Category: Tests

Los que nun vieran lo que pasó’l sábadu na sesión de clasificación y sólo se quedaren colos resultaos de los llibres del vienres, podíen pensar que Brasil diba ser un paséu pa Hamilton. Pero’l pilotu inglés sigue siendo humanu, como diz elli, y un erru cometíu a dos minutos d’empezar la Q1 dexábalu fuera dafechu de la clasificación y facíalu salir del pitlane’l domingu. De xuru que muncha xente fan de Ferrari pensó en qu’esto mesmo podía tener pasao en carreres anteriores, enantes de que’l mundial tuviera decidíu.

De toles formes, nun foi una carrera de debilidaes pa Mercedes, nin tampoco lo foi la sesión de clasificación onde Bottas fexo la pole. Hamilton consiguió remontar posiciones hasta ponese cuartu al final, y quiciás tuviera sío terceru con más vueltes. De toles formes, quedónos claro otra vuelta más que Mercedes tán un pasu per delantre del restu tanto no mecánico como no mental.

Ferrari aprovechó la debilidá de Bottas nel primer xiru dempués de la salida, y Vettel consiguió ganar dempués de delles carreres ensin consiguilo, siendo acompañáu nel podiu amás de por Bottas, pol so compañeru d’equipu Kimi Räikkönen que terminó terceru, sumando un bon númberu de puntos pa Ferrari y dexando a Vettel más cerca de ser matemáticamente segundu na clasificación de pilotos.

Amás, ye importante destacar l’actuación de Felipe Massa na so última carrera en Brasil (polo menos de momentu…) que terminando séptimu llogró zarrar el so capítulu na Fórmula Uno de la meyor forma posible.

Al final nun apaeció nin una gota lluvia, pero sí vimos coses en pista que trestocaron un pocu los planes que los equipos teníen pa les sos estratexes, con coche de seguridá incluyíu na vuelta trés que fexo que los pilotos adelantasen les paraes previstes y aquellos que tiníen daños pudieran entrar a compensalos.

Como dicíemos, Mercedes nun dexó d’amosar una vegada más que son mereceores de dambos campeonatos. Pesie al erru de Hamilton el sábadu, trabayaron n’un coche que diba salir dende’l pitlane con partes previstes pa 2018, lo que nos fai albidrar que van siguir mandando o a lo menos no más alto na temporada que vien. Anque Bottas nun foi quien a facer de la so pole una victoria, nun dexó de lluchar por ponese al altor de Vettel anque nun foi suficiente. Hamilton terminaría cuartu, un puestu algamáu a base d’adelantamientos en pista que dexaben n’evidencia les carencies del restu de coches comparaos col Mercedes.

Ferrari, anque tarde, foron los trunfadores del gran premiu. Yá nun-yos sirve más que pal arguyu de ganar n’un circuitu icónicu y terminar la temporada con optimismu. Vettel fexo una salida perbona que-y permitió atopar el sitiu xustu p’adelantar a Bottas nel primer xiru y nunca nun vese amenazáu por elli o por Hamilton. Räikkönen tamién fexo una carrera sólida, terminando terceru.

Red Bull llegaben con torgues a Brasil. Aparte de nun ser un circuitu que se-yos dea bien, Ricciardo tinía una penalización de diez posiciones. La so salida na mitá de la parrilla foi bona, pero los incidentes de la primer curva afectáronlu de manera que llegó a tar penúltimu en pista dempués de facer un trompu. Ensin embargu, n’otra exhibición d’adelantamientos del pilotu australianu, consiguió remontar posiciones hasta terminar sextu. El so compañeru Verstappen tuvo una carrera más tranquila, anque siempre pendiente de les gomes ya’l so desgaste. Terminó quintu.

Nun hai duldes que Massa corría con una marcha más: yera la so (segunda) última carrera en casa dempués de que s’anunciara que va dexar la Fórmula Uno al final de la temporada. Na mente de tol mundo ta’l so retornu dempués del anunciu sorpresa de la retirada de Nico Rosberg y los movimientos que vinieron con ello, pero paeznos que d’esta va dir la definitiva. Ye por eso que nun nos sorprende velu terminar séptimu n’un circuitu nel que yá ganó tres vegaes nel pasáu y onde’l públicu nun dexaba de cantar el so nome. Williams consiguió aprovechase de los problemes de Force India y de les dificultaes de McLaren pa rodar al so ritmu, y consiguieron un puñadín de puntos que cásique confirma’l so quintu puestu nel mundial de constructores. Pero nun foi too bueno, Stroll tuvo una sesión de clasificación bastante floxa y una carrera mui probe, terminando nel puestu dieciséis.

McLaren consiguió puntuar con Alonso, qu’adelanta a Vandoorne nel mundial de pilotos a falta d’una carrera pal final de la temporada. El pilotu belga foi víctima d’un accidente con Ricciardo y Magnussen y onde nun pudo facer nada pa evitalo. El ritmu del McLaren foi bastante bonu tol fin de selmana. De fechu, Alonso fue quien a clasificar séptimu’l sábadu, anque gracies a la penalización de Ricciardo empezaría sextu. Tuvo delles batalles en pista con Pérez y Massa, y vio la bandera a cuadros en octavu llugar.

Force India tuvo una carrera decepcionante si pensamos no que nos tienen avezaos dende’l principiu la temporada. Ocon viose fuera bien temprano por un choque con Grosjean que perdió’l coche y golpeólu nel lláu drechu, quedando dambos fuera de pista. Anque Grosjean pudo siguir en carrera, nun tuvo la mesma suerte Ocon qu’acaba asina con una racha perbona de carreres finalizaes ya en puntos. Pérez, pela so parte, tampoco nun tuvo demasiao inspiráu, y anque lu vimos dar guerra en dellos momentos de la carrera, namás pudo terminar novenu.

Renault paecía que podía dar muncho más de lo que finalmente vimos nel gran premiu. Sáinz namás pudo ser undécimu y Hülkenberg, un pilotu al que Brasil suel dase-y bien, féxose col últimu puntu en disputa. Nun ta siendo un fin de temporada brillante pa Renault, que ta en boca de toos, especialmente polos fallos socesivos de los motores que monten Toro Rosso y pol baxón de rendimientu que tán amosando. De toles formes, consiguieron recortar un puntu a Toro Rosso, que nun pudieron sumar nengún.

Toro Rosso yá tuvo problemes el vienres con dambos pilotos: nun pasaben diez minutos de la primer sesión de llibres cuando víemos el coche de Hartley echar fumo y quedar aparcáu n’un de los llaos del circuitu. Otru problema más pal pilotu de Toro Rosso que nun ve forma de tener un fin de selmana ensin problemes. Gasly pel so lláu tamién tuvo problemes que ficieron a los mecánicos de Toro Rosso trabayar muncho más de lo que cuntaben. Hartley tuvo de retirase de la carrera y Gasly namás pudo terminar nel puestu doce.

Ericsson llegó a tar cerca los puntos n’un momentu de la carrera, pero la realidá de Sauber ye la que ye y la lóxica terminó imponiéndose con dambos pilotos nos últimos puestos namás per delantre de Stroll y Grosjean. Na so batalla particular, el pilotu suecu quedaría per delantre de Wehrlein, que tuvo dellos problemes col coche y nun rodó a bon ritmu.

Haas tuviera una sesión de clasificación bastante decente, pero perdiólo too nos primeros metros del gran premiu: Magnussen chocaba con Vandoorne y quedaba fuera y Grosjean con Ocon, anque pudo continuar. Ensin embargu, el francés diba ser penalizáu con diez segundos, dalgo que nun alteró muncho la so posición que yá yera últimu. Anque siguen teniendo oportunidaes d’adelantar a los dos equipos que tienen per delantre, namás una bona carrera con un bon puñáu de puntos pue ayudalos y viendo lo visto en Brasil, nun tenemos claro que vaigan ser quien a ello.

La última carrera de la temporada va ser Abu Dhabi dientro dos selmanes. Demientres llega esa fecha, éstos son los númberos que nos dexó’l gran premiu de Brasil 2017:

Clasificación

Carrera

Siguimos faciendo boca a dos selmanes d’entamar la temporada 2017 colo que dio de sí la segunda selmana de tests en Barcelona. Yá dexamos a un llau la espectación poles presentaciones de chapa, pintura y potencia ya intentamos nesti segundu eventu intentar albidrar en qué condiciones lleguen realmente los equipos. Y nun ye fácil, con Mercedes y Ferrari xugando al póker y confirmando que tán claramente destacaos sobre’l restu pero cola incertidume de cuála ye la diferencia ente ellos.

Y ye que cada vez ta más claro que Ferrari fexo un trabayu descomanáu esti iviernu, o qu’incluso ta asoleyando ganancies que llograra l’añu pasáu pero que nun fueron quien a esplotar por otros problemes. Hasta segundu y mediu sobre’l restu-yos calculaba a esti par Guenther Steine. Interesante teniendo en cuenta que vien del xefe d’un equipu con motorización Ferrari. El casu ye que va haber qu’esperar a lo menos a Melbourne pa empezar a sacar coses en claro, y quiciás nun salgamos de duldes hasta que pase dalguna carrera más. Lo que ta claro ye que’l so ritmu y la so fiabilidá (recordemos, sólo cuatro unidaes de potencia se permiten pa tola temporada) tán mui per delantre del restu.

Red Bull intenta asomar la patina ente dalgunos problemes de Renault, esperables en cierta parte polos cambios de diseñu del motor pero que tampoco acaba de despegase del restu, y ellos mesmos asumen les distancies con Ferrari y Mercedes. Quiciás nun seya nes primeres carreres sinon cuando teamos más cercanos a la mitá de la temporada cuando Red Bull se sumen a la fiesta de la cabeza. O quiciás tamién nos tán engañando ya’l dúu cabezaleru realmente seya un tríu magar que se muestren bastante conformes colo que tán viendo.

Per detrás, el grupu formáu por Williams, Force India, Toro Rosso, Renault y Haas promete entretenimientu. Quiciás seya Williams el qu’apunte meyores maneres nestes altures tan tempranes, pero la sensación ye que nun va haber muncha distancia ente toos estos equipos. Quiciás hai dalgún tapáu xugando al despiste tamién, o dalgún otru que se perciba perriba les sos posibilidaes reales una vez metíos en condiciones de carrera. Yá va quedando menos pa sabelo.

Sauber paez quedar rezagáu y probablemente bona culpa d’ello seya siguir cola unidá de potencia del añu pasáu. Veremos si los permite lluchar por dalgo y pueden compensalo ameyorando’l trabayu n’aerodinámica de los rivales directos. Pueden quedar especialmente atrás na carrera de desarrollos a nun ser que lleguemos al llímite de ganancies especialmente no tocante a los propulsores.

McLaren pela so parte nun arrenuncia a enllenar páxines y páxines. Sigui con complicaciones y cambiando motores y xugando al ensayu-error col problema implícitu na toma de datos del coche cuando tas probando configuraciones diferentes. Nun sabemos si realmente tán na situación de despiste de fai dos años y si’l riesgu que tomaron esti añu pa facer cambios drásticos nel motor los dexará a principiu de temporada per detrás de la so competitividá en 2016. Sí ye verdá que al rodar cola unidá a baxu rindimientu pa poder dar xiros a la pista y nun estrozales, el ritmu ye bastante peor al vistu l’añu pasáu. La cuestión ye cuanto ye esi detuning y si sedrán quien a iguar los problemes que toparon (dalgunos envueltos en daqué misteriu) pa llevar un motor competitivu a Australia. De lo contrario tendría perdifícil acabar la carrera siquiera.

Ensin más, dexámovos colos tiempos que se marcaron cada día nesa segunda selmana de test:

 

Primer día: llunes, 7 de marzu

Segundu día: martes, 8 de marzu

Tercer día: miércoles, 9 de marzu

Cuartu día: xueves, 10 de marzu

Va pocu más de dos selmanes qu’abríemos la temporada n’AsturiesF1 y equí tamos otra vuelta, cola primer tanda de test de F1 yá terminaos. A la fin, dempués de muncha semeya, munchu vídeo y munches bones pallabres, víemos los nuevos coches ponese en pista con resultaos estremaos. Empezando pola decepción de McLaren qu’amenaza con más de lo mesmo perdiendo práuticamente’l primer día, con problemes el segundu y llogrando recuperar dalgo de tiempu los dos últimos; eso sí, curiando al máximu la unidá de potencia por mor de dellos problemes, qu’empezaron con problemes col diseñu del tanque d’aceite según dalgunos y siguen con otros que Hasegawa paecía nun tener claros tovía.  Depués d’arriesgar nos sos primeros dos años con una arquitectura dela unidá de potencia que-yos dio bien de guerra, aprovecharon la mayor llibertá d’evolución al eliminase esti añu los tokens nel motor para reorganizar el propulsor d’una forma más asemeyada a la del de Mercedes.  Esti cambiu nun ta llibre de problemes, pero nun sedrá almisible repetir lo d’años anteriores.

Per otru llau destacar les buenes sensaciones d’un Ferrari onde, anque busquen ser más prudentes, nun pueden ocultar que de momento les coses tán saliendo como esperaben y tán mostrándose fuertes nel planu de la fiabilidá, dependerá agora de cuanto avanzaron el restu.  Y cuando falamos del restu falamos especialmente de Mercedes, l’enemigu a batir y campeón esta selmana también en vueltes al circuitu, sicasí nun se puede dicir muncho sobre ónde tán a nivel de ritmu polo que se vio tovía.  Sí ye cierto que Ferrari y Mercedes parecen apuntar a tar un poco más avanzaos que’l restu.

En Williams Massa volvió al trabayu mientres Stroll ta deprendiéndolu duramente y con poca posibilidá de garrar esperiencia en pista a cuenta d’un par d’incidentes que lu ficieron retirase bien llueu los dos díes. Per parte de los vehículos con motorización de Renault, les coses fueron de peor a meyor, y ye que trátase d’otra unidá de potencia remocicada dafechu, con tol trabayu d’estabilización qu’ello conlleva. Dalgo nos diz qu’especialmente Red Bull guarda bastante, mientres que quiciás s’esperaba más de Toro Rosso. De la marca, Renault, sinceramente nun sabemos qué esperar, pero nun puede ser nada parecido a lo qu’asocedió l’añu pasáu.

Tamién esperábemos más llucimientu de Force India, pero quizás nun ye’l momentu tovía d’enseñar les cartes. Per otru llau Haas asoma la patina como aspirante a puntos nes carreres si la progresión correspuende a lo que s’intúi nestos primeros díes.

Pero esto nun ye más que test, alcordaivos, anque yá tenemos delles coses clares: McLaren entá tien muncho que bregar, la superioridá en velocidá d’estos coches con respeutu a los del añu pasáu ye bultable y los comentarios de los pilotos sobre lo desixentes que son nun nos dexen duldes: tamos énte una temporada perinteresante en tolos sentíos. Siguimos con incógnites sobre si veremos más o menos adelantamientos, pero tarde o temprano sabremos cuala ye la realidá.

Tovía queda tiempu pa que lleguen los coches a Australia. De momentu, estos son los númberos que nos dieron los cuatro primero díes de test en Barcelona:

Primer día: llunes, 27 de febreru

Segundu día: martes, 28 de febreru

Tercer día: miércoles, 1 de marzu

Cuartu día: xueves, 2 de marzu