Category: Análisis

Lloñe d’aparar, la Fórmula Uno sigui dando titulares, dalgo normal si tenemos en cuenta que los coches tán rodando otra vez nel circuitu de Yas Marina pa los test de Pirelli. Asina que, enantes de zarrar el llibru de la temporada 2016, vamos echar un vistazu a lo que ficieron los equipos na última carrera d’esti añu:

– Mercedes: dexando de llau’l fechu de ser campeones del mundo de constructores ya pilotos, esta vez con Nico Rosberg, la escudería alemana atópase agora col dilema de qué facer con Hamilton y la so desobediencia a les órdenes del equipu de dir más rápido (dalgo que taba condicionando la carrera de Rosberg que vio cómo la so distancia colos sos persiguiores desapaecía). Son munches les voces qu’aplauden la estratexa del pilotu inglés, pa dase una última oportunidá de facese col campeonatu, pero qu’al mesmu tiempu critiquen la so decisión de desobedecer ya opinen que Mercedes tendría d’actuar de dalguna forma pa qu’eso nun se vuelva a repitir esa actitú. Toca esperar y ver.

– Ferrari: a dambos pilotos se-yos da bien Abu Dhabi, especialmente a Vettel, que si la carrera tuviera tinío un par de vueltes más podía haber terminao segundu. Víamos una imaxe de la escudería italiana más sólida qu’en munchos otros grandes premios. Pa la so suerte, 2017 va de xuru a convirtise n’una oportunidá pa desquitase por un 2016 bastante floxu. Vettel consiguió acabar terceru n’Abu Dhabi, Kimi foi sextu, y Ferrari terceros nel mundial de constructores.

– Red Bull: foi quiciás una carrera más probe pa dambos pilotos qu’en comparación con otres (sobre too si pensamos no que fexo Verstappen en Brasil). La salida foi bien probe pa dambos, y anque Verstappen pudo compensalo y terminar cuartu, toles sos posibilidaes de ganar o sacar tayada a la “debilidá” de Rosberg desapaecieron. Ricciardo namás pudo ser quintu pesie a ser terceru na calificación.

– Force India: fueron el cuartu equipu más fuerte nel gran premiu, y tamién lo son nesti 2016. Consiguieron ganar la so batalla escontra Williams y la so regularidá con dambos equipos nos puntos en munches de les carreres (cuando un golpe de mala suerte nun dexaba a Hülkenberg fuera de pista) fae que tengan firmao una de les sos meyores temporaes. N’Abu Dhabi, otra vez nos puntos, sedría Hülkenberg quien sumare más puntos, quedando séptimu xusto per delantre’l so compañeru Sergio Pérez, n’octavu llugar.

– Williams: ensin Bottas nos puntos yera bien difícil ganar la so batalla escontra Force India, y anque Massa puntuó, nun foi suficiente, dexando a la escudería inglesa nel quintu llugar del campeonatu de constructores. Bottas tuvo de retirase por un incidente na primer vuelta que nun lu dexó rodar más de seis en pista, y Massa, na so última carrera na Fórmula Uno, foi novenu.

– McLaren: foi un fin de selmana de despidíes pa Jenson Button, que va dexar el so asientu pa 2017 (cola opción de tornar en 2018, anque seyan mui pocos los que lo vean posible, el propiu pilotu incluyíu) al belga Stoffel Vandoorne y anque tol mundu deseyaba que fuera la so meyor carrera o polo menos una qu’esfrutare, na ominosa vuelta trece un problema na suspensión del coche facía que l’inglés tuviera de retirase. El so compañeru Alonso consiguió terminar décimu, sumando l’últimu puntu disponible.

– Haas: dambos pilotos quedaron a les puertes de puntuar na última carrera de la so primer temporada en Fórmula Uno. Grosjean terminó undécimu con Gutiérrez xusto detrás nel puestu doce. Ye una pena que nun pudieran poner broce d’oru a la so temporada con dalgún puntu, pero paeznos que si miren al conxuntu a la temporada, puen tar más que contentos.

– Manor: la mala suerte del equipu británicu ye que Sauber la tuviera de cara en Brasil y consiguiera sumar dos puntos vitales pa pasalos nel campeonatu. Otra vez más los Manor fueron superiores a Sauber en carrera quedando Ocon (décimoterceru) per delantre de Wehrlein (décimocuartu).

– Sauber: tovía deben tar peñizcándose pa creyese que gracies a los dos puntos de Brasil tan décimos nel mundial, porque n’Abu Dhabi otra vez quedaron fuera de puntos y per detrás de los sos principales competidores, los Manor. Nel últimu gran premiu del añu, Ericsson foi décimoquintu y Nasr, décimosextu.

– Renault: foi esti un últimu gran premiu pa olvidar: pa Magnussen porque foi’l primer pilotu en quedase fuera de carrera por un incidente na primer vuelta, y Palmer, qu’anque tuvo a tiro los puntos, un choque con Sáinz y la posterior penalización de cincos segundos, lu dexaron en décimosextu llugar, n’otru probe gran premiu pa la escudería francesa.

– Toro Rosso: partiendo del fechu de que foi un fin de selmana horrible pal equipu, nun ye de sorprender que nengún de los pilotos terminare’l gran premiu. Ente los problemes coles gomes del vienres, los problemes en calificación el sábadu, y un domingu pa olvidar, lo meyor que-yos pudo pasar foi que terminar la temporada pa ponese a pensar en 2017.

Si lleistis el nuestru artículu sobre la carrera en Brasil, yá tendréis una idea de lo que dio de sí, pero agora queremos paranos a analizar lo que fexo cada equipu porque nun fueron flores pa toos ellos:

– Mercedes: Rosberg sigui na dinámica de “quedar segundu valme” y anque lu vimos sufrir con Verstappen y, de fecho, ser pasáu por elli, otra vuelta más fexo los deberes. Hamilton foi dueñu ya señor de la carrera (con permisu del agua) y en toles vegaes nes que se rellanzó la carrera, llogró dexar clavaos a los sos persiguidores. Les victories que sigui acumulando paecen saber a pocu cuando la distancia con Rosberg ye entá de catorce puntos y tamos llegando a la última carrera del añu.

– Red Bull: esti fin de selmana tien un nome propiu y esi ye Max Verstappen. Tenémoslu cuestionao nesti blogue por considerar qu’a vegaes el so ímpetu ta lloñe de ser encamentable en pista, pero la verdá ye que fexo un carrerón esti domingu pasáu, non solo poniendo n’aprietu a Rosberg, sinon faciendo valer la estratexa d’última hora p’algamar el podiu que tol mundu daba por perdíu pa elli. Ricciardo sufrió milenta vegaes más, y namás pudo ser octavu. Red Bull convirtióse oficialmente nesti gran premiu nel segundu clasificáu del mundial de constructores.

– Force India: nun hai duldes que, con condiciones cambiantes, los Force India van tar ehí, non sólo pol coche si non polos dos pilotos que tienen. Sergio Pérez féxose col cuartu llugar dempués d’una carrera ensin más errores que los normales al tar conduciendo n’agua, y Hülkenberg quedó séptimu y tuvo la suerte de nun dañar de más el morru del so coche al topase con restos del Ferrari de Kimi. Yá casi tienen nes sos manes el cuartu puestu del mundial de constructores.

– Ferrari: anque nun foi una mala carrera pa Vettel teniendo en cuenta les condiciones en pista, quedar quintu nun debiera ser una alegría pal equipu italianu. Muncho menos quedase fuera, como-y pasó a Kimi Räikkönen dempués de perder el control del Ferrari lo que fexo que s’estrellare na recta de meta. La suerte foi que tolos pilotos que viníen detrás d’elli tuvieron los reflexos a punto pa esquivalu ya evitar un mal mayor.

– Toro Rosso: ta claro, y dende yá va tiempu, que’l pilotu nel que se pue enfotar Toro Rosso ye Carlos Sáinz. Otra vez en condiciones meteorolóxiques complicaes diolo too y foi quién a terminar sextu. Ye verdá que Kvyat tuvo un choque, ensin culpa d’elli, con Palmer que lu llevó per delantre por falta visibilidá, pero nun dexamos de tener que buscar escuses pal pilotu rusu dende va meses.

– Sauber: dempués de diecinueve carreres, Sauber algamó’l so oxetivu, consiguiendo puntuar de la mano de Nasr (en casa) que consiguió ser novenu. Nun se-y pue negar al pilotu brasileñu la bona carrera que fexo, xugando perbien les sos cartes y aprovechándose de que n’agua toles diferencies s’igüen un pocu. Ericsson nun tuvo tanta suerte y acabó estrellándose a la altura de la entrada al pitlane, quedando fuera. Gracies a los dos puntos de Nasr, Sauber pasa a Manor nel mundial de constructores.

– McLaren: premiu de consolación pa la escudería, que consiguió sumar un puntu con Alonso. Pesie a tener dos de los pilotos más capaces n’agua, lo cierto ye que pa Button foi más una tortura qu’un gran premiu que disfrutare. De fechu, namás pudo ser últimu. El so compañeru d’equipu, anque décimu, tampoco nun tuvo un gran premiu pa esfrutar.

La escudería ta amás nel puntu mira dempués de que s’anunciare que Ron Dennis va dexar el so sitiu nel equipu. La batalla que llevaba hai tiempu lluchando pa conservar el so poder na escudería terminó cola so salida. Queda ver qué movimientos van producise nes selmanes qu’entren y nun podemos dexar d’entruganos de qué manera afeuta esto al contratu a tres firmáu colos pilotos pa 2017-2018.

– Williams: quedaron a les puertes de los puntos con Bottas y foi gracies a Massa que vivimos unu de los momentos más emocionantes de la hestoria recién de la F1: el fechu de correr per última vegada en casa y de terminar esti gran premiu con un accidente que lu dexaba fuera, fexo que fuéremos testigos del amor del públicu brasileñu pol so pilotu y d’una despedida cola que munchos pilotos suañen. Esi momentu nun va devolve-yos los puntos perdíos, pero ta claro que foi dalgo bien prestoso de ver. Ye obvio que’l públicu va echar de menos a Felipe Massa.

– Manor: demientres bona parte de la carrera, cuntábamos con ver un Manor otra vuelta nos puntos (de fechu, n’un momentu dambos lo tuvieron) pero nos últimos momentos del gran premiu esa certeza desapaeció. Ocon nun consiguía frenar nin a Alonso nin a Bottas, que lu pasaben a falta de bien poco pa terminar, faciendo esfumase la oportunidá de Manor de sumar otru puntu y d’Ocon de puntuar per primer vegada na Fórmula Uno. L’amargor vieno de la mano del novenu puestu de Nasr, que fai que Sauber tea agora un puntu perriba Manor dempués de más de la mitá del campeonatu col suañu de ser décimos.

– Renault: nun foi un gran premiu bonu pa la escudería francesa: Palmer nun calculó bien la distancia con Kvyat, un pocu enantes del accidente de Räikkönen y llevo per delantre a Kvyat, que sí pudo acabar. Magnussen tampoco nun tuvo brillante nin aprovechó les circunstancies, y namás foi décimocuartu.

– Haas: el desastre cebóse colos pilotos de Haas. Primero con Grosjean que nin siquiera pudo empezar el gran premiu por tener un accidente na vuelta de reconocimientu. Dempués, con Gutiérrez que tuvo de retirar el coche por problemes lletrónicos nel coche. El mexicanu nun foi quién a controlar la so frustración y víemoslu tener dalgo bronca dientro los boxes con Guenther Steiner, jefe de Haas. Situaciones como estes nun ayuden a la imaxe de Gutiérrez, del que yá sabemos que va tar fuera del equipu en 2017 y busca sitiu n’otru.

Prósima parada (ya última…) Abu Dhabi dientro de menos de dos selmanes.

Nun penséis que ta too dicho sobre’l Gran Premiu de México. Yá pasaron unos díes dende que terminó y entá siguimos sintiendo impresiones ya sensaciones sobre lo que pasó’l domingu. Lo malo ye que nun se fala tanto de lo que foi’l Gran Premiu en sí no que cinca a la emoción pola victoria o les batalles en pista, si non polos momentos del final y de los que yá falemos nel artículu dempués de la carrera. Agora toca echar un güeyu a lo que fexo cada equipu:

– Mercedes: nun tuvieron mayor problema pa dominar demientres el fin de selmana, anque Rosberg metía delles duldes nel cuerpu hasta la sesión de calificación. Dambos pilotos fixeron el so trabayu, Rosberg otra vegada minimizando daños y Hamilton faciéndose cola victoria (nun-y queda otra si quier ganar el campeonatu) y, pa variar, nun siendo oxetu de comentarios más allá de lo fecho en pista si non espeutadores de les desventures de los sos perseguiores. Dos carreres namás, la balanza sigui del llaú del pilotu alemán, pero entá nun ta too dicho.

– Red Bull: el tercer puestu de Ricciardo consolídalu como tercer pilotu del campeonatu de constructores, y pon un pocu nel so sitiu a un Verstappen qu’empieza a dar mieu. Yá lo comentamos enantes, y vamos siguir insistiendo: la Fórmula Uno necesita xente ensin prexuicios como elli, pero tamién xente con dos deos de frente pa saber au tán los límites cuando van con un volante ente les manes. Paeznos qu’esto último ye lo que-y falta al pilotu holandés.

– Ferrari: lo que paecía que diba ser un podiu pa Ferrari convirtiose n’un espectáculu teatral y una carrera de fondu nel casu de Vettel. En pista dieron un saltín alantre, con un Kimi más bien discretu dexando tol protagonismu al so compañeru d’equipu. Les vueltes finales fueron un bon exemplu del momentu que ta viviendo Vettel na so carrera: nun salen les coses, atopa torgues (en forma de pilotos) y cada vez-y cuesta más controlase verbalmente. Lleíemos a Martin Brundle (comentarista de Sky y ex-pilotu de Fórmula 1) diciendo que había un mundu ente’l mocín de Red Bull que tolo ganaba y que paecía tar en paz con toos, ya’l pilotu que tenemos agora. Ta claro que Red Bull, salvo exceiciones, foi una época dorada pa elli y qu’esti añu ta sufriendo abondo. Les sos pallabres son un exemplu d’esa frustración, sentimientu que volvió a invadilu esti domingu. De toles formes, nun va llevar penalización anque d’agora palantre, un pilotu que se muestre irrespetuosu, sí lo va ser.

– Force India: anque Felipe Massa foi la pesadilla de Sergio Pérez tola carrera y nun foi quién a pasalu, la escudería consiguió rascar otru puntín más pa la so cuenta personal na so batalla con Williams, gracies al séptimu puestu de Hülkenberg. De fechu, son los cuatro pilotos de dambos equipos los que completaron el grupu de los diez primeros xunto a los tres equipos de la parte alta de la tabla.

– Williams: coles duldes sobre la so posible aliniación pa 2017 (Bottas nun ta confirmáu entá y suenen dellos nomes) paez que la escudería inglesa yá tien perdida la partida con Force India, qu’a puquitinos nun dexa de sumar puntos de ventaxa. Quéden-yos namás dos asaltos pa consiguir facese con esi cuartu puestu tan valoratible pa dambos equipos.

– Sauber: llevamos tola temporada falando del baxón de forma de Sauber, y nesti gran premiu tuvieron a poco de facese col primer puntu del añu. Ericsson fexo gran parte de la carrera ensin cambiar neumáticos y cuando too paecía predicir que diba fundise a última hora, y sobre too dempués del incidente de la primer curva. Aguantó nel puestu once. Igual llega un pocu tarde, o simplemente ye casualidá, pero l’equipu suizu entá tien dos oportunidaes más p’asaltar los puntos qu’esti añu se-yos resisten. Felipe Nasr terminó décimoquintu.

– McLaren: dicía Fernando Alonso que con tal de terminar perriba’l so compañeru d’equipu la carrera yá diba ser un llogru pa elli. Bueno, nin eso pudo algamar. El británicu foi décimosegundu xusto per delantre del asturianu. Otru gran premiu bien deceicionante pa la escudería británica.

– Renault: falábemos enantes de la cantidá de vueltes qu’Ericsson fizo coles mesmes gomes. Podemos dicir lo mesmo de Palmer. Anque nun foi una carrera vistosa pa ellos, pudieron esfrutar un pocu en pista y consiguieron terminar, con dambos coches, nel décimocuartu (Palmer) y décimoséptimu llugar (Magnussen).

– Toro Rosso: otru gran premiu de deceiciones pa Toro Rosso. Dambos pilotos fueron penalizaos con segundos (Sáinz por un encontronazu con Alonso en pista, onde casi manda al pilotu de McLaren fuera y Kvyat por salise del trazáu, con ventaxa de tiempu pa elli, y nun devolver la posición) y quedaron bien lloñe de los puntos y del so oxetivu de tar ente los diez primeros. El sábadu de Sáinz nun fuera nada mal, pero’l domingu camudó la suerte, ya otra vez tornaben les cares llargues al equipu.

– Haas: Grosjean tuvo de salir dende’l pitlane’l domingu, dempués d’una xornada de sábadu complicada pa dambos pilotos. Nun foi nada meyor la carrera, onde namás fueron meyores que’l Manor d’Ocon y Gutiérrez foi la causa del incidente de la primer curva. Tóca-yos pasar páxina y pensar en Brasil.

– Manor: con Wehrlein fuera na primer curva y Ocon con problemes, amás de l’amenaza d’Ericsson a esi puestu décimu, nun foi una carrera fácil pa Manor. Con dos carreres pa terminar la temporada, yá casi puen acariciar esi décimu puestu nel mundial de constructores, pero viendo lo visto esti domingu pasáu, siempre cola cautela de dir carrera a carrera.

Entá col tastu del Gran Premiu na boca, casi tamos mirando a México pero nun queríemos pasar páxina ensin facer un análisis de lo que foi la carrera del domingu pa cada equipu:

– Mercedes: nun creyemos que dalguién nun confiara na capacidá de Hamilton pa facese cola victoria n’Austin. Lleva faciéndolo cuatro veces de les cinco posibles dende qu’empezara a haber Gran Premiu nel COTA y esti añu volvía a tener casi’l 90% de posibilidaes de ganar: ye un circuitu que se-y da especialmente bien, qu’esfruta y la situación nel mundial nun-y permite más que ganar. Pel otru llau, Rosberg fexo la carrera que tinía de facer, minimizando daños con respeutu a lo que fexo’l so compañeru pesie a la salida que fexo y gracies al coche de seguridá virtual que torgó la estratexa de Ricciardo cuando diba segundu.

– Red Bull: cada vegada pinta más que van ser Red Bull los segundos nel mundial de constructores. Anque nesta carrera namás puntuaron con un pilotu, tuvieron la suerte de qu’a Ferrari-yos pasó lo mesmo. Ricciardo fexo una carrera perbona, tando segundu gran parte d’ella, hasta que’l coche de seguridá provocáu pol so propiu compañeru d’equipu comprometío la so estratexa y fexo que perdiera esi segundu puestu y tuviera de conformase con ser terceru. Nel otru llau del box, Verstappen pasó la primer parte de la carrera batallando en pista, retrucando al so equipu de que nun taba corriendo pa ser cuartu, equivocándose a la hora de facer el so pit-stop pillando despreveníu al so equipu que salvó la situación como pudo. Pocu dempués, víemoslu parar el coche, quedando fuera del Gran Premiu por problemes cola caxa cambios.

– Ferrari: nin siquiera son quién a sacar ventaxa de los males de los sos rivales, yá qu’anque Red Bull sólo terminó con un coche, a ellos pasó-yos lo mesmo. Nel casu de Räikkönen, foi a cuenta d’un pit-stop nel que la rueda trasera drecha quedó mal apertada, resultando en que se fuera afloxando cuando’l pilotu finlandés taba enfocando la salida en cuesta del pitlane. Vettel pel so llau, fexo una bona carrera, anque sólo pudo ser cuartu. Estes selmanes se tien falao muncho del so aparente desencantu cola Scudería y la rellación tensa con Arrivabene. Ta claro que nun soplan vientos de felicidá nel equipu italianu.

– McLaren: en conxuntu McLaren fexo una carrera mui completa. Les calificaciones nun dexen claro’l puntu nel que tán ya’l domingu vimos a dambos pilotos metese nos puntos con facilidá (tamién beneficiaos polos incidentes de Hülkenberg, Bottas, Verstappen y Räikkönen). Button calificaba décimonovenu’l sábadu y adelantó diez posiciones pa terminar siendo novenu na carrera. Alonso esfrutó en pista, pesie a qu’al empiezu la carrera quexábase de ser adelantáu polos Renault, y regalonos dellos adelantamientos y batalles, especialmente na última parte de la carrera con Sáinz. Consiguió terminar quintu.

– Toro Rosso: nes últimes carreres, Sáinz nun consiguía tar contentu col coche, pero nun foi’l casu n’Austin. De fechu, el fin de selmana completu foi bien positivu pa elli, terminando sextu en carrera dempués de defendese d’Alonso durante un bon puñau de vueltes. Nun podemos dicir lo mesmo del so compañeru d’equipu, Daniil Kvyat, que dempués de confirmar el so asientu pa la temporada prósima cola escudería, tornaba a dar una imaxe bien probe, con dellos incidentes en pista con otros pilotos y una penalización de diez segundos. Terminó undécimu dempués de ganar una posición por penalización de Magnussen.

– Williams: lo mesmo que diximos pa Ferrari podría dicise pa Williams: nin siquiera puen aprovechase de los problemes del so másimu rival nel mundial de constructores, Force India, porque ellos tamién los tuvieron. Massa consiguió ser séptimu dempués de lluchar con un Fernando Alonso inspiráu. El so compañeru Valtteri Bottas nun puntuó, quedando décimosextu, dempués de vese envueltu nel incidente de la primer curva con Hülkenberg.

– Force India: Na so batalla personal con Williams siguen per delantre, gracies a que la escudería inglesa sólo sumó puntos con un coche. Puen respirar tranquilos yá que dempués del accidente de Hülkenberg al empiezu, paecía que-yos podíen recortar un puñáu de puntos, pero pal so aliviu, sólo unu de los Williams entró nos puntos. Pérez tuvo dellos momentos en pista, incidente con Kvyat incluyíu, pero consiguió acabar octavu.

– Haas: nun foi una carrera espléndida pal equipu en conxuntu, pero sí pa Grosjean, que dempués de deceicionase’l sábadu, volvía a los puntos nel Gran Premiu de casa y quedaba décimu Gutiérrez nun terminó. Esta yera una carrera perimportante pal equipu y anque nun pudieron lucise más, a lo menos consiguieron sumar otru puntín más.

– Renault: nun foi’l fin de selmana de Palmer. Ente problemes na calificación del sábadu y la información que l’equipu nun-y facilitaba (torgando asina vueltes d’otros pilotos) y la so frustración por nun poder adelantar al so compañeru d’equipu por mandatu del pitwall l’inglés nun tuvo’l so meyor fin de selmana. El so compañeru terminara undécimu pero foi penalizáu al final de la carrera con cinco segundos por nun devolver la posición al salise en pista cuando lluchaba con Kvyat. Al final terminó siendo duodécimu per detrás del pilotu rusu.

– Sauber: hebo parte de la carrera na que Marcus Ericsson llegó a tar acariciando los puntos, pero foi un espeyismu. Cada vez queden menos oportunidaes pa poder sumar un par de puntinos que los coloquen perriba Manor, y paecía qu’Austin diba ser el momentu. Ensin embargu, terminaron décimocuartu (Ericsson) y décimoquintu (Nasr).

– Manor: siguen terminando carreres con dambos coches, y siguen faciendo valer el puntu consiguíu n’Austria. Cada vegada ven más cerca’l final de la temporada y con ella la posibilidá de dar un pasu alantre gracies al beneficiu económicu que supón esi puntu. Quéden-yos namás tres carreres de siguir apertando y resistiendo (y cruciando los deos pa que Sauber nun tenga un Gran Premiu inspiráu y consiga puntuar).

Cuando los equipos yá dexaron atrás Suzuka y tienen tola mente puesta no que va ser el siguiente gran premiu del calendariu, el de los Estaos Xuníos, llegamos nós pa facer un análisis de lo que fizo cada equipu’l domingu en Xapón enantes de pasar páxina y empezar la xira americana:

– Mercedes: Rosberg lleva delles selmanes ensin dexar de dar golpes na mesa, amosando que ta nel meyor estáu de forma posible, tanto a nivel físicu como sicolóxicu. Ye esti últimu aspeutu’l más necesariu pa elli, el que creyemos que-y faltaba pa siquiera poder face-y un pocu sombra a Hamilton, que por contra, ta amosando, como yá fizo tantes otres veces nel pasáu, que cuando nun ta centráu ye’l so peor enemigu. Entá puen pasar munches coses nes carreres que nos queden, pero ta claro que si Hamilton quier amenorgar esi marxe que tien con Rosberg (l’alemán tien una ventaxa de 33 puntos) va tener que facer dalgo más qu’usar snapchat nes conferencies de prensa. La escudería alemana yá ye campeona del mundial de constructores por tercer añu consecutivu. Ensin duldes, más que merecío.

– Red Bull: si entá nos quedaben duldes de que yá-y teníen tomada la midía a Ferrari, nesta carrera yá desapaecieron. N’un circuitu nel que, teóricamente, la escudería italiana diba ser superior, vimos como Verstappen se colaba nel podiu ensin problema nengún y incluso se defendió de Hamilton nes vueltes finales. Ricciardo sufrió más en pista, y nun pudo ser más que sextu.

– Ferrari: Ta claro que tanto Vettel como Räikkonen partíen con penalización (Vettel tres posiciones pol incidente de Malasia con Rosberg y Räikkönen por cambiar la caxa cambios un pocu enantes de la carrera) pero nin siquiera los víemos plantar cara y anque intentaron ganar la partida a Mercedes en pista con una estratexa que nun prestó a munchos, terminaron fuera del podiu, siendo cuartu Vettel y quintu Räikkönen. Anque nun ye un mal resultáu, viendo les espectatives que teníen puestes nesta carrera, sí pue considerase dalgo deceicionante.

– Force India: Siguen ensin baxar la guardia, metiéndose con dambos pilotos nos puntos, y terminando carreres dexando amás bona imaxe. Yá tienen un marxe con respeuto a Williams de diez puntos, que nun son muncho si cuntamos qu’entá queden cuatro carreres, pero nun tien pinta de que vaigan dexar escapar munchos de los puntos que tengan a tiru. Hülkenberg amás de puntuar siendo octavu, dexónos un adelantamientu perguapu a Bottas y un “See you later” que prestó abondo a los fans. Nun podemos dexar de ver nesi adelantamientu un reflexu de lo que ta pasando nel mundial ente dambes escuderíes. Pérez consiguió acabar séptimu.

– Williams: Consiguieron sumar puntos con dambos coches, pero per detrás del so máximu competidor, Force India. Tres puntinos que saben a bien poco n’una de les lluches más interesantes que tenemos nel mundial de constructores. Felipe Massa terminó la carrera en novenu llugar, siendo Bottas décimu. Anqué entá queda tiempu pa que puedan pasar a Force India, la verdá ye que nun paez que-yos vaiga a ser fácil, y de fechu paeznos que si Force India nun se derrumben a última hora, los diez puntinos de diferencia puen ser colchón abondo d’equí al final de la temporada.

– Haas: Ficieron una sesión de calificación perbona, metiendo a dambos coches ente los diez primeros per primera vez nesta temporada. Ensin embargu, la deceición vieno en carrera, onde quedaron fuera de los puntos, con Grosjean nel undécimu puestu y Gutiérrez, que calificara décimu, nel veinte. Ensin duldes, un gran premiu que van querer más olvidar pronto. Amás, nel siguiente gran premiu cuerren en casa, razón de más pa quitar del mediu les males sensaciones en Xapón y centrase n’esfrutar el so primer gran premiu en casa.

– Renault: Ensin puntos esta vez, pero con un Palmer inspiráu, que volvió a tar per delantre de Magnussen. Ye como si, a estes altures del campeonatu, tuviere corriendo por conservar el so asientu, unu de los más cobiciaos agora mesmo na parrilla. Hai munchos candidatos, los dos pilotos actuales ente ellos, pero paez que Palmer púnxo les piles pa dar motivos a la escudería francesa pa escoyelu a elli. Dientro d’unes selmanes veremos si pagó la pena. El pilotu inglés terminó décimosegundu, mientres Magnussen foi décimocuartu.

– Toro Rosso: Carlos Sáinz resumía perfeutamente lo que foi la carrera pa elli, y paeznos que pa dambos pilotos: un desastre. En nengún momentu paecieron tar cómodos y de fechu nun hai más qu’echar un güeyu a la clasificación pa velos bien lloñe de los puestos que solíen ocupar hai unos cuantos meses. El baxón de forma de la escudería ye bultable, y el so únicu consuelu nesti gran premiu ye que los sos rivales nel mundial de constructores, McLaren, tampoco nun fueron quién a puntuar.

– Sauber: los equipos de los puestos baxos de la tabla suelen tener de conformase colo poco bueno que-yos toca, siempre xulgando como bueno dalgun aspeutu positivu que nun tan avezaos a esfrutar. Nesti casu, y anque quiciás sepa a poco, ye qu’Ericsson quedó per delantre de dambos McLaren, en décimoquintu llugar, ensin qu’estos pudieran pasalu en pista. Insistimos que nun ye motivu d’allegría, pero’l fechu de terminar la carrera yá ye un plus pa la escudería suiza, que de xuru ta deseyando que llegue’l 2017 d’una vez. Nasr terminó la carrera nel puestu décimonovenu.

– McLaren: La gran deceición del gran premiu vieno de la mano de la escudería inglesa y sobre manera del motor xaponés otra vuelta. Sabíemos que nun diben dir especialmente bien en Suzuka, y que Jenson Button diba penalizáu por cambiar la so unidá de potencia (anque eso significaba salir namás que cinco puestos per detrás de lo que yá calificara’l sábadu) pero tol mundo esperaba un poquiñín más, sobre too cuando falamos de correr na tierra d’Honda. Nin el coche nin les gomes respondieron y por ello Fernando Alonso foi decimusextu y Jenson Button decimuoctavu.

– Manor: Siguen acabando carreres y anque nun foi esti’l so gran premiu más brillante, nin tán contentos col resultáu, paeznos que sigue siendo dalgo a destacar. Nun podemos olvidar que sigue valiendo’l puntu consiguíu por Wehrlein n’Austria, que los coloca perriba Sauber nel mundial de constructores. Nun puen dexar de siguir trabayando hasta la última vuelta en Yas Marina dientro de mes y mediu.

Nun queda muncho pa ponenos a mirar yá pa Xapón, pero enantes de zarrar el capítulu de Malasia vamos repasar lo que fexo cada equipu’l domingu pasáu nel circuitu de Sepang:

– Red Bull: ensin duldes, los mayores beneficiaos de la rotura de motor de Hamilton. Tuvieron acariciando en dellos momentos el primer puestu en carrera, pero paecía que les sos propies pelees en pista (Verstappen llegó a pidir al equipu que “actuara” pa dexalu adelantar al so compañeru yá que yera más rápidu) diben da-y la victoria al pilotu de Mercedes. Ensin embargu, unes vueltes dempués diben vese premiaos con esa primer posición y con un coche de seguridá virtual que daba a Ricciardo la prioridá d’entrar en boxes, facilitando asina que llueu sólo tuviera de puxar pa facese cola so primer victoria del añu, la primera dende 2014. Verstappen terminó segundu.

– Mercedes: lluz y solombra na escudería alemana. Nun creyemos que quede entá naide nel mundu formuleru que nun sintiera les pallabres de Hamilton sobre lo que pasó na carrera. Los comentarios del inglés nun dexaron a naide indiferente, unos considérenlos una falta respetu al equipu, otros namás una forma de falar y un episodiu más nel xuegu de desestabilización que xueguen los pilotos de Mercedes dende hai bien de tiempu. El casu ye qu’agora mesmo Rosberg y Hamilton tán separtaos nel campeonatu por veintitrés puntos, casi como lo que val una victoria d’un gran premiu. De xuru qu’en Xapón va siguir falándose de Malasia pero nosotros vamos dexalo en que la mala suerte tornó a cebase con Hamilton dexándolu fuera de carrera por rotura d’un motor nuevu, demientres el so compañeru remontaba dende l’últimu puestu por un incidente nel que se vio envueltu na primer vuelta. L’alemán foi capaz de subir al podiu quedando terceru, anque nes últimes vueltes tuvo d’agrandar el marxe que lu separaba de Räikkönen por una penalización de diez segundos por un incidente n’un adelantamientu en pista al finlandés.

– Ferrari: siempre pasa que cada temporada la mala suerte paez cebase con un pilotu. Dalgunos dirán qu’esti añu toca-y a Hamilton, pero a nós paeznos qu’esto ta afeutando-y más a Vettel. L’incidente de la primer curva de carrera dexolu fuera cola suspensión rota, y cola deceición d’otru gran premiu ensin puntuar. El so movimientu en pista foi bastante fuerciáu, y anque sabemos que nun diba cola intención de provocar lo que pasó, sí que ye verdá que foi un error al que nun nos tien avezaos. En Xapón va partir con tres posiciones de penalización. Pel so llau, Kimi Räikkönen acabó cuartu, ensin muncha complicación anque ensin llegar a ser nunca una amenaza pa los tres primeros.

– Williams: el gran premiu de Felipe Massa empezaba yá torcíu na vuelta de calentamientu. Quedábase paráu y tuvo de salir dende’l pitlane. Dende ehí yá nun pudo facer muncho más y terminó décimoterceru. El so compañeru Valtteri Bottas quedó quintu, per delantre los dos Force India a los que yá tienen a tiru de tres puntos nel campeonatu de constructores.

– Force India: con dambos coches dientro de los puntos, Sergio Pérez en sextu puestu y Nico Hülkenberg n’octavu, consiguen mantenese cuartos nel mundial de constructores anque saben que nun puen despistase con Williams a tres puntos. De toles formes, nesta época de la temporada Force India solía amosar una baxada de forma qu’esti añu nun tamos viendo, polo que tienen bien de coses de les qu’allegrase na escudería.

– McLaren: los británicos repiten con dambos pilotos dientro los puntos y una perbona actuación d’Alonso saliendo últimu p’acabar séptimu. Jenson Button viose perxudicáu pol últimu coche de seguridá (pola rotura de Hamilton) que salió al pocu d’entrar a cambiar gomes y benefició a dellos pilotos que veníen per detrás. De toles formes, consiguió acabar novenu y McLaren allóñase cada vegada más de Toro Rosso y consolidando la sexta posición nel mundial de constructores. La siguiente carrera ye en casa asina qu’espérase d’ellos que, como mínimo, repitan lo que se vio’l domingu en Malasia y dambos coches puntúen.

– Renault: col sustu del vienres nel coche de Magnussen (un escape de combustible fexo que’l coche ardiera cuando’l pilotu danés dexaba’l garaxe) paecíanos que tábemos ente un gran premiu complicáu pa la escudería francesa. Y anque foi asina pel llau de Magnussen, que tuvo de retirase por un choque con Kvyat que dañó la parte trasera del so coche, nel llau de Jolyon Palmer taben de cellebración yá que consiguió colase nel puestu diez, sumando asina’l so primer puntu esta temporada, y unu más pa Renault. Nun tenemos claro qu’esti gran premiu faga pol restu la temporada, pero paeznos que yá yera hora que’l pilotu inglés tuviera la so oportunidá de sumar puntos.

– Toro Rosso: nun tuvieron muncha suerte na carrera, Sáinz con problemes dende la salida al apagase-y el coche, y Kvyat col choque con Magnussen, qu’anque nun lu fexo abandonar la carrera, sí condicionó la so posición. Sáinz foi undécimu y Kvyat décimocuartu. Cada vez-yos queda más lloñe la sexta posición del campeonatu de constructores.

– Sauber: cuando dicimos que siempre hai un pilotu en cada temporada col que la mala suerte se ceba, podemos facelo xeneral a un equipu nel casu de Sauber. Anque un puestu doce en carrera pue nun ser gran cosa, ye bastante llogru pa la escudería suiza, qu’esti añu nun ta pasando por una bona situación, yá dende bien pronto na temporada. De toles formes, con Nasr fuera de carrera por problemes (supuestamente col motor, anque dicho cola boca pequeña) entá-yos queda muncho que trabayar, ya’l suañu de puntuar esta temporada cada vez paez más complicáu.

– Manor: bona carrera de dambos pilotos, a los víemos incluso batallar en pista y que nun dexan de cumplir colos oxetivos de terminar carreres (y aprovechar los puntos que caigan). Wehrlein acabó perriba’l so compañeru en décimoquintu llugar, con Ocon décimosextu. El pilotu francés recibió dos penalizaciones por pasase de velocidá nel pitlane.

– Haas: xunto con Hamilton, los grandes perdedores del gran premiu. Grosjean tuvo otra vez problemes colos frenos, como los que nun lu dexaron participar nel gran premiu de Singapur hai dos selmanes, anque esta vez lu dexaben na gravilla. Esteban Gutiérrez pel so llau quedaba fuera por una rueda mal axustada que se soltó demientres el pilotu taba en pista y pola que Haas yá recibió multa. Nes entrevistes Grosjean, casi autoconvenciéndose, insistía en que tolo que la escudería americana tenía conseguío hasta agora taba siendo un regalu porque, siendo’l so primer añu nun pensaben siquiera en puntuar y agora mesmo tienen bien agarrada la octava posición nel mundial. A siguir trabayando.

Cola mayoría de los equipos yá de vuelta nes sos sedes y colos pilotos desperdigaos pol continente asiáticu ya’l européu, vamos facer un repasu a lo que cada escudería dio de sí nel pasáu gran premiu de Singapur:

– Mercedes: Podemos nomalos los triunfadores de la nueche, anque paeza que ye lo que siempre dicimos, pero teniendo en cuenta que corríen n’un circuitu onde suelen tener más problemes pa dominar, el domingu vímoslos lluchar pa poder pasar perriba de los sos rivales. Cuando’l coche nun marca tanto la diferencia tamién saben lluchar. Nun vamos repetir que la carrera de Rosberg foi de quitase’l sombreru y que Hamilton, anque más baxu, tamién fexo una bona carrera. La llucha pol campeonatu de pilotos sigue más qu’abierta.

– Red Bull: Yeren la principal amenaza pa Mercedes, y asina lo demostraron el domingu. Anque Verstappen nun anduvo mui finu si lu comparamos con Ricciardo, la verdá ye qu’en conxuntu l’equipu respondió a les espectatives que se teníen de la so actuación nesti gran premiu. Les últimes vueltes de Ricciardo intentando alcanzar a Rosberg son de los más reseñable d’esta carrera y cásique de los últimos años.

– Ferrari: Vettel víase torgáu’l sábadu por un problema na suspensión que lu facía salir últimu al nun poder marcar un tiempu competitivu mientres llegaba a box col coche sobre tres ruedes. Paecía que la so carrera taba sentenciada y en Ferrari tirábense de los pelos pensando nun fin de selmana nel que sí qu’había oportunidaes de lluchar polo más alto del caxón, pero conociendo al alemán (y el fechu de que yá lo fexo otra vez) sabíase que nun diba ser tan catastrófico. Y anque les actuaciones de Ferrari siguen sabiendo a poco (cuartu y quintu nesta carrera) teniendo en cuenta les circunstancies pueden respirar tranquilos, anque cola atención puesta nes decisiones a tomar nes estratexes de carrera, que siguen siendo la so debilidá.

– McLaren: A estes altures de la temporada yá vien siendo vezu qu’un McLaren termine la carrera ya’l otru quede fuera enantes de tiempu por problemes de dalgún tipu nel coche: o perda de potencia, o accidente, o lo que se tercie. Nesta ocasión, y por tercera vez en cinco carreres, tocaba-y a Jenson Button. Los incidentes de la salida cebáronse con elli tamién y na vuelta 43 tuvo que retirar el coche pesie a entrar en boxes pa intentar siguir en pista. El so compañeru, dempués d’una perbona salida na que llegó a ser quintu, consiguía terminar séptimu y sumar puntos pa la escudería, que sigue abriendo brecha con Toro Rosso.

– Force India: Dalgo asemeyao a lo de McLaren suel pasa-yos a Force India. Dicíemos na previa qu’esti yera un circuitu que se-yos da bien y Pérez pudo demostralo dempués de salir con ocho posiciones de penalización. Quedó octavu. El so compañeru nin siquiera llegó a la primer curva, y foi’l mayor afeutáu del incidente na salida, onde se convirtió nel rellenu d’un sandwich formuleru que lu dexó fuera de carrera. Pa aliviu de Force India, Williams nun puntuó, asina que siguen tando vivos na so llucha con ellos pol cuartu llugar nel campeonatu de constructores, un puntu perriba la escudería inglesa.

– Toro Rosso: Dempués de munches carreres víemos a Kvyat brillar. Un novenu puestu puede saber a pocu, pero teniendo en cuenta les sos males actuaciones dende que se “mudara” a Toro Rosso, esta carrera, esperamos, pue da-y un emburrión de cara al so futuru. El so compañeru nun pudo imitalu y quedó dafechu fuera los puntos, en décimocuartu puestu con problemes nel MGU-K.

– Renault: Nun tamos avezaos a ver esta temporada’l color amariellu de Renault dientro los puntos, pero Singapur ye una esceición pa too. Magnussen dicía que se-y facía increyible lo bien que diba’l coche y que casi-y sabía a poco’l décimu puestu que consiguió. Esi puntín va vali-yos bien na so defensa escontra Manor nel campeonatu de constructores. Los seis puntos que los separen deberíen ser suficientes pa que Renault asegure’l so novenu puestu. Palmer, pel so llau, anduvo perdíu pelos puestos baxos demientres tola carrera y sigui na cuerda floxo con respeutu a lo que puea pasar col so futuru en Renault. Acabó décimoquintu.

– Haas: Grosjean nun pudo nin salir por problemes col brake-by-wire, y Gutiérrez volvió a quedase a les puertes de puntuar. Ensin duldes foi un gran premiu pa olvidar pa la escudería norteamericana, pero teniendo en cuenta que yera la so primer vez, el fechu de ser casi quien a puntuar tendría de da-yos motivos, a lo menos, pa sorrir un poco. Cada carrera ye un descubrimientu pa ellos, y ta claro que nun van poder triunfar en toes, porque nin siquiera los equipos más consolidaos y poderosos lo faen. Empezaben el campeonatu col oxetivu d’acabar carreres y tán viéndose capaces de puntuar, asina que pue dicise que la temporada de Haas ta siendo bien positiva.

– Williams: Nun ta siendo’l so añu. Ente les carreres floxes que tienen y qu’encima nun paez que la suerte tea del so llau, en Singapur víemoslos fuera de los puntos otra vegada más. Massa a lo menos pudo terminar la carrera, siendo décimosegundu, pero Bottas foi’l tercer afeutáu del incidente de la salida y anque paró y pudo continuar delles vueltes, terminó por abandonar na 35.

– Sauber: Dambos coches terminaron y eso yá ye un llogru pa la escudería suiza. Nun puntuaron pero a lo menos nun se vieron afeutaos por nengún incidente en pista nin nes paraes. Nasr consiguió acabar per delantre’l so compañeru siendo décimoterceru, demientres qu’Ericsson foi décimoséptimu, per detrás de Pascal Wehrlein.

– Manor: Nun foi quiciás el gran premiu más positivu pa ellos. Con dellos incidentes demientres los entrenamientos llibres, paecía que nun diben brillar muncho’l domingu y tuvieron una carrera discreta, anque consiguieron colocar a un Sauber per detrás d’unu de los suyos. Ocon nun lo ta faciendo mal teniendo en cuenta lo que lleva nel coche y les posibilidaes qu’esti ufre, pero queda-yos entá muncho que trabayar. Esi puntín nel mundial de constructores val el so pesu n’oru.

Queden menos de dos selmanes p’aterrizar en Singapur, pero entá queden delles coses que revisar en Monza. Vamos echar una güeyada a lo que ficieron los equipos nel gran premiu d’Italia del domingu pasáu.

– Mercedes: Díbemos convencíos de que diben a ser los dominadores de tol fin de selmana ya cuntábemos con que fuere Hamilton quien consiguiese la victoria’l domingu polo visto nes primeres sesiones. Ensin embargu, víemoslu otra vez fallar na salida (paez que nun tien fácil arreglu el problema o problemes col embrague del Mercedes) y a Rosberg aprovechase d’ello. Dempués d’eso, la carrera del alemán foi bien tranquila, demientres que pa Hamilton foi un poco más entretenida, quedando sextu na salida pa recuperar darréu y terminar segundu. Namás dos puntos separen agora a los dos pilotos.

– Ferrari: De vuelta a la realidá del restu d’equipos, Ferrari consiguió dar una alegría a los tifosi con Vettel nel tercer puestu y Kimi detrás d’elli. Nun ye a lo qu’aspiren, pero un podiu en Monza vistíu de rosso siempre paga la pena. Arrivabene comentaba qu’entá nun daben nada por perdío, y paeznos que tien de ser la persona más optimista dientro l’equipu porque nun nos paez que vaigamos a ver coses mui distintes d’equí a final de temporada. De momento, siguen per detrás de Red Bull nel campeonatu de constructores.

– Red Bull: Como ellos mesmo dixeron, minimizaron daños. Nun foi la so meyor carrera, pero teniendo en cuenta que nun corríen n’un circuitu que-yos beneficiare y onde la potencia de la PU yera importante, quedar dientro los puntos yera’l mal menor. Ricciardo foi unu de los protagonistes del gran premiu pol so adelantamientu a Bottas, una de les poques coses vistoses que nos dexó la carrera. Riccardo acabó quintu con Verstappen séptimu.

– Williams: Dempués de tar nel puntu mira pol movimientu de pilotos, Williams consiguía meter dambos coches nos puntos, anque Bottas almitía que taben deceicionaos porque cuntaban con poder alcanzar el podiu. Nun foi asina: elli quedaría sextu ya’l so compañeru Felipe Massa novenu.

– Force India: Siguen batallando con Williams pol campeonatu de constructores y anque vuelven a tar per detrás, nun dexaron de sumar puntos con dambos pilotos. Suponemos que cada vez-yos cueste más facer frente a les posibles meyores que traigan el restu equipos pero nun duldamos que van siguir bregando na so llucha particular con Williams. Pérez terminó octavu y Hülkenberg, décimu.

– Haas: Anque ensin puntos, esta foi una bona carrera pa Haas. Ensin escaecer que por primer vegada consiguieron entrar en Q3 el sábadu con Esteban Gutiérrez, el domingu fueron quien a presentar batalla en pista y quedar a piques de metese ente los diez primeros. Grosjean foi undécimu y Gutiérrez acabó nel puestu trece.

– McLaren: Otros que tuvieron nel puntu mira tol fin de selmana: empezaben la carrera col convencimientu de que nun diben poder sacar muncho de Monza por ser unu de los peores circuitos pa ellos. Puntos nun sacaron, pero Alonso consiguió facer, a última hora dempués de montar gomes nueves a falta dos vueltes, la vuelta rápida de carrera polo que se fexo col troféu col que se premia al pilotu que la consigue en cada gran premiu. Nun fueron too maraviyes, ya l’asturianu víase torgáu nel pit stop, dalgo que nos regaló dalgún qu’otru mesaxe de radio al equipu, y pasáu en pista pol so compañeru. Button terminó décimosegundu y Alonso décimocuartu.

– Toro Rosso: Cuando sintimos falar a Sáinz notamos daqué frustración nes sos pallabres y les ganes de tornar a puntuar de siguío. Monza foi pa ellos unu de los peores grandes premios, y d’eso ye muestra que Sáinz sólo pudiera ser décimoquintu ya’l so compañeru nin siquiera pudiere terminar la carrera.

– Sauber: De xuru qu’a la escudería ya se-yos ta faciendo llarga la temporada. Nasr quedaría fuera de carrera a los pocos minutos d’empezar la carrera por un choque con Palmer y Ericsson nun pudo más que ser décimosextu. Ensin duldes, nun foi un día de sorrises en Sauber. Y yá sumen unos cuantos…

– Renault: Recuperáu del so accidente de va una selmana en Spa, Magnussen pudo acabar la so carrera sólo per delantre los Manor, que nun ye dicir muncho, pero que teniendo en cuenta lo que ta dando de sí la temporada pa la escudería francesa, ye bastante. Palmer quedaba fuera nel choque con Nasr y suma otru gran premiu nel que nun ye quién a amosar de lo que ye capaz en pista. Ta quedándose ensin oportunidaes ya suenen munchos pilotos pa ocupar el so asientu. Esperamos que pueda facer dalgo por compensalo d’equí a payares.

– Manor: Nun foi de los meyores domingos pa Manor, anque’l sábado dexábanos a Wehrlein otra vez en Q2. L’alemán quedaría fuera de carrera por un problema col coche ya Ocon consiguió acabar, anque nun taba demasiao contentu con como fuera’l fin de selmana. Tóca-yos, otru gran premiu más, siguir trabayando.

A piques de pasar páxina y ponenos a mirar pa Monza n’un par de díes, vamos facer un repasín a l’actuación de los equipos nel pasáu gran premiu de Bélxica:

– Mercedes: como vien siendo vezu, los grandes triunfadores de la carrera. A la victoria de Rosberg ensin nengún problema xúnise’l tercer puestu del so compañeru Lewis Hamilton que salía dende atrás poles penalizaciones acumulaes por cambios d’unidaes de potencia. Agora’l británicu tien tres unidaes de renta pa tirar lo que queda de temporada.

– Red Bull: Verstappen tuvo en boca de tola xente, pa bien y pa mal, anque foi’l so compañeru Ricciardo’l que fexo’l meyor trabayu (o’l más rentable) quedando segundu. L’holandés ta ganándose bien d’enemigos en pista, al tiempu qu’almiradores fuera d’ella, y nun nos paez que vaiga ser mui bien acoyíu esti fin de selmana polos tifosi en Monza dempués de les sos engarradielles con Vettel y Räikkönen.

– Force India: tres de Mercedes, los que meyor trabayu ficieron como equipu ensin dulda. Vien dándose-yos bien esti circuitu y de fechu, cuartu y quintu puestu paez que saben a poco teniendo en cuenta qu’enantes de la bandera colorada too paecía indicar que Hülkenberg podía pensar nesi tercer puestu del caxón. Al final nun pudo ser, sicasí dambos pilotos ficieron una carrera mui completa y l’allegría del equipu al adelantar a Williams nel campeonatu de constructores dizlo too d’una escudería que nun dexa de sorprendenos cada temporada.

– Ferrari: de xuru que los dos pilotos de la Scuderia suañaron con Verstappen estos díes, y anque nun-yos fue mal del too en carrera teniendo en cuenta l’incidente nel primer xiru y tolos altos y baxos, de xuru qu’aspiraben a muncho más n’un circuitu que (especialmente a Räikkönen) se-yos suel dar bien. Agora tán tolos güeyos puestos en Monza, el so feudu y onde de xuru fadrán por facer una bona carrera enfrente la so xente. Si Verstappen nun se mete en mediu esta vez, claro…

– McLaren: nun dexen de repitise les ocasiones nes qu’una carrera que puede da-yos un bon garapiellu puntos a la escudería británica termina siendo un calvariu pa dalgún de los sos pilotos. Pesie a que toles torgues túvoles Alonso demientres el fin de selmana, el que lo sufrió en carrera foi Button. L’asturianu fizo séptimu y Button viose fuera de carrera a les poques vueltes del empiezu por un incidente nel que Wehrlein interpretó mal la so maniobra en pista dexándolu ensin tiempu pa frena y qu’acabó llevándolu per detrás. Dambos pilotos quedaron fuera. Bonos puntos pa McLaren, que yá ta perriba Toro Rosso na clasificación de pilotos.

– Williams: probablemente aspiraben a más, y tinía la pinta nos entrenamientos y na sesión de calificación de qu’asina diba ser. Consiguieron puntuar con dambos coches, siendo Bottas octavu y Massa décimu, pero son puntos que saben a pocu viendo los resultaos de Force India. Toca siguir trabayando.

– Haas: les primeres vueltes del gran premiu fueron bien entreteníes pa los equipos de la parte media de la tabla, porque viéronse upaos a los puntos gracies a tolos incidentes qu’hebo. Ensin embargu, nel casu del equipu americanu y pesie a facer una bona carrera, nun fueron quien a quedase neses posiciones y resultaron décimosegundu (Gutiérrez) ya décimoterceru (Grosjean).

– Toro Rosso: otra escudería que marcha de Spa con deceición ye, ensin duldes, Toro Rosso. Ente lo descafeináu qu’anduvo Kvyat tol fin de selmana (nun ta faciendo muncho por quedase na Fórmula 1 visto lo visto en pista) y la mala suerte de Sáinz, que vio como quedaba ensin goma trasera por un reventón, l’equipu nun pudo facese con nengún puntu y vio como McLaren lu adelantaba na clasificación de constructores. Paez qu’empieza la parte más duro de la temporada con un motor ensin evoluciones y onde-yos tocará reducir daños sacando tolo que puedan del chasis y pensando en 2017.

– Renault: el sustu del gran premiu vieno de la mano de Kevin Magnussen que se salía xusto al terminar Eau Rouge a l’altura de la salida del pit-lane. Anque lu víemos acoxar, súpose darréu que nun fuera nada y que ta garantizada la so presencia en Monza esti fin de selmana. Bones noticies. La verdá ye que l’arranque de la carrera pa ellos foi bien interesante, fueron de los que se beneficiaron de los incidentes, y llegaron a tar nos puntos, séptimu ya octavu, pero nun duró muncho. Al final, Palmer sólo pudo ser décimoquintu.

– Manor: con Wehrlein fuera, yera cosa d’Ocon el dexar a Manor en bon llugar, y dientro la so llucha particular con Sauber, féxolo. Quedó xusto per delantre de Nasr y completó’l so primer gran premiu ensin problemes y amosando una perbona actitú. Yá quedó confirmao que d’equí a final de temporada (salvo cambios inesperaos) va quedase en Manor, ensin tener que responder a les llamaes de Renault como tercer pilotu.

– Sauber: ente la irregularidá qu’amuesen ya’l tar perdiendo la batalla escontra Manor, en Sauber tienen bien poco que cellebrar. Spa nun foi una bona carrera pa ellos. Suma y sigui.

Enantes de metenos de cabeza na segunda mitá de la temporada qu’empieza en menos d’una selmana nel míticu Spa, vamos echar una güeyada a lo que foi la primer parte no que cinca a los equipos:

– Mercedes: malapenes los vemos pasalo mal, anque esti añu yá dieron más d’un sustu a los sos xefazos, paez que tamos a piques de ver una repitición de lo que foi l’añu pasáu la batalla ente los dos pilotos por facese col títulu, con Hamilton un pasu per delantre. Pol bien de la competición, esperamos que Rosberg seya quién a volver a ponese a l’altor de les sos primeres carreres.

– Red Bull: dempués de les vueltes y amenaces del añu pasáu, y d’empezar la temporada con bastante discreción, el cambiu de pilotu xugó a favor de dambes partes (non tanto na del sacrificáu Kvyat). Agora mesmo son el segundu equipu nel campeonatu, non sólo por puntos: paez que por fin-y garraron la midía a Ferrari y van tar pegándose colos italianos hasta’l final de la temporada.

– Ferrari: esperábase de Ferrari que fueren quién a facer tremar, anque fuera un pocu, a les fleches platiaes, pero hasta agora paez que nun tan pol llabor. Cola marcha de James Allison y ensin nenguna victoria entá no que va de temporada, la paciencia na escudería italiana va acabándose y les idees en forma soluciones tamién. Ensin embargu, cuntamos con velos rellumar anque seya un pocu na segunda parte del campeonatu.

– Williams: la escudería inglesa ta sacando bueno resultaos pal baxu rendimientu que ta amosando esta temporada (baxu siempres comparándolu col añu pasáu, por exemplu). Esperábamos muncho más d’ellos, anque entá-yos queden bien de carreres pa facenos cambiar d’opinión.

– Force India: tolos años, Force India, seliquino, van colándose nos puestos d’enriba, onde teóricamente nun deberíen tar, faciendo podios y carreres mui completes. Esti añu puen poner n’apuros a Williams, que yá los ven de regüeyu, y anque ye verdá que siempres suelen baxar un pocu na segunda parte de la temporada, cuntamos con siguir velos bregando por esi cuartu puesto nel mundial.

– Toro Rosso: ye difícil xulgar el llabor de la escudería dempués del cambiu de pilotos: Sáinz sigui fuerte, puntuando regularmente y faciendo carreres competitives. Cola marcha de Verstappen convirtióse nel llíder dafechu del equipu, y la probe actuación de Kvyat dende que tornare fai qu’esta seya más obvia entá. El rusu nun termina de cuayar dempués del incidente que fexo que Red Bull decidiere relegalu a la escudería hermana en beneficiu de Verstappen. Munchos piensen que yá nun hai sitiu pa elli na F1 y que va ser unu de los que veamos desapaecer l’añu que vien. Les carreres vinientes sedrán les que decidan y na segunda parte de la temporada acusarán más l’usar un propulsor del añu pasáu que nun evoluciona.

– McLaren: l’empiezu de la temporada nun foi tan desastre como 2015, pero entá sigue costando asimilar el ver a McLaren nel puestu séptimu de constructores y aplaudiendo’l fechu d’entrar na Q3 y garrar puntos los domingos. Quéda-yos munchu trabayu per delantre, con un 2017 nel horizonte con posible cambiu de pilotos (Button dexaría’l so asientu a Vandoorne) y la promesa de tornar a ser competitivos. Na segunda parte de la temporada cuntamos con velos siguir sumando puntos ya dando pasinos, insuficientes pa esta temporada pero positivos si pensamos na so situación hai doce meses.

– Haas: les primeres carreres sorprendieron pa bien, y llueu impúnxose la lóxica y la realidá de ser un equipu nuevu na competición. De toles formes, el fechu de tar puntuando, anque nun seya en toles carreres, yá ye un méritu y tamos viendo a Gutiérrez faer carreres mui sólides y a Grosjean arrampuñar puntinos que los ponen perriba de les espeutatives de munchos na clasificación.

– Manor: siempres empiecen les temporaes cola idea de que lo d’ellos ye pensar en terminar carreres, pero esti añu tamos viendo un pasín más. Non sólo terminen carreres si non que tamién pueden suañar con sumar puntos como yá pasó con Wehrlein n’Austria, rompiendo col mitu de que Manor (o cualquier escudería “pequeña” sólo pue puntuar en Mónaco). Con Haryanto fuera del coche (anque vaya a siguir tando vinculáu al equipu) tócanos ver de lo que ye capaz Ocon, pupilu de Mercedes, nesta segunda parte.

– Sauber: la escudería suiza son, ensin duldes, los más castigaos económicamente nesta temporada. La entrada d’una nueva direición promete da-yos puxu pa sumar anque seya un par de puntinos que los ayuden a pasar a Manor na clasificación. Viendo lo que vimos hasta agora paez difícil.