Author: Asturies F1

Teníemos abondes esperances en que’l Gran Premiu de Gran Bretaña fuera unu d’esos que queden pa l’alcordanza, cuando se fai memoria de lo vivío en dellos años de la Fórmula Uno. Nun tenemos claro qu’esti vaiga ser el casu, anque pue dicise que d’entamu pintaba bien.

Quedaben namai que venti minutos pa que s’apagaren les lluces ya empecipiare la décima carrera de la temporada, cuando los cielos ingleses s’abrieron pa dexar pasu a un bastiazu que dexo bien moyada la pista y a la xente qu’esperaba que llegare la hora de salir a pista. Muncha xente frotaba les manes pensando no qu’eso significaba: agua en pista suel ser sinónimu de coses interesantes pa ver. Pero tamién suel ser sinónimu de munches duldes sobre si ta bien o no pa correr. Ya eso fexo que la carrera tuviere d’entamar detrás del coche seguridá. Como casi siempres, esto nun prestó a munchos, demientres otros dicíen que yera lóxico. De toles formes, cinco vueltes dempués, víemos por fin a los pilotos pisar l’aceleaor, anque ensin munches floritures: al pocu ratu Hamilton yá tenía una ventaya bultable y diba caltenela hasta’l final.

Lo más entretenío vieno de la mano de les salides del pista y los trompos, gracies al agua qu’entá quedaba, y les lluches ente Rosberg y Verstappen pol segundu puestu del podiu. Per detrás, Vettel sufriendo (tuvo un fin de selmana bastante malu, tornó a tener problemes cola caxa cambios y tuvo penalización pal domingu, y amás, en carrera, foi penalizáu con cinco segundos sobre’l so tiempu por un incidente con Massa), Ricciardo, que nun foi quien a tar a l’altura del so compañeru d’equipu, y Räikkönen, peleau colos Williams y col agua.
En xeneral nun foi una carrera entretenida, si acasu al principiu, y sobre too cuando marchó’l coche seguridá y una bayura pilotos entró a cambiar gomes, faciendo del pit lane un caos nel que los comisarios nun metieron mano. Onde sí la metieron foi na decisión de Mercedes de “chiva-y” a Rosberg la solución a un problema cola caxa cambios que nun lu dexaba meter séptima. Costó-yos diez segundos de penalización que lu fixeron cayer al tercer puestu, en beneficiu de Verstappen, que quedó finalmente segundu.

Tornó abrise’l debate sobre lo útil o non que son les prohibiciones de los mesaxes de radio: ayeri foi obvio qu’a Mercedes-y compensaba más dexar a unu de los sos pilotos terceru diciendo-y lo que tinía de facer pa solucionar el so problema nel coche, enantes de nun dicir nada y quedar fuera de carrera.

¿Ye necesario llegar a esti puntu? Cada vegada hai más xente que piensa qu’estes regles nun valen pa nada, pero tamién qu’hai falta de dar más autonomía a los pilotos nel coche. El problema vien cuando unu d’ellos tien d’enfrentase a milenta combinaciones de botones nel so volante ya interpretar lo que tola teunoloxía desarrollada hasta agora-y pide en cada momentu. Ta claro que naide nun queremos ver a pilotos que son marionetes dirixíes dende’l muru ensin nengún tipu de capacidá de decisión, pero tamién ye verdá qu’estos pilotos conducen máquines cada vuelta más sofisticaes y que non siempre son quién a dar col puntu necesariu pa resolver un problema tando en pista (víemoslo en Baku onde énte’l mesmu problema, Hamilton nun foi quien a resolver lo que-y pasaba al coche demientres Rosberg sí, y nun pudieron recibir ayuda nenguna dende’l muru). De xuru que siguiremos falando muncho d’esti tema, que ta lloñe de quedar solucionáu.

No que cinca’l restu d’equipos, McLaren nun cumplió les espeutatives, quedando fuera de los puntos con dambos coches dempués de tar ente los diez primeros casi tol fin de selmana; Williams tuvo munchísimos problemes demientres tola carrera y quedaron tamién fuera de los puestos d’arriba, y Sauber, dempués d’una calificación onde nun pudieron cuntar con Marcus Ericsson que tuvo un accidente bien feu na tercera práutica, sólo terminó con Nasr. Fálase de que nun tardando van anunciar la compra del equipu por dalguna empresa, pero entá nun se sabe si va ser parte l’equipu o van facese cargu de too. La verdá ye que cada carrera amosen más dificultaes y paez qu’esa compra podría ser una solución pa ellos.

Manor nun tuvo tanta suerte como la selmana pasada n’Austria, y tanto Wehrlein como Haryanto quedaron fuera, dambos por salida de pista. Otros que van necesitando que llegue’l parón de branu son Renault, que quedaron tamién con dambos coches fuera de carrera. Haas nun tuvo demasiada suerte, ellos mesmos reconocíen que la lluvia de xusto enantes de la carrera-yos rompiera totalmente la estratexa: Gutiérrez acabó nel puestu dieciséis y Grosjean nun terminó.
Meyor-yos fue a Toro Rosso, que tornaron a puntuar colos sos dos pilotos, Sáinz otra vuelta perriba Kvyat, que sigui ensin despuntar dempués de pasar de Red Bull a Toro Rosso hai un par de meses.

La próxima parada ye Hungría dientro dos selmanes, penúltimu gran premiu enantes de les vacaciones pa la Fórmula Uno, y una de les carreres que siempre suel dar que falar. Taremos sollertes.

Equí vos dexamos tolos datos de la calificación del sábadu y la carrera d’ayeri:

Clasificación

*Marcus Ericsson nun participó na calificación dempués del so accidente na tercera práutica. Vettel tuvo penalización de cinco posiciones por cambiu na caxa cambios. Empezó nel puestu once’l domingu.

Carrera

*NT: Nun terminó
**Nico Rosberg foi penalizáu con 10s sobre’l so tiempu mesmo que Sebastian Vettel.

Entá tamos recuperando del Gran Premiu d’Austria y de tolos comentarios que salieron d’elli (dempués del choque de Hamilton y Rosberg, Mercedes yá dixo que nun diben tirar d’órdenes d’equipu pa meter en vereda a los sos pilotos, pero que diben a ser más estrictos con ellos) llegamos a Silverstone con delles novedaes, como la renovación de Räikkönen pa otru añu en Ferrari.

Ye esti un fin de selmana que siempre emociona a pilotos y fans, y ayeri quedara claro otra vuelta demientres la rueda de prensa de los pilotos, onde taben los tres británicos que formen parte de la parrilla d’esti añu, Jenson Button, Lewis Hamilton y Jolyon Palmer. Anque en situaciones distintes, con Hamilton n’una situación bastante más agradable que los otros dos, de xuru qu’esti gran premiu va ser especial pa toos ellos.

Güeyu al tiempu, espérase agua pa cásique tol fin de selmana, poro munchos de los equipos van intentar saca-y partíu a eses condiciones (como yá fixeren n’Austria hai dellos díes). Y güeyu especial a lo que pueda facer Manor neses circunstancies. Yá pasaron a Sauber na clasificación d’equipos, dexando n’evidencia que nun son l’equipu más floxu de la parrilla. McLaren van con dos tokens más, tamién esperando ser quien a repitir el resultáu d’Austria.

Amás, vamos tener a Occon nel Renault de Magnussen, y a Leclerc nel de Gutiérrez en Haas, aprovechando la oportunidá p’amosar les sos cualidaes pa la Fórmula Uno pa quien pueda tar interesáu. Alcordaivos qu’Ocon ta compitiendo nel DTM de la mano de Mercedes y Leclerc ta en GP3 con ART GP.

Ye hora de ponese manes a la obra, entama’l Gran Premiu de Gran Bretaña 2016 en Silverstone.

Vais permitimos qu’esta entrada llegue un pocu más tarde de lo normal y que sirva de resume pa lo que foi el Gran Premiu de la selmana pasada en Spielberg enantes de poner los güeyos en Silverstone.

Dempués de que’l tiempu nun diera más que previsión d’agua pa tol fin de selmana, nun pilló a naide por sorpresa que nun parare de llover en tol fin de selmana y que, gracies a eso, viéremos cosines interesantes en calificación y carrera, por exemplu, un McLaren (el de Button) acabando quintu en calificación y llegando a ponese segundu en carrera. Cuntaba cola ventaxa de les penalizaciones de Rosberg y Vettel, pero igualmente foi’l pilotu inglés quien más-y provechu-y sacó al tiempu, como suel ser normal (nun ye raro qu’agora en McLaren nagüen por más lluvia pal finde viniente). Acabó sextu.

Vettel tornó a tener mala suerte, pinchando a mitá de carrera y quedando fuera. Rosberg paecía a piques de facese con otra victoria hasta que, llegando a la última vuelta, en Mercedes volvieron a echar les manes a la cabeza al velos tocase, quedando más perxudicáu Rosberg, que de tar primeru acabó quintu y gracies. Hamilton féxose cola victoria y colos abucheos del públicu. Segundu nel podiu tuvo Verstappen, repitiendo otra bona carrera, aprovechando tolo posible les oportunidaes y les circunstancies de carrera. Nel tercer llugar atopamos a Kimi, que como vien siendo vezu, aprovecha que nun ta’l so compañeru pa ser elli quien suba al podiu. Trabayu d’equipu ensin duldes.

Nun foi la carrera de Toro Rosso, que víen como en pocu tiempu se-yos descolgaben Kvyat primero y llueu Sáinz daqué apaecío a lo que-yos pasó a Force India, que nun pudieron ver a los sos pilotos puntuar. Tampoco nun fue la carrera d’Alonso, que tuvo bien atrás demientres parte de la carrera y terminó abandonando.

Ensin embargu, quién entá tará cellebrando ye Manor, col puntu consiguíu pol pupilu de Mercedes, Pascal Wehrlein, ensin que naide cuntara con ello. Ensin duldes, unu de los meyores del gran premiu. Haas consiguió puntos gracies a Grosjean que foi quien a metese nel puestu séptimu. Williams sólo sacaron un par de puntinos pola novena posición de Bottas. Massa tuvo de retirase.

El restu equipos siguieron na so llínia, Renault ensin dar muncho que falar y Sauber despertando dacuando.

Dempués de la novedá de Bakú, aterrizamos n’un vieyu conocíu pa pilotos y fans: el Red Bull Ring. Tamos nel Gran Premiu d’Austria.

De les llargues rectes d’Azerbaixán pasamos a lo verde de Spielberg, n’un entorno que casi paez sacáu de cuentu. L’añu pasáu Rosberg féxose cola victoria y paez que tien munches papeletes pa repitir nesti, anque de xuru Hamilton tará pensando en facer qu’eso nun pase.

McLaren lleguen con optimismu, paez-yos qu’Austria pue ser un bon llugar pa ellos pa sumar puntos dempués de la sequía de los últimos GPs. Tenemos muncho enfotu no que pueda facer Red Bull en casa y tamién si Ferrari sedrá quién por fin a abrir la llata les victories. Williams ficiéralo bien l’añu pasáu con Massa nel podiu y suponemos que vengan con ganes de facelo igual de bien si non meyor, col permisu los Mercedes. Güeyu tamién a Force India, que lleguen con ganes de siguir faciendo podios tamién, y a los Toro Rosso.

Pela parte d’atrás, Sauber necesita facer una bona carrera pa consiguir llevantar la moral d’un equipu castigau polos problemes económicos, mesmo que Renault, que namás consiguieron puntuar una vegada no que va de temporada y anden faltos d’esos puntos que se-yos resisten. Tamos seguros de que Manor siguirá dando guerra per detrás, ya aprovechando los problemes de los d’enriba pa facese güecu en puestos más altos.

Tai sollertes, entama un nuevu fin de selmana de Fórmula Uno.

Ta visto que nun se puede avezar ún a lo bueno. Nin tampoco se puen crear expectatives enantes d’una carrera porque entos ye probable que pase lo que pasó esti fin de selmana en Bakú: casi nada. Vimos milenta adelantamientos, eso sí, y velocidaes que metíen mieu pola cabeza. Pero aparte d’eso, tolo que se falara (basándose no visto nes carreres de GP2 y GP3) quedó en nada, y tuvimos delantre la que quiciás podamos nomar, de momentu, la carrera más aburrida de lo que llevamos de temporada. Sicasí viemos una sesión de clasificación interesante y con munchos sustos por mor de les banderes amarielles qu’apaecíen de contino faciendo albuertar vueltes rápides y dexando munches veces la suerte a una sola vuelta.

De toles formes, vamos ser xenerosos ya resaltar delles cosines que si fueron interesantes na carrera:

– per un llau, la incertidume la estratexa, naide nun tinía claro si yera meyor parar una o dos vegaes. Hai delles coses que les simulaciones nun son quién a resolver ya’l nun tener referencies d’años pasaos dexábalo too abierto, too ello nun asfaltu como quien diz “fechu pal eventu” nel qu’habia que ver cómo respondíen les gomes.

– per otru, la calor y los cambios de temperatura ente les práutiques y lo que foi la carrera en sí, xunto a lo “verde” que taba l’asfaltu del circuitu.

– les debilidaes de Mercedes: son les rentes de les que viven los que ven con malos güeyos que les fleches platiaes ganen dafechu. Ver qu’ellos tamién tienen problemes, como los que tuvieron tanto Rosberg como Hamilton en carrera, fáenlos más humanos, anque llueu terminen ganando’l gran premiu, como ye’l casu de Bakú.

– Force India, y más concretamente, Checo Pérez. Otru carrerón, manteniendo a raya al Ferrari de Kimi ya dándose’l gustu de pasalu en pista pa facese col tercer caxón del podiu.

– los Manor lluchando en pista por posición, y non por facese a un llau poles banderes azules.

Ensin embargu, hebo daqué de lo que se faló enforma, que tornó a poner nel centru del debate la prohibición de los mesaxes de radio. Na carrera oyíemos a Hamilton desesperáu porque nun sabía que-y pasaba al so coche, nun tenía nin idea de cuála yera la combinación de botones que tinía de seleicionar pa ponelu a funcionar bien otra vuelta…y los sos inxenieron nun podíen facer nada por elli, si nun queríen sanción. Lo mesmo pasaba-y a Räikkönen un pocu dempués.

Ye verdá que la inxeniería ye imparable y la so evolución fai que los pilotos tengan cada vez d’atender coses que nun son necesariamente conducir, apurar frenaes ya garrar curves, ya en principiu la prohibición viose bien pol mor de dexar independencia al pilotu. Colo que nun se cuntaba yera con llegar al absurdo de tener al pilotu en pista ensin entender qué tien de facer col so coche, una tarea que paez que nun ye tan cenciella como memorizar una secuencia botones si non milenta posibilidaes.

El circuitu prestó en xeneral a los fans y a los pilotos, pero non asina la carrera. Rosberg ye agora un pocu más llíder perriba Hamilton, y Ferrari sigue a la gueta la victoria, la primera d’esta temporada.

Clasificación

Carrera

La última vez que tuviéremos un gran premiu d’Europa foi en Valencia, en 2012 onde ganara Alonso con Ferrari. Güei, o más bien esti fin de selmana, toca preparase pa una nueva carrera con un escenariu al que nun tamos avezaos: Bakú, capital d’Azerbaixán.

Dende bien ceo vienen diciendo que ye un circuitu que tien mui bona pinta pol fechu de que’l so trazáu crucia les cais perestreches del centru hestóricu la ciudá. De fechu ye dalgo que paez prestar a los pilotos sobremanera. Ta claro que si quier facese un güecu merecíu nel calendariu, Bakú tien d’ufrir dalgo que nun se vea n’otros llaos. Valencia intentáralo, anque duldamos que la xente eche de menos ver los coches correr pel so trazáu. A Bakú toca-y agora la papeleta de convirtise en cita importante nel calendariu.

Ye bien poco lo que podemos comentar con respeutu a lo que podemos esperar de los pilotos ensin tenelos visto en pista. Tamién ye verdá que más o menos creyemos que nun se vea nada ablucante anque nun dexa de crecer esa sensación de novedá al nun saber qué mos pue trayer un circuitu que ta enllenu incógnites. Lo bueno ye que nun somos los fans los únicos que tamos asina y esa mesma incertidume acompaña a los equipos, lo que fai aumentar les papeletes pa ver daqué curioso’l domingu.

Esta foi la elección de neumáticos de los pilotos:

Y equí tenemos los datos del circuitu.

Ta comprobao qu’esti añu perdese’l principiu los grandes premios de Fórmula 1 ye sinónimu de nun ver daqué interesante que tea pasando. Ayeri tuvimos otru exemplu. Paecíanos que la carrera podía ser un paseín de Hamilton viendo lo visto’l sábadu, pero Vettel féxose cargu namás apagase les lluces de ponelo en dulda.

Dende toles cámares suxetives que nos ufrieron les distintes imaxes de lo que víen los pilotos. Los Mercedes tornaron a dexar la puerta abierta pa qu’un Vettel inspiráu pisare l’aceleraor ya en cosa d’unos metros yá tuviera primeru. Un pocu dempués, víemos como Hamilton zarraba-y al so compañeru la puerta pa un adelantamientu, echándolu fuera y faciendo que Rosberg acabare nesi movimientu en novenu llugar.

El restu pilotos aprovecharon la oportunidá pa dir subiendo posiciones, ente ellos los Red Bull y unu de los Williams, el que quedaría al final nel podio nes manes de Bottas. Ferrari tornó a complicase la vida cola estratexa, calculando de más la duración d’un coche de seguridá virtual activau por cuenta’l coche Button, que quedó ensin motor na décima vuelta. Ferrari fexo entrar a Vettel nesi momentu, y pa la so desgracia el coche de seguridá virtual nun duró lo suficiente, faciendo que Vettel perdiera tola so ventaya col Mercedes de Hamilton.

Dende eso, l’alemán intentó ponese a l’altura del británicu pero nun vio forma, y acabó quedando segundu, col finlandés Bottas terceru. Rosberg terminó peleándose con Verstappen pol cuartu llugar, pero ensin éxitu, saliéndose yá na última vuelta y quedando quintu.

Acompañándolos nel top ten, el Ferrari de Kimi y el Red Bull de Ricciardo, que nun tuvo tampoco suerte nel pit stop. Amás, los dos Force India consiguieron puntuar, y Carlos Sáinz Jr. féxose col octavu llugar dempués de salir de bien atrás por cuenta un accidente’l sábadu que lu torgó al tener que camudar la caxa cambios el domingu, cola so penalización de cinco posiciones en parrilla.

McLaren nun puntuó, anque Alonso tuvo bien cerca de consiguir la décima posición, quedando undécimu xunto a los Sauber, los Haas y los Manor y Magnussen. A Button xuntáronse Palmer y Massa. Hai que resaltar que nengún de los retiraos foi por cuenta un accidente, si non por fallu mecánicu o llétricu.

Agora tán tolos güeyos puestos en Bakú, capital de L’Azerbaixán, qu’en cosa tres díes va ver como s’enllenen les sos cais de xente y coches. Tai sollertes, ye’l nuevu Gran Premiu d’Europa.

Carrera

Somos munchos los que nos entrugamos, cuando llega’l gran premiu de Canadá, qué pinta esti circuitu pente les carreres europees. Camentamos qu’igual yera más conveniente, pensando nos desplazamientos continentales, dexala pal final. El casu ye que, dempués de Mónaco, tocar cruciar l’Atlánticu p’averase al circuitu Gilles Villeneuve, en Montreal, unu de los favoritos de fans ya pilotos.

Nun ye raro que tengamos bones carreres ellí, polo que cruciamos los deos pa qu’esta seya, polo menos, la mitá d’entretenida que les anteriores nesta temporada. Aterrizamos dempués de la victoria de Hamilton en Mónaco, aprovechando toles circunstancies, y cola mirada puesta en Ricciardo y la so capacidá de recuperase de dos carreres que lu pillaron col pie cambiau. Tamién, taremos pendientes, otra vuelta, de lo que faiga Rosberg pa dexar atrás la séptima posición del pasáu gran premiu.

Per detrás d’ellos, unos Ferrari cada vegada más cuestionaos poles sos probes actuaciones (esperábase muncho más de lo que tán ufriendo) mesmo que Williams, n’una situación asemeyada. El restu equipos siguirán coles sos lluches particulares, puxando por metese nos puntos y mirando pal cielu polo que les ñubes puean trayer. Y ye qu’en Canadá cuando llueve, llueve con ganes, si non, que-y entruguen a Button por Canadá 2011…

Esta ye la esbilla de gomes que fexo cada pilotu pa esti GP:

Y los datos del circuitu