Category: Paddock

Anque yá lleva dellos díes en funcionamientu, ponémonos agora dafechu en marcha pa esfrutar d’otra temporada na máxima competición del motor. Hai milenta cambios, milenta histories que cuntar y una bayura de carreres pa comentar. Esta nueva edición de la F1 vien con munches novedaes, entavía afeutaos como tamos pola pandemia del coronavirus que yá tuvo impautu en 2020. Nunos díes, vamos ver les lluces colloraes apagase nel circuitu de Sakhir, qu’esti añu va ser la carrera d’entamu de la temporada. Precisamente nesti circuitu vivimos hai unos díes los primeros ya únicos test de pre-temporada, qu’abrieron munches puertes a un 2021 apertáu pela parte medio de la clasificación y con munchos equipos prometiendo munches coses bones. Mercedes y Red Bull lleven años siendo candidatos a lluchar polos campeonatos anque ye verdá que la escudería de Brackley s’impuso nos últimos años. Sicasí, nun van tar solos. Ferrari arriesga y pinta que va tentar de complicar les coses a los dos favoritos demientres Aston Martin (enantes Racing Point), en teoría un Mercedes B, vien tocando na puerta pidiendo pasu. Nun podemos escaecer a AlphaTauri, que marcó bonos tiempos y dexó perbones sensaciones nos test de pre-temporada. Duldes en Mercedes, bones sensaciones colos motores Honda y un Ferrari que nun quier quedar atrás, nun paez mala xunta.

Va ser interesante ver tamién la llucha ente Alpine (enantes Renault) con Fernando Alonso al volante, y McLaren, qu’agora tien de pareya de pilotos a Norris y Ricciardo. Son quiciás los más fuertes, xunto con Aston Martin, de la parte medio-alto de la tabla. Sicasí, cuidamos que la llucha per baxo nun va tar menos interesante. Williams dio un pasu alantre, lo que podría ponelu al altor d’equipos como Haas y Alfa Romeo. Nesa zona, los puntos véndense mui caros y de xuru vamos ver una prestosa batalla ente los tres equipos.

Tenemos delles cares nueves en parriella, mesmo que pilotos emigraos d’otros equipos. Tal ye’l casu de Sergio Pérez que ta énte la oportunidá de la so vida en Red Bull. Paecía que’l mexicanu diba quedar fuera de competición pa 2021, pero a última hora l’equipu del toru coloráu escoyólu pa facer par xunto a Max Verstappen. Aparte d’en McLaren y Alpine, que yá comentemos, tamién hubo cambiu en Ferrari, au l’espaciu dexáu por Sebastian Vettel (agora en Aston Martin) ocúpalu agora Carlos Sáinz. Mesmo pasa en Haas, que yá nun cuenta con Grosjean y Magnussen. Los dos veteranos dexaron los sos volantes qu’agora ocupen Mick Schumacher y Nikita Mazepin. N’AlphaTauri tenemos a Tsinoda de compañeru de Pierre Gasly. mientres que’l restu d’equipos nun camudaron la so alliniación.

Equipos y pilotos 2021

Esti añu vamos tener un total de 23 carreres que vos resumimos na siguiente tabla:

Calendariu 2021

Como veis, un calendariu escomanáu que contrasta enforma coles diecisiete carreres que vivimos en 2020. Ensin duldes otru añu de retos pa equipos y pilotos y que vos vamos cuntar equí n’Asturies F1. ¡Arrancamos!

Entá nos queda más d’una selmana pal prósimu gran premiu (Bélxica) pero la Fórmula Uno sigue dando noticies. Y ye que tamos en medio de lo que yá se conoz dende va tiempu como silly season, esi momentu na temporada na qu’empiecen los rumores sobre pilotos diendo y viniendo d’equipu n’equipu. 2016 nun diba ser diferente.

Podemos empezar por comentar que dende la prósima carrera vamos tener una cara nueva na parrilla, anque nun seya un desconocíu: Esteban Ocon va sustituyir a Rio Haryanto nel Manor. Lo qu’empezare siendo rumor (el gobiernu d’Indonesia nun taba faciendo los pagos necesarios pa que’l pilotu pudiera siguir sentáu nel so coche) acabó por facese real hai unos díes, cuando Manor confirmaba que diben tener a Ocon como compañeru de Wehrlein. Diose asina puerta a los rumores que vinculaben a Vandoorne col equipu, y refuérciase la presencia de Mercedes en parrilla qu’asitió en Manor a dos pilotos del so programa. Ocon taba compitiendo con Mercedes en DTM mientres facía les llabores de reserva de Renault y segundu reserva de Mercedes.

Continuamos col futuru del pilotu de McLaren Jenson Button. Lleva un par d’años yá nos que l’equipu dexa pa última hora la decisión de quedase con elli o non, ya esti añu comentaren que hasta setiembre nun diben empezar a tratalo. Lo que ta claro ye que los güeyos del equipu británicu tán más enriba de Vandoorne que nunca, y los de Williams en Button. Los de Grove nun dexen d’afalagar al inglés, anque siempre dexando claro que nun van esperar eternamente a que tomen una decisión. Paez claro que McLaren va quedase con Alonso, pero la identidá del so futuru compañeru en 2017 entá nun ta clara. Jenson paez que va a aprovechar el branu pa facese una idea de que dirección quier tomar la so carrera dientro de les opciones que tien.

Y falando de Williams, cada vegada ta más claro que nun van cuntar con Massa pa 2017, lo que dexaría’l sitiu pa la posible llegada de Button, y hai quien diz que Bottas podría nun quedar tampoco. A Button súmase tamién Kvyat, pa los optimistes que piensen qu’entá va tener sitiu na F1 dempués d’esti añu. Y los futuros rookies, nun podíen faltar nel bombu, Alex Lynn (pilotu de desarrollu de Williams y previamente nel programa de Red Bull que compite agora en GP2 y que ya descarta correr una tercer temporada na serie) y Lance Stroll (na Fórmula 3 y pilotu desarrollu de Williams).

Renault y Force India tán tamién nel puntu mira. Los segundos pol fechu de que munchos piensen que Sergio Pérez va dexar l’equipu pa xunise a Williams anque tenga firmáu contratu con Force India pa 2017. En Renault, porque l’asientu de Palmer nun paez tar aseguráu, mesmo que’l de Magnussen, y tamién falen de Sergio Pérez como posible sustitutu,. La entruga ye…¿si Pérez se mueve, pa quién quedaría’l so sitiu? ¿Quiciás Sáinz como apunten dalgunos otros?

Tamién se fala de Nasr saliendo de Sauber o de que los pilotos de Haas pa 2017 podríen nun ser los mesmos, pero ta claro qu’equí entramos nel xuegu de los equipos de caltener un pocu l’interés d’unos ya otros pensando yá na prósima temporada.

Pa resumir, güeyos puestos no que fagan Pérez y Williams, porque los sos movimientos van ser la clave pa los que van venir dempués.

Si dalgo nos tienen enseñao les temporaes pasaes, ye que la mitá los rumores de la silly season queden namás que nel intentu d’unos cuantos de colgase la medalla del “díxelo yo primero”. N’unes selmanes veremos a quién-y toca quedase col oru.

Actualización 01/09/2016: Felipe Massa anuncia la so retirada de la Fórmula Uno, dexando asina un asientu vacíu en Williams pa 2017.
Actualización 02/09/2016: Jenson Button anuncia la so retirada de la competición en 2017 anque va siguir trabayando como pilotu de desarrollu con McLaren y dexa la puerta abierta a volver en 2018. Stoffel Vandoorne pasa a ser compañeru de Fernando Alonso pa la prósima temporada.
Actualización 14/10/2016: Renault confirma a Nico Hülkenberg como pilotu pa 2017.
Actualización 03/11/2016: Williams confirma a Valtteri Bottas y Lance Stroll como pilotos pa 2017.
Actualización 09/11/2016: Renault confirma a Jolyon Palmer como pilotu pa 2017.
Actualización 11/11/2016: Haas confirma a Kevin Magnussen como pilotu pa 2017.
Actualización 21/11/2016: Sauber confirma a Marcus Ericsson como pilotu pa 2017.