Category: Análisis

Aprovechando’l parón braniegu, tócanos echar un güeyu a lo que ficieron los equipos el domingu nel Gran Premiu d’Alemaña nel Hockenheimring:

– Mercedes: como dicíemos nel resume de la carrera, Rosberg foi otra vuelta’l so pior enemigu, complicándose la vida na salida y dexando a Hamilton, que fexo un trabayu perbonu, más llíder na calificación y ganaor de la carrera. Queremos pensar que nun va ser esti’l principiu del final de les opciones del alemán al títulu y que’l parón va servir pa qu’organice les sos idees y dexe atrás esti complexu d’inferioridá que-y fae facese pequeñu enfrente’l so compañeru.

– Red Bull: el pasu alantre de la escudería austríaca ye evidente, pa desgracia de Ferrari. Dambos pilotos acompañaron a Hamilton nel podiu n’Alemaña, ya en nengún momentu amosaron debilidá frente a Rosberg, como pudimos ver na pista especialmente del llau Verstappen.

– Ferrari: hebo dellos cambios na selmanada pasada na estructura interno del equipu, y anque nun se-y pue echar la culpa de los resultaos de la escudería a eso, sí que ye verdá que quiciás son de los que más van agradecer esti parón pa reorganizase ya continuar puxando por facese col segundu puesto na clasificación de constructores.

– Force India: una de les cualidaes del equipu ye que, ensin facer munchu ruiu, van consolidando les sos actuaciones añu tres d’añu. Siguen na so batalla particular con Williams, a los que de momentu tienen perbaxo nel campeonatu. Dambos pilotos fixeron un bon trabayu, otra vuelta, na carrera, anque Pérez paecía nun tar mui contentu con como-y fueron les coses demientres el fin de selmana.

– McLaren: comentábemos nel resume’l fechu de que McLaren llegaba a Alemaña cola necesidá de meter a dambos pilotos ente los diez primeros y nun dexar de sumar puntos. Eso foi asina demientres casi tol gran premiu hasta’l final onde víemos a Alonso desinflase. Los problemes col combustible pasaron-yos factura a dambos, al asturianu más qu’a Button, que pudo facese con dellos puntos quedando octavu. Entá nun entendemos mui bien qué foi lo que fexo qu’Alonso considerare apropiao, dempués de tar avisáu de la necesidá d’aforrar combustible, el desdoblase de Verstappen cuando esti lu pasó en pista, dalgo que fexo que Pérez aprovechase la batalla p’adelantalu y que dende esi puntu, Alonso nun pudiera más que ver cómo lu adelantaben los sos perseguidores más cercanos. Terminó siendo décimosegundu.

– Williams: suma y sigui de Williams, n’otra carrera deceicionante col abandonu de Massa y el puestu novenu de Bottas que tuvo suerte de que la carrera nun durase dalguna vuelta más. Otru equipu que de xuru taba naguando pol parón braniegu pa esclariar les sos idees. Buena falta-yos fai.

– Haas: Gutiérrez ta empezando a sacudise la presión de tar siempre per detrás del so compañeru d’equipu y lleva yá dellos GPs faciendo bones actuaciones y dexando’l coche a la vera los puntos. Nesta ocasión, foi undécimu, siendo Grosjean décimoterceru dempués de ser penalizáu por cambiar la caxa cambios.

– Toro Rosso: Pesie a que nun tán faciendo una mala temporada, yá empiecen a acusar les sos carencies con respeutu a otros equipos con más presupuestu y avances (por exemplu, McLaren, que gracies a los puntos de Button y a que nengún de los pilotos de Toro Rosso puntuare, yá-yos saquen un puntu). Kvyat sigui cola so batalla particular por atopar el so sitiu nel equipu y por asegurase’l futuru pa 2017, daqué que naide nun ve claro, nin siquiera elli. Sáinz pela so parte tuvo una de les sos peores carreres, nun puntuando dempués de ser penalizáu con tres posiciones el sábadu por bloquear a Massa demientres la sesión de calificación.

– Renault: Palmer tuvo una actuación bien bona’l sábadu en calificación anque nun pudo repitilo’l domingu, y xunto al so compañeru sólo pudieron ser décimonovenu ya décimosextu respeutivamente. La escudería ta, como nun podía ser d’otra manera, centrada yá nel coche de 2017 y los sos pilotos lluchando por esi asientu que-yos garantice volver a correr pa la temporada que vien. La sombra d’Ocon (pilotu reserva de Renault y de formación pa Mercedes) ye bien allargada.

– Sauber: Nun esperábemos milagros a dos carreres dende qu’anunciaron el cambiu na so direición. Sí ye verdá que cuntamos con velos espoxigar nes carreres vinientes, pero nun foi nada sorprendente velos nel fondu la parrilla otra vuelta na sesión de calificación, nin que la so carrera fuera discretina. L’aplausu podemos da-ylu a Nasr polos sos adelantamientos al principiu la carrera, anque nun sirvieren pa muncho y tuviera d’abandonar unes cuantes vueltes dempués. Ericsson foi décimooctavu.

– Manor: Dambos coches consiguieron terminar la carrera, pesie a dalgún qu’otru incidente en pista ente los pilotos. Lo que más se comenta agora mesmo sobre Manor nun ye tanto lo que faen dientro la pista (anque Wehrlein tornó a facer una bona sesión de calificación el sábadu) si non lo que pasa fuera y la falta del dinero que garantiza l’asientu a Haryanto. Pudo correr n’Alemaña, y anque dende’l gobiernu indonesiu paez que tienen claro’l so compromisu col equipu, nun ta claro que lu vaigamos ver correr en Bélxica dempués del parón. Na carrera, Wehrlein acabó décimoséptimu ya’l so compañeru vixésimu.

Quiciás seya inxusto dicir qu’esta foi una de les peores, o más aburríes, carreres del campeonatu, pero la verdá ye qu’anque tuvimos dalgo d’aición en pista, la mayor parte del tiempu pasémoslu viendo a pilotos solos y a Räikkönen y Verstappen peleándose. Esto foi el gran premiu de Hungría:

– Mercedes: pesie a quedase ensin la pole’l el sábadu dempués de muncha polémica sobre les banderes amarielles y la velocidá de los pilotos demientres tán en pista, dalgo que perxudicó a Hamilton (por trompu d’Alonso) pero benefició a Rosberg (anque foi investigáu pa ver si realmente frenare) l’alemán nun supo aprovechase dello y perdió enseguida la so ventaxa, primero con Ricciardo ya dempués col so compañeru d’equipu, que nun la dexó en lo que quedó de gran premiu. Otra carrera dominada por Hamilton, otra victoria pa la so coleición y seis puntos de más que lu faen llíder del campeonatu de pilotos perriba’l so compañeru.

– Red Bull: yeren los únicos capaces de disputar la victoria a Mercedes equí, como yá ficieren en 2014, y tuvieron la oportunidá de la mano de Ricciardo, anque nun foi suficiente pa facese col primer escalón del podiu. Anque dambos pilotos ficieron una bona carrera, el que más beneficiu sacó foi l’australianu, quedando terceru. El so compañeru foi quintu.

– Ferrari: yá van delles carreres nes que Vettel nun ye’l centru d’atención nel bon sentíu, y nesti casu fexo una carrera discreta, quedando per delantre del so compañeru d’equipu, que foi sextu, pero ensin facer munchu ruíu. Pela so parte, Räikkönen vióseles con Verstappen un bon cachu de la carrera, pal esfrute de los fans, que poco más d’aición pudieron ver en pista. Dambos pilotos son cuartu y quintu nel campeonatu.

– McLaren: la carrera foi un desastre pa Button y aburrida p’Alonso, según elli comentó. El británicu tuvo problemes col frenu que’l so equipu intentó resolver por radio cayendo asina, según los comisarios, n’una violación del reglamentu los mesaxes que se puen tresmitir, dalgo que nin pilotu nin equipu nin fans compartíen. Dempués d’un drive through y de pasar un tramu de la carrera penúltimu, tuvo de retirase por una fuga d’aceite nel coche que l’equipu espera nun seya recurrente p’Alemaña. Alonso foi un exemplu de regularidá quedando séptimu en carrera y tamién nes otres sesiones de llibres y calificación, y sumando seis puntos vitales pal equipu.

– Toro Rosso: Que Kvyat nun ta bien dende que lu movieron a Toro Rosso ye evidente, y más cuando’l so compañeru d’equipu rara vez queda fuera los puntos en carrera demientres elli queda perdíu pelos puestos baxos de la tabla. El pilotu rusu ta poniéndo-ylo difícil a los que quieren que siga na Fórmula Uno pa 2017. Sáinz foi octavu, per detrás d’Alonso, faciendo una bona carrera y otra vuelta superando al so compañeru d’equipu.

– Williams: Dicíemos que Silverstone nun fuera’l so gran premiu, pero podíemos dicir lo mesmo de Hungría: Massa viose fuera de Q1 el sábadu, polo que yá empezó cola torga d’entamar la carrera bien atrás. El domingu nun foi muncho lo que pudo facer n’un circuitu onde adelantar ye complicao y quedó nel puestu dieciocho. Pela so parte, Bottas foi novenu, dalgo meyor que’l so compañeru d’equipu pero ensin brillar. Dambos pilotos tán a la espera de que se confirme si siguen pa 2017 na escudería inglesa, polo qu’estos resultaos nun-yos tán faciendo nengún favor.

– Force India: Hülkenberg foi quien a facese col últimu puntu quedando décimu, xusto perriba’l so compañeru d’equipu que se vio torgáu n’un pit stop que-y condicionó’l restu la carrera. Force India sigui avanzando seliquino, y viendo les debilidaes de Williams, nun sedría raro que los superaren nes prósimes carreres.

– Renault: Yá dicíemos nel resume de la carrera que Palmer foi unu de los meyores en carrera, y tuvo a piques de consiguir puntos, los primeros na so carrera en Fórmula Uno, y una gran ayuda pa Renault. Pero un trompu, que nun foi culpa d’elli del too polo que pudimos saber dempués, fexo qu’esta oportunidá desapaeciere, dexándolu nel puestu doce, per delantre de Magnussen que foi décimoquintu.

– Haas: L’equipu norteamericanu completó una carrera discreta, con Gutiérrez daqué inspiráu en comparación col so compañeru, anque nun pudieron pasar del puestu trece (pal pilotu mexicanu) y catorce (pa Grosjean). Ensin escaecer que ye esti’l so primer añu nesta competición, nun-yos queda otra que siguir ameyorando pa siguir sumando carreres buenes, como les que yá tienen fecho, y puntos que los ayuden a subir na clasificación de constructores.

– Sauber: Nun esperábemos una recuperación milagrosa en dos díes pa la escudería suiza, pero polo menos pudimos ver a dambos coches acabar y faciéndolo relativamente bien en pista. Nasr tuvo dellos momentos interesantes y anque Ericsson nun pudo pasar del puestu veinte ya’l so compañeru foi décimoséptimu, les sensaciones son distintes. Coles preocupaciones económiques agora a un llau, quiciábes l’equipu pue centrase n’ameyorar lo suficiente pa pasar a Manor nel mundial de constructores.

– Manor: Tolo que nun seya terminar últimu en carrera pa los Manor ye un llogru, y nesti casu Wehrlein pudo ser décimonovenu perriba’l so compañeru d’equipu que foi vixésimoprimeru y d’Ericsson. Haryanto nun ta na meyor de les posiciones arrodiau de rumores que dicen que’l so asientu nun ta aseguráu por cuenta’l dinero que nun llega a Manor de la mano de los sos sponsors (Haryanto trayía dinero del gobiernu d’Indonesia, el so país d’orixe). Fálase de la posibilidá de Vandoorne sentándose nel so asientu pa Hockenheim, por nun tener que competir na Superfórmula hasta finales d’agostu, pero entá nun hai nada confirmao per nengún de los dos llaos.

Como yá pasara en Barcelona, dempués del Gran Premiu de Gran Bretaña, llegaron los test de Silverstone. Güei y mañana vamos poder ver a los equipos coles futures estrelles de la Fórmula Uno, y dalgún qu’otru veteranu, y tamién a Pirelli que güei tinía a Wehrlein al volante pa facer pruebes coles sos gomes de cara a 2017.

Pero nun tamos equí pa falar de los test, si non p’analizar, lo que fexo cada equipu’l domingu pasáu:

– Mercedes: Dempués de cuatro victories en cinco carreres, paez que yá toos entamen a pensar qu’a Hamilton nun-y va costar muncho pasar perriba’l so compañeru d’equipu como yá fexo l’añu pasáu. Y la verdá ye que esti fin de selmana pasáu Hamilton diba con una ración extra de velocidá. Dempués de la carrera en Silverstone, cola penalización de Rosberg, dambos pilotos tán separtaos namai que por ún puntu, y tol mundu-y da la victoria a Hamilton nel prósimu gran premiu…

– Red Bull: Naide nun tinía duldes de que Ricciardo yera un bon pilotu, y más dempués de velu superar a Vettel na so temporada xuntos na escudería del toru colloráu. Siguimos ensin tener duldes, pero podemos confirmar yá que’l so compañeru agora, Verstappen, lu ta poniendo en valor al tar faciéndolo meyor qu’elli entá, hasta agora. Volvió a subise al podiu esti fin de selmana, dempués de facelo yá n’Austria, y foi quién a poner a Rosberg en problemes. Anque quedó terceru, cola penalización de Rosberg, acabó siendo segundu. El so compañeru, foi cuartu y sigui necesitáu d’un podiu que nun lu dexe na solombra del holandés.

– Ferrari: Tercer cambiu de caxa de cambios pa Vettel y carrera bastante discretina pa dambos pilotos. L’alemán foi penalizáu por un incidente con Massa con cinco segundos que nun afeutaron la so posición final, novena. Räikkönen tuvo meyor suerte, quedando quintu ensin dar muncha guerra.

– Force India: Ensin facer milagros, Force India consiguió facer una bona carrera esti domingu, quedando Pérez sextu y Hülkenberg séptimu. Nun ye tanto como consiguir pisar el podiu, dalgo qu’entá Hülkenberg nun consiguió esta temporada, pero Force India nun pue dexar de sumar puntos en carreres que nun-yos favorecen, como yera esta. Bon trabayu.

– Toro Rosso: Anque Kvyat tuvo una meyor carrera y menos problemes esti domingu, el so compañeru siguió quedando perriba d’elli, n’octavu puestu, demientres que’l rusu tinía de conformase col últimu puntu disponible. La escudería italiana sigui sumando puntos pocu a pocu, faciendo una bona temporada, a pesar de los cambios na so aliniación de pilotos y de les irregularidaes de Kvyat. Hai quien diz que nun va siguir l’añu que vien, demientres Sáinz yá foi confirmáu por Toro Rosso. La silly season ta a piques d’entamar…

– Williams: Fin de selmana pa olvidar en Williams. Nin Massa nin Bottas fueron quién a quedase nos puntos énte’l públicu de casa y amás dieron una imaxe bien probe. Cuenten con tornar con más fuercia pa Hungría pero la verdá ye que cada vez ta más claru’l pasu atrás de la escudería comparao colo que ficieron l’añu pasáu. Tienen falta ameyorar muncho pa les carreres que queden.

– McLaren: Alonso pasó tol fin de selmana dientro los puntos, calificó entre los diez primeros, pero una vez en carrera, nun foi quien a pasar del puestu décimoterceru ente fallos d’estratexa del equipu y problemes pa mantener el coche dientro la pista. Button tuvo una mala sesión de calificación y pasó tol fin de selmana con problemes, asina que’l so puestu doce nun sorprende. Si acasu queda-y el probe consuelu de quedar perriba’l so compañeru d’equipu otra vez. Sigui la so maldición nel gran premiu de casa.

– Sauber: una amuesa de la situación na que ta l’equipu ye que nun tean presentes nos test de Silverstone de güei y mañana. El domingu, dempués de recuperar a Ericsson tres del so accidente del sábadu, acabó Nasr namás, faciendo una bona carrera dientro de lo llimitáu que ta’l coche. Ericsson aguantó menos de la mitá la carrera dempués de que’l so coche presentare dellos problemes que nun-y dexaron continuar.

– Haas: L’equipu norteamericanu siguen colos sos altibaxos, faciendo perbones carreres unes veces ya quedando fuera los puntos o acabando con un solu coche n’otres. En Silverstone, sólo acabó Gutiérrez y foi décimosextu.

– Renault: Otra carrera ensin puntos ya ensin pilotos en pista. Renault continúen coles sos probes actuaciones (anque naide nun-yos pide munchos más viendo cómo terminaren l’añu pasáu). De xuru yá tán pensando no que puen dar de sí pa 2017. Siéntense voces que dicen que Palmer podría nun siguir, anque paez que Magnussen tien l’asientu aseguráu. Nun mos paez que, nesti casu, el problema seyan los pilotos si non más bien el fechu de que Renault entamó con desventaxa esta temporada. Tolo que seya siguir palante ya aguantar va ser bueno pa ellos nesti 2016.

– Manor: Dempués de la felicidá d’Austria, llegó la deceición de Silverstone con dambos coches fuera de carrera. La realidá de Manor ye que siguen dando pasinos pequenos y tienen de pensar (y nosotros tamién) de que tolos pasos alante, mesmo que-yos pasa a Renault, son positivos pa ellos, y más cuntando col fechu de que yá nun son l’últimu equipu de la parrilla. Tienen de lluchar por defender esi puntu que-yos pon perriba Sauber nel mundial de constructores porque pa ellos va ser daqué mui importante pensando en 2017.

Dempués de los test en Silverstone, la Fórmula Uno dexa pasar unos díes enantes de tirar pa Budapest pa la undécima carrera del añu y a la espera de ver si Hamilton se fai col control del campeonatu o Rosberg despierta y recupera la bona racha cola qu’entamare la temporada.

Yá vos cuntamos lo que foi’l primer gran premiu d’Europa en Bakú y toca agora dir pasando la lupa perriba los equipos pa ver cómo-yos trató’l nuevu circuitu:

– Mercedes: como vos dicíemos ayeri, la escudería alemana viose afeutada (nel casu de Hamilton) pola complexidá de los sos propios coches y la prohibición de tresmitir información pela radio a los pilotos, torgando una carrera que yá venía coxa de la calificación del sábadu. Nel otru llau del box, Rosberg tornó a sorrir dempués de dos carreres nes que nun se subía al podiu.

– Ferrari: Vettel tomó la decisión de nun siguir les indicaciones del so equipu no que cinca a estratexa de carrera, dalgo que-y vieno bien, teniendo en cuenta que quedó segundu y nun dio muestres de debilidá nes cincuenta y ún vueltes del gran premiu. El so compañeru, tamién afeutao pola falta información sobre lo que-y pasaba al so coche, terminó cuartu.

– Force India: suel ser normal que Force India fagan delles carreres potentes y terminen llueu ensin aliendu por cuenta l’esfuerciu escomanáu que ye pa ellos tar na F1 a l’altura los equipos grandes. De toles formes, nun se ponen colloraos a la hora de facer podios, ya otra vuelta pudimos ver a Sergio Pérez facese col tercer puestu. Hülkenberg tuvo dalgún problema en pista, na salida, pero tamién consiguió metese nos puntos.

– Williams: Bottas paecía que diba ser candidatu a repetir podiu viendo’l so rendimientu nos entrenamientos llibres, pero al final nun lo consiguió, anque dambos pilotos fueron quien a metese ente los diez primeros.

– Red Bull: fueron noticia por nun ser quién a poner a funcionar les gomes pa poder plantar cara a los d’enriba, anque puntuaron dambos la sensación foi que nun tuvieron a l’altura de lo que s’esperaba d’ellos.

– McLaren: Button tuvo cerca de metese nos puntos y anque na escudería británica nun tán pa cellebraciones, ye verdá que pudimos velu en pista faciendo adelantamientos y plantando cara a otros pilotos. Alonso tuvo de retirase, sumando otra carrera más en blanco.

– Sauber: cualesquier cosa bona que-yos pase yá ye motivu d’allegría dempués de les selmanes de problemes que vienen arrastrando. Dicir d’ellos qu’acabaron con Nasr nel puestu doce pue nun sonar a muncho, pero paeznos importante velos fuera de los últimos llugares de la parrilla. De toles formes, siguen teniendo falta d’ameyorar muncho’l so rendimientu.

– Haas: Gutiérrez tuvo problemes na salida (con Hülkenberg) y Grosjean fexo una bona carrera anque nun nos queda claro si tuvo cómodu en dalgún momentu d’ella. Hai quien diz que yá pasó la suerte del principiante que se-yos suponía siendo nuevos esti añu, pero paeznos que ye más falta vezu pa según que coses que falta de capacidá de saca-y partíu al coche. Taremos pendientes en próximes carreres.

– Renault: que terminen los dos coches ta convirtiéndose n’utopía pa Renault, asina qu’esti gran premiu entra dientro d’esa definición. L’apuesta de Magnussen de dir a una parada terminó dexándolu nel puestu catorce dempués de tar acariciando los puntos demientres parte la carrera.

– Manor: foi una pena ver a Wehrlein dicir que los sos frenos yá nun daben pa más y retirar el coche al poco, pero foi un prestu velu a él y al so compañeru d’equipu plantando cara en pista. Bakú ye un bon circuitu pa Manor y de xuru pue convertise nel so nuevu Mónaco.

– Toro Rosso: colos dos coches fuera de carrera, poco podemos comentar de Toro Rosso. Kvyat casi nun pudo facer vueltes pues el so problema apaeció bien ceo, demientres que Sáinz entá pudo esfrutar un poco más del gran premiu enantes de retirase, dambos por problemes cola suspensión.

Nun hebo demasiaes sorpreses nel gran premiu, anque sí ye verdá que los pilotos tuvieron bones pallabres pal nuevu circuitu. Les cais que nos paecíen estreches terminaron faciéndose anches énte tantu adelantamientu. La próxima parada va ser Austria: damos el saltu del calor de Azerbaixán ya unu de los circuitos más llargos del calandariu, al Red Bull Ring de Spielberg ya’l so verdor, unu de los circuitos más curtios d’esti añu.

A vegaes entá nun dixirimos la carrera y yá tenemos enriba otra, como nos pasa esta selmana. Cuando terminéis de ller esto, probablemente yá teamos preparando la previa pal prósimu en Bakú. Pero de momentu, vamos echa-y una güeyadina a lo que ficieron los equipos nel gran premiu de Canadá del domingu pasáu:

– Mercedes: paez qu’oscureció un pocu pel lláu del garaxe de Rosberg qu’empezara la temporada ensin dexar de ganar y yá lleva dos carreres fuera del podiu y col so compañeru no más alto d’elli. Entá tien 9 puntinos de marxe, que puen volar n’un soplíu nel prósimu gran premiu. De toles formes, Hamilton nun pue tar 100% contentu colo fecho en Canadá en cuantes a la salida. Sigui siendo la so pesadilla.

– Ferrari: de lo que más se faló ensin duldes nesta carrera foi de la salida de Vettel. Tiénnos avezaos a estes coses pero el problema vien cuando nun ye quién a consiguir qu’esa ventaya na salida continue hasta’l final, seya por mala estratexa, seya porque’l coche nun da de sí…Entá siguimos esperando la victoria de la escudería italiana nesta temporada. Y demientres Vettel nel podiu carrera sí, carrera non.

– Williams: naide nun sabe cómo Bottas, dempués d’un finde normalín, consiguió quedar terceru, pero quiciás venga de que-y presta esti circuitu y de que yá tinía ganes de facer daqué interesante pa dir callando rumores (la “silly season” empezó enantes de lo normal). Nun tuvo tanta suerte Massa, que tuvo de retirase y al que de xuru estos rumores nun faen nengún favor yá que son munchos los que yá dan por fecha la so retirada al final d’esta temporada y especialmente si les coses con Williams nun pintan meyor. Veremos en qué queda too n’unos meses.

– Red Bull: pue dicise que, anque fuera del podiu, dambos pilotos ficieron una carrera bien bona, sobre too nel casu de Verstappen que foi quién a mantener a Rosberg detrás, resistiendo la so presión y los sos intentos de pasalu. Lo de Mónaco yá quedó atrás ya en Canadá tornemos a ver la so meyor versión. Nel casu de Ricciardo, anque nun brilló tanto porque la carrera nun-y ufrió la oportunidá (hai que dicilo too) tamién fexo un bon trabayu, pocu consuelu de xuru, pal pilotu australianu.

– Force India: l’equipu de Silverstone taba en toles quinieles pa facelo bien en Canadá, y anque too ye ameyorable, tener a dambos pilotos dientro los puntos ye daqué que Force India tendría de tornar en rutina si quieren quedase col quintu puesto nel mundial de constructores. Tanto Hülkenberg como Pérez llucharon pa consiguir los sos puestos, amosando una solidez que siempre suel meter miéu a los rivales, sobre too viniendo d’un podiu en Mónaco.

– Toro Rosso: son munches les persones qu’aplaudieron el carrerón de Sáinz esti fin de selmana, y la verdá ye que, como dixeron otros tantos, el pilotu madrilanu nun dexa de crecer con cada gran premiu, incluso dempués de vese torgáu na calificación y llueu en carrera saliendo vixésimu. Ta pasando-y la mano pela cara al so compañeru d’equipu, agora Kvyat, qu’otra vuelta más anduvo perdíu fuera los puntos. Tenemos munchu miéu que teamos presenciando la que va ser la so última temporada en Fórmula Uno a nun ser qu’ameyore muncho les coses.

– McLaren: los comentarios d’Alonso al terminar la carrera falen por sí solos (aburrióse) anque paeznos que siguen ensin facer nengún favor a los intereses del so equipu que sólo pudo acabar con un coche y, amás, fuera los puntos. Button yá tuviera de cambiar la unidá de potencia el vienres (una nueva que-y punxeren, la tercera de la temporada, y que-y dio problemes) teniendo de montar la qu’usare en Mónaco y que, na novena vuelta, dexó de funcionar.

– Haas: una de les coses que ta definiendo a Haas dende l’empiezu la temporada ye la so inconsistencia pa entrar nos puntos, pero a la vez la so capacidá pa terminar carreres, daqué que nel so momentu yera una prioridá. Tán lloñe de tar a l’altura de los equipos de la parte alta de la tabla, pero tamién de quedase nos puestos más baxos. Nesti casu quedaron dambos fuera de les posiciones de puntos, con Gutiérrez décimoterceru xusto perriba Grosjean, décimocuartu.

– Sauber: otra carrera de Sauber ensin facer munchu ruíu, lo cual vien siendo positivo pa la escudería yá que los sos pilotos nun llevanten cabeza. Dempués del incidente en Mónaco, nesta carrera poco pudieron facer y otra vuelta más, alloñaos de los puntos, consiguieron terminar con dambos coches pero ensin convencer.

– Renault: tol mundo sabía que diba ser una temporada complicada pa la escudería francesa, pero si amás la suerte nun acompaña, atopamos a Magnussen décimosextu, dempués de nun poder nin siquiera participar na sesión de calificación, y Palmer fuera de carrera na vuelta dieciséis por problemes col coche. Entá-yos queda muncho que trabayar.

– Manor: l’oxetivu de dir acabando carreres con dambos coches ta cumpliéndose dende yá va dellos grandes premios, anque seya los últimos o aprovechando’l patinazu de dalgún de los “grandes”. Cuidamos que dientro poco entamarán a mirar un poco más arriba, intentando averase más a Haas y dexando atrás dafechu a Sauber.

Siempre que llega Mónaco éntranos un dalgo que mos fai creyer que mos espera un carrerón. Munches veces ye asina, otres ye namás un trámite. Quiciás lo d’esti domingu nun foi un carrerón, pero nun va entrar na hestoria como un GP aburríu. Tuvo cosines, que vamos dir analizando agora, equipu per equipu:

– Mercedes: la gloria tornó a les manes de Hamilton. Dempués de seis meses ensin pisar lo más alto del podium, fízose cola victoria nes cais de Montecarlo. Esto nun dexa de ser bueno p’apertar más el campeonatu y que Rosberg nun lo crea too fecho. El pilotu alemán tevo na solombra la mayor parte la carrera, teniendo dexar pasar al so compañeru d’equipu pa que pudiere tirar palante cuando elli nun podía. Cuidamos qu’en Canadá volverá a dar guerra pelos puestos d’arriba, pero esti fin de selmana namás pudo ser séptimu.

– Red Bull: siempre se diz de Ricciardo que ye unu de los pilotos más risueños de la parrilla, ye raru nun velu sorrir. Red Bull consiguiolo nesti gran premiu, dempués d’un error n’un cambiu de gomes. Ricciardo pidio-yos qu’aforraren en desplicaciones. Quedemos toos coles ganes de ver a Ricciardo ganar la so primer carrera en 2016 dempués d’un bon fin de selmana (con pole’l sábadu) pero nun taba pa él. Pel otru llau del box, menos sorrises entá: Verstappen nun pudo siguir brillando como lo fizo en Barcelona, y dempués d’un accidente’l sábadu en calificación, volvió a pasa-y lo mesmo en carrera.

– Force India: dambos pilotos completaron una bona carrera, anque ensin duldes el pilotu del gran premiu foi Checo Pérez. Terminó terceru, ensin dase un respiru intentando alcanzar a Hamilton y Ricciardo. Nun lo consiguió, pero dio una imaxe perbona de lo que ye capaz en pista. Como casi siempre, sacando beneficiu de les carreres atípiques. Pa variar esta temporada, Hülkenberg pudo acompañalu nos puntos, siendo sextu.

– Ferrari: yá lo dicíemos nel post comentando la carrera, el gran premiu de Vettel foi más bien discretín, sin faer muncho ruíu acabó cuartu, demientres el so compañeru tenía de retirase por un accidente na primer parte la carrera. Cada gran premiu vamos creyendo menos nes pallabres que prometíen que diben dar guerra a Mercedes por victories. Nun llegó’l día entá.

– McLaren: yá van dos carreres nes que dambos McLaren terminen nos puntos, seña de que la escudería sigui ameyorando. Ta claro que nun son estos los puestos nos que quieren quedar, pero queda-yos per delantre muncha temporada pa siguir atacando los puestos cimeros. Alonso consiguió terminar en quintu llugar, con Button novenu.

–Toro Rosso: l’únicu pilotu de la escudería italiana que fexo los deberes foi Sáinz. Kvyat tuvo problemes namás empezar la carrera y llueu tuvo un accidente con Magnussen que los dexó a dambos fuera. Ensin embargu, el so compañeru consiguió terminar octavu, sumando puntinos valiosos pal equipu.

– Williams: la deceición más grande del gran premiu quiciás foi Williams. La deceición yá vinía del sábadu, onde tampoco nun dieron una bona imaxe. El domingu, Massa namás pudo facese con un puntu, quedando décimu, demientres Bottas tuvo perdíu en pista tol gran premiu y acabó nel puestu doce.

– Haas: nun suel dase que Gutiérrez faga meyores carreres que Grosjean, pero si foi quién a facelo en Mónaco onde quedó a un pasu los puntos, demientres el so compañeru tenía un encontronazu con Kimi (que casi lu lleva per delantre intentando siguir en pista dempués del so accidente) y sólo podía terminar nel puestu trece, namás per delantre de los Manor.

– Manor: en Mónaco siempre s’espera que seyan de los que más provechu saquen, anque nun tocó esta vez. Ta claro que volver facer lo que fexo hai dos años Bianchi ye complicao, pero quiciás esperábemos un poco más d’ellos. Haryanto acabó últimu, ya’l so compañeru, axuntando delles penalizaciones, acabó per delantre d’elli nel puestu catorce.

– Sauber: paeznos que lo peor que-y pue pasar a un equipu que ta pasándolo mal económicamente ye ver un accidente ente los sos dos pilotos, peleando por posiciones baxes. Nasr nun quería dexar pasar a Ericsson, Ericsson quería pasar y l’equipu asina-y lo dixo a Nasr. Al final de la hestoria atopamos a dos Sauber atravesaos en pista y fuera de carrera al pocu.

– Renault: la verdá ye que’l principiu de temporada de Palmer nun ta siendo mui bona, pesie al puestu once que fixera na primer carrera. En Mónaco, mesmo que-y pasó a Verstappen, nun se-y vio cómodu y eso quedó espeyao en dellos accidentes nos llibres y tamién en carrera, que lu dexaron fuera. Magnussen tamién tuvo lo suyo, anque ensin culpa, yá que foi n’un accidente con Kvyat onde terminó’l gran premiu pa elli. Siguimos esperando ver a dambos pilotos dientro los puntos.

Dempués d’esti análisis, pasen tolos güeyos a ponese enriba’l circuitu Gilles Villeneuve. Vamos pa Canadá.

Entá nun tamos recuperaos de lo que dio de sí’l domingu y yá tán los coches en pista. Pero non, nun ye otru GP si non el primeru de los test que toquen esti añu ente carreres (ayeri martes y güei toca test en Barcelona, y dempués del GP de Silverstone va tocar otra vuelta). Ensin embargu, vamos dexar los test pa otra entrada y centranos nel análisis de lo que ficieron los equipos el domingu pasáu:

– Red Bull: podíemos llegar a imaxinar que Red Bull ganare dalguna carrera esti añu, pero nun creo que naide nunca albidrara que diba ser el recién llegáu Verstappen quien lo diba faer y menos na primer carrera namás xunise al equipu. Dexando de llau un pocu tolos récors qu’algamó el pilotu holandés, nun dexa de ser importante tar pendientes de Red Bull nes carreres que vienen. Ricciardo lleva dende qu’entamó la temporada quedando a les puertes del podium, y nun creyemos que-y quede muncho pa consiguilo.

– Ferrari: ye xusto dicir que Ferrari por fin tuvo una carrera ensin mayor torga qu’un rapaz de 18 años conduciendo un Red Bull. Anque anduvieron floxos el sábadu, casi deceicionando coles sos posiciones, el domingo sacaron un bon puñáu de puntos, faciendo qu’agora Kimi seya’l segundu pilotu na clasificación xeneral.

– Williams: Massa llogró sorrir un pocu dempués de la llaceria que foi la so calificación el sábadu, quedando fuera na Q1, pero en carrera nun fueron los que más dieron que falar. Discretos, faciendo’l so trabayu y dientro los puntos.

– Toro Rosso: dicen que correr delantre la to xente date una inyeicción d’adrenalina importante. Debe ser lo que-y pasó a Sáinz que na primer curva de la primer vuelta, púnxose terceru per delantre los Ferrari. Bien ye verdá que nun duró muncho, pero la so sexta posición diz bastante del bon gran premiu que fexo. Kvyat ocupó’l décimu puestu n’una carrera discretina tres tar nel puntu de mirar demientres tol fin de selmana.

– Force India: el comentariu que facíemos el GP pasáu pal equipu pue usase otra vuelta equí: buena carrera de Checo Pérez, qu’acabó nos puntos, mala suerte pa Hülkenberg. Y van…

– McLaren: esti GP nun foi tán dulce pa la escudería británica como foi’l pasáu pero nun foi amargu tampoco. Alonso tuvo de retirase y quedó namás en manes de Button el poder puntuar. Féxolo, dos puntinos que saben a poco pero que nun dexen de ser importantes pa la moral del equipu.

– Haas: Grosjean tuvo d’abandonar y Gutiérrez consiguió, por fin, acabar una carrera n’un puestu bastante decente (foi undécimu) y dando bona imaxe. Agora sólo-y falta facelo en toles carreres que queden.

– Renault: nun lo ficieron mal, anque Magnussen sufrió una penalización por chocar col so compañeru d’equipu (taba’l GP pa ello…). Nun entraron en puntos, pero nun paez qu’heba quexa de lo que foi la carrera.

– Sauber: vímolos pelease ente ellos en pista, y pocu más. Paeznos que lo que más-yos convien agora mesmo, tando como tán les coses dientro l’equipu, lo meyor ye que sigan completando carreres, intentando consiguir puntos y ensin metese en munchos problemes.

– Manor: otra carrera colos dos coches terminando y ensin mayores problemes. Nel fin de selmana siguen tando ente los que más velocidá punta marquen lo que nos fai pensar no que daría de si esi coche si nun fuera sólo’l más rápidu nes rectes.

– Mercedes: como vos diximos na crónica, diose milenta vueltes al accidente de dambos pilotos na primer vuelta, non sólo por como pue afeutar al equipu’l nun puntuar n’un GP (anque cuntamos qu’esto nun pase otra vez) si non tamién poles reaiciones dientro la escudería y ente los pilotos. Paez que nun dio muncho más de sí y que Mercedes yá tán pensando en Mónaco, onde Rosberg espera triunfar otru GP más y Hamilton cambiar la so suerte, ensin sorpreses.

Quien viera’l GP del domingu pasáu sabrá qu’anque tuvo dellos momentos inspiraos, nun foi lo que se diz un carrerón no que cinca a los adelantamientos y batalles en pista. Ensin embargu, tuvo delles cosines que paga la pena comentar:

– Mercedes: Rosberg sigui faciendo plenos y la mala suerte amarrada al coche de Hamilton. El pilotu inglés taba convencíu de que si nun llega a tener nengún problema na carrera, tuviérala ganao. Eso ye lo que diz elli, pero nun tien pinta de que daqué pueda frenar a Rosberg que nun seya el propiu Rosberg.

– Ferrari: falando de suerte, nun se pue dicir que Vettel tea teniendo muncha esti añu. Toles promeses al principiu de temporada tán pendientes, mesmo que la necesidá d’amosar que tienen un coche en condiciones pa plantai cara a Mercedes. De toles formes, el propiu Räikkönen yá dixo que Ferrari nun ta a l’altura de la escudería alemana.

– Williams: metemos-y muncha caña a Williams pero ye que dende l’empiezu la temporada pensábemos que diben dar muncha más guerra de la que tán dando dempués del so 2015. Bien ye verdá que floxearon en delles coses, pero prometíen muncho más de lo que tán dando de sí. Nesti GP, anque nun fueron mal, tampoco nun fueron quién a sacai más partíu a la primer llínia de la parrilla. Tendremos d’esperar a Barcelona.

– McLaren: beneficiándose de la fiesta que foi la primer parte de la carrera, atopamos el McLaren d’Alonso sextu y el de Button décimu. Nun se vía dalgo asina dende Hungría 2015, que se diz pronto. Paez que na escudería británica yá puen entamar a sorrir un pocu, anque sea hasta Barcelona onde esperen pasalo pior qu’en Rusia.

– Renault: cuando falábemos al principiu de cosines que comentar, ésta yera una d’elles. Renault consiguió los sos primeros puntos gracias a un Kevin Magnussen inspiráu que terminó la carrera séptimu. El so compañeru nun dio tanto de sí, pero paeznos que, mesmo que McLaren, Renault tienen motivu pa sorrir polo menos dientro les prósimes dos selmanes.

– Haas: tornaron a metese nos puntos, en posición más discreta esta vuelta, pero dientro, que ye lo importante pa ellos. Grosjean fexo una bona carrera, mientres el so compañeru quedó perdíu ente los puestos últimos, amosando que l’estáu de forma del francés ye mui superior, pel momentu, al del so compañeru Gutiérrez.

– Force India: dambos pilotos cumplíen 100 GPs en Sochi, pero cellebráronlo de formes distintes. Checo Pérez entrando nos puntos, Hülkenberg quedando tiráu na primer vuelta. La verdá ye que’l pilotu alemán nun sal d’una pa metese n’otra, y entá nun tuvo un GP tranquilu y consistente, d’esos a los que nos tien avezaos.

– Toro Rosso: yá diximos ayeri que los comisarios de la carrera fartucárense a penalizaciones, y l’únicu pilotu que sobrevivió a Sochi, Sáinz, viose afeutau por una d’elles. Sáinz acabó nel puestu once en pista, pero los 10 segundos que-y amestaron como penalización por echar del trazáu a otru pilotu, valieron pa que quedare nel puestu doce. El so compañeru, Verstappen, vio como’l coche-y quedaba paráu na vuelta 33, quedando fuera de carrera.

– Red Bull: de xuru que si dalgún equipu quier pasar rápido la páxina de Sochi, tien de ser Red Bull. Ente la qu’entamó Kvyat al principiu y el baxu rendimientu que se-yos vio en carrera a dambos (quedaron de fechu fuera los puntos, Ricciardo quedó l’once gracies a la penalización a Sáinz) paeznos qu’esta carrera va ser la que más ceo van quitar de la so cabeza esti añu. Amás, les últimes actuaciones del pilotu rusu nun tan xugando al so favor n’una escudería que desixe tanto a los sos pilotos. Nes carreres vinientes va tener tolos güeyos enriba d’elli y de xuru nun se-y van permitir más errores.

– Sauber: en dalgún momentu la carrera, Ericsson tuvo nos puntos y paecía que Sauber podíen dar la sorpresa. Pero non. Nasr foi otru de los pilotos qu’arrastraron penalización (cinco segundos) ya’l so compañeru terminó desinflando pa quedar nel puestu catorce.

– Manor: Haryanto nun pudo nin siquiera intentar facer daqué nesta carrera, yá que mesmo que Hülkenberg, quedó fuera nos primeros metros del GP. Ye buena pena porque, anque paez que ta más que claro que Wehrlein amosa meyor rendimientu qu’elli, ta teniendo demasiaos problemes nes carreres que tampoco nun-y dexen dar el 100% y reivindicase un pocu. No que cinca al so compañeru d’equipu, diose’l prestu d’adelantar a dellos pilotos en pista, dexando a los sos xefes percontentos. Hai que dicir que dambos coches marcaron de les velocidaes puntes más altes del fin de selmana.

Agora tócanos poner los güeyos enriba’l circuitu de Montmeló pa, dientro de menos de dos selmanes, volver ponenos en plan d’esfrutar el quintu GP d’esta temporada.

Demientres tolos equipos tán pensando yá na siguiente ronda de la temporada, nós paramos un pocu pa echar una güeyada a lo que foi l’últimu gran premiu dende’l puntu vista los equipos. Nun hai qu’escaecer que tolos pilotos fueron quien a terminar la carrera, anque la so suerte en carrera foi bien distinta:

– Mercedes: anque nun podemos falar de desastre como tal, el fin de selmana pa Lewis Hamilton foi lo más paecío. Tando avezáu a los puestos de delantre, un séptimu sabe a poco, sobre too si quien ta no cimero ye’l to compañeru d’equipu y rival. Nun tenemos duldes de que Hamilton nun tardará en dar guerra otra vuelta, pero l’entamu la temporada pillolu col pie cambiáu…o con Rosberg mui inspiráu, nun queremos quitar méritu al alemán. El domingu, pesie a la salida, amosó otra vez por qué ta onde ta con 34 puntos perriba’l restu.

– Ferrari: Quiciás podemos entender a Vettel cuando-y echó la bronca a Kvyat al final la carrera: la maniobra del rusu casi-yos cuesta la carrera a dambos pilotos de Ferrari y a lo meyor podía tenela evitao. O non. Asina son les carreres, como dicía’l pilotu de Red Bull. Seya como fuera, tanto Vettel como Räikkönen salvaron los muebles, Vettel quedando segundu y Kimi, dientro lo malo, quintu.

– Red Bull: Yá Ricciardo nos dexare cola boca medio abierta al quedar segundu na calificación, y anque diben bien, nun creyemos que muncha xente esperare velos ehí enriba: Kvyat terceru, Ricciardo cuartu, pinchazu incluyíu. ¿Tará entamando Red Bull a garrar confianza o esi podiu sedría solo casualidá?

– Williams: Massa dicía que taba contentu cola so carrera, mesmo que Bottas. Siendo sextu y décimu, nun ye pa dici-yos que non, pero siguimos esperando (y yá van tres carreres) esperando pol puxu que-yos víemos l’añu pasau.

– Toro Rosso: Dambos coches dientro los puntos, y otru gran premiu ensin sustos. Los mozos de la parrilla tán entamando a asentar la cabeza, anque siguen ensin mieu a la hora de planta-yos cara a los demas pilotos. Da-yos igual que seyan campeones del mundo o rookies. Y con ello, vienen los puntos: octavu Verstappen, novenu Sáinz.

– Force India: Dicía Nico Hülkenberg en Twitter que paez qu’esti añu lu mirare un tuertu no que va de temporada, y la verdá que nun se pue dicir que l’alemán tea teniendo muncha suerte nes carreres. El so compañeru foi undécimu, demientres qu’elli terminó nel puestu quince. Con Force India ta pasándonos apaecío a con Williams: siguimos esperando que despeguen.

– McLaren: esperábemos muncho más d’ellos. Pasaron bona parte la carrera ente los diez primeros, pero al final, terminaron quedando práuticamente igual que na calificación. Button arriesgó col últimu stint y les gomes, Alonso dixo que nun daba más de sí’l coche. Suma y sigue.

– Haas: la suerte qu’acompañó a la escudería americana nes dos primeres carreres nun tuvo en China. Gutiérrez consiguió quedar primero que’l so compañeru (foi décimocuartu y Grosjean décimonovenu) n’una posición bastante estremada de lo que víemos en Sakhir o Melbourne. Va toca-yos siguir trabayando nes próximes carreres.

– Sauber: gran premiu discretu pa Sauber. Ensin munchu ruíu, dambos pilotos acabaron la carrera, en puestos de la parte baxa pero ensin quexes. Nasr llevó lo d’él nel coche con Hamilton pero pudo completar el gran premiu. Ericsson foi décimosextu y elli vixésimu.

– Renault: Magnussen intentó convencenos de que Renault tenía motivos pa sorrir, asina que dalgo tien de saber que nun sepamos nosotros porque la verdá ye qu’entá nun-y vimos la bona cara al resurdíu equipu francés. El danés foi décimoséptimu y el so compañeru d’equipu, Palmer, terminó últimu.

– Manor: Wehrlein de xuru tendrá yá escaecío l’error del sábadu que lu dexó fuera de la calificación bien ceo, y enfotaráse nel fechu de que dambos coches terminaron la carrera y nun fueron últimos. Wehrlein acabó décimuoctavu y Haryanto vixésimoprimeru.

Tercer carrera de la temporada y vuelta al sentíu común y al formatu de clasificación al que tábemos avezaos hasta l’añu pasáu. Irónicamente la fórmula vieya trexo sorpreses nuna sesión de clasificación na que viemos a Red Bull asomar el focicu en primera llinia de parrilla y a Hamilton que nun pudo marcar tiempu por un problema mecánicu.

Yá en carrera, la salida foi una vez más el puntu débil de Mercedes onde Rosberg vio cómo Ricciardo-y garraba la primer posición, pa recuperala un par de vueltes depués ayudáu pola diferencia de potencia ente los coches mientres Ricciardo topaba cola torga d’un pinchazu que lu obligaba a entamar una remontada qu’acabaría na cuarta posición. Lewis Hamilton volvía a teneles nes primeres curves con Felipe Nasr teniendo que camudar el morru del coche y Kimi tuvo lo de so con Vettel, nun ataque de Kvyat na segunda curva que l’alemán calificó de “suicida”. El finlandés tuvo d’entamar la so remontada que lu dexaría detrás de Ricciardo, ayudaos dambos por un Coche de Seguridá que salió a pista pocu depués pola cantidá de restos de coches qu’habia en pista.

Col desfile de coches escontra los boxes que s’abrió nesi impass de la carrera Vettel aprovechó p’adelantar a dos coches en pitlane, aprovechando que Hülkenberg reducía velocidá pa dar tiempu a qu’atendieren primero al so compañeru d’equipu nel box de Force India. Hamilton aprovechó les vueltes que tuvo’l coche de seguridá en pista pa cumplir colos compuestos obligatorios de neuḿaticos faciendo dos paraes nesi intervalu tiempu.

A partir d’ehí, Rosberg llideraría la carrera con cierta comodidá y l’espectáculu treslladaríase unes posiciones más atrás. Parte de la carrera pudimos ver a McLaren dientro los puntos pa terminar por quedar nunes, vamos dicilio, decepcionantes posiciones pa lo que s’esperaba d’ellos, mesmo que Renault, que siguin estancaos nes posiciones baxes ensin que paeza qu’haiga forma de que camuden les coses, anque Magnussen seya optimista.

Nun mentimos si dicimos que dempués del Coche de Seguridá, la carrera foi quedando perfilada y namás nos ufrió dellos adelantamientos y dalguna qu’otra estratexa que nun valió pa cambiar muncho les coses. Ye importante recordar que nun hebo nengún abandonu pesie a tolos choques que pudimos ver.

Estos son los resultados de la clasificación y de la carrera:

Calificación

Carrera