Category: Temporada 2017

Llega la última crónica del 2017 y failo con una carrera aburrida embaxo’l brazu. Con too decidío en dambos campeonatos ya un circuitu que nun ye que dea pa muncho en tema adelantamientos, la verdá que nun ye sorpresa que varios pilotos ya fans comentaren que la carrera foi poco vistosa. Abu Dhabi nun suel dar munchu espectáculu, anque sí que ye verdá que l’añu pasáu tuvimos una carrera entretenida ensin tar el campeonatu de pilotos decidíu.

Seya como fuere, dalgunes coses puen destacase, como les batalles ente Bottas y Hamilton o la de Massa con Alonso. Renault consiguía’l so oxetivu de terminar sextu nel mundial de constructores gracies al sextu puestu algamáu por Hülkenberg, non ensin polémica, anque Sáinz nun terminaría tan contentu la so carrera. Ferrari nun dio pa muncho nin con Vettel nin con Räikkönen y Haas tuvieron carreres más entreteníes que’l restu anque ensin el premiu de los puntos esta vegada.

Bottas fízose con una victoria bien merecida pa Mercedes, teniendo a Hamilton pegáu en gran parte de la carrera pero ensin que realmente fuera una amenaza pa elli. Cola pole del sábadu, una bona salida prometía una posibilidá de victoria que se fexo real pal finlandés. Ensin embargu, nun sirvió pa ponese segundu nel campeonatu de pilotos perriba Vettel por terminar esti terceru en carrera. Foron mui superiores a Ferrari esti fin de selmana. Agora, como nun pue ser d’otra manera, yá tán pensando nel coche de 2018.

Ferrari nun dieron pa muncho n’Abu Dhabi: Kimi Räikkönen foi ún de los pilotos que faló d’aburrimientu en pista, con poques coses que facer sacante l’aforrar combustible, dalgo que disgusta a tolos pilotos pues nun los dexa sacar el máximu al coche. Tuvo la primer parte de la carrera batallando con Ricciardo hasta qu’esti abandonó ya dempués d’eso nun tuvo realmente muncho más que facer que nun fuera terminar la carrera en cuartu llugar. Verstappen, que terminó quintu per detrás d’elli, nunca nun foi un peligru pa elli.

En Red Bull, pa esti últimu períodu de la temporada, paez que cambiaren les tornes y la mala suerte de Verstappen pasara a Ricciardo. El pilotu australianu nun terminó tres de les últimes cuatro carreres y Abu Dhabi foi una d’elles. Diba cuartu cuando paró en pits pensando que tinía un pinchazu pero en realidá yera un problema hidráulicu que lu dexó fuera na vuelta 19. Verstappen foi otru de los que comentó l’aburrimientu que pasó demientres la carrera (de fechu dicía que si tuviera tinío una almohada, tuviera dormío gran parte del gran premiu). De toles formes, el pilotu holandés nun tuvo cómodu nin nes sesiones del vienres, nin el sábadu, asina que’l quintu puestu nun sorprende.

Renault aterrizaben n’Abu Dhabi col oxetivu de terminar sextos nel mundial constructores pa empatar con Toro Rosso ya consiguieron ocho con Hülkenberg, que terminó sextu precisamente. Ensin embargu, nun foi una posición ganada ensin polémica yá que’l pilotu alemán foi penalizáu con cinco segundos por adelantar posición a Sergio Pérez pel exterior del circuitu. L’equipu Force India nun taba conforme cola penalización porque consideraben que yera necesario que Hülkenberg, además, devolviera la posición a Pérez, dalgo que los comisarios nun consideraron que ficiera falta.

Nel otru llau del garaxe, Carlos Sáinz taba faciendo una bona carrera hasta qu’una parada pa cambiar gomes diba dexalu fuera. Una de les ruedes, la delantera drecha, quedó mal afixada y provocó que’l pilotu madrilanu nun pudiera controlar el coche y tuviera d’abandonar al pocu de salir del pitlane. Amás, l’equipu recibió una multa de 5000€ por dexar a Sáinz salir cola rueda mal puesta.

Force India remató esti domingu la so meyor temporada hasta la fecha ya féxolo como bien siendo vezu: con dambos pilotos en puntos. Al marxe de la polémica yá comentada de Pérez con Hülkenberg, tanto elli como Ocon ficieron una bona carrera na llínia de les que vienen faciendo demientres tola temporada. El pilotu francés tuvo una carrera bastante solitaria ya nunca nun pudo siquiera poner n’apuros al so compañeru d’equipu, que terminó séptimu. Elli sedría octavu.

McLaren terminaron la temporada ya’l so periplu con Honda dientro los puntos, dalgo que nun dexa de ser positivo pa dambes partes. De fechu, el pilotu asturianu foi ún de los que más espectáculu dio xunto a Massa, n’una repitición de lo que víemos en carreres pasaes ente dambos. Vandoorne pel so lláu completó una carrera pa olvidar, na que nunca nun tuvo cómodu y onde nun pudo facer funcionar les gomes. Terminó nel puestu doce, con Alonso nel octavu.

Williams nun cumplieron les expectatives que tol mundo tenía puestes nellos, anque pudieron terminar el campeonatu dientro los puntos col décimu puestu de Massa. El pilotu brasileñu perdió’l novenu llugar con Alonso en pits. L’actuación de Stroll foi bien probe, con milenta problemes coles gomes, munches irregularidaes ya inseguridá en pista. Nun tuvo cómodo en nengún momentu del fin de selmana.

Magnussen abrió la carrera con un trompu, dalgo qu’ensin duldes nun ye lo meyor pa llegar a puntuar n’una carrera. De toles formes, el gran premiu de dambos pilotos foi más entreteníu que la media, pues tuvieron batalles en pista con pilotos como Stroll o Wehrlein qu’amás ganaron. Anque nun puntuaron, Haas puen tar contentos con esti gran premiu ya en xeneral cola temporada, la so segunda na máxima competición del motorsport. Grosjean terminó undécimu y Magnussen décimoterceru.

Sauber taben bastante contentos col resultáu y sobre too cola puesta n’escena de Wehrlein, qu’en dellos momentos llegó a tar décimoterceru. Anque ye verdá que l’equipu ta sufriendo pa poder facer carreres decentes, a lo menos vénse dellos pasos alantre, cosa qu’ensin dulda ye positivo de cara a 2018, onde necesiten un bon puxu que-yos devuelva la ilusión y la capacidá de competir n’igualdá de condiciones col restu la parrilla.

Cola temporada yá terminada, nun termina l’actividá yá que martes y miércoles van cellebrase los test Pirelli n’Abu Dhabi de cara a 2018. Demientres, equí vos dexamos tolos datos d’esti finde y nos ponemos manes a la obra pa facer el resume d’esta temporada 2017 que yá despidimos.

Carrera

Paez mentira que yá pasaran ocho meses y qu’esti domingu vaigamos a ver la última carrera d’esta temporada 2017. Una carrera au los dos principales puestos yá tán decidíos pero onde tovía tenemos cosines poles que mirar, como los puestos medios de la tabla. Amás, llegamos a Abu Dhabi inda col futuru de Williams en dulda, anque coles noticies de que Kubiça y Sirotkin van ser los pilotos que participen nel test de Pirelli namás terminar la temporada. Y como nun podía ser d’otra manera, sigui falándose de 2018 y de les pruebes que dellos pilotos tán faciendo n’otres categoríes del deporte de motor.

Mercedes siguen cellebrando otru añu d’éxitu incuestionable. Con otru doblete embaxo’l brazu, lleguen a Abu Dhabi con más ganas d’esfrutar y probar coses pa 2018 qu’otra cosa, dalgo que ye un pocu la llínia que tán siguiendo’l restu d’equipos.

Ferrari consiguieron ganar n’anterior carrera y de xuru que, anque nun valga pa nada nes sos aspiraciones, van querer repitilo equí. Siempre surdirán les voces quexones que dirán, con razón, qu’agora nun val pa nada, pero la necesidá de terminar la temporada con bona carrera paeznos vital pa la Scuderia de cara a 2018.

En Red Bull, si por ellos fuera, nun terminaben la temporada. Verstappen vien a Abu Dhabi con ganes de siguir faciendo bones carreres ensin casi baxase del podiu. Ricciardo va mas allá y fala de victoria pa rematar les coses bien. Lo que ta claro ye qu’esti ye un circuitu que-yos puede ayudar nesa xera y conociéndolos en pista nun ye dalgo que nos paeza imposible.

Force India tamién miren a 2018 y aprovechen esta última carrera pa probar coses nueves y pa dar oportunidá a George Russell de siguir curtiéndose nel coche. Va tar presente na FP1 el vienres. Tanto Pérez como Ocon resalten d’Abu Dhabi l’espectáculu que ye’l circuitu en sí, coles lluces, col atapecer, pero tamién que se pue adelantar y eso da vida a les carreres. Amás, Ocon tien bones alcordances de Yas Marina porque foi equí onde se convirtió en campeón de GP3 y au probó per primera vegada un F1 n’una sesión de llibres.

Williams siguen nel puntu mira dempués de milenta selmanes. Siguen ensin confirmar nada sobre’l pilotu que va acompañar a Stroll nel 2018, pero yá cebaron los rumores diciendo que Kubiça va ser, xunto a Sirotkin, el pilotu que participe nos test de la selmana qu’entra n’Abu Dhabi con Pirelli. Nesta decisión munchos vieron la confirmación non oficial de que Kubiça va ser pilotu de Williams en 2018 y ye cuestión de tiempu que se faga oficial. El restu, siguen especulando con otros pilotos como Di Resta o incluso Kvyat.

Toro Rosso confirmó hai unos díes que Pierre Gasly y Brendon Hartley diben ser los sos pilotos pa 2018. Lo qu’empezó como una solución a curtiu plazu, terminó convirtiéndose n’una alliniación de pilotos que paez que convence nel equipu. Anque entá nun puntuaron, lleguen a Abu Dhabi con ganes de consiguir un bon resultáu que los motive pa siguir trabayando de cara a 2018 onde van empezar el so camín xunto a Honda. Cada vegada paecen tar más cómodos nel coche y amás Gasly tien bones razones pa querer correr equí yá que foi onde se proclamó campeón de GP2.

Renault deberíen brillar más equí de lo que lo ficieron n’Interlagos porque esti ye un circuitu que, en teoría, los beneficia más. Ensin embargu, eso ye namás la teoría, y l’equipu francés llega con ganes y l’oxetivu de puntuar pa facese col sextu puestu nel mundial. Pa eso tienen que sumar cinco puntos más que Toro Rosso y que Haas nun los supere (tiénenlos a dos puntos). Nun paez que vaiga ser cenciello pero ganes nun-yos falten.

Haas lleguen relaxaos a Abu Dhabi. Saben que tienen complicao ser sextos nel mundial y que la séptima plaza va tar disputada, pero eso nun paez que los preocupe demasiao. Namás piensen en sacar el mayor partíu posible al coche n’un circuitu complicáu y onde ye importante que’l coche tea lo más equilibráu posible. Si amás d’eso puen atropar puntos, meyor que meyor.

McLaren disputen n’Abu Dhabi’l so últimu gran premiu con Honda, pol momentu. Un períodu de tiempu que prometía ser perbonu pa dambos llaos y terminó siendo más bien una pesadiella. Alonso anduvo estos díes faciendo pruebes en Toyota con un LMP1 y en United Autosports con un LMP2 de cara a les carreres que tien pensao disputar en 2018 con dambos equipos. Sabemos de xuru qu’una d’elles va ser les 24 hores de Daytona, con United Autosports, pero entá quedaba por saber si con Toyota va correr Le Mans. No que cinca al gran premiu de F1, va ser complicao pa ellos algamar puntos pero van intentalo, poniendo tamién l’enfotu en deprender tolo que puean de cara a la temporada viniente.

Sauber nun tuvo una bona temporada y anque fueron progresando demientres la temporada, tán deseyando facer un parón, recalcular les coses y ponese manes a la obra col coche de 2017. Entá nun sabemos qué pilotos van tar nel equipu pa 2018. Paez probable qu’ún d’ellos seya Leclerc pero’l futuru d’Ericsson y Wehrlein tovía ye desconocíu.

Los horarios n’Abu Dhabi tornen a ser “normales”:

VIENRES 25/11/2017

LLIBRES 1: 10:00
LLIBRES 2: 14:00

SÁBADU 26/11/2017

LLIBRES 3: 11:00
CLASIFICACIÓN: 14:00

DOMINGU 27/11/2017

CARRERA: 14:00

Equí podéis atopar más información sobre’l circuitu de Yas Marina y más abaxo les gomes escoyíes pal gran premiu:

Interlagos ye siempre un circuitu al que presta llegar. Esti 2017 va ser el de la despidía de Massa (por segunda vegada) y col campeonatu yá decidíu pela parte arriba a favor de Mercedes, toca esperar y ver qué pasa nel restu la tabla.

Como davezu, hai predicción de lluvia pal fin de selmana, anque nun ta claro que vaiga apaecer el domingu demientres el gran premiu. Sí ye verdá que ye dalgo que los pilotos esperen, porque suel da-yos oportunidaes de consiguir puntos ya incluso’l podiu. Tando a 800 metros d’altor, nun ye tán desixente como México, pero les sos calterístiques ya’l so trazáu faen que tanto pilotos como inxenieros tengan de trabayar duro pa consiguir el punto óptimu de los sos monoplaces.

En Mercedes, colos deberes pa 2017 yá fechos, tán pensando en 2018. De fechu, estes dos carreres que nos queden piensen dedicales a probar coses de cara a la temporada qu’entra. Siempre se diz que cuando ta decidíu un campeonatu, los pilotos empiecen a conducir pa esfrutar, ensin presiones, asina que tenemos ganes de ver de qué son capaces los pilotos de Mercedes nesa situación. Bottas entavía pue ser segundu nel campeonatu, lo que zarraría una temporada d’aplausu (otra más) pa la escudería alemana.

Ferrari yá formuló la so amenaza añal de dexar la Fórmula Uno, dalgo que yá dexó de llamar l’atención hai tiempu. Munchos medios critiquen la so postura con respeutu a los cambios proyeutaos pa 2020, demientres qu’otros falen de que tienen razón y otros más ignoren yá lo que dicen por considerar que ye más una pataleta que daqué fundamentao. Muncho más se fala del so baxón de forma na segunda parte del campeonatu yá incluso de cómo “fallaron” a Vettel. Ensin más que consiguir, si cuenten con consiguir los más puntos posibles, sobre too pensando que Vettel entá puede perder la so segunda posición nel mundial de pilotos.

Red Bull tán n’un perbón estáu de forma, sobre too dende Hungría. Nes últimes carreres Verstappen desfízose de la so mala suerte, anque tal paez que-y la pasara a Ricciardo nes dos últimes. Nun ye un circuitu que-yos preste especialmente, pero sí ún onde puen consiguir coses importantes, como’l podiu col que se fizo Verstappen l’añu pasáu.

Force India yá tienen aseguráu’l cuartu puestu nel mundial, polo que lleguen a Brasil con ganes d’arriesgar y probar nueves estratexes cola seguridá de que nun van vese penalizaos por ello y cola posibilidá de deprender y ameyorar. El vienres vamos ver a George Russell, campeón de GP3, a los mandos del monoplaza, entá nun sabemos en llugar de quién. Los pilotos esperen que’l domingu llueva pa poder tener oportunidaes d’alcanzar un podiu que se-yos resiste.

Williams yeren noticia esta selmana pol anunciu, esperáu per otru llau, de que Massa va a retirase al final d’esta temporada. Ye dalgo que vivimos l’añu pasáu pero que, por circunstancies inesperaes (la despedía de Rosberg de Mercedes ya’l cambiu de Bottas pa ocupar el so asientu) quedó cancelao. Nun creyemos qu’esti añu vaiga pasar lo mesmo. De toles formes, entá nun se sabe quién va pilotar xunto a Stroll en 2018, por ello tol enfotu ta puestu nes dos carreres que queden y n’asegurase’l quintu puestu nel mundial, que cada vegada tienen más cerca.

Toro Rosso tien nes sos files al nuevu campeón de WEC. Brendon Hartley y los sos compañeros de Porsche convertíense nos nuevos campeones del campeonatu de resistencia’l domingu pasáu, amosando que’l pilotu qu’agora ocupa l’asientu en Toro Rosso nun ye poca cosa. Na so tercer carrera en F1 va dando pasinos alantre, garrando confianza col coche y ameyorando como yá pudimos ver hai dos selmanes. Gasly pel so lláu llega equí a competir per primer vegada, anque ensin nengún mieu. Dambos pilotos, como’l restu de la parrilla, esperen que l’agua los ayuda dalgo pa consiguir esos puntos tán necesarios pa siguir sumando nel mundial.

Renault tán intentando recuperase de la deceición de México, onde dambos pilotos tuvieron d’abandonar y toca-yos siguir bregando pol so oxetivu, qu’agora yá ta más centráu en ser sextos. Hülkenberg suel facer bones carreres en Brasil (de fechu, equí consiguió la so primer pole siendo rookie, en 2010 con Williams) y almite que siempre vien extra-motiváu a Brasil polo que-y presta’l circuitu y l’ambiente. Amás, dempués de los dos abandonos siguíos en Austin y México, tien más razón entá pa intentar tener un bon fin de selmana. Sáinz quier repitir la so carrera del añu pasáu, que foi n’agua. L’equipu ye optimista sobre les sos oportunidaes equí sobre too pensando n’incorporar dalgunes meyores, pequenes, pero que quiciábes los ayuden a consiguir puntos el domingu.

Haas lleguen con munches ganes de correr n’Interlagos y más sabiendo que tienen a Renault a un puntu y a Toro Rosso a seis, colo qu’una bona carrera podría facer que llegaren a ser sextos nel mundial de constructores dalgo que sedría un perbón llogru pa la escudería norteamericana. Giovinazzi va volver tar n’unos llibres, en sustitución de Magnussen, pero en cuenta ser los primeros, como suel ser vezu, va tar nos segundos.

McLaren anunciaben esta selmana que Lando Norris ye’l so nuevu pilotu reserva y probador, desvinculando d’esi papel a Jenson Button de forma definitiva. Amás, Alonso yá tuvo en Toyota pa entrar en contautu colos LMP1 y pa les midíes del so asientu de cara a Le Mans en 2018. Equí lleguen con confianza de poder facer les coses bien, especialmente si clasifiquen bien el sábadu. La última victoria de McLaren foi precisamente equí, en 2012 cuando Jenson Button ganaba la última carrera de McLaren hasta la fecha, con motores Mercedes. Nesti 2017, sedrá la última con motores Honda, hasta nuevu avisu.

Sauber esperen ameyorar un poco con respeutu a carreres anteriores equí, aprovechar les circunstancies cambiantes y consiguir dalgún puntu. En México pudimos ver a Ericsson con bon ritmu, cerca de los puntos enantes d’abandona, polo qu’esperen siguir nesa llínia equí pero cuntando con poder ver la bandera a cuadros con dambos coches esta vegada. Amás, vamos ver a Charles Leclerc nel monoplaza demientres la primer sesión de llibres, con halo incluyíu.

Llega la penúltima carrera de la temporada, con horariu de tarde:

VIENRES 10/11/2017

LLIBRES 1: 13:00
LLIBRES 2: 17:00

SÁBADU 11/11/2017

LLIBRES 3: 14:00
CLASIFICACIÓN: 17:00

DOMINGU 12/11/2017

CARRERA: 17:00

Equí vos dexamos más información sobre’l circuitu y les gomes escoyíes polos pilotos pa esti gran premiu:

 

A 2200 metros d’altura y dempués de hora y media llarga de carrera, yá conocemos al campeón d’esti 2017 de Fórmula Uno: pesie a nun ganar y nin siquiera subir al podiu esti fin de selmana, Lewis Hamilton proclamose’l domingu campión del mundo por cuarta vegada, sumando’l so éxitu al que yá consiguiera Mercedes la selmana pasada n’Austin. Cola pole de Vettel del sábadu, que sorprendió a munchos, entrábennos les duldes de si l’alemán podría retrasar hasta Brasil la coronación de Hamilton. Y casi lo creyimos dempués de dellos metros tres la salida.

El pilotu de Ferrari salió bien, como tamién lo ficieron los sos persiguidores, Max Verstappen que salía segundu y Lewis Hamilton, en tercer puestu. Ensin embargu, el pilotu de Red Bull ensiguida amosó la superioridá del so coche y pasó a Vettel, non ensin qu’esti presentare batalla. Hamilton quiso aprovechase d’esi momentu de debilidá del pilotu de Ferrari p’adelantalu elli tamién pero, n’una maniobra que munchos califiquen de dalgo agresiva, Vettel zarrolu y terminaton tocándose y resultando’l morru de Vettel dañáu y la rueda trasera drecha de Hamilton pinchada. Dambos pilotos tendríen d’entrar en boxes enantes de tiempu, cola idea de nun volver parar más. La carrera de dambos quedaría condicionada dende esi momentu, anque Ferrari tuvo muncho más ritmu que’l Mercedes, dalgo que yá s’esperaba.

Pela parte d’arriba, Verstappen nun tardó en facese col control de la carrera, per delantre de Bottas y Räikkönen, a bastante distancia l’ún del otru y del pilotu holandés. Ensin embargu, y pesie a la so superioridá en pista, nun foi too tranquilidá pa Red Bull. Ricciardo convirtióse nel primer abandonu de la carrera por un problema col turbo. Poques vueltes dempués, sería’l Renault de Hülkenberg el que quedara fuera, por un problema cola batería. Yá son cuatro de cinco les carreres abandonaes pol pilotu alemán de Renault. Delles vueltes más allá, el Toro Rosso de Brendon Hartley tamién tinía problemes, provocando un coche de seguridá virtual que faría que casi tolos pilotos entraren a boxes p’aprovechar la situación y cambiar gomes. Hasta esti momentu diben tres coches con motor Renault retiraos del gran premiu, lo que metía la medrana nel cuerpu de la xente de Red Bull. Pero nun diba ser el motor de Verstappen el que parara, si non el de Carlos Sáinz, un nuevu abandonu y deceición máxima nel equipu.

Nes últimes vueltes de carrera, y dempués de ver a Hamilton batallar con coches inferiores pa intentar ganar posiciones, diba siendo más obvio que Vettel tinía too perdío nel mundial. Anque nun dexaba de subir na tabla, tamién lo facía Hamilton, dalgo que nun-y convenía pa los sos intereses. Si’l inglés puntuaba, Vettel tinía de ser, a lo menos, segundu, y nesi puestu taba un Valtteri Bottas que de xuru nun diba vender fácilmente la so posición.

Pudimos ver delles batalles en pista que pagaron muncho la pena, como la que protagonizaron Magnussen y Alonso, a la que llueu se sumaba Hamilton y que beneficiaba al pilotu de Haas, que mientres los otros dos pilotos s’engarriaben, consiguía mete-yos distancia, terminando octavu. Tamién ficieron un perbon trabayu los dos pilotos de Force India, sobre too Ocon, que llegó a rodar terceru. L’equipu yá consiguió amarrar el cuartu puestu nel mundial de constructores.

Ericsson foi l’últimu abandonu de la carrera, dempués de que’l so Sauber nun pudiera controlar la calor xenerada en carrera y prendiera. El suecu tuvo bona parte del gran premiu dientro de los puntos.

En xeneral vimos bastante acción en pista y la tensión foi alta hasta les últimes vueltes onde yá entendimos que la misión de Vettel yera imposible. Ensin embargu, les batalles que vimos ente pilotos, ficieron qu’esti gran premiu de México pueda considerase una carrera entretenida.

Mercedes algamó’l domingu l’oxetivu que se marcaran pa esti 2017 y que supón que lleven cuatro años consecutivos ganando dambos campeonatos. Anque nun tuvieron una carrera cenciella nel lláu de Hamilton, Bottas sí completó una carrera tranquila ensin problemes pero a muncha distancia de Verstappen, pal que nunca foi un problema.

Podemos dicir que Ferrari viéronse na mesma situación que Mercedes, por tener a ún de los sos pilotos na cola de pilotos y otru corriendo no más alto. Kimi Räikkönen terminó siendo terceru dempués de pasar parte de la carrera detrás de Force India. Nun taba contentu cola salida, pero consiguió facese col puestu más altu de los disponibles yá que Bottas taba mui lloñe como pa ser quién a alcanzalu enantes del final. Vettel entá nun pue confiase, pues tien a quince puntos a Bottas nel campionatu de pilotos.

La victoria de Verstappen quedó un poco desllucida pol fechu de producise xusto coincidiendo cola proclamación de Hamilton como campeón d’esta temporada. Pero’l pilotu holandés de Red Bull fexo una carrera sólida, ensin errores, poniendo de los nervios a los sos inxenieros intentando consiguir la vuelta rápida de carrera y, en xeneral, ensin duldar de les sos posibilidaes. Ye síntoma de que ye una carrera controlada’l fechu de que malpenes lu vimos en pantalla. Nel otru lláu del garaxe, Ricciardo volvía a repitir abandonu por problemes col coche. Salía con penalización y el turbo nun dexó que terminara.

Los Force India, otra vuelta más, completaron una carrera perbona. Ocon, como yá comentábemos enantes, llegó a rodar terceru, anque la lóxica impúsose y terminó per detrás de los Ferrari. El pilotu francés tuvo a raya al so compañeru demientres tol gran premiu, clasificando per delantre d’elli’l sábadu, y consiguiendo ser quintu’l domingu. Pérez, pela so parte, tuvo una carrera entretenida, con batalles con pilotos como Räikkönen o Stroll, per detrás del que terminaría. Consiguió acabar séptimu, sumando xunto al so compañeru otra carrera con dambos coches dientro de los puntos y sellando’l cuartu puestu pa Force India nel mundial de constructores.

Williams consiguieron puntuar con Stroll y beneficiáronse de los problemas de Renault y Toro Rosso. El pilotu canadiense fexo una bona carrera, llegando a tar quintu en dellos momentos de la carrera y celebrando’l so cumpleaños con un séptimu puestu y un bon puñáu de puntos importantes pa los intereses del equipu nel campionatu. Massa namás pudo ser undécimu.

Haas tamién consiguió sumar puntos con Magnussen. El pilotu danés foi amás protagonista de dellos de los momentos más entreteníos de la carrera na so batalla con Alonso pol octavu puestu, col que terminaría la carrera. Grosjean nun entró en puntos, y tuvo un incidente con Alonso que dañó’l so coche y condicionó’l restu de la so carrera. Haas sigui per detrás de Toro Rosso y Renault nel mundial, pero namás a ún puntu de distancia de los segundos y a seis de los primeros.

McLaren nun corría n’un circuitu favorable, pero a lo menos consiguió sumar un puntu col coche d’Alonso y amás pudimos ver a dambos pilotos plantar batalla en dellos momentos de la carrera. Nunca nun abandonaron los puestos averaos a los puntos ya incluso paecía que dambos diben poder puntuar, pero finalmente diba ser Alonso’l que sumare un puntu terminando décimu con Vandoorne acabando nel puestu doce.

A dambos pilotos de Toro Rosso nun-yos sorrió la suerte esti fin de selmana: Pierre Gasly diba a la carrera ensin malpenes tener fecho vueltes nel circuitu por una montonera de problemes que-y fueron asocediendo demientres el fin de selmana. Anque consiguió terminar décimoterceru, víase que nun diba cola confianza necesaria que da’l conocer una migayina’l circuitu. Amás, la solombra del abandonu del so compañeru y d’otros tantos pilotos con motor Renault persiguíalu, pero finalmente consiguió ver la bander a cuadros.

Sauber sumó otru gran premiu con problemes: Ericsson abandonó y Wehrlein namás pudo ser décimocuartu, namás per delantre del Haas de Grosjean. Otra carrera pa olvidar y un pasín más cerca del final d’una temporada desastrosa pal equipu.

En Renault saltaron toles alarmes cuando cuatro de los seis coches que lleven el so motor quedaben fuera del gran premiu de México. Saltaron más entá cuando nengún de los sos coches pudieron terminar la carrera. Nel casu de Hülkenberg, el problema foi llétricu, pero supón el cuartu abandonu en cinco carreres del alemán. Nel casu de Sáinz, una mala salida y un trompu yá torgaron la so carrera y nun diba ser quién a terminar dempués.

Anque tán decidíos yá los campiones de cada categoría, nun ta too resuelto entá. De fechu, queden batalles perinteresantes nel mundial de pilotos (por exemplu, pol segundu puestu) y na parte media de la tabla nel mundial de constructores.

La prósima cita ye Brasil dientro de dos selmanes.

Ensin tiempu pa dixerir el Gran Premiu d’Austin, yá tamos en México, nel Autódromo Hermanos Rodríguez. Por tercer añu, la Fórmula Uno aterriza nel circuitu mexicanu cola solombra esta vegada de los terribles terremotos sufríos ellí hai unos meses. Munchos de los equipos quixeron amosar la so solidariedá cola población y busquen que’l domingu se vea una bona carrera en homenaxe a les víctimes.

Llegamos a ún de los circuitos más complexos del calendariu pola so ubicación: los 2200 metros d’altura dan más d’un dolor de cabeza a los inxenieros yá que la densidá del aire ye inferior y eso nun ayuda al sistema d’enfriamientu de los coches. Amás, necesiten correr con muncha aerodinámica pa compensar la lixereza del coche. En resume, una de les carreres onde los pilotos van tener más dificultaes.

Mercedes yá son campiones del mundu, por cuartu añu consecutivu. Ellos mesmos almiten qu’entá tán a la mitá de los sos oxetivos, yá que cuenten con ganar tamién el mundial de pilotos. Nun pinta mal: Hamilton pue ser campión esti fin de selmana incluso quedando quintu anque Vettel gane la carrera. Echando un güeyu a la temporada del pilotu británicu, nun suma nengún abandonu nin carrera ensin puntuar, polo que paez lóxico que’l campionatu seya pa elli. Ensin embargu, si miramos a cómo taben les coses enantes de Singapur y pensamos na mala suerte de Vettel en tres carreres siguíes que dieron la vuelta al campionatu, yé tamién lóxico dir con calma. Ye lo que dicen nel equipu: México nun ye’l meyor circuitu pa ellos, siempre suelen tener problemes nesti tipu de circuitos, polo que, anque ye fácil y mui probable que Hamilton seya campión equí, nun quieren dalo por fecho enantes de correr.

A Ferrari sólo-yos queda lluchar, sobre too confiando en que la suerte puea ayudalos d’una vegada nes tres carreres que queden nesti 2017. Vettel va buscar ganar los grandes premios que queden y cuenta cola ventaxa de qu’esti circuitu pue ser beneficiosu pa Ferrari en comparanza con Mercedes. Con Räikkönen buscarán sumar otru bon puñáu de puntos y, de xuru, subir al podiu.

Red Bull entá rumien la decisión de penalizar a Verstappen n’Austin pol so adelantamientu per fuera del trazáu, y lleguen a México entá colos ecos de lo que pasó. Ensin embargu, ponen tol enfotu nesta nueva carrera, onde Verstappen foi penalizáu l’añu pasáu y tamién quedó fuera del podiu por un adelantamientu por fuera, nel estilu del d’Austin. Tanto elli como Ricciardo tán confiaos de que puen facer dalgo curioso y metese nel podiu, pesie a lo difícil que ye consiguir una vuelta bona poles condiciones del circuitu.

Force India cuerren en casa. Pa la primer sesión d’entrenamientos llibres, en cuenta Ocon vamos tener a Alfonso Celis nel coche, ya’l pilotu francés tornará pa la segunda tanda. Anque nada nun ta zarrao entá, l’equipu tien mui fácil quedase col cuartu llugar nel campionatu de constructores y col bonus extra pa Sergio Pérez por correr en casa. Dambos pilotos falaben de lo prestosu que ye esti trazáu de correr y tamién de la so situación a nivel personal, dempués de les engarradielles del pasáu. Paez que les agues tornen a tar calmes nel equipu.

Williams entá nun tomaron la decisión sobre los sos pilotos pa 2018 y nun van facelo hasta dempués de que termine la temporada. Asina lo dixeron a principios d’esta selmana. Los puntos siguen siendo vitales pa ellos porque los dos equipos que tienen por detrás entá puen facese con esi quintu puestu nel que lleven anclaos dende casi l’empiezu la temporada. Na mesma llínia que’l restu de pilotos ya equipos, comenten lo difícil que va ser esti circuitu pa consiguir vueltes que seyan perfectes.

Toro Rosso confirmaron a Hartley y Gasly como pilotos pa esti gran premiu, dando una nueva patadina a Daniil Kvyat, que yá se ve más fuera que dientro de la Fórmula Uno pal añu que vien. De fechu, son munches les voces qu’afirmen que van ser estos los pilotos que compitan en 2018 cola escudería. Gasly llega a México cola deceición de nun poder competir na Súper Fórmula (la última carrera foi cancelada por amenaza de tifón, quedando’l pilotu francés a mediu puntu del llíder) y teniendo que perdese’l gran premiu d’Austin. Dambos pilotos namás busquen siguir ameyorando y buscar los puntos, dalgo que paez complicao pola so condición de “novatos”.

Renault, con dos pilotos bien potentes agora a los mandos de los sos monoplaces tienen munches posibilidaes de sumar un bon puñáu de puntos d’equí al final de la temporada. Vimos lo que podía facer Sáinz nel so debut, que permitió a Renault pasar a Haas, polo que si dambos pilotos tán en bona forma, puen incluso competir por sacar a Williams de la comodidá del quintu puestu.

Grosjean expresaba la so preocupación pol sistema d’enfriamientu de los frenos en México yá que ye un aspeutu, los frenos, col que lleva peleándose tola temporada. Haas van intentar dar una meyor imaxe que la que dieron hai una selmana en casa siempre teniendo en cuenta la cantidá d’aspeutos que tienen de tener en cuenta pa competir equí con garantíes de puntuar. El so consuelu ye que les dificultaes afeuten a tolos equipos na mesma midía.

McLaren yá parten con penalizaciones (55) pal domingu pol cambiu de pieces d’Alonso derivaes de los problemes que tuviera n’Austin. De momentu, Vandoorne paez tar salváu, anque dende l’equipu nun taben convencíos al 100%. Ensin embargu, el pilotu asturianu almitió que dellos nuevos componentes que montaron n’Austin dieren bon resultáu ya esperen consiguir lo mesmo equí. Vandoorne, pel so lláu, va debutar nesti circuitu. Dende l’equipu son sinceros y nun cuentan con puntuar equí, anque nun pierden la esperanza de que dalguna circunstancia-yos lo permita.

Sauber siguen xenerando poques noticies, salvo quiciás una entrevista a Ericsson, asoleyada a principios de selmana onde’l pilotu suecu defendía que se merecía tener un sitiu na Fórmula Uno l’añu que vien. Ye lóxico que, cola cantidá de pilotos a la espera de dar el saltu que hai agora mesmo (Leclerc siendo’l que más posibilidaes tien nesti casu concretu) los qu’esti añu tán amosando un rendimientu baxu necesiten lexitimase cara al públicu. Nun sabemos en qué situación s’atopen les negociaciones de pilotos en Sauber pero nun tenemos mui claro que vaigamos a ver el mesmu par na prósima temporada.

En México repitimos horariu nocturnu:

VIENRES 27/10/2017
Llibres 1: 17:00
Llibres 2: 21:00

SÁBADU 28/10/2017
Llibres 3: 17:00
Clasificación: 20:00

DOMINGU 29/10/2017 (alcordaivos que retrasamos la hora, a les 3:00 van ser les 2:00)
Carrera: 20:00

Equí podéis atopar tolos datos sobre’l circuitu y más abaxo les gomes escoyíes por Pirelli pa esta carrera, con debut del ultrasoft:

Anque un par de hores enantes de que los coches se punxeren en marcha n’Austin abriéronse los cielos y cayó un bon bastiazu, la carrera del domingu desendolcóse embaxo un sol bien brillante y ensin nengún restu d’agua en pista. Dempués d’unes preparaciones al más puru estilu estaoxunidense, los veinte coches alliniábense en pista pa tomar la salida.

En más d’una ocasión esti añu tuvimos perbones salides que llueu tornábense en carreres más bien tirando a aburríes. Nesti casu tuvimos la suerte de tener dambes coses. Na salida, Hamilton víase relegáu al segundu puestu na primer curva dempués de que Vettel ficiera un perbón adelantamientu que lu colocaba llíder. Yera dalgo que necesitaba porque tener a Hamilton per delantre significaba tar más lloñe del oxetivu de siguir lluchando pol campeonatu. A los pocos metros yá-y metía una distancia curiosa al pilotu británicu de Mercedes qu’en nengún momentu se punxo nerviosu, consciente de que la so batalla tinía de ser calma ya ensin riesgos. Tampoco nun tuvo qu’esperar muncho pa ponerse otra vuelta per delantre, seis xiros y yá taba llíder, porque Vettel nun consiguió cuidar les gomes ya’l so rendimientu empecipió a baxar.

Aparte de los dos d’alantre, tamién vimos actividá pel mediu la parrilla: Alonso pasó a Sáinz y varios pilotos consiguieron sumar posiciones, como Verstappen que salía nel puestu dieciséis dempués de la so penalización. Magnussen salíase nesa batalla de la primer curva, lo que lu obligaba a parar más llueu de lo que cuntaben. Otru que paraba enantes de tiempu y pal restu de la carrera foi Hülkenberg, que tres la so penalización del sábadu, quedaba fuera na vuelta cuatro. Wehrlein, víctima de les lluches de la primer parte de la carrera, precisamente con Magnussen, quedaba fuera tamién na vuelta siete.

A midía que diben pasando les vueltes fuimos viendo’l papel perimportante que xugaba la bona xestión de les gomes demientres la carrera. Munchos pilotos terminaron por adelantar les sos paraes porque los Pirelli nun aguantaben el ritmu.

Ún de los pilotos que más espectáculu dio hasta que’l so coche decidió que valió foi Ricciardo. Siguiendo l’estilu al que nos tien avezaos, foi protagonista de dellos adelantamientos d’aplausu na so batalla por pasar a Bottas pa ponese terceru. Ensin embargu, na vuelta dieciséis, el so motor Renault callaba y dexábalu tiráu. Lo mesmo fadría na vuelta venticinco el Honda d’Alonso, que tamién tuvo de retirase.

Otros que tamién tuvieron llucha en pista fueron Ocon y Sáinz. El pilotu madrileñu, na so primer carrera con Renault, plantó cara al Force India, regalándonos dellos momentos emocionantes en pista.

Les últimes vueltes foron una sucesión de lluches perriba, con Verstappen intentando algamar el podiu y Vettel buscando consiguir la victoria que Hamilton tinía nes manes dende que recuperara’l llideralgu de la carrera. Pela parte d’atrás, Ericsson chocó con Magnussen, dempués de que’l danés ficiera una maniobra pa dexar pasar a Vettel ya’l suecu nun fuera capaz de reaccionar a tiempu. Llevó una penalización de cinco segundos.

El ritmu d’estes últimes vueltes foi más baxu, lóxicamente, que’l del restu de la carrera, menos pa Verstappen. A falta de namás unes curves pa ver la bandera a cuadros adelantaba a Räikkönen pa facese col tercer caxón del podiu. Ensin embargu, el pilotu de Red Bull yera inmediatamente investigáu y los comisarios decidíen penalizalu con cinco segundos por considerar que l’adelantamientu a Räikkönen foi per fuera la pista. La inconsistencia de los comisarios pa penalizar esti tipu d’acciones (penalizando a unos y non a otros) fexo que la xente de Red Bull se quexara al altu la lleva pola decisión de los comisarios.

Mercedes son campeones del mundo de Fórmula 1 por cuarta vegada consecutiva. Naide dulda que, pesie a dellos momentos de duldes, son merecíos campeones tamién nesta ocasión. N’Austin, Hamilton yá yera casi ganaor el vienres, por tolo que supón pa elli esti gran premiu, l’ambiente y les ganes de consiguir la victoria. Asina lu vimos el domingu, salvo eses vueltes nes que Vettel foi llíder, sin duldar en nengún momentu que la carrera diba ser pa elli. Bottas bregó muncho demientres la carrera, pero decepcionó al final a la hora d’aguantar a los sos persiguidores (Verstappen y Räikkönen) y terminó siendo quintu.

Ferrari ficieron tolo posible por ganar, pero hai tiempu que perdieron esa maxa que los acompañaba la primer mitá de la temporada. Vettel fexo tolo que tuvo na so mano pa vencer pero nun foi suficiente. Räikkönen, una vegada más, cumplió’l so papel de compañeru d’equipu dexando pasar a Vettel nes últimes vueltes de la carrera, y vióse superáu por Verstappen a última hora, pero pudo subir al podiu dempués de la penalización d’esti. Necesitaben superar a Mercedes por diecisiete puntos y anque sumaron más qu’ellos, nun valió pa poder siguir lluchando pol campeonatu.

Red Bull podía tener consiguío un perbón resultáu n’Austin y de fechu llegaron a tar nel podiu demientres dellos minutos. Ricciardo yá diba al llímite col so motor asina que tampoco nun sorprendió velu fuera, pesie a que paecía inxusto dempués de lo visto en pista. Nel casu de Verstappen nun queremos quedanos sólo col so adelantamientu si non tamién col fechu de que salía décimosextu y consiguió terminar cuartu, dalgo que tamién paga la pena mentar.

Force India siguen siendo los meyores de los equipos medianos. Ocon fexo una carrera perbona, sobre too si tenemos en cuenta que tuvo malu gran parte del fin de selmana, y terminó sextu. Amás regalonos dellos momentos en pista que nun faen más que confirmar el so talentu como pilotu. Pérez pel so llau, dalgo más floxu pero dientro de los puntos de toles formes, terminaba octavu.

Renault cambiaben de pilotu y anque nun foi una carrera completamente satisfactoria a nivel d’equipu, sí lo fue pa Sáinz. Debutaba col equipu francés y la verdá que naide nun diría que yera la so primer carrera y que hai dos selmanes taba corriendo con Toro Rosso. El sábadu fexo una perbona sesión de clasificación volviendo a tar dientro los diez primeros, ya’l domingu terminó siendo séptimu, al nun ser quien a pasar a Ocon. Hülkenberg, como yá comentamos, convirtíase nel primer abandonu por un fallu nel coche. L’equipu francés supera agora a Haas nel campeonatu y son séptimos.

Williams tuvo una sesión de clasificación bastante normalina, que consiguieron compensar un pocu en carrera con Massa, que terminó octavu. Stroll nun entró en puntos, quedando undécimu. Anque nun ye matemático, paez que nun van poder alcanzar a Force India nel campeonatu de pilotos. Lo que sí tienen que tener en cuenta ye que Toro Rosso tán a quince puntos y Renault a venti, polo que cualquier despiste pue dexálos entá fuera del quintu puestu nel que lleven estancaos dende hai tiempu.

Toro Rosso tamién estrenaba pilotu, con Brendon Hartley al volante con penalización incluyida. Al otru garaxe tornaba Kvyat, que consiguió puntuar nesta carrera. Llegó a rodar octavu, faciendo un trabayu bastante decente pero dalgo insuficiente pa devolvelu al equipu. Toro Rosso confirmó que diben ser Gasly y Hartley quienes corrieran en México. El neozelandés taba bien contentu cola so carrera pol cambiu que suponía con respectu a les otres categoríes au compitió y lo importante del manexu de gomes, dalgo que foi clave pa elli demientres tol fin de selmana. Terminó nel puestu trece.

McLaren paecía que podíen puntuar y de fechu Alonso clasificó ente los diez primeros, pero nun valió pa terminar cola poca fiabilidá del motor Honda. Na vuelta venticinco l’asturianu abandonaba ya’l so compañeru namás pudo terminar duodécimu.

Haas corríen en casa, pero tuvieron una gran premiu bastante desastrosu. L’accidente na primer vuelta torgó la carrera de Magnussen, y Grosjean, anque pudo terminar ente los diez primeros, desinflóse nes últimes vueltes. Una carrera decepcionante pal equipu estaoxunidense, con Grosjean catorce y Magnussen dieciséis. Amás pierden el so puestu nel mundial de pilotos en favor de Renault.

Sauber sumó otra carrera ensin brillu y con abandonu incluyíu. Wehrlein yera’l pior paráu del accidente ente elli y Magnussen y quedaba fuera na vuelta siete. Ericsson pel so lláu tamién se les vía con Magnussen, escontra’l que chocaba, anque consiguía terminar la carrera, nel puestu quince y per delantre del danés.

Enantes de poner la vista en México, au vamos nel prósimu fin de selmana, equí vos dexamos tolos númberos del sábadu y del domingu:

Clasificación

Carrera

Dempués de los madrugones asiáticos, lleguen les tardes formuleres del otru llau del planeta. Aterrizamos n’Austin pal Gran Premiu de los Estaos Xuníos d’esti 2017 que yá va viendo’l so final. Y llegamos con milenta novedaes y cambios.

Toro Rosso va correr esti finde con novedaes: a l’ausencia de Sáinz qu’a partir d’agora va correr con Renault, súmase la de Gasly que va correr la última carrera de Súper Fórmula onde tien posibilidaes de ser campión (ta a mediu puntu del llíder). Kvyat torna a la parrilla dempués de dos carreres a la solombra y la escudería elixó a Brendon Hartley (pilotu de Porsche en WEC) como sustitutu de Gasly pa esta carrera. Anque’l so nome yera ún de los que sonaba, sorprendió a muncha xente, pesie a los bonos númberos que tien na so hestoria deportiva.

McLaren confirmaba ayeri qu’Alonso va siguir nel equipu, a lo menos, otru añu más, cola posibilidá de participar n’otres competiciones demientres la temporada (por exemplu Daytona o Le Mans). El cambiu a Renault supunxo, ensin duldes, un pasu alantre n’anovación del asturianu, qu’espera poder trunfar l’añu que vien, repitiendo carreres del pasáu, anque con equipu distintu.

Como vos dicíemos, Sáinz va formar parte del equipu Renault dende esta carrera d’Austin. Esto xuega en contra del pilotu británicu Palmer, que queda ensin asientu a cuatro carreres del final de la temporada lo cual nun dexa de ser daqué negativu pal so futuru. Cada vegada paez más claro que nun va haber asientu pa elli na parrilla de 2018.

Austin yá se convirtió por méritos propios n’una de les cites preferíes de los aficionaos al motor. Pesie a tar n’un país au la Fórmula Uno nun tien nada que facer entá en comparanza con otres competiciones como Indy, ye verdá que los sos númberos van ameyorando y paez lóxico que sigan medrando de la mano de Liberty agora qu’ellos tán al cargu del negociu.

Mercedes nun aceuten les pallabres d’aquellos que yá los ponen como campeones en dambos campeonatos. Pesie a que lo tienen mui cenciello ya incluso pueden zarralo esti fin de selmana, siguen na so llínia de trabayar y nun dar les coses por sentaes enantes de faceles. Conscientes de que, dientro de lo bien que lo tán faciendo, entá tienen marxe de meyora, lleguen a Austin cola esperanza de nun tener nenguna preocupación no que cinca al rendimientu de dambos coches. Paez que pue ser esta una carrera que-yos venga a ellos meyor qu’a Ferrari, pero yá deprendimos esta temporada qu’eses coses nun se cumplen en delles ocasiones.

Ferrari lleven tres carreres contracorriente: a les sos desgracies súmase la bona suerte del so principal rival en dambos campeonatos. Anque Vettel siga afirmando qu’entá hai una migayina d’esperanza, la realidá paeznos bien distinta. Ensin descartalos del too, paeznos complicao que vaigan ser quien a compensar pola perda de puntos de les tres carreres pasaes, sobre too si pensamos qu’Austin suel ser un bon circuitu pa Mercedes. Nun duldamos que la Scuderia nun va dexar de lluchar hasta Abu Dhabi, ya entendemos que necesiten dosis extra d’optimismu pa consiguir afrontar la última parte del campeonatu con fuercia dempués de les deceiciones de carreres pasaes.

Dambos pilotos de Red Bull tán encantaos d’aterrizar n’Austin. Ricciardo puntualiza que ye un bon circuitu p’adelantar, y dempués de lo que tenemos visto en pista esti añu, nun podemos dexar d’emocionanos por ver de lo que ye capaz el pilotu australianu. La clave pa Verstappen, y realmente pa tolos pilotos, ta en consiguir el puntu correctu del coche a la hora de garrar les curves y frenar pa sacar lo meyor de cada vuelta.

Force India tán siendo unu de los meyores equipos esti añu, amosando carrera tres carrera que superaron los momentos de baxón que solíen acompañalos na segunda mitá de la temporada y que víemos n’años pasaos. Esti 2017, ensin embargu, siguen puntuando regularmente, a vegaes incluso con dambos pilotos, lo que fai que’l cuartu puestu yá casi seya pa ellos si les coses siguen como hasta agora. Sergio Pérez fala d’Austin como casi la segunda carrera de casa, pola gran cantidá de fans mexicanos que s’axunten ellí. Dambos pilotos amas destaquen un circuitu qu’anque ye técnicu y complicau en dellos sectores, ye mui prestosu ya entreteníu pa ellos.

Williams entá nun revelaron quién va ser el compañeru de Stroll pa 2017. Ayeri supimos que Di Resta va competir nes 24 hores de Daytona, lo cual nun zarra’l so futuru na escudería inglesa pero pue ser indicativo de que’l pilotu escocés anda buscándose la vida en casu de que nun tenga sitiu nel equipu del que ye pilotu reserva. Tanto elli como Kubiça tuvieron faciendo test demientres esta selmana, ensin que los comentarios del equipu permitieran albidrar si yá escoyeran a dalgún de los dos pa pilotar en 2018. Al marxe d’esto, l’equipu cuenta con puntuar con los dos coches nesta carrera, n’un intentu desesperáu por alcanzar a Force India y sobre too por poner distancia per detrás con Toro Rosso.

Toro Rosso lleven delles carreres nel puntu de mira polos cambios nos sos pilotos. Yá vos diximos más arriba que p’Austin van cuntar con Brendon Hartley y Daniil Kvyat, pero entá nun sabemos quién va correr na carrera del domingu 29, n’una selmana. Esta incertidume paeznos que pudiera xugar encontra l’equipu, anque tamién confiamos na capacidá que pue tener Hartley pa sorprender na so primer carrera na Fórmula Uno. Nun sabemos l’estáu nel que llegará Kvyat, nin como llega de confianza, dempués de ser apartáu del equipu pa dexar sitiu a Gasly.

De momentu sabemos que Hartley va penalizar por cambiu de la unidá de potencia, y saldrá nos puestos d’atrás, ensin duldes una bona prueba p’amosar de lo que ye capaz pero una torga nel so debut formuleru.

Haas cuerren en casa, col puxu qu’eso suel dar a los equipos. Tán completando una temporada bastante curiosa, anque lloñe de los oxetivos que se tienen marcao ellos mesmos. Ensin embargu, siendo’l so segundu añu na competición, lo que tán consiguiendo ye bastante almirable. Dambos pilotos son conscientes de que van tener de lluchar y trabayar muncho pa consiguir bonos resultaos nes carreres que queden, y sobre too nesta que tenemos delantre, onde van querer facelo bien delantre de los sos fans. Amás, traen meyores equí, polo que van ser unu de los equipos de los que tar pendientes en pista.

Renault lleguen a Austin con novedaes nos sos pilotos. Anque nun s’espera que faiga grandes coses col so nuevu equipu no que queda de temporada, sí que ye verdá que los fans tán a la espera de ver de lo que ye capaz Sáinz a bordo del Renault. Cola deceición de nun puntuar nes dos carreres pasaes yá olvidada, lleguen equí con ganes de facer funcionar les meyores qu’entá tienen pendientes de probar nel coche. Sólo los separa un puntu de Haas y diez de Toro Rosso, que tán agora mesmo sextos nel mundial de constructores, polo qu’entá puen consiguir facese con esi puestu.

Los planes de McLaren pa esti fin de selmana ye ameyorar con respeutu a Suzuka. Anque les carreres asiátiques nun fueron necesariamente negatives, yá que Vandoorne consiguió bonos resultaos, nun se puede dicir lo mesmo d’Alonso, polo qu’un bon resultáu a nivel d’equipu n’Austin ye l’oxetivu. Dempués d’asegurar motorista y pilotos, McLaren busca terminar la temporada de la meyor forma posible y dexar atrás tres años de fracasos y poques razones pa sorrir.

Anque sorprenda, Sauber siguen experimentando con cambios nel coche, suponemos que de cara a 2018 yá que poco-yos queda por consiguir nesta temporada. En díes pasaos víemos cambios no que se conoz como “aleta de tiburón” y cola que munchos equipos lleven meses experimentando, llegando a soluciones bastante creatives (por exemplu, el casu de Force India, que paez un serruchu). Dambos pilotos, na llínia del restu de la parrilla, tienen ganes de ponese al volante porque consideren esti circuitu como ún de los meyores y más entreteníos pa conducir.

Los horarios p’Austin nun incluin madrugón:

VIENRES, 20 d’ochobre
– Llibres 1: 17:00
– Llibres 2: 21:00

SÁBADU, 21 d’ochobre
– Llibres 3: 18:00
– Clasificación: 23:00

DOMINGU, 22 d’ochobre
– Carrera: 21:00

Equí podéis atopar más información sobre’l circuitu y les gomes escoyíes por Pirelli pa esti gran premiu: