Category: Temporada 2016

Y fíxose l’agua. Otru elementu que reapaeció esta temporada xunto cola vuelta del circuitu d’Istambul Park y que vieno a xiringar les posiciones mesmo en pariella como en carrera pa da-y un toque distintu a esti gran premiu. Y ye qu’esti elementu garró yá protagonismu dende los llibres y fíxose especialmente notable na clasificación que tuvo que ser pausada por mor d’ello. Una sesión de clasificación na que yá toparíemos les primeres sorpreses del eventu. Con una adaptación increible de los coches de Racing Point, fueron estos los protagonistes de los primeros puestos. Comandaos per Stroll, namás Verstappen pudo asomar el focicu na primer llinia de salida per delantre del otru coche del equipu rosa. Mala sesión pa Mercedes qu’acolumbraba una carrera complicada onde Hamilton xugábase proclamase campeón del mundu. Bones sensaciones tamién p’Alfa Romeo que metíen los dos coches ente los diez primeros puestos mientres que na otra cara de la moneda quedaba McLaren con unos resultaos bastante probes.

Yá nel domingu la lluvia siguió presente pero con intensidá menor, incluso menos de lo pronosticao pa la segunda parte de la carrera. Al contrario de lo que pasó na sesión anterior, nun foi’l día nin de Stroll nin de Verstappen. El pilotu holandés de Red Bull nun tendría una bona salida y perdería posiciones tres d’un error al intentar gana-y la plaza a Checo Pérez, lo que comprometería la so carrera al tener qu’entrar a boxes de secute. Stroll encabezaría la prueba hasta que, pasada la mitá del gran premiu veríase obligáu a entrar una vegada más de les planificaes en box pa cambiar unos neumáticos que se vieren desgastaos por un golpe nel alerón delanteru. Saldría primeru, pero acabaría novenu nuna carrera na que’l so compañeru d’equipu aprovecharía p’acabar en podiu aguantando la plaza cola que salió en parriella.

Lewis Hamilton llogró’l so sétimu títulu de Campeón del Mundu nuna carrera que nun paecía fecha pa que celebrare nada. A los problemes colos reglaxes pa facer funcionar les gomes sobre l’asfaltu nuevu del circuitu axuntóse l’agua lo que nun dexaba a les fleches platiaes nes meyores condiciones pa enfrentase a la carrera, como demostraría lo que víemos el sábadu. Por embargu, el domingu supo xestionar les gomes y reducir los errores al mínimu pa acabar siendo’l vencedor del gran premiu y del campeonatu. Una carrera que dibuxaba una forma guapa de facelo, saliendo dende’l sestu puestu y demostrando les habilidaes en moyao. Nun-y foi tan bien a Bottas que pago’l preciu d’un trompu al iniciu con daños nel coche y con una perda considerable de posiciones. Nun foi quien a recuperar el ritmu y acabaría fuera de los puntos.

Sebastian Vettel realcontraríase col podiu tres muncho tiempu y muncho trabayu pa entendese col Ferrari d’esti añu, saliendo novenu sabría aprovechar les oportunidaes pa dir esguilando na clasificación y metese na llucha ente Pérez y Leclerc nes últimes curves p’aprovechar un error del segundu y entrar nel podiu. Leclerc tuvo’l tercer puestu al algame hasta esa última curva nuna carrera na que tamién supo dir de menos a más.

Alexander Albon fadría una carrera discreta lo que tien les sos coses buenes y les sos coses males cuando falamos d’esti tipu de carreres, acabaría sétimu tres salir cuartu. Lando Norris nun tuvo un bon día na clasificación, pero foi quien a igualo en carrera metiéndose en puntos y faciendo la so carrera. Puntos mui importantes pa McLaren.

En Renault quiciás esperaben más d’esti gran premiu, especialmente cola batalla tan apertada que tienen con Racing Point y McLaren, pero nun puedieron pasar de décimu y undécimu. Pocos puntos pal equipu que tendrá que siguir sumando si quier subir puestos na clasificiación. Tampoco foi’l día pa los Alpha Tauri, tamién con problemes y qu’acapararon les dos posiciones siguientes. Räikkönen nun pudo facer buenu’l resultáu del sábadu quedando ensin puntos en carrera mientres Haas tuvo una carrera pa olvidar con Magnussen nel puestu 17 y con Grosjean fuera de carrera. El pilotu danés foi precedíu per George Russell. Williams sigue ensin llograr un puntu esti añu y Latifi nun pudo acabar la carrera. Muncho tendrán que meyorar les coses pa estos pilotos y equipos nes carreres que vengan.

La viniente carrera llévanos al desiertu, al circuitu de Shakir, au tornaremos a ver a los coches embaxo les lluces artificiales.

Cola mesma velocidá que lleguemos a la carrera final del campeonatu, pasó esta. La temporada 2016 yá ye parte de la hestoria, pero enantes de pasar páxina vamos analizar qué nos dexó esti Gran Premiu d’Abu Dhabi.

L’escenariu yera, dientro lo posible, bastante atrayente: entá taba por decidise’l campeonatu de pilotos (sí, val, otra vez ente pilotos de Mercedes pero está vegada sí que paecía que Rosberg podía consiguilo), dos de los pilotos más veteranos corríen el so últimu gran premiu (anque haiga entá dalguien que crea que lo de Button ye un añu sabáticu) y, anque menores, entá nos quedaban batalles por resolver.

Con Hamilton en pole, yera quiciás cenciello albidrar que diba consiguir facese cola carrera’l domingu, sobre too por ser Abu Dhabi un circuitu onde ye relativamente complicao adelantar. Dicimos relativamente, porque’l porcentaxe de victoria dende la pole yera bien baxu, alredor del 29%, polo que tampoco nun yera una garantía de triunfu pal pilotu inglés.

Rosberg salía decidíu a facer la so carrera, siguiendo’l patrón de los últimos grandes premios: siendo segundu diba ser campeón y arriesgase a pasar a Hamilton yera sinónimu de riesgu dalgo qu’elli nun necesitaba pa consiguir el so propósitu. Demientres la selmana bromearon dellos pilotos col ayudar a Hamilton, col papel de Red Bull en carrera y cola posibilidá de que Hamilton xugare a bloquear al so compañeru pa facilitar el llabor d’adelantamientu a los del equipu austriacu. Y too eso pudimos velo nesti últimu gran premiu de la temporada.

La salida foi tranquila pa tolos pilotos de cabeza menos pa Verstappen, que n’un incidente con Pérez perdía posiciones que llueu nun podría recuperar fácilmente. Anque llegó a rodar segundu, nunca nun llegó a ser un candidatu real a la victoria. L’enemigu de les fleches plateaes pasó a ser, pa variar, Ferrari, que con bastante bon ritmu, especialmente nel llau de Vettel, taben decidíos a ganar la partida esta vez. Les entraes en pit de Mercedes fueron copiaes pola scudería y de fechu, perxudicaron per dos veces al equipu alemán que tuvieron de retener a dambos pilotos (caún na so parada) pa dexar pasar a un pilotu Ferrari y evitar devolvelu a carrera de forma peligrosa, dalgo que diba terminar en penalización. Nun foi munchu’l tiempu que perdieron, pero sí lo suficiente pa que Mercedes posare los pies na tierra y dexara de creyer que taba too fecho.

Tamién na salida, vimos a Magnussen n’apuros, convirtiéndose nel primer retiráu de la carrera. A partir d’esi momentu, la carrera entró n’una especie de letargu, na que paecía que yá quedaba too dicho. Vimos a Button romper la suspensión del coche y vese obligáu a retirase nel so últimu gran premiu. Tamién tuvo problemes Bottas, sumándose a la llista abandonos.

Sedría nel últimu terciu de carrera cuando tornare la emoción al gran premiu: Hamilton decidió activar el mou estratéxicu, viéndose segundu del campeonatu baxó’l ritmu de carrera, reteniendo a Rosberg que diba xusto detrás, y faciendo asina que los sos persiguidores (Verstappen y Vettel) s’averaren a elli. Equí empezó’l nerviosismu de Rosberg, que pidía por radio que mandaren acelerar a Hamilton o que lu dexaren pasalu, y el pasotismu de Hamilton al que-y pidieron d’elles vegaes qu’acelerare (ente otres coses pa nun comprometer la so propia victoria) pero ensin consiguilo. El británicu víase subcampeón y ya-y daba lo mesmo’l resultáu de la carrera.

Les últimes vueltes fueron un auténticu supliciu pal pilotu alemán, que tuvo a Vettel pegáu y a puntu d’adelantalu nos últimos metros. El so aliviu yera que, siendo terceru, tamién podía ser campeón. Al final, Hamilton ganaría la carrera, una victoria bien amarga, yá que xunto a elli nel podiu taben, aparte de Vettel, terceru, el so compañeru d’equipu y nuevu campeón del mundu, Nico Rosberg, en segundu llugar.

Pal restu d’equipos, alloñaos del focu d’atención, la carrera nun foi de les más vistoses: Palmer foi sancionáu por una colisión con Sáinz, que tuvo de retirase, xunto al so compañeru d’equipu, Daniil Kvyat, que tamién quedara fuera d’elles vueltes primero. Un gran premiu pa olvidar pa Toro Rosso. Manor rozó los puntos otra vuelta más, pero nun pudo sumar nengún y perdió la partida escontra Sauber. N’un momentu de la carrera víemos a dambos pilotos lluchando ún contra l’otru y sacándose fuera de pista.

Force India consiguió finalmente ser cuartu del campeonatu de constructores perriba Williams, metiendo a dambos pilotos en puntos otru gran premiu más. Williams sólo pudo terminar con Massa, que foi novenu. McLaren sumó otru puntu col décimu puesto d’Alonso.

Tai sollertes a los prósimos díes pal análisis por equipos del gran premiu d’Abu Dhabi y pa un resume final de temporada.

De momentu, equí vos dexamos tolos datos sobre la sesión de calificación del sábadu, con Hamilton, Rosberg y Ricciardo nos tres primeros puestos de parrilla, y los resultaos del domingu, onde la victoria foi pa Hamilton y el campeonatu del mundu pa Rosberg:

Clasificación

Carrera

Descansu pa unos, naguar pa otros. Llega’l final de la temporada de Fórmula Uno 2016 y failo en mediu del desiertu n’Abu Dhabi, nel circuitu de Yas Marina.

Dexando de llau lo que supón tener unes instalaciones asina n’un paraxe qu’antaño yera namás qu’una sablera, aterrizamos en Yas Marina pa ser testigos de la última carrera del añu formuleru y tamién del desenllaz del campeonatu. Sí, son los mesmos protagonistes que los últimos tres años, pero a lo menos esti añu nun tenemos al mesmu pilotu perriba y ye que Nico Rosberg podría convertise en campeón del mundu de Fórmula Uno esti domingu per primer vegada. Paez que tien toles papeletes pa conseguilo, pero la xente que siguimos la Fórmula Uno sabemos que hai qu’esperar.

Los númberos son los siguientes: si gana Hamilton, Rosberg sedría campeón siendo terceru, si Hamilton quedara segundu, a Rosberg valdría-y ser sextu; si Hamilton fuera terceru, Rosberg podría ser campeón siendo quintu, y si Hamilton quedare fuera del podium, incluso siendo cuartu, el campeón sedría Rosberg.

Como vos dicimos, paez que lo raro sedría qeu Rosberg nun aprovechare la so oportunidá de ser campeón, anque nun tenemos claro que vaiga dir a pola carrera, yá qu’arriesgar nun-y beneficia a elli precisamente. ¿Veremos una repitición de les últimes carreres nes que Hamilton dominaba y Rosberg lu siguía ensin cometer errores bultables, pa ser segundu? Ye bien fácil que seya asina, pero hasta que nun salga la bandera a cuadros el domingu a eso de les tres y media llargues nun vamos sabelo.

Pal restu de pilotos, última carrera (en Fórmula Uno) pa dos veteranos como son Massa y Button y otru par d’ellos coles duldes sobre’l so futuru en 2017: Ericsson renovó hai unos díes con Sauber y falta saber quién lu va acompañar. Suenen Nasr, actual pilotu de la escudería y responsable de los dos puntos que l’equipu sumó esti añu, y Esteban Gutiérrez, que corrío con Haas esti 2016. Falta saber amás que va pasar con Wehrlein y Manor. Anque yá más o menos tenemos claro quién va tar onde pa 2017, falten esi par de flecos por determinar.

Con casi tolo demás decidío, paez que la másima emoción (como si fuera poco) va tar no que fagan los dos pilotos de Mercedes. Nun sabemos si Manor va ser quien a consiguir dos puntos pa ponese perriba Sauber (sinceramente, nun pensábemos que Sauber fueren a facelo esti añu) y quiciás ehí podemos atopar dalgo de lo que tar pendientes mesmo que la batalla, casi finalizada, ente Force India y Williams.

Ensin más, vos dexamos con dellos datos sobre’l circuitu de Yas Marina equí y el resume de les gomes que Pirelli pon a disposición de los equipos pa esti últimu gran premiu de la temporada:

Prometémosvos que nun vais echar tantu tiempu en lleer esta crónica como en ver la carrera d’esti gran premiu pasáu. Al más puru estilu Canadá 2011, el gran premiu de Brasil 2016 empezó un pocu p’allá de les cinco la tarde, y nun vio final hasta más allá de les ocho.

Y ye que yá pintaba que diba ser una carrera accidentada según taba’l tiempu, y según los pronósticos que tuvimos demientres tol fin de selmana d’agua n’Interlagos. Tando como tamos avezaos a que los del tiempu nun acierten, nun esperábemos la d’agua que diba cayer en Sao Paulo enantes del gran premiu y demientres los coches taben en pista.

Grosjean foi’l primer afeutau poles condiciones meteorolóxiques y quedaba fuera de carrera cuando taba dando la vuelta de formación y diba camín de la parrilla de salida. Eso fexo que’l gran premiu nun empezara a la hora. Dempués, tomose la decisión de que too empezare detrás del coche de seguridá, dalgo que los pilotos criticaron por creyer que les condiciones yeren decentes pa correr. Pocu a pocu foi viéndose qu’anque había partes que nun presentaben mayor problema, otres yeren una aventura. Tolos pilotos llevaben gomes de lluvia estremo pero pronto dellos optaron polos intermedios, col riesgu qu’eso suponía.

Al pocu de desapaecer el coche de seguridá dempués de siete vueltes, segundu accidentáu del día: Marcus Ericsson perdía’l control del so coche que quedaba atravesáu na entrada al pitlane, lo que trexo consigo otru coche de seguridá ya la prohibición d’entrar en boxes, dalgo que sí fexo Red Bull con Ricciardo lo que supunxo cinco segundos de penalización pal piotu australianu. Massa veríase tamién penalizáu con cinco segundos por adelantar enantes de la lína de coche de seguridá.

Cuando too quedo listo pa tornar a ver los coches correr, víemos a Rosberg “vendese” ente Verstappen, o pa ser xustos col alemán, ser lo suficientemente intelixente como pa nun arriesgase más de lo necesario nes condiciones nes que taben conduciendo y con un pilotu como’l holandés. Llevábemos unes poques vueltes dempués de qu’entrare’l coche de seguridá de vuelta al so garaxe, cuando Kimi Räikkonen perdía’l control del so Ferrari na recta de meta y tenía un accidente bien gordu (y que pudo ser pior viendo los pilotos que tenía detrás y que lu consiguieron esquivar) y apaecía la primer bandera colorada del día pesie a que primero sacaben el coche de seguridá. Yera obvio que l’estrozu de Räikkönen y tolos restos del coche diben a necesitar que la carrera tuviera aparada.

Tolos coches tuvieron la posibilidá de camudar les gomes y de tocar partes dañaes (por exemplu, Hülkenberg que llevó puestu nel alerón delanteru un pedazu del Ferrari de Kimi) y al reanudase la carrera, tolos pilotos diben, otra vegada, con neumáticos de lluvia estremo y detrás del coche de seguridá. Pasaron otres ocho vueltes hasta que Charlie Whiting (direutor de carrera) decidió aparar la carrera (otra bandera colorada) énte les males condiciones de pista. Con esta decisión, ganose les crítiques de los pilotos y los abucheos del públicu, fartucu de moyase y de nun ver espectáculu en pista.

Dempués d’un ratu d’inactividá, volvíemos a tener carrera (na vuelta cuarenta y ocho) ya’l siguiente en sumase a la lista de pilotos que nun diben ver la bandera a cuadros foi Massa. Precisamente, el pilotu brasileñu foi quien protagonizó’l momentu más perguapu del fin de selmana cuando, dempués del accidente que lu dexó fuera de carrera (nel mesmu puntu qu’Ericssón) garraba una bandera de Brasil y percorría tola distancia del pitlane saludando al públicu que lu ovacionaba, a los comisarios que taben peremocionaos, y pasaba per delantre de los garaxes d’otres escuderíes d’au los mecánicos salieron p’aplaudilu al so pasu. Al final, atopose cola so muyer ya’l so fíu, poniendo’l broche a unu de los momentos más emotivos que tenemos vivío na hestoria de la Fórmula Uno.

Dempués de que’l coche de Massa fuera sacáu de pista, volvíemos a tener carrera y diba pagar la pena tola espera y tolos parones. Red Bull decidía meter a Verstappen en pista dempués de que’l pilotu holandés nun fuera quien a facer funcionar los intermedios que montara un tiempu enantes. Paecía que l’equipu tiraba la carrera a la basura, a lo menos el podiu, pero nun foi eso lo que vimos hasta’l final. N’una remontada que valió l’aplausu y les bones pallabres de bien de xente, Verstappen foi imponiéndose pasín ente pasu a los sos rivales en pista, pasando del puestu doce al terceru, recuperando la posición que perdiera pola última entrada en boxes.

A too esto, Hamilton lideró una carrera qu’enxamás ganara, y colócase con cincuenta y dos victories na so carrera deportiva. Nun vamos dicir que foi una carrera fácil pa elli, yá que neses condiciones cualquier erru tuviera sío fatal y el pilotu inglés nun amosó en nengún momentu signos de debilidá ente los sos persiguidores. Rosberg salvó los muebles dempués de rodar terceru demientres delles vueltes, y aprovechóse de la estratexa de Red Bull pa recuperar el segundu puestu que yá nun diba dexar hasta la bandera a cuadros.

Ye reseñable’l novenu llugar de Felipe Nasr, que da a Sauber dos puntos perimportantes na so batalla con Manor pol décimu puestu de constructores, que tuvieron casi tola carrera nos puntos con Ocon, anque al final perdieron el décimu llugar nos últimos momentos de la carrera. Red Bull yá son oficialmente subcampeones y McLaren suma otru puntu gracies a Fernando Alonso. Tamién puen tar contentos en Force India col carrerón de los sos dos pilotos, cuartu y séptimu, y en Toro Rosso col sextu puestu de Sáinz. El so compañeru Kvyat namás pudo ser décimoterceru dempués d’un accidente con Palmer que lu llevó per delantre un tiempu enantes del accidente de Räikkönen, dexando claro que les condiciones de visibilidá en pista yeren bien probes. Aparte de los que yá se nomaron, Esteban Gutiérrez tamién quedó fuera.

Embaxo podéis atopar los resultaos de la calificación del sábadu y los de la carrera:

Clasificación

Carrera

Paez que sorprende qu’a les puertes d’unu de los grandes premios más importantes del calendariu y con too por decidise nel campeonatu de pilotos, se tea falando muncho más de lo que tien pasao fuera y de los movimientos nes escuderíes que del campeonatu y la carrera que tenemos delantre en sí. Pero asina ye a vegaes la Fórmula Uno.

El casu ye qu’aterrizamos en Brasil, penúltima carrera del campeonatu, una de les grandes, símbolu del deporte del motor ya escenariu de grandes carreres que decidieron campeonatos. Pue ser, de fechu, que la d’esti domingu seya otra d’elles, anque col bon momentu de forma nel que llega Hamilton, too paez albidrar que vamos dir cola dulda hasta Abu Dabi.

Fuera de pista, esti par de selmanes falóse muncho de Vettel y lo que fexo ya dixo en México, de Verstappen y la so forma de plantase en pista, de la marcha de Magnussen de Renault a Haas, de que Palmer queda en Renault, de qu’Ocon va movese a Force India y de los pilotos de Williams pa 2017. Como siempres, los diarios especializaos en motor enllenen páxines y ringleres con información de fuera de pista, anque, como nesti casu, entá nun sepiamos quien va ser el nuevu campeón del mundu.

Nun hai motivos pa creyer que Hamilton nun vaiga ganar otra vegada, pero tampoco pa pensar que Rosberg nun va intentalo. El fechu de qu’al alemán-y valga ser segundu nes dos carreres que queden pa ganar pue ser sinónimu de dir a conservar y conformase con ser segundu, anque tol mundu sabe qu’eso de ser segundu nun entra nel vocabulariu de los pilotos.

Con un escenariu tan cambiante y prestosu como ye la pista d’Interlagos, sólo queda espera que la del domingu seya una carrera que nos faga alcordanos de por qué siguimos esti deporte.

Embaxo podéis atopar información sobre les gomes que van usase nesti gran premiu y equí tenéis tolo que hai que saber sobre Interlagos.

La carrera que víemos el domingu nel Autódromo Hermanos Rodríguez de México nun va pasar a la hestoria como’l más entreteníu en xeneral, pero sí como’l que más dio que falar pol so final y el dir y venir al final d’elli.

Toles promeses de lluvia que se facíen pal domingu quedaron desaniciaes cuando víemos rellumar el sol dende bien ceo. Paecía pues que diba ser, otra vuelta, un paséu de Mercedes. Y anque asina foi, más o menos, hebo delles coses que rescamplar.

De primeres, la salida, onde Hamilton salía bien, dexando atrás a un Rosberg peleáu con Verstappen pola so segunda posición, batalla que casi afeutó a Hamilton que tuvo d’atayar pelo verde, siendo protagonista d’unu de los movimientos que más se tienen criticao por considerase que ganó ventaya y tendría de tener sío penalizáu. Nel primer xiru darréu la recta de salida, atopábemos los primeros afeutaos polos incidentes de carrera: Wehrlein quedaba fuera dempués de que Gutiérrez chocara con elli, y faciendo que l’alemán llevara consigo a Ericsson, que llueu pudo siguir en carrera. De fecho, foi l’alemán de Manor l’únicu retiráu de carrera.

Primer vuelta de coche de seguridá, qu’ayudó a pilotos como Ericsson que pudo entrar bien llueu pa intentar compensar los problemes del choque con Wehrlein, y Ricciardo, qu’entraba demientres Maylander rodaba cabezaleru.

Tres d’esti primer incidente, la carrera estabilizó daqué. Sáinz recibió cinco segundos de penalización por echar a Alonso de pista cuando lluchaben por posición. La batalla más interesante protagonizáronla Felipe Massa y Sergio Pérez, que nun yera quien de ponese per delantre del pilotu de Williams.

Pa Hamilton foi una carrera bien tranquila, non tanto pa Rosberg que tuvo de defendese de los Red Bull qu’amenazaben con quitai la segunda plaza na carrera. Vettel, pel so llau, tamién peleó colos Red Bull, completando una bona carrera nel llau de Ferrari dempués de la deceición de la calificación del sábadu. Ensin embargu, nun diba dir too tán tranquilo como l’alemán pensaba. Xunto col so calvariu poles banderes azules, que yá vien siendo vezu en delles carreres, la so batalla con Verstappen tornose más intensa colos ataques del holandés que puxando por adelantalu salíase y ganaba una posición que nun devolvió por más que Vettel-Ferrari y Red Bull-y lo desixeren. Ello ye que terminó la carrera y Verstappen nun devolvió la posición, un xestu que nos paez absurdu, sabiendo de sobra que diba cayer en penalización y lo que fixere al final nun diba valer.

El historial d’estos dos pilotos en pista ye llargu, y pudimos ver a Vettel desesperáu, viendo que Ricciardo vinía per detrás d’elli con intención de pasalu, gracies a que’l so compañeru taba taponando al pilotu Ferrari. L’alemán nun entendía que Verstappen nun-y devolviera la posición. Na so batalla con Ricciardo, realizó dellos movimientos duldosos que terminaron siendo investigaos y penalizaos polos comisarios.

Verstappen acabó terceru la carrera. Allegóse a la sala onde taben Hamilton y Rosberg, pa tener de marchar a los pocos minutos por recibir una penalización que lu dexaba quintu. Vettel tuvo de salir del coche y correr al podium porque esa penalización dexábalu a elli terceru. Les ceremonies del podiu pasaron, con dos pilotos de Mercedes intentando mostrase ayenos a lo que pasaba y la solombra d’otra penalización apaeció.

Tenemos de comentar que, dientro la so desesperación, Vettel falaba por radio de mui males maneres hacia’l direutor de carrera, Charlie Whiting, dalgo que, ensin escusalo, dexa bien a les clares la frustración pola pasividá de la FIA a la hora de penalizar a Verstappen en pista. L’holandés fexo lo que-y dio pola gana pela carrera, ensin qu’ello tuviere consecuencies, más que les de vese relegáu al quintu puestu. Siguimos entrugándonos si la FIA, siendo tan permisiva col pilotu nun tará creando un monstruu, nel pior sentíu de la pallabra. Nun duldamos de la so capacidá en pista, asina como nun duldamos del so talentu y de que posiblemente llegue a ser campeón del mundu y a facenos esfrutar bien de veces sobre l’asfaltu, pero les sos formes en pista dexen muncho que deseyar, y yá nun paez que seya namás un pilotu agresivu nes sos defenses y nos sos ataques.

Pa rematar la riestra de penalizaciones, Vettel recibía diez segundos por, según la FIA, realizar movimientos potencialmente peligrosos en pista (pa defendese de los ataques de Ricciardo). Al final, el pilotu australianu recibió’l trofeu ensin subise al podiu y asegúrase’l tercer puestu nel campeonatu de pilotos.

Nel restu de la parrilla, bona carrera d’Ericsson y Palmer, aguantando casi tola carrera coles mesmes gomes. Deceición, otra vuelta más, en McLaren, con Alonso dexando recadinos al equipu (“tú fai’l to trabayu que faigo’l de mio”), y colos Toro Rosso desapaecíos en combate, tres d’un sábadu positivu pa Sáinz.

Equí vos dexamos los datos de calificación y carrera. Tai sollertes al análisis por equipos onde vos vamos detallar más lo que dio de sí’l gran premiu pa cada escudería:
Clasificación

Carrera