la so carrera. Cuando les lluces s’apagaron n’Albert Park pal primer gran premiu de la temporada 2018, yeren munchos los que cuntaben con una carrera na que Mercedes diba triunfar.

Y ye que na clasificación del sábadu, pesie al accidente de Bottas que lu dexó ensin posibilidá d’intentar lluchar pola pole, Hamilton foi mui superior a los Ferrari y los Red Bull nun tuvieron al altor de lo que s’esperaba d’ellos dempués d’unos llibres bien curiosos. Nun hebo grandes sorpreses nesa sesión: los Sauber nos últimos puestos xunto colos Toro Rosso y Sirotkin. La deceición vieno cuando Force India nun pudo metese na Q3 pero compensó cola sorpresa de ver a dambos Haas dientro, dempués de que l’añu pasáu-yos costara un mundu clasificar siquiera pa la Q2. Con toles pieces nel tableru, empecipió la carrera.

Y como yera d’esperar, Hamilton marcó’l ritmu de les primeres vueltes. Lo más interesante venía per detrás: Räikkönen tuvo a Vettel detrás y un pocu más lloñe Magnussen consiguía adelantar a Verstappen na salida y nun dexó nenguna puerta abierta pa que’l pilotu holandés pudiera pasalu y llanzase a polos Ferrari. De fechu, el pilotu de Red Bull cometió un erru que llevó a un trompu y a la perda de posiciones col so compañeru d’equipu, con Grosjean y col Renault de Hülkenberg al que terminaría adelantando.

L’aplausu mayor demientres la primer parte de la carrera ye, ensin duldes, pa los dos pilotos de Haas ya’l so llabor pa mantener controlaos a los dos Red Bull ya incluso facelos cometer errores. Paecía qu’Haas diba consiguir unu de los sos meyores resultaos en conxuntu nesti gran premiu y que diben a facelo amás plantando cara a ún de los aspirantes al títulu. Demientres esto pasaba, tuvimos el primer retiráu de la temporada: Sergei Sirotkin yera’l primer pilotu n’acabar la carrera por un problema colos frenos del so Williams. Al pocu, veríemos a Marcus Ericsson dexar el so coche nel garaxe y un pocu más tarde, sedría Gasly el que tuviera que parar con problema nel motor. Males noticies pa Honda (otra vez).

Foi cuando empezaron les paraes cuando l’orde normal de les coses empezó a cambiar: Magnussen foi’l primeru de los Haas en parar. N’una parada que foi aparentemente llimpia y rápida, el pilotu danés reincorporábase en pista pa siguir lluchando pol cuartu puestu que dexara enantes de parar. Pero al pocu tiempu de dexar el carril de pitlane, víemoslu dir mui despacio y terminar dexando paráu el coche: un problema con una de les ruedes izquierdes lu obligaba a aparcar el so Haas. Imaxes posteriores amosaben como los mecánicos discutíen por dalgo que nun quedara bien puesto demientres la parada del so pilotu. Les esperances d’Haas quedaben puestes en Grosjean, que paraba al pocu tiempu. Y si l’equipu americanu nun tuviera bastante cola deceición de perder a Magnussen, ésta aumentó cuando yera Grosjean el que tinía qu’aparcar el so coche por otru problema coles ruedes, nesti casu la delantera izquierda. Otru error na parada que costaba la carrera al pilotu francés y facía desapaecer toles sorrises de les cares del equipu Haas.

La parada en pista de Grosjean fexo que s’activara’l VSC (coche de seguridá virtual) fechu qu’aprovechó Vettel pa parar y que terminó determinando’l resultáu final de la carrera. Hamilton parara siete vueltes primero, mesmo que Räikkönen, que respondió a la parada de Mercedes. Vettel aguantó y viose beneficiáu pol incidente de Grosjean y les circunstancies del VSC terminaron por facelu salir delantre d’Hamilton. Un erru de comunicación ente’l muru ya’l pilotu inglés paez que condicionaron la so forma de reaicionar énte’l VSC, facilitando’l llabor a Ferrari que, pa variar, vieron como-yos funcionaba una estratexa. El VSC terminaría siendo un coche de seguridá y Maylander sedría llíder de carrera demientres unes cuantes vueltes.

Dende esi puntu, Vettel diba dominar la carrera pa frustración d’Hamilton que vía como la so oportunidá d’empezar el campeonatu como llíder desapaecía por dalgo qu’entá nun yera a entender. La comunicación por radio col equipu fexo obvio que’l pilotu de Mercedes nun terminaba de creyese que fuera a quedar segundu dempués de dominar la primer parte de la carrera ensin problema. Pela parte d’atrás, Räikkönen tuvo de defendese hasta’l final de les ansies de Ricciardo de subise al podiu nel gran premiu de casa, dalgo qu’al final el pilotu australianu (afeutáu por una penalización de tres posiciones por rebasar la velocidá permitida con bandera colorada na clasificación del sábadu) nun consiguiría. A lo menos, féxose col troféu pola vuelta rápida de carrera.

Verstappen terminó la carrera lluchando con Fernando Alonso pol quintu llugar na clasificación. El pilotu McLaren defendió la so posición y consiguió sumar un bon puñáu de puntos vitales pal equipu y sobre too pa’l so ánimu, especialmente viendo que los Toro Rosso tuvieron un gran premiu especialmente desastrosu (Gasly retiráu y Hartley últimu). P’añader a l’allegría, Vandoorne tamién puntuó, siendo novenu. El restu de puestos dientro de los diez primeros ocupáronlos los pilotos Renault, Hülkenberg séptimu y Sáinz décimu, y Valtteri Bottas, que dempués del accidente del sábadu y la penalización pol cambiu de caxa cambios, namás pudo terminar octavu.

Force India quedaron a les puertes de los puntos con dambos pilotos. La verdá que l’equipu de Silverstone nun tuvo’l meyor de los empiezos de temporada: como dicíemos, na clasificación del sábadu nun consiguieron entrar en Q3 y na carrera nun pudieron puntuar. Siempre dicimos que lo que pasa n’Australia nun suel ser espeyu de lo que va pasar el restu la temporada, y ye dalgo qu’ensin duldes esperen nel equipu británicu.

Hai que rescamplar el décimotercer puestu de Charles Leclerc col Sauber que permitió al pilotu francés facer un debú bastante curiosu. El so compañeru d’equipu tuvo de conformase con ver terminar la carrera dende’l paddock. Nun pinta que Sauber vaigan a dar guerra esta temporada, pero paez que van tener como compañía a Williams y Toro Rosso na parte baxo dalgo de lo que quiciás puedan beneficiase. Williams tampoco nun dio señales positives nesti gran premiu: con Sirotkin fuera de carrera y Stroll décimocuartu, la verdá que nun pinta bien pa los de Grove. Pero insistimos, esto nun ye namás que l’empiezu la temporada.

Con too fecho n’Australia, ponemos rumbu a Baréin pa dientro de dos selmanes, pero enantes vos dexamos tolos númberos que nos dexó la clasificación del sábadu y la carrera del domingu. Amás del resume n’imáxenes de la clasificación y de la carrera

Carrera

Dicir Australia na Fórmula Uno ye lo mesmo que dicir principiu de temporada. Yá ta too en marcha n’Albert Park pal primer gran premiu d’esti 2018. Sumamos esperances de ver un bon espectáculu, con espectatives sobre lo que darán de sí los nuevos monoplaces y les ganes de los pilotos de facese col campeonatu cuando llegue payares.

Anque ye ún de los grandes premios favoritos de pilotos y fans, la verdá ye que ye quiciás nel que menos enfotu se puede poner pa sacar conclusiones sobre la temporada. Esti añu, n’un intentu por facilitar l’adelantamientu n’un trazáu onde ye bastante complicao, habilitáronse tres zones de DRS.

N’una temporada que va sumar ventiún carreres, con selmanes nes que vamos encadenar hasta tres grandes premios siguíos, llegamos a Albert Park con milenta interrogantes en tolos aspeutos: ¿Volverá Mercedes a dominar como n’años pasaos? ¿Ganará Hamilton el so quintu campeonatu? ¿Sedrá Vettel? ¿Dará guerra Red Bull? ¿Funcionará bien la xunión McLaren-Renault? ¿Y la Toro Rosso-Honda? Podríemos tar asina hasta que llegue’l domingu porque son milenta los frentes qu’entavía tenemos abiertos y qu’esperamos dir zarrando col pasu les selmanes y les carreres.

La realidá ye que tenemos énte nós un campeonatu nel que hai dos pilotos qu’opten a ponese al altor de Fangio en númberu de campeonatos consiguíos. Tanto Hamilton como Vettel sumen cuatro, ya esti añu podríen igualar al pilotu arxentinu. P’alcanzar los siete de Schumacher entá-yos queda camín qu’andar. Y anque nengún de los dos paez da-y importancia a esti tema, ye verdá que sedría un éxitu importante.

Los sos equipos respeutivos tán nel puntu de mira, con Ferrari especialmente necesitáu d’amosar que sí, qu’esti añu puen facese con dambos campeonatos como en delles vegaes creyimos la temporada pasada. La verdá ye que cuesta pensar que naide que nun seya Mercedes puea facese col campeonatu de constructores y más si pensamos que la combinación Hamilton-Bottas ta dando más resultáu que la Vettel-Räikkönen. Nun queremos tampoco escaecer que Red Bull tamién puen tar ehí arriba si consiguen dir fuerte dende’l principiu. El duelu nes altures pue tar interesante.

Baxando a la parte media de la tabla, hai munchos candidatos a facer un bon trabayu esta temporada. Los favoritos, por méritos propios, son Force India. Después d’una temporada perbona l’añu pasáu nel qu’en nengún momentu se vieron cuestionaos polos equipos d’atrás, esti añu esperen repitir resultáu empezando equí n’Australia. Tienen una de les combinaciones de pilotos más potentes pa consiguilo.

Pa complica-yos la vida van tar Williams, que lleguen n’un mar de duldes a Albert Park. Tamién McLaren, que crucien los deos pa que nesti primer gran premiu, anque irrelevante hasta ciertu puntu por nun ser espeyu de lo que pue dir pasando nel futuru, consigan bones sensaciones y, sobre too, un bon resultáu. Renault pel so lláu paez que dieron un pasu alantre esti añu y hai munchu enfotu en ver lo que puen facer. Toro Rosso ta deseyando ponese en marcha nesti primer gran premiu pa confirmar que sí, que’l cambiu a Honda foi bonu y que puen aspirar a munchos puntos nesta nueva temporada. Nel casu de Sauber, cualquier avance va ser positivu si lu comparamos col desastre de 2017. Tenemos munches ganes de ver de lo que ye capaz Charles Leclerc a los mandos del nuevu fórmula del equipu suizu.

Tamos a piques de ver apagase les lluces colloraes por primer vegada esti añu y yá toca dir garrando sitiu y madrugar pa la primer carrera de la temporada. Equí vos dexamos los horarios pa ver les sesiones de llibres, la clasificación y la carrera:

VIENRES 23/03/2018
LLIBRES 1 – 02:00
LLIBRES 2 – 06:00

SÁBADU 24/03/2018
LLIBRES 3 – 04:00
CLASIFICACIÓN – 07:00

DOMINGU 25/03/2018
CARRERA – 07:10

Y pa que nun se vos escape nengún detalle, equí podéis atopar tola información sobre’l circuitu d’Albert Park, en Melbourne, escenariu del primer gran premiu de la temporada 2018 que yá tenemos enriba nós.