O lo que ye lo mesmo, entama la temporada 2016. Magar el puntu partida oficial ye’l Gran Premiu d’Australia, dientro de menos d’un mes, pa los aficionaos a esti deporte too entama cola primer sesión de entrenos (dalguién mos diría incluso qu’entama cola primer presentación de coche). Ye’l momentu de ponese manes y güeyos a la obra pa ver si toes eses promeses que mos faen los equipos d’ameyorar y volver con más puxu na siguiente temporada, van entamando a cumplise.
Dende equí vamos tar abondo pendientes de los test, con especial atención a lo que da de sí el nuevu equipu na parrilla, Haas; de cuántu puxu amuesa Renault nel so retornu a la F1 como equipu; de lo que ye capaz Manor esti añu colos dos rapacinos qu’agora tien al volante y tamién de si les desventures del McLaren-Honda son cosa del pasáu o siguen bien presentes entá.
De momentu, vos ufrimos la llista y los díes d’actividá en pista, col pilotu al que-y va tocar garrar el coche en cada una de les sesiones:
Author: Asturies F1
L’Entamu
Tamién existimos, ye un fechu. Somos los gargüelos que más berren pero a los que menos se-yos oye, los que namás pisen l’asfaltu cuando s’apaguen los motores, somos los que madruguen cuando nun hai que trabayar, los qu’entamen les sos vacaciones con 20 o 21 sitios ente ceya y ceya. Bono, realmente namás somos unos d’ellos, xente que disfruta y vive’l deporte del motor, qu’esfruta cola F1, munches veces los grandes olvidaos y reducíos a oxetos de consumu. Ello ye que, de xemes en cuando, presta sentase y contar la nuestra parte de la historia.
Que naide piense que va topar equí al enésimu espertu, esto ye un chigre más anque non un cualquiera. Ún nel que se fala de F1 ensin más enfotu que siguir disfrutando del nuestru deporte. Porque, con permisu, vamos reivindicar esti deporte pa los aficionaos, disfrutar de la conducción de los avances técnicos qu’emburrien a la cume del motorsport a ser lo que ye. Y pa ser coherentes, siempre pidiendo más, siempre fuerciando los llímites ¿por qué non?.
Esto nun ye otra cosa, namás eso, otru blog más sobre F1, yet another blog about F1…