Category: Carreres

Yá viníemos avisando de que les carreres en Rusia nun veníen siendo vistoses. Esti añu nun foi distinto. Amás, paeznos que lo que vimos foi casi una sentencia de la temporada a falta de cinco carreres, lo que nun diz muncho a favor de la emoción del campeonatu esti añu o meyor dicho, a favor del rendimientu de Ferrari teniendo, en boca de munchos, el meyor coche de la parriella. La pole de Bottas nun-y valió pa facese cola victoria y anque munches otres vegaes nesta temporada tenemos falao de la falta que tien de ser más valiente en pista, nesta ocasión foi otru tema’l que lu dexó ensin la primer posición del podiu.

El sábadu, el pilotu finlandés de Mercedes sorprendía faciéndose con un primer puestu que tol mundu-y daba a Hamilton yá dende’l vienres. Sicasí, na previa avisemos qu’a Bottas se-y da perbién esti circuitu y que nun ye la primer vegada que pasa perriba’l so compañeru d’equipu. Otra vez más volvió a confirmalo a una vuelta. Ferrari nun pudo más que conformase col tercer puestu de Vettel y con Räikkönen cuartu, mentantu’l Force India, Haas y Sauber aprovecharon les penalizaciones de los dos Red Bull y Toro Rosso, amás de la poca competitividá de Renault pa colase ente los diez primeros.

El domingu, qu’aportó con ñubes negres que nun llegaron a esmolecer a los equipos, entamaba la carrera. Bottas salió bien, mesmo que Vettel qu’aprovechó de primeres el rebufu del finlandés pa ponese al llau de Hamilton y casi pasalu. Ensin embargu, l’inglés aprovechóse al tiempu d’esi rebufu cuando’l so compañeru se punxo na so mesma llínia, faciendo que pudiera caltener la so posición per delantre del Ferrari. Per detrás, la salida foi bastante llimpia, sacante dellos incidentes ente Vandoorne y Ricciardo que nun condicionaron la carrera.

Con estes blimes diba trescurriendo la carrera cuando al pocu víemos a un Toro Rosso, el de Gasly, fuera de pista. Terminaba’l so gran premiu enantes de tiempu. Nun pasara nin un minutu cuando yera l’otru Toro Rosso, el de Hartley, el que víemos travesáu fuera del circuitu. Dambos pilotos, según informó l’equipu dempués, tuvieron problemes colos frenos, paez ser que’l mesmu problema dambos, que los dexó fuera del gran premiu tan llueu. Sicasí, estos dos sedríen los dos únicos pilotos que nun veríen la bandera a cuadros.

Los abandonos de los Toro Rosso nun ficieron salir al coche de seguridá y la carrera continuó ensin mayor incidente. De fechu, ye una de les coses a rescamplar: l’ausencia de problemes pa los pilotos. Sáinz tendría un alcuentru con Sirotkin que condicionó dafechu la so carrera, pero en xeneral nun hebo más problemes.

Dellos pilotos aguantaron les sos paraes (los dos Red Bull y el Renault de Hülkenberg sobremanera) pero Ferrari nun xugó a les estratexes ya preocupáronse de pasar a los Mercedes en pista. De fechu, ún de los momentos más interesantes de la carrera foi la batalla ente Vettel y Hamilton lluchando por posición y que terminó col pilotu inglés per delantre del alemán.

El ritmu de Vettel en pista nun foi abondo pa frenar a Hamilton nesi momentu. Sicasí,provocó que Mercedes tomara una de les decisiones polémiques de la carrera y de la que más se faló dende que terminó: Bottas tuvo de dexar pasar a Hamilton pa, en pallabres del equipu, evitar que Vettel lu adelantara. El finlandés nun punxo pega y les posiciones nun camudaron hasta’l final pesie a que Vettel enxamás foi quien a pasar a nengún de los dos. Les cellebraciones al acabar la carrera y les cares que nos ufría la imaxe de TV del xefe del equipu nun dexaben duldes de que la decisión nun cayó bien. Sicasí, ye otra victoria pa Hamilton que fai medrar la so distancia con Vettel, al que tien a cincuenta puntos, una distancia que yá nos paez casi imposible de salvar. A falta de cinco carreres y una montonera de puntos por disputase paez pronto pa zarrar el campeonatu pero muncho tienen de torcese-y les coses a Hamilton pa que nun seya campeón esti añu.

Aparte de lo que pasó nos puestos d’enriba, Räikkönen tuvo una carrera tranquila y terminó cuartu ensin facer munchu ruiu. Los que sí lu ficieron fueron los dos Red Bull qu’empezaben la carrera nes últimes posiciones y terminaron quintu (Verstappen) y sestu (Ricciardo). El pilotu holandés completó una carrera brillante onde llegó a ser llíder demientres varies vueltes hasta la so parada en boxes. Per detrás d’ellos, Leclerc, que remató’l fin de selmana dempués d’una bona clasificación ayeri con un sétimu puestu. Acompañáronlu nos últimos llugares que dan puntos: Magnussen, que terminó octavu y volvió a sumar pal so equipu, dempués de confirmase que tanto elli como’l so compañeru van siguir en 2019, y los dos Force India, que tuvieron una batalla interesante en pista anque condicionada poles órdenes que viníen dende la muria.

La deceición protagonizola Renault: Hülkenberg tuvo en puntos gran parte de la carrera y xugósela a un primer tramu llargu y ser de los últimos en facer la so parada, cuidando qu’eso diba da-y ventaxa pa poder entrar en puntos. Nun lo consiguió y namás pudo terminar nel puestu doce. Sáinz, como comentábemos, tuvo problemes dende’l so toque con Sirotkin y terminó decimosétimu. Per delantre, l’otru Haas, el de Grosjean, qu’el sábadu tuvo una perbona sesión de clasificación pero’l domingu quedó nel puestu once a piques d’entrar en puntos.

Más abaxo, l’otru Sauber, el de Marcus Ericsson, al que-y pasó daqué asemeyao a Grosjean. El sábadu metióse ente los diez primeros pero en carrera nun pasó de ser decimoterceru. Los dos McLaren tuvieron un fin de selmana mui complicáu. Alonso partía con penalizaciones, pero nun paecía qu’eso fuera escusa pa’l resultáu en Rusia. Dambos pilotos sabíen qu’esti circuitu nun favorez les prestaciones del McLaren, asina que nun sorprende el decimocuartu puestu d’Alonso ya’l decimosestu del so compañeru d’equipu Vandoorne.

Otru equipu que suma y sigui na so temporada pal escaezu ye Williams. Sirotkin tinía falta de facer un bon trabayu en Rusia, yá que cuerre en casa, pero un toque con Sáinz dexólos a dambos con bien poques oportunidaes de facer nada curioso. El so compañeru Lance Stroll nun fexo muncho más, anque sí terminó más arriba na tabla. El canadiense foi decimoquintu mientres que’l pilotu rusu namás pudo ser decimoctavu.

De xuru que d’esta carrera va siguise falando, sobre too lo que cinca a les ordes d’equipu y a los comentarios que d’elles se deriven pero nun da tiempu a pensar muncho pues dende Rusia pegamos un saltu y aterrizamos en Suzuka pal gran premiu de Xapón. Pa que la espera se faiga curtia, equí vos dexamos tolos númberos de la xornada del sábadu y domingu nel circuitu de Sochi:

Clasificación

Carrera

La Fórmula Un aterriza nel circuitu de Sochi pa otra nueva cita col campeonatu del mundu. Como yá ye vezu estes últimes selmanes, esti gran premiu llega con novedaes na parriella pa 2019. Equí vos dexamos tola información que va saliendo, con actualizaciones cada vegada qu’un equipu se pon al día. Lo último que supimos hai un par de díes ye que Antonio Giovinazzi va ser compañeru de Kimi Räikkönen en Sauber pal añu qu’entra, con Marcus Ericsson como tercer pilotu.

Rusia suel dase-y bien a Valtteri Bottas, anque tenemos duldes de si, dau’l casu, Mercedes lu dexará pasar per delantre del so compañeru d’equipu Lewis Hamilton, qu’agora mesmo tien les coses mui de cara pa ser campeón del mundu por quinta vegada. Los dos años pasaos el pilotu finlandés rellumó demientres esti fin de selmana y cuidamos que pueda facer lo mesmo nesta ocasión. Pa evitalo tará Ferrari, n’hores baxes nel llau de Vettel que nun dexa de perder carreres (ensin quitar méritu a les victories de Hamilton) y cada vegada ve más lloñe la posibilidá de facese col so quintu campeonatu del mundu, pero que sigui siendo ún de los meyores coches na parriella.

Red Bull anden faltos d’un bon fin de selmana en conxuntu. Anque Verstappen pudo subise al podiu en Singapur, hai tiempu que dambos pilotos nun s’averen a los primeros puestos a la vez, sobre too por cuenta los problemes de fiabilidá nel llau de Ricciardo. Sochi ye otra oportunidá, con permisu de Mercedes y Ferrari, y al toru coloráu nun-y queda otra qu’aprovechar los erros que, anque pocos, tamos viendo que tamién-yos pasen a los grandes.

Renault ta agarrándose al cuartu puestu del campeonatu con toles ganes ya’l pasáu gran premiu foi provechosu pola suma de puntos de dambos pilotos y la falta d’ellos de los sos rivales. Sicasí, cada carrera ye una páxina en blanco y nun sumar en dambos llaos del garaxe supón el riesgu de qu’otru equipu faiga bien los deberes y se ponga a tiru. Ye’l casu de Haas, qu’anque nun sacaron rendimientu al gran premiu de Singapur (la vuelta rápida nun da puntos) suelen metese ente los diez primeros y acortar distancia con esi cuartu puestu tan golosu. Nengún de los dos pilotos del equipu estauxunidense ta confirmáu pa 2019, asina que nun hai relaxu posible pa ellos, dalgo que namás puede beneficiar al equipu poles ganes que dambos pongan en pista.

De McLaren paez que nunca nun hai nada bueno nin positivo que dicir y anque Rusia en principiu va ser un circuitu complicáu, hai que rescamplar que tan sestos nel campeonatu dalgo que l’añu pasáu nin siquiera suañaben. Ye obvio que McLaren nun aspira a un sestu puestu nel mundial de constructores nin a sumar puntos dacuando, pero pasín ente pasu asentaron nesa posición y anque paez posible que Force India termine adelantando a la escudería de Woking, nun paez que los equipos d’atrás vaigan facese col sétimu puestu que paez que va quedar pa McLaren. Sigui siendo deceicionante, pero ye un avance en comparanza con años pasaos. Pa Sochi, como yá comentamos, nun ponen munchu enfotu ya farán por sacar lo másimo que puean a un circuitu que nun ye propiciu pa ellos.

Force India sigui na so particular xera por recuperar la posición nel mundial de constructores que tinía enantes de camudar el so nome. Nun tien pinta que, como diximos, vaiga costar que pase a McLaren ya igual a Haas, anque abúltanos muncho que seyan quien a ponese cuartos. Sobre too si la carrera en Sochi ye asemeyada a la de Singapur, onde un accidente ente Pérez y Ocon dexó a esti últimu fuera y al mexicanu n’una situación complicada en pista. L’equipu tornó a dicir que, si hai falta, van usar les ordes d’equipu pa evitar otru problema d’estos que nun fai más que torgar el so avance. Taremos sollertes en Sochi.

Toro Rosso tienen un colchón curiosu con Sauber, pero nun puede despistase si nun quier que l’equipu suizu los pase. Ensin pilotos pa 2019 y con Hartley cada vegada más fuera de la escudería, Sochi ye otra piedra de toque pa ver hasta au puede llegar el coche. Naide nun ta escesivamente deceicionáu col rendimientu del motor Honda y dambes compañíes siguen falando de la so bona rellación y lo fácil que ye trabayar cola otra, anque los resultaos nun acompañen del too.

Sauber yá zarró files pa 2019 y ye posible que tenga una de les alliniaciones de pilotos más interesantes pal añu que vien. Con estes blimes y la tranquilidá de tener el futuru solucionáu, al equipu sólo-y queda enfotase nes carreres que falten pa consiguir ponese per delantre de Toro Rosso ya nun dexar que Williams adelante.

Sirotkin cuerre en casa esti fin de selmana, y de xuru va ser una ocasión especial pa elli y pal equipu Williams en conxuntu, faltu de resultaos positivos y de sorrises. Anque sumaron puntos hai un par de carreres, esi tastu yá desapaeció ya tornó la realidá d’esti 2018 na que son poques les situaciones nes que l’equipu pudo sorrir. Sicasí, como con toles otres carreres, Sochi ye una nueva oportunidá de, quiciás, consiguir daqué positivo anque seya polos erros del restu.

Sochi nun suel dar carreres vistoses pero esperamos equivocanos ya ver un gran premiu entreteníu. Podéis atopar tola información sobre’l circuitu equí. Los horarios pa esti fin de selmana son:

VIENRES, 28/09/2018

LLIBRES 1: 10:00
LLIBRES 2: 14:00

SÁBADU, 29/09/2018

LLIBRES 3: 11:00
CLASIFICACIÓN: 14:00

DOMINGU, 30/09/2018

CARRERA: 13:10

Y éstes son les gomes escoyíes pal gran premiu de Rusia 2018:

Hai munches coses que tamos deprendiendo esta temporada de Fórmula Un. Ente elles ta’l nun enfotase en Ferrari nos circuitos nos que, teóricamente, ye más fuerte. Lleva pasando yá delles carreres y Singapur tamién foi un exemplu. La realidá pa la Scuderia ye que nun dexa de perder grandes premios que van terminar costando-y otru campeonatu de pilotos y de constructores.

Y ye que dende’l vienres víemos a Ferrari no cimero, con Mercedes en posiciones más discretes y Red Bull aprovechando lo que podía. La teoría sabíemosla: Marina Bay ye un circuitu nel que Red Bull ye bastante fuerte y que se-y da perbien a Ferrari. Mercedes nun va mal pero nun ye un de los sos favoritos. Les cuentes qu’echamos poníen a Ferrari no más alto con Red Bull y Mercedes peleándose polo que dexaren les fleches coloraes, y los primeros quiciábes con más oportunidaes de rellumar. Vimos que salíen los númberos nes sesiones d’entrenamientos llibres, y na primer tanda de la sesión de clasificación. La Q3 foi otru cantar. Y ye que Hamilton amosó otra vegada más de lo que ye capaz a una vuelta cuando ta nel puntu óptimu de forma: una pole estratosférica cola que nin Ferrari nin Red Bull pudieron suañar, anque Verstappen foi quien más s’averó. Nueva pole, nueva deceición pa Vettel que sólo pudo ser terceru.

El domingu, cola carrera en seco y los pantasmes de la salida del añu pasáu, empezó una carrera onde, como suel ser vezu, tuvimos incidente pocu dempués de que les lluces del semáforu s’apagaron. Esta vegada fueron protagonistes los dos Force India ya’l más afeutáu Esteban Ocon, que quedó fuera ensin poder nin siquier completar una vuelta. Sergio Pérez intentó desplicar al equipu que nun tinía espaciu ya que l’incidente foi inevitable, pero Ocon nun paecía tar mui convencíu ya tampocu Force India, que yá amenazó con intervenir ya imponer órdenes d’equipu.

