Category: Temporada 2016

Silly season 2016

Entá nos queda más d’una selmana pal prósimu gran premiu (Bélxica) pero la Fórmula Uno sigue dando noticies. Y ye que tamos en medio de lo que yá se conoz dende va tiempu como silly season, esi momentu na temporada na qu’empiecen los rumores sobre pilotos diendo y viniendo d’equipu n’equipu. 2016 nun diba ser diferente.

Podemos empezar por comentar que dende la prósima carrera vamos tener una cara nueva na parrilla, anque nun seya un desconocíu: Esteban Ocon va sustituyir a Rio Haryanto nel Manor. Lo qu’empezare siendo rumor (el gobiernu d’Indonesia nun taba faciendo los pagos necesarios pa que’l pilotu pudiera siguir sentáu nel so coche) acabó por facese real hai unos díes, cuando Manor confirmaba que diben tener a Ocon como compañeru de Wehrlein. Diose asina puerta a los rumores que vinculaben a Vandoorne col equipu, y refuérciase la presencia de Mercedes en parrilla qu’asitió en Manor a dos pilotos del so programa. Ocon taba compitiendo con Mercedes en DTM mientres facía les llabores de reserva de Renault y segundu reserva de Mercedes.

Continuamos col futuru del pilotu de McLaren Jenson Button. Lleva un par d’años yá nos que l’equipu dexa pa última hora la decisión de quedase con elli o non, ya esti añu comentaren que hasta setiembre nun diben empezar a tratalo. Lo que ta claro ye que los güeyos del equipu británicu tán más enriba de Vandoorne que nunca, y los de Williams en Button. Los de Grove nun dexen d’afalagar al inglés, anque siempre dexando claro que nun van esperar eternamente a que tomen una decisión. Paez claro que McLaren va quedase con Alonso, pero la identidá del so futuru compañeru en 2017 entá nun ta clara. Jenson paez que va a aprovechar el branu pa facese una idea de que dirección quier tomar la so carrera dientro de les opciones que tien.

Y falando de Williams, cada vegada ta más claro que nun van cuntar con Massa pa 2017, lo que dexaría’l sitiu pa la posible llegada de Button, y hai quien diz que Bottas podría nun quedar tampoco. A Button súmase tamién Kvyat, pa los optimistes que piensen qu’entá va tener sitiu na F1 dempués d’esti añu. Y los futuros rookies, nun podíen faltar nel bombu, Alex Lynn (pilotu de desarrollu de Williams y previamente nel programa de Red Bull que compite agora en GP2 y que ya descarta correr una tercer temporada na serie) y Lance Stroll (na Fórmula 3 y pilotu desarrollu de Williams).

Renault y Force India tán tamién nel puntu mira. Los segundos pol fechu de que munchos piensen que Sergio Pérez va dexar l’equipu pa xunise a Williams anque tenga firmáu contratu con Force India pa 2017. En Renault, porque l’asientu de Palmer nun paez tar aseguráu, mesmo que’l de Magnussen, y tamién falen de Sergio Pérez como posible sustitutu,. La entruga ye…¿si Pérez se mueve, pa quién quedaría’l so sitiu? ¿Quiciás Sáinz como apunten dalgunos otros?

Tamién se fala de Nasr saliendo de Sauber o de que los pilotos de Haas pa 2017 podríen nun ser los mesmos, pero ta claro qu’equí entramos nel xuegu de los equipos de caltener un pocu l’interés d’unos ya otros pensando yá na prósima temporada.

Pa resumir, güeyos puestos no que fagan Pérez y Williams, porque los sos movimientos van ser la clave pa los que van venir dempués.

Si dalgo nos tienen enseñao les temporaes pasaes, ye que la mitá los rumores de la silly season queden namás que nel intentu d’unos cuantos de colgase la medalla del “díxelo yo primero”. N’unes selmanes veremos a quién-y toca quedase col oru.

Actualización 01/09/2016: Felipe Massa anuncia la so retirada de la Fórmula Uno, dexando asina un asientu vacíu en Williams pa 2017.
Actualización 02/09/2016: Jenson Button anuncia la so retirada de la competición en 2017 anque va siguir trabayando como pilotu de desarrollu con McLaren y dexa la puerta abierta a volver en 2018. Stoffel Vandoorne pasa a ser compañeru de Fernando Alonso pa la prósima temporada.
Actualización 14/10/2016: Renault confirma a Nico Hülkenberg como pilotu pa 2017.
Actualización 03/11/2016: Williams confirma a Valtteri Bottas y Lance Stroll como pilotos pa 2017.
Actualización 09/11/2016: Renault confirma a Jolyon Palmer como pilotu pa 2017.
Actualización 11/11/2016: Haas confirma a Kevin Magnussen como pilotu pa 2017.
Actualización 21/11/2016: Sauber confirma a Marcus Ericsson como pilotu pa 2017.

Gran Premiu d’Alemaña 2016 – Análisis por equipos

Aprovechando’l parón braniegu, tócanos echar un güeyu a lo que ficieron los equipos el domingu nel Gran Premiu d’Alemaña nel Hockenheimring:

– Mercedes: como dicíemos nel resume de la carrera, Rosberg foi otra vuelta’l so pior enemigu, complicándose la vida na salida y dexando a Hamilton, que fexo un trabayu perbonu, más llíder na calificación y ganaor de la carrera. Queremos pensar que nun va ser esti’l principiu del final de les opciones del alemán al títulu y que’l parón va servir pa qu’organice les sos idees y dexe atrás esti complexu d’inferioridá que-y fae facese pequeñu enfrente’l so compañeru.

– Red Bull: el pasu alantre de la escudería austríaca ye evidente, pa desgracia de Ferrari. Dambos pilotos acompañaron a Hamilton nel podiu n’Alemaña, ya en nengún momentu amosaron debilidá frente a Rosberg, como pudimos ver na pista especialmente del llau Verstappen.

– Ferrari: hebo dellos cambios na selmanada pasada na estructura interno del equipu, y anque nun se-y pue echar la culpa de los resultaos de la escudería a eso, sí que ye verdá que quiciás son de los que más van agradecer esti parón pa reorganizase ya continuar puxando por facese col segundu puesto na clasificación de constructores.

– Force India: una de les cualidaes del equipu ye que, ensin facer munchu ruiu, van consolidando les sos actuaciones añu tres d’añu. Siguen na so batalla particular con Williams, a los que de momentu tienen perbaxo nel campeonatu. Dambos pilotos fixeron un bon trabayu, otra vuelta, na carrera, anque Pérez paecía nun tar mui contentu con como-y fueron les coses demientres el fin de selmana.

– McLaren: comentábemos nel resume’l fechu de que McLaren llegaba a Alemaña cola necesidá de meter a dambos pilotos ente los diez primeros y nun dexar de sumar puntos. Eso foi asina demientres casi tol gran premiu hasta’l final onde víemos a Alonso desinflase. Los problemes col combustible pasaron-yos factura a dambos, al asturianu más qu’a Button, que pudo facese con dellos puntos quedando octavu. Entá nun entendemos mui bien qué foi lo que fexo qu’Alonso considerare apropiao, dempués de tar avisáu de la necesidá d’aforrar combustible, el desdoblase de Verstappen cuando esti lu pasó en pista, dalgo que fexo que Pérez aprovechase la batalla p’adelantalu y que dende esi puntu, Alonso nun pudiera más que ver cómo lu adelantaben los sos perseguidores más cercanos. Terminó siendo décimosegundu.

– Williams: suma y sigui de Williams, n’otra carrera deceicionante col abandonu de Massa y el puestu novenu de Bottas que tuvo suerte de que la carrera nun durase dalguna vuelta más. Otru equipu que de xuru taba naguando pol parón braniegu pa esclariar les sos idees. Buena falta-yos fai.

– Haas: Gutiérrez ta empezando a sacudise la presión de tar siempre per detrás del so compañeru d’equipu y lleva yá dellos GPs faciendo bones actuaciones y dexando’l coche a la vera los puntos. Nesta ocasión, foi undécimu, siendo Grosjean décimoterceru dempués de ser penalizáu por cambiar la caxa cambios.

– Toro Rosso: Pesie a que nun tán faciendo una mala temporada, yá empiecen a acusar les sos carencies con respeutu a otros equipos con más presupuestu y avances (por exemplu, McLaren, que gracies a los puntos de Button y a que nengún de los pilotos de Toro Rosso puntuare, yá-yos saquen un puntu). Kvyat sigui cola so batalla particular por atopar el so sitiu nel equipu y por asegurase’l futuru pa 2017, daqué que naide nun ve claro, nin siquiera elli. Sáinz pela so parte tuvo una de les sos peores carreres, nun puntuando dempués de ser penalizáu con tres posiciones el sábadu por bloquear a Massa demientres la sesión de calificación.

– Renault: Palmer tuvo una actuación bien bona’l sábadu en calificación anque nun pudo repitilo’l domingu, y xunto al so compañeru sólo pudieron ser décimonovenu ya décimosextu respeutivamente. La escudería ta, como nun podía ser d’otra manera, centrada yá nel coche de 2017 y los sos pilotos lluchando por esi asientu que-yos garantice volver a correr pa la temporada que vien. La sombra d’Ocon (pilotu reserva de Renault y de formación pa Mercedes) ye bien allargada.

– Sauber: Nun esperábemos milagros a dos carreres dende qu’anunciaron el cambiu na so direición. Sí ye verdá que cuntamos con velos espoxigar nes carreres vinientes, pero nun foi nada sorprendente velos nel fondu la parrilla otra vuelta na sesión de calificación, nin que la so carrera fuera discretina. L’aplausu podemos da-ylu a Nasr polos sos adelantamientos al principiu la carrera, anque nun sirvieren pa muncho y tuviera d’abandonar unes cuantes vueltes dempués. Ericsson foi décimooctavu.

– Manor: Dambos coches consiguieron terminar la carrera, pesie a dalgún qu’otru incidente en pista ente los pilotos. Lo que más se comenta agora mesmo sobre Manor nun ye tanto lo que faen dientro la pista (anque Wehrlein tornó a facer una bona sesión de calificación el sábadu) si non lo que pasa fuera y la falta del dinero que garantiza l’asientu a Haryanto. Pudo correr n’Alemaña, y anque dende’l gobiernu indonesiu paez que tienen claro’l so compromisu col equipu, nun ta claro que lu vaigamos ver correr en Bélxica dempués del parón. Na carrera, Wehrlein acabó décimoséptimu ya’l so compañeru vixésimu.

Gran Premiu d’Alemaña 2016 – Carrera

Llegó’l parón del branu na Fórmula Uno y dexonos un gran premiu d’Alemaña con bien de coses pa comentar. La primera d’elles y que comentaremos en dalgún otru post, les grades vacíes nel circuitu de Hockenheim. Los propios pilotos vienen diciendo que muncha de la culpa de qu’eses grades tean asina nun ye tanto porque la Fórmula Uno nun seya interesante si non polo cares que son les entraes. Foi bastante triste ver les grandes lones de propaganda tapando delles partes del circuitu onde naide nun mercó asientos, y tamos falando del país de la escudería actualmente dominante y con 4 pilotos en parrilla.

Per otru llau, quedó claro otra vuelta más que Rosberg nun tien otru enemigu en pista que nun seya elli mesmu: fexo un vienres perfeutu, quedando primeru en toles práutiques. Nel sábadu brilló, tamién lliderando la tercera práutica y faciendo una pole más cargáu y sobreponiéndose a un problema col acelerador que lu obligó a marcar tiempu más tarde que’l restu. Too nos facía pensar que diba ser más de lo mesmo el domingu. Pero otra vuelta más, una salida desastrosa torgólu pal restu la carrera. Topóse con un Hamilton brillante dende’l principiu y de dos Red Bull que lu tuvieron a raya demientres cásique tola carrera. A ello axuntóse l’incidente con Verstappen al volver a pista tres el primer cambiu de neumáticos por una maniobra que los comisarios consideraron illegal por echar de pista al holandés y que-y costó cinco segundos (que l’equipu cumpliría con creces na segunda parada yá que fadríen ocho segundos al tener un problema col cronómetru y querer evitar daños mayores). Y eso foi too: la diferencia ente elli ya’l so compañeru d’equipu yá ye de diecinueve puntos. Queda muncho campeonatu entá, pero como pinten les coses aseméyase demasiao a lo que yá tenemos visto nes dos temporaes pasaes.

Ferrari dexó claro otra vegada que nesti parón de branu van de tener que trabayar muncho pa resolver la so situación actual, dempués de la marcha de James Allison y los cambios na estructura interna del equipu qu’eso va trayer, si bien anunciaron que nun diben a facer más desarrollos que los que teníen planificaos a principiu de temporada col envís de dir moviendo recursos al desarrollu del coche de 2017. Red Bull ta cada vez más fuerte y dende la escudería italiana velos cada vez más lloñe na clasificación de constructores, ensin duldes ye dalgo que tienen de tratar de resolver nes carreres que vienen. En xeneral, dambos pilotos completaron un gran premiu discretu, con Vettel cuestionando otra vez decisiones estratéxiques de carrera per parte l’equipu (anque nun se puede negar que fuere mui optimista l’intentu d’undercut a Verstappen cuando esti taba casi 10 segundos per delantre), y ganó-y la batalla a Räikkönen, que quedó sextu per detrás d’elli.

Per detrás de Ferrari atopamos el Force India de Nico Hülkenberg, séptimu, que xunto al so compañeru consiguió arrampuñar con puntos mui importantes na so batalla con Williams. La escudería inglesa volvió a deceicionar, cola retirada de Massa y la carrera irregular de Bottas que vio cómo desapaecía tol trabayu fechu cuando la so estratexa lu dexaba espuestu y les gomes empezaben a rendir mal. Viose adelantáu a última hora por Button, que foi octavu, dexándolu novenu.

Les espeutatives puestes en McLaren pa esti gran premiu descansaben na cantidá de puntos que pudieren consiguir ente dambos pilotos, y anque na mayor parte la carrera foi asina, les vueltes finales fueron un infiernu p’Alonso, que de tar novenu per detrás del so compañeru, terminó decimosegundu y fuera los puntos tres una estraña maniobra na qu’intentó desdoblase con Verstappen y qu’aprovecho Pérez p’adelantalu. La carrera de dambos McLaren viose llimitada por problemes de consumu de combustible que los obligó a aforrar nes últimes vueltes.

Pelos puestos medios, topamos, aparte d’Alonso, al Haas de Gutiérrez, qu’ensin munchu ruiu ta empezando a ponese a l’altura de Grosjean; los dos Renault, que dempués d’una bona sesión de calificación per parte Palmer, consiguieron terminar y dar un pocu guerra en pista; dambos Toro Rosso, que paez qu’empiecen a asoleyar el llímite de correr con una especificación de la PU del añu pasáu y dexaron en bandexa a McLaren el so llugar nel campeonatu de constructores y agora tán un puntu perbaxo la escudería inglesa y a los Manor, que tuvieron dalgún qu’otru encontronazu en pista pero consiguieron terminar. Haryanto sigui cola sombra del rumor que diz que nun va siguir en Manor a la vuelta’l parón braniegu, con Ocon (pilotu de formación de Mercedes y reserva de Renault) sumándose agora a la llista de posibles sustitutos. Sauber sólo pudo acabar con Ericsson yá que Nasr quedó fuera dempués de protagonizar un bon adelantamientu nos primeros momentos de la carrera. Nun podemos entá xulgar cómo de bono foi pa la escudería’l cambiu de direición, pero cuntamos con empezar a velo na prósima carrera en Bélxica.

Los únicos abandonos del gran premiu fueron, como yá comentemos, Felipe Nasr y Felipe Massa.

Equí vos dexamos los resultaos de calificación del sábadu y los de la carrera del domingu:

Clasificación

Pos Pilotu Q1 Q2 q3
1 Nico Rosberg 1:15.485 1:14.839 1:14.363
2 Lewis Hamilton 1:15.243 1:14.748 1:14.470
3 Daniel Ricciardo 1:15.591 1:15.545 1:14.726
4 Max Verstappen 1:15.875 1:15.124 1:14.834
5 Kimi Räikkönen 1:15.752 1:15.242 1:15.142
6 Sebastian Vettel 1:15.927 1:15.630 1:15.315
7 Nico Hulkenberg 1:16.301 1:15.623 1:15.510
8 Valtteri Bottas 1:15.952 1:15.490 1:15.530
9 Sergio Perez 1:16.169 1:15.500 1:15.537
10 Felipe Massa 1:16.503 1:15.699 1:15.615
11 Esteban Gutierrez 1:15.987 1:15.883
12 Jenson Button 1:16.172 1:15.909
13 Carlos Sainz 1:16.317 1:15.989
14 Fernando Alonso 1:16.338 1:16.041
15 Romain Grosjean 1:16.328 1:16.086
16 Jolyon Palmer 1:16.636 1:16.665
17 Kevin Magnussen 1:16.716
18 Pascal Wehrlein 1:16.717
19 Daniil Kvyat 1:16.876
20 Rio Haryanto 1:16.977
21 Felipe Nasr 1:17.123
22 Marcus Ericsson 1:17.238

Na parrilla de salida Sáinz foi penalizáu con tres puestos por un incidente con Felipe Masa na clasificación, Hulkenberg con un puestu puesto por un error al montar los neumáticos y Grosjean con cinco puestos por cambiar la caxa de cambiu.

Carrera

Pos Pilotu Tiempu Vuelta
1 Lewis Hamilton 1:30:44.200 67
2 Daniel Ricciardo +6.996 67
3 Max Verstappen +13.413 67
4 Nico Rosberg +15.845 67
5 Sebastian Vettel +32.570 67
6 Kimi Räikkönen +37.023 67
7 Nico Hulkenberg +70.049 67
8 Jenson Button +1 vuelta 66
9 Valtteri Bottas +1 vuelta 66
10 Sergio Perez +1 vuelta 66
11 Esteban Gutierrez +1 vuelta 66
12 Fernando Alonso +1 vuelta 66
13 Romain Grosjean +1 vuelta 66
14 Carlos Sainz +1 vuelta 66
15 Daniil Kvyat +1 vuelta 66
16 Kevin Magnussen +1 vuelta 66
17 Pascal Wehrlein +2 vueltes 65
18 Marcus Ericsson +2 vueltes 65
19 Jolyon Palmer +2 vueltes 65
20 Rio Haryanto +2 vueltes 65
NC Felipe Nasr NT 57
NC Felipe Massa NT 36

Gran Premiu d’Alemaña 2016 – Previa

Entá ensin recuperanos del too de Hungría, pegamos el saltu a Alemaña pal so Gran Premiu nel circuitu de Hockenheim. Aterrizamos equí dempués d’un añu d’ausencia d’esti GP por cuenta los problemes de Nürburgring (l’otru circuitu que lu entama) en 2015. De momentu paez qu’el d’esti añu tira palantre, yá cuntamos con que seya asina nos años vinientes.

Llegamos a Alemaña con Hamilton llíder nel campeonatu de pilotos, non con un marxe descomanáu, pero sí con un colchón pa dir faciendo lo que yá fixera n’años pasaos, ganar carreres, sumar puntos y facese col campeonatu otra vuelta. Rosberg necesita ser muncho más ambiciosu nes sos estratexes y al volante, yá que ta visto qu’en momentu que Hamilton-y mete un pocu presión pierde puxu y dexa que tolo trabayao s’esbarrumbe. Esti añu cuenta con una ventaxa y ye qu’en dalgún momentu de les carreres de la segunda parte’l campeonatu, Hamilton va vese penalizáu pol cambiu na unidá de potencia, lo que yá ye una torga de diez posiciones en parrilla. Ye d’ehí d’onde Rosberg pue sacar beneficiu, aparte de faciendo carreres nes que nun abra la puerta al so compañeru, o cualquier otru pilotu que-y meta un pocu presión, nel primer xiru de la primer vuelta.

Hockenheim ye la última carrera de la primer parte del campeonatu, y buen momentu pa dir valorando lo fecho hasta agora. Hai equipos, como Renault, que yá tán pensando (con tola razón) nel coche pa 2017. Otros tienen un güeyu neso ya otru en siguir atropando puntos pal campeonatu, tolos que tengan entá daqué que consiguir. Paez raro ya drástico dicir esto cuando entá queda la mitá’l campeonatu, pero paez que hai escuderíes que nun pinten meyor pa esa segunda parte.

De momentu, tolos güeyos puestos nel circuitu alemán y no que puen facer ellí, ya en casa, los pilotos de Mercedes (Rosberg por partida doble). Per detrás, güeyu a la batalla tanto de pilotos como de constructores de Red Bull y Ferrari, y a la de Williams y Force India, y tamién al puxu de Sauber por el puntín de Manor que los dexa como últimos.

Gran Premiu de Hungría 2016 – Análisis por equipos

Quiciás seya inxusto dicir qu’esta foi una de les peores, o más aburríes, carreres del campeonatu, pero la verdá ye qu’anque tuvimos dalgo d’aición en pista, la mayor parte del tiempu pasémoslu viendo a pilotos solos y a Räikkönen y Verstappen peleándose. Esto foi el gran premiu de Hungría:

– Mercedes: pesie a quedase ensin la pole’l el sábadu dempués de muncha polémica sobre les banderes amarielles y la velocidá de los pilotos demientres tán en pista, dalgo que perxudicó a Hamilton (por trompu d’Alonso) pero benefició a Rosberg (anque foi investigáu pa ver si realmente frenare) l’alemán nun supo aprovechase dello y perdió enseguida la so ventaxa, primero con Ricciardo ya dempués col so compañeru d’equipu, que nun la dexó en lo que quedó de gran premiu. Otra carrera dominada por Hamilton, otra victoria pa la so coleición y seis puntos de más que lu faen llíder del campeonatu de pilotos perriba’l so compañeru.

– Red Bull: yeren los únicos capaces de disputar la victoria a Mercedes equí, como yá ficieren en 2014, y tuvieron la oportunidá de la mano de Ricciardo, anque nun foi suficiente pa facese col primer escalón del podiu. Anque dambos pilotos ficieron una bona carrera, el que más beneficiu sacó foi l’australianu, quedando terceru. El so compañeru foi quintu.

– Ferrari: yá van delles carreres nes que Vettel nun ye’l centru d’atención nel bon sentíu, y nesti casu fexo una carrera discreta, quedando per delantre del so compañeru d’equipu, que foi sextu, pero ensin facer munchu ruíu. Pela so parte, Räikkönen vióseles con Verstappen un bon cachu de la carrera, pal esfrute de los fans, que poco más d’aición pudieron ver en pista. Dambos pilotos son cuartu y quintu nel campeonatu.

– McLaren: la carrera foi un desastre pa Button y aburrida p’Alonso, según elli comentó. El británicu tuvo problemes col frenu que’l so equipu intentó resolver por radio cayendo asina, según los comisarios, n’una violación del reglamentu los mesaxes que se puen tresmitir, dalgo que nin pilotu nin equipu nin fans compartíen. Dempués d’un drive through y de pasar un tramu de la carrera penúltimu, tuvo de retirase por una fuga d’aceite nel coche que l’equipu espera nun seya recurrente p’Alemaña. Alonso foi un exemplu de regularidá quedando séptimu en carrera y tamién nes otres sesiones de llibres y calificación, y sumando seis puntos vitales pal equipu.

– Toro Rosso: Que Kvyat nun ta bien dende que lu movieron a Toro Rosso ye evidente, y más cuando’l so compañeru d’equipu rara vez queda fuera los puntos en carrera demientres elli queda perdíu pelos puestos baxos de la tabla. El pilotu rusu ta poniéndo-ylo difícil a los que quieren que siga na Fórmula Uno pa 2017. Sáinz foi octavu, per detrás d’Alonso, faciendo una bona carrera y otra vuelta superando al so compañeru d’equipu.

– Williams: Dicíemos que Silverstone nun fuera’l so gran premiu, pero podíemos dicir lo mesmo de Hungría: Massa viose fuera de Q1 el sábadu, polo que yá empezó cola torga d’entamar la carrera bien atrás. El domingu nun foi muncho lo que pudo facer n’un circuitu onde adelantar ye complicao y quedó nel puestu dieciocho. Pela so parte, Bottas foi novenu, dalgo meyor que’l so compañeru d’equipu pero ensin brillar. Dambos pilotos tán a la espera de que se confirme si siguen pa 2017 na escudería inglesa, polo qu’estos resultaos nun-yos tán faciendo nengún favor.

– Force India: Hülkenberg foi quien a facese col últimu puntu quedando décimu, xusto perriba’l so compañeru d’equipu que se vio torgáu n’un pit stop que-y condicionó’l restu la carrera. Force India sigui avanzando seliquino, y viendo les debilidaes de Williams, nun sedría raro que los superaren nes prósimes carreres.

– Renault: Yá dicíemos nel resume de la carrera que Palmer foi unu de los meyores en carrera, y tuvo a piques de consiguir puntos, los primeros na so carrera en Fórmula Uno, y una gran ayuda pa Renault. Pero un trompu, que nun foi culpa d’elli del too polo que pudimos saber dempués, fexo qu’esta oportunidá desapaeciere, dexándolu nel puestu doce, per delantre de Magnussen que foi décimoquintu.

– Haas: L’equipu norteamericanu completó una carrera discreta, con Gutiérrez daqué inspiráu en comparación col so compañeru, anque nun pudieron pasar del puestu trece (pal pilotu mexicanu) y catorce (pa Grosjean). Ensin escaecer que ye esti’l so primer añu nesta competición, nun-yos queda otra que siguir ameyorando pa siguir sumando carreres buenes, como les que yá tienen fecho, y puntos que los ayuden a subir na clasificación de constructores.

– Sauber: Nun esperábemos una recuperación milagrosa en dos díes pa la escudería suiza, pero polo menos pudimos ver a dambos coches acabar y faciéndolo relativamente bien en pista. Nasr tuvo dellos momentos interesantes y anque Ericsson nun pudo pasar del puestu veinte ya’l so compañeru foi décimoséptimu, les sensaciones son distintes. Coles preocupaciones económiques agora a un llau, quiciábes l’equipu pue centrase n’ameyorar lo suficiente pa pasar a Manor nel mundial de constructores.

– Manor: Tolo que nun seya terminar últimu en carrera pa los Manor ye un llogru, y nesti casu Wehrlein pudo ser décimonovenu perriba’l so compañeru d’equipu que foi vixésimoprimeru y d’Ericsson. Haryanto nun ta na meyor de les posiciones arrodiau de rumores que dicen que’l so asientu nun ta aseguráu por cuenta’l dinero que nun llega a Manor de la mano de los sos sponsors (Haryanto trayía dinero del gobiernu d’Indonesia, el so país d’orixe). Fálase de la posibilidá de Vandoorne sentándose nel so asientu pa Hockenheim, por nun tener que competir na Superfórmula hasta finales d’agostu, pero entá nun hai nada confirmao per nengún de los dos llaos.

Gran Premiu de Hungría 2016 – Carrera

Enantes de metenos de cabeza al gran premiu d’Alemania que yá ta casi enriba nós, vamos echar una güeyadina a la carrera del domingu nel Hungaroring. Una fin de selmana con una clasificación pasada por agua que casi l’allarga per dos hores con cuatro banderes coloraes (sí, cuatro, anque el peligru colos coches fuera pista nel estáu nel que taba’l circuitu obligaba a tomar más precauciones de la cuenta). Tres una Q1 d’apuestes ente parones y cambios de xuegos de neumáticos según diba secando’l firme y faciendo carril les coses fueron normalizándose en Q2, sicasí yeren a vese variaciones na clasificación en puestos onde nun tamos avezaos fai tiempu con unos Red Bull que paecíen amenazar a los Mercedes, hasta una Q3 na que too volvia a la “normalidá”. Una normalidá na que-y tocaba esta vez a Rosberg salise cola d’él.
En cuantes la carrera, nun ye que fuera la carrera más vistosa de la temporada, y sobre too teniendo en cuenta les carreres tan bones que tuvimos los dos años pasaos. Si acasu, y como vien siendo vezu esti añu, lo que dio más de sí foi la salida, onde Rosberg vía como la so pole del sábadu desapaecía y tornába en segundu caxón del podiu ensin que pudiera facer muncho por evitalo. Anque nun foi tan cenciello como pue paecer y Hamilton tuvo de pelease non sólo col so compañeru d’equipu si non tamién colos Red Bull, especialmente el de Ricciardo, que tuvo a puntu quita-y la primer posición, anque llueu terminara terceru en carrera.

Les vueltes siguientes fueron más o menos tranquiles pal llíder de carrera (y agora mesmo, tamién de campeonatu) ya en xeneral pa tolos pilotos, cola esceición de Kimi Räikkönen ya Max Verstappen, que tuvieron casi tola carrera engarriaos por ver quien quedaba per delantre, dalgo qu’a la fin consiguió’l pilotu holandés, y de Jenson Button, que vio la carrera torgada primero con un problema col frenu, y llueu con una penalización per parte direición de carrera polo que consideraron un mesaxe prohibíu (según el reglamentu) y que lu penalizó con un drive through. Tornó otra vuelta’l debate de lo conveniente o non d’estes penalizaciones, sobre too dempués de les quexes espresaes pol propiu pilotu al so equipu demientres la carrera, onde cuestionaba que nun se consideraren los sos problemes de frenu razón de sobra pa necesitar ayuda del muru, por ser un tema de seguridá y non d’ayuda al pilotu. De toles maneres, por si nun tuviera poco, el pilotu inglés viose fuera de carrera por cuenta una perda d’aceite nel coche, siendo l’únicu pilotu retiráu del gran premiu. El so compañeru foi séptimu, protagonizando l’anéudota del gran premiu por tener sío séptimu en toles sesiones tanto llibres como calificación ya llueu tamién en carrera.

Prestonos enforma la carrera de Palmer, anque tuvo la mala suerte de facer un trompu tando en puntos ya perder la oportunidá de sumar daqué pal equipu y pa si mesmu de cara al campeonatu de pilotos. Tamién tuvo un día aceutable Felipe Nasr, anque’l so equipu nun consiguiera facer lo mesmo, daqué ensin dulda positivo pa elli y pa Sauber, recién rescatáu económicamente por una compañía suiza. Nun tuvieron tanta suerte Massa y Kvyat, con una carrera bastante probe, dalgo que nun ayuda a la so imaxe y al so futuru, cada vuelta más cuestionáu, nes sos respeutives escuderíes.

Equí vos dexamos la tabla de calificación del sábadu ya la del domingu. Hamilton ta agora llíder del campeonatu con seis puntos perriba Rosberg. Ricciardo ye terceru, con sólo un puntu más que Räikkönen y cinco que Vettel, que ye quintu.

Clasificación

Pos Pilotu Q1 Q2 q3
1 Nico Rosberg 1:33.302 1:22.806 1:19.965
2 Lewis Hamilton 1:34.210 1:24.836 1:20.108
3 Daniel Ricciardo 1:39.968 1:23.234 1:20.280
4 Max Verstappen 1:40.424 1:22.660 1:20.557
5 Sebastian Vettel 1:35.718 1:24.082 1:20.874
6 Carlos Sainz 1:36.115 1:24.734 1:21.131
7 Fernando Alonso 1:35.165 1:23.816 1:21.211
8 Jenson Button 1:37.983 1:24.456 1:21.597
9 Nico Hulkenberg 1:41.471 1:23.901 1:21.823
10 Valtteri Bottas 1:42.758 1:24.506 1:22.182
11 Romain Grosjean 1:35.906 1:24.941
12 Daniil Kvyat 1:36.714 1:25.301
13 Sergio Perez 1:41.411 1:25.416
14 Kimi Räikkönen 1:36.853 1:25.435
15 Esteban Gutierrez 1:38.959 1:26.189
16 Felipe Nasr 1:37.772 1:27.063
NC Jolyon Palmer 1:43.965
NC Felipe Massa 1:43.999
NC Kevin Magnussen 1:44.543
NC Marcus Ericsson 1:46.984
NC Pascal Wehrlein 1:47.343
NC Rio Haryanto 1:50.189

Carrera

Pos Pilotu Tiempu Vuelta
1 Lewis Hamilton 1:40:30.115 70
2 Nico Rosberg +1.977 70
3 Daniel Ricciardo +27.539 70
4 Sebastian Vettel +28.213 70
5 Max Verstappen +48.659 70
6 Kimi Räikkönen +49.044 70
7 Fernando Alonso +1 vuelta 69
8 Carlos Sainz +1 vuelta 69
9 Valtteri Bottas +1 vuelta 69
10 Nico Hulkenberg +1 vuelta 69
11 Sergio Perez +1 vuelta 69
12 Jolyon Palmer +1 vuelta 69
13 Esteban Gutierrez +1 vuelta 69
14 Romain Grosjean +1 vuelta 69
15 Kevin Magnussen +1 vuelta 69
16 Daniil Kvyat +1 vuelta 69
17 Felipe Nasr +1 vuelta 69
18 Felipe Massa +2 vueltes 68
19 Pascal Wehrlein +2 vueltes 68
20 Marcus Ericsson +2 vueltes 68
21 Rio Haryanto +2 vueltes 68
NC Jenson Button NT 60

Gran Premiu de Hungría 2016 – Previa

Enantes del descansu formuleru n’agostu, quédennos dos carreres en fin de selmanes siguíos. La primera d’elles, Hungría.

El circuitu de Hungaroring ye unu de los favoritos del calandariu, pa pilotos, equipos ya fans en xeneral polos cambios ya oportunidaes qu’ufre pa ver bones carreres y polo caprichosu que suel ser el tiempu, siendo les tormentes dalgo a esperar demientres el fin de selmana.

Una de les primeres noticies coles qu’entamamos esti fin de selmana ye la compra de Sauber pola empresa Longbow Finance S.A. Yá vos dicíemos hai unes selmanes qu’andaben a la gueta de compraor que-yos ayudare a salir de la situación económica complicada na que taben pero nun se sabía entá si diba ser un sofitu económicu o lo que pasó, la compra dafechu del equipu. Anque’l nome va caltenese, Peter Sauber va dar un pasu atrás, ya en principiu Monisha Kaltenborn va siguir como xefa d’equipu ya CEO.

Hungría ye circuitu especial pa munchos pilotos, si non que-yos lo digan a Fernando Alonso y Jenson Button que ganaron la so primer carrera de Fórmula Uno ellí. Dende McLaren, confíen en que seya esta una buena carrera pa dambos na que puedan siguir sumando puntos y ameyorando les sos prestaciones. Otros que tán faltos d’un pocu tranquilidá son Ferrari. Dempués de confirmar la so aliniación pa 2017, calteniendo a dambos pilotos, nun dexaron d’apaecer voces crítiques que cuestionen el papel que tán faciendo esti añu. La verdá ye que, pal potencial qu’amosaben a entamos de temporada, nun tán respondiendo como s’esperaba y entá tamos por ver la so victoria nesti 2016.

Tamién hai tensión na zona más alta la tabla, onde los dos pilotos de Mercedes tán separtaos por namás un puntu, que pue desapaecer (o medrar) na carrera’l domingu. Hai un par d’años víemos a Hamilton salvar los muebles dempués de quedar fuera de clasificación el sábadu, pero paeznos qu’esti añu va tar más enfotau no que pueda facer el so compañeru que nel restu de coses.

Tola atención (y les esperances pa una victoria non-plateada) ta puesta en Red Bull. Ricciardo yá sabe lo que ye ganar en Hungría, féxolo en 2014, ya’l so compañeru d’equipu ta apuntando maneres p’apuntase otra victoria nesti 2016. Siendo como ye Red Bull el favoritu pa poner n’apuros a Mercedes, paeznos que’l tar sollertes de lo que fagan en pista ta más que xustificao.

Taremos amás pendientes del tiempu que faga, yá que, como diximos enantes, les tormentes nun son rares nesta época del añu nel circuitu y eso pue ayudar a que veamos otra bona carrera.

Gran Premiu de Gran Bretaña – Análisis por equipos

Como yá pasara en Barcelona, dempués del Gran Premiu de Gran Bretaña, llegaron los test de Silverstone. Güei y mañana vamos poder ver a los equipos coles futures estrelles de la Fórmula Uno, y dalgún qu’otru veteranu, y tamién a Pirelli que güei tinía a Wehrlein al volante pa facer pruebes coles sos gomes de cara a 2017.

Pero nun tamos equí pa falar de los test, si non p’analizar, lo que fexo cada equipu’l domingu pasáu:

– Mercedes: Dempués de cuatro victories en cinco carreres, paez que yá toos entamen a pensar qu’a Hamilton nun-y va costar muncho pasar perriba’l so compañeru d’equipu como yá fexo l’añu pasáu. Y la verdá ye que esti fin de selmana pasáu Hamilton diba con una ración extra de velocidá. Dempués de la carrera en Silverstone, cola penalización de Rosberg, dambos pilotos tán separtaos namai que por ún puntu, y tol mundu-y da la victoria a Hamilton nel prósimu gran premiu…

– Red Bull: Naide nun tinía duldes de que Ricciardo yera un bon pilotu, y más dempués de velu superar a Vettel na so temporada xuntos na escudería del toru colloráu. Siguimos ensin tener duldes, pero podemos confirmar yá que’l so compañeru agora, Verstappen, lu ta poniendo en valor al tar faciéndolo meyor qu’elli entá, hasta agora. Volvió a subise al podiu esti fin de selmana, dempués de facelo yá n’Austria, y foi quién a poner a Rosberg en problemes. Anque quedó terceru, cola penalización de Rosberg, acabó siendo segundu. El so compañeru, foi cuartu y sigui necesitáu d’un podiu que nun lu dexe na solombra del holandés.

– Ferrari: Tercer cambiu de caxa de cambios pa Vettel y carrera bastante discretina pa dambos pilotos. L’alemán foi penalizáu por un incidente con Massa con cinco segundos que nun afeutaron la so posición final, novena. Räikkönen tuvo meyor suerte, quedando quintu ensin dar muncha guerra.

– Force India: Ensin facer milagros, Force India consiguió facer una bona carrera esti domingu, quedando Pérez sextu y Hülkenberg séptimu. Nun ye tanto como consiguir pisar el podiu, dalgo qu’entá Hülkenberg nun consiguió esta temporada, pero Force India nun pue dexar de sumar puntos en carreres que nun-yos favorecen, como yera esta. Bon trabayu.

– Toro Rosso: Anque Kvyat tuvo una meyor carrera y menos problemes esti domingu, el so compañeru siguió quedando perriba d’elli, n’octavu puestu, demientres que’l rusu tinía de conformase col últimu puntu disponible. La escudería italiana sigui sumando puntos pocu a pocu, faciendo una bona temporada, a pesar de los cambios na so aliniación de pilotos y de les irregularidaes de Kvyat. Hai quien diz que nun va siguir l’añu que vien, demientres Sáinz yá foi confirmáu por Toro Rosso. La silly season ta a piques d’entamar…

– Williams: Fin de selmana pa olvidar en Williams. Nin Massa nin Bottas fueron quién a quedase nos puntos énte’l públicu de casa y amás dieron una imaxe bien probe. Cuenten con tornar con más fuercia pa Hungría pero la verdá ye que cada vez ta más claru’l pasu atrás de la escudería comparao colo que ficieron l’añu pasáu. Tienen falta ameyorar muncho pa les carreres que queden.

– McLaren: Alonso pasó tol fin de selmana dientro los puntos, calificó entre los diez primeros, pero una vez en carrera, nun foi quien a pasar del puestu décimoterceru ente fallos d’estratexa del equipu y problemes pa mantener el coche dientro la pista. Button tuvo una mala sesión de calificación y pasó tol fin de selmana con problemes, asina que’l so puestu doce nun sorprende. Si acasu queda-y el probe consuelu de quedar perriba’l so compañeru d’equipu otra vez. Sigui la so maldición nel gran premiu de casa.

– Sauber: una amuesa de la situación na que ta l’equipu ye que nun tean presentes nos test de Silverstone de güei y mañana. El domingu, dempués de recuperar a Ericsson tres del so accidente del sábadu, acabó Nasr namás, faciendo una bona carrera dientro de lo llimitáu que ta’l coche. Ericsson aguantó menos de la mitá la carrera dempués de que’l so coche presentare dellos problemes que nun-y dexaron continuar.

– Haas: L’equipu norteamericanu siguen colos sos altibaxos, faciendo perbones carreres unes veces ya quedando fuera los puntos o acabando con un solu coche n’otres. En Silverstone, sólo acabó Gutiérrez y foi décimosextu.

– Renault: Otra carrera ensin puntos ya ensin pilotos en pista. Renault continúen coles sos probes actuaciones (anque naide nun-yos pide munchos más viendo cómo terminaren l’añu pasáu). De xuru yá tán pensando no que puen dar de sí pa 2017. Siéntense voces que dicen que Palmer podría nun siguir, anque paez que Magnussen tien l’asientu aseguráu. Nun mos paez que, nesti casu, el problema seyan los pilotos si non más bien el fechu de que Renault entamó con desventaxa esta temporada. Tolo que seya siguir palante ya aguantar va ser bueno pa ellos nesti 2016.

– Manor: Dempués de la felicidá d’Austria, llegó la deceición de Silverstone con dambos coches fuera de carrera. La realidá de Manor ye que siguen dando pasinos pequenos y tienen de pensar (y nosotros tamién) de que tolos pasos alante, mesmo que-yos pasa a Renault, son positivos pa ellos, y más cuntando col fechu de que yá nun son l’últimu equipu de la parrilla. Tienen de lluchar por defender esi puntu que-yos pon perriba Sauber nel mundial de constructores porque pa ellos va ser daqué mui importante pensando en 2017.

Dempués de los test en Silverstone, la Fórmula Uno dexa pasar unos díes enantes de tirar pa Budapest pa la undécima carrera del añu y a la espera de ver si Hamilton se fai col control del campeonatu o Rosberg despierta y recupera la bona racha cola qu’entamare la temporada.

Gran Premiu de Gran Bretaña 2016 – Carrera

Teníemos abondes esperances en que’l Gran Premiu de Gran Bretaña fuera unu d’esos que queden pa l’alcordanza, cuando se fai memoria de lo vivío en dellos años de la Fórmula Uno. Nun tenemos claro qu’esti vaiga ser el casu, anque pue dicise que d’entamu pintaba bien.

Quedaben namai que venti minutos pa que s’apagaren les lluces ya empecipiare la décima carrera de la temporada, cuando los cielos ingleses s’abrieron pa dexar pasu a un bastiazu que dexo bien moyada la pista y a la xente qu’esperaba que llegare la hora de salir a pista. Muncha xente frotaba les manes pensando no qu’eso significaba: agua en pista suel ser sinónimu de coses interesantes pa ver. Pero tamién suel ser sinónimu de munches duldes sobre si ta bien o no pa correr. Ya eso fexo que la carrera tuviere d’entamar detrás del coche seguridá. Como casi siempres, esto nun prestó a munchos, demientres otros dicíen que yera lóxico. De toles formes, cinco vueltes dempués, víemos por fin a los pilotos pisar l’aceleaor, anque ensin munches floritures: al pocu ratu Hamilton yá tenía una ventaya bultable y diba caltenela hasta’l final.

Lo más entretenío vieno de la mano de les salides del pista y los trompos, gracies al agua qu’entá quedaba, y les lluches ente Rosberg y Verstappen pol segundu puestu del podiu. Per detrás, Vettel sufriendo (tuvo un fin de selmana bastante malu, tornó a tener problemes cola caxa cambios y tuvo penalización pal domingu, y amás, en carrera, foi penalizáu con cinco segundos sobre’l so tiempu por un incidente con Massa), Ricciardo, que nun foi quien a tar a l’altura del so compañeru d’equipu, y Räikkönen, peleau colos Williams y col agua.
En xeneral nun foi una carrera entretenida, si acasu al principiu, y sobre too cuando marchó’l coche seguridá y una bayura pilotos entró a cambiar gomes, faciendo del pit lane un caos nel que los comisarios nun metieron mano. Onde sí la metieron foi na decisión de Mercedes de “chiva-y” a Rosberg la solución a un problema cola caxa cambios que nun lu dexaba meter séptima. Costó-yos diez segundos de penalización que lu fixeron cayer al tercer puestu, en beneficiu de Verstappen, que quedó finalmente segundu.

Tornó abrise’l debate sobre lo útil o non que son les prohibiciones de los mesaxes de radio: ayeri foi obvio qu’a Mercedes-y compensaba más dexar a unu de los sos pilotos terceru diciendo-y lo que tinía de facer pa solucionar el so problema nel coche, enantes de nun dicir nada y quedar fuera de carrera.

¿Ye necesario llegar a esti puntu? Cada vegada hai más xente que piensa qu’estes regles nun valen pa nada, pero tamién qu’hai falta de dar más autonomía a los pilotos nel coche. El problema vien cuando unu d’ellos tien d’enfrentase a milenta combinaciones de botones nel so volante ya interpretar lo que tola teunoloxía desarrollada hasta agora-y pide en cada momentu. Ta claro que naide nun queremos ver a pilotos que son marionetes dirixíes dende’l muru ensin nengún tipu de capacidá de decisión, pero tamién ye verdá qu’estos pilotos conducen máquines cada vuelta más sofisticaes y que non siempre son quién a dar col puntu necesariu pa resolver un problema tando en pista (víemoslo en Baku onde énte’l mesmu problema, Hamilton nun foi quien a resolver lo que-y pasaba al coche demientres Rosberg sí, y nun pudieron recibir ayuda nenguna dende’l muru). De xuru que siguiremos falando muncho d’esti tema, que ta lloñe de quedar solucionáu.

No que cinca’l restu d’equipos, McLaren nun cumplió les espeutatives, quedando fuera de los puntos con dambos coches dempués de tar ente los diez primeros casi tol fin de selmana; Williams tuvo munchísimos problemes demientres tola carrera y quedaron tamién fuera de los puestos d’arriba, y Sauber, dempués d’una calificación onde nun pudieron cuntar con Marcus Ericsson que tuvo un accidente bien feu na tercera práutica, sólo terminó con Nasr. Fálase de que nun tardando van anunciar la compra del equipu por dalguna empresa, pero entá nun se sabe si va ser parte l’equipu o van facese cargu de too. La verdá ye que cada carrera amosen más dificultaes y paez qu’esa compra podría ser una solución pa ellos.

Manor nun tuvo tanta suerte como la selmana pasada n’Austria, y tanto Wehrlein como Haryanto quedaron fuera, dambos por salida de pista. Otros que van necesitando que llegue’l parón de branu son Renault, que quedaron tamién con dambos coches fuera de carrera. Haas nun tuvo demasiada suerte, ellos mesmos reconocíen que la lluvia de xusto enantes de la carrera-yos rompiera totalmente la estratexa: Gutiérrez acabó nel puestu dieciséis y Grosjean nun terminó.
Meyor-yos fue a Toro Rosso, que tornaron a puntuar colos sos dos pilotos, Sáinz otra vuelta perriba Kvyat, que sigui ensin despuntar dempués de pasar de Red Bull a Toro Rosso hai un par de meses.

La próxima parada ye Hungría dientro dos selmanes, penúltimu gran premiu enantes de les vacaciones pa la Fórmula Uno, y una de les carreres que siempre suel dar que falar. Taremos sollertes.

Equí vos dexamos tolos datos de la calificación del sábadu y la carrera d’ayeri:

Clasificación

Pos Pilotu Tiempu
1 Lewis Hamilton 1:29.287
2 Nico Rosberg 1:29.606
3 Max Verstappen 1:30.313
4 Daniel Ricciardo 1:30.618
5 Kimi Räikkönen 1:30.881
6 Sebastian Vettel 1:31.490*
7 Valtteri Bottas 1:31.557
8 Carlos Sáinz 1:31.989
9 Nico Hülkenberg 1:32.172
10 Fernando Alonso 1:32.343
11 Sergio Pérez 1:31.875
12 Felipe Massa 1:32.002
13 Romain Grosjean 1:32.050
14 Esteban Gutiérrez 1:32.241
15 Daniil Kvyat 1:32.306
16 Kevin Magnussen 1:37.060
17 Jenson Button 1:32.788
18 Jolyon Palmer 1:32.905
19 Rio Haryanto 1:33.098
20 Pascal Wehrlein 1:33.151
21 Felipe Nasr 1:33.544

*Marcus Ericsson nun participó na calificación dempués del so accidente na tercera práutica. Vettel tuvo penalización de cinco posiciones por cambiu na caxa cambios. Empezó nel puestu once’l domingu.

Carrera

Pos Pilotu Tiempu Vuelta
1 Lewis Hamilton 1:34:55.831 52
2 Max Verstappen +8.250s 52
3 Nico Rosberg +16.911s 52
4 Daniel Ricciardo +26.211s 52
5 Kimi Räikkönen +69.743s 52
6 Sergio Pérez +76.941s 52
7 Nico Hülkenberg +77.712s 52
8 Carlos Sáinz +85.858s 52
9 Sebastian Vettel +91.654s 52
10 Daniil Kvyat +92.600s 52
11 Felipe Massa +1 vuelta 51
12 Jenson Button +1 vuelta 51
13 Fernando Alonso +1 vuelta 51
14 Valtteri Bottas +1 vuelta 51
15 Felipe Nasr +1 vuelta 51
16 Esteban Gutiérrez +1 vuelta 51
17 Kevin Magnussen NT 49
18 Jolyon Palmer NT 37
NC Rio Haryanto NT 24
NC Romain Grosjean NT 17
NC Marcus Ericsson NT 11
NC Pascual Wehrlein NT 6

*NT: Nun terminó
**Nico Rosberg foi penalizáu con 10s sobre’l so tiempu mesmo que Sebastian Vettel.

Gran Premiu de Gran Bretaña 2016 – Previa

Entá tamos recuperando del Gran Premiu d’Austria y de tolos comentarios que salieron d’elli (dempués del choque de Hamilton y Rosberg, Mercedes yá dixo que nun diben tirar d’órdenes d’equipu pa meter en vereda a los sos pilotos, pero que diben a ser más estrictos con ellos) llegamos a Silverstone con delles novedaes, como la renovación de Räikkönen pa otru añu en Ferrari.

Ye esti un fin de selmana que siempre emociona a pilotos y fans, y ayeri quedara claro otra vuelta demientres la rueda de prensa de los pilotos, onde taben los tres británicos que formen parte de la parrilla d’esti añu, Jenson Button, Lewis Hamilton y Jolyon Palmer. Anque en situaciones distintes, con Hamilton n’una situación bastante más agradable que los otros dos, de xuru qu’esti gran premiu va ser especial pa toos ellos.

Güeyu al tiempu, espérase agua pa cásique tol fin de selmana, poro munchos de los equipos van intentar saca-y partíu a eses condiciones (como yá fixeren n’Austria hai dellos díes). Y güeyu especial a lo que pueda facer Manor neses circunstancies. Yá pasaron a Sauber na clasificación d’equipos, dexando n’evidencia que nun son l’equipu más floxu de la parrilla. McLaren van con dos tokens más, tamién esperando ser quien a repitir el resultáu d’Austria.

Amás, vamos tener a Occon nel Renault de Magnussen, y a Leclerc nel de Gutiérrez en Haas, aprovechando la oportunidá p’amosar les sos cualidaes pa la Fórmula Uno pa quien pueda tar interesáu. Alcordaivos qu’Ocon ta compitiendo nel DTM de la mano de Mercedes y Leclerc ta en GP3 con ART GP.

Ye hora de ponese manes a la obra, entama’l Gran Premiu de Gran Bretaña 2016 en Silverstone.