Category: Análisis

Tamos a piques de zarrar otru añu anque la temporada de Fórmula Un hai un mes llargu que remató. Con tiempu pa reflexonar, saborguiar y echar en falta coses, queremos zarrar nosotros l’añu falando de lo que pa nós foi lo meyor d’esti 2018 na máxima competición del motor:

MEYOR PILOTU: LEWIS HAMILTON

Si hai dalguién que destacó esti añu ye, ensin duldes, Lewis Hamilton. Independientemente de les preferencies que cada quién tenga no que cinca a pilotos ya equipos, naide nun puede negar que la temporada del inglés foi casi perfeuta. Yá dexó claro que cuando tien la cabeza centrada ye cuasi imparable. Podríemos dicir que ye eso lo que quiciás-y faltó a Vettel esti añu. Anque paeznos que foi’l meyor pilotu na parriella, hai que rescamplar el llabor de Charles Leclerc nel so debú na F1 y que fai que teamos deseyando velu al volante del Ferrari esti 2019 qu’entra.

MEYOR EQUIPU: MERCEDES AMG F1

Ensin sorpreses, otra vegada. Sí ye importante siñalar que Ferrari tuvo la oportunidá de ser quien llevara esti calificativu. L’entamu de la temporada foi mui sólidu nel equipu italianu pero la so evolución terminó deceicionando. Otru añu más queden a les puertes de facese col campeonatu, pero esti 2018 ye entá pior porque yeren los favoritos y nun supieron reaicionar a les evoluciones de Mercedes. Nun podemos escaecer el llabor de Sauber, dexando atrás los momentos oscuros de la temporada pasada.

MEYOR COCHE: FERRARI SF71H

Quiciás paeza una contradicción o que queramos facer un favor a Ferrari dando-y un requexu nesti repasu, pero lo cierto ye que l’equipu italianu tuvo (a lo menos en bona parte de la temporada) el meyor coche esti añu. Especialmente na primera metá del campeonatu. Dalgo ponderatible si tenemos en cuenta cómo fueron los anicios nesta dómina híbrida fai yá unos años.  En Maranello volvieron a demostrar que son quien a facer una macchina que seya quien a lluchar polo más alto y a enfrentase téunicamente a Mercedes dexando de paecer intocable.

MEYOR CARRERA: GRAN PREMIU D’AZERBAIXÁN

Ye complicao escoyer una carrera al acabar la temporada porque son munchos los momentos colos que nos quedamos, tanto bonos como malos. Bakú lleva faciendo méritu pa tar ente les meyores carreres dempués d’entrar nel calendariu formuleru ensin munchu convencimientu. Nesta ocasión, anque foi Hamilton quien venció, les circunstancies nes que lo fexo, con un pinchazu nel últimu momento de Bottas que diba ser el ganador final túvonos pendientes de tolo que pasaba en pista hasta la bandera a cuadros y non toles carreres pueden dicir eso.

MEYOR MOMENTU: POLE DE RÄIKKÖNEN EN MONZA

Anque’l resultáu final del gran premiu nun foi’l que querríen los tifosi, la llocura desatóse’l sábadu col retornu a la pole de Kimi Räikkönen. Son munches les persones que yá lu quieren retirar, pero esi día tapó munches boques que lu poníen como incapaz d’aportar nada al so equipu. Demientres tola temporada, ensin facer munchu ruíu, fexo la so parte y pudo, amás d’esta pole, sumar una victoria. El finlandés tien bien pocu qu’amosar a estes altures, pero en Monza dexó claro qu’entá puede ser el más rápidu.

MEYOR EVENTU: SILVERSTONE

El cambiu de manes de la direición de F1 ta dexando cosines nel intentu d’averar la competición a los fans. Anque entavía s’echen en falta coses que pueden ameyorar, ye positivo ver grandes premios que consiguen axuntar a un númberu bultable de persones y que la xente sigue emocionándose coles carreres. Por eso, préstanos rescamplar lo que vemos añu tres añu en Silverstone, un circuitu de los tradicionales que nunca nun deceiciona. Con un futuru inciertu, paeznos importante qu’esti tipu d’eventos nun desapaezan del calendariu pol so raigañu y por ser parte de la esencia de la competición de motor.

Zarramos asina esti 2018 que pa nosotros foi bien bayurosu. Cuidamos qu’el 2019 va tar enllenu de bonos momentos formuleros que vamos intentar dexar equí espeyaos. Deseyamos a toles persones que nos lleen un prestou 2019 ya esperamos que nel añu qu’entra podamos siguir ocupando parte de les vuestres vides falando d’una de les coses que más nos presta: la Fórmula Un. ¡FELIZ 2019!

Los llamentos pola fin d’una temporada de F1 duren lo que dura’l tiempu en qu’entamen a movese les coses. La información que recibimos agora ye poco pero val doble. Yá tenemos a tolos pilotos que van ser protagonistes de la temporada 2019 y los equipos yá tienen too puesto nel coche que-yos van a dar pa competir.

Mientres lleguen los díes de presentaciones y test, siguimos n’AsturiesF1 faciendo un pocu d’alcordanza de lo que foi esta temporada que namás terminó hai dos selmanes. Falábemos nel anterior post de lo que ficieron los cinco primeros equipos na clasificación, ello ye Mercedes, Ferrari, Red Bull, Renault y Haas. Toca falar del restu.

McLaren nun resurdió. Nun creyemos, sicasí, que dalguién creyera que’l fechu de dexar dir a Honda pa recibir a Renault diba valir pa dalgo, a lo menos al curtiu plazu. Sí nos paez qu’esta temporada tuvo de ser l’amuesa de que nun yera too culpa d’Honda y que McLaren tien de camudar munches coses si quier tornar a competir no cimero. Agora toca recuperar el tiempu que se perdió echando toles culpes fuera de los malos resultaos de los últimos años. Cola anuncia de la marcha d’Alonso al terminar la temporada, paecía que l’equipu nun podía cayer más fondo y la so apuesta por dos talentos bien mozos yera un riesgu que, quiciás tiníen de tomar. Hebo momentos bonos na escudería que permitieron a dambos pilotos atropar puntos que punxeron al equipu sextu na clasificación, muncho meyor que temporaes anteriores ya’l puntu dende’l que construyir el proyeutu pa 2019. Aparte de too esto, quiciás lo más negativo, si ye posible, ye la imposibilidá de ver a Vandoorne n’un coche curiosu. El campeón de F2 dexa’l so asientu esti añu pa dir pa la Fórmula E y paeznos que los sos dos años en McLaren nun amuesen el so talentu real. Tampoco paez qu’en Woking quixeren dar un oportunidá al pilotu de pilotar un coche más “potable”.Agora’l futuru del equipu queda nes manes de Lando Norris y Carlos Sáinz. Tai sollertes.

Force India, o meyor dicho Racing Point F1, empezaron la temporada como favoritos pa ser cuartos. Yera vezu velos facer bones primeres partes de temporada y llueu desinflase un pocu pero aguantar. Nun pudimos velo nesti 2018 ente otres coses por esi mentáu y pernomáu cambiu de nome tres la compra, per parte del padre de Lance Stroll, del equipu. La escudería quedó ensin puntos pa la segunda parte de la temporada, pero tovía foi quien a terminar nel séptimu llugar y non mui lloñe del sextu. Nun foi una temporada tan regular per parte de dambos pilotos o al menos non como la 2017 onde yera vezu atopar a ún o a l’otru, o dambos, dientro de los puntos. Ye tiempu de cambios nel equipu, d’imaxe y pilotos. Esteban Ocon, que pasa a ser pilotu reserva de Mercedes, pierde’l so asientu en favor de Stroll que va tener a tol mundu sollerte p’amosar qu’en verdá merez tar ehí y nun ye namás cuestión de perres.

El cambiu de Sauber ente la temporada pasada ya esta foi bultable. Empezando polos sos dos pilotos: Leclerc tinía tola atención enriba d’elli pol so posible futuru en Ferrari, dalgo que terminó faciéndose real gracies a les sos bones actuaciones. Nel otru llau del garaxe, el suecu Marcus Ericsson, en cuenta fundir, sacó lo meyor de sí y xustificó la so presencia na F1. Irónicamente, la so meyor temporada en F1 nun-y val pa quedase como primer pilotu en nengún equipu y va tener de conformase con ser reserva. Sauber camuda dambos pilotos, dexando pasu a la veteranía de Räikkönen y a les espeutatives de Giovinazzi. Fálase de qu’en 2019 podríen dir entá meyor, asina que tamos deseyando de velos en pista otra vegada pa confirmalo.