Dempués de delles vueltes tres del coche de seguridá y con Vettel per delantre de Verstappen, al qu’adelantó na salida, rellanzóse la carrera. Tuvimos dellos momentos interesantes en pista, pero la verdá ye que, en conxuntu, la carrera foi una d’eses que la xente suel nomar aburrida. La estratexa de Ferrari de parar a Vettel primero que’l restu pa tentar a Mercedes nun funcionó y decidieron conformase con dexar la carrera nes manes de Verstappen, esperando que’l pilotu de Red Bull, al facer la so parada, sí fuera quien a pasar a Hamilton. Esto tampoco nun tuvo ésitu y dende bien llueu la carrera tuvo nes manes de Mercedes que la xestionó como-y petó.

Vettel conformóse con intentar adelantar otra vuelta a Verstappen, que na so parada nun pasó a Hamilton pero sí al pilotu alemán y punxo ceo distancia ente ellos. En Ferrari desesperaben viendo como perdíen otra carrera n’un circuitu nel que son fuertes. El restu del gran premiu foi una batalla de Verstappen por intentar averase a Hamilton, con delles oportunidaes gracies a los doblaos, pero l’inglés yá tinía tomada la midida al pilotu de Red Bull y nun concedió espaciu.

Per detrás, tanto Bottas como Räikkönen y Ricciardo ficieron la so carrera ensin muncho problema ya teniendo de conformase col cuartu puestu. Los tres pilotos quedaron un pocu a la solombra de los sos compañeros que llevaron tol protagonismu d’esti gran premiu pola so llucha polos tres puestos del podiu.

Na mitá de la tabla, dalgo que nun camudó foi la oportunidá que dellos pilotos aprovecharon pa entrar en puntos nel circuitu urbanu de Singapur. Foi’l casu d’Alonso que foi’l meyor del restu, quedando sétimu con un McLaren qu’agradeció competir en Marina Bay. Per detrás, el Renault de Sáinz que nun dio amueses de debilidá y terminó nel puestu octavu con Hülkenberg zarrando los diez primeros. Bon resultáu pa Renault que precisa de carreres onde puntúen dambos pilotos p’amarrar el so cuartu puestu, sobre too con Haas y Force India quedando fuera de puntos.

Otru qu’aprovechó la situación foi’l pilotu de Sauber Charles Leclerc, que dempués del accidente que tuvo na primer sesión de llibres del vienres, tinía falta d’una bona carrera pa compensar ya zarrar les boques que criticaben que Ferrari lu escoyera pa 2019. El so compañeru tuvo parte de la carrera en puntos, pero quedó a les puertes nel puestu once.

Vandoorne tamién llegó a tar dientro de los puntos, anque’l so coche nun daba pa más que’l puesto doce nel que terminó. Otra deceición pal pilotu belga pal que cada carrera ye una tarxeta de presentación pa un posible equipu que lu quiera fichar pa 2019. Per detrás del pilotu de McLaren quedó’l pilotu francés de Toro Rosso, Pierre Gasly. La escudería hermana de Red Bull pintaba meyor de lo que terminaron, pues Hartley namás pudo ser décimosétimu.

Otru equipu que tuvo un gran premiu pa escaecer foi Haas con Magnussen nel puestu dieciocho y una carrera mui floxa pero col añadíu de facer la vuelta rápida de carrera con 1:41.905 na vuelta cincuenta y que ye’l nuevu récor de Marina Bay. Nun valió pa muncho nel resultáu, pero a lo menos nun dexa un tastu tan amargosu na carrera del equipu estauxunidense. De fechu, Grosjean llevó una penalización de cinco segundos por nun facer casu de les banderes azules y falóse de que tuvo cerca de recibir una penalización d’una carrera por esi fechu.

Como yá diximos al principiu, Force India tampoco nun tuvo una bona carrera. Al abandonu tempranu d’Ocon sumóse un gran premiu mui complicáu pa Sergio Pérez, engarriau bona parte d’ella col pilotu rusu de Williams, Sergei Sirotkin. El mexicanu terminó siendo penalizáu con un drive through y acabó nel puestu dieciséis. Los pilotos de Williams nun lo tuvieron fácil tampoco, anque Sirotkin dixo que dexara too en pista. Terminaron nel puestu diecinueve nel casu del pilotu rusu y Lance Stroll nel catorce.

Descansu d’un par de selmanes pa viaxar a Rusia, al circuitu de Sochi, una pista onde Valtteri Bottas-y tien tomada la midida al so compañeru d’equipu. ¿Sedrá quien a facese cola victoria? Dientro d’unos díes descubrirémoslo. Hasta que llegue’l día, equí vos dexamos tolos númberos que dexó la clasificación del sábadu ya la carrera del domingu:

Clasificación

Carrera

Yá ta too preparao en Marina Bay pa un de los grandes premios que pasín ente pasu ta tornándose en míticu nel calendariu de la Fórmula Un. L’escenariu nocherniegu, anque yá replicáu n’otros circuitos como Sakhir o Yas Marina, sigui siendo un de los aspeutos que más presten a la xente. El fechu de que seya un circuitu urbanu da-y un toque interesante porque agranda les posibilidaes de ver enriba’l podiu a pilotos colos que de primeres igual nun se cuntaba y nos puntos a equipos que suelen tener poques oportunidaes de puntuar. Por toes eses razones, Singapur ye una de les cites más esperaes de la temporada.

Estes dos selmanes ente’l gran premiu d’Italia y la deceición de Ferrari de nun ganar delantre los tifosi ya’l gran premiu de Singapur, hai dos noticies (qu’en verdá ye una) que rescamplen perriba otres: Kimi Räikkönen nun va siguir en Ferrari pa 2019 y va ser pilotu de Sauber les dos prósimes temporaes. El sitiu déxailu a Charles Leclerc, dalgo colo que cásique tol mundo cuntaba. Ye una apuesta arriesgada polo mozu que ye’l pilotu monegascu, pero paez que lo fecho hasta’l momentu convenció del too a Ferrari.

Y si dalgo necesiten en Ferrari ye una victoria en Singapur. Nun hai nada confirmao pero suponemos qu’a partir d’agora Kimi va emplegase como ayudante de Vettel pa facer que l’alemán compense los puntos perdíos en carreres pasaes nes que tinía toles papeletes de facese cola victoria. Al llau, Mercedes, col tastu de ganar en territoriu Ferrari y d’una bon llabor d’equipu, una vegada más, per parte de Bottas. Toca aprovechar toles sos posibilidades en Singapur p’agrandar la diferencia tanto nel mundial de pilotos como nel de constructores colos coches coloraos.

Red Bull suel sacar ganancia de correr en Marina Bay y de fechu nel gran premiu d’Italia decidieron penalizar a Ricciardo camudando’l motor pa dir con elli frescu pa esti gran premiu. Lo que nun cuntaben que pasara ye que la unidá de potencia nun completara la carrera y Ricciardo tuviera que retirase. Taremos sollertes a lo que puedan facer equí, un escenariu que-yos suel ser favoratible.

Renault necesiten una bona carrera pa desquitase de les probes actuaciones del pasáu. Siguen cuartos pero tienen cada vegada más cerca a los sos persiguidores, lo que fai albidrar que la batalla por esi cuartu puestu nel mundial va tar perinteresante nesta ya en carreres vinientes. Haas yá tán namás qu’a diez puntos ya equí en Singapur tienen papeletes pa entrar en puntos y poder averase más entá.

McLaren tamién tien motivos pal optimismu nesti circuitu. Dempués de la confirmación de los pilotos pa 2019, les agues calmen un pocu ya torna l’atención a lo que pasa na pista ya’l trabayu por dir viendo en qué coses tienen d’ameyorar de cara a la prósima temporada. Les calterístiques del so monoplaza adáutense meyor a esti circuitu, polo que nun sedría ablucante velos en puntos, a lo menos con un de los coches.

Force India tamién tien bon historial en Marina Bay ya vienen con fuercia dempués de la so refundación. Siguen les duldes sobre los pilotos pa 2019, sobre too dempués del movimientu de Leclerc a Ferrari y Norris a McLaren. Anque nun hai novedaes, son munches les persones qu’esperen ver a dambos en parriella pal añu que vien. De xuru qu’en Singapur farán por dar razones pa la so renovación pa otra temporada más nel equipu de Silverstone. Ye importante rescamplar qu’en dos carreres, tres quedar ensin puntos pola so refundación, yá fueron quien a colocase perriba de tres equipos.

Toro Rosso tampoco nun sabe quién va tar al volante pa 2019 y Brendon Hartley tien muncha falta de consiguir una bona carrera tanto pa elli como pa’l so equipu. La falta de regularidá, sumao a la mala suerte que lu fai tar siempre nel centru d’accidentes que lu dexen fuera de carrera les más de les veces ensin culpa nenguna, fai que la so temporada tea siendo floxa y que les duldes sobre’l so futuru nun dexen de medrar. Marina Bay sedrá la so siguiente oportunidá.

Sauber va cuntar con un campeón del mundo nes sos files pa 2019 ya eso ye motivu d’arguyu nel equipu. Amás, tienen agora mesmo a una de les promeses d’esti deporte, polo que les sorrises tán mui xustificaes nel equipu suizu. Singapur tamién ye motivu de sorrisa por tolo que pueden consiguir equí. Anque tienen unos cuantos puntos de diferencia con Toro Rosso, ye realista pensar que puedan entrar ente los diez primeros con dambos coches viendo lo que vienen faciendo esta temporada.

Williams por fin consiguió sacar daqué positivo d’una carrera y n’Italia, gracies a la descalificación de Grosjean, dambos pilotos puntuaron. Tres puntos vitales pa los ánimos del equipu que va intentar repitir en Marina Bay. Ye complicao porque en verdá tolos pilotos tienen oportunidá de facer daqué curioso y los puntos van vendese caros.

Los horarios nun camuden, nun hai madrugones anque la carrera adelántase una hora:

VIENRES, 14/09/2018

LLIBRES 1: 10:30
LLIBRES 2: 14:30

SÁBADU, 15/09/2018

LLIBRES 3: 12:00
CLASIFICACIÓN: 15:00

DOMINGU, 16/09/2018

CARRERA: 14:10

Equí podéis atopar tola información sobre’l circuitu de Marina Bay y más abaxo les gomes pa esta carrera:

Tamos en Monza. El templu de la velocidá. Un de los circuitos onde más s’alienda Fórmula Un y un de los favoritos pa la xente amante d’esti deporte y casa de los tifosi.

Ferrari llega en bon momentu con Vettel acabante de ganar en Bélxica. Pesie al abandonu de Räikkönen, les sesiones de llibres fueron bastante curioses p’albidrar que los coches coloraos van volver a tar no cimero de la clasificación tamién equí col permisu de Mercedes. La escudería alemana, sicasí, paez dir un pasu per detrás y da por fecho que si quieren ganar van tener que trabayalo muncho o aprovechar dalgún erru de l’equipu italianu.

Monza ye sinónimu de velocidá, y d’eso saben bastante esti añu en Ferrari. L’estra de correr en casa ya’l puxu de los tifosi son los ingredientes que precisen na Scuderia pa sumar otra victoria y averase un pocu más a Hamilton nel mundial de pilotos y a Mercedes nel de constructores. Nengún de los dos va tenelo fácil y yá sabemos cómo terminen les victories que se dan por feches enantes de correr.

Red Bull vien entá col tastu del podiu de Verstappen y cola noticia de que Ricciardo va salir dende atrás na parriella’l domingu por cambiu de motor. Ye una decisión lóxica si pensamos que’l siguiente gran premiu ye Singapur, un circuitu nel que son muncho más fuertes. Como ellos mesmos declaren, quieren más sacrificar Monza, onde tienen menos enfotu en facer dalgo granible que nes curves y xiros más enrevesaos de Yas Marina.

Renault va tar sollerte a lo que faga Red Bull col nuevu motor, una versión qu’entá nin siquiera ellos montaron nos sos coches y supón un pasu alantre nel trabayu del equipu francés por afitase na cuarta posición del mundial. Nun puede despistase, porque Haas nun dexa d’atropar puntos y la opción de nun sumar con nengún de los pilotos yá nun ye válido pa siguir nesi cuartu llugar. Hülkemberg partirá con diez posiciones de penalización na salida pol incidente nel gran premiu belga.

Yá ye vezu cuntar col equipu estauxunidense ente los diez primeros nes sesiones del sábadu y nes carreres del domingu. Pesie a les duldes sobre’l futuru de Grosjean, l’equipu suma y sigui, y yá tienen a Renault bien cerca. La clave pa ellos ta siendo esa regularidá que pocos equipos llogren nesa parte medio de la tabla. Nun sumen munchos puntos, pero súmenlos cásique toles carreres y munches vegaes con dambos pilotos, dalgo que nel pasáu foi un ésitu pa equipos como Force India. En Monza van volver tar en toles quinieles.

McLaren cellebró’l xueves el nacimientu del so fundaor, Bruce McLaren, anque la verdá ye que l’equipu nun ta pa munches cellebraciones. Nada nun se comentó del futuru de Vandoorne entá, y anque hebo comentarios de qu’Ocon tuviera en Woking pa preparar el so asientu pa competir nun tardando paez que nun va ser en Monza cuando lu veamos montáu nel McLaren. Ye verdá qu’esta selmana pocu se faló en xeneral del mercáu de pilotos, pero de xuru qu’en Monza vamos resolver delles cuestiones, ente elles ésta.

En Toro Rosso pasa daqué asemeyao: les duldes entá siguen con Hartley, que nun tien aseguráu’l so asientu y cada carrera ye una reivindicación pa que lu dexen competir nel equipu en 2019. Nun ta na mesma posición Gasly, cola tranquilidá de saber que pa l’añu qu’entra va tar sentáu al volante d’un Red Bull. Un equipu con dos pilotos en situaciones bien distintes y qu’intenten amenorgar la distancia de ventidós puntos que yá los separen de McLaren.

Sauber tamién cuerre en casa y toca rellumar. Alfa Romeo aterriza con Sauber n’Italia y ye una ocasión especial pa dambos. La temporada ta siendo milenta vegaes más positiva que 2018, sobre too porque los dos pilotos son de facer carreres curioses y nun ye raro que puntúen. Ericsson ta faciendo un perbón llabor esti añu y paez que tener a Leclerc al llau ta motivándolu enforma, dalgo que de xuru va terminar ayudando a que tenga asientu pa 2019. En Monza, como dicimos, toca rellumar.

Force India tuvo en Spa una de les meyores clasificaciones y carreres en tiempu y amás xusto dempués de camudar el so nome. Anque perdió los sos puntos, yá namás necesita ún más pa ponese perriba de Sauber, dalgo que nun paez que vaiga costar facer en Monza. Dempués de tolos cambios y torgues d’esti añu, va cola ilusión d’aprovechar el bon momentu de Bélxica y ver si puede replicalu n’Italia.

Williams namás suma cuatro puntos nel mundial. Nin siquiera la perda de puntos de Force India los dexa abandonar esi últimu puestu. La so situación ye llaceriosa, anque en Bélxica hebo momentos bonos, especialmente pel llau de Sirotkin. La incertidume d’esta dómina nun ayuda nada a un proyeutu deceicionante pero al que toos tamos deseyando ver tener anque seya un pocu d’ésitu.

