Category: Temporada 2017

El gran premiu de Hungría 2017 nun va pasar a la hestoria como’l más entreteníu pero sí como’l que más vimos desarrollase’l conceutu “trabayu d’equipu”. Y ye que les órdenes d’equipu tuvieron más que presentes nesti gran premiu: dende Mercedes a Ferrari pasando por Renault.

Enantes de nada hai que rescamplar la perbona actuación de Ferrari esti fin de selmana, sobre manera’l sábadu ya’l domingu. Ayeri dexaron claro que taben un pasu per delantre de Mercedes y güei terminaron de convencenos. La pole de Vettel el sábadu, ya’l segundu puestu de Räikkönen facía albidrar que’l domingu díbemos ver a un Ferrari dominaor y anque nun foi too un camín de roses, especialmente nel casu de Vettel y un poco frustrante pa Kimi por tener que xugar a ser el segundu pilotu, ye incuestionable que taben meyor que Mercedes.

La salida foi relativamente limpia y perbona pa la mayor parte los pilotos. Räikkönen casi pudo facese cola primer posición dende’l principiu pero Vettel cubrió bien la so posición pa empezar a meter distancia ente elli y los persiguiores. Pela metá del grupu sí que víemos salides más sucies, con dellos pilotos per fuera pista pero que nun supunxo mayor problema hasta que, unos metros más tarde, teníemos el primer y quiciás incidente más importante de carrera: Ricciardo intenta pasar a Verstappen cola mala suerte de qu’un error del so compañeru d’equipu terminara echándolu fuera de pista y, con ello, fuera de carrera. El coche de seguridá tuvo de salir pa permitir que s’eliminaren los restos que quedaren en pista y l’aceite.

Suel falase de Verstappen como un pilotu escesivamente intensu en dellos momentos, capaz de lo meyor y de lo peor. Nesti casu paez que foi más un error de cálculu qu’otra cosa, pero que ye dalgo qu’a estes altures del partíu’l pilotu de Red Bull nun se pue permitir, sobre too si se trata del so propiu compañeru d’equipu. Verstappen recibió dos puntos de penalización tres la carrera y sirvió una penalización de diez segundos en pista.

Dempués d’esti incidente, poco más pasó que resultara vistoso. La pista del Hungaroring ye estrecha y fai que los adelantamientos seyan complicaos, más entá agora que los coches son más anchos. Ye por eso que lo más que vimos foi pilotos persiguiéndose ente sí y terminando fuera de pista: pasó con Sáinz y Alonso, dalgo que foi investigao y considerao llance de carrera; tamién pasó con Hülkenberg y Grosjean, lo que condicionó la carrera del pilotu francés de Haas; víemoslo tamién con Hülkenberg otra vez y con Magnussen, onde l’alemán terminó fuera de pista por una maniobra de Magnussen que-y valió una penalización de cinco segundos y dos puntos na so llicencia. Dellos pilotos yá falaben de que’l gran premiu diba ser suciu y la verdá que nun se confundieron muncho.

Mercedes buscó la manera de pasar a los Ferrari dempués de que Hamilton dexara atrás a Verstappen y gracies al llabor de Bottas que lu dexó pasar pa que l’inglés intentara adelantar a Räikkönen. A pocos metros de ver la bandera a cuadros, Hamilton devolvía la posición a Bottas, que terminaba terceru per detrás de los Ferrari col so compañeru inmediatamente detrás en cuartu llugar. Tamién Ferrari tuvo de recurrir al llabor d’equipu con Kimi siendo más rápidu que Vettel protexendo la posición de dambos por problemes de Vettel col volante que lu obligaben a dir más despacio de lo que realmente podía.

Red Bull consiguió terminar quintu con Verstappen, pero la deceición yera evidente sobre too pensando en que Ricciardo fuera’l pilotu más rápidu’l vienres ya de cara al domingu pintaben perbien. L’incidente ente dambos pilotos non sólo torgó la carrera de Ricciardo si non tamién la del propiu Verstappen.

Ferrari nun fueron los únicos en tener un bon fin de selmana. McLaren llegaba a Hungría cola esperanza de poder rascar puntinos, siendo esti un circuitu que-yos suel favorecer. Y féxolo. Alonso completó una carrera sólida siempre dientro los puntos, pa terminar sextu, mientres que’l so compañeru, Stoffel Vandoorne, sigui dando pasinos alantre na so evolución como rookie y terminó décimu. Dambos coches dientro de los diez primeros y, pa sumar, la vuelta rápida de carrera pal pilotu asturianu. Facía tiempu que víemos sorrises dende’l llau de la escudería de Woking. Col parón braniegu tendremos que ver en qué queda la so rellación con Honda.

Per detrás, atopamos a Sáinz, col Toro Rosso, qu’otra vuelta más consiguió metese ente los diez primeros demientres el so compañeru d’equipu tuvo perdíu la mayor parte la carrera y nun consiguía sumar nengún puntu. Siguen los rumores que vinculen a Sáinz con milenta equipos, pero de momentu, el pilotu sigui intentando sumar pa Toro Rosso y reivindicándose carrera tres carrera. Daniil Kvyat terminó undécimu.

Los Force India consiguieron tamién puntuar con dambos coches, n’un suma y sigui que paez imparable. Pérez fexo una perbona salida que lu metió yá en puntos dempués d’una sesión de clasificación bien floxa’l sábadu onde nin siquiera tuvo dientro de los diez primeros. Ensin embargu, en pista mostrose regular y seguru, mesmo que’l so compañeru d’equipu que sigui ensin apease de los diez primeros puestos, consolidándose como’l meyor rookie de la primer parte de la temporada.

Fuera los puntos, aparte del yá mentáu Kvyat, tenemos a Renault con Palmer, que nun tuvo’l meyor de los comienzos el vienres, pero que tuvo bastante seguru en pista y consiguió acabar la carrera. Nel otru llau del garaxe nun tuvieron tanta fortuna y Hülkenberg tuvo de retirase dempués del incidente con Magnussen. Otru fin de selmana ensin puntos pa la escudería francesa, pero un pocu d’optimismu nel llau de Palmer que sigui cola solombra de Kubiça acechándolu.

Más abaxo, nel puestu décimoterceru atopamos a Magnussen, que terminó duodécimu pero que colos cinco segundos de penalización recibíos baxaba un puestu. Nun foi un bon fin de selmana pa Haas, yá que Grosjean nin siquiera pudo ver la bandera a cuadros. Dempués d’una parada fuerciada dempués del toque con Hülkenberg que dexara dalgo tocáu’l coche, el pilotu de Haas dexaba’l box con una de las ruedes, la drecha trasera, mal montada, lo que lu dexó fuera de carrera unos metros más alantre, yá nel trazáu.

Williams vio la so rutina de pilotos alterada por problemes de salud de Massa que pudo participar nes sesiones de llibres del vienres y na primer parte de la tercera del sábadu, pero que nun pudo competir na clasificación. Dexaría esa tarea nel pilotu reserva del equipu, l’escocés Paul Di Resta, que llevaba fuera de la competición dende 2014. Foi una llamada arriesgada per parte de Williams yá que Di Resta nun rodara enxamás nesti coche y tola so experiencia vinía del simulaor. Consiguió clasificar per delantre del Sauber de Marcus Ericsson el sábadu y el domingu, pesie a que la so salida, lóxicamente, nun foi bona, tuvo rodando per delantre los Sauber demientres bona parte de la carrera hasta que, a siete vueltes del final, tuvo d’abandonar por un fallu nel Williams. Pela so parte, Stroll tampoco nun tuvo una actuación brillante y namás pudo terminar décimosextu.

De Sauber sigui falándose más polo que pasa fuera de los circuitos (col so nuevu alcuerdu con Ferrari pa 2018 dempués de romper con Honda) que polo que se fai dientro. Nin Wehrlein nin Ericsson ficieron gran cosa en pista, y la so carrera foi discreta. Dempués del emburrión de puntos de McLaren, colóquense na última posición con cinco puntos, a seis de la escudería británica. Ensin duldes, una situación pocu atractiva pa lo que-yos resta de temporada.

Embaxo podéis atopar tolos datos sobre la sesión de clasificación del sábadu y los resultaos del domingu:

Clasificación

Carrera

Dexamos descansar la Fórmula Uno hasta finales del mes d’agostu, pero nun escaezais que siguirá habiendo daqué d’acción en pista nos dos díes de test nel Hungaroring dende’l martes 1 d’agostu, una oportunidá pa los pilotos reserva y les futures promeses de la F1.

Enantes del parón braniegu quédanos facer una visitina a unu de los circuitos preferíos de pilotos y fans. Nel pasáu’l Hungaroring tiennos regalao carreres perinteresantes y, nos últimos tres años, tres ganadores distintos. La carrera húngara siempre se presta pa grandes premios entreteníos y viendo lo visto hasta agora, confiamos qu’esti añu nun vaiga ser excepción.

Dempués de Silverstone ya’l so desenllaz que dexó’l mundial más apertáu que nunca na temporada, llegamos a Hungría cola emoción poles ñubes. Tol mundu señaló’l bon estáu de forma de Hamilton demientres la carrera pasada, onde dominó en carrera de principiu a fin. Hungría suel cebase colos campeones y nun regalar nada, polo que suponemos que Mercedes, anque confíen nes sos posibilidaes, nun quieran dir cola carrera ganada. Amás, tienen ehí a Bottas, que yá ganó dos carreres no que llevamos de temporada y tien a Vettel a tiru.

Ferrari dedicaron estes dos selmanes a intentar dar col problema que causó los dos pinchazos a última hora en Silverstone y que torgaron la carrera de dambos pilotos, especialmente la de Vettel, que lu dexó séptimu, n’un intentu de que nun vuelva a repitise. De cara al mundial de constructores ye importante pa ellos que Mercedes dexe de sumar 1-2 en carrera, porque yá ye bultable la diferencia ente dambes escuderíes.

En Red Bull lleguen con meyores, tán ansiaes como, esperamos por ellos, útiles p’arañar décimes a los equipos d’arriba. Ricciardo yá sabe lo que ye ganar equí, féxolo en 2014, y cuidamos que Verstappen, recuperáu de la so racha de mala suerte, lluchará por tar nes primeres posiciones. L’equipu tien munchu enfotu puestu nestes meyores, anque entá queda por ver si son lo qu’esperaben.

Pela mitá la tabla, Force India y Williams siguen cola so particular batalla, que llevamos viviendo yá delles temporaes, y que de momentu dexa claro que los de Silverstone tienen la sartén garrada pol mangu. La irregulariedá de Stroll nun ta ayudando al equipu de Claire Williams y pesie a esi segundu puestu de Baku, el nun puntuar en toles carreres ta suponiendo un problema pa ellos, sobre too porque Force India ye raro que falle nesi aspeutu.

Haas cuenten con siguir na llínia de grandes premios pasaos, esperando que la mala suerte dexe de cebase con ellos y que los frenos de Grosjean dexen de ser protagonistes nes sos carreres. En Renault, con Palmer cada vegada más cuestionáu, siguin dando pasinos alantre que nun dexen de saber a poco pa lo que s’esperaba d’ellos. Toro Rosso lleva un par de carreres en hores baxes, con rumores sobre’l futuru de Sáinz, el rendimientu de Kvyat ya hestories qu’en definitiva consisten desviar l’atención de lo que ye realmente importante pa ellos que ye sumar cada domingu con dambos pilotos.

Pela parte baxo, Sauber anunciaba hai un par de díes que Nobuharu Matsushita, el pilotu xaponés de F2 que compite agora mesmo nel equipu ART Gran Prix, va participar nos test que van tener llugar dempués del gran premiu nel propiu circuitu de Hungaroring. Nesta anuncia, munchos quixeron ver la confirmación de que Sauber sigui col plan de montar motores Honda pa 2018, dalgo que llevaba nel aire dende que hai unes selmanes de comentara que l’alcuerdu taba en duldes. La sorpresa saltaba’l xueves cuando n’un comunicáu, tanto Sauber como Honda tresmitíen que’l so alcuerdu pa que la escudería montara motores Honda a partir de 2018 quedaba canceláu por “razones estratéxiques” que respondíen a diferentes visiones del futuru conxuntu que cada llau tinía. La situación de McLaren col motorista nun paez avanzar, y queda ver qué episodiu toca vivir nel circuitu húngaru y, tres la decisión de Sauber, qué pasa col futuru de Honda xunto a la escudería de Woking. Les noticies nun dexaben de salir estos díes y conocíemos darréu que Sauber firmara con Ferrari pa siguir usando los sos motores (esta vez la última versión de los mesmos) de magar 2018.

Equí vos dexamos tola información sobre’l circuitu y les gomes escoyíes por Pirelli pa esti gran premiu de Hungría 2017:

 

Nun sabemos cuántes veces más escribiremos sobre un gran premiu en Silverstone, pero otra vegada más, el circuitu dionos motivos más que suficientes pa creyer que tien de siguir tando nel calendariu.

Vivimos una carrera na que la salida foi bien interesante por toles batalles que pudimos ver, y que nos dexó un final inesperáu. Pel medio, fuimos viendo les batalles ente compañeros d’equipu, les de pilotos buscando subir puestos y les frustraciones d’otros al vese perdíos en pista.

Dende bien ceo llegaron los problemes pa dellos pilotos, dalgunos incluso enantes de tomar la salida. Yera’l casu de Jolyon Palmer, que nin siquiera pudo ponese en parrilla por un problema colos frenos. L’inglés ficiera una bona sesión de clasificación ayeri, quedando a les puertes de los diez primeros, y mostrábase confiáu de que podía tener un bon rendimientu en carrera, sobre too corriendo en casa, pero la mala suerte en forma de problema nel so coche volvió a cebase con él. Amás, nun ayuda nada’l que haiga rumores que dicen que Sáinz podría reemplazalu en Renault, dalgunos comenten que tan pronto como a partir del próximu gran premiu de Hungría, dalgo que paez bastante poco fundamentao.

Falando de Sáinz, él ya’l so compañeru d’equipu Daniil Kvyat fueron los principales protagonistes de los primeros minutos de carrera. Dempués d’una salida na que Verstappen-y ganó la posición a Vettel y pudimos ver una batalla perguapa ente dambos pola tercera posición mientres Hamilton y Räikkönen escapaben, los dos pilotos de Toro Rosso teníen un accidente dempués de que Kvyat se saliera del trazáu y chocara col so compañeru al volver a él. Dambos pilotos culpaben al otru, y Sáinz quedó dafechu fuera de carrera, pero los comisarios consideraron que la culpa yera de Kvyat al que penalizaron en pista con un drive through, y fuera d’ella con dos puntos na so llicencia. El rusu pudo continuar en pista, pero namás pudo terminar décimoquintu. L’incidente ente dambos provocó un coche de seguridá que camudó la estratexa de dellos equipos, como por exemplu Sauber con Wehrlein.

Dende les primeres vueltes quedó claro que Hamilton, salvo problema como’l que víemos en Baku, diba controlar la carrera de principiu a fin, asina que la mayor parte de la carrera tuvo concentrada no que facíen los sos persiguidores. Verstappen y Vettel ficieron bien entretenida la primer parte del gran premiu poles sos maniobres d’adelantamientu l’ún sobre l’otru. Ye innegable que dempués de tanta mala suerte y tantos abandonos, el holandés de Red Bull tenía munchísimes ganes de dar guerra en pista, y amosolo güei. Vettel sólo foi quien a pasalu en pits, n’una bona estratexa de Ferrari que lu puso per delantre de Verstappen.

Pa Mercedes, la carrera foi tranquila nel lláu de Hamilton ya intensa ya entretenida nel de Bottas. El finlandés salía novenu dempués d’un cambiu de caxa de cambios que lu dexaba nesa posición dempués de clasificar cuartu ayeri. Fexo una carrera sólida, plantando cara a los Ferrari y con capacidá suficiente p’adelantalos en pista, anque foi un golpe de suerte’l que lu fexo terminar segundu per detrás del so compañeru d’equipu.

Esi golpe de suerte vieno en forma de problema de neumáticu por partida doble nel llau de Ferrari. A falta de dos vueltes y yá casi col segundu caxón del podiu nes sos manes, Kimi Räikkönen vía desapaecer les sos oportunidaes de sumar un bon puñáu de puntos por cuenta un pinchazu na goma delantera izquierda. Dientro la mala suerte, tuvo la fortuna de tar cerca de los garaxes y de poder entrar ensin dañar el coche pa consiguir terminar terceru. Entá recuperábemos l’aliendu de ver el problema de Räikkönen cuando víemos a Vettel salise de pista y volver a ella con otru pinchazu, nel mesmu llau que Kimi. L’alemán tuvo menos suerte y tuvo que percorrer más trazáu col neumáticu dañáu, perdiendo posiciones y terminando, finalmente, séptimu.

Pesie a que lluchó muncho en pista, nun foi esti’l meyor gran premiu del alemán de Ferrari. Avezaos como tamos a que seya un reló y que cometa pocos errores, nesta ocasión vímoslu irregular, saliéndose en varies ocasiones, frenando de más y, en definitiva, amosando que nun taba tolo cómodu que quería. Agora mesmo, la llucha nel mundial de pilotos nun pue tar más apertada con un puntu de diferencia ente Sebastian Vettel y Hamilton.

Red Bull completó una bona carrera con dambos pilotos, especialmente con Daniel Ricciardo que dempués d’empezar penúltimu, consiguió facese cola quinta posición y foi ún de los pilotos que más espectáculu dio colos sos adelantamientos en pista. Nun foi tarea fácil pa él ya que rodando duodécimu tuvo una salida de pista que lu fexo cayer hasta’l puestu diecisiete y tener que lluchar otra vuelta por metese en puntos. Ensin duldes, xunto con Hamilton, el triunfador de la carrera. Red Bull cuenta con trayer una meyora importante pa Hungría dientro dos selmanes, polo que tolos güeyos van tar puestos n’ellos y sobre too en Ricciardo que yá ganó equí hai tres años. Verstappen entró a última hora en pits pol mieu del equipu a que les sos gomes corrieren la mesma suerte que les de los pilotos de Ferrari, pero nun perdió nenguna posición yá que la distancia col so inmediatu persiguidor, el so compañeru d’equipu, yera bultable.

Pa Renault nun foi too decepción, yá que Hülkenberg consiguió terminar sextu ya eso qu’a última hora empezaron a apaecer d’ellos problemes nel coche que casi lu dexen fuera. L’alemán, ensin embargu, pudo terminar, faciendo una bona carrera y sumando puntos vitales pa la so escudería.

Nel llau de Force India, otra vuelta con dambos pilotos en puntos y otra vuelta con batalla ente ellos en pista, qu’esta vez foi bien limpia y tranquila. Ocon ganó la partida a Pérez, faciendo una salida perbona que yá condicionó’l restu de la carrera, yá que’l propiu Pérez almitió qu’esi momentu foi condicionante pa como diba dir el gran premiu. Seya como fuera, los de Silverstone siguen sumando puntos y ganando la so batalla de constructores a Williams.

Williams consiguió puntuar con Massa, pero namás con un puntu que sabe a pocu, sobre too teniendo en cuenta que Force India metía a dambos pilotos dientro de los diez primeros y perriba d’ellos. El sábadu volvieron a tener una sesión de clasificación bastante mala pa dambos pilotos y en carrera nengún de los dos brilló, anque Massa consiguiera un puntu. Stroll nun foi quien a repitir lo visto en carreres pasaes y acabó n’un decepcionante puestu décimosextu.

McLaren vivió un gran premiu d’altibaxos, con Vandoorne (que’l sábadu clasificaba per primer vegada per delantre de Fernando Alonso) bona parte d’ella dientro los puntos y con Alonso perdíu nes posiciones baxes dempués de sufrir otra tanda de penalizaciones por cambios en delles pieces del coche. L’asturianu nin siquiera pudo ver la bandera a cuadros y retirábase con un problema de potencia. Suma y sigui.

Haas decepcionó bastante nesti gran premiu. Paecía que podíen rendir bien y Grosjean tuvo a tiru de puntos demientres gran parte de la carrera, pero problemas pa Magnussen na primer vuelta, nel incidente ente Kvyat y Sáinz, que lu torgaron pal restu de la carrera, y una carrera bastante irregular de Grosjean, con salides de pista ya encontronazos con otros pilotos, ficieron que la escudería estadoxunidense namás pudiera terminar nos puestos doce (Magnussen) y trece (Grosjean).

Otros que nun tuvieron motivu nengún pa sorrir fueron Sauber. Dambos pilotos tuvieron dalgún qu’otru momentu en pista nel que llegaron a chocar l’ún col otru, y anque Ericsson consiguía terminar décimocuartu, siguen ensin convencer a naide. Tamos a la espera de saber si’l cambiu de dirección con Vasseur entrando nes ecuaciones, xuega nel so favor y empiecen a ameyorar el so rendimientu. Wehrlein namás pudo terminar décimoséptimu.

Dientro de dos selmanes la Fórmula Uno retorna a Hungría, onde solemos ser testigos de carreres bien entreteníes, sobre too si la lluvia decidi apaecer. Demientres, equí vos dexamos tolos númberos que nos dio’l gran premiu de Silverstone na sesión de clasificación del sábadu y en carrera’l domingu:

Clasificación

Carrera

Poco nos costó dexar atrás el Gran Premiu d’Austria pa ponenos manes a la obra col de Silverstone, unu d’esos que siempre tan marcaos nel calendariu por míticos. Ensin embargu, llegábemos al circuitu inglés cola noticia de que’l BRDC (el club de pilotos británicos que xestiona Silverstone) activara la cláusula de rescisión del contratu cola F1, lo que quier dicir que, si nun s’atopa otra solución, el gran premiu de Gran Bretaña dexaría d’existir en Silverstone más allá de 2019. Anque se sabía que la cosa nun taba mui bien no que cinca a esti tema dende yá va tiempu y carreres, lo cierto ye que nun dexó de sorprender a munchísima xente del mundu de la F1 que, cuando’l martes s’anunciaba que había una rueda de prensa p’anunciar daqué importante, nun cuntaba que fuera esa decisión.

Inevitablemente, l’actualidá del circuitu va tar venceyada agora a lo que pase nos despachos y a si pue atopase un futuru pal gran premiu en suelu inglés. De toles formes, la vida sigui nel circuitu de Silverstone qu’esti fin de selmana cellebra la so cita cola máxima categoría del deporte de motor.

Al marxe de les alabances y les ganes de correr en Silverstone, especialmente pa dos de los pilotos por ser la so casa, tenemos que falar de Sauber, que hai unos díes nomaba a Frédéric Vasseur como xefe d’equipu, ente otros roles. El so cargu va facese efectivu a partir del próximu llunes 17. La escudería yá vien necesitando un pocu estabilidá n’esi aspeutu pa centrase n’ameyorar o, si eso nun ye posible, en consiguir ser meyores que McLaren pa nun terminar últimos esti añu.

No estrictamente deportivo, Mercedes llega a Silverstone cola necesidá de nun dexar de repitir carreres como la d’Austria, onde Bottas nun tuvo rival en nengún momentu, anque de xuru pensando que’l so pilotu Lewis Hamilton nun dexará de tar inspiráu, como suel ser vezu n’elli cuando cuerre en casa. Ferrari tarán sollertes, yá qu’anque ye un circuitu que se-yos da bien, lleguen a territoriu hostil dempués de lo que pasara en Baku ente Vettel y Hamilton.

Otru equipu sobre’l que tarán milenta güeyos va ser McLaren pola necesidá que tienen de facelo bien delantre’l so públicu. Nes últimes hores falábase de que l’alcuerdu de Honda con Sauber rompiérase y tamién surdíen rumores sobre posibles asociaciones de la marca de Woking pal so futuru inmediatu. Siguimos recibiendo milenta informaciones, pero nenguna ensin base que nos permita afirmar qué va ser realmente de McLaren en 2018. La silly season nun fexo más qu’empecipiar.

Tamién Williams, que tán de cuarenta aniversariu y hai pocu estrenaben un documental sobre la hestoria del equipu, lleguen con ganes de facelo bien en casa y de siguir na sienda los puntos. Otros que tamién cuerren en casa son Force India, que tienen la so sede precisamente en Silverstone. La escudería anglo-india nun sal de los diez primeros dende qu’empezó la temporada, dalgo que ye especialmente meritorio teniendo en cuenta qu’unu de los sos pilotos ye prácticamente un rookie.

Red Bull tien la so fábrica a dellos kilómetros de Silverstone, y anque tengan el so circuitu propiu n’Austria, esti domingu van correr tamién en casa. Ensin duldes, el que llega con más ganes ye Verstappen, deseyando alloñase de tola mala suerte que lu lleva acompañando delles carreres, dexándolu fuera en cinco de les siete últimes. Viendo’l bon rendimientu de Ricciardo nun podemos más qu’imaxinar lo que tuvieren sío les últimes carreres si’l holandés tuviera podío disputar les carreres enteres. Esperamos que podamos velo esti domingu en suelu inglés.

La so escudería hermana, Toro Rosso, llega a Silverstone cola necesidá de dexar atrás les males sensaciones d’Austria y recuperase del so baxu rendimientu nel circuitu de Spielberg. Cuidamos que nun dexarán de lluchar por metese ente los diez primeros como vien siendo vezu.

Nel casu de Renault, Palmer llega col sentimientu positivu de tener sío meyor que’l so compañeru d’equipu n’Austria y de correr en casa, dalgo que, suponemos, va da-y un extra de motivación, dalgo que nun dexa de necesitar. Haas, dempués d’una bona carrera n’Austria onde dambos coches amosaron un bon ritmu pesie al problema hidráulicu de Magnussen que nun lu dexó terminar, cuentan con repetir rendimientu en Silverstone.

Equí vos dexamos tolos datos sobre’l circuitu y embaxo podéis atopar tola información sobre los neumáticos escoyíos por Pirelli pa esti gran premiu:

Hai dellos grandes premios que tienen la mala suerte de pasar dempués d’ún que dio pa muncho tanto dientro como fuera de la pista. Esti ye’l casu d’Austria. Nun foi una carrera que vaiga pasar a la hestoria de la F1 como una de los emocionantes, de fechu foi too bastante predecible y dempués de lo visto’l sábadu, que quiciás foi lo que dio un pocu d’emoción al fin de selmana pola pole de Bottas cola que naide nun cuntaba y la penalización de cinco posiciones de Hamilton por cambiu de caxa de cambios, la carrera nun ufrió grandes coses.

De toles formes, dempués del gran premiu tenemos dalgo más d’emoción no que cinca al mundial de pilotos, con Bottas dando un pasu alantre y poniéndose a tiru del so compañeru d’equipu, a quince puntos, y Vettel siendo más llíder, con veinte puntos perriba del inglés. Foi una carrera onde les grandes protagonistes fueron les gomes y la so xestión yá que tolos pilotos tuvieron dalguna quexa polo rápido que se gastaben, polos blísters qu’apaecíen o problemes asemeyaos.

Cuando les lluces del semáforu s’apagaron a les dos de la tarde del domingu poníase en marcha’l gran premiu d’Austria en Spielberg. Nesi momentu, quiciás la parte que más dio de sí de tola carrera, víemos a Bottas facer una salida perfecta y a Vettel quedar dalgo retrasáu. De fechu, cuestionóse si’l finlandés s’adelantara a la salida y foi investigáu polos comisarios, que decidieron que nun había infracción: la salida fuera perfeuta y punto. Vettel consiguió reponese d’una salida non tan perfeuta, y pelos puestos d’atrás, Verstappen y Sáinz quedaben tamién dalgo descolgaos. Hamilton, dempués de ser terceru’l sábadu na clasificación y de salir octavu pola so penalización, colocábase séptimu n’una salida onde varios pilotos viéronse afeutaos: Alonso quedó fuera dempués de que Kvyat chocara con elli dempués d’una salida un pocu intensa pero normal siendo’l pilotu rusu. Esi tipu de movimientos nun suelen ser raros n’él y esta vegada costó-y la carrera a él y al pilotu de McLaren.

Verstappen pel so llau, siguí cola so mala suerte y a una salida bastante desastrosa na que tuvo un problema col embrague sumose’l convertise en víctima de los malos cálculos de Kvyat. Yá son cinco carreres de siete nes que’l holandés nun ye a ver la bandera a cuadros. Sáinz tampoco nun tuvo una salida brillante, y pronto viose cayer dende’l so puestu de salida, décimu, al décimoquintu.

A partir d’equí, la carrera consistió na persecución de Vettel intentando cazar a Bottas, la remontada discreta de Hamilton, ya’l xuegu de Ferrari con Räikkönen faciendo por estorbar un pocu al so compatriota pa beneficiar al pilotu alemán. Nin siquiera víemos muncha acción nos puestos más baxos. Si acasu los problemas que teníen los pilotos doblaos pa quitase del mediu en dellos momentos de carrera y que, por exemplu, costaron un drive through y dos puntos na so llicencia a Stoffel Vandoorne. Kvyat tamién recibiría esa penalización anque terminara quedando fuera de carrera delles vueltes dempués.

Vettel consiguió minimizar daños quedando segundu y más sabiendo que Hamilton, qu’intentó nes últimes vueltes adelantar a Ricciardo ensin éxitu y que tuvo un fin de selmana bastante descafeináu, namás consiguía ser cuartu. Räikkönen, pel so llau, sería l’encargáu d’ocupar el quintu llugar, n’una carrera discreta pero regular del finlandés.

Tenemos que destacar la recuperación de Williams en carrera, dempués d’una clasificación bien mala pa dambos pilotos el sábadu, consiguíen metese nos puntos el domingu, y teniendo en cuenta que nun foi una carrera lloca como pudo ser Baku, ye d’aplaudir l’esfuerciu de la escudería de Grove. Stroll lleva yá tres carreres siguíes puntuando, dempués de terminar décimu nesta carrera. Massa pel so llau foi novenu.

Nel llau de Red Bull, pesie a la decepción de Verstappen, volvemos atopanos col podiu de Ricciardo, cinco siguíos, que pon la nota positiva a la escudería nel so circuitu. Force India ufrió dellos momentos interesantes con Ocon y Magnussen, pero too terminó col pilotu danés retiráu de carrera por un problema hidráulicu. Foi bona pena yá que tuviera faciéndolo perbien demientres tol fin de selmana y la mala suerte cebóse con él tanto’l sábadu como’l domingu. Taba lluchando por puntos cuando’l so coche lu dexó fuera. Ensin embargu, el so compañeru Grosjean consiguió terminar sextu, amosando que Haas taben rindiendo mui bien tol fin de selmana. Force India pel so lláu, olvidaes yá les carreres pasaes nes que los sos pilotos tuvieron dellos momentos tensos en pista, consiguieron atropar dellos puntos vitales pa la so posición nel campeonatu de constructores. Pérez terminaba séptimu y Ocon yera octavu. El pilotu francés lleva puntuando en ocho de les nueve carreres disputaes hasta agora, bonos númberos ensin duldes.

En Renault, pudimos ver por fin a Palmer quedar per delantre’l so compañeru d’equipu, nel puestu undécimu, dalgo que, pesie a nun sumar puntos, de xuru que-y sirve pa motivase un pocu de cara al so gran premiu dientro siete díes. El pilotu británicu ta siendo cuestionáu por tol mundu y hai milenta rumos alrodiu’l so asientu y les posibilidaes de que nun dure muncho n’elli, asina que sin duldes esta carrera va ser un respiru pa él. Hülkenberg, pel so llau, namás pudo ser décimoterceru.

McLaren consiguió terminar con Vandoorne, pero Alonso, como yá diximos, quedó fuera dempués del accidente con Kvyat. EL pilotu belga nun pudo metese en puntos y quedó duodécimu. En Sauber, Wehrlein consiguió quedar per delantre del so compañeru d’equipu incluso dempués de salir dende’l pitlane por cambiu del turbo, pero dambos quedaben nes últimes posiciones, Wehrlein décimocuartu y Ericsson décimoquintu. Esti gran premiu foi dalgo más tranquilu pa la escudería suiza, pero sabemos que los movimientos internos siguen. Nes carreres vinientes de xuru que siguiremos viendo más cambios.

Embaxo podéis atopar tolos datos sobre la sesión de clasificación del sábadu, cola pole de Bottas, y tamién los resultaos de la carrera, cola so victoria. Dientro siete díes aterrizamos en Silverstone, unu de los grandes premios más esperaos de la temporada.

Clasificación

Carrera

Tovía se sigui falando del gran premiu d’Azerbaiyán y nun ye pa menos, foi unu de los más vistosos yá entreteníos de lo que llevamos de temporada. Unos falaben de lo que se vio en pista, otros de lo que se taba cociendo fuera d’ella, yá que la FIA decidió intervenir nel incidente ente Vettel y Hamilton nel que l’alemán chocó col británicu no que se califica dende casi tolos ámbitos d’una maniobra intencionada. Hailos que dixeron que lo pasao pasao ta, por mui mal exemplu que tenga dao la estrella de Ferrari colo que fexo. Otros opinaron que’l castigu que recibió en pista ya’l descuentu de tres puntos del so carné nun foi suficiente y vieron con buenos güeyos la intervención de la FIA. Ente tantes opiniones cuesta distinguir quien fala por interés propiu y quién lo fai dende la neutralidá. Nosotros lo que vos podemos cuntar ye que dempués del alcuentru de Vettel y Arrivabene colos miembros de la FIA, ente los que taba Jean Todt, y de que l’alemán asumiera tola culpa polo que pasó y se comprometiere a trabayar por enmendar un pocu la imaxe que dexó, sobre too de cara a los más mozos, el máximu muérganu decidió que Sebastian Vettel nun diba a formar parte de nenguna campaña promocional que tuviera que ver cola máxima competición del motor. Si se volviera a repitir esti tipu d’acción nel futuru, seya Vettel seya otru pilotu, sí que habría sanción. Y con esto zárrase, anque sía namás na teoría, esti capítulu de la temporada 2017.

Llegamos a Austria, territoriu y circuitu Red Bull, coles ganes de ver otra bona carrera qu’ayude a olvidar lo que se fala fuera de la pista. L’añu pasáu yéremos testigos d’otru de los momentos críticos de los dos pilotos de Mercedes na so disputa pol primer puestu na clasificación. Esti añu, esa disputa treslládase a un pilotu Mercedes y a otru Ferrari, que yá lleguen col ambiente calecíu pa que veamos más que chispes en pista.

Red Bull, dempués del so triunfu inesperáu, pero no por eso menos prestosu, tamién llega cola intención, per un llau de siguir la sienda del éxitu con Ricciardo, y de consiguir que’l coche termine la carrera, pel de Verstappen. El pilotu holandés lleva varies carreres faciendo bien les coses nel sábadu pero viéndose fuera de carrera por culpa’l coche, el domingu.

Poco se faló esta selmana de McLaren, si acasu de la venta de Ron Dennis de lo qu’entá-y quedaba de la escudería cola qu’antaño consiguiera milenta triunfos. Los sos dos pilotos continúen centraos en sacar el mayor rendimientu posible al coche qu’algamaba los puntos, per primer vegada hai namás que dos selmanes. El restu d’equipos buscará la manera de metese nos puestos d’enriba aprovechando les disputes ente pilotos y asina sacar tayada pal so propiu beneficiu.

Tamos deseyando ver a los dos Renault rindiendo bien, yá que se fala de que’l so futuru ye bien prometeor, asina como lo que puen faer los Sauber dempués de delles selmanes un pocu intenses no extradeportivo.

Ensin más, equí vos dexamos tolos datos sobre’l circuitu d’Austria, el Red Bull Ring, y la información sobre les gomes elexíes por Pirelli pal fin de selmana.

L’añu pasáu cuando tocaba escribir sobre esti gran premiu (renomáu esti añu col país que lu acueye) nun lo facíemos con munchu entusiasmu yá que la carrera fuera más bien aburrida, si acasu con un pocu d’interés polos problemes que tuviera Hamilton, pero la victoria fuera pa un Mercedes.

Un añu dempués y tres d’una sesión de calificación au los Mercedes amosaron que nun taben tán muertos como paecía nesti trazáu, llegaba otru gran premiu en Baku. Y vaya gran premiu, unu de los más interesantes ya entreteníos que tenemos visto en tiempu. Vamos empezar pola primer vuelta, la salida na que Hamilton pudo caltener el so primer puestu mientres per detrás Vettel se colocaba segundu y un inspiráu Pérez garraba el tercer puestu, dexando a Bottas y Räikkönen peliándose per detrás. Dambos tendríen un incidente que faría que Bottas tuviera d’entrar en pit pa cambiar el morru del so coche y s’atopara nel puestu diecisiete. Tamién nos primeros metros de carrera, víemos a Sáinz facer un trompu dempués d’intentar evitar un choque col so compañeru d’equipu, Daniil Kvyat, que se saliera n’una de les escapatories y taba intentando metese otra vuelta na carrera.

Nun diba ser un bon gran premiu pal pilotu rusu yá que na vuelta doce acababa topándose con una de les paredes del circuitu y asina terminaba la so carrera y apaecía’l primer coche de seguridá, oportunidá qu’aprovechaben los pilotos de los puestos más baxos pa parar y probar una estratexa nueva dempués de cómo diben pasando les coses. Nun facía nin una vuelta que marchara’l primer coche de seguridá cuando teníemos otru, esta vegada por cuenta los restos que quedaren en pista tres los distintos accidentes y lo que dexara Kvyat col suyu. Los pilotos nun consideraben que fuera dalgo necesario y fueron munches les protestes polo lento que diba el coche de seguridá y que castigaba tanto gomes como motores.

N’unu de los momentos previos a que desapaeciera el coche de seguridá, una maniobra de Hamilton facía que Vettel chocara cola parte trasera del Mercedes dalgo a lo que’l pilotu alemán reaccionó poniéndose a l’altura de Hamilton y chocando’l so coche escontra’l del pilotu británicu. L’alemán nun entendía por qué Hamilton lu ficiera chocar frenándolu tanto y tomaba la xusticia pela so mano, dalgo que-y terminó costando una penalización de diez segundos de stop and go delles vueltes más tarde.

Al pocu d’esti incidente, nel reaniciu de carrera, los Force India peleaben por posición cuando Esteban Ocon zarraba a Sergio Pérez y dambos se tocaben, saliendo Pérez peor paráu y causando otru coche de seguridá. Nun duró muncho esta vegada y pronto apaeció la bandera colorada, pa permitir que se trabayara en llimpiar el circuitu de tolos restos qu’entá quedaben. Gracies a esa bandera, Räikkönen y Pérez que taben a piques de retirase, pudieron trabayar nos sos coches y sacalos otra vuelta a pista, anque con vuelta perdida. Nun-yos valdría de muncho, yá que dambos terminaríen retirándose.

Tres la bandera colorada y el reiniciu, el cuartu, de la carrera, Ricciardo facía una maniobra d’adelantamientu que lu dexaba terceru en carrera. Massa, que nesi momentu taba terceru, vía como’l so Williams diba perdiendo posiciones por un problema cola suspensión del coche, qu’al pocu lu dexaba fuera. Bottas siguía remontando posiciones, y Hamilton en primer puestu con Vettel detrás. Dientro los puntos, teníemos a Stroll cuartu, Magnussen quintu y Ocon sextu. Paecía que la carrera diba ganala Hamilton, pero entós nes imáxenes de carrera podíemos ver como’l reposacabeces del so coche s’afloxaba y lu obligaba a parar pa que-y lu fixaren, pesie a que’l mesmu pilotu intentara axustalu tando en pista. Al tiempu qu’esto pasaba, Vettel entraba a servir la so penalización. L’alemán saldría per delantre’l pilotu de Mercedes, que yá nun sedría a pasalu.

Per delantre, Ricciardo víase col llideralgu de carrera nes sos manes, siguíu de Stroll y Magnussen. El pilotu de Haas fexo una carrera fantástica, y anque nun consiguió terminar terceru si non que foi séptimu, foi un gran esfuerciu nel so llau del garaxe. Grosjean namás pudo ser décimoterceru dempués de milenta problemes colos sos frenos.

La pelea pol podio llegaría hasta’l final, con Ricciardo quedando primeru y Bottas, dempués de dir faciendo la so carrera ensin munchu ruíu, consiguía adelantar a Stroll a pocos metros de la llínia de meta y cola bandera a cuadros ondeando, faciendo que’l pilotu canadiense tuviera de “conformase” con ser terceru dempués d’una carrera na qu’amosó que pue facer les coses bien si ta centráu y motiváu. Conviértese nel pilotu rookie más mozu n’algamar el podio.

Ocon terminaría siendo sextu, per delantre del Haas y Sáinz que pesie al trompu de la primer vuelta pudo recuperase y acaba octavu. Y ensin duldes, la bona noticia del día va pa McLaren por consiguir los dos primeros puntos de la temporada, de la mano d’Alonso, que terminaba novenu. Pudieron ser más, yá que’l so compañeru d’equipu tuvo cerca d’adelantar a los Sauber, pero quedó al final nel puestu doce. Pel medio los McLaren, los pilotos Sauber, que tamién tuvieron el so momentu en pista tocándose cuando peleaben por posición, quedaben décimu (Wehrlein) y undécimu (Ericsson).

Nel apartáu d’abandonos abrimos con Palmer, que foi’l primer sacrificáu, dempués d’un fallu nel so Renault, siguíu de Kvyat, del que yá falemos y Max Verstappen, que yera ún de los que más guerra taben dando nos primeros puestos enantes de que’l so Red Bull, otra vuelta, terminara dexándolu tiráu.

Nico Hülkenberg tamién quedaría fuera de carrera dempués de chocar cola parte drecha del so coche, dalgo que lu dexaba fuera del gran premiu y suponía un doble DNF pa Renault. A esta llista súmense los yá mentaos Massa, Pérez y Räikkönen.

Va falase muncho demientres esta selmana sobre lo fecho por Vettel, que dempués de la carrera yera penalizáu con tres puntos nel so carné. El pilotu alemán suma yá 9 puntos de los 12 que cada pilotu tien y cumplen ciclu en Silverstone, lo que quier dicir que tien de tener cuidáu nel próximu Gran Premiu d’Austria, en dos selmanes, de nun tener nengún accidente que lu puea penalizar.

Tamién va siguir falándose de los Sauber y la so situación tanto en pista como dientro les oficines. Y por supuesto, de McLaren. La escudería sumó güei los sos primeros puntos de la temporada pero sigui ensin convencer y la obsesión por evitar qu’Alonso se-yos escape pue llevar a tomar decisiones dientro poco.

Equí vos dexamos tolos datos de la sesión de clasificación del sábadu y los resultaos del gran premiu d’Azerbaiyán 2017:

Clasificación

Carrera

Anque ye la segunda vez que vemos Fórmula Uno peles cais de Bakú, ye esta la primer vegada que tenemos un Gran Premiu d’Azerbaiyán. Colos circuitos nuevos son poques les estadístiques que podemos ufrir y les predicciones, sobre too teniendo en cuenta que’l ganaor del añu pasáu yá nun cuerre. N’aquel gran premiu, Nico Rosberg facíase cola victoria, per delantre de Vettel y Pérez.

Esti añu, los actores nun son mui distintos, pero cuntamos con que los dos Mercedes tean dando guerra nes primeres posiciones, como nos tienen avezaos, mesmo que los Ferrari. Red Bull naguaben por llegar a Bakú, sobre too Ricciardo, que suel esfrutar los circuitos d’esti tipu (tamién-y pasa con Mónaco y Singapur).

Pa desgracia del circuitu, son munches les coses que se tán falando fuera de lo que ye la carrera en sí: la posible separación de McLaren y Honda, y les duldes que surden sobre quién suministraría motores a la escudería británica. Falábase d’un retornu a Mercedes, cola torga qu’eso supón pa ser a plantar cara a Mercedes n’un futuru, ya incluso de la entrada d’Alfa Romeo como motorista. Pero como siempre pasa en Fórmula Uno, hai delles époques del añu nel que ye too especular (la famosa silly season qu’afeuta a pilotos ya equipos de la mesma manera). Va tocanos pues esperar a ver en qué queda tola discusión.

Per otru llau tamién supimos demientres esta selmana que Monisha Kaltenborn yá nun ye xefa d’equipu de Sauber, dalgo que llevábemos temiéndonos dende va tiempu. Los resultaos nun tán siendo los esperaos, yá nun lo fueron l’añu pasáu, ya’l so puestu taba en dulda cásique cada gran premiu. Llegaos equí nun sorprende que, dempués de que Sauber tea faciendo carreres bastante descafeinaes, Kaltenborn haiga perdío’l so poder. Hai dellos nomes yá sonando pa sustituyila que de xuru dirán concretándose nel fin de selmana.

Delles entrugues vienen a la mente n’esta previa: ¿sedrá Hamilton quien a repitir l’éxitu de Canadá? ¿Consiguirá Vettel recuperase? ¿Acabará McLaren la carrera con dalgún de los dos coches? A partir del vienres a les once de la mañana, diremos dando rempuesta a estes ya otres entrugues.

Alcordaivos, los primeros llibres (como acabamos de comentar) empiecen a les once de la mañana, y la segunda sesión, a les tres de la tarde. Pal sábadu, tenemos los llibres tres a les doce y la sesión de calificación a les tres. El domingu, la carrera tamién sedrá a les tres de la tarde.

Pa dir abriendo boca, equí vos dexamos dellos datos sobre’l circuitu y, embaxo, podéis ver les gomes que Pirelli trai pa esta carrera y la selcción de cada pilotu.

 

 

Cuando llegaron les ocho de la tarde del domingu, tábemos toos sollertes pa ver si Hamilton diba ser capaz de ganar el gran premiu de Canadá o si Vettel diba aumentar la so ventaxa nel mundial. Anque podíemos prever el resultáu, de xuru que naide nun pensaba que díbemos tener un gran premiu tán entreteníu, dalgo a lo que Canadá nos tien avezaos.

La salida foi tranquila pa Hamilton, que nun tardó en meter tiempu al segundu, y un desastre pa Vettel. Pero si tenemos que falar de bones salides ehí tenemos al pilotu de Red Bull, Max Verstappen: empezaba la carrera quintu y na primer curva taba xusto detrás de Hamilton, n’una maniobra qu’entá tamos intentando entender. Otra ovación pal pilotu holandés. Vettel, pel so lláu, víase cuartu nesos primeros metros. Amás, nel planu negativu, víemos a Kvyat quedar paráu na vuelta de calentamientu, dalgo que pudo solucionar pero que lu condicionó pal restu la carrera ya que llevó penalización por nun recuperar la so posición en parrilla. De fechu, foi entá pior, porque más allá de mitá de carrera,informaben a Toro Ross de que la penalización que recibiera’l pilotu rusu fuera un erru (un drive-through) y aplicaben-y diez segundos de penalización.

Tovía tábemos recuperando de la salida, cuando víemos a dos coches fuera de carrera: Sáinz y Massa, y un Haas sospechosamente entrando en boxes a cambiar l’alerón delanteru. Les imáxenes dexaben claro que Sáinz (que lleva penalización de tres puestos pa Bakú y dos puntos nel carné) y Grosjean chocaren en pista, cola bona suerte pal francés, que sólo con cambiar el morru pudo continuar la so carrera. Ensin embargu, Sáinz salía disparáu, faciendo un trompu que llevaba con él fuera de pista a Felipe Massa, totalmente ayenu a tolo que pasaba per detrás y que cuntaba con conseguir un bon puñáu de puntos pal equipu nesta carrera.

Col Safety Car en pista, munchos equipos decidieron entrar (Sauber con Wehrlein) pa optar por una estratexa alternativa. L’orde de carrera siguía siendo’l de los primeros metros, con Verstappen persiguiendo a Hamilton y Bottas y Vettel per detrás. Al reanudase la carrera, l’alemán de Ferrari perdía parte del so alerón delanteru, dañáu por algún incidente nos primeros momentos de carrera, y víase obligáu a entrar, desmontando asina la estratexa d’una parada y dexándolu últimu. Tocaba remontar.

Unes vueltes más tarde, tol mundo echaba les manes a la cabeza al ver el Red Bull de Verstappen diendo mui despacín y parando n’unu de los llaos del circuitu. Un problema cola batería dexaba al holandés fuera del gran premiu dempués d’una magnífica salida. Con Verstappen fuera, Hamilton metía más distancia entá a los sos persiguidores, Bottas y Ricciardo y empezaba a consolidar la que foi una de les sos carreres más perfectes en cuantes a estratexa y xestión de gomes. Nun tuvo rival en nengún momentu, nin siquiera na salida. Esti circuitu ye especialmente favorable al pilotu inglés, foi equí onde consiguió, hai diez años, la so primer pole y victoria, dalgo que replicaba esti fin de selmana.

Ensin duldes, anque la carrera tuvo bien de frentes abiertos, el que más atención recibió foi la llucha de los Force India. Pérez llideraba a Ocon, pero’l francés taba convencíu de que yera más rápidu que’l so compañeru y podía ponese a tiru Ricciardo, que rodaba terceru. Pidió que lu dexaren pasar, pero l’equipu nun se pronunció y Pérez acabó per delantre. Surdieron munches opiniones sobre lo correcto o non de lo fecho pol equipu, pero ta claro que dambos pilotos ufrieron un espectáculu d’aplausu. Esteban Ocon nun dexa de reafirmase gran premiu tres gran premiu, y lo d’ayeri namás foi un pasu alantre.

Ferrari nun tuvo’l so día esti domingu: al problema de Vettel al principiu de carrera, sumábase problemes colos frenos nel coche de Räikkönen na so última parte, xusto cuando lluchaba por posición en pista col so compañeru. Vettel consiguió terminar cuartu, salvando los muebles de dalgo que pudo ser muncho peor pa los sos intereses. Pal recuerdu van quedar los movimientos d’adelantamientu fechos pol alemán, del que se dicía que nun sabía adelantar, y que tuvo dellos momentos estelares na so llucha por subir puestos.

Per detrás de los Force India y Räikkönen atopamos a Stroll, por fin nos puntos. El pilotu de Williams corría en casa y tenía bien de ganes de zarrar dalguna qu’otra boca crítica. Nun nos paez que sólo con una carrera vaiga apagar les crítiques de quienes piensen que nun tien calidá pa tar na F1, pero de xuru que, a nivel personal, va servir de motivación de cara al futuru.

Zarraron el top ten Nico Hülkenberg, que sigui siendo la garantía de puntos de Renault yá que Palmer quedó nel undécimu puestu, y Romain Grosjean. El so compañeru, Kevin Magnussen, tuvo bien de tiempu nos puntos, pero una penalización por adelantar col coche de seguridá virtual en pista lu retrasaba. Terminó per detrás de Palmer nel puestu doce. Atopamos al primer Sauber, el de Marcus Ericsson, nel puestu trece. El pilotu suecu sintíase feliz pola so carrera que, anque ensin puntos, foi bastante tranquila. El so compañeru, dempués de salir del pitlane por cambiu na caxa cambios, namás pudo ser décimoquintu.

McLaren tornó a terminar fuera de los puntos y namás con un coche. Dempués de tener demientres delles vueltes dambos coches dientro de los diez primeros, el rendimientu del coche foi amenorgando y nel casu de Fernando Alonso, desapaeciendo. Sintíamos al pilotu asturianu ser, una vez más, percríticu col so equipu y cola información que-y diben facilitando per radio. A falta de dos vueltes pal final, el motor del McLaren morría y dexaba a Alonso fuera. Vandoorne terminó décimocuartu. Les tensiones ente la escudería británica ya’l motorista Honda siguin aumentando y yá son milenta les voces que piden que se produza, por fin, la separación definitiva y que McLaren torne a montar motores Mercedes. Esta temporada yá ta perdida.

Na clasificación del sábadu nun hebo más sorpresa qu’un nuevu récord de vuelta. Hamilton, n’un circuitu que ye como so segunda casa, baltaba toles marques cola so pole ya establecía un nuevu récord. El restu de puestos siguieron la tendencia de carreres pasaes. De fechu, ye curiosu’l casu de Bottas que sólo sabe clasificar terceru, cola excepción de la so pole en Baḥréin. Una bandera amariella na Q1 por cuenta d’un accidente de Wehrlein nun suponía muncha torga pa los pilotos, salvo’l casu de Stroll, lo cual fai más meritoriu’l so puestu octavu en carrera.

En dos selmanes, viaxamos por segunda vegada a Bakú pal gran premiu d’Europa.

Clasificación

Carrera