Category: Temporada 2018

Ensin malpenes descansar de lo que pasó nel circuitu Paul Ricard, yá tamos mirando pa Spielberg, pal Red Bull Ring, onde va disputase la novena carrera d’esta temporada 2018. Aterrizamos en territoriu Red Bull pal segundu de la primer tanda de tres grandes premios siguíos que vamos tener esti añu. Ye esti un circuitu que nel pasáu tiennos dao carreres curioses y au Red Bull tien más que nunca la obligación y les ganes de ponese les piles pa nun dexar escapar a los dos equipos de la cabeza.

Anque consiguieron un podiu hai una selmana, nunca nun ye suficiente cuando lo que quies ye adelantar a los tos principales rivales. Agora mesmo ye Mercedes quien manda en dambes clasificaciones, pero saben que Ferrari nun va poner les coses fáciles y de fechu, viendo como se ta desendolcando esti añu’l campeonatu, ye hasta posible que marchemos d’Austria con un llíder distintu.

Falóse muncho de l’actuación de Vettel en Francia, de los sos erros y de les penalizaciones recibíes. Nel lláu de Mercedes, lóxicamente, consideraron que los cinco segundos que recibió pol accidente con Bottas nun fueron bastante ya incluso Verstappen dio la so opinión dempués de que tenga sío elli centru d’atención precisamente pola so forma de conducir.

Seya como seya, Austria ye un asuntu distintu, una oportunidá más pa siguir sumando puntos y nun dexar que naide s’escape. Nin per delantre, nin pela parte del medio. Renault tuvo una actuación bona en Francia, anque non col resultáu que deseyaben dempués de los problemes de Sáinz a última hora. Son los meyor posicionaos de los equipos medianos y Austria preséntase como la ocasión perfeuta p’amosar que lo de Sáinz foi un casu de mala suerte non de falta de fiabilidá, y de que pueden afianzase nesa posición.

Y diríamos qu’agora mesmo pueden tar tranquilos. Entavía nun vimos los coches en pista, pero les carreres pasaes fáennos albidrar que de momentu naide nun los va poner n’apuros. McLaren siguen nel so pozu particular, cada carrera una llucha por nun fundise más; Haas sumando a puquitinos y bregando pa ser quien a dexar atrás a Toro Rosso; Force India intentando despertar y arrancar del too y Sauber, pasín ente pasu, convenciendo de la so recuperación. Williams aseméyase un pocu a la situación de McLaren, pero con entavía más drama y fracasu. Tar últimos con dos rapazos que nun terminen de cuayar una actuación curiosa en pista y viéndose cuestionaos día tres día nun facilita les coses pero’l mundu de la Fórmula Uno ye a vegaes mui inxustu.

Pa esti fin de selmana, los horarios tornen a ser los normales de los grandes premios d’esti añu:

VIENRES, 29/06/2018

LLIBRES 1: 11:00
LLIBRES 2: 15: 00

SÁBADU, 30/06/2018

LLIBRES 3: 12:00
CLASIFICACIÓN: 15:00

DOMINGU, 01/07/2018

CARRERA: 15:10

Equí podéis atopar tola información sobre’l Red Bull Ring y más abaxo les gomes escoyíes pa esti gran premiu:

Dempués d’una ausencia de ventiocho años podemos dicir que Francia llegó pa quedase. Anque nun sorprendió a naide’l resultáu que nos dio, superó toles espeutatives, que cada vegada son más desixentes colos circuitos que reapaecen. Muncho se faló del Paul Ricard: les rayes que permitíen frenar a los pilotos pa evitar que terminaren nes barreres foron oxetu de comentarios cásique tolos díes d’esti fin de selmana; lo complexo de siguir la trazada correuta pa los pilotos (delles semeyes recordaben a llaberintos); la dificultá p’adelantar que terminó quedando olvidada porque sí que vimos dellos adelantamientos en carrera. Ensin embargu, munches vegaes el circuitu ye tan bonu como los pilotos lu faigan y si éstos van a por toes ye raro que nun veamos un bon espectáculu. Falten tovía cosines qu’iguar pero podemos dicir que’l Paul Ricard cumplió bien na so primer carrera dempués de tantu tiempu.

El sábadu la lluvia foi protagonista na tercer sesión de llibres pero non tanto na sesión de clasificación, anque los equipos trabayaron cola amenaza de que cayera agua en cualquier momentu d’ella. Con eso y con too, los Mercedes retornaron a les dos primeres posiciones de la parrilla, con Hamilton faciéndose otra vegada col primer puestu dexando a Vettel per detrás y a los dos Red Bull y Räikkönen alloñaos de la pole.

La sorpresa de la sesión del sábadu fueron McLaren. Dambos pilotos quedaron fuera de la Q2 p’acompañar nes posiciones más baxes de la parrilla a Hartley y a los Williams. Les coses en McLaren hai tiempu que nun funcionen bien pero esta actuación del sábadu vien a rematar un fin de selmana nel qu’Eric Boullier tuvo de dar más desplicaciones de les que quixera nes sos ruedes de prensa.

El domingu, n’una carrera en seco, les predicciones daben a Hamilton de vencedor, y nun s’equivocaron. El pilotu inglés en nengún momentu vio peligrar la so victoria. Nun foron tan cencielles les coses pal so compañeru Valtteri Bottas que a poco de la salida, tuvo un accidente con Sebastian Vettel n’un erru d’esos qu’a vegaes l’alemán comete y que nin siquiera elli mesmu entiende. Dambos pilotos salieron perxudicaos, Bottas con un pinchazu y Vettel col morru dañáu ya viéronse obligaos a facer una parada temprana y aguantar el restu de la carrera ensin entrar.

De la so desgracia aprovecháronse los dos Red Bull, con Verstappen per delantre, qu’aguantó tola carrera nel segundu puestu qu’algamó na salida y que nun abandonó en nengún momentu. El so compañeru Daniel Ricciardo, ensin embargu, nun pudo aguantar nel tercer llugar y terminó cuartu tres ser adelantáu pol Ferrari de Räikkönen que, como davezu, fexo una carrera correuta ensin llamar muncho l’atención y consiguiendo un podium. Vettel pudo a lo menos terminar quintu, bastante bono cuntando col accidente y cola penalización de cinco segundos que recibió. Bottas terminaría séptimu, un puestu deceicionante si pensamos que salía dende la segunda posición, pero bastante curiosa pensando nel accidente ya en que pudo llegar a quedase fuera de la carrera.

Nun foi esti l’únicu accidente de los primeros momentos de la carrera. Al tiempu que víemos les imaxes de Vettel con Bottas, apaecíen otres con dos de los pilotos franceses de la parrilla como protagonistes: Pierre Gasly y Esteban Ocon terminaron la so carrera enantes de tiempu dempués d’un erru de cálculu del pilotu de Force India que n’un movimientu inesperáu hacia la drecha zarró espaciu al pilotu de Toro Rosso que nun foi quien a reaicionar y terminó truñándolu. Esti incidente provocaría la salida del coche de seguridá y l’abandonu de dambos pilotos.

Dende esti momentu y dempués de que Maylander abandonara la pista, la carrera estabilizó y viose bastante espectáculu per parte de los pilotos de Haas y Renault y Leclerc col so Sauber. Grosjean tuvo un sábadu permalu, yá que terminó la Q3 nes barreres. El domingu nun tuvo una mala carrera pero nun consiguió entrar en puntos. El so compañeru Kevin Magnussen tamién consiguió entrar en Q3 el sábadu ya’l domingu nunca nun salió de los puestos de puntos. Terminó siendo sestu per delantre del Mercedes de Bottas y aprovechando que Sáinz tuvo problemes d’última hora col motor del so Renault.

Dempués d’un tiempu d’estabilidá, averándose casi’l final de la carrera, tuvimos otru de los momentos del gran premiu: la goma de la rueda izquierda del Williams de Lance Stroll reventó provocando que’l pilotu perdiera’l control del coche n’un momentu de bastante sustu. Sicasí, nun tuvimos de llamentar un accidente aparatosu porque’l pilotu canadiense nin siquiera llegó a les barreres, les rayes azules y coloraes del entornu de la pista ayudaron a frenar la velocidá del coche. Llevábemos tol fin de selmana sintiendo les desplicaciones sobre la so utilidá y nesti casu concretu pudimos veles cumpliendo la so función. Ye una interesante fórmula pesie a qu’estéticamente a la xente paez que nun-y convence. La carrera terminó col coche de seguridá virtual por cuenta d’esti últimu incidente.

Renault consiguió puntuar con dambos pilotos. Pesie al problema d’última hora de Carlos Sáinz, pudo acabar en puntos, nel puestu octavu y xusto per delantre del so compañeru d’equipu, Nico Hülkenberg, nel novenu. Otru puñáu de puntos pa sumar a la cuenta de Renault que son entá más importantes pensando que, otra vuelta más, los pilotos de McLaren nun sumaron.

Pa zarrar los puestos de puntos, Charles Leclerc. Sigui reivindicándose como pilotu, pasín ente pasu. Terminó nel puestu décimu y yá suma 11 puntos, igualando’l númberu de puntos del so compañeru d’equipu en tolo que lleva na Fórmula Uno. Ensin duldes el pilotu monegascu ta faciendo méritos pa qu’equipos como Ferrari se fixen n’elli. Marcus Ericsson sólo pudo terminar nel puestu décimoterceru.

McLaren, como diximos, nun pudieron sumar puntos. Nel casu de Fernando Alonso nin siquiera vio la bandera a cuadros y terminó enantes de tiempu dientro del garaxe por problemes col coche. Tamién elli tuvo un incidente con Sebastian Vettel que nun tuvo más consecuencia qu’un trompu pal asturianu. El so compañeru Vandoorne terminó la carrera nel puestu doce. Nun duldamos que les crítiques al equipu van siguir tiempu y sobre too hasta que se vea movimientu y cambiu dientro de la escudería.

Zarrando la clasificación quedaron Sirotkin, nel puestu quince, qu’amás llevó una penalización de cinco segundos por dir demasiao despacio cuando’l coche de seguridá taba en pista y Brendon Hartley, que yá salía del puestu venti por penalización y que nun pudo facer muncho más el domingu.

Fuera quedaron los yá mentaos Gasly, Ocon amás de Sergio Pérez, que tuvo de retirase por un problema col motor. Nun foi un gran día pa los pilotos de Force India.

Ensin casi descansu tamos yá pensando nel siguiente gran premiu, el segundu d’esta tanda de tres que toca: Austria. De momentu y hasta que llegue la previa d’esa carrera, equí vos dexamos tolos númberos de sábadu y domingu nel Circuitu Paul Ricard y los resúmenes de la clasificación y la carrera:

Clasificación

Carrera

Siempre presta cuando entren nuevos grandes premios nel calendariu. Si, como nesti casu, lo que pasa ye qu’entra un circuitu míticu que fai’l so retornu a la competición na Fórmula Uno, ye meyor entavía. Dempués de diez años d’ausencia d’un circuitu francés na Fórmula Uno (en 2008 corrióse por última vegada en Magny Cours) Paul Ricard torna a la máxima competición del motor ventiocho años dempués del so últimu gran premiu.

Hai qu’añadir a esto que va ser la primera d’un set de tres carreres siguíes que van llevanos de Francia a Austria y llueu al míticu Silverstone. Nun podemos quexanos de falta de grandes premios esti añu.

Aterrizamos en Le Castellet pa la octava cita d’esti 2018. Hai munchísima espectación énte esta carrera, aparte de polo mítico del circuitu, porque había tiempu que nun se daba la coincidencia de correr n’un circuitu francés con pilotos franceses en parrilla (Grosjean, Ocon y Gasly) ya un equipu francés (Renault). Los ingredientes son perbonos, esperamos que’l resultáu tamién lo seya.

Porque’l retornu d’un circuitu dempués de ventiocho años d’ausencia, pesie a tener sío usáu pa test, implica que, como cuando unu nuevu entra, son too novedaes, los pilotos y equipos nun saben qué van atopase, y eso ye siempres ganancia pa quien ve la carrera dende fuera. Güei ye quiciás más difícil que nunca facer predicciones sobre lo que vamos poder ver el domingu. La situación ideal pa un mundial que vien careciendo carreres aburríes apocayá.

Ferrari vienen con fuercia, enchipaos polo vivío en Montréal ya esperando que’l Paul Ricard nun se-yos atragante. El llideralgu de Vettel nel mundial de pilotos ye mínimu y cualquier erru ye costosu. Mercedes tán na cabeza nel mundial de constructores, pero siendo conscientes de qu’esti añu nun va ser un paséu y que cada puntu van tener de lluchalu. Son munches les voces qu’almiten que Ferrari tien, probablemente, el meyor coche d’esti añu y en Mercedes nagüen por probar qu’eses voces tán equivocaes.

Red Bull van tar nel puntu de mira, anque por causes ayenes a esti gran premiu. Esta selmana confirmóse lo que llevaba tiempu siendo un rumor: dende 2019 van montar motores Honda, mesmo que ta faciendo esti añu Toro Rosso. Dicen que lo que tán viendo na escudería hermana paez-yos lo suficientemente importante como pa considerar que ye la so meyor baza pal añu viniente. La bayura d’opiniones sobre esta decisión dexa claro que nun paez que la xente confíe en qu’Honda pueda dar a Red Bull lo que necesiten pa pasar perriba Mercedes y Ferrari, pero ye evidente que Renault nun lo ta consiguiendo tampoco agora. Nun nos queda otra qu’esperar a ver lo que da de sí esti nuevu empareyamientu dientro unos meses. A too esto súmase’l fechu de que’l futuru de Daniel Ricciardo ta nel aire, y esta nueva xuntanza ente Red Bull y Honda nun paez ser la más afayadiza pa que l’australianu tenga’l so sitiu ellí pa 2019. La silly season ta a piques de ponese en funcionamientu…

Pela metá la tabla, tolos güeyos van tar puestos en Renault por razones obvies: cuerren en casa, ya eso paez ser siempre un plus pa los equipos. Si amás, como nel casu de Renault, vienes de facer bones actuaciones en carreres pasaes y agora mesmo yes el meyor de los equipos medianos, la motivación ye entavía mayor. Pa frenalos van tar McLaren, con un Alonso que vien de ganar Le Mans con Toyota, y que necesiten sumar si nun quieren ver a Renault escapase na clasificación. Na escudería de Woking tamién son too rumores, yá que la victoria d’Alonso en Le Mans plantegó la cuestión de si diba dexar la Fórmula Uno pa metese n’IndyCar ya intentar ganar n’Indianápolis y facese cola naguada triple corona (ganar Mónaco na F1, les 24 hores de Le Mans y les 500 milles d’Indianápolis). McLaren nun tán ufriendo’l rendimientu esperáu, polo que nun sedría estraño que l’asturianu tomara esa decisión.

Force India van espabilando a puquitinos, pero tan sele que les meyores malpenes se noten na clasificación. Tienen a McLaren entá a doce puntos, una distancia que ye fácil de salvar pero sólo si empiecen a puntuar con dambos coches, dalgo qu’esti añu nun ye vezu como en 2017 cuando los dos Force India yeren clientes habituales de los puntos. Tienen amás que tener controlaos a Toro Rosso y Haas que, con diecienueve puntos, tán faciendo por dir pasín ente pasu ameyorando y xubiendo posiciones na clasificación.

Sauber tán firmando un 2018 que, con namás siete grandes premios disputaos, yá foi munchísimo meyor que’l 2017. Son munchos los cambios qu’hebo nel equipu, totalmente necesarios, ya’l rendimientu que ta dando Charles Leclerc ta ayudándolos a recuperar el so sitiu. El pilotu monegascu ta tamién nel puntu de mira por tar el so futuru en Ferrari, hai quien diez que pa cubrir el sitiu que dexaría Kimi Räikkönen. Si ye capaz de rindir asina con un Sauber na situación na que ta, creyemos que ponelu n’un Ferrari ye una apuesta segura. Pero, como colo de Ricciardo, toca esperar y ver ya dexar que la silly season vaiga garrando forma.

Güeyu colos horarios qu’en Francia vamos una hora per detrás:

VIENRES 22/06/2018

LLIBRES 1: 12:00
LLIBRES 2: 16:00

SÁBADU 23/06/2018

LLIBRES 3: 13:00
CLASIFICACIÓN: 16:00

DOMINGU 24/06/2018

CARRERA: 16:10

Equí podéis atopar información sobre’l circuitu Paul Ricard y abaxo, les gomes que se van usar nesti gran premiu:

Suel pasar na Fórmula 1 que se dan coses por feches y éstes terminen nun pasando. Por exemplu, que Lewis Hamilton domine en Canadá. Muncha xente fala d’elli como’l rei de Montréal, y ye que yá tien ganaos seis grandes premios ellí. Por eso nun yera d’estrañar que se cuntara cola so victoria’l domingu.

Verstappen llideró toles sesiones de llibres, ensin incidentes nin mayor problema, xusto lo que necesitaba. Perfilábase como posible candidatu a pole’l sábadu y victoria’l domingu. Hamilton, como dicimos, yera otru candidatu. Pero naide nun cuntaba con que fuera Vettel quien dominara la clasificación del sábadu cola pole ya’l domingu con una carrera al estilu de les que lleguemos a avezanos nel pasáu cuando taba en Red Bull: dominiu de principiu a fin.

De fechu, Räikkönen paecía que diba dar más guerra que’l so compañeru, pero al llegar el momentu decisivu foi l’alemán quien dio’l golpe enriba la mesa con una vuelta de pole casi perfeuta. Bottas consiguió ponese segundu, mientres que foi Verstappen quien clasificó terceru y Hamilton nuna deceicionante cuarta posición. Canadá nun ye Mónaco y adelantar ye posible, pero saliendo cuartu y con un Ferrari que paecía rindir meyor de lo que s’esperaba, paecía que Hamilton diba tenelo complicao pa facese cola victoria’l domingu.

Y asina foi. La salida’l domingu foi llimpia. Verstappen atacó dende bien ceo a Bottas, que defendió perbién la so posición ya nun dexó al holandés ponese per delantre. Per detrás d’ellos les posiciones siguieron como taben y, como siempre, los problemes vinieron na parte medio-baxo de la tabla. Na curva seis Stroll perdió’l control del so coche dempués de tener un toque con ún de los McLaren. La mala suerte cebóse con Hartley que foi víctima d’esi movimientu y viose escontra la muria nun accidente bastante escandalosu (ver videu) que dexó a dambos pilotos fuera. Hartley sigui escorríu pola mala suerte ya polos rumores que falen de que Red Bull anda considerando a Lando Norris como’l so sustitutu si les coses nun ameyoren y Stroll tampoco nun ta en meyor situación, sumando otru fin de selmana negativu con Williams.

Col coche de seguridá en pista, los pilotos de la parte baxo de la tabla como Vandoorne y Gasly aprovecharon pa entrar, pero’l restu siguieron en pista. Dende esi momentu y salvo un toque ente Sáinz y Pérez que fizo que’l pilotu de Force India perdiera’l control del so coche y casi acabara na muria, nun vimos muncho más.

Pela parte d’arriba, Ricciardo ganó-y la partida a Hamilton nel pitstop pero aparte d’eso, la carrera foi bastante monótona. Bien ceo viose que naide diba poner en problemes a Vettel y que tinía bien dominada la carrera. Tamién taba claro que Bottas tinía controláu a Verstappen y Ricciardo nunca nun se vio amenaciáu por Hamilton.

Los pilotos Renault dieron bastante espectáculu dientro la monotonía que foi’l gran premiu, y consiguieron puntuar dambos, terminando sétimu (Hülkenberg) ya octavu (Sáinz) y sumando un bon garrapiellu de puntos perimportantes na so batalla con McLaren, que nun sumaron nengún. Alonso quedó fuera de carrera por un problema col escape y Vandoorne, con milenta problemes, namás pudo terminar décimosestu.

Force India consiguió puntuar con Ocon, que fexo una bona carrera anque pudo consiguir más que’l novenu puestu nel que terminó. Pérez tuvo más problemes dende’l so alcuentru con Sáinz, y nun entró en puntos, siendo namás décimocuartu. Zarrando los diez primeros quedó Leclerc, que suma otru puntu pa Sauber y sigui amosando que ye ún de los pilotos a tener en cuenta de cara al futuru. El so compañeru tuvo una actuación más discreta, terminando décimoquintu.

Haas tampoco nun tuvo un bon domingu: el sábadu Grosjean nin siquiera pudo participar na sesión de clasificación y anque tuvo bona parte de carrera dientro los puntos, al final terminó nel puestu doce. Magnussen tampoco nun fizo muncho más anque igual que’l so compañeru llegó a tar dientro los puntos, pero terminó nel puestu trece. Otru finde pa escaecer nel garaxe de Haas.

Al accidente de Toro Rosso hai que sumar que Gasly tampoco nun pudo facer muncho más en carrera. Con problemes el sábadu y saliendo dende bien atrás el domingu, quedó a les puertes de los puntos, sumando otru fin de selmana de munches entrugues nel equipu hermanu de Red Bull.

L’encargáu de zarrar la llista de pilotos que terminaron la carrera foi Sirotkin que xunío al accidente de Stroll, dexa otra carrera pa Williams ensin siquiera averase a los puntos. Siguen soplando vientos negativos en Grove.

Nun podemos terminar esta crónica ensin mentar una anéudota curiosa que tuvo de protagonista la bandera a cuadros. Por un erru d’información a la persona encargada d’enseñala, la carrera declaróse como terminada na vuelta sesenta y nueve. Y ye que la bandera apaeció cuando a Vettel tovía y quedaba la última vuelta per delantre (el mesmu pilotu pidió per radio que nun s’enseñara la bandera a cuadros enantes de tiempu, que tovía nun terminara). L’erru fexo que Ricciardo perdiera’l so premiu a la vuelta rápida de carrera, que quedó en manes del so compañeru Verstappen.

Dexamos Canadá pa descansar un par de selmanes y garrar fuercies pa los tres grandes premios siguíos que nos lleguen. La primera d’eses paraes va ser nel circuitu Paul Ricard, en Francia, que retorna al calendariu de la Fórmula Uno. Demientres llega la fecha, equí vos dexamos tolos númberos del sábadu y del domingu y el resume en videu de la clasificación y la carrera:

Clasificación

Carrera

Facemos un parón na xira europea de la Fórmula Uno pa pegar el saltu hasta Canadá pal sestu gran premiu d’esta temporada. Dempués d’una carrera en Mónaco que namás-y debió prestar a Daniel Ricciardo y dalgún otru más, el circuitu Gilles Villeneuve yá ta preparáu pa recibir los monoplaces y pilotos d’esti 2018.

Canadá tiennos dexao bones alcordances de grandes premios entreteníos y ye ún de los escenarios favoritos de Lewis Hamilton. Anque’l dominiu de Mercedes nun ye tan obviu esti añu, sí ye que verdá que tienen motivos pa creyer qu’esti pue ser un bon fin de selmana pa ellos, especialmente pal pilotu inglés. Poro, el focu ta puestu enriba les fleches platiaes pero tamién no que puean facer Ferrari y Red Bull pa torgar esa victoria cola que cásique tol mundu cunta.

Falando de Red Bull, tienen bona falta de siguir na bona llínia de Mónaco, pesie a les dificultaes coles que llegó esa victoria pa Ricciardo. Pa Verstappen, qu’estes selmanes ta recibiendo muncha presión non sólo del so equipu si non, y sobre too, de los medios, ye perimportante consiguir facer una carrera ensin incidentes y au pueda amosar que nun se-y olvidó como ganar carreres. Dempués de sumar un bon garrapieyu de carreres nes que siempre tuvo dalgún problema, el pilotu holandés necesita más que nunca una carrera tranquila.

Pela parte media la tabla, McLaren tien muncha falta de facer un bon papel en Canadá. Tán a seis puntos de distancia de Renault na tabla, que sacó renta del gran premiu de Mónaco. Nel garaxe d’Alonso cellebren 300 grandes premios y sabemos lo importantes que son esti tipu d’efemérides na Fórmula Uno y lo que presta facer una bona carrera cuando amás cellebres dalgo.

Per detrás, pasín ente pasu Force India va espertando, pero nun tien nada que ver colo que víemos l’añu pasáu. Anque entavía tien tiempu y la tabla ta apertada en puntos, nun nos paez que vaigan poder imponese nel cuartu puestu como en 2017. El tar dientro los diez primeros el sábadu yá nun ye vezu pa ellos mesmo que puntuar con dambos coches el domingu. Sí que ye verdá qu’ameyoraron bastante en comparanza col principiu la temporada, pero tovía tienen muncho que trabayar. Puede ser tamién que nun seya sólo culpa d’ellos si non méritu del restu d’equipos qu’espabilaron esti añu.

Y ello ye que Force India tien un colchón cómodu de siete puntos perriba Toro Rosso pero nun puede despistase yá que l’equipu filial de Red Bull, con una bona carrera per parte de los sos pilotos, puede ponese perriba d’ellos. Hartley, de toles formes, ta teniendo bastantes problemes p’adaptase al coche y ta siendo bastante irregular, mientres que Gasly paez tar n’una meyor situación pesie a que los resultaos tampoco nun son brillantes.

Force India nun se tien de preocupar namás de Toro Rosso si non que tien a Haas a la mesma distancia. L’equipu estauxunidense tuvo una carrera pal escaezu en Mónaco y lleguen a Canadá cola necesidá de recuperar la forma que vimos en grandes premios pasaos onde nun salíen de los diez primeros. Amás, parten con una alvertencia de los sos xefes: evitar les muries y los accidentes porque anden llimitaos de pieces p’arreglar los coches. Viendo los pasos daos hasta agora, paeznos qu’esti comentariu va sobre too dirixíu a Romain Grosjean.

Sauber tán viviendo un bon momentu, anque Mónaco nun foi tampoco un suañu pa ellos. L’accidente de Leclerc de xuru dio pa pensar muncho y pa garrar fuercies y facelo lo meyor posible en Canadá y consiguir metese otra vuelta más dientro de los diez primeros. Williams dirá col mesmu pensamientu, especialmente nel llau de Stroll, que cuerre en casa. Hai siñales que nos permiten creyer que l’equipu de Grove ta espabilando, pero son entavía febles como pa poner enfotu n’elles. Lo que ta claro ye que, cuando primero espabilen, primero tendremos batalles perprestoses pela mitá medio-baxo de la tabla.

Canadá ye davezu un gran premiu entreteníu y amás nun toca madrugar. Estos son los horarios pa esti fin de selmana:

VIENRES 08/06/2018

LLIBRES 1: 16:00
LLIBRES 2: 20:00

SÁBADU 09/06/2018

LLIBRES 3: 17:00
CLASIFICACIÓN: 20:00

DOMINGU 10/06/2018

CARRERA: 20:10

Y equí vos dexamos tola información sobre’l circuitu Gilles Villeneuve y les gomes escoyíes pa esti gran premiu:

Faise difícil escribir una crónica d’un gran premiu cuando lo que se vio na pista nun foi gran cosa. Hai munchos exemplos d’esto y la carrera que vimos esti domingu ye ún d’ellos.

Yá dende’l vienres podíemos albidrar el resultáu que tendríemos el domingu. Red Bull dominaron de principiu a final y naide nun duldaba de que diben tar arriba. L’únicu enemigu yeren ellos mesmos y cómo xestionaren les carreres de los sos dos pilotos. Ricciardo tuvo un sábadu impecable y Verstappen tornó a poner el toque negativu con un accidente casi al terminar la tercer sesión de llibres que llueu fexo que nun pudiera nin siquiera salir na sesión de clasificación.  L’equipu intentó apurar hasta l’últimu momentu pa dase cuenta que yera inevitable camudar la caxa de cambios. Foi un erru que yá lu vimos cometer hai dos años tamién na sesión de llibres nesti gran premiu y supunxo que’l domingu tuviera de salir dende la última posición de salida n’un circuitu de Montecarlo au ye mui complicao adelantar.

El restu de pilotos tuvieron sesiones de clasificación bastante tranquiles, con Ricciardo na pole, acompañáu por Vettel y Hamilton nes dos posiciones siguientes y los sos respeutivos compañeros cuartu (Räikkönen) y quintu (Bottas). Los Force India consiguieron metese ente los diez primeros el sábadu, con Ocon sestu y Pérez novenu y Alonso ocuparía’l sétimu llugar. Sáinz nel puestu ocho y Gasly nel décimu completen la llista de los diez primeros clasificaos. Les gomes hypersoft que trayía Pirelli nun dexaron de sumar récor tres récor.

El domingu entamó cola sensación de que díbemos a tener una bona carrera pero foi un sentimientu que desapaeció bien pronto. De fechu, tol espectáculu que vimos nes primeres vueltes foi los problemes del Williams de Stroll, que llegó a pinchar dos vegaes na carrera, y tuvo que facer una parada bien temprano. Los pilotos fueron garrando’l so sitiu en pista y salvo dellos momentos de llucha pela parte media de la tabla, foi una carrera bastante llimpia. Na mayor parte de los casos, los pilotos fueron a una parada.

Una de les claves de la carrera fueron les gomes. Pa Hamilton fueron una pesadiella, yá que nun foi quien a facelos funcionar como elli quería y vía que’l restu de los sos competidores nun teníen esi problema. Per delantre, Ricciardo tuvo una carrera bastante tranquila hasta que, un pocu enantes d’algamar la mitá del gran premiu, lu sintíemos pela radio comunicar que taba perdiendo potencia. Tola xente echaba les manes a la cabeza y facía alcordanza de cómo hai dos años Ricciardo tuvo na so mano la victoria del gran premiu de Mónaco ya un erru del so equipu a la hora de la so parada (nun tiníen llistes les ruedes) dexábalu ensin ella. Paecía que díbemos a ver lo mesmo otra vuelta esti 2018. Ensin embargu, el motor Renault de Red Bull aguantó ya’l pilotu australianu consiguió ser el primeru en ver la bandera a cuadros. Ta claro que si hai que correr con problemes nel motor del coche, que seya en Mónaco. Vettel pasó tolo que quedó de gran premiu apretando pa intentar pasar a Ricciardo, pero malpenes s’averó a menos de mediu segundu.

Bottas y Räikkönen pasaron bastante desapercibíos en carrera y nun dieron muncha guerra a los d’arriba. Per detrás, Ocon fizo valer la so posición na clasificación del sábadu con una carrera bastante sólida que resultó n’un sestu puestu y un bon puñáu de puntos pal equipu. El so compañeru, Sergio Pérez, tuvo dellos problemes n’una de les sos paraes que lu ficieron perder la so posición en pista y terminar nel puestu doce.

Los pilotos de Toro Rosso tuvieron suertes distintes. Gasly consiguió metese ente los diez primeros al terminar sétimu, pero Brendon Hartley nin siquiera pudo ver la bandera a cuadros. Con dellos problemes demientres el gran premiu, la so carrera terminó cuando foi embestíu per detrás pol Sauber de Leclerc. El pilotu monegascu perdió’l control del coche por un fallu los frenos y nun foi quien a evitar al Hartley, quedando dambos fuera de carrera. L’otru Sauber, el de Marcus Ericsson, tampoco nun sumaría nada por pocu, yá que terminó nel puestu once. Foi una carrera bastante deceicionante pal equipu suizu yá que yeren munches les esperances puestes nesta carrera, sobre too nel llau de Leclerc, que corría en casa.

Pa completar les posiciones de puntos, tenemos al Renault de Hülkenberg, del qu’esperábemos más (en xeneral, esperábemos más de Renault) que foi octavu. El so compañeru Carlos Sáinz, que lu superó na sesión de clasificación, terminó décimu. Renault tuvo suerte de que McLaren nun sumó nengún puntu na so batalla particular col equipu de Woking. Alonso tuvo problemes cola caxa de cambios y Vandoorne tuvo una parada en boxes demasiao llarga y que lu dexó décimocuartu. Mesmo que pa Sauber, Mónaco nun foi’l suañu que McLaren esperaba.

Yá falemos de que Ricciardo salió victoriosu de les desixencies d’esti gran premiu pero nun diximos nada de lo que dio de sí pa Verstappen. Terminó nel puestu nueve, dalgo que ye bastante positivo si pensamos que nel momentu de salida yera últimu. Ta claro que salir nesa posición en Mónaco nun ye lo meyor, por muncho que’l to coche seya’l meyor nesi trazáu y pa les sos condiciones. Consiguió sumar puntos pero siguirá rumiando l’erru del sábadu que lu dexó ensin la posibilidá de disputa-y la victoria al so compañeru.

Comentemos tamién que pa dellos equipos esti gran premiu foi bastante negativu, pero’l broche tienen de llevalu Haas y Williams. Haas tuvieron desapaecíos tola fin de selmana. Magnussen intentó desplicar el sábadu’l motivu pol que diben tan mal dempués de que nes últimes carreres nun salieren de los puntos, pero nun yera quien a ello. Grosjean amás, salía con penalización qu’arrastraba del gran premiu anterior, y dambos partíen del puestu décimoctavu (Grosjean) y décimonovenu (Magnussen). Nun tuvieron nada que facer en tola carrera más que pelease col so coche ya intentar nun perder más posiciones colos sos rivales. El pilotu danés terminaría décimoterceru mientres que’l francés sedría décimoquintu. Un gran premiu pa olvidar.

Williams nun foi mal nos llibres, de fechu Sirotkin llegó a tar ente los diez primeros n’una de les sesiones. Pero’l domingu foi otru tema: al problema de que yá mentemos de Stroll, sumáronse los de Sirotkin, que foi penalizáu con diez segundos de stop-and-go por nun tener toles ruedes puestes nel llímite del tiempu fixáu por direición de carrera. Con esa penalización yá nun pudo nin siquiera averase a los puntos y terminaría nel puestu décimosestu. Stroll quedaría xusto per detrás, nel puestu décimosetimu.

Tamién tuvo penalización Brendon Hartley por dir demasiao rápido nel carril de boxes, anque nun tendría influyencia nenguna pa elli.

Dexamos Mónaco pa cruciar l’Atlánticu camín de Canadá pa la sétima cita d’esta temporada. Enantes d’ello, vos dexamos tolos númberos que dio la fin de selmana na clasificación del sábadu y na carrera del domingu asina como los resumenes en vídeu de la clasificación y de la carrera.:

Clasificación

Carrera

Naide nun dulda que Mónaco ye ún de los circuitos más queríos pola afición formulero y polos pilotos. Ellos falen del glamour, de lo cerca que tas siempre de la muria y de les posibilidaes qu’ufre p’aquellos qu’otres vegaes nun pueden sumar n’otru tipu de circuitos. Y l’atmósfera, caro. Tola xente fala de la sensación de tar n’una película cuando los Fórmula Uno tán peles sos cais. Y por si yá Mónaco nun yera especial, vamos ver esta fin de selmana’l debú del neumáticu más blandu de los que trai Pirelli, el nomáu hypersoft. Hai muncha espeutación por ver cómo rinde esta nueva creación. Vais poder identificalu pola so color rosa claro.

Ye’l sestu gran premiu de la temporada yá, sesta vegada que visitamos un circuitu nesti 2018 y entavía col tastu na boca del pasáu gran premiu en Montmeló onde Mercedes recuperó alcordances del so pasáu dominador. Foi esa carrera que nun ufrió munches sorpreses, yera esperable que Mercedes dominare, como asina foi.

Mónaco ye un asuntu distintu, y Red Bull yá va garrando sitiu por saber que pue ser una de les sos meyores oportunidaes de la temporada pa facese cola victoria. Dáse-yos mui bien esti trazáu, yá nel pasáu los tenemos visto no más alto ya siempre con posibilidaes. De toles formes, Ferrari y Mercedes nun van poné-yoslo fácil. La Scuderia vien necesitada de sumar en dambos campeonatos pa que les fleches platiaes nun s’escapen.

Más abaxo puede pasar cualaquier cosa. Como dicíemos más arriba, Mónaco ye l’escenariu onde too ye posible. Antaño yá vimos a Marussia sumar puntos, l’añu pasáu a Pascal Wehrlein y asina un llistáu llargu de pilotos d’equipos de la parte baxo de la tabla qu’atoparon equí la so oportunidá de brillar. Tamos pensando nesti casu particular no que vaigan poder facer en Williams o Sauber, sobre too nel casu de los últimos viendo que’l so rendimientu nun dexa d’ameyorar.

Pel mediu cásique tolos equipos tarán frotándose les manes pensando nel bon puñáu de puntos que puen atropar equí y la so importancia pa les carreres vinientes.

Pero primero de que too se decida, lleguen los llibres y la sesión de clasificación. Alcordaivos que Mónaco ye especial en tolos sentíos y les tandes de llibres de los vienres fáense en xueves. Asina qu’estos son los horarios pa esta fin de selmana:

XUEVES 24/05/2018

LLIBRES 1: 11:00
LLIBRES 2: 15:00

SÁBADU 26/05/2018

LLIBRES 2: 12:00
CLASIFICACIÓN: 15:00

DOMINGU 27/05/2018

CARRERA: 15:10

Si queréis más información sobre’l circuitu de Montecarlo, equí podéis atopar tolos datos y embaxo vos dexamos tola información sobre les gomes que vamos ver pa esta carrera.

Dempués de dos selmanes de descansu, torna la Fórmula Uno. Esta vegada toca aterrizar en Catalunya, nel circuitu de Montmeló, escenariu bien conocíu pa los pilotos por ser au se suelen facer los test de pre-temporada.

Quinta carrera que llega col pesu de consiguir superar lo que se vió n’Azerbaixán. Montmeló nun suel ufrir carreres apasionantes, si nun cuntamos na hestoria reciente de Mercedes l’incidente na primer vuelta de los dos pilotos Nico Rosberg y Lewis Hamilton que los dexó a dambos fuera a les primeres de cambiu. Daquella tovía les coses nun fervíen como lo fadríen más alantre, pero ye quiciás una de les alcordances que nos trai esti gran premiu a la memoria a poco que pensemos.

Siempre que nuna carrera vivimos dalgo que nos dexa cola boca abierta (el mentáu accidente sedría un exemplu) suel pasar que, na siguiente, tamos pendientes dafechu de los protagonistes pa ver si de dalguna manera vuelven a entamala. Esti honor correspuende por méritu propiu a Red Bull nesta ocasión dempués de ver a los sos dos pilotos fuera nel anterior gran premiu y de que l’equipu tenga confirmao que nun va usar les órdenes d’equipu p’aselar les coses ente ellos. Ésta suel ser una decisión popular ente la xente porque naide nun quier ver a dos pilotos que nun puean competir anque lleven el mesmu coche pero tamién ye verdá que munches vegaes los equipos terminen arrepintiéndose de tomala. El domingu tendremos la oportunidá de saber si Horner acertó o non.

Tán les coses más calmes nos garaxes de los dos rivales más direutos del equipu del toru coloráu. Mercedes llega a Barcelona entá col tastu de la victoria nel lláu de Lewis Hamilton y col chip yá cambiáu nel de Bottas pa poder compensar la deceición que foi Azerbaixán pa elli. Pa pone-yos les coses complicaes enforma tará Ferrari tamién con ganes d’ocupar otra vegada’l caxón más altu del podiu.

Ye mui probable que nun haiga munches sorpreses no que veamos el sábadu na sesión de clasificación nin en carrera. Como diximos, los grandes premios en Montmeló suelen ser relativamente predicibles. De toles formes, son munchos los equipos que nun quieren dir confiaos porque la realidá qu’amosó Azerbaixán nun tien nada que ver colo que vamos ver esti finde. Ye’l casu de Force India, qu’anque paez que dieron un saltu alantre, entá nun son nin la solombra de lo que vimos en 2017. Renault tarán encantaos de complica-yos les coses, sobre too porque nun dexen de dar pasinos con cada carrera y anque agora mesmo tán per detrás de McLaren na clasificación de constructores ocupando la quinta posición, namás necesiten dos puntos pa ponese perriba d’ellos.

La escudería de Woking, pela so parte, buscará siguir na dinámica positiva de puntos que, ensin ser la situación ideal, cada vegada convence más a la xente de que dexar Honda pa dir con Renault foi una bona idea. Sobre too si pensamos na situación de Toro Rosso hasta agora. Gasly trunfó nel desiertu, pero nun pudo nin siquiera puntuar nos dos siguientes y anque Hartley yá sumó’l so primer puntu na Fórmula Uno en Bakú, entavía-yos queda muncho que facer.

Podemos dicir lo mesmo de Williams. Sirotkin tien tres posiciones de penalización pa esti gran premiu dalgo que yá condiciona enforma la so carrera. Stroll pel so lláu buscará repitir les bones sensaciones del pasáu gran premiu. Ye curioso pensar na situación na que s’atopa esti equipu nesti 2018 si pensamos qu’hai dellos años Pastor Maldonado ganaba esti gran premiu precisamente con ellos. Nun tán pasando per una bona racha y amás tán atopándose con que Sauber sí que ta consiguiendo puntos esti añu. Primero con Ericsson y llueu con Leclerc, yá son dos les carreres que l’equipu suizu tien puntuao, dalgo que yá en sí ye más positivo que tolo que se vio nel 2017. Y nun olvidemos qu’esti ye’l quintu gran premiu de la temporada.

Nun queremos terminar ensin facer una mención especial a Haas y la temporada que tamos viendo hasta agora. Nun hai dulda de que’l coche tien potencial y capacidá pa tar dientro de los puntos. Otra cosa ye que los sos dos pilotos seyan quien a consiguilo. L’accidente de Grosjean n’Azerbaixán, qu’entavía tamos intentando entender, amuesa la so falta de concentración y la so incomodidá n’un coche que nun consigui manexar como quier. Nel otru lláu del garaxe, Magnussen paez tar más contentu, anque sigui na so llínia de tar metíu en tolos incidentes que pasen nos grandes premios, dalgo que d’una o d’otra manera termina torgando les sos carreres. De momentu tán na parte baxo la tabla pero puen aspirar a muncho más polo que tenemos visto hasta agora. El coche respuende, agora falta que lo fagan tamién los pilotos.

Tornamos al típicu horariu européu pa esti gran premiu anque, alcordaivos de que se retrasen toles sesiones una hora con respeutu a temporaes pasaes y la carrera una hora y diez minutos:

VIENRES 11/05/2018

LLIBRES 1: 11:00
LLIBRES 2: 15:00

SÁBADU 12/05/2018

LLIBRES 3: 12:00
CLASIFICACIÓN: 15:00

DOMINGU 13/05/2018

CARRERA: 15:10

Equí vos dexamos tola información sobre’l circuitu de Montmeló, escenariu d’esti quintu gran premiu de la temporada y a continuación la información sobre les gomes escoyíes.

Dicíemos al zarrar la previa del gran premiu d’Azerbaixán que suel ser un gran premiu que da muncho de sí pesie a llevar namás que dos años (agora tres) nel calendariu. Al mesmu tiempu pensábemos que siempre se da’l fechu de que, cuando más enfotu pones en que vaiga a ser entretenida una carrera, termina siendo aburrida ya poco vistosa. El domingu tuviemos la suerte de que nun fuere asina y de ver, otra vegada más, una d’eses carreres que te faen tar pendiente de la pantalla tol tiempu que dura.

Con tolo visto’l sábadu, podíemos albidrar que Ferrari taben n’una posición de poder marchar cola carrera. Vettel consiguió la pole na clasificación con sorprendente facilidá pa lo que esperábemos pero siendo’l más listu ya aprovechando lo complicao que ye’l circuitu y los errores d’otros pilotos (equí puede vese la vuelta). Räikkönen tuvo na so mano esa pole pero un error nel últimu puntu del circuitu dexaríalu sextu. Los Mercedes salieron segundu y terceru, con los dos Red Bull xusto per detrás. L’equipu del toru coloráu decepcionó bien pa lo que s’esperaba d’ellos que yera tar dalgo más cerca del primeru puestu. Force India dieron un saltu de calidá, esperáu, y metieron dambos coches nos puntos, mesmo que los dos Renault. Pela parte baxo, McLaren tuvieron una clasificación bastante decepcionante, Leclerc consiguió clasificar décimocuartu, la so meyor sesión hasta agora y Grosjean volvió a tener un sábadu accidentáu y terminó saliendo últimu.

El domingu alboreció con unes condiciones meteorolóxiques bastante meyores de lo que s’esperaba. L’agua nun apaeció y facía munchu aire. La salida al gran premiu foi sorprendentemente llimpia, a lo menos los primeros metros onde s’esperaba qu’hubiere bastantes más toques de los que se vieron. De toles formes, sí que víemos que dalgún coche perdía cachos del chasis al tocar a otru y sedría un poco más alantre cuando viémos los primeros problemes. Ocon diba ser el primer sacrificáu. En paralelo con Räikkönen dexó pocu espaciu al finlandés nun intentu d’impidir que lu adelantare y terminó viendo como yera emburriáu por elli y diba escontra la muria. Ocon quedaba fuera y Kimi tendría de visitar los pits. Un pocu dempués, Sirotkin apaecía como’l siguiente abandonu de la carrera demientres Fernando Alonso tinía de parar coles dos gomes dreches pinchaes. Les repeticiones amosaben como dambos pilotos se tocaben (Sirotkin intentó evitar tocase con un coche que lu adelantaba pela drecha, el Renault d’Hülkenberg, y terminaría contra Alonso). El coche de seguridá tendría de facer apaición cortando un pocu’l ritmu a Vettel que yá metiera distancia abondo ente elli y Hamilton.

La salida foi tranquila nos puestos d’arriba. Vettel nun tuvo nengún problema pa defender la so posición y per detrás nun hebo nengún cambiu tocante al orde de salida. Tres del coche de seguridá, Vettel facía una nueva arrancada que dexaba casi clavaos a los sos rivales y lu ponía en bona posición pa siguir alantre a pola victoria.

Per detrás, hebo un ritmu frenéticu d’adelantamientos, protagonizaos na so primer parte polos dos Renault. Una de las imaxes de la carrera tien de ser un doble adelantamientu de los pilotos Renault a los dos pilotos Red Bull n’una de les rectes del circuitu. Ye un exemplu gráficu de que Renault nun dexa d’ameyorar carrera tres carrera ya qu’en determinaos circuitos pue llegar a desafiar al que teóricamene ye l’equipu más fuerte de los que ye motorista.

Hebo un periodu de carrera na que la situación estabilizó y na que tol mundo empezó albidrar que lo que tábamos viendo diba ser el resultáu final. Leclerc y Stroll siguíen metíos en puntos, anque nun sabíemos cuanto diba durar. Hülkenberg nun diba durar muncho dientro d’ellos y terminaría sumándose a los yá retiraos Sirotkin y Ocon.

Los pilotos Red Bull siguíen na so llucha particular por facese col cuartu puestu en carrera cuando, nel mesmu puntu qu’enantes víemos a Renault adelantalos, una maniobra de Verstappen, que foi bastante criticada, y una falta de reflexos de Ricciardo terminaba col australianu emburriando al so compañeru d’equipu y con dambos coches fuera de carrera. Les cares en Red Bull dicíenlo too, sobre too nel llau del pilotu holandés al que tanto se ta cuestionando poles sos actuaciones en carreres pasaes.

L’accidente de Red Bull provocó que volviera a salir el coche de seguridá, dalgo qu’aprovechó Bottas pa facer la so parada. Hasta esi momentu’l pilotu finlandés decidiera prolongar el so períodu enantes de parar, enfotáu en qu’otru accidente puediera obligar al coche de seguridá a salir. Viendo les sos esperances facese realidá, fexo la so parada y beneficiándose de dir con neumáticos meyores, púnxose a tiru de victoria.

Enantes de comentar el final inesperáu de la carrera, ye importante rescamplar l’actuación de Pérez, Sáinz y Leclerc, que siguíen tando dientro los puntos. Amás, Grosjean quedaría fuera de carrera demientres el coche de seguridá rodaba peles cais de Bakú, n’una maniobra qu’entovía nun llegamos a entender nin nosotros nin el propiu pilotu. El so incidente nun causó más que l’allargamientu del coche de seguridá en pista.

Al rellanzase la carrera, Vettel intentaría pasar a Bottas, pasándose de frenada y dexando la puerta abierta pa que’l finlandés siguiera alantre y los pilotos que viníen per detrás lu pasaren, esto ye Hamilton y Räikkönen. Al pocu, por cuenta les gomes dañaes, terminaría pasándolu tamién Pérez.

Quedaben un par de vueltes, Bottas yera llíder sólidu y yá paecía tocar el primer puestu cuando la goma de la so rueda drecha trasera reventaba, obligándolu a abandonar la carrera y dexando la victoria en bandexa al so compañeru d’equipu Lewis Hamilton, que taba xusto per detrás. Victoria pues pa Mercedes y Hamilton qu’agora llidera’l campeonatu de pilotos mientres que Mercedes se pon a un puntu de Ferrari nel de constructores.

Per detrás acompañaron al pilotu inglés nel podiu Kimi Räikkönen que, ensin facer grandes coses en carrera y dempués del incidente con Ocon, terminaría faciéndose con un bon segundu puestu, y de Pérez, únicu pilotu en parrilla con dos podios en Bakú y, actualmente, meyor pilotu mexicanu de la hestoria. L’últimu caxón del podiu sedría pa elli, confirmando’l saltu que Force India vinía necesitando.

El cuartu sedría Vettel, que dicía que nun s’arrepiente del movimientu que fexo sólo de que nun funcionara. Per detrás llegaría Sáinz, con un quintu puestu que ye’l so meyor resultáu hasta la fecha con Renault y, xusto per detrás, Charles Leclerc. El pilotu monegascu de Sauber amosó que sí, que’l so equipu esti añu ta rindiendo meyor y, anque s’aprovechó de les desgracies d’otros pa dir escalando posiciones, tuvo una carrera mui sólida y siempres tuvo dientro de los puntos. El McLaren de Fernando Alonso entraría sétimu, compensando un poco polos problemes del principiu ya’l so compañeru diba ser novenu dempués d’una fin de selmana bastante negativa nel so llau del garaxe. Pente medies de dambos McLaren, el Williams de Lance Stroll, al que se-y da bastante bien esti circuitu. L’equipu de Grove tuvo d’esperar cuatro carreres pa consiguir los sos primeros puntos, dos. Siguen siendo últimos pero de xuru qu’estos dos puntos van vali-yos como motivación pa les carreres vinientes.

Otru que sumaría per primer vegada ye Brendon Hartley. Los Toro Rosso nun tuvieron una carrera tranquila, pero’l pilotu neozelandés consiguió ponese décimu y sumar asina un puntu valiosu pal so equipu ya’l so primer puntu en Fórmula Uno. Per detrás, entraríen Ericsson, Gasly y Magnussen, qu’anque tuvo gran parte de la carrera dientro los puntos, un incidente con Ericsson penalizaríalu con diez segundos, faciendolu quedar décimoterceru.

Foi una gran carrera que, anque ganada por un Mercedes (que podría ser hasta ciertu puntu esperable), nun dexó de sorprendenos de principiu a fin. Les mires tán puestes agora en Cataluña, dientro dos selmanes, pala quinta carrera de la temporada. Demientres llega’l día, equí tenéis tolos númberos que nos dexó la fin de selmana y los resúmenes oficiales de la clasificación y la carrera:

Clasificación

Carrera