Con estes blimes llega Monza ensin descansu, la última de les paraes europees. Equí podéis atopar tola información sobre’l circuitu. Los horarios pa esta fin de selmana nun camuden:

VIENRES 31/08/2018

LLIBRES 1: 11:00
LLIBRES 2: 15:00

SÁBADU 01/09/2018

LLIBRES 3: 12:00
CLASIFICACIÓN: 15:00

DOMINGU 02/09/2018

CARRERA: 15:10

Pa terminar, equí vos dexamos la seleición de gomes pal gran premiu:

Yá tornó la Fórmula Ún y féxolo con un gran premiu que tuvo momentos per interesantes y la reivindicación del halo como ferramienta de seguridá, dempués de toles crítiques que recibió pola so estética. Suponemos que nun hai meyor manera d’afitase qu’amosando la utilidá que tien y paeznos que’l domingu quedó bastante claro.

Dempués de dominar tol fin de selmana les sesiones d’entrenamientos llibres, paecía mui claro que la pole del sábadu diba ser pa un Ferrari, con más lóxica’l de Vettel. Ensin embargu, l’agua foi la invitada que los monoplaces coloraos nun queríen ver y qu’en Mercedes recibieron con presto. El resultáu foi pole pa Hamilton, amosando otra vuelta lo bien que se-y da a Mercedes y sobre too al pilotu inglés les condiciones d’agua en pista. Otros que tamién aprovecharon bien l’agua pa clasificar arriba foron Ocon (terceru) y Pérez (cuartu) na que ye la meyor clasificación como equipu del agora nomáu Racing Point Force India. A los monoplaces roses dáse-yos bien Spa, y yá nel pasáu Fisichella consiguió una pole nel trazáu belga. Räikkönen namás pudo ser sestu per detrás del Haas de Grosjean que sumó otra bona sesión de clasificación siendo quintu. Per detrás los Red Bull y l’otru Haas y Bottas, que con penalización diba salir atrás ficiera lo que ficiera na clasificación.

El domingu alboreció seco y asina trescurrió la carrera. Como yá ye vezu esta temporada, la parte más intensa foi la salida. Y ye que volvimos a vivir escenes similares a les de 2012 cuando Romain Grosjean voló col so coche perriba’l Ferrari de Fernando Alonso. Esta vegada los protagonistes variaron un pocu. Hülkenberg, no que’l pilotu describió como un erru a la hora de calcular l’espaciu de frenada, chocó cola parte trasera del McLaren d’Alonso un pocu primero del primer xiru tres la salida, xusto’l mesmu escenariu qu’en 2012. Eso fexo que’l coche del asturianu volara pelos aires, pasando xusto perriba del Sauber de Leclerc y dexando delles marques nel so halo y la sensación d’aliviu de velu puestu pesie a toles crítiques del pasáu. Naide nun sabe qué tuviera pasao ensin halo, pero’l propiu Leclerc dixo que s’allegraba de tenelu en coche. Hülkenberg recibió una penalización de diez posiciones pal gran premiu de Monza y tres puntos de la so llicencia.

Aparte d’estos tres pilotos, esi xiru tamién trexo otros accidentes, como ún ente Ricciardo y Räikkönen, que terminó afeutando a dambos pilotos, que nun terminaron la carrera. Al pilotu australianu intentaron iguai-y el morru del coche, pero diba con vuelta perdida y l’equipu decidió retirar el coche. Bottas tamién tuvo un incidente con Sirotkin y recibió cinco posiciones de penalización pa la siguiente carrera n’Italia. El finlandés fexo una bona remontada pa terminar cuartu dempués de salir na parte d’atrás de la parriella.

Mientres l’incidente pasaba de la primer vuelta, los coches que nun tuvieron metíos nello siguíen el so camín nel trazáu de Spa. Vettel adelantó a Hamilton no que l’inglés describió “como si nun tuviera ellí”, amosando lo bien que diba’l Ferrari. Dambos Force India punxeron a Hamilton nerviosu y cásique pudieron adelantalu, pero l’inglés defendió bien la so posición. Más tarde, adelantolos Verstappen a dambos. Dempués de que saliera’l coche de seguridá y tolo que pasara nel incidente de la primer vuelta se limpiara, los monoplaces tornaron a competir. Y pocu a pocu foi mui obvio que Vettel tinía la carrera na so mano. Ensin alloñase muncho de Hamilton tampoco nun se vio amenazáu pol inglés en nengún momentu, nin siquiera na so parada en boxes, dalgo que suel ser clave pa Ferrari y au más fallen.

La carrera dempués del accidente foi tranquila, casi aburrida en dellos momentos, colos equipos intentando facer funcionar les sos estratexes. Vimos delles batalles en pista, sobre too protagonizaes por Bottas que foi quien más tuvo de trabayar pa esguilar na clasificación y bones maniobres d’Ericsson, que dixo esta selmana que decidió dexar de pensar nel bon campeonatu que taba faciendo’l so compañeru Leclerc pa enfotase en sí mesmu, dalgo que-y puede valir un asientu pa 2019.

Vettel foi’l primeru en ver la bandera a cuadros n’una carrera mui controlada pela so parte y amosando que’l Ferrari va mui bien. Hamilton tuvo de conformase cola segunda posición, y llidera al alemán nel campeonatu de pilotos por diecisiete puntos. El tercer llugar foi pa Verstappen, dalgo positivo que sacar del fin de selmana de Red Bull que tuvo más nel puntu de mira polo de fuera que polo visto en pista. Per detrás del holandés llegó Bottas, que como dicimos tuvo de remontar bien de posiciones, hasta trece, pa compensar la penalización. Los dos Force India nun pudieron subir al podiu, pero quedaron quintu (Pérez) y sestu (Ocon) y ye un bon resultáu dempués de toles dificultaes poles que pasaron les últimes selmanes.

Más abaxo, nos puestos sétimu ya octavu terminaron los Haas, Grosjean perriba’l so compañeru Magnussen. L’equipu estauxunidense nun para d’atropar puntos y yá tienen a Renault a tiru. La escudería francesa nun sumó puntos esti domingu, pues Sáinz terminó nel puestu once y Hülkenberg nin siquiera terminó la primer vuelta. Sí sumaron Toro Rosso con Gasly, que foi novenu, y Sauber con Ericsson, que zarró los diez primeros clasificaos siendo décimu. Los sos compañeros nun tuvieron tanta suerte. Hartley, anque tuvo bona parte de la carrera en puntos, nun pudo pasar de ser décimocuartu, mientres que Leclerc, como Hülkenberg y Alonso, nin siquiera pudo completar una vuelta.

Williams nun tuvo una mala carrera, anque sigue ensin puntos. Sirotkin tuvo bastante bien, quedando per delantre del so compañeru d’equipu y quiciás agarrándose a esi asientu col qu’espera quedase pa 2019. Pesie al incidente con Bottas, foi quien a terminar nel puestu doce. Stroll quedó xusto per detrás, nel trece.

Pa zarrar, McLaren. Esperábemos ver si Alonso, dempués d’anunciar la so retirada, de momentu, de la másima competición del motor, tinía un bon gran premiu. Spa yá tien pa elli alcordances amargues d’aquel accidente de 2012. Agora puede sumar les de 2018. Nel lláu de Vandoorne, otra carrera deceicionante pal pilotu belga que nun pudo nin brillar un pocu nel so gran premiu de casa. Esta selmana puede ser decisiva pal so futuru si, como s’especula, Ocon aterriza na escudería de Woking nel so llugar. De toles formes, non too pinta mal pa Vandoorne que podría tener un asientu en Sauber pa 2019, según los rumores de la eterna silly season. Sicasí, otru fin de selmana pa dexar al escaezu en McLaren.

Dexamos Bélxica atrás y yá tamos pensando n’Italia, nel templu de la velocidá, la tierra de los tifosi. En menos d’una selmana torna la Fórmula Ún. Demientres llega, equí vos dexamos los númberos del sábadu y del domingu en Spa:

Clasificación

Carrera

Cuando llegó’l momentu final de la carrera d’Hungría, tol mundu quedó cola sensación de que diba ser un branu tranquilu, ensin muncho que lleer nin falar, porque asina lo taben vendiendo dende los equipos. La realidá foi bien distinta (equí podéis informavos de los cambios que vamos ver na parrilla pa 2019) y yá sabemos el destín de dellos pilotos que va camudar un pocu’l dibuxu de la parriella d’esti añu. L’ausencia d’Alonso pal añu qu’entra y la separación de Red Bull y Ricciardo ye quiciábes lo más llamatible y de lo que más se va falar nesti fin de selmana de retornu de la F1 al míticu circuitu de Spa.

Aparte de marcar el fin del mes d’agostu ye tamién sinónimu del fin del parón formuleru y un de los circuitos pol que más nagua la xente aficionao a los monoplaces. Nel pasáu tuvimos carreres mui mítiques, carreres que nun lo fueron tanto, cola omnipresencia de la mítica Eau Rouge y tol misticismu que l’arrodia a ella y a toos y caún de los xiros d’esti trazáu.

Nun podemos evitar ponenos a pensar no que pasará d’equí a que veamos la bandera a cuadros n’Abu Dabi. L’añu pasáu pintaba perbién pa Vettel enantes de que too terminara en desastre pa Ferrari. Esti añu Hamilton ye’l que tien la ventaya y anque tamos en puntos estremaos nel tiempu, nun podemos nun rellacionar dambos casos. ¿Sedrá Hamilton quien a caltener una actitú frío énte Ferrari que, de xuru, van siguir lluchando con Mercedes por ganar les más de les carreres que queden?

La llucha pela victoria va tar ente les fleches platiaes y los monoplaces coloraos, pero nun podemos dexar fuera a Red Bull y a Ricciardo especialmente, agora que cuerre ensin presión nenguna pol so futuru. Sabe qu’en 2019 va tar en Renault, agora toca-y esfrutar tolo que pueda de lo que-y queda nel equipu de Milton Keynes. Y al llau, Verstappen, nel que siempre hai qu’enfotase.

Renault falaba de qu’a partir d’agora cualquier erru de nun puntuar puede facer que pierda’l cuartu puesto nel mundial de constructores que tanto ta costando amarrar. Y ye que Haas vien con fuercia y anque Grosjean entá nun ta confirmáu pa 2019 mesmo que Magnussen, paez que’l segundu va quedar y que’l francés va tener que dar motivos pa que lu escueyan a elli en cuenta d’a otros pilotos que tán esperando la so oportunidá, ente ellos Charles Leclerc.

Force India pasa a llamase Racing Point Force India, como ya vos comentemos nel post sobre’l mercáu de pilotos pa 2019, y nun va cuntar con Bob Fernley pal añu qu’entra, dalgo que suma duldes a lo que vamos tener na prósima temporada nel equipu de Silverstone. Les duldes económiques paez que son cosa del pasáu, pero nun hai pilotos oficiales entavía ya esto, sumao a lo de Fernley, nun ayuda muncho a la estabilidá del equipu, que ta teniendo una temporada bastante complicada. Amás, Pérez y Ocon, como munchos otros pilotos, van tar corriendo pol so asientu pa 2019, dalgo que da un estra d’emoción a esti gran premiu.

Podemos dicir lo mesmo de McLaren. Dempués del anunciu d’Alonso y la confirmación de Sáinz pa 2019, queda la dulda de lo que va pasar con Vandoorne. Obviamente, l’equipu nun diba dar el pasu de tomar una decisión enantes de Bélxica, anque sólo seya pola consideración al pilotu belga que cuerre en casa esti fin de selmana. Sicasí, les coses nun tán tan clares pa Monza y nun sorprendería ver un cambiu de pilotu o una confirmación pa 2019 que nun incluyera a Vandoorne. A la motivación de correr énte’l so públicu súmase la de correr pol so asientu.

Amás, Lando Norris va debutar na primer sesión d’entrenamientos llibres, un fechu que munchos quieren ver como la confirmación de que va ser quien acompañe a Sáinz en McLaren pa 2019. La realidá ye que les coses en F2 tán diendo-y bien y tien posibilidaes de facese col campeonatu dalgo que, de producise, lu obligaría a salise de la categoría a la espera de dalgo meyor…¿en Fórmula Ún? La lóxica diz que terminará en McLaren, si non esti añu, nun tardando muncho y por eso otros equipos lu tienen nel puntu de mira, dalgo que nun presta na escudería de Woking, que nun quier soltar a un pilotu nel que tien puestes munches esperances.

Toro Rosso ye quiciás l’equipu que más duldes tien pa 2019 no que cinca a los sos pilotos. Gasly promociona y marcha pa Red Bull y nun hai confirmación de que Hartley vaiga siguir, anque tienlo agora más fácil que si’l francés continuara na escudería. Cuntando con que Toro Rosso ye una plataforma de promoción de pilotos nun sorprendería ver a dos pilotos “desconocíos” na F1 pa 2019.

Sauber tampoco nun tienen claro lo qu’espera en 2019. De toles formes, aterriza en Spa con ganes de nun descolgase y siguir sumando puntos. Amás, dambos pilotos tienen la motivación de tar corriendo col güeyu puestu nel añu que vien, y necesiten facer una bona carrera pa que la xente que mueve los filos de la F1 nun los escaeza. Paez que Leclerc tien les coses más de cara qu’Ericsson, pero yá se sabe que na F1 too cambia mui rápido y, a vegaes, ensin que naide lo espere.

Williams ye quien menos titulares ta xenerando, somorguiáu nos sos propios problemes col rendimientu del coche y la posible marcha de Stroll, ya’l so capital, pa Force India. La situación nun ye fácil pa un de los equipos más míticos y más apreciaos de la parriella. Les duldes qu’a estes altures de la temporada tienen tolos equipos, nel casu de Williams tienen de ser llaceriantes con un coche que nun rinde en pista ya ensin saber qué pilotos van poder atrayer pa 2019.

Acabó’l branu formuleru, tornaron les carreres. Y nun hai meyor sitiu pa facelo que Spa. Equí vos dexamos tola información sobre’l circuitu y más abaxo los horarios pa tol fin de selmana:

VIENRES, 24/08/2018

LLIBRES 1: 11:00
LLIBRES 2: 15:00

SÁBADU, 25/08/2018

LLIBRES 3: 12:00
CLASIFICACIÓN : 15:00

DOMINGU, 26/08/2018

CARRERA: 15:10

Ya éstes son les gomes escoyíes pal gran premiu:

La xente que siguimos la Fórmula Uno tamos empezando a avezanos un pocu a aguantanos de dicir qu’una carrera ta siendo aburrida porque suel pasar que nel últimu tramu d’ella pase dalgo que camuda un pocu la so hestoria.  Hungría nun foi un gran premiu perinteresante de principiu a final, hebo dellos momentos qu’engancharon ya otros que daben ganes de pasalos rápido. La sesión del sábadu de clasificación foi n’agua y dexónos unos Mercedes bastante más fuertes de lo que s’esperaba o quiciábes, ya ensin quitar mérito a les fleches platiaes, unos Ferrari más febles de lo que paecía nes sesiones llibres. El sábadu tamién nos dexó a los dos Toro Rosso dientro de los diez primeros, un gran esfuerzu pela so parte, y la deceición de Ricciardo, que con tráficu en pista cuando taba faciendo la so vuelta y torgáu por una bandera mariella, nun pudo pasar a Q3.

Pal domingu nun daba agua, polo que podíemos esperar que los Ferrari realmente pudieran facese fácilmente cola victoria. La salida foi llimpia, con esceición de dalgún toque ente los coches de la segunda mitá de la tabla; ente ellos Ricciardo, al qu’Ericsson pegó col so coche na parte izquierda del Red Bull ensin más consecuencies. Hai que dicir qu’el pilotu suecu nun pudo facer otra cosa yá que lu taba zarrando un McLaren pel llau izquierdu.

Pela cabeza, Hamilton nun se movió del primer puestu y Bottas defendióse bien de dambos Ferraris, anque Vettel terminó adelantando al so compañeru Räikkönen al pocu tiempu. Otros pilotos que consiguieron remontar places foron Hülkenberg col so Renault y Fernando Alonso, que salía once y rápido metióse dientro de los puntos.

Foi una carrera onde los abandonos llegaron llueu. El primeru en quedar fuera foi Charles Leclerc. El sábadu tuvo una sesión de clasificación bastante probe, quedando fuera en Q1. Yá comentemos en cróniques pasaes que nun se-y da bien l’agua, y pudimos comprobalo otra vuelta na clasificación d’esti gran premiu. De toles formes, la carrera terminó bien pronto pa elli al quedar fuera na segunda vuelta. Eso dexaba a Ericsson, que na salida yá tuvo un incidente con otru coche, pa intentar atropar puntos pa Sauber. El coche de Leclerc quedó paráu en pitlane, polo que nun fexo falta que nengún coche de seguridá apaeciera.

Poques vueltes más tarde, cuando les coses yá diben tomando forma y Hamilton nun dexaba de meter distancia con Bottas, que siguía segundu, víemos a Max Verstappen, que rodaba xusto per detrás de Räikkönen en quintu puestu y tuviera fecho una perbona salida, dir mui despacio y anunciar per radio que taba perdiendo potencia nel coche. Red Bull confirmó pocu dempués que fuera un problema col MGU-K. Con Verstappen fuera y Ricciardo teniendo que remontar posiciones dende fuera de puntos paecía que Red Bull tiníen posibilidaes mui pequeñes de sacar daqué positivo d’esta carrera, una onde se suponía que diba rendir muncho meyor. L’abandonu de Verstappen provocó un coche de seguridá virtual ensin mayor consecuencia y que Horner llanzare dalgún puñal a Renault en directu na retresmisión británica, dando a entender que los motores que recibiíen nun tenién la calidá pola que pagaben. Verstappen tamién faló nel mesmu sen.

Delles de les coses que podemos destacar de les vueltes centrales de carrera son les batalles pela parte media, munches de les que tuvieron a Ricciardo de protagonista polos sos adelantamientos y pola llucha con otros pilotos, por exemplu con Alonso o Magnussen. Foi una carrera bastante tranquila n’esi aspeutu, onde cásique nun hebo contautu ente coches nos adelantamientos.

El primeru en parar foi Räikkönen, que diba condicionáu pola falta de llíquido pa beber nel coche (completó la carrera ensin poder beber nada). Siguiólu Bottas. Vettel y Hamilton optaron por allargar más la so parada, sobre too nel casu del alemán que llegó a esperar a la vuelta 39 pa entrar, aprovechando pa lliderar la carrera ya intentar meter tiempu cuando’l pilotu inglés fexo la so parada.

Ferrari cuntaba con parar más tarde que los sos rivales d’arriba y salir per delantre de Bottas, pero’l tráficu en pista (Sáinz foi ún de los pilotos que más guerra dio ya falóse de que taba inorando les banderes azules) y una parada mui lenta del equipu ficieron que saliera per detrás de dambos Mercedes. Nun yera la llucha que tiníen en mente pero diba convertise na pesadiella de Vettel pal restu de carrera yá que nun foi quien a pasar a Bottas, que fexo un perbón trabayu defendiéndose del alemán.

Ensin embargu, el tramu más llargu ensin parar fízolu Ricciardo, qu’aguantó hasta la vuelta cuarenta y cinco pa montar gomes nueves, n’un intentu por averase al podiu nes últimes vueltes de carrera.

Dos equipos que ficieron bon trabayu en pista, dexando momentos entreteníos foron Toro Rosso, con un Gasly perinspiráu, y McLaren, con dambos coches en puntos. La mala suerte de toles formes cebóse otra vuelta con Stoffel Vandoorne que tuvo de retirase cuando diba octavu por un problema cola caxa de cambios, na vuelta cincuenta y ún. El so abandonu provocó un coche de seguridá virtual que nun alteró pa nada la carrera ente otres coses pol pocu tiempu que duró. De fechu, Kimi Räikkönen quexóse al equipu de que nun lu avisaron de que terminara el coche de seguridá virtual ya l’equipu respondió que fuera tan rápido que nun se dieran cuenta.

Dicíemos nel primer párrafu d’esta crónica que tábemos avezándonos a aguantar a les últimes vueltes de carrera pa ver si pasaba daqué interesante. Hungría nun deceicionó. Los protagonistes fueron Bottas y Vettel en primer llugar. La llucha ente dambos pilotos paecía vista pa terminar col finlandés segundu ya’l pilotu de Ferrari terceru pues esti nun atopaba forma d’adelantar ya’l so ritmu nun yera l’esperáu que vimos demientres el fin de selmana. Ensin embargu, a poques vueltes del final, Vettel adelantó a Bottas y cuando esti quiso intentar devolver l’adelantamientu, buscó sitiu onde nun había y con un Vettel totalmente ayenu a la so posición, chocó contra la parte trasera del Ferrari. Nengún de los dos coches sufrió daños importantes que los dexaran fuera de pista, anque’l que pior quedó foi Bottas, al que pasó llueu Räikkönen.

Ricciardo rodaba quintu y tardó poco en ponese a tiru de Bottas. El Mercedes del finlandés yera mui inestable por cuenta’l golpe y n’un xiru onde Ricciardo lu taba adelantando, terminó chocando tamién con elli, dexando a Ricciardo na escapatoria, pero ensin echalu de carrera. Pa suerte del australianu, Gasly vinía a muncha distancia y nun perdió’l so puestu. De fechu, ganólu porque Mercedes pidió a Bottas que devolviera la posición a Ricciardo, n’un intentu de minimizar les consecuencies del choque de cara a los comisarios que tres la carrera decidieron penalizalu con diez segundos, dalgo que de toles formes nun afeuta a la so clasificación.

Hamilton ganó una d’eses carreres que más-y presten, tranquiles y segures pa elli. Llidera’l campeonatu con una diferencia de venticuatro puntos con Vettel que ye segundu. Räikkönen terminó terceru ya’l Red Bull de Ricciardo cuartu siguíu por Bottas.

Rescamplamos el bon trabayu de Gasly que terminó sestu, col so compañeru n’undécimu llugar, y tamién de Haas, que metió a dambos pilotos en puntos. Magnussen terminó séptimu y Grosjean décimu. El pilotu danés amosó que ta deprendiendo de les crítiques que dicen que ye peligrosu en pista y vímoslu defendese y adelantar de forma mui llimpia.

McLaren consiguió puntos con Alonso, que terminó octavu. L’equipu tuvo una bona actuación y de fechu consiguió facer funcionar la so estratexa de paraes, dexando a Haas y Renault per detrás. Grosjean quexábase al equipu de cómo yera posible que quedara per detrás d’ellos y Haas nun pudo más que dicí-y que fueran meyor qu’ellos na estratexa.

Renault rindió bastante bien, pero nun consiguieron tornar esi rendimientu en puntos. Sáinz consiguió terminar novenu, pero Hülkenberg topose con Ocon, que nun lu dexó pasar hasta qu’a última hora pudo facese col puestu doce, probe resultáu pa les pretensiones de Renault que ven como Haas se ta acercando a ellos nel mundial de constructores.

Force India tuvo un fin de selmana complicáu de principiu a final. Los problemes esternos paez que quedaron espeyaos en pista onde nengún de los dos pilotos pudo siquiera pensar nos puntos. Ocon terminó nel puestu trece siguíu de Pérez nel catorce. De xuru que’l parón braniegu va sirvir pa intentar solucionar los problemes financieros a los que tien d’enfrentase y pa buscar rematar la temporada de la meyor manera posible. De momentu ta metiendo distancia con McLaren al que saca siete puntos y colócase sestu na clasificación de constructores.

Sauber nun brilló nesti gran premiu ya l’abandonu de Leclerc, súmase los problemes d’Ericsson pa sacar ritmu al coche dañáu pol golpe con Ricciardo. El pilotu suecu terminó quince per delantre, eso sí, de dambos Wiliams.

Los de Grove otra vegada fueron últimos. Stroll salió de pitlane ya’l so compañeru consiguió terminar per delantre, nel puestu dieciséis. Los rumores qu’averen al pilotu canadiense a Force India nun ayuden demasiao a los intereses del equipu, que sigui ensin medrar nin consiguir dalgún resultáu positivu.

Con Hungría llegamos al final de la primer parte de la temporada. Los equipos descansen agora cuatro selmanes hasta finales del mes d’agostu cuando la Fórmula Uno retorna nel circuitu de Spa, en Bélxica. Hasta que llegue esi día, tai sollertes a esti blogue pa informavos de lo que va pasando cola silly season y más noticies de Fórmula Uno.

Enantes de dir de vacaciones, equí vos dexamos tolos datos que dexaron sábadu y domingu n’Hungría:

Clasificación

Videu colo más destacao

Carrera

Ensin casi recuperanos de lo vivío n’Alemaña, llegamos a Hungría pal últimu gran premiu enantes de que la Fórmula Uno marche de vacaciones. Hungaroring suel dar bon espectáculu, anque tamién tien dexao carreres bastante aburríes, y ye ún de los circuitos favoritos de públicu y pilotos en xeneral.

Mercedes llegua a Hungría entovía col tastu de la victoria de Hamilton, más importante entá por la posición dende la qu’empezó la carrera y pol resultáu negativu de Vettel, del que se distancia agora diecisiete puntos. Nun ye un mal circuitu pa Mercedes esti lo qu’ensin duldes van aprovechar pa sumar otra victoria, dientro lo posible más controlada y tranquila que la d’Alemaña. Dambos pilotos tienen garantizáu’l so futuru na escudería alemana dempués d’anovar los sos contratos, polo qu’agora la so única preocupación ye precisamente sumar puntos y ganar carreres.

En Ferrari lleguen afeutaos pola muerte de Sergio Marcchionne, qu’hasta fai bien pocu yera’l so presidente, y por un gran premiu alemán negativu nel llau de Vettel. De toles formes, equí preséntase-yos otra oportunidá pa nun dexar que dambos campeonatos queden nes manes de Mercedes y col bon rendimientu que lleven amosando hasta agora, errores aparte, ensin duldes tienen munches posibilidaes de victoria.

En Red Bull entavía siguen tascando la cabeza por nun saber qué ye lo que ta pasando nel coche de Ricciardo pa que nun dexe de da-y problemes gran premiu tres gran premiu. N’Alemaña l’australianu nun ye que tuviera munches posibilidaes de facese cola victoria, pero xurden munches duldes sobre la fiabilidá del so monoplaza, que paez ser el que lleva tola mala suerte esti añu. Verstappen tampoco nun ye que tea teniendo un añu tranquilu, anque sí ye verdá que ta teniendo menos altibaxos nestes selmanes ya’l coche paez tar respondiendo meyor. Hungría nun se-yos da mal y col pasu les carreres cada vegada queden menos oportunidaes de facese con victories que los dexen averase un pocu más a los dos primeros polo que nun-yos queda otra qu’intentar lluchar por tar no más alto del podiu’l domingu.

Pela parte medio de la tabla, Renault sigui cola ventaxa y la tranquilidá de ser quien meyor lo ta faciendo hasta agora de los equipos medianos. Tienen un colchón bultable con Force India y Haas, pero nun tán puntuando con dambos pilotos de manera regular polo que nun pueden relaxase. Force India y Haas tán agora mesmo empataos a puntos. Force India ta recuperándose pocu a pocu del baxón de la primer parte de la temporada, anque entá nun tán al altor de lo que vimos l’añu pasáu. Hungría puede ser un bon escenariu pa sumar un bon puñáu de puntos que los dexe distanciase de Haas y allegase a Renault. Haas pel so lláu, sigue amosando un bon rendimientu, sobre too’l sábadu, anque nun terminen de rematalo los domingos. Yá ye vezu velos dientro de los diez primeros nes sesiones de clasificación, pero nun consiguen facer lo mesmo en carrera, dalgo perimportante si quieren pasar a Force India y poner n’apuros a Renault.

McLaren tuvo un fin de selmana bastante negativu n’Alemaña. L’equipu decidió que pa Hungría van cambiar el chasis a Vandoorne, pues paez que’l so coche ta teniendo problemes de rendimientu que ta afeutando a los sos resultaos. Cuiden que con esi cambiu, les coses van ameyorar pal pilotu belga, que ta necesitáu de puntos y d’una bona carrera pa recuperar la confianza en sí mesmu como pilotu y de la xente que ta dientro de la Fórmula Uno. A Alonso dase-y bien esti circuitu y nun sedría d’estrañar que consiguiera puntuar tamién nesta ocasión pesie al baxu rendimientu del coche en munchos grandes premios.

Toro Rosso tamién necesiten un bon gran premiu onde borrar duldes y problemes. Naide nun cuntaba con que les coses fueren dir perfeutamente con Honda dende’l principiu, anque sí que ye verdá que tuvieron delles carreres curioses, pero’l procesu va diendo despaciu y afeuta a los pilotos que nun consiguen los resultaos que s’esperen. De toles formes, el puntu de Hartley nel gran premiu d’Alemaña ye enfotu suficiente pa mirar pa Hungría con optimismu.

Sauber ta consiguiendo sumar puntos casi cada gran premiu, si nun ye con Leclerc ye con Ericsson, que pasín ente pasu va faciendo por ameyorar les sos actuaciones en carrera. La escudería suiza, ensin tar faciendo coses increyibles, nun dexa de dar pasos alantre, ameyorando con cada gran premiu y poniéndose a tiru de Toro Rosso y McLaren nel mundial de constructores.

Nel casu de Williams, les posibilidaes de ver una meyora pa esta temporada paecen cada vegada más pequeñes, por nun dicir nules. L’equipu ta siendo oxetu de rumores que falen de que Stroll taría buscando’l so futuru n’otra escudería, ya’l de Sirotkin nun paez tar tampocu aseguráu. Fálase otra vuelta de Kubiça como opción, pero paeznos que lo que necesita l’equipu enantes de nada ye entender qué ye lo que-yos ta fallando esti añu pa que carrera tres carrera ufran una imaxe más probe y lloñe de lo que teníemos visto en temporaes pasaes.

N’Hungría siguimos col horariu européu:

VIENRES, 27/07/2018

LLIBRES 1: 11:00
LLIBRES 2: 15:00

SÁBADU, 28/07/2018

LLIBRES 3: 12:00
CLASIFICACIÓN: 15:00

DOMINGU, 29/07/2018

CARRERA: 15:10

Equí podéis atopar tola información sobre l’Hungaroring y más abaxo les gomes escoyíes pa esti gran premiu: