Category: Temporada 2016

Gran Premiu de Singapur 2016 – Análisis por equipos

Cola mayoría de los equipos yá de vuelta nes sos sedes y colos pilotos desperdigaos pol continente asiáticu ya’l européu, vamos facer un repasu a lo que cada escudería dio de sí nel pasáu gran premiu de Singapur:

– Mercedes: Podemos nomalos los triunfadores de la nueche, anque paeza que ye lo que siempre dicimos, pero teniendo en cuenta que corríen n’un circuitu onde suelen tener más problemes pa dominar, el domingu vímoslos lluchar pa poder pasar perriba de los sos rivales. Cuando’l coche nun marca tanto la diferencia tamién saben lluchar. Nun vamos repetir que la carrera de Rosberg foi de quitase’l sombreru y que Hamilton, anque más baxu, tamién fexo una bona carrera. La llucha pol campeonatu de pilotos sigue más qu’abierta.

– Red Bull: Yeren la principal amenaza pa Mercedes, y asina lo demostraron el domingu. Anque Verstappen nun anduvo mui finu si lu comparamos con Ricciardo, la verdá ye qu’en conxuntu l’equipu respondió a les espectatives que se teníen de la so actuación nesti gran premiu. Les últimes vueltes de Ricciardo intentando alcanzar a Rosberg son de los más reseñable d’esta carrera y cásique de los últimos años.

– Ferrari: Vettel víase torgáu’l sábadu por un problema na suspensión que lu facía salir últimu al nun poder marcar un tiempu competitivu mientres llegaba a box col coche sobre tres ruedes. Paecía que la so carrera taba sentenciada y en Ferrari tirábense de los pelos pensando nun fin de selmana nel que sí qu’había oportunidaes de lluchar polo más alto del caxón, pero conociendo al alemán (y el fechu de que yá lo fexo otra vez) sabíase que nun diba ser tan catastrófico. Y anque les actuaciones de Ferrari siguen sabiendo a poco (cuartu y quintu nesta carrera) teniendo en cuenta les circunstancies pueden respirar tranquilos, anque cola atención puesta nes decisiones a tomar nes estratexes de carrera, que siguen siendo la so debilidá.

– McLaren: A estes altures de la temporada yá vien siendo vezu qu’un McLaren termine la carrera ya’l otru quede fuera enantes de tiempu por problemes de dalgún tipu nel coche: o perda de potencia, o accidente, o lo que se tercie. Nesta ocasión, y por tercera vez en cinco carreres, tocaba-y a Jenson Button. Los incidentes de la salida cebáronse con elli tamién y na vuelta 43 tuvo que retirar el coche pesie a entrar en boxes pa intentar siguir en pista. El so compañeru, dempués d’una perbona salida na que llegó a ser quintu, consiguía terminar séptimu y sumar puntos pa la escudería, que sigue abriendo brecha con Toro Rosso.

– Force India: Dalgo asemeyao a lo de McLaren suel pasa-yos a Force India. Dicíemos na previa qu’esti yera un circuitu que se-yos da bien y Pérez pudo demostralo dempués de salir con ocho posiciones de penalización. Quedó octavu. El so compañeru nin siquiera llegó a la primer curva, y foi’l mayor afeutáu del incidente na salida, onde se convirtió nel rellenu d’un sandwich formuleru que lu dexó fuera de carrera. Pa aliviu de Force India, Williams nun puntuó, asina que siguen tando vivos na so llucha con ellos pol cuartu llugar nel campeonatu de constructores, un puntu perriba la escudería inglesa.

– Toro Rosso: Dempués de munches carreres víemos a Kvyat brillar. Un novenu puestu puede saber a pocu, pero teniendo en cuenta les sos males actuaciones dende que se “mudara” a Toro Rosso, esta carrera, esperamos, pue da-y un emburrión de cara al so futuru. El so compañeru nun pudo imitalu y quedó dafechu fuera los puntos, en décimocuartu puestu con problemes nel MGU-K.

– Renault: Nun tamos avezaos a ver esta temporada’l color amariellu de Renault dientro los puntos, pero Singapur ye una esceición pa too. Magnussen dicía que se-y facía increyible lo bien que diba’l coche y que casi-y sabía a poco’l décimu puestu que consiguió. Esi puntín va vali-yos bien na so defensa escontra Manor nel campeonatu de constructores. Los seis puntos que los separen deberíen ser suficientes pa que Renault asegure’l so novenu puestu. Palmer, pel so llau, anduvo perdíu pelos puestos baxos demientres tola carrera y sigui na cuerda floxo con respeutu a lo que puea pasar col so futuru en Renault. Acabó décimoquintu.

– Haas: Grosjean nun pudo nin salir por problemes col brake-by-wire, y Gutiérrez volvió a quedase a les puertes de puntuar. Ensin duldes foi un gran premiu pa olvidar pa la escudería norteamericana, pero teniendo en cuenta que yera la so primer vez, el fechu de ser casi quien a puntuar tendría de da-yos motivos, a lo menos, pa sorrir un poco. Cada carrera ye un descubrimientu pa ellos, y ta claro que nun van poder triunfar en toes, porque nin siquiera los equipos más consolidaos y poderosos lo faen. Empezaben el campeonatu col oxetivu d’acabar carreres y tán viéndose capaces de puntuar, asina que pue dicise que la temporada de Haas ta siendo bien positiva.

– Williams: Nun ta siendo’l so añu. Ente les carreres floxes que tienen y qu’encima nun paez que la suerte tea del so llau, en Singapur víemoslos fuera de los puntos otra vegada más. Massa a lo menos pudo terminar la carrera, siendo décimosegundu, pero Bottas foi’l tercer afeutáu del incidente de la salida y anque paró y pudo continuar delles vueltes, terminó por abandonar na 35.

– Sauber: Dambos coches terminaron y eso yá ye un llogru pa la escudería suiza. Nun puntuaron pero a lo menos nun se vieron afeutaos por nengún incidente en pista nin nes paraes. Nasr consiguió acabar per delantre’l so compañeru siendo décimoterceru, demientres qu’Ericsson foi décimoséptimu, per detrás de Pascal Wehrlein.

– Manor: Nun foi quiciás el gran premiu más positivu pa ellos. Con dellos incidentes demientres los entrenamientos llibres, paecía que nun diben brillar muncho’l domingu y tuvieron una carrera discreta, anque consiguieron colocar a un Sauber per detrás d’unu de los suyos. Ocon nun lo ta faciendo mal teniendo en cuenta lo que lleva nel coche y les posibilidaes qu’esti ufre, pero queda-yos entá muncho que trabayar. Esi puntín nel mundial de constructores val el so pesu n’oru.

Gran Premiu de Singapur 2016 – Carrera

Nun fin de selmana con más incertidumes d’avezaes nun salimos defraudaos n’absoluto. Nun circuitu onde yá sabíemos que los Mercedes nun son tan dominantes como lo vienen siendo no que va de temporada vimos una carrera na que munchos pilotos sacaron lo meyor d’ellos pa regalanos una carrera d’eses de les que presta ver y revisar pola imposibilidá de garrar de primeres tola acción qu’hebo nella.

Yá’l sábadu, na clasificación, víase al Red Bull de Ricciardo colase p’ente los Mercedes y na primer llinia de salida. Y eso que paecía qu’a lo menos Rosberg esta vez sí qu’acertaba colos botones pa configurar el coche de la forma más afayadiza pa esti circuitu (non ensin llevar un sustu na primer sesión d’entrenamientos) y llevaba la pole. Na otra cara de la moneda, a Hamilton siguía faciendose-y cuesta arriba l’adautación a esti circuitu, pero nada que ver colos problemes del añu pasáu. Toro Rosso asomaba na primer mitá de la tabla demostrando qu’esti nun yera un circuitu onde la unidá de potencia xugaba un papel tan protagonista.

El domingu, la salida del gran premiu foi determinante pa munchos pilotos, especialmente pa Nico Hülkenberg, que foi’l gran perxudicáu. El so intentu d’adelantar posiciones viose torgáu poles ansies de los pilotos que tenía a los llaos y a los que quiciás nun tuvo mui en cuenta a la hora metese, resultando col so coche atrapáu ente ellos dos y provocando que perdiera’l control del mesmu y terminara mirando al sen contrariu y col monoplaza estrozáu. Otra desilusión que sumar a la llarga coleición del alemán esta temporada. De toles formes, nun foi l’únicu que tuvo que llamentar esi accidente: Bottas y Button pudieron aguantar más en pista que’l pilotu de Force India, pero tuvieron de parar bien llueu (na primer vuelta) al vese afeutaos pol incidente, pero dambos tuvieron d’aparcar los coches nel garaxe enantes de ver la bandera a cuadros.

Rosberg nun tuvo solu nin foi una carrera fácil pa elli si non tolo contrario. Ye por eso que ye entá más valoratible lo que fexo. Ricciardo tuvo detrás d’elli tol gran premiu, dende bien ceo, y en nengún momentu dexó de lluchar por la victoria. Les últimes vueltes del gran premiu fueron quiciás de les más emocionantes que tenemos visto nesta temporada: Rosberg tinía la opción d’entrar en boxes pa cambiar les gomes y dir hasta’l final con elles nueves, pero la diferencia con Ricciardo yera pequeña como pa facela funcionar. Asina que decidió tirar, xestionar los diecinueve segundos llargos que tenía de marxe pa llegar hasta’l final, curiando con mimu unos frenos que-yos veníen dando problemes de sobrecalentamientu a les dos fleches platiaes. Na última vuelta, Ricciardo taba a menos d’un segundu y con DRS, pero Rosberg yá tenía la carrera nes manes aplicando en cada xiru la desixencia precisa.

Hai carreres que definen a pilotos. De fechu, hai xente que diz qu’en dellos circuitos estrémense los buenos pilotos de los normalinos. Esti domingu en Singapur pudimos ver a Nico Rosberg pilotando pol campeonatu del mundo. Son munches les voces que se tienen xuntao pa dicir que ye un pilotu que nun lo da, y teniendo al so llau a Hamilton, les comparaciones son odioses; pero’l domingu víemos al alemán xestionar una carrera como la de Singapur, de les más dures (si non la que más) del calendariu, con sangre fría y sabiendo en cada momentu qué pasu dar (llegando incluso a cortar a los inxenieros cuando-y daben datos de la carrera pa siguir concentráu). Asina ye como se ganen campeonatos del mundu. A Hamilton nun-y quedó otra que, dempués de quedar terceru, felicitar al so compañeru. Mereciólo yá dende’l vienres.

Tres d’ellos dos, la engarradiella yera la de Hamilton y Räikkönen. Anque’l so espectáculu quiciás nun foi tan emocionante, tuvo bien entretenío velos adelantase y ye d’aplaudir la estratexa de Mercedes p’adelantalos na parada en boxes, y otra vez movimientos poco claros na escudería Maranello que fexo perder a Raikkonen probablemente una posición por nun entrar primero una vez lo ficiere Lewis. Ye lo bueno que tienen carreres tan desixentes como Singapur, que la superioridá de Mercedes reduzse y vense obligaos a dir más allá de lo rápidos que seyan pa pensar n’estratexes a la hora superar a los sos rivales, y ye ehí onde tienen que demostrar tamién, y tán demostrando que tampoco nun son mancos nesi aspectu.

El restu del grupu de los diez primeros diben ocupalu Vettel, que saliendo últimu consiguió facese col quintu llugar; Verstappen, qu’al contrario de lo que munchos creyíamos, nun brilló tanto como s’esperaba (anque eso nun nos quitó dellos adelantamientos pa enmarcar); Alonso, qu’otra vuelta foi quién a colocar el so McLaren nos puntos dempués d’una bona salida que lu colocaba quintu; Pérez, que dempués de ser penalizáu con ocho posiciones en pista por ignorar les banderes amarielles y por nun reducir velocidá demientres la calificación el sábadu, consiguió recuperase pa terminar octavu; Kvyat, que zarró munches boques esti fin de selmana faciendo un bon trabayu y poniéndose al altor del so compañeru Sáinz que nun tuvo tanta suerte y nun pudo puntuar anque pintaba bien el sábadu; y nel puestu diez, una de les sorpreses de la carrera, el Renault de Kevin Magnussen. La escudería francesa púnxose les piles dempués de que Manor dixera que son el so oxetivu y consiguió sumar otru puntín d’oru.

Per detrás, Gutiérrez, que sigue ensin consiguir metese nos puntos, quedando otra vuelta a les puertes. Massa sedría décimosegundu, n’otru fin de selmana pa olvidar na escudería Williams; Nasr consiguió pasar perriba’l so compañeru quedando décimoterceru, con Ericsson décimoséptimu. Palmer namás pudo ser décimoquintu per delantre los Manor, que quedaron décimosextu (Wehrlein) y décimoctavu (Ocon).

La mayor deceición del día foi la de Romain Grosjean que nin siquiera pudo empezar la carrera por problemes col brake-by-wire qu’impidieron que pudiera siquiera ponese na parrilla de salida.

Equí vos dexamos tolos resultaos del sábadu y domingu:

 

Clasificación

Pos Pilotu Q1 Q2 Q3
1 Nico Rosberg 1:45.316 1:43.020 1:42.584
2 Daniel Ricciardo 1:44.255 1:43.933 1:43.115
3 Lewis Hamilton 1:45.167 1:43.471 1:43.288
4 Max Verstappen 1:45.036 1:44.112 1:43.328
5 Kimi Räikkönen 1:44.964 1:44.159 1:43.540
6 Carlos Sainz 1:45.499 1:44.493 1:44.197
7 Daniil Kvyat 1:45.291 1:44.475 1:44.469
8 Nico Hulkenberg 1:46.081 1:44.737 1:44.479
9 Fernando Alonso 1:45.373 1:44.653 1:44.553
10 Sergio Perez 1:45.204 1:44.703 1:44.582
11 Valtteri Bottas 1:46.086 1:44.740
12 Felipe Massa 1:46.056 1:44.991
13 Jenson Button 1:45.262 1:45.144
14 Esteban Gutierrez 1:45.465 1:45.593
15 Romain Grosjean 1:45.609 1:45.723
16 Marcus Ericsson 1:46.427 1:47.827
17 Kevin Magnussen 1:46.825
18 Felipe Nasr 1:46.860
19 Jolyon Palmer 1:46.960
20 Pascal Wehrlein 1:47.667
21 Esteban Ocon 1:48.296
22 Sebastian Vettel 1:49.116

Carrera

Pos Pilotu Tiempu Vuelta
1 Nico Rosberg 1:55:48.950 61
2 Daniel Ricciardo +0.488 61
3 Lewis Hamilton +8.038 61
4 Kimi Räikkönen +10.219 61
5 Sebastian Vettel +27.694 61
6 Max Verstappen +71.197 61
7 Fernando Alonso +89.198 61
8 Sergio Perez +111.062 61
9 Daniil Kvyat +111.557 61
10 Kevin Magnussen +119.952 61
11 Esteban Gutierrez +1 vuelta 60
12 Felipe Massa +1 vuelta 60
13 Felipe Nasr +1 vuelta 60
14 Carlos Sainz +1 vuelta 60
15 Jolyon Palmer +1 vuelta 60
16 Pascal Wehrlein +1 vuelta 60
17 Marcus Ericsson +1 vuelta 60
18 Esteban Ocon +2 vueltes 59
NC Jenson Button NT 43
NC Valtteri Bottas NT 35
NC Nico Hulkenberg NT 0
NC Romain Grosjean NS 0

Gran Premiu de Singapur 2016 – Previa

Les carreres que nun son mítiques, qu’entá nun se ficieron güecu na hestoria de la Fórmula Uno, tienen d’ufrir daqué a la xente pa qu’añu tres d’añu vaigan al circuitu a veles o tean pendientes d’elles na televisión. Esi ye’l casu de Singapur, que por méritu propiu ta incluyida ente una de les carreres esperaes de la temporada. Quiciás ye polo diferente, quiciás porque suel dar oportunidaes a los d’atrás o quiciás pola demanda que-yos fai a los pilotos y coches, nun sabemos que ye lo que más atrai, pero Singapur ye un gran premiu de los de frotase les manes.

Aterrizamos en Marina Bay cola llucha pol campeonatu de pilotos bien apertada: Hamilton y Rosberg tán separtaos agora mesmo por dos puntos. Esti ye’l circuitu que más duldes llevanta en Mercedes, onde peor lo pasaron l’añu pasáu y onde paez que los nrivales tan más cerca o incluso enriba d’ellos. ¿Detectaríen yá la causa de los problemes del añu?  ¿Sedríen quien a igualo? Amás, tol equipu andará pendiente d’ensayar les salides, dalgo qu’esti añu se-yos ta atascando. Van vese amenazaos de xuru por Red Bull, n’un circuitu nel que van vese más beneficiaos y por Ferrari con ganes de repetir el triunfu del añu pasáu y aselar asina la so necesidá de victoria.

Pela zona media, Williams sigui bregando con Force India pol cuartu puestu de pilotos, y Force India tiende a ser un equipu que funciona bien en Singapur, lleven puntuando dende 2010 y dalguna vez quedaron ente los cinco primeros. Pel so llau Williams tampoco queda atrás en Marina Bay, polo que la batalla ta asegurada.

Más abaxo, Toro Rosso y McLaren van tar tamién engarraos, nel casu de los británicos col conocimientu de que son en Singapur más fuertes de lo que son en Monza. En Toro Rosso empiecen a tar necesitaos de volver a los puntos dempués d’un gran premiu d’Italia bastante negativu pa dambos pilotos y quieren parar la cayida llibre que supón el estancamientu nel propulsor.

Haas aterriza per primera vez en Singapur suponemos que cola intriga de ver si van ser quién a responder a les demandes d’unu de los circuitos más duros del campeonatu. Pel llau de Sauber, siguen reforciándose a nivel de personal, de xuru yá pensando na estratexa pa 2017, pero cola esperanza d’entá poder facer dalgo pa ponese per delantre de Manor, qu’hai unos díes dicíen que’l so oxetivu agora nun ye tanto defendese de Sauber como intentar alcanzar y pasar a Renault nel campeonatu constructores. Tiénenlos a tiru, y Singapur pue poné-yoslo más fácil entá.

Abaxo podéis atopar les gomes que van usar los pilotos pa esti gran premiu y equí tenéis más información sobre esti circuitu.

singapore-tyres-2016

Gran Premiu d’Italia 2016 – Análisis por equipos

Queden menos de dos selmanes p’aterrizar en Singapur, pero entá queden delles coses que revisar en Monza. Vamos echar una güeyada a lo que ficieron los equipos nel gran premiu d’Italia del domingu pasáu.

– Mercedes: Díbemos convencíos de que diben a ser los dominadores de tol fin de selmana ya cuntábemos con que fuere Hamilton quien consiguiese la victoria’l domingu polo visto nes primeres sesiones. Ensin embargu, víemoslu otra vez fallar na salida (paez que nun tien fácil arreglu el problema o problemes col embrague del Mercedes) y a Rosberg aprovechase d’ello. Dempués d’eso, la carrera del alemán foi bien tranquila, demientres que pa Hamilton foi un poco más entretenida, quedando sextu na salida pa recuperar darréu y terminar segundu. Namás dos puntos separen agora a los dos pilotos.

– Ferrari: De vuelta a la realidá del restu d’equipos, Ferrari consiguió dar una alegría a los tifosi con Vettel nel tercer puestu y Kimi detrás d’elli. Nun ye a lo qu’aspiren, pero un podiu en Monza vistíu de rosso siempre paga la pena. Arrivabene comentaba qu’entá nun daben nada por perdío, y paeznos que tien de ser la persona más optimista dientro l’equipu porque nun nos paez que vaigamos a ver coses mui distintes d’equí a final de temporada. De momento, siguen per detrás de Red Bull nel campeonatu de constructores.

– Red Bull: Como ellos mesmo dixeron, minimizaron daños. Nun foi la so meyor carrera, pero teniendo en cuenta que nun corríen n’un circuitu que-yos beneficiare y onde la potencia de la PU yera importante, quedar dientro los puntos yera’l mal menor. Ricciardo foi unu de los protagonistes del gran premiu pol so adelantamientu a Bottas, una de les poques coses vistoses que nos dexó la carrera. Riccardo acabó quintu con Verstappen séptimu.

– Williams: Dempués de tar nel puntu mira pol movimientu de pilotos, Williams consiguía meter dambos coches nos puntos, anque Bottas almitía que taben deceicionaos porque cuntaban con poder alcanzar el podiu. Nun foi asina: elli quedaría sextu ya’l so compañeru Felipe Massa novenu.

– Force India: Siguen batallando con Williams pol campeonatu de constructores y anque vuelven a tar per detrás, nun dexaron de sumar puntos con dambos pilotos. Suponemos que cada vez-yos cueste más facer frente a les posibles meyores que traigan el restu equipos pero nun duldamos que van siguir bregando na so llucha particular con Williams. Pérez terminó octavu y Hülkenberg, décimu.

– Haas: Anque ensin puntos, esta foi una bona carrera pa Haas. Ensin escaecer que por primer vegada consiguieron entrar en Q3 el sábadu con Esteban Gutiérrez, el domingu fueron quien a presentar batalla en pista y quedar a piques de metese ente los diez primeros. Grosjean foi undécimu y Gutiérrez acabó nel puestu trece.

– McLaren: Otros que tuvieron nel puntu mira tol fin de selmana: empezaben la carrera col convencimientu de que nun diben poder sacar muncho de Monza por ser unu de los peores circuitos pa ellos. Puntos nun sacaron, pero Alonso consiguió facer, a última hora dempués de montar gomes nueves a falta dos vueltes, la vuelta rápida de carrera polo que se fexo col troféu col que se premia al pilotu que la consigue en cada gran premiu. Nun fueron too maraviyes, ya l’asturianu víase torgáu nel pit stop, dalgo que nos regaló dalgún qu’otru mesaxe de radio al equipu, y pasáu en pista pol so compañeru. Button terminó décimosegundu y Alonso décimocuartu.

– Toro Rosso: Cuando sintimos falar a Sáinz notamos daqué frustración nes sos pallabres y les ganes de tornar a puntuar de siguío. Monza foi pa ellos unu de los peores grandes premios, y d’eso ye muestra que Sáinz sólo pudiera ser décimoquintu ya’l so compañeru nin siquiera pudiere terminar la carrera.

– Sauber: De xuru qu’a la escudería ya se-yos ta faciendo llarga la temporada. Nasr quedaría fuera de carrera a los pocos minutos d’empezar la carrera por un choque con Palmer y Ericsson nun pudo más que ser décimosextu. Ensin duldes, nun foi un día de sorrises en Sauber. Y yá sumen unos cuantos…

– Renault: Recuperáu del so accidente de va una selmana en Spa, Magnussen pudo acabar la so carrera sólo per delantre los Manor, que nun ye dicir muncho, pero que teniendo en cuenta lo que ta dando de sí la temporada pa la escudería francesa, ye bastante. Palmer quedaba fuera nel choque con Nasr y suma otru gran premiu nel que nun ye quién a amosar de lo que ye capaz en pista. Ta quedándose ensin oportunidaes ya suenen munchos pilotos pa ocupar el so asientu. Esperamos que pueda facer dalgo por compensalo d’equí a payares.

– Manor: Nun foi de los meyores domingos pa Manor, anque’l sábado dexábanos a Wehrlein otra vez en Q2. L’alemán quedaría fuera de carrera por un problema col coche ya Ocon consiguió acabar, anque nun taba demasiao contentu con como fuera’l fin de selmana. Tóca-yos, otru gran premiu más, siguir trabayando.

Gran Premiu d’Italia 2016 – Carrera

De xuru que la carrera de Monza que vimos esti domingu nun va pasar a la hestoria por ser una de les más entreteníes. Quiciás se fale muncho más de lo que pudimos dir enterándonos no que cinca’l futuru de dellos pilotos. Anque tenéis tola información nel post sobre la silly season d’esti añu, nun ta de más comentar equí delles coses que nos dexó’l fin de selmana n’Italia.

Pa empezar, Massa dexa de ser pilotu de Fórmula Uno. El brasileñu anunciaba’l xueves que dexaba la másima competición de motor dempués de quince años. El so pasu dexaba la puerta abierta a un nuevu pilotu p’acompañar a Valtteri Bottas en Williams. Falábase de Jenson Button, pero esti encargóse’l sábadu de descartar la posibilidá, anunciando que se retiraba de la competición p’asumir un rol más pasivu en McLaren: va ser pilotu de desarrollu y va tar disponible nel momentu en que lu necesiten. Ye más, firmó por dos años, cola opción de garrar el coche otra vez en 2018 si quedare l’asientu de Fernando Alonso llibre. El so sustitutu, ensin novedá nesti aspeutu, va ser Stoffel Vandoorne. Pal restu movimientos, siguiremos esperando.

Volviendo a la carrera en Monza, una vegada más tol interés (salvo exceiciones) tuvo na salida, onde Hamilton perdía tola so ventaxa ganada cola pole del sábadu y se vía adelantáu por hasta cinco coches, acabando sextu. Rosberg féxose cola primer posición y nun la diba dexar en nengún momentu hasta ver la bandera a cuadros. Nun hai quexa nenguna cola actuación del alemán. Sabemos que ye posible que nun fuera quién a quita-y la victoria a Hamilton si esti nun tuviera problema na salida, pero fexo lo que tinía de facer y colócase a dos puntos del so compañeru d’equipu qu’a lo menos consiguió ser segundu. El tercer caxón del podiu diba ser pa Vettel, pa prestu de los tifosi. Dientro de los puntos víemos a los dos Red Bull, a los dos Force India y a los Williams. Grosjean quedaría a un pasu de metese ente los diez primeros, siendo undécimu.

La carrera dexonos detalles como un adelantamientu de Ricciardo a Bottas que nos tuvo aplaudiendo un bon ratu, o’l fechu de qu’Alonso montare gomes nueves a dos vueltes del final pa facese col trofeu pola vuelta rápida de carrera. Nun tuvo una carrera tranquilina yá qu’un error nel semáforu de McLaren retúvolu de más nel box, faciendo que perdiere tiempu, ya llueu víase rebasáu en pista pol so compañeru d’equipu con gomes más nueves que les d’elli. Acabó la carrera décimocuartu, quedando Jenson Button nel puestu doce.

Dientro de lo que vien siendo vezu, nun foi la carrera nin de los Sauber, nin de los Toro Rosso nin tampoco la de Renault. La primer vuelta dexonos dellos abandonos: Nasr y Palmer por un choque ente ellos pol qu’entá se siguen culpando l’ún al otru. Un ratu dempués quedábase paráu Wehrlein. Manor tuviera dellos problemes yá’l sábadu col coche de Ocon, anque esta vegada tocaría-y al so compañeru quedar fuera. De toles formes, l’alemán sigue arrancando aplausos y yá ye la tercera vez qu’entra na Q2 un sábadu cola pista seca.

A los yá mentaos, xuníase Kvyat, n’otra carrera pa olvidar del rusu.

Equí vos dexamos los númberos que nos dexó’l fin de selmana:

Clasificación

Pos Pilotu Q1 Q2 Q3
1 Lewis Hamilton 1:21.854 1:21.498 1:21.135
2 Nico Rosberg 1:22.497 1:21.809 1:21.613
3 Sebastian Vettel 1:23.077 1:22.275 1:21.972
4 Kimi Räikkönen 1:23.217 1:22.568 1:22.065
5 Valtteri Bottas 1:23.264 1:22.499 1:22.388
6 Daniel Ricciardo 1:23.158 1:22.638 1:22.389
7 Max Verstappen 1:23.229 1:22.857 1:22.411
8 Sergio Pérez 1:23.439 1:22.922 1:22.814
9 Nico Hülkenberg 1:23.259 1:22.951 1:22.836
10 Esteban Gutiérrez 1:23.386 1:22.856 1:23.184
11 Felipe Massa 1:23.489 1:22.967
12 Romain Grosjean 1:23.421 1:23.092
13 Fernando Alonso 1:23.783 1:23.273
14 Pascal Wehrlein 1:23.760 1:23.315
15 Jenson Button 1:23.666 1:23.399
16 Carlos Sáinz 1:23.661 1:23.496
17 Daniil Kvyat 1:23.825
18 Felipe Nasr 1:23.956
19 Marcus Ericsson 1:24.087
20 Jolyon Palmer 1:24.230
21 Kevin Magnussen 1:24.436
NC Esteban Ocon NT

Grosjean foi penalizáu con 5 puestos en parrilla por un cambiu de caxa de cambios.

Carrera

Pos Pilotu Tiempu Vuelta
1 Nico Rosberg 1:17:28.089 53
2 Lewis Hamilton +15.070 53
3 Sebastian Vettel +20.990 53
4 Kimi Räikkönen +27.561 53
5 Daniel Ricciardo +45.295 53
6 Valtteri Bottas +51.015 53
7 Max Verstappen +54.236 53
8 Sergio Pérez +64.954 53
9 Felipe Massa +65.617 53
10 Nico Hülkenberg +78.656 53
11 Romain Grosjean +1 vuelta 52
12 Jenson Button +1 vuelta 52
13 Esteban Gutiérrez +1 vuelta 52
14 Fernando Alonso +1 vuelta 52
15 Carlos Sáinz +1 vuelta 52
16 Marcus Ericsson +1 vuelta 52
17 Kevin Magnussen +1 vuelta 52
18 Esteban Ocon +2 vueltes 51
NC Daniil Kvyat NT 36
NC Pascal Wehrlein NT 26
NC Jolyon Palmer NT 7
NC Felipe Nasr NT 6

Gran Premiu d’Italia 2016 – Previa

Bien nos presta, dempués de cuatro selmanes ensin Fórmula Uno, tener dos carreres siguíes, y qu’encima seyan dos de les más mítíques del calendariu. Dempués de pasar por Spa, tócanos facer parada en Monza, territoriu tifosi.

Tamos yá en setiembre, asina qu’espérase qu’empiecen a veninos noticies sobre’l futuru de dellos pilotos como yá vos cuntábemos hai unes selmanes. Detrás de tolos rumores siempres hai dalgo de verdá, pero vamos dexar que seyan los propios equipos los que vaigan confirmando a quién van tener pa 2017 enantes de dicir nosotros dalgo más.

Poniendo los güeyos enriba’l gran premiu, Monza ye siempres una de les carreres más esperaes del calendariu pol ambiente, pola so condición de templu de la velocidá y por ser un circuitu míticu. Ferrari tará deseyando poner los pies en casa y regalar a la so afición igual non una victoria pero quiciás a lo menos un bon gran premiu del que puedan esfrutar.

Llegamos a Italia pensando no que puean facer los equipos más rápidos, pero tamién no que pase per detrás, onde Sauber sigue teniendo problemes pa derrotar a Manor y onde taremos sollertes a la condición de Magnussen (Renault) dempués del so accidente en Spa.

Otros que van tar naguando facelo bien otra vuelta, son Force India, que van lluchar por facer medrar la diferencia que los separa de Williams na clasificación de constructores. Esperen poder siguir col bon momentu qu’amosaron en Bélxica hai unos díes.

Los pilotos de Haas, anque nun son nuevos en Monza, atoparánse cola novedá, como en cada gran premiu, d’un circuitu qu’entá nunca probaron col so nuevo coche. Na so continua evolución, l’equipu americanu sigui dando satisfaiciones a los sos fans y tamién a quien s’enfotó nellos. Nun puntúen regularmente, pero’l fechu de tener los puntos que tienen yá ye un llogru en sí.

Nel llau de McLaren, toca dexar atrás la carrera de Bélxica, de sabor agridulce, pa centrase nesti gran premiu onde van intentar lluchar polos puntos anque conscientes de que nun ye ún de los meyores pa ellos.

Les escuderíes del toru coloráu lleguen con optimismu a Monza, la hermana mayor con ganes de siguir abriendo brecha con Ferrari y la pequeña coles de dexar atrás Bélxica ya esfrutar d’un gran premiu nel que quiciás puedan beneficiase de los problemes que tenga McLaren.

Ensin más, equí vos dexamos della información sobre’l circuitu que nos toca visitar esti fin de selmana y estes son les gomes elexíes polos pilotos pa tol fin de selmana:

neumaticos-italia-2016

Gran Premiu de Bélxica 2016 – Análisis por equipos

A piques de pasar páxina y ponenos a mirar pa Monza n’un par de díes, vamos facer un repasín a l’actuación de los equipos nel pasáu gran premiu de Bélxica:

– Mercedes: como vien siendo vezu, los grandes triunfadores de la carrera. A la victoria de Rosberg ensin nengún problema xúnise’l tercer puestu del so compañeru Lewis Hamilton que salía dende atrás poles penalizaciones acumulaes por cambios d’unidaes de potencia. Agora’l británicu tien tres unidaes de renta pa tirar lo que queda de temporada.

– Red Bull: Verstappen tuvo en boca de tola xente, pa bien y pa mal, anque foi’l so compañeru Ricciardo’l que fexo’l meyor trabayu (o’l más rentable) quedando segundu. L’holandés ta ganándose bien d’enemigos en pista, al tiempu qu’almiradores fuera d’ella, y nun nos paez que vaiga ser mui bien acoyíu esti fin de selmana polos tifosi en Monza dempués de les sos engarradielles con Vettel y Räikkönen.

– Force India: tres de Mercedes, los que meyor trabayu ficieron como equipu ensin dulda. Vien dándose-yos bien esti circuitu y de fechu, cuartu y quintu puestu paez que saben a poco teniendo en cuenta qu’enantes de la bandera colorada too paecía indicar que Hülkenberg podía pensar nesi tercer puestu del caxón. Al final nun pudo ser, sicasí dambos pilotos ficieron una carrera mui completa y l’allegría del equipu al adelantar a Williams nel campeonatu de constructores dizlo too d’una escudería que nun dexa de sorprendenos cada temporada.

– Ferrari: de xuru que los dos pilotos de la Scuderia suañaron con Verstappen estos díes, y anque nun-yos fue mal del too en carrera teniendo en cuenta l’incidente nel primer xiru y tolos altos y baxos, de xuru qu’aspiraben a muncho más n’un circuitu que (especialmente a Räikkönen) se-yos suel dar bien. Agora tán tolos güeyos puestos en Monza, el so feudu y onde de xuru fadrán por facer una bona carrera enfrente la so xente. Si Verstappen nun se mete en mediu esta vez, claro…

– McLaren: nun dexen de repitise les ocasiones nes qu’una carrera que puede da-yos un bon garapiellu puntos a la escudería británica termina siendo un calvariu pa dalgún de los sos pilotos. Pesie a que toles torgues túvoles Alonso demientres el fin de selmana, el que lo sufrió en carrera foi Button. L’asturianu fizo séptimu y Button viose fuera de carrera a les poques vueltes del empiezu por un incidente nel que Wehrlein interpretó mal la so maniobra en pista dexándolu ensin tiempu pa frena y qu’acabó llevándolu per detrás. Dambos pilotos quedaron fuera. Bonos puntos pa McLaren, que yá ta perriba Toro Rosso na clasificación de pilotos.

– Williams: probablemente aspiraben a más, y tinía la pinta nos entrenamientos y na sesión de calificación de qu’asina diba ser. Consiguieron puntuar con dambos coches, siendo Bottas octavu y Massa décimu, pero son puntos que saben a pocu viendo los resultaos de Force India. Toca siguir trabayando.

– Haas: les primeres vueltes del gran premiu fueron bien entreteníes pa los equipos de la parte media de la tabla, porque viéronse upaos a los puntos gracies a tolos incidentes qu’hebo. Ensin embargu, nel casu del equipu americanu y pesie a facer una bona carrera, nun fueron quien a quedase neses posiciones y resultaron décimosegundu (Gutiérrez) ya décimoterceru (Grosjean).

– Toro Rosso: otra escudería que marcha de Spa con deceición ye, ensin duldes, Toro Rosso. Ente lo descafeináu qu’anduvo Kvyat tol fin de selmana (nun ta faciendo muncho por quedase na Fórmula 1 visto lo visto en pista) y la mala suerte de Sáinz, que vio como quedaba ensin goma trasera por un reventón, l’equipu nun pudo facese con nengún puntu y vio como McLaren lu adelantaba na clasificación de constructores. Paez qu’empieza la parte más duro de la temporada con un motor ensin evoluciones y onde-yos tocará reducir daños sacando tolo que puedan del chasis y pensando en 2017.

– Renault: el sustu del gran premiu vieno de la mano de Kevin Magnussen que se salía xusto al terminar Eau Rouge a l’altura de la salida del pit-lane. Anque lu víemos acoxar, súpose darréu que nun fuera nada y que ta garantizada la so presencia en Monza esti fin de selmana. Bones noticies. La verdá ye que l’arranque de la carrera pa ellos foi bien interesante, fueron de los que se beneficiaron de los incidentes, y llegaron a tar nos puntos, séptimu ya octavu, pero nun duró muncho. Al final, Palmer sólo pudo ser décimoquintu.

– Manor: con Wehrlein fuera, yera cosa d’Ocon el dexar a Manor en bon llugar, y dientro la so llucha particular con Sauber, féxolo. Quedó xusto per delantre de Nasr y completó’l so primer gran premiu ensin problemes y amosando una perbona actitú. Yá quedó confirmao que d’equí a final de temporada (salvo cambios inesperaos) va quedase en Manor, ensin tener que responder a les llamaes de Renault como tercer pilotu.

– Sauber: ente la irregularidá qu’amuesen ya’l tar perdiendo la batalla escontra Manor, en Sauber tienen bien poco que cellebrar. Spa nun foi una bona carrera pa ellos. Suma y sigui.

Gran Premiu de Bélxica 2016 – Carrera

Ayeri vivíemos otru d’esos grandes premios nos que pasen tantes coses que paez casi imposible enterase de toes. Cuntábemos con un aliciente que yera’l ver a Hamilton empezando dende bien atrás y col fechu de tener a Verstappen na primer llínia de salida al llau de Rosberg. Yá tábemos echando cuentes de lo que diba pasar, pero de xuru que naide nun foi quién a predicilo bien.

Como vien siendo vezu, l’empiezu la carrera dio pa muncho: Vettel, Räikkönen y Verstappen facíen un sandwich nel intentu de dar los tres al tiempu una curva cásique pela mesma trazada, lo que resultó n’incidente, que nun foi penalizáu, pero que dexó a Vettel ablucáu (yá vien siendo tradición nesta temporada) y a Kimi cola necesidá de cambiar de morru. Verstappen diría viéndose perxudicáu pola xugada demientres la carrera, quedando fuera los puntos.

Precisamente, mesmo Räikkönen como elli dieron vien de falar poles sos batalles en pista, tamién dalgo que yá casi ye tradicional, y onde sintíemos a Kimi desesperáu polos movimientos del pilotu de Red Bull pa defendese de los sos intentos de rebasalu.

Los tres pilotos pudieron terminar la carrera, nel casu de los pilotos Ferrari puntuando, pero hebo otros con muncha menos suerte. Ye’l casu de Carlos Sáinz, al que-y reventó la goma trasera drecha faciéndolu perder el control del so coche ya intentando lluchar por sacalu del trazáu pa estorbar lo menos posible. Terminó col alerón traseru montáu perriba’l coche.

Tamién fueron protagonistes negativos Pascal Wehrlein ya Jenson Button: dambos quedaron fuera de carrera cuando’l pilotu de Manor chocaba a Button per detrás, dañándo’l so coche ya’l del pilotu inglés, y por d’ello quedando dambos fuera. Wehrlein dicía dempués que, como pasa bien de vegaes, foi una maniobra que lu pilló despreveníu y que nun esperaba la reaición de Button, que lu dexó ensin capacidá pa correxir la de so ya evitar el choque. McLaren puntúo con Alonso, que tamién salía d’atrás y terminaba nos puntos. Nel llau de Manor, víen como’l so debutante, Esteban Ocon, terminaba la carrera ensin mayor problema.

Siguiendo cola carrera ya otros protagonistes, tenemos a los Renault: gracies a tolos incidentes de los primeros momentos de carrera, viéronse aupaos a los puntos, llegaron a ser séptimu (Palmer) ya octavu (Magnussen), pero nun diba ser too sorrises. Kevin Magnussen tuvo un incidente bien gordu al final de la subida a Eau Rouge, onde perdía’l coche dafechu a l’altura de la salida del pit-lane. El pilotu danés tuvo un corte nel tobillu izquierdu, víemoslu coxear de la que salía del coche, que quedó estrozáu dafechu. El golpe foi tan fuerte que la carrera tuvo que parase con bandera colorada pa poder afitar les barreres que quedaron desfeches pol impactu. Esti parón diba da-yos a los pilotos una parada de más, y a torgar delles estratexes.

Pela parte d’arriba, Rosberg nun se vio en nengún momentu amenazáu na so llucha pola victoria, anque tuvo de ser inquietante ver que’l so compañeru, dempués de salir dende atrás, yera quintu cuando se paraba la carrera. Ensin embargu, l’alemán ganó un Gran Premiu de Bélxica ensin problema nengún. El Red Bull de Ricciardo acompañaríalu nel segundu puestu, n’otra bona carrera del australianu, y Hamilton acabaría siendo terceru, un puestu bien meritoriu teniendo salío penúltimu.

Tamién ye de destacar el cuartu y quintu puestu de los dos pilotos de Force India n’un circuitu que se-yos suel dar bien. Yá adelanten a Williams na clasificación de constructores, mesmo que McLaren con Toro Rosso.

Aparte de los yá mentaos Wehrlein, Button, Sáinz y Magnussen, tamién quedaba fuera de carrera Ericsson, que yá tuviera una penalización pal fin de selmana por cambiu de la so unidá de potencia.

Clasificación

Pos Pilotu Q1 Q2 q3
1 Nico Rosberg 1:48.019 1:46.999 1:46.744
2 Max Verstappen 1:48.407 1:47.163 1:46.893
3 Kimi Räikkönen 1:47.912 1:47.664 1:46.910
4 Sebastian Vettel 1:47.802 1:47.944 1:47.108
5 Daniel Ricciardo 1:48.407 1:48.027 1:47.216
6 Sergio Perez 1:48.106 1:47.485 1:47.407
7 Nico Hulkenberg 1:48.080 1:47.317 1:47.543
8 Valtteri Bottas 1:48.655 1:47.918 1:47.612
9 Jenson Button 1:48.700 1:48.051 1:48.114
10 Felipe Massa 1:47.738 1:47.667 1:48.263
11 Romain Grosjean 1:48.751 1:48.316
12 Kevin Magnussen 1:48.800 1:48.485
13 Esteban Gutierrez 1:48.748 1:48.598
14 Jolyon Palmer 1:48.901 1:48.888
15 Carlos Sainz 1:48.876 1:49.038
16 Pascal Wehrlein 1:48.554 1:49.320
17 Felipe Nasr 1:48.949
18 Esteban Ocon 1:49.050
19 Daniil Kvyat 1:49.058
20 Marcus Ericsson 1:49.071
21 Lewis Hamilton 1:50.033
NC Fernando Alonso NE

Na parrilla de salida Sáinz foi penalizáu con tres puestos por un incidente con Felipe Masa na clasificación, Hulkenberg con un puestu puesto por un error al montar los neumáticos y Grosjean con cinco puestos por cambiar la caxa de cambiu.

Carrera

Pos Pilotu Tiempu Vuelta
1 Nico Rosberg 1:44:51.058 44
2 Daniel Ricciardo +1 vuelta4.113 44
3 Lewis Hamilton +27.634 44
4 Nico Hulkenberg +35.907 44
5 Sergio Perez +40.660 44
6 Sebastian Vettel +45.394 44
7 Fernando Alonso +59.445 44
8 Valtteri Bottas +60.151 44
9 Kimi Räikkönen +61.109 44
10 Felipe Massa +65.873 44
11 Max Verstappen +71.138 44
12 Esteban Gutierrez +73.877 44
13 Romain Grosjean +76.474 44
14 Daniil Kvyat +87.097 44
15 Jolyon Palmer +93.165 44
16 Esteban Ocon +1 vuelta 43
17 Felipe Nasr +1 vuelta 43
NC Kevin Magnussen NT 5
NC Marcus Ericsson NT 3
NC Carlos Sainz NT 1
NC Jenson Button NT 1
NC Pascal Wehrlein NT 0

Gran Premiu de Bélxica 2016 – Previa

Acabáronse les vacaciones (pa quien les tuviera) y yá nos ponemos en plan p’acolumbrar la segunda parte de la temporada 2016 de Fórmula Uno. La desconexón nun foi tala yá que nin equipos nin pilotos pararon de compartir lo que diben faciendo demientres estes selmanes de descansu. Pero’l momentu de garrar otra vuelta’l coche y ponelu a andar yá llegó.

Y qué meyor forma d’empezar qu’en Spa. Ún de los circuitos míticos nel calandariu por méritos propios (el trazáu ye unu de los más apreciaos y n’elli pudimos ver munches y mui bones carreres). Ello ye que llevamos dellos díes lleendo a equipos y pilotos espresar el so prestu por volver a correr ellí, dalgo que se repite añu tres d’añu.

Anque nun esperamos grandes cambios tocante a lo visto na primer parte de la temporada, sí qu’esperamos quiciás que los equipos que hasta agora entá tienen daqué qu’amosar, lo fagan. Tamos pensando especialmente n’ansiada victoria de Ferrari, nel terminar una carrera con bones sensaciones a nivel equipu pa Williams y nel pasar a Manor nel mundial de constructores pa Sauber.

Tendremos tamién que poner los güeyos enriba lo que faga Ocon a bordo’l MRT05 (dempués de que Haryanto terminare quedando fuera por falta financiación) y tolos que necesiten ganase l’asientu pal añu viniente, sobre too nel casu de Kvyat.

Pela parte alta, taremos pendientes como siempre de la reaición (si la hai) de Rosberg cola vuelta al trabayu y de si al final Hamilton decide cumplir la penalización pol cambiu de componentes de la PU nesti circuitu, asina como de lo que puean facer los Red Bull pa siguir poniendo nervioses a les fleches platiaes.

Nun dexaremos tampoco de tar sollertes a lo que puea pasar no que cinca a la silly season que como sabéis nun dexa de xenerar noticies ya rumores qu’entá nun terminen de cuayar. De xuru siguirá falándose muncho nesti gran premiu.

Equí puedes ver los datos del circuitu y estes son les gomes que va a usar cada pilotu:
neumaticos-belxica-2016

Análisis de la primera parte de la temporada 2016

Enantes de metenos de cabeza na segunda mitá de la temporada qu’empieza en menos d’una selmana nel míticu Spa, vamos echar una güeyada a lo que foi la primer parte no que cinca a los equipos:

– Mercedes: malapenes los vemos pasalo mal, anque esti añu yá dieron más d’un sustu a los sos xefazos, paez que tamos a piques de ver una repitición de lo que foi l’añu pasáu la batalla ente los dos pilotos por facese col títulu, con Hamilton un pasu per delantre. Pol bien de la competición, esperamos que Rosberg seya quién a volver a ponese a l’altor de les sos primeres carreres.

– Red Bull: dempués de les vueltes y amenaces del añu pasáu, y d’empezar la temporada con bastante discreción, el cambiu de pilotu xugó a favor de dambes partes (non tanto na del sacrificáu Kvyat). Agora mesmo son el segundu equipu nel campeonatu, non sólo por puntos: paez que por fin-y garraron la midía a Ferrari y van tar pegándose colos italianos hasta’l final de la temporada.

– Ferrari: esperábase de Ferrari que fueren quién a facer tremar, anque fuera un pocu, a les fleches platiaes, pero hasta agora paez que nun tan pol llabor. Cola marcha de James Allison y ensin nenguna victoria entá no que va de temporada, la paciencia na escudería italiana va acabándose y les idees en forma soluciones tamién. Ensin embargu, cuntamos con velos rellumar anque seya un pocu na segunda parte del campeonatu.

– Williams: la escudería inglesa ta sacando bueno resultaos pal baxu rendimientu que ta amosando esta temporada (baxu siempres comparándolu col añu pasáu, por exemplu). Esperábamos muncho más d’ellos, anque entá-yos queden bien de carreres pa facenos cambiar d’opinión.

– Force India: tolos años, Force India, seliquino, van colándose nos puestos d’enriba, onde teóricamente nun deberíen tar, faciendo podios y carreres mui completes. Esti añu puen poner n’apuros a Williams, que yá los ven de regüeyu, y anque ye verdá que siempres suelen baxar un pocu na segunda parte de la temporada, cuntamos con siguir velos bregando por esi cuartu puesto nel mundial.

– Toro Rosso: ye difícil xulgar el llabor de la escudería dempués del cambiu de pilotos: Sáinz sigui fuerte, puntuando regularmente y faciendo carreres competitives. Cola marcha de Verstappen convirtióse nel llíder dafechu del equipu, y la probe actuación de Kvyat dende que tornare fai qu’esta seya más obvia entá. El rusu nun termina de cuayar dempués del incidente que fexo que Red Bull decidiere relegalu a la escudería hermana en beneficiu de Verstappen. Munchos piensen que yá nun hai sitiu pa elli na F1 y que va ser unu de los que veamos desapaecer l’añu que vien. Les carreres vinientes sedrán les que decidan y na segunda parte de la temporada acusarán más l’usar un propulsor del añu pasáu que nun evoluciona.

– McLaren: l’empiezu de la temporada nun foi tan desastre como 2015, pero entá sigue costando asimilar el ver a McLaren nel puestu séptimu de constructores y aplaudiendo’l fechu d’entrar na Q3 y garrar puntos los domingos. Quéda-yos munchu trabayu per delantre, con un 2017 nel horizonte con posible cambiu de pilotos (Button dexaría’l so asientu a Vandoorne) y la promesa de tornar a ser competitivos. Na segunda parte de la temporada cuntamos con velos siguir sumando puntos ya dando pasinos, insuficientes pa esta temporada pero positivos si pensamos na so situación hai doce meses.

– Haas: les primeres carreres sorprendieron pa bien, y llueu impúnxose la lóxica y la realidá de ser un equipu nuevu na competición. De toles formes, el fechu de tar puntuando, anque nun seya en toles carreres, yá ye un méritu y tamos viendo a Gutiérrez faer carreres mui sólides y a Grosjean arrampuñar puntinos que los ponen perriba de les espeutatives de munchos na clasificación.

– Manor: siempres empiecen les temporaes cola idea de que lo d’ellos ye pensar en terminar carreres, pero esti añu tamos viendo un pasín más. Non sólo terminen carreres si non que tamién pueden suañar con sumar puntos como yá pasó con Wehrlein n’Austria, rompiendo col mitu de que Manor (o cualquier escudería “pequeña” sólo pue puntuar en Mónaco). Con Haryanto fuera del coche (anque vaya a siguir tando vinculáu al equipu) tócanos ver de lo que ye capaz Ocon, pupilu de Mercedes, nesta segunda parte.

– Sauber: la escudería suiza son, ensin duldes, los más castigaos económicamente nesta temporada. La entrada d’una nueva direición promete da-yos puxu pa sumar anque seya un par de puntinos que los ayuden a pasar a Manor na clasificación. Viendo lo que vimos hasta agora paez difícil.