Category: Carreres

Nun hai meyor cosa que predicir qu’una carrera va a ser aburrida pa que termine siendo entretenida. Abu Dhabi nun suel ser escenariu de grandes premios d’esos que queden na memoria del mundu formuleru pero esti domingu tuvimos una exceición a mou de remate pa esti 2018 que yá termina.

Hamilton féxose con otra victoria, la oncena nuna de les sos meyores temporaes hasta’l momentu, si non la meyor. Dempués de convertise en campeón en México, el restu de carreres yeren pa elli una excusa pa siguir atropando puntos y valtando records, ente ellos el de ser el primer pilotu en pasar de los cuatrocientos puntos n’una temporada.

La sesión de clasificación del sábadu nun dexó munches sorpreses nin perriba nin per baxo. Ferrari, sobre too nel casu de Vettel, nun tuvo un vienres curiosu, paecía que nun tinía ritmu, pero consiguió a lo menos ponese segundu per detrás de Hamilton. La pole de Hamilton sumaba la undécima d’esta temporada. Ente los diez primeros, Leclerc y Ocon destacaben ente’l restu de pilotos habituales neses posiciones.

La salida foi llimpia, anque complicada pa Verstappen. El so coche entró en mou seguridá lo que fexo que perdiere posiciones colos pilotos que tinía per detrás. Ensin embargu, nun tardó en recuperales, agasayándonos con dellos momentos en pista con Ocon onde dambos pilotos alternaron posiciones y adelantamientos que nos tuvieron aguantando l’aliendu por ver en qué terminaba esa batalla. Anque sí hebo un momentu de contautu, nengún de los dos foi más allá de dexar en pista tola tensión vivida dende Brasil.

Tamién hai que destacar los adelantamientos de pilotos como Leclerc a Daniel Ricciardo, anque llueu nun valiera pa muncho pal pilotu de Sauber que rápido diba ser adelantáu. Nesti intre, per detrás d’estos dos pilotos, viníen Nico Hülkenberg y Romain Grosjean lluchando por posición. La distancia ente ellos yera tan escasa qu’ún de los xiros terminó con Hülkenberg rodando hasta les barreres y quedando boca baxo mientres el so coche echaba fumu y apaecía daqué fueu pela parte l’escape. Por suerte, el pilotu nun sufrió dañu nengún y l’incidente foi xulgáu como eventu de carrera, ensin más consecuencia. Nesti momentu tuvimos el primer coche de seguridá, que permitió a unos cuantos pilotos aprovechar pa parar y montar gomes pa dir hasta’l final de carrera.

Anque tuvimos dellos cambios de llíder, paecía bastante obvio que Hamilton tinía la carrera fácil. Cola retirada de Räikkönen poques vueltes dempués del incidente del principiu, otru garrapiellu de pilotos entró a facer la parada obligatoria al activase’l coche de seguridá virtual.

En Ferrari intentaron el overcut, parando primero de que Bottas lo ficiera, pero una parada más llarga de lo normal nun ayudó a esi llabor. Sicasí, tampoco Bottas nun tuvo brillante nesti gran premiu y a última hora foi perdiendo posiciones por nun poder sacar más de les gomes hasta quedar quintu, per detrás de los dos Red Bull.

La victoria de Hamilton foi bastante cómoda y Vettel tampoco nun tuvo mayor problema pa facese col segundu caxón del podiu, que completó Verstappen. Ricciardo quedó cuartu y dexó claro’l bon momentu de forma col que termina Red Bull pesie a los problemes del pilotu australianu col so coche.

A los abandonos de Hülkenberg y Räikkönen, sumamos el d’Ericsson, que nun pudo poner bon remate a una temporada bastante completa y positiva nel so llau del garaxe. Esteban Ocon tuvo qu’abandonar delles vueltes dempués del pilotu suecu de Sauber y tamién quedó pel camín Pierre Gasly, cuando a poques vueltes del final el so coche empezó a echar fumu.

Amás, Fernando Alonso recibió tres penalizaciones de cinco segundos cada una por ganar ventaya diendo por fuera del trazáu. Sicasí, l’asturianu terminaría nel puestu once, a les puertes de los puntos na so última carrera, pel momentu, na Fórmula Un.

Amás de los yá nomaos cinco primeros, pa completar los diez primeros atopamos a Carlos Sáinz, na so meyor clasificación del añu, en sexta posición. Per detrás, Charles Leclerc y Sergio Pérez en sétimu y octavu llugar, y los dos Haas pa zarrar les posiciones de puntos, n’una bona actuación del equipu estauxunidense.

Alonso peleó con Magnussen pol últimu puestu que daba drechu a puntos, pero les penalizaciones que recibió torgaron esi intentu, y tuvo de conformase con ser undécimu mientres el so compañeru, Vandoorne, que foi protagonista d’un de los meyores adelantamientos del gran premiu, terminaba nel puestu catorce.

L’únicu Toro Rosso en ver la bandera a cuadros, el de Brendon Hartley (que yá sabemos que va a ser sustituyíu por Alexander Albon pal añu que vien), terminó nel puestu doce, xusto per detrás d’Alonso pero con distancia abondo con elli y los Williams de Stroll y Sirotkin foron décimoterceru y décimoquintu.

La competición termina, pero l’actividá sigui porque’l martes 27 ya’l miércoles 28 tenemos los test d’entrenamientu nel circuitu de Yas Marina, onde yá vamos ver a los equipos colos sos pilotos pa 2019. Tai sollertes al blogue onde vos informaremos de lo que dean de sí estes dos sesiones.

Demientres, equí vos dexamos tolos númberos del gran premiu d’Abu Dhabi 2018:

Clasificación

Carrera

Cuando una temporada echa a andar en marzu, naide nun piensa na última carrera del añu y paez que queda un mundu hasta que llegue. Sicasí, la velocidá qu’acompaña a los monoplaces tamién va col tiempu y equí tamos, faciendo la última previa d’esta temporada 2018.

Va ser un gran premiu especial pa munchos pilotos. Ente ellos, ensin duldes, pa Fernando Alonso que va correr la que, de momentu, va ser la so última carrera en Fórmula Un dempués de diecisiete años na categoría. Van sucedese los homenaxes al pilotu, empezando pola so escudería que va vistir al so monoplaza pa la ocasión.

Pero nun va ser l’únicu en despidise: el so compañeru Stoffel Vandoorne marcha a competir a la Fórmula E y entavía nun sabemos qué va pasar colos pilotos de Williams y con Brendon Hartley. Marcus Ericsson va dar un pasu atrás como primer pilotu, pero va siguir venceyáu a la F1 y vamos ver delles cares nueves. Equí vos vamos informando de tolos cambios pal 2019.

Col campeonatu resueltu en dambes categoríes paez que llegar a Abu Dhabi nun ye quiciábes la opción más interesante. Ye un circuitu mui vistosu, casi como de cuentu cuando atapez pero que nun nos tien dao carreres prestoses. Entavía queden coses por confirmase nel campeonatu de pilotos, nel qu’una carrera tovía puede facer diferencia, pero la verdá ye qu’aterrizamos nel circuitu de Yas Marina con bien poques expeutatives.

Sicasí, hai vegaes nes que, precisamente esi nun tener nada qu’ufrir termina dando carreres prestoses, pol relaxu de los pilotos que namás salen a pasalo bien y despidise d’una temporada que foi más o menos bona pa caún d’ellos.

En Mercedes tienen milenta motivos pa salir con ganes a Abu Dhabi a rematar una temporada na que la dupla equipu-pilotu tornó a dar un resultáu positivu. Bottas pel so llau, siempre un pocu a la solombra, fará por consiguir una victoria pa poner el toque positivu que-y falta al so 2018.

Ferrari yá tienen mente y coraes nel coche de 2019 y nos cambios de pilotos: cola llegada de Charles Leclerc, espérase muncha competición dientro del propiu equipu, lo que nos paez que siempre ye bono, sobre too porque Vettel quiciábes necesita esa presión de nun sintise favoritu. Mesmo que Mercedes, esta carrera puede servir pa terminar otru añu más nel que quedaron a les puertes del campeonatu y que, esperamos, va da-yos pa pensar en cómo igual los errores qu’en munches ocasiones dexaron la victoria nes manes de les fleches platiaes.

Red Bull entama dende que termine la carrera del domingu la so nueva etapa con motores Honda. Viendo la evolución na escudería hermana, son munches les voces que creen que l’equipu de Milton Keynes puede aspirar a muncho na temporada viniente. El pasáu con McLaren quedó atrás y agora Honda namás mira hacia delantre con dos equipos a los que dar motores. 2019 puede ser l’añu de la so consolidación, otra vegada, na F1. Abu Dhabi va ser amás la última carrera de Daniel Ricciardo que va lluchar por compensar les deceiciones d’abandonos en grandes premios pasaos col primer caxón del podiu.

Renault ye otru de los equipos que más atención va llevar en 2019. Cola entrada de Ricciardo ya’l potencial que s’espera d’ellos, esti cuartu puestu consiguíu en 2018 bien puede repitise (si non dir a más). Na última carrera del añu, de despidida del equipu pa Sáinz, la escudería francesa buscará confirmar que nun son cuartos por casualidá y que’l so rendimientu foi n’ascensu col pasu les carreres.

Haas sigui un pocu l’exemplu de Renault, y anque tuvo carreres bastante desastroses, ye evidente que’l potencial del coche ta ehí y que cada añu consiguen superar l’anterior. Pa un equipu tan mozu nun dexa de ser positivo terminar quintu na clasificación y calteniendo a los dos pilotos, sólo podemos esperar coses bones pa 2019. N’Abu Dhabi, toca esfrutar esi quintu puestu y atropar, si ye posible, otru bon númberu de puntos.

McLaren va a tar nel puntu mira d’esti gran premiu polo que yá cuntemos de la despidida d’Alonso ya les coses que lleven faciendo nes dos últimes selmanes a mou d’homenaxe. El domingu va ser un día especial pa tol equipu ya’l fin d’una etapa que munchos cuiden nun se repita. El períodu dende que Honda entró otra vegada a la F1 allargose hasta esti, yá con motores Renault, y que vieno a confirmar que’l problema con Honda nun yeren tanto los motores como la falta d’entendimientu. Con dos nuevos pilotos pa 2019 y munches expectatives nel coche que puedan preparar, n’Abu Dhabi va centrase too en que tanto Alonso como Vandoorne tengan un bon fin de fiesta.

Force India pasó por munches coses esta temporada, pero la so recuperación dende que perdieran puntos a mitá de temporada ye una de les que más rescamplen. El rendimientu de los sos pilotos nun foi ideal, sobre too si lo comparamos col del añu pasáu pero nun dexó de ser positivu en munchos aspeutos. Coles polémiques qu’arrodien a la escudería últimamente (ente l’actuación d’Ocon en Brasil, el so futuru, el futuru de Pérez y la posible llegada de Stroll) de xuru va intentar poner fin a la temporada de la meyor manera: dientro de los diez primeros.

En Sauber tovía nun se creen que tean a piques de rematar una temporada que pa ellos foi mui positiva en tolos sintíos: la presencia de Leclerc sacó lo meyor d’Ericsson, qu’esti añu tuvo actuaciones bastante brillantes, ya’l pilotu monegascu confirmó que lo que víemos en categoríes inferiores nun yera casualidá. Con toa esta combinación, el futuru pa Sauber ye curiosu, cola llegada de Giovinazzi ya’l retornu de Räikkönen y con un coche que promete. De momentu, Abu Dhabi ye la última oportunidá d’amosar que, esti añu sí, Sauber puede competir con equipos con más presupuestu y que tien, agora mesmo, una de les pareyes de pilotos que más aplausos arrancaron esta temporada.

Sicasí, Sauber nun puede despistase porque Toro Rosso entá nun se rindió. Ye probablemente l’equipu que más piensa en sacar puntos pa poder pasar a Sauber na clasificación y maquiellar un pocu’l so puestu ente los tres últimos. Sicasí, ser llaboratoriu de pruebes pa Red Bull valió-yos pa conocer el potencial d’Honda y anque pa 2019 entavía nun tienen confirmáu a Hartley, como en carreres pasaes, el pilotu neozelandés va tar compitiendo pol so asientu.

Nun sabemos cuanto hai que Williams ta pensando na temporada 2019 y pa los de Grove esti últimu gran premiu va ser namás el final d’una temporada desastrosa. El xueves por fin conocíemos quien diba acompañar a George Russell en 2019, Robert Kubiça, n’un retornu esperáu por munchos y con milenta expectatives. Nel equipu inglés el trabayu yá ta entamáu pa dar los pasos necesarios pa devolvelos al rendimientu d’años pasaos. La cita nel desiertu, cuando termine, de xuru va sacar más d’un suspiru d’aliviu de pensar que lo peor, de momentu, yá pasó y que 2019 ye una fueya en blanco.

La última carrera del añu dispútase nel circuitu de Yas Marina. Podéis atopar información sobre’l trazáu equí y apuntar los horarios pa tol fin de selmana que son:

VIENRES, 23/11/2018

LLIBRES 1: 10:00
LLIBRES 2: 14:00

SÁBADU, 24/11/2018

LLIBRES 3: 11:00
CLASIFICACIÓN: 14:00

DOMINGU, 25/11/2018

CARRERA: 14:10

Y la última seleición de gomes de la temporada:

Quien pensara que por tener el campeonatu de pilotos resueltu les carreres diben facese más aburríes (dalguna persona entrugaríase si eso ye posible) confirmó ayeri que, a lo menos nel casu d’Interlagos, nun diba ser asina. Nun tenemos munches ganes puestes no que podamos ver n’Abu Dhabi en dos selmanes, pero’l circuitu brasileñu dexónos una carrera perentretenida.

La sesión de clasificación yá dio bastante de sí, anque foi Hamilton quien se fexo col primer puestu, siguíu del Ferrari de Vettel ya con Bottas terceru. Paecía que podíemos atopanos con una carrera onde Mercedes iba rematar dafechu’l campeonatu de pilotos, y anque foi asina, el guión camudó un pocu.

A Red Bull nun se-yos da mal Interlagos, magar el domingu partíen dende la quinta posición de Verstappen, y un cachu más atrás nel casu de Ricciardo, por penalización. Deceicionaba’l sábadu, pero non el domingu.

La salida del gran premiu, soleyera dempués de que se falara d’amenaza d’agua, foi pa Hamilton, que foi metiendo distancia rápido col restu de pilotos que tinía per detrás, engarriaos entre ellos. Vettel perdió rápido la segunda posición con Bottas, y nun tardando diba pasalu Räikkönen. L’alemán nun tuvo una carrera mui inspirada y la estratexa de Ferrari de salir con gomes distintes al restu tampoco nun dio pa tanto como esperaben. Verstappen salió tamién inspiráu y pasín ente pasu foi faciéndose güecu na clasificación, adelantando a pilotos en pista, controlando’l desgaste de les gomes y faciéndose cola primer posición de la carrera. Bottas tinía problemes colos neumáticos y la so entrada a boxes tampoco nun valió pa muncho. Dambos pilotos montaron medios na segunda tanda de carrera ya’l so ritmu quedó comprometíu ya foi dalgo que Red Bull aprovechó. Vimos batalles perguapes por posición ente casi tolos pilotos de la parriella.

Cuando la victoria paecía bastante clara pa Verstappen, dempués de recuperar la so primer posición en pista tres la so parada, vivimos un incidente que condicionó dafechu’l resultáu de la carrera. Ocon, acabante de parar y que nesi momentu rodaba décimosextu, intentó adelantar a Verstappen pa desdoblase pero la so maniobra, na que Verstappen nun cedió nin un milímetru, terminó con dambos en cada llau del trazáu y con Hamilton como principal beneficiau de la situación. A naide nun sorprendió la reaición de Verstappen demientres taba en pista, del so xefe d’equipu y de les sos pallabres nes entrevistes al terminar la carrera segundu. Más tarde, viéronse imaxes nes que’l pilotu holandés, mui enfadáu con Ocon, lu emburriaba na zona de pesaxe. Esti actu fexo intervenir a la FIA (que de fechu tuvo de separtar a dambos pilotos) que penalizó a Verstappen con dos díes de servicios a la comunidá.

Cola victoria de Hamilton y Bottas quintu, Mercedes féxose col títulu de constructores, mientres Ferrari queden otru añu más segundos, dempués de que Räikkönen y Vettel quedaren terceru y sextu. L’otru Red Bull, el de Ricciardo, terminó por fin una carrera ensin contratiempos y pudo quedar cuartu dempués d’una bona batalla con Vettel primero y Bottas dempués. Dambos pilotos nun pudieron facer nada col bon rendimientu del Red Bull n’Interlagos.

Per detrás de los seis primeros, atopamos otra vuelta a Charles Leclerc. Sauber sigui sumando puntos mui importantes pa meter distancia con Toro Rosso. Ericsson nun pudo terminar dempués de tener un choque con Grosjean nos primeros momentos de la carrera. El pilotu suecu calificó sextu’l sábadu pero nun pudo treslladar esi bon resultáu al domingu. Sicasí, colos puntos de Leclerc, Sauber sigui amosando la gran meyora d’esti añu.

Haas sumó puntos colos sos dos pilotos, dalgo que viníen necesitando dempués de dellos momentos de duldes en carreres pasaes. Nun paez que vaigan alcanzar a Renault na clasificación de constructores, pero yá podemos dicir que la so temporada foi bastante curiosa y terminar quintos nel mundial ye un éxitu bultable. Falando de Renault, tuvieron un gran premiu bastante probe: Hülkenberg tuvo de retirase por problemes nel coche y Sáinz, que yá calificó mal el sábadu, anduvo perdíu polos puestos baxos tol gran premiu y terminó nel puestu doce. La suerte pa la escudería francesa ye que yá tienen amarráu’l cuartu puestu nel mundial de constructores, the best of the rest.

Completando’l grupu de los diez primeros tenemos a Sergio Pérez, que sumó un puntu pa Force India. Ocon, dempués del accidente con Verstappen, namás pudo terminar decimocuartu, ensin puntos. Con esti resultáu allóñase la oportunidá del equipu de pasar a McLaren, y paez que van terminar la temporada sétimos. Insistimos que nun ye un mal resultáu pa ellos teniendo en cuenta que quedaron ensin puntos nel parón braniegu por cuenta’l cambiu de nome. Sicasí, nun podemos dexar d’entruganos hasta au tuvieren llegao si nun fuera por esi fechu.

McLaren tampoco nun tuvo una bona carrera. Sicasí, Vandoorne amosó un bon rendimientu y quedó per delantre del so compañeru, al qu’adelantó n’un par d’ocasiones en pista. Alonso foi protagonista de dellos mesaxes de radio al so equipu nos qu’amosaba la so frustración col coche. Terminó la carrera penúltimu por cuenta una penalización por ignorar banderes azules. Vandoorne foi quien a terminar nel puestu quince y tamién recibió penalización pol mesmu motivu que’l so compañeru.

Toro Rosso quedó a les puertes de los puntos. L’equipu intervino un pocu ne trescursu de la carrera al pidir a los sos pilotos que dexaran pasar al compañeru pa intentar adelantar al pilotu de delantre. Foi llamatible la reaición de Gasly que, de primeres, nun quiso devolver la posición dempués de nun ser quien a adelantar. Hartley, que sigui ensin saber au va tar en 2019, dexaba claro per radio que nun-y prestaba un res lo que taba faciendo’l pilotu francés. A la fin, el pilotu neozelandés foi undécimu y Gasly decimoterceru. Ensin puntos, Sauber escápase na clasificación.

Williams, dempués d’anunciar esta selmana que Rob Smedley va dexar l’equipu, sigui perdíu nos últimos puestos ya esta vegada faciendo un sandwich con Alonso, siendo Sirotkin decimosextu y Stroll último, nel decimooctavu llugar.

Los abandonos, namás dos nesti gran premiu, fueron Hülkenberg y Ericsson.

Dempués d’una gran carrera n’Interlagos, toca volar a Abu Dhabi pal últimu eventu d’esta temporada 2018. Demientres llega’l momentu, equí vos dexamos tolos númberos que nos dexa’l sábadu ya’l domingu n’Interlagos:

Clasificación

Carrera

La Fórmula Un vien siendo nos últimos años daqué inxusto coles últimes carreres de la temporada. Nel casu de los dos años caberos, col mundial resueltu, paez que nun hai interés nengún nelles. Esti añu, magar Hamilton yá ye campeón, entavía nun sabemos qué equipu va facese col campeonatu de constructores, si Mercedes o Ferrari, y esa ye una de les coses pa les que mirar en Brasil.  Sí que sabemos que Red Bull va ser terceru dafechu.

Tamién hai interés en ver cómo queda’l mundial de pilotos nos puestos terceru, cuartu y quintu. Räikkönen ye agora mesmo’l terceru, siguíu de Botttas a once puntos y con Verstappen a venti. Con dos carreres per delantre, eses posiciones pueden entá camudar d’equí a la bandera a cuadros n’Abu Dabi.

Sicasí, non tolos equipos compiten cola victoria na mente ya nos casos de los equipos de la mitá de la tabla facese con un puestu curiosu na clasificación tórnase en beneficios pa la temporada siguiente. Ehí ye quiciás onde queda’l mayor interés de la temporada, anque paez que Renault tien bastante controlada la situación pa ser el cuartu meyor equipu. Tienen un colchón de venti puntos de diferencia con Haas, que paez que nun va ser quien a pasalos. L’equipu estauxunidense cuida qu’estes dos últimes carreres van servir pa recuperase un pocu de la deceición de les dos últimes nes que’l so rendimientu foi bastante probe. Nesta escudería tamién pueden tar tranquilos col so quintu puestu, con McLaren a ventidós puntos tienen casi’l trabayu fechu pa esti 2018.

Falando del equipu de Woking, esta selmana confirmóse que’l pilotu brasileñu Sérgio Sette Camara, qu’agora mesmo compite en F2 nel equipu Carlin Motorsport, va ser el so pilotu de pruebes y desarrollu pa 2019. L’equipu inglés sigui apostando pola mocedá na elleición de los sos pilotos. El so sextu puestu nel mundial de constructores nun ye brillante, pero sí bastante meyor que lo visto n’años pasaos y un puntu dende’l que construyir un equipu competitivu pa la temporada viniente. Brasil suel ser un bon escenariu nel qu’atropar puntos qu’ayuden a rematar la temporada con bones sensaciones.

Force India recuperó bastantes puntos nes carreres que vinieron dempués del so cambiu de nome (Racing Point Force India) cuando perdieron tolos que tiníen. Cuntando con eso, el fechu de que l’equipu tea nel sétimu puestu con McLaren a quince puntos ye bastante positivo y con dos carreres per delantre nun ye descartable que puedan facese col sextu llugar, sobre too nel casu de Brasil, onde la meteoroloxía suel ser protagonista. Pa ello, tienen falta de que dambos pilotos, qu’entavía nun tienen confirmaos los sos futuros na escudería pal añu qu’entra, sumen nes carreres que queden y lo fagan con un bon puñáu de puntos. Nun ye dalgo imposible, anque esti añu paez qu’hai menos enfotu si lu comparamos colo que víemos en 2017, onde tanto Ocon como Pérez yeren habituales ente los diez primeros.

Una de les batalles pendientes más interesantes pa estos dos últimos grandes premios ye, ensin duldes, la qu’hai ente Sauber y Toro Rosso. L’equipu suizu pasó a la escudería hermana de Red Bull na carrera pasada gracies a los puntos atropaos por Leclerc y Ericsson. Namás hai tres puntos de diferencia ente ellos, asina que de xuru vamos ver a los cuatro pilotos, sobre manera a Hartley, qu’entá nun sabe si competirá l’añu que vien en F1, dando tolo que tienen p’afianzar la so posición na clasificación.

Williams hai tiempu que tien les mires puestes nel añu viniente. Con George Russell confirmáu como pilotu pa 2019, falta entá saber quién lu acompañará, pero nun ye dalgo no que tenga priesa l’equipu. De momentu, toca intentar rematar la temporada de la forma más digna posible, con Brasil como primer oportunidá.

Torna la F1 al circuitu d’Interlagos y sigui colos horarios de tarde. Equí podéis atopar tola información sobre l’Autódromo José Carlos Pace y éstes son les hores pa esti fin de selmana:

VIENRES, 09/11/2018

LLIBRES 1: 14:00
LLIBRES 2: 18:00

SÁBADU, 10/11/2018

LLIBRES 3: 15:00
CLASIFICACIÓN: 18:00

DOMINGU, 11/11/2018

CARRERA: 18:10

Les gomes que vamos ver usar a los equipos na penúltima carrera de la temporada 2018 son les siguientes:

Y terminó’l campeonatu. A lo menos, la llucha por consiguilu a nivel individual: Lewis Hamilton yá ye cinco veces campeón de Fórmula Un, xuniéndose a un esclusivu grupu de pilotos como Fangio y Michael Schumacher, qu’entá ye’l pilotu con más títulos. Nun hai discusión sobre la superioridá de Hamilton pa facese con esti nuevu títulu esti añu. Pesie a que Ferrari tinía de primeres, el coche más rápidu, la evolución demientres la temporada de Mercedes fai que Hamilton seya agora campeón y que la escudería tea a piques de consiguir otru títulu de constructores.

Sicasí, México nun foi de dominiu platiáu. Como dicíemos na previa, Red Bull pintaba perbién equí y asina foi dende’l vienres: Verstappen llideró toles sesiones de llibres y Ricciardo féxose cola pole‘l sábadu. Vettel precisaba una victoria p’allargar el campeonatu hasta Brasil, pero’l rendimientu de los dos Red Bull ya’l fechu de que clasificara per detrás de Hamilton, complicaba  l’asuntu abondo. Too se diba xugar na primer parte de la primer vuelta, nuna reuta onde Red Bull diba tener de defendese de la mayor velocidá punta de los Mercedes y Ferrari.

Y fueron quien a ello. Verstappen pasó per delantre del so compañeru d’equipu, que fexo por defendese de la bona salida de Hamilton. L’holandés nun dexaría’l llideralgu de la carrera hasta ver la bandera a cuadros. Vettel tuvo tamién una bona salida, pero nun foi quien adelantar a naide nesi momentu. La de so foi una carrera estudiada, imaxinamos que consciente de que más que de sí mesmu dependía un pocu de la suerte qu’acompañara a Red Bull y a Mercedes.

Pa los coches de la parte medio de la parriella nun foi tan tranquila. Alonso algamó a subir dellos puestos nes primeres vueltes pero tuvo d’abandonar ceo tres alcontrase con restos d’otru coache. Les esperances d’arrancar dalgún puntín desapaecieron pronto. El so abandonu provocó un coche de seguridá virtual. Enantes d’esti momentu, Ocon tuvo de facer la so primer parada pa cambiar el morru del coche. Tres de les primeres vueltes tres la salida del coche de seguridá, Verstappen nun dexó de meter distancia colos sos persiguidores, entregaos a una batalla ente ellos que permitía al pilotu holandés siguir amarrando’l primer puestu. El tiempu de separación ente los cinco primeros yera mínimu, y foi asina hasta que tocó’l baille de paraes, bien llueu.

Nun hebo munchu movimientu de posiciones tres la primer parada y fueron camudando en pista y condicionaes pol tráficu que se foi aculumando (el quintu clasificáu, Valtteri Bottas, terminó dobláu, con una estratexa probe nel so llau del garaxe). Les distancies diben engrandándose y cuando too pintaba a un doblete de Red Bull, tornemos a ver una imaxe familiar esta temporada: el coche de Daniel Ricciardo soltaba un pocu fumo y terminaba paráu n’un llau del circuitu na vuelta sesenta y ún. Octavu abandonu del australianu n’una carrera onde acolumbraba que, si non la victoria, sí podía consiguir el podiu.

Vimos bastantes adelantamientos nel circuitu, ente ellos ún de Vettel a Hamilton que podemos considerar un de los meyores de la carrera. Pela parte media-baxa de la parriella, los pilotos diben alternando posiciones y Renault yeren los que meyor partíu taben sacando a las posiciones del sábadu. Ensin embargu, Sáinz tuvo d’abandonar tamién, na vuelta ventiocho, dexando a Hülkenberg solu pa puntuar pal equipu pero cola tranquilidá de la mala carrera que taben faciendo Haas, que nin siquiera rozaron los puntos.

D’estes desgracies fueron quien a beneficiase los dos pilotos de Sauber, que puntuaron, y Stoffel Vandoorne, únicu pilotu de McLaren que terminó la carrera y que se fexo con cuatro puntos vitales pal equipu y pal propiu pilotu. Otru que sacó bon partíu a la carrera en México foi Pierre Gasly, que consiguió otru puntu pa Toro Rosso, tres la penalización de Hartley (cinco segundos) por un golpe con Ocon. Precisamente, Force India sufrió la deceición del abandonu de Sergio Pérez na vuelta trenta y ocho, nel so premiu de casa y qu’Ocon namás pudiera terminar nel puestu once, condicionáu pol incidente de la primer vuelta.

Los pilotos de Williams nun acabaron en puntos pero a lo menos tampoco lo ficieron no más baxo de la clasificación, quedando Stroll duodécimu y Sirotkin xusto per detrás nel puestu trece. Per detrás llegaríen Hartley y los dos Haas, nuna de les carreres más deceicionantes del equipu estauxunidense, qu’en nengún momentu del fin de selmana tuvo un bon rendimientu en pista.

Lewis Hamilton torna a consiguir un campeonatu del mundu en México nuna carrera que gana Max Verstappen y na qu’elli nun subi al podiu. La hestoria de 2017 repitióse nesti 2018. Demientres llega’l momentu de siguir alantre col campeonatu y pone-y el ramu coles dos últimes carreres, la siguiente n’Interlagos, equí vos dexamos tolos númberos del sábadu y domingu nel Autódromo Hermanos Rodríguez:

Pa acabar, estos son los resultaos d’esti fin de selmana:

Clasificación

Carrera

A casi naide nun-y presta que’l campeonatu de Fórmula Un quede decidíu a falta d’un par de carreres, anque de xuru los siguidores del pilotu campeón nun tarán d’alcuerdu con esto. Esti fin de selmana ye más que probable que nos atopemos, como va un añu, ente la última carrera enantes de que Lewis Hamilton seya campeón del mundu per quinta vegada.

Nun podemos sacar casi nengún aspeutu negativu a la temporada del pilotu inglés nin la del so equipu, en progresión demientres tol añu y pasando perriba Ferrari otru añu más. Nun queremos tampocu quitar méritu al so llabor, anque abúltanos que la Scuderia tien dalgo culpa poles numberoses amueses de debilidá nestos dos últimos años. Sicasí, naguábemos por ver a dos equipos distintos lluchando pol campeonatu y foi lo que tuvimos en 2017 y 2018.

Ensin pasar una selmana dende’l gran premiu d’Austin onde Räikkönen se fexo cola victoria y sorprendió a más d’una persona, llegamos al circuitu más altu del campeonatu: l’Autódromo Hermanos Rodríguez, un de los trazaos más prestosos estéticamente del calendariu. Les carreres que tenemos vivío hasta agora tuvieron entreteníes, y de fechu hai que tar sollertes a lo que puedan facer los pilotos de Red Bull.

Y ye qu’anque tea too de cara pa Mercedes y Hamilton, México ye una carrera onde Red Bull dexa atrás les sos debilidaes y tien la posibilidá de lluchar pola victoria n’igualdá col equipu alemán y Ferrari. Hamilton nun tien falta de ganar pa ser campeón, val-y ser sétimu, anque nun nos paez que vaiga escoyer relaxase tanto.

Ferrari tienen énte ellos una última oportunidá d’allargar el campeonatu hasta Brasil. El bon trabayu fechu n’Austin na estratexa, sobre too nel llau de Räikkönen, va ser de xuru importante equí pa consiguir daqué positivo, anque con Red Bull na ecuación, les coses complíquense más entá pal equipu italianu.

Fuera de los tres primeros, Renault tien bien amarráu el cuartu puestu dempués de la so bona actuación n’Austin. Col tropiezu de Haas (Grosjean abandonó y Magnussen quedó descalificáu), la escudería francesa tien el trabayu casi fechu. Pel so llau, l’equipu estauxunidense paez que tamién tien el so quintu puestu aseguráu y tien de tar más pendiente de les irregularidaes col tema del combustible que valió la descalificación de Magnussen, y de los problemes en pista de Grosjean que lu penalicen pa esta carrera con tres posiciones.

Ye poco probable que McLaren llegue a pasar a Haas y anque tienen unos cuantos puntos de ventaya con Force India, l’equipu de Silverstone tien bastante fácil sumar en México con dambos pilotos, sobre too con Pérez que cuerre en casa. Alonso tuvo una carrera mui deceicionante n’Austin polo qu’espera compensalo nel Hermanos Rodríguez, mesmo que Vandoorne.

Pela parte baxo, Toro Rosso y Sauber sáquense namás que cuatro puntos, polo qu’esa batalla ta abierta y de xuru va tar interesante nes carreres que queden. Hartley tien falta de siguir sumando como fexo n’Austin, pol equipu pero tamién pol so futuru. Williams, cola mirada yá puesta nel añu qu’entra, van facer por consiguir dalgún puntu que maquille un pocu los siete puntos que sumen y que son un pocu l’espeyu d’una temporada que yá se fai mui llarga.

Los horarios en México son asemeyaos a los d’Austin, nun siendo la sesión de clasificación del sábadu:

VIENRES, 26/10/2018

LLIBRES 1: 17:00
LLIBRES 2: 21:00

SÁBADU, 27/10/2018

LLIBRES 3: 17:00
CLASIFICACIÓN: 20:00

DOMINGU, 28/10/2018

CARRERA: 20:10

Yá tamos preparaos pa otru gran premiu, l’antepenúltimu d’esti 2018 que pasín ente pasu va terminando. Equí vos dexamos tola información sobre’l circuitu y más abaxo les gomes escoyíes pa esti fin de selmana:

2044 díes abulten muncho. 113 carreres ye un númberu grande d’eventos. Estes cifres quedaron en nada esti domingu n’un d’esos grandes premios de los que se va falar n’años vinientes de xuru. El protagonista d’estos númberos nun ye nin Hamilton, nin Vettel nin tampoco Verstappen, si non esi pilotu al que tol mundo aplaude cuando gana o consigui un bon resultáu porque siempre sabe lo que ta faciendo: Kimi Räikkönen.

Llevaba ensin subir a lo cimero del podiu dende 2013, cuando lo fixera per última vegada nel gran premiu d’Australia. Dende esi día hasta esti domingu, munches pallabres se dixeron sobre la so calidá como pilotu, la so personalidá dientro y fuera del circuitu, el so pasotismu y la so falta de resultaos, o meyor dicho, victories. Ensin embargu, too eso quedó pa prau énte la so victoria n’Austin. Naide esperaba por elli y, una vegada más, supo lo que taba faciendo.

La idea cola que díbemos al domingu yera la d’una victoria tranquila de Hamilton dempués d’una pole trabayada’l sábadu. Cuntando con qu’al inglés se-y da bien el COTA, taba casi claro que diba poder cellebrar el so quintu campeonatu nesta ocasión. Vettel consiguía calificar segundu pero una penalización de tres posiciones lu ponía quintu. Otra amuesa más de la falta de concentración del alemán esti añu (la penalización vieno de nun baxar de velocidá con bandera colorada). Amás, Verstappen rompió la suspensión na Q1 y quedó fuera de la llucha polos primeros puestos. Taba casi too dicho pal domingu. Pero…llegó Kimi.

La salida foi caótica pa munchos, pero mui fácil pal pilotu finlandés que nel primer xiru dempués de la pendiente púnxose per delantre de Hamilton, que fexo por cubrise d’elli pero ensin muncha suerte. Dende esi momentu, naide nun foi quien a averase a Räikkönen. Sicasí, los güeyos taben puestos nel so compañeru d’equipu, que buscaba la forma d’aprovechar la debilidá de Hamilton pa garralu elli tamién y asina allargar el campeonatu hasta México. Nun foi posible y un toque con Ricciardo féxolu facer un trompu que lu retrasó varies posiciones, una película que yá vimos en carreres pasaes.

Munchos pilotos tuvieron de facer la so parada nes primeres vueltes por cuenta los incidentes de la salida: Fernando Alonso foi un de los más afeutaos, el primeru en quedar fuera dafechu por un choque con Stroll. L’asturianu quexóse muncho na radio de les maniobres de los pilotos. El pilotu canadiense pudo terminar la carrera ensin problema anque en posiciones baxes. Otros dos que xestionaron mal los primeros metros fueron Charles Leclerc y Romain Grosjean. El pilotu francés tuvo una sesión de clasificación el sábadu mui curiosa, na mesma llínia que selmanes anteriores, pero nun supo sacai beneficiu y terminó la so carrera enantes de tiempu y tamién la del pilotu de Sauber, que tampoco nun ye quien a sacar dalgo de les sos bones clasificaciones. Grosjean recibió penalización en puntos y posiciones pal próximu gran premiu y ta mui cerca de quedase ensin puntos na so llicencia lo que faría que se perdiese una carrera.

Cola gran premiu avanzáu y Verstappen sumando adelantamientu tres adelantamientu, llegó l’abandonu de Ricciardo por cuenta’l motor y que fexo que saliera’l coche de seguridá y dellos pilotos decidieran aprovechar pa parar. Yá perdimos la cuenta de la cantidá de problemes que suma’l pilotu australianu, que de xuru tará entrugándose de quién ye culpa que’l so coche seya’l que falla. Imaxinamos que sedría’l mesmu pensamientu que tinía l’añu pasáu’l so compañeru, anque agora toca sumar el fechu de que Ricciardo va correr l’añu que vien col equipu que da motores a Red Bull.

Como dicimos, el pilotu holandés foi un de los meyores de carrera yá que salía dende’l puestu dieciocho y consiguió terminar segundu. Hamilton tuvo de conformase col tercer puestu que tovía nun-y da’l campeonatu y duldaba de que la estratexa de Mercedes a la hora de parar tuviera sio la correuta. Ta claro que Red Bull supieron xugar perbien les sos cartes y amás el públicu recibió de regalu una batalla perguapa ente Verstappen y Hamilton nes últimes vueltes.

Vettel tuvo la so llucha personal con Bottas al que terminó pasando n’un de los pocos errores que cometió’l pilotu finlandés de Mercedes que, sicasí, nun brilló muncho. El pilotu de Ferrari namás foi cuartu, xusto per detrás de Hamilton, lo que fai que’l campeonatu continúe hasta México onde l’inglés namás tien de sacai tres puntos a Vettel pa ser campeón. Mal se tien de dar, esta vegada sí, pa que nun lo consiga.

Los dos pilotos Renault terminaron tres de Bottas, n’una de les poques carreres curioses que vimos a dambos, pesie a que Sáinz penalizó con cinco segundos por salise del trazáu y aprovechar p’adelantar. Per detrás acabaron el Force India d’Ocon ya’l Haas de Magnussen, que cellebraba’l puntuar per primer vegada en casa. Sicasí, dambos pilotos fueron descalificaos por irregularidaes col fluxu de combustible mentantu la primer vuelta, dalgo que la FIA decidió sancionar. D’esto beneficiáronse Pérez, que sumó tres puntos más, y Hartley ya Ericsson, qu’entraron nellos. El pilotu neozelandés desplicaba llueu na TV que dempués de la carrera que tuviera n’Austin, nun sabía que más-y quedaba por facer pa tener un sitiu pa 2019. Gasly namás pudo ser décimosegundu.

McLaren quedó a les puertes de puntuar cola descalificación d’Ocon y Magnussen y amás namás terminó col coche de Vandoorne. Pa zarrar la clasificación, los dos Williams, n’otru gran premiu pal escaezu.

Pa acabar, estos son los resultaos d’esti fin de selmana:

Clasificación

Carrera

Tamos nesa época del añu na que tamos cuntando les selmanes que queden pa rematar la temporada, na que les coses van garrando forma de reuta final y na que tenemos cuasi completa la parriella del añu qu’entra. La selmana pasada supimos que Russell va ser nuevu pilotu en Williams y tamos esperando que dende l’equipu confirmen quién va ser el so compañeru, mentantu siguen les especulaciones sobre si va ser Esteban Ocon o Robert Kubiça.

Amás, tamién conocimos el futuru de Stoffel Vandoorne, que va dar el pasu a la Fórmula E dempués de que McLaren decidiera nun siguir con elli pa 2019. Si pensamos nos avances d’esta categoría y nel futuru que s’albidra pa ella, nun nos paez que seya una mala opción pa Vandoorne dempués d’una mala etapa na escudería de Woking.

Ello ye que tamos pendientes entá de conocer, como yá dicíemos, quien va ser pilotu de Williams xunto a Russell pa la temporada que vien, amás de los pilotos de Force India, anque paez que Stroll y Pérez tienen toles papeletes. Tampoco nun sabemos quién va ser compañeru de Kvyat en Toro Rosso. Equí falámovos de tolos cambios y confirmaciones pa 2019 ya informámovos d’ellos nel momentu mesmu que pasen.

Ochobre y payares son meses de pasar nel otru llau del planeta, a lo menos tocante a la Formula Un. Llega otru puñáu de carreres, dos d’elles siguíes: EEXX, México y Brasil son les tres próximes cites enantes de viaxar a Abu Dhabi pa rematar l’añu en cinco selmanes. Austin, Circuit of the Americas, ye’l prósimu escenariu y nel que, mui probablemente, Lewis Hamilton va conquistar el so quintu títulu del mundu.

Anque entavía hai posibilidaes pa Ferrari, la realidá ye que son mínimes, ya’l desastre tien de ser bien grande pa que Hamilton nun seya campeón. No que cinca a equipos ta la cosa más apretada, pero pinta bien pa Mercedes. Austin ye un circuitu que se-y da bien al pilotu inglés, asina que nun sorprendería velu facese cola pole‘l sábadu ya una victoria’l domingu. A Red Bull nun se-yos da mal tampoco’l trazáu del COTA, y cuntamos con ellos pa intentar retrasar la cellebración de Hamilton hasta México.

¿Acabóse entós la emoción de la F1 pa esti añu? La verdá ye que pinta que va ser asina no cimero, pero entá queden munches batalles pela parte medio-baxo polo que lo interesante va tar ehí. Con namás cuatro carreres, entramos n’un períodu onde los puntos van tener munchu más valir. Renault tien falta d’ellos pa confirmar el so cuartu puestu del campeonatu y poner más distancia col restu d’equipos, sobre too con Haas, que ta a ocho puntos y equí cuerre en casa. L’equipu estauxunidense ta faciendo una temporada curiosina, anque dacuando irregular, pero de xuru que correr énte’l so públicu ye una motivación pa ellos. Ocho puntos nun son difíciles d’algamar pa ellos, si tienen una bona carrera’l domingu y Renault nun sumen. Ehí va tar una de les batalles más prestoses de lo que queda de campeonatu.

McLaren ta nel puestu sestu, con cincuenta y ocho puntos, muncha diferencia con Haas polo que’l so interés ta en quedase nesi llugar hasta ver la última bandera a cuadros. Tienen per detrás a Force India n’ascensu y n’Austin otra oportunidá de quiciábes sumar un par de puntos que dean fuelgu pa lo que vien. Ye fácil que Force India termine poniéndose per delantre, pero pel momentu son quince puntos de diferencia. La temporada nun ta siendo brillante y pa 2019 van facer falta munchos cambios, pero l’enfotu agora ta en terminar toles carreres que queden y, sobre too, puntuar en dalguna d’elles. La primer oportunidá ta n’Austin.

Los tres equipos que zarren la tabla tuvieron una temporada bastante irregular si pensamos nel balance de puntos y abandonos qu’axunten. Toro Rosso brilló en dellos momentos y l’asociase con Honda paez que foi una bona decisión, pero non siempre los vimos ente los diez primeros. Tán a trece puntos de Force India y tienen a Sauber a tres. La distancia ye mínima col equipu suizu, polo que la escudería hermana de Red Bull precisa de bones actuaciones nestes cuatro carreres últimes, entamando per Austin, pa nun quedar penúltimos nel campeonatu. Williams paez tar fuera yá de la llucha por nun quedar últimos. Cola confirmación de Russell, que lo tien mui bien pa ser campeón de F2, abrióse un pocu de lluz nel futuru del equipu y anque entavía nun tienen nada zarrao, falta tiníen de sorrir esta temporada. Veremos si n’Austin son quien a consiguir dalgún bon resultáu qu’allargue esa sorrisa.

Saltamos al continente americanu y con ello vienen los horarios de tarde. Pa Austin, estes son les hores de cada sesión:

VIENRES, 19/10/2018

LLIBRES 1: 17:00
LLIBRES 2: 21:00

SÁBADU, 20/10/2018

LLIBRES 3: 20:00
CLASIFICACIÓN: 23:00

DOMINGU, 21/10/2018

CARRERA: 20:10

Equí podéis atopar tola información sobre’l COTA y más abaxo les gomes seleicionaes pa esti gran premiu:

Si hai siete díes vos dicíemos que nos paecía que la llucha pel campeonatu taba casi terminada, dempués de Xapón nun lo duldamos. Ferrari amosó debilidá una vegada más dexando nes manes de Mercedes el campeonatu de pilotos y cásique’l de constructores au la Scuderia entavía nun tien too perdío

Tolos pilotos de la parriella esfruten en Suzuka, toos coinciden que ye un de los circuitos más prestosos del calendariu aparte d’esi componente míticu que tien tanto pa ellos como los fans. Nun foi la carrera más guapa del añu pero tampoco nun deceicionó. A Hamilton siempre se-y da bien Xapón: ta n’una racha perbona con seis carreres ganaes de les últimes siete y col campeonatu casi nes sos manes, en Suzuka vímoslu dende’l vienres tranquilu, seguru de si mesmu ya esfrutando. Nel otru llau ta un Vettel que ve cómo vuelve a perder un campeonatu que yera de so enantes de llegar a Monza. La hestoria repítese y los ecos de 2017 tornen nesti 2018. Ferrari tinía’l coche más rápidu hai delles carreres, pero Mercedes ye agora quien domina.

El sábadu, la pole de Hamilton foi namás otru pasu alantre pa un fin de selmana redondu. Con Bottas xusto per detrás, podíemos casi albidrar otru doblete de Mercedes. Colo que nun cuntábemos yera cola apuesta arriesgada de Ferrari na Q3 de sacar a los sos dos pilotos con gomes intermedies a facer les primeres vueltes. Fueron los únicos que les montaron y bien rápido se decataron del erru. Nun taba too perdío sicasí, anque tuvieron de xugásela na segunda parte de la sesión. A Räikkönen nun-y salió mal del too, quedó cuarto pero Vettel nun pudo completar una vuelta llimpia, a lo que se sumó l’agua qu’empezó a cayer enantes del final de la sesión, y terminó novenu (octavu pola penalización d’Ocon por ignorar una bandera colorada na tercer sesión de llibres). Suzuka ye, en teoría, un circuitu complicáu p’adelantar y salir octavu nun facilitaba les coses al pilotu alemán de Ferrari. De la so desgracia aprovechóse Verstappen pa ponese terceru.

Hai que rescamplar, dientro de los diez primeros, la sesión de Grosjean que clasificó quintu, los dos Force India (cola yá mentada penalización d’Ocon que lu baxó al puestu once) y los dos Toro Rosso, n’un gran sábadu pa dambos pilotos coles meyores que llevara Honda al circuitu xaponés. Ricciardo pasó per otru sábadu pa escaecer con un fallu de motor que lu dexó fuera yá na Q2.

La salida del domingu foi quizá lo meyor pa Vettel, que se punxo cuartu al pocu d’entamar la carrera. Hamilton y Bottas nun tardaron en dir metiendo distancia a Verstappen que diba terceru y diba ser el protagonista d’un de los momentos más caldiaos de la carrera y que-y llevó una penalización: saltó una chicane y na so reincorporación al circuitu atopó con Räikkönen con tola intención d’adelantalu. El pilotu de Red Bull arrequexó al finlandés y los comisarios interpretaron que la so vuelta al trazáu fuera peligrosa, penalizándolu con cinco segundos.

Nun diba ser la última de Verstappen pues al tiempu alcontraríase con un Vettel naguando por ponese per delantre d’elli pa dir a la gueta Hamilton y, nuna maniobra asemeyada de Verstappen pero qu’esta vegada nun tuvo sanción, el pilotu de Ferrari terminó dando un trompu que lu dexó en penúltimu llugar. Nesi momentu terminó la so carrera y, quiciábes, la so llucha pol campeonatu. Tamién vimos alcontronazu en pista ente Magnussen y Leclerc, col pilotu danés más perxudicáu y provocando un coche de seguridá pa recoyer los trozos que foi dexando tres un pinchazu. Leclerc retiróse na segunda mitá de la carrera por problemes mecánicos dempués de rodar la mayor parte del tiempu que tuvo en pista dientro de los puntos. Domingu deceicionante pa dos de los pilotos que meyor rendimientu tán amosando esti añu, pesie a nun tar puntuando davezu.

Ricciardo consiguió recuperar posiciones y terminar la carrera cuartu, dempués de salir nel puestu quince. Les males sesiones de clasificación tán dexándonos, paeznos, ensin lluches perguapes na parte d’arriba nes que de xuru’l pilotu australianu diba ser un de los protagonistes.

Pela parte baxo, Alonso y Stroll tuvieron el so momentu con una maniobra del canadiense que dexó al asturianu fuera del trazáu y pola que’l pilotu de Williams penalizó con cinco segundos. Sicasí, Alonso nun foi namás víctima nesti incidente y los comisarios tamién lu penalizaron a elli al paece-yos que, al salise pela grava garró ventaya. Suma y sigue pa dambes escuderíes, qu’ocuparon los cuatro últimos puestos de la clasificación.

Les deceiciones más grandes vinieron en Renault, con Hülkenberg sumándose a los dos abandonos yá mentaos de Magnussen y Leclerc y tamién Toro Rosso, que cuntaben puntuar dempués del bon rendimientu del sábadu. Gasly quedó undécimu a piques d’entrar dientro los diez primeros, ya’l so compañeru Brendon Hartley más abaxo, nel decimotercer llugar.

Sicasí, Renault puntuó con Sáinz, que terminó décimu. Tamién Force India, que tuvo una carrera bastante tranquila en dambos llaos del garaxe, garró puntos con dambos pilotos, igual que Grosjean, que foi octavu, el rellenu d’un sandwich ente los dos Force India. Ericsson nun pudo sumar nengún puntu pa Sauber.

Dempués de la mini-xira asiática, pegamos el saltu al otru continente, l’americanu, pa la siguiente tanda de tres carreres: la primera en llegar, Austin, puede ser na que Hamilton se faga col so quintu campeonatu. Hasta que llegue la fecha, equí vos dexamos tolos númberos que dexó esti fin de selmana en Suzuka:

Clasificación

Carrera

Ensin tiempu casi pa recuperase de lo que vimos en Sochi yá tamos en Xapón pa otru gran premiu. Tornen los madrugones, y un circuitu de los que más presten a los pilotos y equipos. Ye la casa d’Honda, que llega a Suzuka en condiciones bien distintes a les del 2017, con otru equipu como compañeru de viaxe: Toro Rosso

Dende que’l domingu cayera la bandera a cuadros, falóse bastante más de la decisión de Mercedes d’intervenir nel orde de los sos pilotos que de la carrera en sí mesma, lo que vien a dicir que nun foi una carrera mui vistosa. Ensin entrar nel debate, hai opiniones pa tolos gustos anque ye verdá que paez que rescamplen más les persones a les que nun-yos prestó lo que fexo l’equipu alemán. Ensin duldes, en Suzuka vamos siguir falando ya sintiendo falar d’esti tema, sobre too porque la emoción pol campeonatu cada vegada ye menor cola ventaya que tien Hamilton agora mesmo sobre Vettel, cincuenta puntos.

De fechu, Mercedes aterriza en Xapón cola tranquilidá de tener cásique too fecho nel mundial de pilotos ya de tener una distancia cómoda nel de constructores. Nun tamos avezaos a ver a la escudería alemana murnia dempués d’una carrera, pero esi yera l’humor xeneral dempués del gran premiu en Sochi. En Xapón van tener una bona oportunidá de dexar too eso nel pasáu ya enfotase en facer más bultable la diferencia con Ferrari.

La Scuderia nun puede fallar. Les males noticies ye que nun fallar nun ye garantía d’éxitu porque necesiten que Hamilton pinche y eso ye dalgo que nun vimos muncho esta temporada. Vettel taba bastante más contentu’l domingu que los sos rivales, un pocu con resignación, sabiendo que tien les coses mui complicaes pa ser campeón nesti 2018. Queden cinco carreres cuntando Suzuka y les posibilidaes pa Ferrari, coles diferencies que yá mentemos, son bastante escases anque non imposibles.

Red Bull amosó un perbón rendimientu en Sochi. De fechu, Horner comentaba que si nun fuera porque salíen dende atrás, quiciás tuvieren lluchao pola victoria. Si pensamos nel ritmu que tiníen dambos pilotos, sobre too Verstappen, nun paecen estrañes estes pallabres de Horner. En Suzuka en principiu nun van tener penalización, asina que van poder lluchar pol podiu.

Renault ta teniendo grandes premios bastante irregulares nel sen de que nun sumen en toos nin siquier con un pilotu. Anque en Sochi Hülkenberg nun tuvo una mala carrera’l domingu, el so plan nun salió bien y terminó ensin puntos, mesmo que Sáinz. Entavía tienen ventaya col quintu, que ye Haas, pero con cinco carreres entá nun pueden confiase y Suzuka tien de ser el so golpe na mesa pa consolidar esa posición.

Haas yá trabaya cola tranquilidá del futuru zarráu pa 2019. Magnussen sigui puntuando davezu mesmo que Grosjean, y en Xapón tienen una oportunidá d’averase un pocoñín más a Renault, al que tienen a once puntos. Nel so favor tienen que l’equipu francés, como dicíemos, nun ta puntuando davezu dalgo que tán aprovechando nel equipu estauxunidense.

La distancia de McLaren con Haas ye bastante bultable y nun paez que vaiga amenorgar tantu como pa que l’equipu de Woking pueda pasalos y ponese quintu. Amás, Force India sigui sumando dempués de perder tolos sos puntos col cambiu de nome, y tán a ventitrés. L’equipu inglés torna al que nos últimos años fuera un gran premiu especial pa ellos pol so compromisu con Honda pero nel que nun tuvieron bonos resultaos. Lando Norris va volver a tar na primer sesión de llibres (yá tuvo en Sochi, nel monoplaza d’Alonso) ya sigui cola so formación pensando nel 2019.

Force India cuiden que van dir muncho meyor en Suzuka qu’en Sochi, au Sauber (con Leclerc) pasó per delantre d’ellos. Tienen entavía una distancia grande con McLaren por esi quintu puestu que busquen alcanzar, dalgo que sedría d’aplausu pensando na suma express de puntos que tán faciendo nesta segunda parte de la temporada. Les coses tuvieron más tranquiles en pista ente los dos pilotos, pero de xuru que nel equipu van siguir controlándolos pa evitar más incidentes que terminen n’abandonos.

Toro Rosso llega a Suzuka nel so primer añu con Honda collaborando con ellos. Nun tuvieron suerte en Sochi y dambos pilotos abandonaron col mesmu problema de frenos qu’esperan tener solucionáu pa esti gran premiu. Tienen a Force India a cinco puntos y tán tres perriba de Sauber, polo que tienen falta de puntuar yá non solo por sumar y averase al equipu de Silverstone y alloñase de Sauber, si non pa dar una bona imaxe en casa d’Honda.

Sauber tamién tien zarrada la so plantía pa 2019 polo qu’hai motivos pa la tranquilidá nesi sen. Amás, otra bona actuación de Leclerc el domingu fai que sumen puntos y tengan a Toro Rosso y Force India a tiru. Si pensamos la situación na que taben l’añu pasáu per estes feches, nun hai más que motivos pa sorrir nel equipu suizu. En Suzuka toca facese fuertes ya buscar atropar otru bon puñáu de puntos.

Faise mui cenciello desplicar la situación llaceriante na que ta Williams si miramos la cantidá de puntos que tienen. Lleven namás que siete mentantu que Sauber, que ta xusto perriba d’ellos, tien venti más. Ye una amuesa de lo complicáu que ta siendo esti añu pal equipu de Grove que de xuru tán cuntando los díes que queden pa que termine la temporada. Entavía nun tienen zarrada la so alliniación pa 2019 ya nun tien pinta de que vaigan confirmalo enantes d’Abu Dabi. Suzuka ye otru escenariu nel qu’intentar consiguir daqué positivo, dalgo de lo que tienen muncha falta en Williams.

Como diximos nes primeres llínies, toca madrugar pa Suzuka (tolos horarios son AM):

VIENRES, 05/10/2018

LLIBRES 1: 03:00
LLIBRES 2: 07:00

SÁBADU, 06/10/2018

LLIBRES 3: 05:00
CLASIFICACIÓN: 08:00

DOMINGU, 07/10/2018

CARRERA: 07:10

Hasta que llegue la madrugada del viernes, equí vos dexamos tola información sobre’l míticu circuitu de Suzuka y abaxo, les gomes escoyíes pa esti fin de selmana: