Category: Carreres

Somos munchos los que nos entrugamos, cuando llega’l gran premiu de Canadá, qué pinta esti circuitu pente les carreres europees. Camentamos qu’igual yera más conveniente, pensando nos desplazamientos continentales, dexala pal final. El casu ye que, dempués de Mónaco, tocar cruciar l’Atlánticu p’averase al circuitu Gilles Villeneuve, en Montreal, unu de los favoritos de fans ya pilotos.

Nun ye raro que tengamos bones carreres ellí, polo que cruciamos los deos pa qu’esta seya, polo menos, la mitá d’entretenida que les anteriores nesta temporada. Aterrizamos dempués de la victoria de Hamilton en Mónaco, aprovechando toles circunstancies, y cola mirada puesta en Ricciardo y la so capacidá de recuperase de dos carreres que lu pillaron col pie cambiau. Tamién, taremos pendientes, otra vuelta, de lo que faiga Rosberg pa dexar atrás la séptima posición del pasáu gran premiu.

Per detrás d’ellos, unos Ferrari cada vegada más cuestionaos poles sos probes actuaciones (esperábase muncho más de lo que tán ufriendo) mesmo que Williams, n’una situación asemeyada. El restu equipos siguirán coles sos lluches particulares, puxando por metese nos puntos y mirando pal cielu polo que les ñubes puean trayer. Y ye qu’en Canadá cuando llueve, llueve con ganes, si non, que-y entruguen a Button por Canadá 2011…

Esta ye la esbilla de gomes que fexo cada pilotu pa esti GP:

Y los datos del circuitu

Teníemos los güeyos puestos en Mónaco pa ver qué daba de sí la carrera col agua que llevaba cayendo dende pela mañana. Esi mesmu agua foi’l que fexo que se tuviere d’empezar detrás del coche de seguridá y tuviéremos viendo procesión de coches demientres cinco vueltes. Al acabar la quinta, empecipió’l GP de Mónaco. Un par de vueltes dempués, accidente de Palmer y vuelta del coche de seguridá a pista. Paecía que tábemos condergaos a siguir viendo los coches dando vueltes detrás de Mayländer, pero nun foi pa muncho.

Lo que vieno dempués podría resumise mirando pal podio: Hamilton gana dempués de seis meses de sequía, Ricciardo queda segundu dempués de facer pole’l sábadu y perder la opción de ganar la carrera por un error nel box (la so cara yera una desplicación en si mesma) y Pérez terceru. Siempres qu’hai daqué fuera lo normal nes carreres, ye más que probable atopar a Pérez nel podio, asina que nun hai muncho más que dicir sobre la so carrera, aparte de qu’en dengún momentu dexó de lluchar por averase a los dos primeros, quiciás pensando que les gomes ultrablandes que s’estrenaben en Mónaco nun dexaren a Hamilton llegar col coche hasta’l final ensin facer otra parada pa cambiales. Triple xuegu de gomes en cabeza (ultrablandes Lewis, superblandes Ricciardo y blandes Pérez) pa xugar con distintes estratexes de carrera que nun dieron más sorpreses.

Rosberg quedó séptimu, con más problemes que posibilidaes de ganar, per detrás del Ferrari de Vettel, que fexo una carrera bastante discretina pa lo que suel ser normal n’elli, del McLaren d’Alonso, que quedó quintu faciendo honor a las predicciones de Boullier que falaba d’un sextu puestu (mínimo) pa McLaren nel GP y de Hülkenberg que desanició tolos diaños de carreres pasaes y adelantolu a última hora pa quita-y el sextu puestu.

Per detrás de Rosberg, Carlos Sáinz octavu, n’una carrera bien completina, col so compañeru d’equipu fuera de carrera; Button novenu, qu’una vez más foi de los primeros en cambiar gomes en momentu que vio que taba la pista pa ello, y completando el top ten, llegó Massa.

Dambos pilotos de Williams ufrieron una imaxe bien probe en Mónaco, non sólo na carrera, si non tamién na calificación. Otros que tampoco nun encantaron fueron los pilotos de Sauber, que s’engarriaron en pista cuando Ericsson quiso pasar a Nasr, dalgo qu’esti últimu nun quería permitir (pesie a les peticiones al equipu del pilotu suecu y el comentariu fechu por radio a Nasr del equipu) Poca gracia-y debió facer a Monisha Kaltenborn ver a los dos pilotos fuera de carrera cuando tanta falta tienen de dar bona imaxe a posibles patrocinadores.

Quiciás un poco deceicionaos nos dexó Manor: Haryanto nun dio pa muncho y Wehrlein tuvo de preocupase más de la montonera penalizaciones que-y cayeron que de facer daqué en carrera. Quedaron últimos, anque colos abandonos fueron décimocuartu (Wehrlein) y décimoquintu (Haryanto). Los dos pilotos de Haas acabaron fuera los puntos.

En cuantes a abandonos, dambos pilotos de Renault quedaron fuera, Palmer primero, Magnussen n’un accidente con Kvyat. El propiu pilotu de Toro Rosso tamién quedó fuera, ya’l so sucesor en Red Bull, Max Verstappen volvió a tener un accidente que lu dexaría fuera carrera. Dempués de brillar en Barcelona, la verdá ye que Mónaco tornóse na so peor pesadilla (el sábadu en calificación tuvo otru accidente que nun lu dexaría correr namás qu’unes vueltes de la Q1). Räikkönen tamién quedó fuera dempués de chocar en pista y quedar col alerón delanteru esgonciau. Nun pudo más que buscar per onde meter el coche y retirase.

Equí vos dexamos tolos datos de la calificación del sábadu y los de la carrera’l domingu:
Calificación

Carrera

Hai un daqué que fai especial a Mónaco cuando tán los coches corriendo pente les sos cais. Quiciás ye’l fechu de dir contracorriente y tener los entrenamientos llibres de xueves en cuenta vienres; quiciás seya pola burrada dinero que se mueve per ellí en forma coches, cases y yates, ente otres coses; o quiciás seya simplemente una cuestión de ser un circuitu clásicu, distintu al restu anque yá nun seya l’únicu urbanu y que siempre suel trayer sorpreses (na nuestra memoria siguen esos dos puntinos que consiguió Bianchi pa Marussia hai casi dos años).

Siempre esperamos munches coses d’esti circuitu, y paeznos qu’esti añu, dempués de lo que venimos viendo nos anteriores grandes premios, hai motivos pa ello. Primero, güeyos puestos enriba Mercedes dempués de lo que pasó en Barcelona. Va ser raro velos otra vuelta fuera a los dos al mesmu tiempu, pero de xuru que más d’ún tará esperando que dalgo asemeyao pase pa dai vida a la carrera.

Detrás d’ellos, el restu. McLaren son optimistes, tanto como pa ponese sextos y empezar a toser a Ferrari. Ye difícil predecir que pue pasar n’un circuitu nel qu’incluso los Manor tienen razón de tar emocionaos. Verstappen de xuru tendrá ganes de repitir lo que fexo en Barcelona, anque munches coses tienen que dase pa que torne a vese un Red Bull ehí enriba anque dalgo que nos tien enseñao esta temporada (na que sólo llevamos cinco carreres) ye que podemos esperar cualquier cosa.

*Vuelta más rápida de tolos tiempos, según el trazáuque s’usó de 2003 a 2014

Si dalguién pensaba que’l GP de güei diba ser un paséu, otra vuelta más, de les fleches platiaes, de xuru quedaría cola mandíbula fuera sitiu dempués de lo que se vio güei. Pasaron tantes coses y tan distintes de lo que tamos avezaos, que nun sabemos nin per onde empezar.

Llegaben les dos de la tarde, apagábense los semáforos y empecipiaba’l quintu gran premiu de la temporada. Anque nun salió mal Hamilton, rápidamente viose segundu, adelantáu por Rosberg na segunda curva. Nun díbemos pela cuarta curva cuando, n’un intentu por recuperar la posición, Hamilton pisaba la yerba, perdía’l control del coche y llevaba con elli a Rosberg, dexando dambos coches fuera carrera ensin nin siquiera terminar la primer vuelta.

Les culpes de los que saben daqué de F1 cayeron de dambos llaos, anque los comisarios decidieron dexalo como un incidente de carrera. De xuru, siguiremos sintiendo opiniones per tolos llaos y análisis de los movimientos d’ún y l’otru. Lo cierto ye que víemos como Mercedes marchaba de Barcelona ensin puntos, y cómo Räikkönen pasaba perriba Hamilton nel campeonatu de pilotos. Too eso en cuatro curves.

Dexando un pocu de llau lo que foi, ensin duldes, la vuelta de tuerca de la carrera, víemos a Red Bull faciéndose col control de la carrera, de la mano de Ricciardo, y con Ferrari ensin ser quien a adelantar al Toro Rosso de Sáinz nes primeres vueltes. Sabíemos que nun diba durar, nun podía durar pol bien de la escudería rosso, pero foi llamativo velos pelease con un coche que lleva’l motor que teníen ellos l’añu pasáu.

Víase dende bien ceo que la carrera diba tar ente Red Bull y Ferrari, pero naide nun podía esperar que’l recién nomáu pilotu de Red Bull, Max Verstappen, fuera facese col triunfu. De fechu, toles apuestes cayíen del llau de Ricciardo, que casi al final de la carrera víase fuera de la llucha por cuenta un pinchazu. Ensin embargu, cola diferencia que sacaba al quintu, nun perdió’l so cuartu puestu. Verstappen fexo una carrera mui completa, plantando-y cara a tol que quería adelantalu, y faciendo dura les sos ruedes 32 vueltes.

Ferrari foi quien meyor lo tuvo güei colos sos pilotos nel podium, restando un bon puñáu de puntos a Mercedes. Sicasí, nun convencieron, Red Bull dio-yos problemes tola carrera ya’l propiu Räikkönen nun foi quien a quita-y la victoria a Verstappen.

Más abaxo, Sáinz consiguió ser sextu, col so “nuevu” compañeru, Kvyat, garrando un puntu a última hora. Williams entró nos puntos con dambos pilotos, Bottas foi quintu y Massa octavu. Foi séptimu Pérez, consiguiendo puntos pa Force India, demientres Hülkenberg quedaba fuera, otra vegada más, por fallu nel coche y siguiendo cola so racha de mala suerte.

McLaren consiguía puntos otra vez col novenu puestu de Button, y con Alonso quedando fuera na última parte de la carrera al quedase ensin potencia nel propulsor. Pel llau de Sauber, toco-yos batallar entre ellos daqué en carrera, lo mesmo qu’a Renault. Amás, Magnussen foi penalizáu por un incidente col so compañeru d’equipu. Haas llegaba con un coche namás a meta, Gutiérrez, a les puertes de los puntos. Manor tuvieron una carrera discreta.

A la llista retiraos onde taben Hülkenberg, los dos Mercedes y Alonso, xuntábase Grosjean.

Equí vos dexamos los resultaos del sábado, onde Hamilton fizo pole, y lo que dio de sí la carrera güei:
Calificación

Carrera

Entama la xira europea y fáilo en Barcelona. Tamos avezaos a que seya Montmeló (o Circuitu de Barcelona-Catalunya si preferís) testigu de meyores nos monoplaces aparte de ser un trazáu que los pilotos conocen más que bien siendo unu de los elexíos pa los test d’iviernu.

Quiciás la noticia de la fin de selmana, o cola que llegamos a elli, meyor dicho, ye’l cambiu de pilotos ente Red Bull y Toro Rosso: dempués de l’actuación de Kvyat nel GP de Rusia, la escudería de Milton Keynes vio conveniente calmar al so pilotu y movelu al segundu equipu, demientres Verstappen yera l’elexíu pa conducir en Red Bull. Dellos pilotos fixeron comentarios sobre esti movimientu, si yera xustu o non, si l’error de Kvyat fuera tan grande como pa merecese lo que-y taben faciendo…El próximu GP va danos la rempuesta a toos.

No que cinca al restu equipos, fai falta destacar que, pa variar, les fleches platiaes tienen bastante no que pensar en cuantes a lo que-y ta pasando, en temes de fiabilidá, al coche de Hamilton. Nun nos paez qu’otru fallu, seya’l que fuera, y-preste al británicu, asina que cuidamos que tán poniéndolo too n’orde pa que nun haiga sorpreses.

Como nos pasaos GPs, tenemos los güeyos puestos en Sauber, que siguen con problemes económicos qu’esperamos nun los alloñen de les pistes como yá pasara otros años con otros equipos. Tamién vamos güeyar lo que faigan McLaren dempués de puntuar con dambos coches en Rusia aterricen en Montmeló conscientes de qu’esti nun ye’l meyor circuitu pa ellos.

Ferrari, ya especialmente Vettel, necesiten una carrera ensin problemes nin sobresaltos que-yos dexen amosar en qué puntu tán, sobre too’l pilotu alemán, en comparación con Mercedes. A Williams nun se-yos da mal Barcelona, asina que cuntamos con ellos pa tar tamién nos puesto d’arriba.

Equí vos dexamos información pal fin de selmana:
 

Yá llevamos dos grandes premios nos que la salida nos tien agarraos al asientu pa nun perdemos nada, ya’l restu déxanos un pocu a medies. Esto foi lo que pasó otra vuelta en Rusia. L’empiezu foi un caos, nel que víemos como Kvyat refuerciaba la so relación d’amistá con Vettel, sacándolu de carrera, como Hülkenberg siguía cola cigua que lu acompaña dende’l principiu temporada, como Haryanto nin siquiera podía ponese en plan pa facer daqué en pista y como los comisarios teníen trabayu abondo y fartucábense a penalizaciones, delles daqué cuestionables.

Na previa falábemos d’unes entrugues qu’esperábemos responder nesta carrera: sí, Rosberg siguió na so llínia d’imbatibilidá, acompañá d’otru golpe mala suerte pal so compañeru d’escudería, pero amosando un momentu de forma espectacular. Yá van siete carreres siguíes (cuntando les tres últimes de 2015). Williams fizo dalgo, por fin. Nun foi pa tirar cohetes, viendo que Bottas salía segundu, pero fueron el tercer equipu más fuerte en carrera, asina que podemos dicir qu’esta vez sí cumplieron. Red Bull siguió molestando, Kvyat encargóse d’ello, pero nun consiguieron brillar nada en Rusia, nin siquiera algamar puntos. Y Ferrari, como bien dixo Räikkönen, entá nun tien capacidá (y nun sabemos si la va tener) pa ponese perriba Mercedes.

Nun foi una carrera vistosa, pero tuvo dellos momentos. La salida foi ensin duldes lo que más dio de sí, con pilotos aprovechando’l barullu pa escalar posiciones (Hamilton y Alonso ente ellos) y otros perdiéndoles. La salida del Coche de Seguridá dio pasu a cambios nes estratexes n’un circuitu que de normal pide dir a una parada. A partir d’esi puntu, Rosberg entamó a garrar distancia col segundu, Hamilton intentó facer por garralu (la presión d’agua fexo que nun pudiera dar el 100% del coche, y elli taba convencíu de que pudiera tener ganao la carrera) y les siguientes posiciones fueron rifándose ente Räikkönen y los dos pilotos de Williams.

McLaren consiguió meter dambos coches en puntos: Alonso nun salió del top ten dende l’empiezu de la carrera, ya’l so compañeru d’equipu consiguió quita-y l’últimu punto a Sáinz en pista (anque diba perdelu igual pola penalización de 10 segundos qu’arrastraba). Ye la primer vez dende Hungría del añu pasáu que McLaren tien dambos coches nos puntos. Anque diremos analizando más fonderamente los equipos na siguiente entrada del blogue, nun queremos dexar ensin mentar la carrera de Magnussen, que metió’l so Renault nel puestu séptimu, muncho más de lo que podíemos esperar d’ellos viendo lo que veníen faciendo nes carreres pasaes, y viendo la so posición en parrilla.

Nun dexeis de güeyar l’análisis per equipos qu’espublizaremos mañana. Embaxo podéis atopar les tables cola calificación del sábadu ya’l resultáu de la carrera d’ayeri:

Calificación

Carrera

NT*: Nun terminó

Pegamos un saltu dende China a Rusia, y más concretamente al circuitu de Sochi, onde’l fin de selmana viniente va correse la cuarta carrera d’esta temporada. Llegamos entá col bon tastu que nos dexó la carrera pasada y coles ganes de ver qué nos tienen preparao los pilotos.

Delles entrugues tán pendientes: ¿siguirá Nico Rosberg la so racha o consiguirá por fin Hamilton rompela? ¿Habrá manera de que Ferrari quite del medio a les fleches platiaes? ¿Siguirá Red Bull meyorando y molestando a los que tan ehí arriba? ¿Y Williams…farán dalgo?

El restu d’equipos tamién tienen lo d’ellos: McLaren entá tien muncho que dicir, mesmo que Sauber y Renault. Sochi dase-y bien a Jenson Button, asina que, de mano, puen dir col aquel de que ye un bon circuitu pa ellos. Tenemos ganes de ver hasta onde son a llegar Manor nesti Gran Premiu, siempre colos güeyos puestos enriba Pascal Wehrlein. Tamién esperamos ver a los pilotos de Toro Rosso na so llínia, dando guerra. Al mesmu tiempu, Force India tien falta desfacese la capa mala suerte que lleven enriba dende qu’entamó la temporada, y Haas tornar a la senda los puntos pela qu’anduvieron les dos primeres carreres.

Y como siempre, los datos que nos ayuden a averamos al GP:

Enantes de que nos avezáremos a los horarios de tarde, tiramos pa China onde nos va volver a tocar madrugar pal tercer Gran Premiu de la temporada. Delles noticies aterricen con nós: vuelta al 2015 no que cinca a clasificación; motor nuevu pa Jenson Button y Sebastian Vettel y duldes de la participación d’Alonso nel GP.

Dempués de munches crítiques y discusiones, la FIA decidió qu’igual yera meyor facer casu de los pilotos y de toos los qu’amosaron el so disgustu pol nuevu formatu clasificación, y que dalgo saben (aparte la inmensa mayoría de los aficionaos), y tornar a lo que se facía nel 2015, ello ye: Q1, Q2 y Q3 clasificándose pa la siguiente fase los que tengan los meyores tiempos al final del tiempu acutáu.

Per otru llau, continúa la expectación por ver si Rosberg va facer que seyan seis les carreres siguíes nes que se coloca no cimero del podiu. Tovía naide nun ye quién a enfotase muncho n’ello teniendo en cuenta a lo que nos tien avezaos en temporaes pasaes, mesmo que’l so compañeru, pero paez que-y tien garrada la midía no que va de temporada. Amás, esti GP Hamilton tien una penalización de cinco posiciones por cambiu de caxa cambios, anque Mercedes tien enfotu en que, siendo Shanghai un circuitu onde ye bastante cenciello adelantar, nun condicione muncho la carrera del so pilotu.

Hai tamién ganes de siguir viendo a Haas reafirmase carrera tres carrera. De xuru habrá quien, si fallen, diga que yá lo sabía, pero la pinta que tienen no que va de temporada ye motivu suficiente pa que tean contentos.

Nun puen talo tanto en Sauber, cola pantasma económica enriba d’ellos otra vuelta. Cuidamos que seyan quien a salir d’esta, pero la verdá ye que nun debe tar ayudando muncho al equipu a centrase nel campeonatu, que ye quiciás lo que más falta-yos fai a estes altures.

Esti GP tamos especialmente interesaos en ver el rendimientu de Williams: nun terminen de despegar y de momentu tán siendo quiciás la mayor decepción del campeonatu en cuantes a lo que s’esperaba d’ellos y lo que tan faciendo. Hai que ser pacientes, namái van dos carreres, pero la esperiencia diznos que nun se puede ún despistar nestes primeres batalles pa nun perder el tren darréu.

De siguío, vais atopar les gomes elexíes polos pilotos pa esti GP (destaquen nesa escoyeta Williams y Haas) y della información sobre’l circuitu de Shanghai:

Si de dalgo pue presumir la temporada 2016 ye de consiguir que les carreres consigan quitanos el sabor amargu que tán dexando les calificaciones. Dempués d’otru sábadu surrealista, nel que lo que más valió foi ver la Q1 y la vuelta de pole de Hamilton recuperándose dempués d’un erru que paecía poner nes manes de Rosberg el puestu más altu la parrilla, el domingu dexó un sabor perdulce.

httpss://www.youtube.com/watch?v=SHUDGEU6TFE

Bien ceo, víemos como Vettel nun podía nin siquiera terminar la so vuelta de formación pola muerte del so motor. Cola so retirada paecía que la carrera diba queda-yos en bandexa a los Mercedes, pero otra vuelta más Hamilton vio cómo la so ventaxa de pole quedaba en nada tres una salida na que Rosberg-y garró la posición y tuvo un encontronazu con Bottas na primer curva, que-y valió un drive-through al finlandés. De toes formes, Hamilton nun tardó en dir recuperando posiciones, anque tuviera que conformase col tercer caxón del podio. Rosberg dominó d’empiezu a fin la carrera, faciendo con esta cinco les veces consecutives que se sube a lo más alto.

El segundu güecu ocupolu Kimi Räikkönen, n’una carrera ensin problemes y controlada pol pilotu de Ferrari, que fizo por compensar l’ausencia del so compañeru d’equipu garrando dellos puntos pa la escudería rosso.

Per detrás d’estos tres, vimos lluches bien prestoses: los Force India, daqué descafeinaos, anduvieron engarraos con tol mundo, pa terminar bien atrás (teniendo en cuenta lo bien que se-yos suel dar esti trazáu); Williams tuvieron batalles perguapes con casi tola parrilla tamién, destacando los momentos colos Red Bull. Más discretos tuvieron los Toro Rosso, con Sáinz retiráu y Verstappen faciendo’l so trabayu pero ensin dar tanto que falar como n’Australia.

Hai que destacar delles actuaciones esti domingu: per un lláu, Grosjean y Haas, quintos por méritos propios, amosando que lo d’Australia quiciás nun fue tanto buena suerte como buen facer; per otru, Vandoorne, que debutaba en Baḥréin y quedó como únicu representante de McLaren en pista dempués de que Jenson Button tuviera problemes col ERS y nun pudiera terminar la carrera, consiguiendo arrampuñar un pocos puntín, el primeru pa McLaren na temporada. Por último, Pascal Wehrlein qu’amosó que’l Manor nun necesita más que manos capaces pa plantar cara a coches que l’añu pasáu sólo aspiraben a dexar pasar coles banderes azules. El propiu Magnussen quexábase de que yeren como cohetes en recta, lo que facía casi imposible que’l Renault se pudiere arrimar a ellos.

Sauber fexo un trabayu decente, vimos a Ericsson lluchar en pista y plantar cara a los sos rivales, y anque Nasr quexábase del coche, tamién pudo terminar n’un bon puestu.

Aparte de los yá mentaos, tampoco nun terminaron la carrera Esteban Gutiérrez, qu’entá nun sabe lo que ye ver la bandera a cuadros n’un GP, nin Jolyon Palmer. A continuación vos dexamos los resultaos de la calificación y carrera:

Calificación

(*) Empezó dende’l pitlane

Carrera

(**) Nun salió

Dos selmanes dempués del entamu de la temporada en Melbourne, la Fórmula Uno aterriza nel desiertu, n’unu d’esos circuitos que tien de reinventase cada ciertu tiempu pa convencer a la xente de que paga la pena ver correr coches nel so trazáu. Nun hai duldes que l’optar pola lluz artificial paez conformar a los aficionaos que tán al otru llau la televisión porque la realidá ye que, nes grades, nun vemos más que vacíu.

Enfotándonos agora no que ye lo deportivo, trayemos unes delles novedaes embaxo’l brazu: la más bultable, quiciás, ye la noticia que conocíemos ayeri de que, por conseyu médicu, Fernando Alonso nun va correr esti Gran Premiu. El pilotu asturianu tien fractura de costielles y anque nun ye nada grave, nun-y recomendaron arriesgase a tener otru accidente que-y furare un pulmón. Asina pues, Alonso dexa’l so asientu al belga Stoffel Vandoorne, que tuvo de garrar un avión dende Xapón, onde taba pa disputar la Superfórmula, y presentase nel circuitu pa disputar esti GP. Entá nun se sabe si’l China tamién va a tar fuera del calendariu p’Alonso.

Mercedes cuenta siguir marcando’l ritmu, anque con menos presión que n’Australia, y Ferrari pela so parte va a buscar que nun seya asina y ser quién a batir a les fleches platiaes. Detrás van siguir los de siempre, Red Bull y Williams, de los qu’esperamos daqué más en comparación con Australia, mesmo que de Renault. Force India tien fecho bones carreres nesti circuitu poro tamién son unu de los equipos que tan nel puntu de mira esta fin de selmana.

Pel mediu cuntamos topanos colos Toro Rosso, más calmaos, pola cuenta que-yos trai a los sos pilotos. Siendo realistes, nun debieramos esperar que Haas anduvieren per ehí, pero quiciás esti GP sirva pa determinar dafechu si lo que vimos n’Australia con Grosjean foi sólo una casualidá. Sauber, Manor y McLaren tienen falta demostrar qu’Australia foi namás un mal empiezu.

Estos son los neumáticos escoyíos por cada pilotu pa esti GP. Destaca la elección de Mercedes y Renault con un únicu xuegu del compuestu más duru sacrificando los soft. Manor paez preparase pa una estratexa de tandes llargues.

Tocante a la pista, los puntos d’interés, les zones onde se va a poder usar el DRS en carrera y ver cómo ye un on board del Bahrein International Circuit de Sakhir nesti videu. El restu de datos del circuitu (unos de los que tienen el consumu más altu del campeonatu, polo qu’habrá que tar atentos a ello) son los que siguen: