Category: Carreres

Les persones que siguen considerando la Fórmula Uno aburrida con tolos cambios que la vienen calterizando van quedando ensin argumentos gracies a les carres que tamos viendo. Alemaña foi otru exemplu d’ello. Vettel paecía tener casi la victoria nes manes, con una pole casi perfeuta onde Hamilton nun pudo más que calificar décimocuartu por culpa d’un problema hidráulicu que lu dexó fuera na Q3 el sábadu. Nun paecía que naide pudiera poner n’apuros al pilotu alemán nin siquiera Bottas que fexo una vuelta perbona y tampoco’l so compañeru d’equipu, Kimi Räikkönen que clasificó terceru. Pero les coses nunca nun son como pinten ya esto comprobémoslo’l domingu.

La carrera llegó baxo amenaza d’agua y colos equipos mirando pa los sos monitores y pal cielu al mesmu tiempu. Con Hamilton tan lloñe, Vettel namás tuvo que preocupase na salida de defendese de Bottas y de Räikkönen y rápidamente punxo distancia pente ellos. Como yá vimos en Silverstone, Hamilton tuvo bastante cenciello’l dir desfaciéndose de rivales en pista, mesmo que Ricciardo, qu’empecipió la carrera tamién atrás por cambiu de delles pieces del coche.

Les primer vueltes fueron bastante monótones, colos equipos namás faciendo lo que s’esperaba d’ellos, too saliendo según lo que se prevía y ensin agua. Ricciardo foi’l primer abandonu de carrera, una vegada más por problemes col coche. Ta claro que l’australianu nun ta teniendo nada de suerte esti añu y sobre too agora que ta pendiente de saber si sigui con Red Bull o mira pa otru llau.

Hamilton amosó un bon control de los neumáticos comparao colos sos rivales, sobre too nel momentu en que l’agua empezó a cayer. Foron munchos los pilotos que rápido cambiaron gomes optando poles intermedies, pero’l pilotu inglés consiguió caltener el ritmu coles sos ultrasoft.

Cuando yá pensábemos que la carrera nun tenía pa más Sebastian Vettel cometió un erru d’esos que nun suel facer y que cuesten carreres. Yera llíder de carrera cuando n’una curva nun xiró y terminó escontra les barreres. Foi un duru golpe pa elli como pudimos ver pola so reaición dientro’l coche y al sintilu pela radio falando col equipu. Nesi momentu Hamilton entá nun yera primeru pero nun tardó en selo dempués d’un pocu de batalla col so compañeru Bottas y de que Mercedes decidiera intervenir pa que’l finlandés nun intentara recuperar el llideralgu de carrera. Hamilton atopó consuelu nesta victoria dempués de la deceición de nun ganar en Silverstone. Ye curioso que lo faga precisamente en casa de Vettel dempués de que’l pilotu alemán lo ficiera na de so va dos selmanes.

Hamilton recupera asina’l primer puestu nel campeonatu de pilotos, qu’agora llidera con diecisiete puntos perriba Vettel. Nel de constructores, Mercedes pasa a Ferrari y pon ocho puntos pel mediu.

Räikkönen consiguió terminar terceru pa compensar pola deceición de Ferrari con Vettel. Per detrás llegó Verstappen, ún de los primeros n’arriesgar col cambiu de gomes, que llegó a tar llíder pero que nun pudo arrimase al podiu.

Renault consiguió sumar otru puñáu de puntos con Hülkenberg, que pudo terminar quintu pesie a que Sáinz nun pudo namás que ser décimosegundu. La escudería francesa mete asina un pocu más de marxe a los perseguidores na clasificación. Siguen cuartos con ochenta puntos, a ventiún de Force India y Haas, qu’empaten con cincuenta y nueve. Force India puntuó con dambos pilotos, dalgo bien importante sobre too porque s’atopen agora mesmo nel centru de munchos de los rumores que siempre se xeneren demientres estes feches na parrilla.

Haas pel so lláu tuvo una bona sesión de clasificación el sábadu, pero’l domingu nun pudo puntuar con dambos pilotos, si non que foi Grosjean l’encargáu de sumar esta vegada. Magnussen nun tuvo una mala carrera, pero terminó desinflándose y quedó a les puertes de los puntos nel puestu once. Grosjean, pel so lláu, foi sestu.

Zarrando los puestos de puntos ta Marcus Ericcson que terminó novenu. Leclerc nun tuvo una bona carrera, nun se-y da bien l’agua, y tuvo problemes pa facer funcionar el so monoplaza cuando apaeció ésta en pista. Terminó nel puestu quince.

Nel puestu diez terminó Brendon Hartley, que consiguió un puntu que sabe a pocu si pensamos na necesidá dellos que tien esti pilotu que nun ta teniendo una temporada fácil. El so compañeru namás pudo terminar décimocuartu. Pesie a les bones promeses de principiu d’añu, les coses van diendo despacio na recién estrenada xuntanza Toro Rosso-Honda.

La mayor deceición volvió a vinir de la mano de McLaren y Williams. Los de Woking namás terminaron la carrera con Vandoorne, que tuvo un fin de selmana mui complicáu y que paez tar teniendo problemes col so coche que nun tán afeutando de la mesma forma al d’Alonso. L’asturianu nun pudo terminar la carrera y abandonó na última vuelta mientres que’l pilotu belga foi décimoterceru.

Williams pel so lláu nun vio la bandera a cuadros. Dambos pilotos abandonaron la carrera casi siguíos, sumando otru fin de selmana de fracasu pa la escudería inglesa.

Ensin descansu, dexamos Alemaña pa dir a Hungría, pal últimu gran premiu enantes de les vacaciones braniegues. Enantes de dirixinos al Hungaroring, equí vos dexamos tolos datos del sábadu ya’l domingu:

Clasificación

Videu colo más destacao

Carrera

Videu colo más destacao

La Fórmula Uno retorna a ún de los sos entornos míticos: Alemaña. Dempués de la so ausencia ya de ser oxetu de muncha especulación sobre la situación real d’esti eventu nel país, esti añu volvemos a Hockenheim. Dempués de dos selmanes de descansu aterrizamos nesti circuitu que nel pasáu nos dexó bones carreres.

N’un calendariu más apertáu qu’otres ediciones a les que tamos avezaos, llegamos al país de Mercedes, que lleguen con muncha necesidá d’una victoria en casa pa dexar un pocu de llau les dos últimes carreres. Naide nun puede confiase, y muncho menos Ferrari ya’l so pilotu principal, pero ta claro que Vettel llega con un aporte estra por correr en casa. Les coses nun tán funcionando de manera obvia en nengún circuitu asina que nun nos queda otra qu’esperar a ver qué pasa demientres estos tres díes pa dir xulgando.

Red Bull lleguen tamién con munches ganes de nun perder el filu de los puestos más altos. Nun quieren que’l campeonatu termine siendo cosa de namás dos equipos y anque paez que pasín ente pasu tán descolgándose, nunca nun ye bono facelos de menos pues suelen sorprender nos momentos nos que naide nun cuenta con ellos. De xuru van tar preparaos p’aprovechar el más mínimu erru de los pilotos de Mercedes y Ferrari, como yá vimos nel pasáu. Amás, Ricciardo sigui corriendo un pocu a mou de tarxeta de presentación yá que’l so futuru en Red Bull nun ta claru.

Pela parte media de la tabla hai munches ganes y munches duldes. Colos equipos qu’entamaron la temporada pior pasín ente pasu recuperándose, cada vegada tán les coses más apertaes. Renault tien, per agora, la meyor posición, cuartu nel mundial, pero Haas y Force India nun dexen de medrar. McLaren, Toro Rosso y Sauber van dando pasinos más curtios pero nun podemos dexalos fuera de la ecuación pues nunca nun se sabe cuando dalgún d’ellos puede metese en puntos. Williams llega a Alemaña, como a tolos grandes premios, cola necesidá vital d’a lo menos puntuar per primer vegada esta temporada. L’ánimu del equipu nun ye’l meyor, anque tán lloñe de ser los que más atención negativa tán recibiendo polos sos resultaos como sí ta pasando a McLaren. En Grove necesiten un emburrión tan pronto como puedan pa nun sintir qu’esta temporada foi un desastre absolutu. Tienen en Hockenheim una oportunidá nueva.

Los horarios d’Alemaña son los normales del tour européu de la Fórmula Uno:

VIENRES 20/07/2018

LLIBRES 1: 11:00
LLIBRES 2: 15:00

SÁBADU 21/07/2018

LLIBRES 3: 12:00
CLASIFICACIÓN: 15:00

DOMINGU 22/07/2018

CARRERA: 15:10

Equí podéis atopar tola información sobre’l circuitu alemán y debaxo les gomes escoyíes pa esti gran premiu:

Quiciás ún de los suaños de quien sigui la Fórmula Uno, aparte de dir a tolos circuitos posibles, seya ver una gran carrera n’un circuitu míticu. Creo que nun nos equivocamos si dicimos qu’eso foi lo que vimos esti fin de selmana en Silverstone.

Yá dende los llibres foi obvio qu’esti añu nun diba tar too tan claro a favor de Mercedes y que Ferrari llegaben fuertes. El sábadu Hamilton consiguió la pole por un marxe bien pequeñu, como yá pasó n’Australia cola de Bottas, con Vettel y Räikkönen bien cerca. Mercedes diben fuerte, pero los coches coloraos tamién. La sesión del sábadu nun dexó munches sorpreses más allá d’otra deceición pa Williams, que cásique nin tomaron parte d’ella. Brendon Hartley nun pudo participar dempués d’un accidente na tercer sesión de llibres onde rompió la suspensión del coche y acabó nes barreres. Alonso fue quien esta vegada meter el so McLaren na Q2 anque non el so compañeru Stoffel Vandoorne. Otru sábadu pa dexar nel escaezu.

Nun tuvimos una salida tranquila. Vettel confirmó que diba fuerte cuando nun tardó en ponese en primer llugar, mientres qu’Hamilton tinía una salida bastante probe que terminó siendo desastrosa dempués d’un incidente con Räikkönen que con un error al frenar pegó col pilotu inglés. Paecía que too terminaba pa Hamilton, pues nesi momentu pasó a ser últimu na clasificación mientres que Vettel metía distancia a Bottas y los Red Bull.

Dende ehí la carrera pa Hamilton convirtióse n’una serie d’adelantamientos onde quedó claro la superioridá del so Mercedes en comparanza col restu de la parrilla, viendo la facilidá cola que perpasaba a los demás pilotos en pista. Siendo la carrera en seco, taba nes sos manes y nel potencial del monoplaza consiguir remontar tolos puestos perdíos.

Na mesma salida tamién tuvimos un incidente de Sergio Pérez que pudo terminar pior cuando’l pilotu mexicanu terminó con un trompu mirando pal carril de salida de boxes per onde salíen los dos Williams y Hartley. Los tres pilotos y los sos equipos decidieronde trabayar nos sos coches pa intentar ameyorar la so situación y por eso salíen dende’l pitlane. A la fin quedó en nada y Pérez foi otru de los que tuvo que lluchar por consiguir adelantar posiciones en pista pa compensar esi problema de la primer vuelta.

Vettel paecía tener controlada la carrera y too indicaba que díbemos a tar énte una carrera a una parada. Ensin embargu, nun diba ser too tan tranquilo pal pilotu alemán. De primeres, Leclerc quedó fuera de carrera dempués de dir rodando en puntos tola carrera. Un erru na so parada onde nun-y fixaron bien la rueda trasera drecha lu obligó a abandonar.

Yá na segunda mitá de la carrera, Ericsson tuvo un accidente, bastante aparatosu y nel mesmu sitiu que munchos otros de los que vimos demientres el fin de selmana, que fexo que’l coche de seguridá saliera a pista. Nun foi una bona carrera pa Sauber. Tolos pilotos de cabeza menos los dos Mercedes aprovecharon pa entrar en boxes, lo que dexó a Bottas llíder y a Hamilton en tercer posición detrás de Vettel dempués de qu’esti ficiera la so parada.

Los Red Bull, seliquino, intentaron aprovechar los erros de la primer vuelta y Verstappen rodó bien de tiempu en tercer llugar, pero nun tuvo de cara la suerte y tuvo de lluchar pola tercer posición con un Räikkönen con gomes nueves ya’l coche dalgo tocáu pol incidente de la primer vuelta. Seya como fuere, nun foi la carrera del holandés que tuvo delles visites a los márxenes del circuitu y terminó abandonando dempués de facer un trompu que lu metió na gravilla y con problemes nel sistema llétricu de frenáu.

Pela parte media de la tabla, los intercambios de posición fueron constantes, con Force India, Renault, McLaren y Haas entrando ya saliendo de los puestos que dan puntos vuelta tres vuelta.

Dempués de que’l coche de seguridá abandonara la pista ya se rellanzase la carrera, los Ferrari volvíen a atacar y los Mercedes a defendese, sobre too nel casu de Bottas que tinía a Vettel mui cerca cola intención de facese otra vuelta col llideralgu de carrera. Fueron delles vueltes intenses con Mercedes y Ferrari de protagonistes y los dos Red Bull, enantes del trompu de Verstappen, d’espeutadores.

Seis vueltes más tarde, na treinta y siete, el coche de seguridá tornaría a pista dempués d’un accidente entre Grosjean y Sáinz que dexó a dambos pilotos fuera. Sáinz tuvo munchos problemes demientres tol fin de selmana y andaba cerca de los puntos enantes del so accidente col francés, que tuvo meyor vienres y sábadu que domingu.

Col coche de seguridá en pista, tornaba’l reagrupamientu, y la batalla pol llideralgu. Bottas amosó la so habilidá pa retener a los coches ya llueu escapar d’ellos nel rellanzamientu de carrera, anque nesta segunda ocasión nun-y diba a servir pa muncho pues Vettel, dempués de delles vueltes preparándolo, terminó adelantándolu. Con Vettel vieno Hamilton, al que dexaría pasar y Kimi, col que nin siquiera pudo lluchar porque les sos gomes taben desfeches. La siguiente amenaza foi Ricciardo, pero l’australianu quedó ensin tiempu pa poder adelantalu y facese col cuartu puestu.

Per detrás d’ellos, el sestu llugar foi pa Hülkenberg, que suma un bon puñáu de puntos n’un gran premiu nel que nun diben demasiao bien y pa compensar pol abandonu de Sáinz. Ocon foi sétimu n’una gran carrera del pilotu francés que devuelve a Force India a los puntos. Alonso consiguiría ser octavu tres adelantar a Magnussen na última vuelta, sumando cuatro puntos fundamentales pa elli y pal equipu. El pilotu danés sedría l’únicu n’atropar puntos pal so equipu dempués del incidente de Grosjean. Zarrando los puntos quedó Checo Pérez tres recibir Gasly una penalización de 5 segundos por un incidente na parte final de la carrera que lu dexaría decimoterceru en favor del pilotu mexicanu y Stoffel Vandoorne que, pela so parte, sigui ensin sumar puntos. Los dos Williams tornaron a quedar na última parte del paquete siendo los únicos doblaos, con Stroll y Sirotkin decimosegundu y decimocuartu respectivamente.

Foi una gran carrera, d’eses que nun dexen de xenerar opinión, comentarios y que sobre too nun dexaron sitiu nengún pal aburrimientu. Munches vegaes falamos de grandes premios que se faen llargos porque nun pasa nada, pero podemos dicir qu’estes tres carreres siguíes, aparte de suponer un esfuerciu estra pa tola xente que trabaya dientro del mundu formuleru, nos dexaron con un perbón tastu.

Mientres esperamos a que pasen dos selmanes hasta que llegue’l prósimu gran premiu n’Alemaña, nel circuitu de Hockenheim, equí vos dexamos tolos númberos que dexaron el sábadu ya’l domingu y los videos de los resúmenes de la clasificación y la carrera:

Clasificación

Carrera

Ensin respiru d’una selmana pa otra, aterrizamos en Silverstone pal tercer ya últimu gran premiu d’esta tanda de tres qu’empezó con Francia. La Fórmula Uno llega a ún de los sos circuitos más tradicionales y preferíos por fans, equipos ya pilotos.

Y llegamos a Gran Bretaña coles noticies de cambiu en McLaren. Demientres esta selmana que ta a piques de terminar, recibimos la noticia de qu’Eric Boullier, hasta agora direutor d’equipu de la escudería de Woking, dexaba’l so puestu siendo’l primeru d’una serie de movimientos dientro de McLaren que busquen sacar al equipu de la so situación actual. La so colaboración con Honda nun resultó como esperaben y la realidá ye que toles acusaciones que recibió’l xigante xaponés paez que nun tán xustificaes cuando agora, con Renault, McLaren tampoco nun ta consiguiendo resultaos positivos más allá de delles carreres puntuales y más por méritu de los pilotos que por rendimientu del coche. Taba claro que’l primeru en cayer diba ser Boullier yá que la so direición del equipu nun taba convenciendo a naide y nes últimes carreres viose asediáu per tolos llaos, especialmente pela prensa. El so puestu ocúpalu agora Gil de Ferrán ya entren tamién na ecuación Simon Roberts, qu’enantes yera xefe d’operaciones de McLaren Racing y agora va encargase de producción, inxeniería ya loxística del equipu, y tamién dalguien que los fans de Ferrari y de Fernando Alonso conocen bien, Andrea Stella, que ye agora direutor de rendimientu. Nun sabemos si estos cambios tendrán efeutu inmediatu pero ta claro que’l pasu tiníen de dalu. A curtiu plazu tienen que pensar na carrera de Silverstone, el so gran premiu en casa onde necesiten dar una bona imaxe pa, por fin, dar pasos alantre na so meyora.

Nel restu de la parrilla les coses tán relativamente más tranquiles. Mercedes busca en Silverstone quitase la sensación de derrota dempués del gran premiu d’Austria y recuperar el llideralgu en dambos campeonatos, mientres que Ferrari busca, pol contrariu, siguir nesa llínia y sumar otra victoria que permita a Vettel afianzase nesa primer posición. Al duo de cabeza súmase Red Bull, con ganes de nun perder el filu dempués de la gran victoria de Verstappen en tierres austriaques.

La zona media de la tabla ta cada vegada más interesante, con Renault lliderando y mirando de regüeyu lo que faen los sos persiguidores. Haas van buscar repitir l’ésitu d’Austria, onde supieron aprovechase de les desgracies de los equipos d’arriba pa facese con un puñáu de puntos perimportante pa los sos intereses nel campeonatu ya, sobre too, pa la moral de los pilotos y l’equipu en xeneral.

Toro Rosso, anque nun tán teniendo demasiada suerte últimamente, ya especialmente non nel llau de Brendon Hartley, tienen cerca a McLaren ya unos pocos de puntos pondríenlos per delantre del equipu de Woking mientres Sauber, seliquino, sigui sumando puntos y averándose a ellos na clasificación. Williams siguen nel pozu intentando consiguir una bona actuación que los ayude a sumar puntos, vitales pa ellos y seya un emburrión importante na moral de tola xente que ta nel equipu.

Nun hai sorpreses colos horarios en Silverstone:

VIENRES, 06/07/2018

LLIBRES 1: 11:00
LLIBRES 2: 15:00

SÁBADU, 07/07/2018

LLIBRES 3: 12:00
CLASIFICACIÓN: 15:00

DOMINGU, 08/07/2018

CARRERA: 15:10

Equí vos dexamos tola información sobre Silverstone y más abaxo les gomes escoyíes pa esti fin de selmana:

Presten enforma les carreres que son entreteníes y que dan espectáculu y vemos a los pilotos dando’l 100% de sí mesmos. Pero presten más entá les carreres que, de forma inesperada, terminen siendo de lo meyor que se vio na temporada. Ye esta quiciás una forma de desplicar lo que vimos n’Austria esti añu.

Dende bien ceo’l vienres, Mercedes tiníen tomada la midida al restu de pilotos, ocupando los dos primeros puestos en toles sesiones y faciendo lo mesmo’l sábadu. Bottas repitió la pole del añu pasáu, dexando al so compañeru segundu. Vettel tendría de conformase con ser terceru y, dempués de la deliberación de los comisarios, sestu por estorbar a Sáinz cuando facía vuelta na Q2. Del restu podemos destacar, otra vegada más, el desastre de McLaren y Pérez, fuera de Q1.

El domingu, con un tiempu bastante más soleyeru que lo que vimos el restu del fin de selmana, too indicaba que díbemos a ver a un pilotu Mercedes no cimero del podiu ya, casi de xuru, a otru nel segundu o tercer caxón. La dulda yera quien. La salida foi intensa con Räikkönen a piques de facese cola primer posición dende bien ceo y faciendo un sandwich de sí mesmu con dambos Mercedes arrodiándolu. Hamilton foi quien meyor salió d’esa primer batalla, pues se fexo cola primer posición, mientres que Räikkönen tuvo de confirmase con quedar segundu y Bottas perdió varies posiciones que nun diba tardar en recuperar.

Con dambos Mercedes nel primer y segundu puestos, vímoslos rápidamente meter tiempu a los sos persiguidores: Verstappen consiguió metese terceru adelantando a Räikkönen y decidíu a complicar les coses a les fleches platiaes. Ricciardo pel so lláu intentaría ponese a tiru de podio adelantando al Ferrari. Vettel, na sesta posición, nun fexo grandes coses neses primeres vueltes, y de fechu tuvo una salida bastante probe de la que tuvo de recuperase adelantando a los Haas.

Nico Hülkenberg foi la primer víctima d’esti gran premiu cuando’l so motor Renault lu dexó fuera de carrera. Poques vueltes más tarde, diba ser el turnu de Valtteri Bottas, que n’otru día de mala suerte, tuvo problemes de presión hidráulica que lu obligaron a abandonar. El so abandonu provocó un coche de seguridá virtual que casi tolos pilotos de los primeros puestos, aprovecharon pa parar, menos Hamilton y Magnussen. El pilotu británicu rápidamente espresó les sos duldes sobre la decisión y l’equipu un pocu dempués almitió que foi un erru’l que nun parara. Un pocu más tarde vimos hasta qué punto foi una equivocación pues, a la hora de parar y salir de boxes, Hamilton colocóse cuartu per detrás del Red Bull de Ricciardo y con Vettel xusto per detrás.

Falando del Red Bull de Ricciardo, elli foi’l siguiente n’abandonar la carrera. Diba terceru nel momentu que vimos un pocu fumu salir del so coche. Paecía que namás fuera eso pero al pocu tiempu’l pilotu australianu tuvo de retirar el coche. Nun pasaríen munches vueltes hasta que viéremos a Brendon Hartley, que güei estrenaba motor, teniendo tamién qu’abandonar la carrera por problemes col coche. Honda va tener que mirar con lupa qué problemes tuvo’l neozelandés nel monoplaza.

Hamilton llegó a tener que parar dos vegaes, y diba buscando adelantar a la xente que tinía per delantre cuando’l so coche tamién decidió dicir basta. Ye’l primer doble abandonu de Mercedes dende’l que vimos en Barcelona 2016 y bastante significativu porque supón que Lewis Hamilton dexa de ser llíder del mundial de pilotos qu’agora llidera Vettel por un puntu. Tanto l’alemán como’l so compañeru Kimi Räikkönen firmaron una bona carrera que fai que Ferrari adelante a Mercedes nel campeonatu de constructores y se ponga diez puntos per delantre. Räikkönen terminó la carrera segundu mientres que Vettel foi terceru.

La victoria foi pa Max Verstappen, que dende que se punxo primeru nun tuvo nengún tipu de problema nin col manexu de les gomes, como-yos pasó a casi tolos demás pilotos, nin col coche en sí, anque de xuru taba preocupáu polos problemes de Ricciardo nel otru monoplaza. Ye una victoria perimportante por ser en casa pal equipu y casi pal pilotu pola gran cantidá de fans holandeses que vinieron a apoyalu.

Tres l’abandonu de Hamilton, nun hebo grandes cambios y lo más interesante tuvo pela parte media de la tabla. Los dos Haas aprovecharon les desgracies de los grandes equipos pa quedar cuartu (Grosjean) y quintu (Magnussen) firmando una perbona carrera que los coloca quintos nel mundial. Per detrás, Force India intentó colos sos pilotos ponese per delantre del equipu estauxunidense (hebo órdenes d’equipu de fechu) pero nun fueron quien, y terminaron con Ocon nel puestu sestu y Pérez nel sétimu. Teniendo en cuenta la mala sesión de clasificación del mexicanu’l sábadu, esi sétimu puestu ye entá más valiosu.

Pa completar los tres últimos puestos que dan puntos, tres pilotos colos que naide nun cuntaba: Alonso, que dempués de salir del pitlane consiguió meter el so coche na octava posición y los dos Sauber, con Leclerc per delantre en novena posición, que llevaben ensin sumar puntos con dambos coches dende’l gran premiu de China de 2015. Nel casu de McLaren, anque sumen un par de puntos importantes, pierden la so quinta posición nel mundial de constructores, al ser adelantaos por Haas. Vandoorne tuvo d’abandonar dempués de que la so carrera se viera condicionada dende bien temprano con un incidente na salida que lu obligó a pasar por boxes enantes de tiempu.

Fuera de puntos, tenemos a Gasly, que nun pudo más que ser undécimu y foi adelantáu nes últimes vueltes polos dos Sauber. Toro Rosso ta pasando una época difícil, especialmente nel llau de Hartley que nun termina de cuayar una bona carrera. Per detrás llegó Sáinz, nel puestu doce, con un gran premiu bastante complicáu pa elli por problemes coles gomes ya ensin puntos. Renault siguen cuartos nel mundial de constructores pesie a nun sumar güei. Pa zarrar, los dos pilotos de Williams que siguen na so dinámica negativa y paez qu’ensin perspectives d’ameyorar nel plazu más inmediatu. Stroll terminó nel puestu trece y Sirotkin nel catorce.

Termina pues un fin de selmana n’Austria con una carrera que dexó un meyor tastu de lo que s’esperaba. Toca agora dirixinos a ún de los circuitos más míticos del calendariu: Silverstone. Pero enantes, equí vos dexamos tolos númberos del sábadu y del domingu y los resúmenes en videu de la clasificación y la carrera:

Clasificación

Carrera

Ensin malpenes descansar de lo que pasó nel circuitu Paul Ricard, yá tamos mirando pa Spielberg, pal Red Bull Ring, onde va disputase la novena carrera d’esta temporada 2018. Aterrizamos en territoriu Red Bull pal segundu de la primer tanda de tres grandes premios siguíos que vamos tener esti añu. Ye esti un circuitu que nel pasáu tiennos dao carreres curioses y au Red Bull tien más que nunca la obligación y les ganes de ponese les piles pa nun dexar escapar a los dos equipos de la cabeza.

Anque consiguieron un podiu hai una selmana, nunca nun ye suficiente cuando lo que quies ye adelantar a los tos principales rivales. Agora mesmo ye Mercedes quien manda en dambes clasificaciones, pero saben que Ferrari nun va poner les coses fáciles y de fechu, viendo como se ta desendolcando esti añu’l campeonatu, ye hasta posible que marchemos d’Austria con un llíder distintu.

Falóse muncho de l’actuación de Vettel en Francia, de los sos erros y de les penalizaciones recibíes. Nel lláu de Mercedes, lóxicamente, consideraron que los cinco segundos que recibió pol accidente con Bottas nun fueron bastante ya incluso Verstappen dio la so opinión dempués de que tenga sío elli centru d’atención precisamente pola so forma de conducir.

Seya como seya, Austria ye un asuntu distintu, una oportunidá más pa siguir sumando puntos y nun dexar que naide s’escape. Nin per delantre, nin pela parte del medio. Renault tuvo una actuación bona en Francia, anque non col resultáu que deseyaben dempués de los problemes de Sáinz a última hora. Son los meyor posicionaos de los equipos medianos y Austria preséntase como la ocasión perfeuta p’amosar que lo de Sáinz foi un casu de mala suerte non de falta de fiabilidá, y de que pueden afianzase nesa posición.

Y diríamos qu’agora mesmo pueden tar tranquilos. Entavía nun vimos los coches en pista, pero les carreres pasaes fáennos albidrar que de momentu naide nun los va poner n’apuros. McLaren siguen nel so pozu particular, cada carrera una llucha por nun fundise más; Haas sumando a puquitinos y bregando pa ser quien a dexar atrás a Toro Rosso; Force India intentando despertar y arrancar del too y Sauber, pasín ente pasu, convenciendo de la so recuperación. Williams aseméyase un pocu a la situación de McLaren, pero con entavía más drama y fracasu. Tar últimos con dos rapazos que nun terminen de cuayar una actuación curiosa en pista y viéndose cuestionaos día tres día nun facilita les coses pero’l mundu de la Fórmula Uno ye a vegaes mui inxustu.

Pa esti fin de selmana, los horarios tornen a ser los normales de los grandes premios d’esti añu:

VIENRES, 29/06/2018

LLIBRES 1: 11:00
LLIBRES 2: 15: 00

SÁBADU, 30/06/2018

LLIBRES 3: 12:00
CLASIFICACIÓN: 15:00

DOMINGU, 01/07/2018

CARRERA: 15:10

Equí podéis atopar tola información sobre’l Red Bull Ring y más abaxo les gomes escoyíes pa esti gran premiu:

Dempués d’una ausencia de ventiocho años podemos dicir que Francia llegó pa quedase. Anque nun sorprendió a naide’l resultáu que nos dio, superó toles espeutatives, que cada vegada son más desixentes colos circuitos que reapaecen. Muncho se faló del Paul Ricard: les rayes que permitíen frenar a los pilotos pa evitar que terminaren nes barreres foron oxetu de comentarios cásique tolos díes d’esti fin de selmana; lo complexo de siguir la trazada correuta pa los pilotos (delles semeyes recordaben a llaberintos); la dificultá p’adelantar que terminó quedando olvidada porque sí que vimos dellos adelantamientos en carrera. Ensin embargu, munches vegaes el circuitu ye tan bonu como los pilotos lu faigan y si éstos van a por toes ye raro que nun veamos un bon espectáculu. Falten tovía cosines qu’iguar pero podemos dicir que’l Paul Ricard cumplió bien na so primer carrera dempués de tantu tiempu.

El sábadu la lluvia foi protagonista na tercer sesión de llibres pero non tanto na sesión de clasificación, anque los equipos trabayaron cola amenaza de que cayera agua en cualquier momentu d’ella. Con eso y con too, los Mercedes retornaron a les dos primeres posiciones de la parrilla, con Hamilton faciéndose otra vegada col primer puestu dexando a Vettel per detrás y a los dos Red Bull y Räikkönen alloñaos de la pole.

La sorpresa de la sesión del sábadu fueron McLaren. Dambos pilotos quedaron fuera de la Q2 p’acompañar nes posiciones más baxes de la parrilla a Hartley y a los Williams. Les coses en McLaren hai tiempu que nun funcionen bien pero esta actuación del sábadu vien a rematar un fin de selmana nel qu’Eric Boullier tuvo de dar más desplicaciones de les que quixera nes sos ruedes de prensa.

El domingu, n’una carrera en seco, les predicciones daben a Hamilton de vencedor, y nun s’equivocaron. El pilotu inglés en nengún momentu vio peligrar la so victoria. Nun foron tan cencielles les coses pal so compañeru Valtteri Bottas que a poco de la salida, tuvo un accidente con Sebastian Vettel n’un erru d’esos qu’a vegaes l’alemán comete y que nin siquiera elli mesmu entiende. Dambos pilotos salieron perxudicaos, Bottas con un pinchazu y Vettel col morru dañáu ya viéronse obligaos a facer una parada temprana y aguantar el restu de la carrera ensin entrar.

De la so desgracia aprovecháronse los dos Red Bull, con Verstappen per delantre, qu’aguantó tola carrera nel segundu puestu qu’algamó na salida y que nun abandonó en nengún momentu. El so compañeru Daniel Ricciardo, ensin embargu, nun pudo aguantar nel tercer llugar y terminó cuartu tres ser adelantáu pol Ferrari de Räikkönen que, como davezu, fexo una carrera correuta ensin llamar muncho l’atención y consiguiendo un podium. Vettel pudo a lo menos terminar quintu, bastante bono cuntando col accidente y cola penalización de cinco segundos que recibió. Bottas terminaría séptimu, un puestu deceicionante si pensamos que salía dende la segunda posición, pero bastante curiosa pensando nel accidente ya en que pudo llegar a quedase fuera de la carrera.

Nun foi esti l’únicu accidente de los primeros momentos de la carrera. Al tiempu que víemos les imaxes de Vettel con Bottas, apaecíen otres con dos de los pilotos franceses de la parrilla como protagonistes: Pierre Gasly y Esteban Ocon terminaron la so carrera enantes de tiempu dempués d’un erru de cálculu del pilotu de Force India que n’un movimientu inesperáu hacia la drecha zarró espaciu al pilotu de Toro Rosso que nun foi quien a reaicionar y terminó truñándolu. Esti incidente provocaría la salida del coche de seguridá y l’abandonu de dambos pilotos.

Dende esti momentu y dempués de que Maylander abandonara la pista, la carrera estabilizó y viose bastante espectáculu per parte de los pilotos de Haas y Renault y Leclerc col so Sauber. Grosjean tuvo un sábadu permalu, yá que terminó la Q3 nes barreres. El domingu nun tuvo una mala carrera pero nun consiguió entrar en puntos. El so compañeru Kevin Magnussen tamién consiguió entrar en Q3 el sábadu ya’l domingu nunca nun salió de los puestos de puntos. Terminó siendo sestu per delantre del Mercedes de Bottas y aprovechando que Sáinz tuvo problemes d’última hora col motor del so Renault.

Dempués d’un tiempu d’estabilidá, averándose casi’l final de la carrera, tuvimos otru de los momentos del gran premiu: la goma de la rueda izquierda del Williams de Lance Stroll reventó provocando que’l pilotu perdiera’l control del coche n’un momentu de bastante sustu. Sicasí, nun tuvimos de llamentar un accidente aparatosu porque’l pilotu canadiense nin siquiera llegó a les barreres, les rayes azules y coloraes del entornu de la pista ayudaron a frenar la velocidá del coche. Llevábemos tol fin de selmana sintiendo les desplicaciones sobre la so utilidá y nesti casu concretu pudimos veles cumpliendo la so función. Ye una interesante fórmula pesie a qu’estéticamente a la xente paez que nun-y convence. La carrera terminó col coche de seguridá virtual por cuenta d’esti últimu incidente.

Renault consiguió puntuar con dambos pilotos. Pesie al problema d’última hora de Carlos Sáinz, pudo acabar en puntos, nel puestu octavu y xusto per delantre del so compañeru d’equipu, Nico Hülkenberg, nel novenu. Otru puñáu de puntos pa sumar a la cuenta de Renault que son entá más importantes pensando que, otra vuelta más, los pilotos de McLaren nun sumaron.

Pa zarrar los puestos de puntos, Charles Leclerc. Sigui reivindicándose como pilotu, pasín ente pasu. Terminó nel puestu décimu y yá suma 11 puntos, igualando’l númberu de puntos del so compañeru d’equipu en tolo que lleva na Fórmula Uno. Ensin duldes el pilotu monegascu ta faciendo méritos pa qu’equipos como Ferrari se fixen n’elli. Marcus Ericsson sólo pudo terminar nel puestu décimoterceru.

McLaren, como diximos, nun pudieron sumar puntos. Nel casu de Fernando Alonso nin siquiera vio la bandera a cuadros y terminó enantes de tiempu dientro del garaxe por problemes col coche. Tamién elli tuvo un incidente con Sebastian Vettel que nun tuvo más consecuencia qu’un trompu pal asturianu. El so compañeru Vandoorne terminó la carrera nel puestu doce. Nun duldamos que les crítiques al equipu van siguir tiempu y sobre too hasta que se vea movimientu y cambiu dientro de la escudería.

Zarrando la clasificación quedaron Sirotkin, nel puestu quince, qu’amás llevó una penalización de cinco segundos por dir demasiao despacio cuando’l coche de seguridá taba en pista y Brendon Hartley, que yá salía del puestu venti por penalización y que nun pudo facer muncho más el domingu.

Fuera quedaron los yá mentaos Gasly, Ocon amás de Sergio Pérez, que tuvo de retirase por un problema col motor. Nun foi un gran día pa los pilotos de Force India.

Ensin casi descansu tamos yá pensando nel siguiente gran premiu, el segundu d’esta tanda de tres que toca: Austria. De momentu y hasta que llegue la previa d’esa carrera, equí vos dexamos tolos númberos de sábadu y domingu nel Circuitu Paul Ricard y los resúmenes de la clasificación y la carrera:

Clasificación

Carrera

Siempre presta cuando entren nuevos grandes premios nel calendariu. Si, como nesti casu, lo que pasa ye qu’entra un circuitu míticu que fai’l so retornu a la competición na Fórmula Uno, ye meyor entavía. Dempués de diez años d’ausencia d’un circuitu francés na Fórmula Uno (en 2008 corrióse por última vegada en Magny Cours) Paul Ricard torna a la máxima competición del motor ventiocho años dempués del so últimu gran premiu.

Hai qu’añadir a esto que va ser la primera d’un set de tres carreres siguíes que van llevanos de Francia a Austria y llueu al míticu Silverstone. Nun podemos quexanos de falta de grandes premios esti añu.

Aterrizamos en Le Castellet pa la octava cita d’esti 2018. Hai munchísima espectación énte esta carrera, aparte de polo mítico del circuitu, porque había tiempu que nun se daba la coincidencia de correr n’un circuitu francés con pilotos franceses en parrilla (Grosjean, Ocon y Gasly) ya un equipu francés (Renault). Los ingredientes son perbonos, esperamos que’l resultáu tamién lo seya.

Porque’l retornu d’un circuitu dempués de ventiocho años d’ausencia, pesie a tener sío usáu pa test, implica que, como cuando unu nuevu entra, son too novedaes, los pilotos y equipos nun saben qué van atopase, y eso ye siempres ganancia pa quien ve la carrera dende fuera. Güei ye quiciás más difícil que nunca facer predicciones sobre lo que vamos poder ver el domingu. La situación ideal pa un mundial que vien careciendo carreres aburríes apocayá.

Ferrari vienen con fuercia, enchipaos polo vivío en Montréal ya esperando que’l Paul Ricard nun se-yos atragante. El llideralgu de Vettel nel mundial de pilotos ye mínimu y cualquier erru ye costosu. Mercedes tán na cabeza nel mundial de constructores, pero siendo conscientes de qu’esti añu nun va ser un paséu y que cada puntu van tener de lluchalu. Son munches les voces qu’almiten que Ferrari tien, probablemente, el meyor coche d’esti añu y en Mercedes nagüen por probar qu’eses voces tán equivocaes.

Red Bull van tar nel puntu de mira, anque por causes ayenes a esti gran premiu. Esta selmana confirmóse lo que llevaba tiempu siendo un rumor: dende 2019 van montar motores Honda, mesmo que ta faciendo esti añu Toro Rosso. Dicen que lo que tán viendo na escudería hermana paez-yos lo suficientemente importante como pa considerar que ye la so meyor baza pal añu viniente. La bayura d’opiniones sobre esta decisión dexa claro que nun paez que la xente confíe en qu’Honda pueda dar a Red Bull lo que necesiten pa pasar perriba Mercedes y Ferrari, pero ye evidente que Renault nun lo ta consiguiendo tampoco agora. Nun nos queda otra qu’esperar a ver lo que da de sí esti nuevu empareyamientu dientro unos meses. A too esto súmase’l fechu de que’l futuru de Daniel Ricciardo ta nel aire, y esta nueva xuntanza ente Red Bull y Honda nun paez ser la más afayadiza pa que l’australianu tenga’l so sitiu ellí pa 2019. La silly season ta a piques de ponese en funcionamientu…

Pela metá la tabla, tolos güeyos van tar puestos en Renault por razones obvies: cuerren en casa, ya eso paez ser siempre un plus pa los equipos. Si amás, como nel casu de Renault, vienes de facer bones actuaciones en carreres pasaes y agora mesmo yes el meyor de los equipos medianos, la motivación ye entavía mayor. Pa frenalos van tar McLaren, con un Alonso que vien de ganar Le Mans con Toyota, y que necesiten sumar si nun quieren ver a Renault escapase na clasificación. Na escudería de Woking tamién son too rumores, yá que la victoria d’Alonso en Le Mans plantegó la cuestión de si diba dexar la Fórmula Uno pa metese n’IndyCar ya intentar ganar n’Indianápolis y facese cola naguada triple corona (ganar Mónaco na F1, les 24 hores de Le Mans y les 500 milles d’Indianápolis). McLaren nun tán ufriendo’l rendimientu esperáu, polo que nun sedría estraño que l’asturianu tomara esa decisión.

Force India van espabilando a puquitinos, pero tan sele que les meyores malpenes se noten na clasificación. Tienen a McLaren entá a doce puntos, una distancia que ye fácil de salvar pero sólo si empiecen a puntuar con dambos coches, dalgo qu’esti añu nun ye vezu como en 2017 cuando los dos Force India yeren clientes habituales de los puntos. Tienen amás que tener controlaos a Toro Rosso y Haas que, con diecienueve puntos, tán faciendo por dir pasín ente pasu ameyorando y xubiendo posiciones na clasificación.

Sauber tán firmando un 2018 que, con namás siete grandes premios disputaos, yá foi munchísimo meyor que’l 2017. Son munchos los cambios qu’hebo nel equipu, totalmente necesarios, ya’l rendimientu que ta dando Charles Leclerc ta ayudándolos a recuperar el so sitiu. El pilotu monegascu ta tamién nel puntu de mira por tar el so futuru en Ferrari, hai quien diez que pa cubrir el sitiu que dexaría Kimi Räikkönen. Si ye capaz de rindir asina con un Sauber na situación na que ta, creyemos que ponelu n’un Ferrari ye una apuesta segura. Pero, como colo de Ricciardo, toca esperar y ver ya dexar que la silly season vaiga garrando forma.

Güeyu colos horarios qu’en Francia vamos una hora per detrás:

VIENRES 22/06/2018

LLIBRES 1: 12:00
LLIBRES 2: 16:00

SÁBADU 23/06/2018

LLIBRES 3: 13:00
CLASIFICACIÓN: 16:00

DOMINGU 24/06/2018

CARRERA: 16:10

Equí podéis atopar información sobre’l circuitu Paul Ricard y abaxo, les gomes que se van usar nesti gran premiu:

Suel pasar na Fórmula 1 que se dan coses por feches y éstes terminen nun pasando. Por exemplu, que Lewis Hamilton domine en Canadá. Muncha xente fala d’elli como’l rei de Montréal, y ye que yá tien ganaos seis grandes premios ellí. Por eso nun yera d’estrañar que se cuntara cola so victoria’l domingu.

Verstappen llideró toles sesiones de llibres, ensin incidentes nin mayor problema, xusto lo que necesitaba. Perfilábase como posible candidatu a pole’l sábadu y victoria’l domingu. Hamilton, como dicimos, yera otru candidatu. Pero naide nun cuntaba con que fuera Vettel quien dominara la clasificación del sábadu cola pole ya’l domingu con una carrera al estilu de les que lleguemos a avezanos nel pasáu cuando taba en Red Bull: dominiu de principiu a fin.

De fechu, Räikkönen paecía que diba dar más guerra que’l so compañeru, pero al llegar el momentu decisivu foi l’alemán quien dio’l golpe enriba la mesa con una vuelta de pole casi perfeuta. Bottas consiguió ponese segundu, mientres que foi Verstappen quien clasificó terceru y Hamilton nuna deceicionante cuarta posición. Canadá nun ye Mónaco y adelantar ye posible, pero saliendo cuartu y con un Ferrari que paecía rindir meyor de lo que s’esperaba, paecía que Hamilton diba tenelo complicao pa facese cola victoria’l domingu.

Y asina foi. La salida’l domingu foi llimpia. Verstappen atacó dende bien ceo a Bottas, que defendió perbién la so posición ya nun dexó al holandés ponese per delantre. Per detrás d’ellos les posiciones siguieron como taben y, como siempre, los problemes vinieron na parte medio-baxo de la tabla. Na curva seis Stroll perdió’l control del so coche dempués de tener un toque con ún de los McLaren. La mala suerte cebóse con Hartley que foi víctima d’esi movimientu y viose escontra la muria nun accidente bastante escandalosu (ver videu) que dexó a dambos pilotos fuera. Hartley sigui escorríu pola mala suerte ya polos rumores que falen de que Red Bull anda considerando a Lando Norris como’l so sustitutu si les coses nun ameyoren y Stroll tampoco nun ta en meyor situación, sumando otru fin de selmana negativu con Williams.

Col coche de seguridá en pista, los pilotos de la parte baxo de la tabla como Vandoorne y Gasly aprovecharon pa entrar, pero’l restu siguieron en pista. Dende esi momentu y salvo un toque ente Sáinz y Pérez que fizo que’l pilotu de Force India perdiera’l control del so coche y casi acabara na muria, nun vimos muncho más.

Pela parte d’arriba, Ricciardo ganó-y la partida a Hamilton nel pitstop pero aparte d’eso, la carrera foi bastante monótona. Bien ceo viose que naide diba poner en problemes a Vettel y que tinía bien dominada la carrera. Tamién taba claro que Bottas tinía controláu a Verstappen y Ricciardo nunca nun se vio amenaciáu por Hamilton.

Los pilotos Renault dieron bastante espectáculu dientro la monotonía que foi’l gran premiu, y consiguieron puntuar dambos, terminando sétimu (Hülkenberg) ya octavu (Sáinz) y sumando un bon garrapiellu de puntos perimportantes na so batalla con McLaren, que nun sumaron nengún. Alonso quedó fuera de carrera por un problema col escape y Vandoorne, con milenta problemes, namás pudo terminar décimosestu.

Force India consiguió puntuar con Ocon, que fexo una bona carrera anque pudo consiguir más que’l novenu puestu nel que terminó. Pérez tuvo más problemes dende’l so alcuentru con Sáinz, y nun entró en puntos, siendo namás décimocuartu. Zarrando los diez primeros quedó Leclerc, que suma otru puntu pa Sauber y sigui amosando que ye ún de los pilotos a tener en cuenta de cara al futuru. El so compañeru tuvo una actuación más discreta, terminando décimoquintu.

Haas tampoco nun tuvo un bon domingu: el sábadu Grosjean nin siquiera pudo participar na sesión de clasificación y anque tuvo bona parte de carrera dientro los puntos, al final terminó nel puestu doce. Magnussen tampoco nun fizo muncho más anque igual que’l so compañeru llegó a tar dientro los puntos, pero terminó nel puestu trece. Otru finde pa escaecer nel garaxe de Haas.

Al accidente de Toro Rosso hai que sumar que Gasly tampoco nun pudo facer muncho más en carrera. Con problemes el sábadu y saliendo dende bien atrás el domingu, quedó a les puertes de los puntos, sumando otru fin de selmana de munches entrugues nel equipu hermanu de Red Bull.

L’encargáu de zarrar la llista de pilotos que terminaron la carrera foi Sirotkin que xunío al accidente de Stroll, dexa otra carrera pa Williams ensin siquiera averase a los puntos. Siguen soplando vientos negativos en Grove.

Nun podemos terminar esta crónica ensin mentar una anéudota curiosa que tuvo de protagonista la bandera a cuadros. Por un erru d’información a la persona encargada d’enseñala, la carrera declaróse como terminada na vuelta sesenta y nueve. Y ye que la bandera apaeció cuando a Vettel tovía y quedaba la última vuelta per delantre (el mesmu pilotu pidió per radio que nun s’enseñara la bandera a cuadros enantes de tiempu, que tovía nun terminara). L’erru fexo que Ricciardo perdiera’l so premiu a la vuelta rápida de carrera, que quedó en manes del so compañeru Verstappen.

Dexamos Canadá pa descansar un par de selmanes y garrar fuercies pa los tres grandes premios siguíos que nos lleguen. La primera d’eses paraes va ser nel circuitu Paul Ricard, en Francia, que retorna al calendariu de la Fórmula Uno. Demientres llega la fecha, equí vos dexamos tolos númberos del sábadu y del domingu y el resume en videu de la clasificación y la carrera:

Clasificación

Carrera

Facemos un parón na xira europea de la Fórmula Uno pa pegar el saltu hasta Canadá pal sestu gran premiu d’esta temporada. Dempués d’una carrera en Mónaco que namás-y debió prestar a Daniel Ricciardo y dalgún otru más, el circuitu Gilles Villeneuve yá ta preparáu pa recibir los monoplaces y pilotos d’esti 2018.

Canadá tiennos dexao bones alcordances de grandes premios entreteníos y ye ún de los escenarios favoritos de Lewis Hamilton. Anque’l dominiu de Mercedes nun ye tan obviu esti añu, sí ye que verdá que tienen motivos pa creyer qu’esti pue ser un bon fin de selmana pa ellos, especialmente pal pilotu inglés. Poro, el focu ta puestu enriba les fleches platiaes pero tamién no que puean facer Ferrari y Red Bull pa torgar esa victoria cola que cásique tol mundu cunta.

Falando de Red Bull, tienen bona falta de siguir na bona llínia de Mónaco, pesie a les dificultaes coles que llegó esa victoria pa Ricciardo. Pa Verstappen, qu’estes selmanes ta recibiendo muncha presión non sólo del so equipu si non, y sobre too, de los medios, ye perimportante consiguir facer una carrera ensin incidentes y au pueda amosar que nun se-y olvidó como ganar carreres. Dempués de sumar un bon garrapieyu de carreres nes que siempre tuvo dalgún problema, el pilotu holandés necesita más que nunca una carrera tranquila.

Pela parte media la tabla, McLaren tien muncha falta de facer un bon papel en Canadá. Tán a seis puntos de distancia de Renault na tabla, que sacó renta del gran premiu de Mónaco. Nel garaxe d’Alonso cellebren 300 grandes premios y sabemos lo importantes que son esti tipu d’efemérides na Fórmula Uno y lo que presta facer una bona carrera cuando amás cellebres dalgo.

Per detrás, pasín ente pasu Force India va espertando, pero nun tien nada que ver colo que víemos l’añu pasáu. Anque entavía tien tiempu y la tabla ta apertada en puntos, nun nos paez que vaigan poder imponese nel cuartu puestu como en 2017. El tar dientro los diez primeros el sábadu yá nun ye vezu pa ellos mesmo que puntuar con dambos coches el domingu. Sí que ye verdá qu’ameyoraron bastante en comparanza col principiu la temporada, pero tovía tienen muncho que trabayar. Puede ser tamién que nun seya sólo culpa d’ellos si non méritu del restu d’equipos qu’espabilaron esti añu.

Y ello ye que Force India tien un colchón cómodu de siete puntos perriba Toro Rosso pero nun puede despistase yá que l’equipu filial de Red Bull, con una bona carrera per parte de los sos pilotos, puede ponese perriba d’ellos. Hartley, de toles formes, ta teniendo bastantes problemes p’adaptase al coche y ta siendo bastante irregular, mientres que Gasly paez tar n’una meyor situación pesie a que los resultaos tampoco nun son brillantes.

Force India nun se tien de preocupar namás de Toro Rosso si non que tien a Haas a la mesma distancia. L’equipu estauxunidense tuvo una carrera pal escaezu en Mónaco y lleguen a Canadá cola necesidá de recuperar la forma que vimos en grandes premios pasaos onde nun salíen de los diez primeros. Amás, parten con una alvertencia de los sos xefes: evitar les muries y los accidentes porque anden llimitaos de pieces p’arreglar los coches. Viendo los pasos daos hasta agora, paeznos qu’esti comentariu va sobre too dirixíu a Romain Grosjean.

Sauber tán viviendo un bon momentu, anque Mónaco nun foi tampoco un suañu pa ellos. L’accidente de Leclerc de xuru dio pa pensar muncho y pa garrar fuercies y facelo lo meyor posible en Canadá y consiguir metese otra vuelta más dientro de los diez primeros. Williams dirá col mesmu pensamientu, especialmente nel llau de Stroll, que cuerre en casa. Hai siñales que nos permiten creyer que l’equipu de Grove ta espabilando, pero son entavía febles como pa poner enfotu n’elles. Lo que ta claro ye que, cuando primero espabilen, primero tendremos batalles perprestoses pela mitá medio-baxo de la tabla.

Canadá ye davezu un gran premiu entreteníu y amás nun toca madrugar. Estos son los horarios pa esti fin de selmana:

VIENRES 08/06/2018

LLIBRES 1: 16:00
LLIBRES 2: 20:00

SÁBADU 09/06/2018

LLIBRES 3: 17:00
CLASIFICACIÓN: 20:00

DOMINGU 10/06/2018

CARRERA: 20:10

Y equí vos dexamos tola información sobre’l circuitu Gilles Villeneuve y les gomes escoyíes pa esti gran premiu: