Author: Asturies F1

Llegamos ayeri al últimu día de la primer selmana de test con Vettel a la cabeza de tiempos y Hamilton a la cabeza de vueltes, y de vueltes ye de lo que se faló sobre too esta selmana con unos númberos qu’asoleya Mercedes que falen solos tocante a la fiabilidá del W07: nada menos que 675 xiros al Circuitu de Montmeló, ello ye 3.142 kilómetros (casi l’equivalente a dir y venir por carretera d’Uvieu a Llondres). Y nun olvidemos que cada equipu usa nos test un coche namás, ta claro que Mercedes punxo l’apuesta sobre la mesa a la so manera. Pero nun nos podemos olvidar de Ferrari, que paez que van acercándose-yos (anque almitieron que contaben con facer más kilómetros) y, como l’añu pasáu, encabecen les tables de tiempos, anque la sensación ye que nun vimos nada tovia en cuantes a lo que son quien estos coches. Ensin querer mostrase les fleches plateaes colos compuestos blandos y ensin muncha referencia por mor de la carga que pueda tener llevao cada coche en pista ye tovía difícil facese una idea de cuala ye la rellación real ente los dos equipos y hasta qué puntu pudo Ferrari recortar la distancia qu’había a finales del añu pasáu.

Otru equipu que foi quien llograr un kilometraxe ponderatible foi Toro Rosso, que paez dir adautándose bien a la unidá de potencia de Ferrari na evolución del añu postreru. Ye tamién una incógnita tovía cómo los va a llastrar ser l’únicu equipu con un propulsor non evolucionáu, d’ello dependerá en bona midida l’avance que faiga la de Ferrari (y con ella Haas y Sauber, recordamos qu’estos últimos nun pondrán el coche col que competirán esta temporada hasta la selmana que vien). Tampoco se puede dexar de falar de l’actuación de Haas, que nel so primer añu foi quien a rodar muncho más que lo que yeren a facerlo tradicionalmente los equipos novatos y paez que tamién tien coses que dicir. En Manor la meyoría tamién ye clara, agora habrá que ver hasta onde puede escalar esti equipu y cómo se va adautando Haryanto al coche, que como novatu pasó les dificultaes propies na so primer toma de contautu, pero nun va a tener les mesmes concesiones d’equí p’alantre.

Nun hai dulda de que ún de los equipos nos que se posaben más güeyos yera McLaren, qu’empezó con meyor pie los primeros díes de test anque una fuga de refrixerante traxo vieyos recuerdos de testings pasaos ayeri, cuando l’asturianu Fernando Alonso namás pudo rodar per tres vueltes. Sicasí, poles opiniones de los pilotos, paez qu’hai avances na entrega del ERS (ún de los pilancos más sonaos la pasada temporada) lo que puede facer una base más sólida pa dir meyorando. Anque les meyores pueden tapecese más esti añu en tolos equipos pola sensación de que van a tar más apetiguñaos, especialmente na parte trasero del paquete.

Force India sigue queriendo siñalase a ser un competidor direutu de Williams, habrá que ver si mantienen la sienda ascendente de finales l’añu pasáu, los tiempos paecen demostrar que nun se quedaron descolgaos, pero la gran incógnita d’esti equipu sedrá la capacidá económica pa sacar alantre evoluciones a lo llargo la temporada. Red Bull foi otru equipu que fexo unos test discretos, sicasí con resultaos meyores que la casa del so motor (Renault), que notó diferencia cola unidá de potencia Mercedes del añu pasáu amás de sufrir bastantes problemes d’estremáu tipu. Tampoco ye fácil dicir onde se situa Renault col restu falando en términos de potencia.

Asina que queden tovía munches duldes que resolver la selmana que vien y dalgunes que nun acabaremos de conocer a ciencia cierta hasta que nun se pise suelu australianu na primer prueba de la temporada. Mientres tantu, a facer númberos ya intentar albidrar quién va a ser quién esta temporada.

Esta foi la tabla del xueves, cuartu día de test.

La cuenta de vueltes y tiempos total de los primeros test:

Y el total de vueltes por coche:

* Unidaes de potencia o coches de 2015

Llegamos al últimu día de test, dempués de munches vueltes, munchos kilómetros y más d’un dolor de cabeza. Nesta última xornada d’entrenamientos quédanos por ver si en Renault sedrán quien a tener un día tranquilu, si Ferrari va poder retornar a la forma qu’amosó los dos primeros díes con Vettel nel coche, si Force India siguen dando muestres de solidez como ficieron ayeri, y si McLaren-Honda puen siguir dando pasinos alante nel so intentu por amenorgar la distancia que los separa de los equipos punteros.

Vamos comprobar si, efectivamente, Mercedes completa otra xornada ensin mayor problema (anque nun vamos ver a lo menos hasta la prósima tanda de test qué tal rinden colos neumáticos más blandos) lo mesmo que Williams y Sauber, y tamién si Toro Rosso apreten bien les tuerques esta vez (alcordaivos que camudaron el so sistema de fixar los neumáticos al coche, asina que casi nun sorprenden estes coses nestos primeros díes de test). Tolos güeyos van tar tamién fixos no que faga’l debutante Rio Haryanto qu’ayeri foi protagonista de dellos trompos col nuevu Manor.

Estos son los pilotos que van a tar a los mandos nesti últimu día de test:

Mañana vais cuntar con un resume con tolo que pasó nestos cuatro díes de test en Montmeló, les espectatives xeneraes y les duldes qu’entá mos queden por resolver.

Tercer día de pruebes en Barcelona y más kilómetros pa la fardela, siguimos ensin ver intentar sacar el máximu de los coches (como almite’l mesmu Rosberg) y les pruebes con distintos neumáticos de cada equipu faen bastante dificil sacar dalguna conclusión de los númberos que llancen estos díes.  Ye tamién interesante’l fechu de que Mercedes tea repartiendo’l pesu de los díes ente los dos pilotos gracies al altísimu kilometraxe llográu, tal que paez que van per delantre del so propiu programa pa estos díes. Lo que nun puede cayer embaxo ye’l comportamientu de la escudería debutante Haas, no tanto por tiempos al tar na horquiella de tol paquete sinon pol númberu de vueltes y l’enfotu que paez que ta tresmitiendo’l coche a pesar del incidente col alerón delanteru del primer día. L’encargáu de lliderar la tabla de güei ye Hulkenberg que meyora’l tiempu con super-blandos que marcare’l so compañeru, el de Ricciardo colos ultra-blandos y queda a tres décimes d’igualar el tiempu de Vettel tamién col compuestu “ultra”. Paez que Force India quieren amosar que pueden siguir la sienda que tomaben a finales del añu pasáu.

Los problemes esta vez tuvieron nel box de Ferrari, onde Raikkonen nun pudo marcar nengún tiempu na sesión de mañana del so primer día por cuenta de delles revisiones nos sistemes de combustible del coche, y el Toro Rosso de Sainz que tuvo que parar por precaución al deteutar una tuerca mal apretada nuna rueda. Siñalar que según el mesmu Sainz, l’equipu ta usando práuticamente’l coche del añu pasáu con dalgunes modificaciones p’adautalu al motor Ferrari y dalgunes otres pieces nueves d’esti añu.  Renault sigue colos sos problemes diarios, si’l llunes foi’l software y ayeri’l turbo, güei a Magnussen paróse-y el coche nun par d’ocasiones.  Button tuvo qu’acabar la sesión enantes de la cuenta por mor d’un pequeñu incendiu provocáu por un rezumu nel sistema hidráulicu.

Últimu na tabla, Rio Haryanto fexo’l so debut na Fórmula 1 protagonizando dalgunos trompos nos primeros momentos de la sesión.

Los datos de lo que llevamos de test son los siguientes:

Per otru llau, la cuenta de vueltes y tiempos hasta la fecha:

El total de vueltes ye’l siguiente:

* Unidaes de potencia o coches de 2015
(+) STR10 con pieces del STR11

Dempués de dos díes d’entrenamientos tenemos clares delles coses:
– Renault ye quien más problemes amosó nestos dos díes, limitando asina’l númberu de vueltes que Palmer foi quien a dar.
– Toro Rosso camina, sele, pero camina, y anque nun podemos enfotamos no que vemos agora mesmo en pista, la escudería tien motivos pa ser optimista.
– en McLaren-Honda puen respirar daqué tranquilos porque’l coche yá rodó más en total en dos díes que xuntando delles vueltes daes en carrera l’añu pasau. Lo único de lo que nun se llibren, por supuesto, ye de los rumores de movimientu dientro del equipu, dende cabeces importantes hasta los mesmos pilotos. Pero eso son otres hestories.
– Ferrari y Mercedes continúen, y suponemos que güei nun camudarán, trabayando como reloxes, los unos prebando los neumáticos Ultrasoft, igual que fexo Red Bull con Ricciardo, los otros desplegando nueva artillería en forma de suelu de coche con formes caprichoses. Ye lo que tien ser campeón del mundu y probablemente’l meyor coche en pista agora mesmo.
– Manor y Haas siguen, pasín ente pasu, faciendo’l so trabayu de garrar confianza de cara a una temporada na que cuenten zarrar boques. A Rio Haryanto toca-y debutar güei con Manor dempués de dos díes de bon trabayu per parte del campeón de DTM, Pascal Wehrlein.

Equí vos dexamos la lista de nomes que vamos poder ver güei nel circuitu:

MERCEDES AMG F1: Nico Rosberg / Lewis Hamilton
SCUDERIA FERRARI: Kimi Räikkönen
WILLIAMS F1 RACING: Felipe Massa
RED BULL RACING: Daniil Kvyat
FORCE INDIA: Nico Hülkenberg
RENAULT: Kevin Magnussen
SCUDERIA TORO ROSSO: Carlos Sainz Jr.
SAUBER F1 TEAM: Felipe Nasr
McLAREN-HONDA: Jenson Button
MANOR: Rio Haryanto
HAAS: Romain Grosjean

Kimi va ponese manes a la obra col Ferrari, suponemos que n’un intentu de continuar col bon trabayu fechu hasta agora por Vettel, y vamos ver per primera vez nestos test a Massa (con Williams) a Kvyat (col Red Bull) a Hülkenberg (con Force India), a Nasr (con Sauber, alcordaivos que siguen usando’l coche de 2015) y taremos sollertes al debut de Kevin Magnussen a los mandos del Renault.

Segundu día de testing y más vueltes que suben a la cuenta de los equipos, pudimos ver yá a los neumáticos “ultra-soft” n’acción en pista y tolos equipos baxaron güei los tiempos d’ayeri, incluso aquellos que decidieron siguir colos neumáticos medios como Mercedes y Toro Rosso.

Vettel foi una vez el más rápidu y los Mercedes, con Rosberg al volante nesti casu, siguen siendo los que más vueltes sumaron a lo llargo’l día (172, que sumaes a les d’ayeri faen yá 368 vueltes o, lo que ye lo mesmo: 5,58 GP d’España…). Aprovecharon tamién los de Brackley pa probar nuevos elementos aerodinámicos nel suelu del coche. Mención especial pa Manor y Haas que siguen sumando vueltes. Alonso foi quien a sacar partíu del McLaren unos cuantos kilómetros, lo qu’ensin dulda ye una bona noticia siempre a espenses de la entrega que pueda dar esta revisión de la UP d’Honda, que nun acaba de desaniciar les duldes.

Renault sigue na so amarraza particular y, si ayeri yeren dellos problemes de software na unidá de potencia, güei Palmer frayó’l motor (equí podemos ver el momentu) y sigue siendo l’equipu que menos rodó no que llevamos de sesiones.

Vamos colos numberinos, les meyores vueltes y total de xiros daos güei al circuitu son los siguientes:

Per otru llau, la cuenta de vueltes y tiempos ente ayeri y güei ye la que vien darréu:

En total, la suma de vueltes por cada equipos ye la siguiente

* Unidaes de potencia o coches de 2015

Sacar conclusiones nel segundu día de test pue paecenos, y pue ser dafechu, daqué precipitao, pero ayeri pudimos dir texendo una imaxe un pocu clara d’onde ta caún de los equipos. Ye cierto qu’entá queda muncha goma que quemar y munchos kilómetros que rodar, pero nun creyemos que seya arriesgao dicir qu’ayeri nos decatemos de que:

– Mercedes sigue ehí enriba, como si nun tuvieren pasao meses ente esti coche y l’anterior.
– Ferrari dio un pasín alante, anque nun sabemos entá cómo de grande
– McLaren-Honda, magar les 84 vueltes que consiguió dar ayeri Button, entá nun convence nin siquiera a los propios. De fechu, güei supimos que Yasuhisa Arai, xefe d’Honda, va dexar el so puestu al final d’esti mes.
– Manor yá pue declarase coche más guapu de los que tán na parrilla, y que tuvieron una sesión ayeri que-yos permiti ser optimistes.
– Renault entá tien coses de trabayar dempués de los problemes d’ayeri.

El restu d’equipos mantúvose na so llínia de trabayu, con sensaciones positives nel llau del Toro Rosso y de Red Bull. Force India y Williams tuvieron xornaes de trabayu relativamente tranquiles y Haas estrenó la so cuenta de banderes coloraes dempués de perder Grosjean l’alerón delanteru, anque cuenten con tener esi problema solucionáu pa güei.

Estos son los pilotos que van tar rodando en Montmeló nesta xornada de test:

MERCEDES AMG F1: Nico Rosberg
SCUDERIA FERRARI: Sebastian Vettel
WILLIAMS F1 RACING: Valtteri Bottas
RED BULL RACING: Daniel Ricciardo
FORCE INDIA: Sergio Pérez
RENAULT: Jolyon Palmer
SCUDERIA TORO ROSSO: Max Verstappen
SAUBER F1 TEAM: Marcus Ericsson
McLAREN-HONDA: Fernando Alonso
MANOR: Pascual Wehrlein
HAAS: Esteban Gutiérrez

Ensin más, dexámosvos colos test. Alcordaivos de que, pela nuechi, atoparéis equí un resume de tolo que pasó nel Circuit de Catalunya nesti segundu día de test.

Güei pudimos ver yá los coches nel so mediu natural: la pista, cola intención de dir desaniciando les duldes de cara a la temporada.  Quiciás salgan decepcionaos los qu’esperaben una revolución, anque probablemente tovía nun tengamos visto nada en rellación a lo que vamos a ver el restu de la temporada.

Vettel foi el más rápidu del día, meyorando yá’l tiempu que marcó na Q3 del GP d’España, siguiolu Hamilton que foi quien a rodar nada menos que 156 vueltes (polo que paez tienen un oxetivu de rodar ente 600 y 800 km al día). Detrás d’ellos, Ricciardo estrenó el TAG-Heuer en tercer posición siguíu pol Williams de Bottas y el Force India de Celis.

Ente lo que tuvieron un día más complicáu ta McLaren, que tovía nun tenemos claro si empecipia a ver la lluz al final del túnel, anque Boullier nun paez tar mui contentu pesie a que llograron dar bastantes más vueltes que nel estrenu de l’añu pasáu.  Tamién tuvo problemes Toro Rosso, onde la caxa de cambios fizo parar a Sainz pela tarde por precaución y nun lu dexó pasar de les 55 vueltes nun Toro Rosso “qu’estrenaba” PU Ferrari, eso sí, la evolución de 2015. Per detrás d’ellos quedaría Ericsson que pilotaba el Sauber C34 de 2015 a la espera d’estrenar el nuevu coche la selmana que vien. Manor llograba 54 vueltes y desaniciar el so nome de les últimes posiciones a les que tábemos avezaos mientres que Haas, nel so debut na competición, sufrió un fallu nel alerón delanteru que tamien los impidió siguir dando vueltes a Montmeló. Sicasí, nel equipu americanu paecíen enfotaos en que’l problema nun yera grave. Renault, a la cola, intenta recomponer l’equipu mientres intentaben resolver dalgunos pequeños problemes col coche (paez ser que col software) y nun pasaben de ser los más lentos del día.

Hai pistes que nos dan a entender que vamos tener coches más rápidos esti añu, poques sorpreses nos equipos a los que-yos ta costando entamar la temporada (nun dexa de ser curiosa la comparación ente Red Bull y Renault, llevando supuestamente la mesma PU anque la marca del toru la lleve renomada). Quiciabes Sauber, al salir coche del añu pasáu, seya la meyor referencia pa ver onde s’alluga’l restu en comparanza a la temporada pasada. Pero lo dicho, tovía nun salimos de les grandes incógnites que presenta esta temporada, veremos a ver mañana…

Los númberos en cuantes a meyores tiempos y rodaxe güei fueron estos: