Category: AsturiesF1

Ensin casi respiru yá tamos en Brasil, nel Autodromo José Carlos Pace, ún de los circuitos referente del calendariu pa pilotos y equipos. Equí tiénense decidío munchos campeonatos y vien siendo escenariu de carreres bien prestoses de les que nun permiten que te despegues del asientu. Tando como ta’l campeonatu, nun podemos pidir más qu’una carrera cola emoción d’otres del pasáu.

Llegamos coles coses dalgo más folgaes pelo cimero, pero mui apertaes per detrás. Nun ta too ganao, en Red Bull sábenlo, pero tienen la tranquilidá d’un marxe de venti puntos nel mundial de pilotos y namás a un puntu de Mercedes nel de constructores. Una bona carrera n’Interlagos podría dexalo too dicho faltando les tres carreres nel desiertu.

Sicasí, nun nos paez que teamos nún d’esos años nos que too se resuelve ceo y nel que les últimes carreres namás valen pa que se decidan posiciones de la mitá baxo de la tabla. Esti añu tenemos tantos frentes abiertos que ye fácil que nun lleguemos con too visto a la última cita n’Abu Dhabi. Mercedes va precisar dalgo más que lo que vienen ufriendo nes últimes carreres pues, ta claro, nun ye abondo pa batir a Red Bull.

McLaren tien a Ferrari a trece puntos y mediu, una distancia qu’a estes altures del campeonatu yá empieza a ser bastante. Sicasí, con cuatro carreres entá por disputase y un circuitu como’l d’Interlagos, too ye posible, incluso que McLaren durma terceru’l domingu. Les batalles por posición d’esta temporada tán siendo bien entreteníes. Onde otros años diba quedando too decidío bien ceo, esti añu tenemos coses que güeyar perdayuri.

Un aspeutu que nun podemos escaecer mentar ye qu’esta va ser l’últimu eventu nel que vamos tener una clasificación al sprint. L’esperimentu llega al so final con muncho no que pensar sobre cómo ameyoralo y facelo dalgo más interesante. Veremos qué nos ufre nesta ocasión nel circuitu brasileñu.

¿Sedrá quién Hamilton a ganar n’Interlagos? ¿Agrandará Verstappen la so ventaya nel mundial? Demientres llega’l momentu de resolver estes cuestiones, equí vos dexamos tola información que tenemos nel retornu a Brasil de la F1. Nun perdáis detalle:

Y éstes son les gomes escoyíes pa disputar esti gran premiu en tierres brasileñes:

Yá vimos los coches en pista nos test d’hai unos díes nel circuitu de Sakhir, en Baḥréin, pero vamos ufrivos una imaxe más cercana compartiendo les presentaciones que ficieron los equipos de los sos monoplaces nestes últimes selmanes:

MERCEDES AMG-PETRONAS F1 TEAM

Caltienen al mesmu par de pilotos y apuesten por siguir no cimero de la clasificación, anque nos test paeciera que’l so dominiu nun vaya a ser talu por mor de los problemes de configuración que tuvieron col coche. Con un güeyu puestu yá no que va ser 2022, esti ye’l coche de Mercedes pa esta temporada.

ALPINE F1 TEAM

Col retornu de Fernando Alonso a la parriella de la Fórmula 1 asoma Alpine F1 Team, de les cenices de Renault y cola promesa de tener un coche competitivu pa 2022, les blimes van ponese esti añu de transición. Del llau del asturianu va tar Esteban Ocon na so segunda temporada na F1 col equipu francés en reestructuración d’arriba a baxo. Esti va ser el so coche pa esti añu.

HAAS F1 TEAM

Hai munches miraes puestes enriba del equipu estauxunidense pa esti 2021. Per un llau por tener nes sos files al fíu del campeón del mundu Michael Schumacher y que, a la fin, va tener la so oportunidá de dexar de ser “el fíu de” pa ser un pilotu de F1 por méritu propiu, méritu pol que llego a la F1 tres llograr el campeonatu en F2. Per otru, el rusu Nikita Mazepin, que yá dende bien ceo dio qué falar y non por bones razones. Haas ta más necesitáu que nunca de bonos resultaos p’asegurar el so futuru na máxima competición del motor. El so coche pa 2021 va ser esti.

McLAREN F1 TEAM

Con un de los pares de pilotos más interesantes de la parriella, McLaren precisa tener otru bon añu como 2020 nel que confirmaron que tán de vuelta a los puestos primeros y que pueden incluso suañar con ganar carreres. Sicasí, entavía queda camín que percorrer y como tantos otros equipos, esti 2021 va ser el pasu previu enantes de tentar de recuperar el llideralgu perdíu nos últimos años, esti añu’l cambiu de motor a Mercedes pue ser un acelerador d’esi cambiu, anque hai que ver cuánto pesa esa transición nel conxuntu del paquete. Esta temporada, Lando Norris y Daniel Ricciardo van tar al volante d’esti coche.

ALFA ROMEO RACING ORLEN

Otru de los equipos que caltién el so par de pilotos pa 2021 ye Alfa Romeo que tira de veteranía otru añu más con Kimi Räikkönen y premia la temporada de Giovinazzi cola oportunidá d’ameyorar los sos resultaos l’añu pasáu. Ensin muncho que perder y too per delantre, Alfa Romeo tentará de batallar na parte media de la tabla, en principiu, con equipos como Haas o Williams. Esti va ser el so coche pa 2021.

RED BULL RACING

Añu tres añu fueron consolidándose como equipu punteru, y añu tres añu son l’únicu equipu capaz de desafiar el dominiu de Mercedes, anque nunca del too. Esti 2021, cola incorporación de Sergio Pérez de llau de Max Verstappen, calidá al volante nun va faltar. Queda ver si’l coche nel que trabayaron estos meses puede de verdá facer sombra al W12, les sensaciones nes primeres pruebes de la temporada son perbones, veremos en qué queden. El monoplaza de Red Bull ye esti.

ASTON MARTIN COGNIZANT F1 TEAM

Racing Point reconviértese n’Aston Martin ya incorpora al equipu al campeón del mundu Sebastian Vettel que precisa d’un coche competitivu que-y permita amosar que lo que se vio en Ferrari ye cosa del pasáu. L’alemán va tener al so llau a Lance Stroll, pilotu mui necesitáu de mostrar al mundu que nun ta compitiendo en F1 namás por ser el fíu del dueñu del equipu. La so xera de llau de Vettel va tar complicada. L’Aston Martin ye, pa nós, ún de los coche más atractivos de ver en pista, pero ¿sedrá tamién competitivu? La so “cercanía” a Mercedes nun ye secretu pa naide yá. Asina ye como se ve.

SCUDERIA FERRARI MISSION WINNOW

La Scuderia vien siendo estos últimos años un querer y nun poder que suma deceiciones y munches duldes. Sicasí, cada añu ye una nueva oportunidá pa dexar atrás lo malo del anterior y esti añu, con un par de pilotos bien interesante y competitivu nuna apuesta clara pol futuru incorporando a Carlos Sáinz, quiciás podamos ver una meyor versión de Ferrari. 2021 ye, en principiu, una temporada de transición, pero ta claro que tolos equipos salen cola intención de ser quien sume esi campeonatu al so historial. El monoplaza que presenta Ferrari pa esti añu ye esti.

SCUDERIA ALPHATAURI HONDA

2020 va ser un añu qu’esti equipu nun va escaecer. Repiten con Pierre Gasly, que paez que yá dexó atrás los problemes en Red Bull, y sumen a Yuki Tsinoda, una de les promeses de la parriella. Contamos col equipu pa ser de los que lluchen na mitá alta de la tabla depués de lo que vimos nes sesiones de test de pre-temporada, pero igual el propulsor d’Honda nos da dalguna sorpresa. El so coche pa 2021 ye esti.

WILLIAMS RACING

Williams tuvo un 2020 de munchu cambiu, problemes varios y, en xeneral, munches deceiciones. Sicasí, entamen 2021 cola ilusión d’un añu nuevu y tamién coles bones sensaciones de los test de pre-temporada, que los dexaron en bon llugar y quiciábes cola oportunidá d’esta vegada poder lluchar n’igualdá con equipos como Haas o Alfa Romeo. Caltienen a los sos dos pilotos pa esta temporada y van competir con esti monoplaza.

Presentaos los pilotos y los coches y vistos los test, namás nos queda preparanos pa qu’entame la temporada nunos díes. Como yá vos cuntamos na nuestra primer entrada d’esta temporada, nun vamos aniciar l’añu n’Australia como davezu si non que vamos quedar en Baḥréin pa la primer carrera. ¡Tai sollertes qu’esto empecipia!