Toro Rosso foi campu d’operaciones pa Red Bull, que pa 2019 va empezar la so rellación con Honda. Ye verdá que la temporada pa Toro Rosso xunto a Honda entamó muncho meyor de lo que terminó, pero quedó claro que, xunto a Red Bull, el xigante xaponés puede llegar a consiguir coses grandes. Brendon Hartley nun tuvo muncha suerte nes sos carreres y les más de les vegaes quedó fuera de puntos, dalgo que terminó facilitando la so marcha pa 2019. Entren, pa sustituyilu a elli y a Gasly que promociona a Red Bull, Daniil Kvyat y Alex Albon. La escudería hermana de Red Bull caltuvo una batalla con Sauber nes últimes carreres por facese col octavu puestu del mundial de constructores, pero l’equipu suizu terminó quedando per delantre. Pa 2019, volver a empezar.

Si hai un equipu que de xuru tinía ganes de terminar 2018, tien de ser Williams. Dixéronse y cuntáronse tantes coses males del equipu de Grove que nun nos paez xusto siguir sumando más datos negativos. 2018 va quedar pal escaezu como un añu desastrosu. Y puntu. Con Sirotkin y Stroll fuera del equipu, entren Russell y Kubiça, que vienen a ser espeyu de les ilusiones anovaes coles que va Williams a 2019. Necesiten dalgo totalmente distinto a lo que se fexo en 2018 y toca ponese yá.

Con un calendariu otra vegada bien apertáu y milenta novedaes, paez que cuerre priesa dexar 2018 atrás pa enfotase yá no que vien. Sicasí, paeznos qu’esti 2018 dexó bien de momentos interesantes, carreres prestoses qu’acabaron cola cantinela d’aburrimientu que muncha xente entona dacuando y con un futuru brillante con cares nueves y promeses de batalla no más alto de la clasificación.

N’AsturiesF1 zarramos esti 2018 pa ponenos a pensar yá en 2019, pero tai sollertes porque d’equí a marzu diremos cuntandovos tolo que vaiga pasando hasta que toque tornar a ver les lluces coloraes apagase n’Albert Park.

Nun hai temporada de F1 dende qu’entremos na nueva era de unidaes de potencia na que nun sintamos crítiques. L’aburrimientu, la falta de ruíu, los pilotos de pagu y munches otres son típiques demientres los meses que dura un campeonatu. Delles cuando llega payares queden nel escaezu, otres siguen pero más seliquino ya otres nunca nun desapaecen.

Ferrari devolvió a la xente que sigue esti deporte la ilusión de ver batalles en pista que nun tuvieren protagonizaes namás por pilotos de la escudería qu’agora mesmo domina la categoría: Mercedes. Llamativamente, tamién Ferrari s’encargó por dos vegaes de dinamitar les sos oportunidaes de sumar campeonatos na so cuenta particular. Esti añu foi más llaceriante entá porque’l Ferrari que pilotaron Vettel y Räikkönen foi superior al Mercedes en bien de carreres, pero nengún de los dos pilotos foi a aprovechalo bien. Y tol mundu sabía que la supuesta inferioridá de Mercedes diba durar bien poco.

2018 foi un añu redondu pa les fleches platiaes. Ye verdá que Bottas nun sumó nenguna victoria y qu’hebo dellos momentos nos que tuvieron nel puntu de mira, llegando a almitir él mesmu que foi la so peor temporada na categoría, pero l’estáu de forma de Hamilton ye increyible. Siempre se diz d’elli que si ye quien a atopar l’equilibriu ente lo que fai en pista y lo que fai fuera d’ella ye imposible vencelu. Esti añu foi un exemplu d’ello. L’ausencia práutica d’errores pela so parte sumada a les prestaciones d’un coche y un equipu que trabaya pa ganar, ehí tenemos los cinco campeonatos atropaos hasta’l momentu.

Toos cuntamos con que Ferrari torne en 2019, porque paez que consiguió dar cola clave pa poder competir con Mercedes nel planu téunicu. Sólo precisa que los sos pilotos, y sobre too nel casu de Vettel que ye’l que más presión va tener enriba na temporada viniente, seya quien a sacar partíu a les debilidaes del equipu alemán y aprovechales pa facese más fuerte. La presencia de Leclerc paeznos perimportante polo que va suponer de motivación pal pilotu alemán y poles ganes que tenemos de velu n’un bon coche dempués de lo que fexo col Sauber esta temporada.

Nun sabemos si se puede falar de temporada de transición pa Red Bull cuntando col so cambiu de motorista pa 2019. Ello ye que l’equipu de Milton Keynes tuvo momentos bonos, sobre too nes carreres finales anque con suerte desigual pa los sos pilotos. L’añu de Ricciardo, un pocu asemeyáu al que tuvo en 2017 Verstappen, foi desesperante per momentos, anque quiciábes menos dempués de la so decisión de colar de Red Bull pa dir pa Renault. La cantidá bultable d’abandonos del australianu fai que nun lu tengamos visto lluchar por podios como esperábemos, dalgo que sí pudimos ver col so compañeru. Sicasí, Red Bull yá nun mira pa Renault si non pa Honda y paez que lo que vieron y les cuentes qu’echaron na temporada del xigante xaponés con Toro Rosso convencen bastante como pa pensar que, con un perbón chasis, Red Bull puede tar no cimero na temporada 2019. Gasly súmase asina al equipu dempués del so pasu protocolariu pola escudería hermana y toca-y midise a ún de los pilotos más ambiciosos de la parriella. L’espectáculu de xuru va ser prestosu.

Va quedanos pa siempre la dulda de si, nel casu de que Force India (agora Racing Point) nun tuviera perdío los sos puntos na mitá de la temporada, Renault tuviere termináu cuartu. Falábase mui bien al entamu de la temporada de lo que podía facer la escudería francesa pero naide nun esperaba con que valiera como pa ponese cuartos. Ye llamatible que tampoco nun ye que tuvieran carreres estraordinaries davezu, de fechu quedaron munches vegaes fuera de puntos o sólo terminaron con un coche, pero cuando llograron sumar, fixéronlo en momentos estratéxicos cuando los sos persiguidores nun lo facíen. L’equipu necesita más regularidá pa 2019, dalgo que paez que va tener si nos fiamos del criteriu de Ricciardo de firmar con ellos. Cuidamos que’l pilotu australianu quier siguir sumando podios y victories, asina que ye posible que pal 2019 velos cuartos o más arriba nun seya tan raro.

Aparte de Renault, otru equipu que merez l’aplausu del xeneral ye ensin duldes Haas. Nel tiempu que lleven na Fórmula Un la so evolución ta siendo ponderatible y esti añu fueron poques les oportunidaes que nun los vimos ente los diez primeros, sábadu o domingu. Pesie a la deceición de la primer carrera col so doble abandonu dempués de les bones espeutatives puestes no que podíen hacer ellí, la so progresión pela temporada valió-yos el quintu puestu nel mundial de constructores. El manexu de Grosjean y Magnussen sigue tando nel puntu mira, anque curiosamente’l pilotu danés nun recibió penalización dala pol so arte en pista. Sí que ye verdá que tien un estilu de llevar el coche que nos trai a la cabeza’l pilotar d’otru tiempu, menos consideráu col rival, pero tamién ye verdá qu’esti añu esa ambición valió al equipu tar ehí arriba. Lo mesmo podríemos dicir de Grosjean, magar que nel so casu a vegaes danos la sensación de que ye más despiste o torpeza qu’agresividá.

Quédennos la mitá d’equipos por analizar y tamién les carreres, pero como’l descansu ente temporaes ye bien llargu, convidámosvos a que teais sollertes a les siguientes entregues d’esti repasu a 2018.

Mentantu, podéis tamién consultar la llista de pilotos, yá confirmada y completa, que vamos ver na parriella de 2019 equí.

Esta época del añu ye una de les más prestoses y al tiempu alloriantes pa los fans de la Fórmula Un. Pa compensar pola falta de carreres demientres estes tres selmanes en branu, nunca nun falten coses de les que falar. Esti añu la silly season ta dando pa muncho.

L’honor de ser el primeru en dar un pasu alantre sobre’l so futuru ye pa Daniel Ricciardo, qu’al pocu del gran premiu d’Hungría col que la F1 marchaba de vacaciones, anunciaba la so decisión, pa muncha xente inesperada, de dexar Red Bull la temporada que vien. Amás, esclarió que diba pa Renault, compartiendo equipu col alemán Nico Hülkenberg na escudería francesa. La siguiente noticia vieno de la mano del asturianu Fernando Alonso: dempués de muncha especulación sobre’l so futuru, el pilotu de McLaren anunció que nun diba tar na F1 pal 2019, dempués de 17 años na máxima competición de motor. Nun ye, de toles formes, un adiós definitivu, más bien un retiru temporal mientres s’enfota n’otres competiciones. Estos son dos de los movimientos que más dieron que falar nesti mercáu de branu. Pero vamos dir per partes:

MERCEDES
> LEWIS HAMILTON
> VALTTERI BOTTAS
Les fleches platiaes nun van camudar la so alliniación pa 2019, tres firmar con dambos pilotos un contratu que los venceya al equipu alemán pa dellos años más nel casu d’Hamilton y pa un más nel de Bottas que siguirá anovando na midía que los sos resultaos tean a l’altor que demanda la escudería.

FERRARI
> SEBASTIAN VETTEL
> CHARLES LECLERC
Vettel va siguir pa 2019 (el so contratu dura hasta 2020) y too apunta a que Räikkönen tamién anque sigamos sintiendo rumores que lu saquen del equipu pa sentar a Leclerc nel so asientu. Nun hai anunciu oficial nin pa ún nin pal otru lláu, asina que toca esperar que dende Ferrari comuniquen dalgo ya imaxinamos que seya coincidiendo col gran premiu de casa en Monza.

ACTUALIZACIÓN: El 11 de setiembre, Ferrari confirmó que Kimi nun diba continuar como pilotu de la Scuderia pa 2019 y que Charles Leclerc yera l’elexíu pa sustituyilu.

RED BULL
> MAX VERSTAPPEN
> PIERRE GASLY
Cola anuncia de Ricciardo de que dexa la escudería de Milton Keynes, Max Verstappen tórna dafechu en llíder l’equipu. Pa ocupar l’otru asientu nun sorprende que l’equipu escoyera a Pierre Gasly, faciendo valir otra vuelta más el so programa de pilotos mozos que los promociona dende la escudería hermana, Toro Rosso, ya premiando los bonos resultaos del pilotu francés no que va de temporada

RENAULT
> NICO HÜLKENBERG
> DANIEL RICCIARDO
La escudería francesa yá tien confirmaos a los sos pilotos pa 2019: la sorpresa de que Ricciardo vaiga pilotar ellí en 2019 fai albidrar que’l futuru del equipu ye bien prometeor. Al pilotu australianu súmase, como yá dicíemos enantes, l’alemán Nico Hülkenberg, nel que va ser el so tercer añu en Renault.

HAAS
> KEVIN MAGNUSSEN
> ROMAIN GROSJEAN
L’equipu estauxunidense nun confirmó entovía qué pilotos van tar al volante de los sos monoplaces pa 2019. Sicasí paez mui probable que Kevin Magnussen continúe una temporada más, dempués de los bonos resultaos que ta consiguiendo esti añu. Nun paez tenelo tan claro’l so compañeru Romain Grosjean, que nesti 2018 nun ta convenciendo. En casu de que’l francés marchare, suenen pilotos como Leclerc o Pérez, col primeru siendo una opción con bastante xacíu si pensamos que tanto elli como l’equipu tán venceyaos a Ferrari.

ACTUALIZACIÓN: El 28 de setiembre, l’equipu estauxunidense confirmó que, por tercer añu consecutivu, va caltener a Magnussen y Grosjean como pilotos.

RACING POINT FORCE INDIA
> SERGIO PÉREZ
> LANCE STROLL
Force India ye ún de los equipos que más ta dando que falar pola so situación económica y pol futuru de los sos dos pilotos. Pinta que Pérez nun va siguir, anque elli mesmu fala de tener posibilidaes n’un par d’equipos, y tampoco nun hai nada seguro sobre Ocon. Plantégase la posibilidá qu’aterrice nel equipu’l canadiense Stroll, n’un movimientu lóxicu dempués de que so pá, Lawrence Stroll, se ficiera cargu d’evitar que Force India terminara en concursu d’acreedores poniendo daqué del so dineru al serviciu del equipu inglés. Nun sorprendería a naide ver al so fíu a los mandos d’un Force India en 2019, pero ¿quién lu va acompañar?

ACTUALIZACIÓN: El 23 d’agostu confirmóse que l’equipu pasaba a llamase Racing Point Force India dempués de la so compra per parte de la empresa Racing Point UK. L’equipu pierde asina tolos sos puntos ya entama de cero como si fuere un equipu nuevu.

ACTUALIZACIÓN: El 30 de payares, l’equipu confirmó que’l so nome pa 2019 va ser Racing Point F1 desfaciéndose asina del Force India col que llevaben les últimes temporaes.

ACTUALIZACIÓN: El 18 d’ochobre, Force India confirmó que Sergio Pérez va continuar siendo pilotu del equipu pa 2019, dempués de firmar un contratu d’un añu cola escudería inglesa.

ACTUALIZACIÓN: El 30 de payares, Force India confirmó que Lance Stroll va ser el pilotu qu’acompañe a Sergio Pérez na temporada 2019.

McLAREN
> CARLOS SÁINZ
> LANDO NORRIS
Una de les noticies del branu foi l’anunciu de Fernando Alonso de que nun va tar en F1 en 2019. Sorpresa o non, la so noticia vieno siguida de la confirmación de que Sáinz va ser el so reemplazu. Queda pendiente saber el futuru de Stoffel Vandoorne, al que toos faen fuera del equipu pa 2019. La verdá ye que’l fechu de que Lando Norris tea dando titulares y que vaiga a participar na primer sesión d’entrenamientos en Spa nun dexa de facer medrar los rumores a la escontra del pilotu belga, rumores qu’a estes altures tamién falen de la posibilidá de que seya Ocon el que tea en McLaren nel futuru. Nun se descarta, de fechu, que seya darréu, de forma que’l pilotu francés de Force India moveríase a McLaren en sustitución del pilotu belga.

ACTUALIZACIÓN: El 3 de setiembre McLaren confirmó que Stoffel Vandoorne nun va a siguir nel equipu en 2019 y anunció a Lando Norris como pilotu pa la prósima temporada xunto a Carlos Sáinz.

TORO ROSSO
> DANIIL KVYAT
> ALEXANDER ALBON
Nengún pilotu ta oficialmente confirmáu pa tar en 2019 nel equipu Toro Rosso. La marcha de Gasly a Red Bull y los resultaos irregulares de Brendon Hartley, que nun tán convenciendo muncho al equipu, puen dar pa 2019 un equipu nuevu dafechu con otru par de pilotos mozos a la espera del so momentu de debutar na F1. Ún de los nomes que suenen ye’l de Dan Tickburn, que forma parte del programa yá nomáu.

ACTUALIZACIÓN: El 28 de setiembre, Toro Rosso confirmó que Daniil Kvyat diba volver a ser pilotu de Toro Rosso pa la temporada 2019, ocupando l’asientu que dexa Gasly al movese pa Red Bull.

ACTUALIZACIÓN: El 27 de payares, Toro Rosso anunciaba qu’Alex Albon va ser el compañeru de Daniil Kvyat pa la temporada 2019.

SAUBER
> KIMI RÄIKKÖNEN
> ANTONIO GIOVINAZZI
En Sauber observen como a ún de los sos pilotos tán saliendo-y milenta opciones pa 2019, polo que ye lóxico qu’entá nun tengan confirmación oficial de nengún de los dos asientos. Anque tampoco nun ye oficial que Leclerc vaiga salir, hai munchos candidatos a sentase n’un Sauber l’añu qu’entra: el propiu Leclerc, Marcus Ericsson, Kimi Räikkönen y Antonio Giovinazzi. Fálase muncho de la posibilidá d’un intercambiu ente Ferrari y Sauber pa que Kimi acabe nel equipu suizu ya’l pilotu francés na Scuderia, pero como too nesta silly season, namás son rumores.

ACTUALIZACIÓN: El día 11 de setiembre Sauber confirmó que Kimi Räikkönen va competir con ellos hasta 2020. Al mesmu tiempu, Charles Leclerc dexa l’equipu pa dir pa Ferrari.

ACTUALIZACIÓN: El día 25 de setiembre Sauber confirmó a Antonio Giovinazzi como pilotu pa 2019. Marcus Ericsson, pilotu actual de la escudería, va siguir na escudería como pilotu reserva.

WILLIAMS
> GEORGE RUSSELL
> ROBERT KUBIÇA
El 2018 de Williams ta siendo tán desastrosu que casi da pa pensar si tendrán tiempu en pensar en pilotos con tol trabayu que necesiten p’ameyorar lo visto hasta agora. De toles formes, colos rumores de la marcha de Stroll a Force India, quedaríen ensin un de los sos pilotos y son varies les opciones que puen tener, ente elles l’actual pilotu Sergei Sirotkin. Pa facer competencia, Robert Kubiça sigue esperando na solombra, nun sabemos si dispuestu o non a subise al Williams de 2019, y tamién se fala del pilotu Mercedes George Russell, que ta faciendo una temporada bien curiosa en F2.

ACTUALIZACIÓN: El 12 d’ochobre, Williams confirmó que George Russell va ser un de los sos pilotos pa 2019.

ACTUALIZACIÓN: El 23 de payares, Williams confirmó a Robert Kubiça como pilotu pa 2019.

La realidá de la silly season ye que sólo ye seguro lo que ye oficial (anque yá nel pasáu vimos que non siempre ye asina) ya’l restu son rumores, más o menos acertaos, pero rumores a la fin. Tai sollertes a los cambios que vos diremos anunciando y actualizando nes redes sociales y nesti mesmu post desque se vaigan produciendo.

Cuando termines una temporada de Fórmula Uno p’allá pa payares, siempre paez que queda una eternidá pa empezar a ver los coches otra vegada en pista. Pero equí tamos otra vuelta más, a piques d’entamar una temporada nueva y a pocos díes de que los coches arranquen motores nos test de pre-temporada.

Y ye que cásique paez que la Fórmula Uno nun terminara pues tuvimos noticies cada pocu, que los equipos diben dando como a cuentagotes. Tenemos la parrilla de pilotos y d’equipos yá zarrada (nun siendo que dalguién cambie a última hora) y tamién calendariu de test y de carreres. Y, pa nun variar, tenemos polémiques. Sí, ye verdá, yá arranca la Fórmula Uno.

Vamos empecipiar polos equipos y pilotos qu’esti añu vamos ver nos circuitos. Nun hai grandes cambios nin nengún nuevu, anque sí dellos cambeos de nome. Podéis atopar tolos datos nesta páxina.

Williams va ser el primeru n’enseñanos el coche col qu’aspiren a ameyorar lo visto la temporada pasada. Al final, l’equipu de Claire Williams decidió subir al coche al rusu Sergei Sirotkin pa facer pareya con Lance Stroll. Una apueste firme pola mocedá que nun sabemos cómo va resultar pal equipu inglés. El fichaxe de Kubiça que tanto s’anunciaba quedóse n’un puestu como pilotu reserva y probador na escudería, dalgo qu’ensin duldes sabe a pocu dempués de tolo que se faló del so retornu a la competición formulera.

Tolos focos tán puestos enriba de dos equipos principalmente: al marxe de Mercedes y Ferrari, qu’albidramos van tar no cimero de les clasificaciones dende bien ceo, l’atención tamién ta puesta en Toro Rosso (agora Red Bull por petición d’Honda) y, cómo non, en McLaren. Les razones son obvies: los cambios de motorista pa dambos equipos ya’l resultáu que puean tener. Si nos fiamos de lo que vimos en temporaes pasaes, lo suyo yera qu’en Toro Rosso tuvieren de tar más preocupaos porque Honda tuvo lloñe d’amosar un bon rendimientu. Ensin embargu, hai tiempu que les suposiciones dexaron de funcionar y nun queda más qu’esperar a velo en pista pa confirmalo. ¿Sedrá quién Honda a facer un bon papel con otru equipu? ¿Sedrá Renault quién a devolver a McLaren a los puestos qu’opten a podiu? ¿Sedrá too un desastre? Nun queda muncho pa dir respondiendo a estes entrugues.

Otru equipu d’interés ye Force India (de momentu vamos nomalos asina anque anden a la gueta d’un nome nuevu), que nes pasaes temporaes fexo un perbón trabayu y que tienen una de les pareyes de pilotos más interesantes de la parrilla. Tamién tenemos ganes de ver a Charles Leclerc conduciendo un Fórmula Uno como pilotu oficial, de la mano d’Alfa Romeo-Sauber, otra combinación d’equipos míticos qu’esperamos funcione meyor de lo que l’añu pasáu funcionó Sauber.

Col aniciu d’una temporada, la verdá ye que tolos equipos más o menos creen interés pa la xente qu’intenta ver, n’unos test que munches vegaes nun dicen nada anque otres falen por sí mesmos, per onde va dir la temporada. Pa nós les apuestes son clares hasta que pase lo contrario: los principales candidatos al títulu van ser los Mercedes y los Ferrari. En cuantes a los pilotos…la opción cenciella ye pensar en Hamilton como máximu aspirante a ganar el so quintu campeonatu, pero nun dar creitu a Vettel paeznos un erru. De la mesma forma, anque con menos convencimientu, paeznos que Bottas podría tener dalgo que dicir.

Nun queremos escaecer a los pilotos Red Bull. Con un bon coche Ricciardo y Verstappen opten a too, asina que nun sería d’estrañar que tuvieren tamién no cimero. Pela parte media la cosa va tar más reñida y esti añu nun tenemos tan claro qué equipu va tar na última posición.

El calendariu d’esti añu ye intensu (podéis consultalu equí) con munches carreres siguíes qu’ensin duldes son un prestu pa la xente que les ve dende casa o que va al circuitu. Amás de los clásicos (Silverstone, Monza, Suzuka…) tenemos ganes de ver si Baku nos sorprende con otra carrera como la del 2017 onde pasó de too. El retornu d’Alemaña y Francia al calendariu ye siempre una bona noticia anque sigue ensin convencenos el zarrar con Abu Dhabi.

Pa rematar esti primer post de la temporada, nun queríemos dexar fuera una de les noticies de la temporada: Fernando Alonso, pilotu McLaren, va competir nel WEC, el campeonatu de resistencia qu’inclúi les 24 hores de Le mans y qu’esti añu fai una supertemporada de transición qu’empieza y acaba con dambes cites de la épica prueba francesa. Lo que nun pasaría de ser una noticia más y la obviedá de qu’a Alonso yá nun-y val sólo cola F1 como antaño, convirtióse en polémica cuando los organizaores del GP de Fuji (de los mesmos propietarios que l’equipu Toyota), que ta dientro del WEC, decidíen cambiar la fecha de cellebración del so eventu pa que nun-y coincidiera al pilotu asturianu col calendariu de F1. Y ye que la condición principal pa qu’Alonso combine dambes categoríes per parte de McLaren ye que la Fórmula Uno seya lo primero y Fuji coincidía en feches col GP de los Estaos Xuníos.

Como ye lóxico, munches persones manifestaron el so maltar por esta decisión que nun ye cosa del pilotu pero que dexa claro l’interés que mueve al WEC que ta n’hores baxes tres la marcha de Porche con Toyota como únicu constructor dientro la categoría reina, los LMP1, a la espera de confirmación d’equipos privaos. Ensin embargu, paeznos que’l fechu de cuntar con un reclamu como ye Fernando Alonso nun debiera facer que los organizaores o quienes decidan estes coses dexen de pensar en los milenta pilotos que tamién compiten n’otres tantes categoríes y que se vieron afeutaos d’una forma o otra por esti cambeu. Alonso nun ye un pilotu que necesite de favores pa demostrar nada a estes altures de la carrera y hai munchos corredores que lleven apostando per bastante tiempo nestes series. Nun hai qu’olvidar tampoco l’efectu en cadena que provoquen estos movimientos, forzando el cambiu de fecha del eventu correspondiente de Super GT y una colisión del WEC con DTM y The Petit Le mans.

De toles formes nun somos ayenos a los poderes que mueven estes coses y como dicimos, el WEC ta n’hores baxes y paez que cualquier cosa ye válido pa que se fale d’ello. Nun sabemos l’efeutu que pue tener, nin l’ésitu que va tener Alonso col equipu Toyota, favoritos a priori, pero viendo tolo que s’entamó, más-yos val que pague la pena si nun se quier perder credibilidá y atractivu.

Zarramos comentando que dientro unos díes, el llunes que vien más concretamente, empiecen los test en Barcelona, la primer toma de contautu con esta nueva temporada. N’AsturiesF1 taremos sollertes pa traevos la información más importante de lo que vaiga pasando nesos díes.

Estes son les feches y llugares de presentación de cada equipu: