Category: Carreres

Poco nos costó dexar atrás el Gran Premiu d’Austria pa ponenos manes a la obra col de Silverstone, unu d’esos que siempre tan marcaos nel calendariu por míticos. Ensin embargu, llegábemos al circuitu inglés cola noticia de que’l BRDC (el club de pilotos británicos que xestiona Silverstone) activara la cláusula de rescisión del contratu cola F1, lo que quier dicir que, si nun s’atopa otra solución, el gran premiu de Gran Bretaña dexaría d’existir en Silverstone más allá de 2019. Anque se sabía que la cosa nun taba mui bien no que cinca a esti tema dende yá va tiempu y carreres, lo cierto ye que nun dexó de sorprender a munchísima xente del mundu de la F1 que, cuando’l martes s’anunciaba que había una rueda de prensa p’anunciar daqué importante, nun cuntaba que fuera esa decisión.

Inevitablemente, l’actualidá del circuitu va tar venceyada agora a lo que pase nos despachos y a si pue atopase un futuru pal gran premiu en suelu inglés. De toles formes, la vida sigui nel circuitu de Silverstone qu’esti fin de selmana cellebra la so cita cola máxima categoría del deporte de motor.

Al marxe de les alabances y les ganes de correr en Silverstone, especialmente pa dos de los pilotos por ser la so casa, tenemos que falar de Sauber, que hai unos díes nomaba a Frédéric Vasseur como xefe d’equipu, ente otros roles. El so cargu va facese efectivu a partir del próximu llunes 17. La escudería yá vien necesitando un pocu estabilidá n’esi aspeutu pa centrase n’ameyorar o, si eso nun ye posible, en consiguir ser meyores que McLaren pa nun terminar últimos esti añu.

No estrictamente deportivo, Mercedes llega a Silverstone cola necesidá de nun dexar de repitir carreres como la d’Austria, onde Bottas nun tuvo rival en nengún momentu, anque de xuru pensando que’l so pilotu Lewis Hamilton nun dexará de tar inspiráu, como suel ser vezu n’elli cuando cuerre en casa. Ferrari tarán sollertes, yá qu’anque ye un circuitu que se-yos da bien, lleguen a territoriu hostil dempués de lo que pasara en Baku ente Vettel y Hamilton.

Otru equipu sobre’l que tarán milenta güeyos va ser McLaren pola necesidá que tienen de facelo bien delantre’l so públicu. Nes últimes hores falábase de que l’alcuerdu de Honda con Sauber rompiérase y tamién surdíen rumores sobre posibles asociaciones de la marca de Woking pal so futuru inmediatu. Siguimos recibiendo milenta informaciones, pero nenguna ensin base que nos permita afirmar qué va ser realmente de McLaren en 2018. La silly season nun fexo más qu’empecipiar.

Tamién Williams, que tán de cuarenta aniversariu y hai pocu estrenaben un documental sobre la hestoria del equipu, lleguen con ganes de facelo bien en casa y de siguir na sienda los puntos. Otros que tamién cuerren en casa son Force India, que tienen la so sede precisamente en Silverstone. La escudería anglo-india nun sal de los diez primeros dende qu’empezó la temporada, dalgo que ye especialmente meritorio teniendo en cuenta qu’unu de los sos pilotos ye prácticamente un rookie.

Red Bull tien la so fábrica a dellos kilómetros de Silverstone, y anque tengan el so circuitu propiu n’Austria, esti domingu van correr tamién en casa. Ensin duldes, el que llega con más ganes ye Verstappen, deseyando alloñase de tola mala suerte que lu lleva acompañando delles carreres, dexándolu fuera en cinco de les siete últimes. Viendo’l bon rendimientu de Ricciardo nun podemos más qu’imaxinar lo que tuvieren sío les últimes carreres si’l holandés tuviera podío disputar les carreres enteres. Esperamos que podamos velo esti domingu en suelu inglés.

La so escudería hermana, Toro Rosso, llega a Silverstone cola necesidá de dexar atrás les males sensaciones d’Austria y recuperase del so baxu rendimientu nel circuitu de Spielberg. Cuidamos que nun dexarán de lluchar por metese ente los diez primeros como vien siendo vezu.

Nel casu de Renault, Palmer llega col sentimientu positivu de tener sío meyor que’l so compañeru d’equipu n’Austria y de correr en casa, dalgo que, suponemos, va da-y un extra de motivación, dalgo que nun dexa de necesitar. Haas, dempués d’una bona carrera n’Austria onde dambos coches amosaron un bon ritmu pesie al problema hidráulicu de Magnussen que nun lu dexó terminar, cuentan con repetir rendimientu en Silverstone.

Equí vos dexamos tolos datos sobre’l circuitu y embaxo podéis atopar tola información sobre los neumáticos escoyíos por Pirelli pa esti gran premiu:

Hai dellos grandes premios que tienen la mala suerte de pasar dempués d’ún que dio pa muncho tanto dientro como fuera de la pista. Esti ye’l casu d’Austria. Nun foi una carrera que vaiga pasar a la hestoria de la F1 como una de los emocionantes, de fechu foi too bastante predecible y dempués de lo visto’l sábadu, que quiciás foi lo que dio un pocu d’emoción al fin de selmana pola pole de Bottas cola que naide nun cuntaba y la penalización de cinco posiciones de Hamilton por cambiu de caxa de cambios, la carrera nun ufrió grandes coses.

De toles formes, dempués del gran premiu tenemos dalgo más d’emoción no que cinca al mundial de pilotos, con Bottas dando un pasu alantre y poniéndose a tiru del so compañeru d’equipu, a quince puntos, y Vettel siendo más llíder, con veinte puntos perriba del inglés. Foi una carrera onde les grandes protagonistes fueron les gomes y la so xestión yá que tolos pilotos tuvieron dalguna quexa polo rápido que se gastaben, polos blísters qu’apaecíen o problemes asemeyaos.

Cuando les lluces del semáforu s’apagaron a les dos de la tarde del domingu poníase en marcha’l gran premiu d’Austria en Spielberg. Nesi momentu, quiciás la parte que más dio de sí de tola carrera, víemos a Bottas facer una salida perfecta y a Vettel quedar dalgo retrasáu. De fechu, cuestionóse si’l finlandés s’adelantara a la salida y foi investigáu polos comisarios, que decidieron que nun había infracción: la salida fuera perfeuta y punto. Vettel consiguió reponese d’una salida non tan perfeuta, y pelos puestos d’atrás, Verstappen y Sáinz quedaben tamién dalgo descolgaos. Hamilton, dempués de ser terceru’l sábadu na clasificación y de salir octavu pola so penalización, colocábase séptimu n’una salida onde varios pilotos viéronse afeutaos: Alonso quedó fuera dempués de que Kvyat chocara con elli dempués d’una salida un pocu intensa pero normal siendo’l pilotu rusu. Esi tipu de movimientos nun suelen ser raros n’él y esta vegada costó-y la carrera a él y al pilotu de McLaren.

Verstappen pel so llau, siguí cola so mala suerte y a una salida bastante desastrosa na que tuvo un problema col embrague sumose’l convertise en víctima de los malos cálculos de Kvyat. Yá son cinco carreres de siete nes que’l holandés nun ye a ver la bandera a cuadros. Sáinz tampoco nun tuvo una salida brillante, y pronto viose cayer dende’l so puestu de salida, décimu, al décimoquintu.

A partir d’equí, la carrera consistió na persecución de Vettel intentando cazar a Bottas, la remontada discreta de Hamilton, ya’l xuegu de Ferrari con Räikkönen faciendo por estorbar un pocu al so compatriota pa beneficiar al pilotu alemán. Nin siquiera víemos muncha acción nos puestos más baxos. Si acasu los problemas que teníen los pilotos doblaos pa quitase del mediu en dellos momentos de carrera y que, por exemplu, costaron un drive through y dos puntos na so llicencia a Stoffel Vandoorne. Kvyat tamién recibiría esa penalización anque terminara quedando fuera de carrera delles vueltes dempués.

Vettel consiguió minimizar daños quedando segundu y más sabiendo que Hamilton, qu’intentó nes últimes vueltes adelantar a Ricciardo ensin éxitu y que tuvo un fin de selmana bastante descafeináu, namás consiguía ser cuartu. Räikkönen, pel so llau, sería l’encargáu d’ocupar el quintu llugar, n’una carrera discreta pero regular del finlandés.

Tenemos que destacar la recuperación de Williams en carrera, dempués d’una clasificación bien mala pa dambos pilotos el sábadu, consiguíen metese nos puntos el domingu, y teniendo en cuenta que nun foi una carrera lloca como pudo ser Baku, ye d’aplaudir l’esfuerciu de la escudería de Grove. Stroll lleva yá tres carreres siguíes puntuando, dempués de terminar décimu nesta carrera. Massa pel so llau foi novenu.

Nel llau de Red Bull, pesie a la decepción de Verstappen, volvemos atopanos col podiu de Ricciardo, cinco siguíos, que pon la nota positiva a la escudería nel so circuitu. Force India ufrió dellos momentos interesantes con Ocon y Magnussen, pero too terminó col pilotu danés retiráu de carrera por un problema hidráulicu. Foi bona pena yá que tuviera faciéndolo perbien demientres tol fin de selmana y la mala suerte cebóse con él tanto’l sábadu como’l domingu. Taba lluchando por puntos cuando’l so coche lu dexó fuera. Ensin embargu, el so compañeru Grosjean consiguió terminar sextu, amosando que Haas taben rindiendo mui bien tol fin de selmana. Force India pel so lláu, olvidaes yá les carreres pasaes nes que los sos pilotos tuvieron dellos momentos tensos en pista, consiguieron atropar dellos puntos vitales pa la so posición nel campeonatu de constructores. Pérez terminaba séptimu y Ocon yera octavu. El pilotu francés lleva puntuando en ocho de les nueve carreres disputaes hasta agora, bonos númberos ensin duldes.

En Renault, pudimos ver por fin a Palmer quedar per delantre’l so compañeru d’equipu, nel puestu undécimu, dalgo que, pesie a nun sumar puntos, de xuru que-y sirve pa motivase un pocu de cara al so gran premiu dientro siete díes. El pilotu británicu ta siendo cuestionáu por tol mundu y hai milenta rumos alrodiu’l so asientu y les posibilidaes de que nun dure muncho n’elli, asina que sin duldes esta carrera va ser un respiru pa él. Hülkenberg, pel so llau, namás pudo ser décimoterceru.

McLaren consiguió terminar con Vandoorne, pero Alonso, como yá diximos, quedó fuera dempués del accidente con Kvyat. EL pilotu belga nun pudo metese en puntos y quedó duodécimu. En Sauber, Wehrlein consiguió quedar per delantre del so compañeru d’equipu incluso dempués de salir dende’l pitlane por cambiu del turbo, pero dambos quedaben nes últimes posiciones, Wehrlein décimocuartu y Ericsson décimoquintu. Esti gran premiu foi dalgo más tranquilu pa la escudería suiza, pero sabemos que los movimientos internos siguen. Nes carreres vinientes de xuru que siguiremos viendo más cambios.

Embaxo podéis atopar tolos datos sobre la sesión de clasificación del sábadu, cola pole de Bottas, y tamién los resultaos de la carrera, cola so victoria. Dientro siete díes aterrizamos en Silverstone, unu de los grandes premios más esperaos de la temporada.

Clasificación

Carrera

Tovía se sigui falando del gran premiu d’Azerbaiyán y nun ye pa menos, foi unu de los más vistosos yá entreteníos de lo que llevamos de temporada. Unos falaben de lo que se vio en pista, otros de lo que se taba cociendo fuera d’ella, yá que la FIA decidió intervenir nel incidente ente Vettel y Hamilton nel que l’alemán chocó col británicu no que se califica dende casi tolos ámbitos d’una maniobra intencionada. Hailos que dixeron que lo pasao pasao ta, por mui mal exemplu que tenga dao la estrella de Ferrari colo que fexo. Otros opinaron que’l castigu que recibió en pista ya’l descuentu de tres puntos del so carné nun foi suficiente y vieron con buenos güeyos la intervención de la FIA. Ente tantes opiniones cuesta distinguir quien fala por interés propiu y quién lo fai dende la neutralidá. Nosotros lo que vos podemos cuntar ye que dempués del alcuentru de Vettel y Arrivabene colos miembros de la FIA, ente los que taba Jean Todt, y de que l’alemán asumiera tola culpa polo que pasó y se comprometiere a trabayar por enmendar un pocu la imaxe que dexó, sobre too de cara a los más mozos, el máximu muérganu decidió que Sebastian Vettel nun diba a formar parte de nenguna campaña promocional que tuviera que ver cola máxima competición del motor. Si se volviera a repitir esti tipu d’acción nel futuru, seya Vettel seya otru pilotu, sí que habría sanción. Y con esto zárrase, anque sía namás na teoría, esti capítulu de la temporada 2017.

Llegamos a Austria, territoriu y circuitu Red Bull, coles ganes de ver otra bona carrera qu’ayude a olvidar lo que se fala fuera de la pista. L’añu pasáu yéremos testigos d’otru de los momentos críticos de los dos pilotos de Mercedes na so disputa pol primer puestu na clasificación. Esti añu, esa disputa treslládase a un pilotu Mercedes y a otru Ferrari, que yá lleguen col ambiente calecíu pa que veamos más que chispes en pista.

Red Bull, dempués del so triunfu inesperáu, pero no por eso menos prestosu, tamién llega cola intención, per un llau de siguir la sienda del éxitu con Ricciardo, y de consiguir que’l coche termine la carrera, pel de Verstappen. El pilotu holandés lleva varies carreres faciendo bien les coses nel sábadu pero viéndose fuera de carrera por culpa’l coche, el domingu.

Poco se faló esta selmana de McLaren, si acasu de la venta de Ron Dennis de lo qu’entá-y quedaba de la escudería cola qu’antaño consiguiera milenta triunfos. Los sos dos pilotos continúen centraos en sacar el mayor rendimientu posible al coche qu’algamaba los puntos, per primer vegada hai namás que dos selmanes. El restu d’equipos buscará la manera de metese nos puestos d’enriba aprovechando les disputes ente pilotos y asina sacar tayada pal so propiu beneficiu.

Tamos deseyando ver a los dos Renault rindiendo bien, yá que se fala de que’l so futuru ye bien prometeor, asina como lo que puen faer los Sauber dempués de delles selmanes un pocu intenses no extradeportivo.

Ensin más, equí vos dexamos tolos datos sobre’l circuitu d’Austria, el Red Bull Ring, y la información sobre les gomes elexíes por Pirelli pal fin de selmana.

L’añu pasáu cuando tocaba escribir sobre esti gran premiu (renomáu esti añu col país que lu acueye) nun lo facíemos con munchu entusiasmu yá que la carrera fuera más bien aburrida, si acasu con un pocu d’interés polos problemes que tuviera Hamilton, pero la victoria fuera pa un Mercedes.

Un añu dempués y tres d’una sesión de calificación au los Mercedes amosaron que nun taben tán muertos como paecía nesti trazáu, llegaba otru gran premiu en Baku. Y vaya gran premiu, unu de los más interesantes ya entreteníos que tenemos visto en tiempu. Vamos empezar pola primer vuelta, la salida na que Hamilton pudo caltener el so primer puestu mientres per detrás Vettel se colocaba segundu y un inspiráu Pérez garraba el tercer puestu, dexando a Bottas y Räikkönen peliándose per detrás. Dambos tendríen un incidente que faría que Bottas tuviera d’entrar en pit pa cambiar el morru del so coche y s’atopara nel puestu diecisiete. Tamién nos primeros metros de carrera, víemos a Sáinz facer un trompu dempués d’intentar evitar un choque col so compañeru d’equipu, Daniil Kvyat, que se saliera n’una de les escapatories y taba intentando metese otra vuelta na carrera.

Nun diba ser un bon gran premiu pal pilotu rusu yá que na vuelta doce acababa topándose con una de les paredes del circuitu y asina terminaba la so carrera y apaecía’l primer coche de seguridá, oportunidá qu’aprovechaben los pilotos de los puestos más baxos pa parar y probar una estratexa nueva dempués de cómo diben pasando les coses. Nun facía nin una vuelta que marchara’l primer coche de seguridá cuando teníemos otru, esta vegada por cuenta los restos que quedaren en pista tres los distintos accidentes y lo que dexara Kvyat col suyu. Los pilotos nun consideraben que fuera dalgo necesario y fueron munches les protestes polo lento que diba el coche de seguridá y que castigaba tanto gomes como motores.

N’unu de los momentos previos a que desapaeciera el coche de seguridá, una maniobra de Hamilton facía que Vettel chocara cola parte trasera del Mercedes dalgo a lo que’l pilotu alemán reaccionó poniéndose a l’altura de Hamilton y chocando’l so coche escontra’l del pilotu británicu. L’alemán nun entendía por qué Hamilton lu ficiera chocar frenándolu tanto y tomaba la xusticia pela so mano, dalgo que-y terminó costando una penalización de diez segundos de stop and go delles vueltes más tarde.

Al pocu d’esti incidente, nel reaniciu de carrera, los Force India peleaben por posición cuando Esteban Ocon zarraba a Sergio Pérez y dambos se tocaben, saliendo Pérez peor paráu y causando otru coche de seguridá. Nun duró muncho esta vegada y pronto apaeció la bandera colorada, pa permitir que se trabayara en llimpiar el circuitu de tolos restos qu’entá quedaben. Gracies a esa bandera, Räikkönen y Pérez que taben a piques de retirase, pudieron trabayar nos sos coches y sacalos otra vuelta a pista, anque con vuelta perdida. Nun-yos valdría de muncho, yá que dambos terminaríen retirándose.

Tres la bandera colorada y el reiniciu, el cuartu, de la carrera, Ricciardo facía una maniobra d’adelantamientu que lu dexaba terceru en carrera. Massa, que nesi momentu taba terceru, vía como’l so Williams diba perdiendo posiciones por un problema cola suspensión del coche, qu’al pocu lu dexaba fuera. Bottas siguía remontando posiciones, y Hamilton en primer puestu con Vettel detrás. Dientro los puntos, teníemos a Stroll cuartu, Magnussen quintu y Ocon sextu. Paecía que la carrera diba ganala Hamilton, pero entós nes imáxenes de carrera podíemos ver como’l reposacabeces del so coche s’afloxaba y lu obligaba a parar pa que-y lu fixaren, pesie a que’l mesmu pilotu intentara axustalu tando en pista. Al tiempu qu’esto pasaba, Vettel entraba a servir la so penalización. L’alemán saldría per delantre’l pilotu de Mercedes, que yá nun sedría a pasalu.

Per delantre, Ricciardo víase col llideralgu de carrera nes sos manes, siguíu de Stroll y Magnussen. El pilotu de Haas fexo una carrera fantástica, y anque nun consiguió terminar terceru si non que foi séptimu, foi un gran esfuerciu nel so llau del garaxe. Grosjean namás pudo ser décimoterceru dempués de milenta problemes colos sos frenos.

La pelea pol podio llegaría hasta’l final, con Ricciardo quedando primeru y Bottas, dempués de dir faciendo la so carrera ensin munchu ruíu, consiguía adelantar a Stroll a pocos metros de la llínia de meta y cola bandera a cuadros ondeando, faciendo que’l pilotu canadiense tuviera de “conformase” con ser terceru dempués d’una carrera na qu’amosó que pue facer les coses bien si ta centráu y motiváu. Conviértese nel pilotu rookie más mozu n’algamar el podio.

Ocon terminaría siendo sextu, per delantre del Haas y Sáinz que pesie al trompu de la primer vuelta pudo recuperase y acaba octavu. Y ensin duldes, la bona noticia del día va pa McLaren por consiguir los dos primeros puntos de la temporada, de la mano d’Alonso, que terminaba novenu. Pudieron ser más, yá que’l so compañeru d’equipu tuvo cerca d’adelantar a los Sauber, pero quedó al final nel puestu doce. Pel medio los McLaren, los pilotos Sauber, que tamién tuvieron el so momentu en pista tocándose cuando peleaben por posición, quedaben décimu (Wehrlein) y undécimu (Ericsson).

Nel apartáu d’abandonos abrimos con Palmer, que foi’l primer sacrificáu, dempués d’un fallu nel so Renault, siguíu de Kvyat, del que yá falemos y Max Verstappen, que yera ún de los que más guerra taben dando nos primeros puestos enantes de que’l so Red Bull, otra vuelta, terminara dexándolu tiráu.

Nico Hülkenberg tamién quedaría fuera de carrera dempués de chocar cola parte drecha del so coche, dalgo que lu dexaba fuera del gran premiu y suponía un doble DNF pa Renault. A esta llista súmense los yá mentaos Massa, Pérez y Räikkönen.

Va falase muncho demientres esta selmana sobre lo fecho por Vettel, que dempués de la carrera yera penalizáu con tres puntos nel so carné. El pilotu alemán suma yá 9 puntos de los 12 que cada pilotu tien y cumplen ciclu en Silverstone, lo que quier dicir que tien de tener cuidáu nel próximu Gran Premiu d’Austria, en dos selmanes, de nun tener nengún accidente que lu puea penalizar.

Tamién va siguir falándose de los Sauber y la so situación tanto en pista como dientro les oficines. Y por supuesto, de McLaren. La escudería sumó güei los sos primeros puntos de la temporada pero sigui ensin convencer y la obsesión por evitar qu’Alonso se-yos escape pue llevar a tomar decisiones dientro poco.

Equí vos dexamos tolos datos de la sesión de clasificación del sábadu y los resultaos del gran premiu d’Azerbaiyán 2017:

Clasificación

Carrera

Anque ye la segunda vez que vemos Fórmula Uno peles cais de Bakú, ye esta la primer vegada que tenemos un Gran Premiu d’Azerbaiyán. Colos circuitos nuevos son poques les estadístiques que podemos ufrir y les predicciones, sobre too teniendo en cuenta que’l ganaor del añu pasáu yá nun cuerre. N’aquel gran premiu, Nico Rosberg facíase cola victoria, per delantre de Vettel y Pérez.

Esti añu, los actores nun son mui distintos, pero cuntamos con que los dos Mercedes tean dando guerra nes primeres posiciones, como nos tienen avezaos, mesmo que los Ferrari. Red Bull naguaben por llegar a Bakú, sobre too Ricciardo, que suel esfrutar los circuitos d’esti tipu (tamién-y pasa con Mónaco y Singapur).

Pa desgracia del circuitu, son munches les coses que se tán falando fuera de lo que ye la carrera en sí: la posible separación de McLaren y Honda, y les duldes que surden sobre quién suministraría motores a la escudería británica. Falábase d’un retornu a Mercedes, cola torga qu’eso supón pa ser a plantar cara a Mercedes n’un futuru, ya incluso de la entrada d’Alfa Romeo como motorista. Pero como siempre pasa en Fórmula Uno, hai delles époques del añu nel que ye too especular (la famosa silly season qu’afeuta a pilotos ya equipos de la mesma manera). Va tocanos pues esperar a ver en qué queda tola discusión.

Per otru llau tamién supimos demientres esta selmana que Monisha Kaltenborn yá nun ye xefa d’equipu de Sauber, dalgo que llevábemos temiéndonos dende va tiempu. Los resultaos nun tán siendo los esperaos, yá nun lo fueron l’añu pasáu, ya’l so puestu taba en dulda cásique cada gran premiu. Llegaos equí nun sorprende que, dempués de que Sauber tea faciendo carreres bastante descafeinaes, Kaltenborn haiga perdío’l so poder. Hai dellos nomes yá sonando pa sustituyila que de xuru dirán concretándose nel fin de selmana.

Delles entrugues vienen a la mente n’esta previa: ¿sedrá Hamilton quien a repitir l’éxitu de Canadá? ¿Consiguirá Vettel recuperase? ¿Acabará McLaren la carrera con dalgún de los dos coches? A partir del vienres a les once de la mañana, diremos dando rempuesta a estes ya otres entrugues.

Alcordaivos, los primeros llibres (como acabamos de comentar) empiecen a les once de la mañana, y la segunda sesión, a les tres de la tarde. Pal sábadu, tenemos los llibres tres a les doce y la sesión de calificación a les tres. El domingu, la carrera tamién sedrá a les tres de la tarde.

Pa dir abriendo boca, equí vos dexamos dellos datos sobre’l circuitu y, embaxo, podéis ver les gomes que Pirelli trai pa esta carrera y la selcción de cada pilotu.

 

 

Cuando llegaron les ocho de la tarde del domingu, tábemos toos sollertes pa ver si Hamilton diba ser capaz de ganar el gran premiu de Canadá o si Vettel diba aumentar la so ventaxa nel mundial. Anque podíemos prever el resultáu, de xuru que naide nun pensaba que díbemos tener un gran premiu tán entreteníu, dalgo a lo que Canadá nos tien avezaos.

La salida foi tranquila pa Hamilton, que nun tardó en meter tiempu al segundu, y un desastre pa Vettel. Pero si tenemos que falar de bones salides ehí tenemos al pilotu de Red Bull, Max Verstappen: empezaba la carrera quintu y na primer curva taba xusto detrás de Hamilton, n’una maniobra qu’entá tamos intentando entender. Otra ovación pal pilotu holandés. Vettel, pel so lláu, víase cuartu nesos primeros metros. Amás, nel planu negativu, víemos a Kvyat quedar paráu na vuelta de calentamientu, dalgo que pudo solucionar pero que lu condicionó pal restu la carrera ya que llevó penalización por nun recuperar la so posición en parrilla. De fechu, foi entá pior, porque más allá de mitá de carrera,informaben a Toro Ross de que la penalización que recibiera’l pilotu rusu fuera un erru (un drive-through) y aplicaben-y diez segundos de penalización.

Tovía tábemos recuperando de la salida, cuando víemos a dos coches fuera de carrera: Sáinz y Massa, y un Haas sospechosamente entrando en boxes a cambiar l’alerón delanteru. Les imáxenes dexaben claro que Sáinz (que lleva penalización de tres puestos pa Bakú y dos puntos nel carné) y Grosjean chocaren en pista, cola bona suerte pal francés, que sólo con cambiar el morru pudo continuar la so carrera. Ensin embargu, Sáinz salía disparáu, faciendo un trompu que llevaba con él fuera de pista a Felipe Massa, totalmente ayenu a tolo que pasaba per detrás y que cuntaba con conseguir un bon puñáu de puntos pal equipu nesta carrera.

Col Safety Car en pista, munchos equipos decidieron entrar (Sauber con Wehrlein) pa optar por una estratexa alternativa. L’orde de carrera siguía siendo’l de los primeros metros, con Verstappen persiguiendo a Hamilton y Bottas y Vettel per detrás. Al reanudase la carrera, l’alemán de Ferrari perdía parte del so alerón delanteru, dañáu por algún incidente nos primeros momentos de carrera, y víase obligáu a entrar, desmontando asina la estratexa d’una parada y dexándolu últimu. Tocaba remontar.

Unes vueltes más tarde, tol mundo echaba les manes a la cabeza al ver el Red Bull de Verstappen diendo mui despacín y parando n’unu de los llaos del circuitu. Un problema cola batería dexaba al holandés fuera del gran premiu dempués d’una magnífica salida. Con Verstappen fuera, Hamilton metía más distancia entá a los sos persiguidores, Bottas y Ricciardo y empezaba a consolidar la que foi una de les sos carreres más perfectes en cuantes a estratexa y xestión de gomes. Nun tuvo rival en nengún momentu, nin siquiera na salida. Esti circuitu ye especialmente favorable al pilotu inglés, foi equí onde consiguió, hai diez años, la so primer pole y victoria, dalgo que replicaba esti fin de selmana.

Ensin duldes, anque la carrera tuvo bien de frentes abiertos, el que más atención recibió foi la llucha de los Force India. Pérez llideraba a Ocon, pero’l francés taba convencíu de que yera más rápidu que’l so compañeru y podía ponese a tiru Ricciardo, que rodaba terceru. Pidió que lu dexaren pasar, pero l’equipu nun se pronunció y Pérez acabó per delantre. Surdieron munches opiniones sobre lo correcto o non de lo fecho pol equipu, pero ta claro que dambos pilotos ufrieron un espectáculu d’aplausu. Esteban Ocon nun dexa de reafirmase gran premiu tres gran premiu, y lo d’ayeri namás foi un pasu alantre.

Ferrari nun tuvo’l so día esti domingu: al problema de Vettel al principiu de carrera, sumábase problemes colos frenos nel coche de Räikkönen na so última parte, xusto cuando lluchaba por posición en pista col so compañeru. Vettel consiguió terminar cuartu, salvando los muebles de dalgo que pudo ser muncho peor pa los sos intereses. Pal recuerdu van quedar los movimientos d’adelantamientu fechos pol alemán, del que se dicía que nun sabía adelantar, y que tuvo dellos momentos estelares na so llucha por subir puestos.

Per detrás de los Force India y Räikkönen atopamos a Stroll, por fin nos puntos. El pilotu de Williams corría en casa y tenía bien de ganes de zarrar dalguna qu’otra boca crítica. Nun nos paez que sólo con una carrera vaiga apagar les crítiques de quienes piensen que nun tien calidá pa tar na F1, pero de xuru que, a nivel personal, va servir de motivación de cara al futuru.

Zarraron el top ten Nico Hülkenberg, que sigui siendo la garantía de puntos de Renault yá que Palmer quedó nel undécimu puestu, y Romain Grosjean. El so compañeru, Kevin Magnussen, tuvo bien de tiempu nos puntos, pero una penalización por adelantar col coche de seguridá virtual en pista lu retrasaba. Terminó per detrás de Palmer nel puestu doce. Atopamos al primer Sauber, el de Marcus Ericsson, nel puestu trece. El pilotu suecu sintíase feliz pola so carrera que, anque ensin puntos, foi bastante tranquila. El so compañeru, dempués de salir del pitlane por cambiu na caxa cambios, namás pudo ser décimoquintu.

McLaren tornó a terminar fuera de los puntos y namás con un coche. Dempués de tener demientres delles vueltes dambos coches dientro de los diez primeros, el rendimientu del coche foi amenorgando y nel casu de Fernando Alonso, desapaeciendo. Sintíamos al pilotu asturianu ser, una vez más, percríticu col so equipu y cola información que-y diben facilitando per radio. A falta de dos vueltes pal final, el motor del McLaren morría y dexaba a Alonso fuera. Vandoorne terminó décimocuartu. Les tensiones ente la escudería británica ya’l motorista Honda siguin aumentando y yá son milenta les voces que piden que se produza, por fin, la separación definitiva y que McLaren torne a montar motores Mercedes. Esta temporada yá ta perdida.

Na clasificación del sábadu nun hebo más sorpresa qu’un nuevu récord de vuelta. Hamilton, n’un circuitu que ye como so segunda casa, baltaba toles marques cola so pole ya establecía un nuevu récord. El restu de puestos siguieron la tendencia de carreres pasaes. De fechu, ye curiosu’l casu de Bottas que sólo sabe clasificar terceru, cola excepción de la so pole en Baḥréin. Una bandera amariella na Q1 por cuenta d’un accidente de Wehrlein nun suponía muncha torga pa los pilotos, salvo’l casu de Stroll, lo cual fai más meritoriu’l so puestu octavu en carrera.

En dos selmanes, viaxamos por segunda vegada a Bakú pal gran premiu d’Europa.

Clasificación

Carrera

Enantes de continuar col nuestru viaxe formuleru per Europa, toca dir hasta Canadá pal gran premiu d’esta temporada. Una cita obligada del calendariu que nun suel decepcionar. Ye un circuitu que se-y da bastante bien al pilotu de Mercedes Lewis Hamilton polo que, de xuru, tará deseyando ponese al volante del coche pa facese cola victoria del domingu.

Pero, primero, toca ver lo que dan de sí los entrenamientos llibres del vienres y la sesión de clasificación del sábadu, que como yá sabeis, son pela tarde pola diferencia horaria cola ciudá de Montreal.

Llegamos a Canadá con Alonso otra vez a los mandos del McLaren, anque nun sabemos si con munches ganes de descubrir qué nuevu problema apaez nel so monoplaza y coles coses cada vegada más tirantes ente McLaren y Honda. Ta claro que toles esperances qu’un día se tuvieron de que la xuntanza de dambos xigantes tornaría a dar perbonos resultaos yá nun existen, o a lo menos, non nel curtiu plazu. Sabemos que Honda va asociase con Sauber pa 2018 pero nun sabemos si van siguir de la mano de McLaren. Ye obvio que necesiten camudar munches coses (McLaren son últimos con cero puntos na clasificación de constructores) pa que’l panorama escample y tornen los díes de gloria de la escudería de Woking. Ensin embargu, de momento, a tolo que podemos aspirar ye a predecir si sedrán quien a terminar una carrera.

La batalla pol primer puestu tanto en pilotos como en constructores sigui abiertu, anque más folgáu nel casu de pilotos, con Vettel a una victoria de distancia (25 puntos) de Hamilton. En constructores, anque tamién llidera Ferrari, el marxe ye menor. Taremos sollertes tamién a los compañeros d’equipu de dambos pilotos, nel casu de Räikkönen pa ver cómo xestiona la carrera elli y l’equipu dempués de los rumores del GP de Mónaco y nel casu de Bottas por ser esti un circuitu que, como a Hamilton, se-y da bastante bien.

Red Bull nun tien mala hestoria en Canadá, de fechu foi equí onde ganó per primer vegada el so pilotu Daniel Ricciardo, que de xuru espera poder repetir fazaña, anque esti añu paeza más complicao. Force India siguirá bregando pa nun dexar el puestu de cuartu meyor equipu de la parrilla, anque tien un colchón bien grande con Toro Rosso, que va xusto per detrás.

Ye la escudería hermana de Red Bull la que nun se pue despistar porque tien a Williams a tiru piedra, anque los resultaos de Stroll nun tán ayudando a la causa del equipu de Claire Williams, yá que namás ta sumando puntos Felipe Massa. Lance Stroll aterriza na so tierra cola esperanza de dexar atrás tolos malos resultaos de les carreres pasaes y tar a l’altor de lo que s’espera d’elli corriendo en casa.

Per detrás, sigui la batalla ente Renault y Haas, empataos a puntos, y dando pasinos alantre en cada gran premiu. La irregulariedá de Palmer (en Renault) y de Grosjean y Magnussen (en Haas) ta teniendo un efeutu apaecíu al de Stroll en Williams, yá que namás ta sumando, de forma regular, unu de los pilotos.

Na cola, Sauber buscará la forma de meter más distancia a McLaren, dempués de nun puntuar en Mónaco y del sustu de Wehrlein en pista tres l’incidente con Button.

Alcordaivos, los primeros entrenamientos empiecen a les cuatro de la tarde, y la segunda tanda a les ocho. El sábadu, la tercera sesión empieza a les cuatro de la tarde y la clasificación ye a les siete. Pa rematar, el domingu la carrera ye a les ocho de la tarde. Si quereis más información sobre’l circuitu Gilles Villeneuve, podéis atopala equí.

Y esta foi la elección de neúmaticos pa esti GP:

Siempre se diz que, cuanto más enfotu se pon n’una carrera, más decepcionante ye. Y quiciás puea ser esta la conclusión que saquemos dempués de delles hores del Gran Premiu de Mónaco d’esti añu. Anque tuvo dellos momentos de tensión, tenemos claro que nun va pasar a la hestoria pola gran emoción que causó si non, más bien, poles cares llargues de dellos pilotos y pol accidente de Wehrlein. Pero vamos dir per partes.

La salida, ún de los momentos del gran premiu de Mónaco que más expectación crea por ser onde más incidentes atopamos, foi una de les más llimpies del campeonatu hasta agora, ensin nengún problema pa los pilotos qu’ensiguida empezaron a garrar les sos posiciones peles cais de Montecarlo. Dempués de dellos metros, víemos a Bottas intentar adelantar a Vettel que, pel so llau, vía como’l so compañeru Räikkönen metía bon ritmu dende l’entamu.

Quedó claro dende esi momentu que la carrera diba ser cosa de dos coche y que dambos diben ser de la mesma escudería. Faltábanos saber cual diba ser l’orde. Dende qu’ayeri Kimi consiguiera facese cola pole, especulárase muncho sobre si diba haber órdenes d’equipu o non. Y ye que güei, na estratexa, foi Kimi’l primeru n’entrar a boxes, a cumplir la parada mínima que debíen facer, y Vettel quedaba en pista tirando tolo que podía pa meter tiempu enantes d’entrar elli. Y funcionó. Cuando l’alemán entró, consiguió salir per delantre’l so compañeru d’equipu y nun se diba baxar d’ehí hasta ver la bandera a cuadros.

Per detrás d’ellos dos, vimos al Red Bull de Ricciardo rodar ensin problema dalgún y consiguiendo afianzase na tercer posición per delantre del Mercedes de Valtteri Bottas que namás pudo ser cuartu. Y ye que Mercedes foi unu de los equipos que más problemes tuvo demientres tol fin de selmana. Anque nun foi tanto nel casu de Bottas, Hamilton ayeri tuvo milenta torgues en calificación y un accidente de Vandoorne a última hora na Q2 lu dexaba fuera de los diez primeros, empezando güei décimoterceru. Namás pudo terminar séptimu güei y ye llamatible sintilu pola radio con voz resignada y conformándose colos puntos del puestu nel que terminaba, ensin intención d’atacar a Sáinz, que quedaba sextu delantre d’elli. Comentábase que paez qu’esti añu la “irregulariedá” de Hamilton lu lleva a dir perbien n’una carrera y afloxar n’otra, asina que, visto lo visto en Mónaco, paeznos que podemos esperar que-y vaiga bien en Canadá, un sitiu que suel dominar.

Falábemos de Ricciardo como unu de los triunfaores del Gran Premiu, pero nun podemos dicir lo mesmo de Verstappen, que taba lloñe de tar contentu col so quintu puestu, bien meritorio si tenemos en cuenta que los dos años pasaos nin siquiera terminó la carrera, pero que lu tuvo frustráu tol gran premiu por nun ser quien a adelantar.

Precisamente los adelantamientos foi dalgo que s’echó de menos na carrera, onde se contabilizó dalgún aislláu (de Pérez) pero que nos más de los casos quedaben n’intentos siguíos d’incidentes. Esti ye’l casu del movimientu fechu na vuelta 58 por Jenson Button (alcordaivos que taba al volante del McLaren pa esti gran premiu por tar Alonso n’Indianápolis) sobre Pascal Wehrlein, y que resultó nel pilotu de Sauber volcáu escontra la valla de protección. Foi daqué surrealista ver un coche engancháu escontra la valla, posáu nes dos ruedes izquierdes, y col so pilotu dientro esperando que lu sacaren. Los comisarios de carrera consideraron que foi culpa de Button y penalizáronlu retirándo-y dos puntos del carné y con tres posiciones en parrilla, penalización esta última que consideramos daqué absurda teniendo en cuenta’l rol del británicu en McLaren. Nun siendo qu’Alonso o Vandoorne s’ausenten, enxamás va cumplir esa sanción.

Nun podemos escaecer mencionar que, amás, tanto Wehrlein como Button yeren protagonistes al empiezu la carrera, cuando entraron en boxes na primer vuelta pa cambiar gomes, y l’equipu Sauber dexaba salir al so pilotu cuando Button yá taba saliendo, dalgo que los comisarios consideraron yera una maniobra peligrosa y penalizaron con cinco segundos pa Wehrlein, qu’al final nun cumplió por vese fuera de carrera delles vueltes más tarde.

Filando con esti incidente, Sauber y McLaren fueron los grandes perdedores d’esta carrera: aparte de lo que pasó ente Wehrlein y Button, Ericsson tendría un accidente demientres el coche de seguridá, que lu llevaría a vese col morru escontra les valles y fuera de carrera, mientres que Vandoorne, al pocu de reanudase la carrera, quedaría tamién fuera nel mesmu puntu. Nun foi un bon fin de selmana nin pal suecu, que tenía problemes cola caxa de cambios el sábadu, nin pa Vandoorne, que tenía un accidente en Q2. Na carrera, tuvo bien de tiempu nos puntos hasta esi accidente que lu dexó fuera. McLaren sigui últimu nel campeonatu de constructores a la espera de terminar dalguna carrera con dambos coches y de puntuar.

Toro Rosso llogró un perbón sextu puestu con Sáinz, pero nun consiguió puntuar con Kvyat, que quedó fuera de carrera por cuenta un accidente con Pérez que lu intentaba adelantar y terminaba chocando con elli. Los Force India tampoco nun puen tar contentos: dambos pilotos quedaben fuera los puntos, con Ocon mui irregular tol finde y Pérez especialmente batallaor pero ensin aciertu.

Renault perdía a Nico Hülkenberg nes primeres vueltes de carrera por un fallu na caxa de cambios mientres que Palmer, anque cerca, nun podía algamar la zona puntos. Meyor día tuvieron en Haas que pudieron sumar un bon puñáu de puntos con dambos pilotos ente los diez primeros: Grosjean terminó octavu mientres que Magnussen foi décimu.

Como tantes otres veces, n’esti gran premiu too yera cuestión d’estratexa, y anque pa unos funcionó meyor que pa otros, la falta d’intentos d’adelantamientu y lo predecible de les entraes en boxes, cásique fexo que nin siquiera les paraes fueren interesantes. Ta claro qu’esti gran premiu de 2017 nun va ser recordáu por tolo que pasó, quiciábes pol aparatosu accidente de Wehrlein, pero pocu más. Agora toca pensar en Canadá, dientro dos selmanes. De momentu, equí vos dexamos tolos númberos que nos dexó’l Gran Premiu de Mónaco 2017:

Clasificación

Carrera

Cuando l’añu pasáu McLaren anunciaba que Jenson Button diba siguir venceyau a la escudería pero n’un rol de tercer pilotu totalmente pasivu, la mayor parte de la xente saquemos la conclusión de que yera una forma elegante de retiralu y entendimos que la carrera d’Abu Dhabi diba ser la última na que viéramos al inglés.

Por si llegáis tarde a la información, tábemos equivocaos. Esti fin de selmana de gran premiu en Mónaco, envede tener a Alonso al volante, vamos tener de nuevo a Button. Alonso decidió probar a garrar un monoplaza pa les 500 milles d’Indianápolis, dalgo que se-y ta dando bastante bien, y dexó’l so asientu vacíu pa que lu ocupara’l so antiguu compañeru d’equipu. Va ser sólo pa un gran premiu, pero quiciás seya esta la meyor opción y onde McLaren tenga más posibilidaes si les coses salen medianamente bien.

Aterrizamos nel principáu, na ciudá de Montecarlo, pa dexanos perder, a partir del xueves (alcordaivos qu’en Mónaco la folixa formulera empieza de xueves por ser festivu’l vienres) peles sos estreches ya emblemátiques cais. Llegamos n’un punto perinteresante del campeonatu, con la batalla en dambos campeonatos que nun da tregua nin amuesa yá un favoritu que tea destacándose perriba’l restu.

Falar de favoritos en Mónaco paeznos que ye lo mesmo que nun dicir nada, porque cásique cualquier pilotu con un buen coche y un pocu suerte y bon facer pue ser favoritu. Ta claro que les apuestes van siguir de la mano de Ferrari y Mercedes y los pilotos de dambos equipos, pero nun podemos descartar a Red Bull nin muncho menos a Force India, sobre too dempués del bon gran premiu que ficieron en Sochi. Vienen fuerte.

Como dicíemos, ye esti un gran premiu au los equipos de la parte baxo de la clasificación rasquen puntos, como yá fizo l’añu pasáu Marussia con Pascal Wehrlein o n’años anteriores Jules Bianchi pa esi mesmu equipu. Por eso Mónaco ye ún de los favoritos del calandariu pa fans pero tamién p’aquellos equipos que confíen en facelo un pocu bien y asina facese con un bon puñáu de puntos.

Tai sollertes, una de les xoyes de la Fórmula Uno ta a piques d’empezar. Tornamos a Mónaco, tornamos a les cais de Montecarlo y equí vos dexamos tolo que necesitais saber sobre esti circuitu de lleenda.

Dende qu’empezó’l domingu hasta la fin d’esti gran premiu nel circuitu de Montmeló, echáronse milenta cuentes que diben desmontándose col pasu les vueltes.

El sábadu paecía que diba tenelo too Hamilton de cara, y demientres munchu tiempu del gran premiu, foi Vettel quien tuvo en cabeza. Toos pensábemos que Verstappen, quiciás pudiera dar un pocu guerra como yá fixo l’añu pasáu, y quedemos ensin elli en pista dende la primer curva. Y ye qu’esta carrera, quinta de la temporada, dio pa muncho.

Empezaba la carrera con una imaxe a la que cásique tamos avezándonos yá: Hamilton perdiendo’l so lliderlagu en carrera. Sigui mostrándose bien irregular a la hora de les salides y cuesta-y caltener la primer posición, al marxe de lo que llueu faga a midía que pasen les vueltes. Vettel púnxose per delantre y en cuestión de metros yá sacaba un trechu al restu.

Nel primer xiru, víemos a Räikkönen y Verstappen tener un accidente que dexaba a Kimi col coche cola suspensión rota y a Verstappen cola necesidá de llevalu a boxes p’aparcalu. Pensábemos que tuviera sio cosa de dellos y de dalgún despiste, pero nes repeticiones víemos cómo por cuenta esquivar a Bottas que-y vinía pela drecha, Räikkönen chocaba con Verstappen, al que tinía al otru llau. De bien ceo, dos pilotos de los equipos d’enriba quedaben fuera. Los equipos de la mitá la tabla frotaben les manes.

Al tiempu que víemos lo de los pilotos de Red Bull y Ferrari, tamién víemos la disputa entre Massa y Alonso, que dempués de quedar séptimu na clasificación del sábadu, intentaba mantenese nos puntos. El pilotu asturianu terminaría fuera l’asfaltu por cuenta nun chocase con Massa pero, como pasó col incidente que mentamos enantes, nun hebo sanción pa naide.

Estos primeros incidentes en pista ayudaron a los pilotos que clasificaren más atrás a entrar en boxes pa cambiar gomes, casu de Vandoorne o Kvyat. Les coses perriba siguíen con Vettel dominando, Hamilton a la caza y Bottas en tercer llugar con un motor que yá taba na so quinta carrera. El baile de boxes empezólu Mercedes, y Ferrari nun tuvieron avispaos, dalgo que terminaría costándo-yos el llideralgu de carrera cuando, pasada yá la mitá la carrera, Hamilton adelantaba al pilotu de Ferrari con solvencia pa siguir tirando hasta ver la bandera a cuadros.

Bottas nun tuvo tanta suerte y terminó quedando fuera de carrera na vuelta treinta y ocho. Esto foi seis vueltes dempués de ver cómo Vandoorne, n’una maniobra un pocu extraña d’adelantamientu, salíase de pista directu a la grava onde quedaba atrapáu’l so McLaren. El so compañeru Alonso, dempués del problema de la salida, nun sedría quien a escalar posiciones y metese nos puntos. Otru fin de selmana pa olvidar pa la escudería británica pesie a la emoción del sábadu.

Los grandes triunfadores, a nivel equipu, del gran premiu, fueron Force India, acabando cuartu (Pérez) y quintu (Ocon) n’un emburrión de puntos descomanáu pa una escudería qu’intenta afianzase como cuartu nel mundial de constructores. Ocon sigui sumando puntos na so cuenta personal y sigui manteniendo la so racha de puntuar en toles carreres. Per detrás llegaríen el Renault de Nico Hülkenberg (sextu), el Toro Rosso de Carlos Sáinz, que protagonizó unu de los momentos más absurdos en carrera cuando, na so parada en boxes, intentaba adelantar a Magnussen nel carril de salida ya llueu quexábase de que’l pilotu de Haas lu echare de pista. Al final, nengún de los dos pilotos foi penalizáu.

Pa zarrar los puntos, tenemos a Pascal Wehrlein qu’acabó n’un perbón octavu puestu (foi penalizáu con cinco segundos añadíos al so tiempu final por cuenta nun mantenese a la izquierda d’unu de los bolardos colocaos en pista) los sos primeros puntos de la temporada, al otru Toro Rosso, el de Kvyat, en novenu y al Haas de Grosjean en décimu. Dambos Haas tuvieron rodando dientro nos puntos bien de tiempu na carrera, anque sedría finalmente’l pilotu francés el que sumara’l puntu pal equipu norteamericanu.

Yá fuera de los puestos que dan premiu, atopamos al otru Sauber, el d’Ericsson que sigui sumando carreres discretines ensin más, el McLaren d’Alonso, que de xuru tará suañando (y viaxando) yá con Indianápolis y a Felipe Massa que, mesmo que’l pilotu asturianu, dempués del incidente de la primer vuelta yá nun pudo recuperar posiciones.

Pa zarrar la clasificación, tenemos a Magnussen en décimotercer puestu anque, como vos diximos enantes, el pilotu danés pasó bona parte de la carrera en puntos. Dellos incidentes en pista torgaron el so llabor y terminó saliendo de los diez primeros. Otros dos que nun puntuaron fueron Palmer (Renault) y Stroll (Williams).

Cola so victoria Hamilton sigui segundu a seis puntos del llíder (98), que sigui siendo Sebastian Vettel (104). Nel tercer llugar tenemos al otru pilotu Mercedes, Valtteri Bottas, con 63. En cuantes a constructores, Mercedes yá ta ocho puntos perriba Ferrari con 161 puntos (Ferrari tienen 153) y Red Bull son tercero con 72.

El próximu gran premiu, Mónaco, vendrá cargáu cosines que vos diremos cuntando en quince díes.

La próxima parada tenémosla en Montmeló dientro de quince díes. Equí vos dexamos la información de la sesión de clasificación del sábadu y los resultaos del domingu:

Clasificación

Carrera