Author: Asturies F1

Gran Premiu de Xapón 2016 – Análisis por equipos

Cuando los equipos yá dexaron atrás Suzuka y tienen tola mente puesta no que va ser el siguiente gran premiu del calendariu, el de los Estaos Xuníos, llegamos nós pa facer un análisis de lo que fizo cada equipu’l domingu en Xapón enantes de pasar páxina y empezar la xira americana:

– Mercedes: Rosberg lleva delles selmanes ensin dexar de dar golpes na mesa, amosando que ta nel meyor estáu de forma posible, tanto a nivel físicu como sicolóxicu. Ye esti últimu aspeutu’l más necesariu pa elli, el que creyemos que-y faltaba pa siquiera poder face-y un pocu sombra a Hamilton, que por contra, ta amosando, como yá fizo tantes otres veces nel pasáu, que cuando nun ta centráu ye’l so peor enemigu. Entá puen pasar munches coses nes carreres que nos queden, pero ta claro que si Hamilton quier amenorgar esi marxe que tien con Rosberg (l’alemán tien una ventaxa de 33 puntos) va tener que facer dalgo más qu’usar snapchat nes conferencies de prensa. La escudería alemana yá ye campeona del mundial de constructores por tercer añu consecutivu. Ensin duldes, más que merecío.

– Red Bull: si entá nos quedaben duldes de que yá-y teníen tomada la midía a Ferrari, nesta carrera yá desapaecieron. N’un circuitu nel que, teóricamente, la escudería italiana diba ser superior, vimos como Verstappen se colaba nel podiu ensin problema nengún y incluso se defendió de Hamilton nes vueltes finales. Ricciardo sufrió más en pista, y nun pudo ser más que sextu.

– Ferrari: Ta claro que tanto Vettel como Räikkonen partíen con penalización (Vettel tres posiciones pol incidente de Malasia con Rosberg y Räikkönen por cambiar la caxa cambios un pocu enantes de la carrera) pero nin siquiera los víemos plantar cara y anque intentaron ganar la partida a Mercedes en pista con una estratexa que nun prestó a munchos, terminaron fuera del podiu, siendo cuartu Vettel y quintu Räikkönen. Anque nun ye un mal resultáu, viendo les espectatives que teníen puestes nesta carrera, sí pue considerase dalgo deceicionante.

– Force India: Siguen ensin baxar la guardia, metiéndose con dambos pilotos nos puntos, y terminando carreres dexando amás bona imaxe. Yá tienen un marxe con respeuto a Williams de diez puntos, que nun son muncho si cuntamos qu’entá queden cuatro carreres, pero nun tien pinta de que vaigan dexar escapar munchos de los puntos que tengan a tiru. Hülkenberg amás de puntuar siendo octavu, dexónos un adelantamientu perguapu a Bottas y un “See you later” que prestó abondo a los fans. Nun podemos dexar de ver nesi adelantamientu un reflexu de lo que ta pasando nel mundial ente dambes escuderíes. Pérez consiguió acabar séptimu.

– Williams: Consiguieron sumar puntos con dambos coches, pero per detrás del so máximu competidor, Force India. Tres puntinos que saben a bien poco n’una de les lluches más interesantes que tenemos nel mundial de constructores. Felipe Massa terminó la carrera en novenu llugar, siendo Bottas décimu. Anqué entá queda tiempu pa que puedan pasar a Force India, la verdá ye que nun paez que-yos vaiga a ser fácil, y de fechu paeznos que si Force India nun se derrumben a última hora, los diez puntinos de diferencia puen ser colchón abondo d’equí al final de la temporada.

– Haas: Ficieron una sesión de calificación perbona, metiendo a dambos coches ente los diez primeros per primera vez nesta temporada. Ensin embargu, la deceición vieno en carrera, onde quedaron fuera de los puntos, con Grosjean nel undécimu puestu y Gutiérrez, que calificara décimu, nel veinte. Ensin duldes, un gran premiu que van querer más olvidar pronto. Amás, nel siguiente gran premiu cuerren en casa, razón de más pa quitar del mediu les males sensaciones en Xapón y centrase n’esfrutar el so primer gran premiu en casa.

– Renault: Ensin puntos esta vez, pero con un Palmer inspiráu, que volvió a tar per delantre de Magnussen. Ye como si, a estes altures del campeonatu, tuviere corriendo por conservar el so asientu, unu de los más cobiciaos agora mesmo na parrilla. Hai munchos candidatos, los dos pilotos actuales ente ellos, pero paez que Palmer púnxo les piles pa dar motivos a la escudería francesa pa escoyelu a elli. Dientro d’unes selmanes veremos si pagó la pena. El pilotu inglés terminó décimosegundu, mientres Magnussen foi décimocuartu.

– Toro Rosso: Carlos Sáinz resumía perfeutamente lo que foi la carrera pa elli, y paeznos que pa dambos pilotos: un desastre. En nengún momentu paecieron tar cómodos y de fechu nun hai más qu’echar un güeyu a la clasificación pa velos bien lloñe de los puestos que solíen ocupar hai unos cuantos meses. El baxón de forma de la escudería ye bultable, y el so únicu consuelu nesti gran premiu ye que los sos rivales nel mundial de constructores, McLaren, tampoco nun fueron quién a puntuar.

– Sauber: los equipos de los puestos baxos de la tabla suelen tener de conformase colo poco bueno que-yos toca, siempre xulgando como bueno dalgun aspeutu positivu que nun tan avezaos a esfrutar. Nesti casu, y anque quiciás sepa a poco, ye qu’Ericsson quedó per delantre de dambos McLaren, en décimoquintu llugar, ensin qu’estos pudieran pasalu en pista. Insistimos que nun ye motivu d’allegría, pero’l fechu de terminar la carrera yá ye un plus pa la escudería suiza, que de xuru ta deseyando que llegue’l 2017 d’una vez. Nasr terminó la carrera nel puestu décimonovenu.

– McLaren: La gran deceición del gran premiu vieno de la mano de la escudería inglesa y sobre manera del motor xaponés otra vuelta. Sabíemos que nun diben dir especialmente bien en Suzuka, y que Jenson Button diba penalizáu por cambiar la so unidá de potencia (anque eso significaba salir namás que cinco puestos per detrás de lo que yá calificara’l sábadu) pero tol mundo esperaba un poquiñín más, sobre too cuando falamos de correr na tierra d’Honda. Nin el coche nin les gomes respondieron y por ello Fernando Alonso foi decimusextu y Jenson Button decimuoctavu.

– Manor: Siguen acabando carreres y anque nun foi esti’l so gran premiu más brillante, nin tán contentos col resultáu, paeznos que sigue siendo dalgo a destacar. Nun podemos olvidar que sigue valiendo’l puntu consiguíu por Wehrlein n’Austria, que los coloca perriba Sauber nel mundial de constructores. Nun puen dexar de siguir trabayando hasta la última vuelta en Yas Marina dientro de mes y mediu.

Gran Premiu de Xapón 2016 – Carrera

Terminamos la xira de madrugones col gran premiu de Xapón y con una nuevu exemplu del bon momentu de forma nel qu’atopamos a Nico Rosberg con una nueva victoria na so cuenta personal y treinta y trés puntos perriba’l so compañeru d’equipu, Lewis Hamilton, que sigui segundu.

Empezaba’l gran premiu en Suzuka con una salida menos vistosa que les de carreres anteriores, pero con un nuevu error de Lewis Hamilton que lu dexaba, enantes de la primer curva, nel octavu llugar. El so compañeru foi quien a defendese de los ataques iniciales de los pilotos que diben per detrás, y yá nun s’apeó d’ehí hasta ver la bandera a cuadros. De fechu, salvo n’una sesión de calificación, Nico Rosberg nun dexó’l primer puestu en tol fin de selmana.

Dempués d’una salida más bien tranquila, quedónos claro qu’a Hamilton diba toca-y bregar pa ponese a la caza’l so compañeru, pero que nun diba ser cenciello pues tenía per delantre a xente como los Ferrari, Red Bull y Sergio Pérez.

Víemos paraes bien ceo, como nel casu de los Red Bull na vuelta diez, buscando gana-y la partida cola estratexa a Ferrari, dalgo que finalmente conseguiríen con Verstappen. La mayor parte de los equipos optaron por dos paraes, cola esceición de Renault, Sauber y Williams, y pol neumáticu duru como opción más favoratible en pista. De fechu, fueron los que más apostaron polos neumáticos blandos los que más sufrieron ensin sacar muncha rente d’ellos en carrera.

Dempués de les primeres paraes, Hamilton espabiló, y llegó adelantar cuatro pilotos n’una vuelta y paecía que podía ponese en plan pa recuperar el tarrén que yá-y tenía ganáu de sobra Rosberg. Pero atopó con un Max Verstappen inspiráu que tenía otra idea na cabeza. Dambos sedríen protagonistes en carrera gracies a la batalla de les últimes vueltes por facese pola segunda posición del podiu.

Vettel tuvo bien de tiempu per delantre de Hamilton, pero una vez más, con una estratexa que munchos cuestionaron, fexo’l so pit-stop saliendo per detrás del pilotu inglés, anque con gomes blandes, suxiriendo que quiciás buscaben adelantar en pista. Ensin embargu, l’alemán nun foi quien a ello, teniendo de conformase col cuartu puestu dempués d’empezar séptimu poles tres posiciones de penalización qu’arrastraba dende Malasia.

Les vueltes centrales de carrera fueron tranquiles, anque víemos bien d’aición en pista, munchos adelantamientos pa lo que nos tien avezaos Suzuka. Na última parte de carrera too paecía indicar que la carrera diba quedar coles posiciones que teníemos, pero los doblaos xugaron un papel perimportante en dellos momentos, y les quexes de los pilotos d’arriba fueron numberoses (especialmente les de Vettel).

Na última vuelta, Verstappen consiguió eliminar l’amenaza de Hamilton axustando al másimu la frenada y faciendo que’l pilotu inglés se saltare la chicane y fuera llargu, dando el segundu puestu del podiu al holandés.

Como anéudota de la carrera, el mesaxe que Nico Hülkenberg dexaba a Bottas n’unu de los adelantamientos más guapos que vimos güei: dempués de varios intentos de pasar al finlandés, el pilotu de Force India atopaba’l so momentu y poníase per delantre, dempués de lo que dicía “See you later!” (“¡Vémonos llueu!”). Avezaos como tamos a que los pilotos namás usen la radio pa falar col equipu o quexase de lo que pasa en pista, coses como estes nun dexen d’arrancanos una sorrisina.

Amás, Mercedes yá son campeones 2016 de constructores, con 593 puntos, amosando una vegada más la so superioridá. 2017 va suponer un cambiu pa tolos equipos, de xuru pa ellos tamién, pero de momentu puen esfrutar del so tercer campeonatu consecutivu.

La siguiente parada llévanos al otru llau del globu, a Austin, pal gran premiu d’Estaos Xuníos. Acabáronse los madrugones, empiecen les carreres p’acompañar la tarde. Pero enantes de centranos nos viaxes al continente americanu, equí vos dexamos tolos númberos que nos dieron esti sábadu y domingu:

Clasificación

Pos Pilotu Q1 Q2 Q3
1 Nico Rosberg 1:31.858 1:30.714 1:30.647
2 Lewis Hamilton 1:32.218 1:31.129 1:30.660
3 Kimi Räikkönen 1:31.674 1:31.406 1:30.949
4 Sebastian Vettel 1:31.659 1:31.227 1:31.028
5 Max Verstappen 1:32.487 1:31.489 1:31.178
6 Daniel Ricciardo 1:32.538 1:31.719 1:31.240
7 Sergio Perez 1:32.682 1:32.237 1:31.961
8 Romain Grosjean 1:32.458 1:32.176 1:31.961
9 Nico Hulkenberg 1:32.448 1:32.200 1:32.142
10 Esteban Gutierrez 1:32.620 1:32.155 1:32.547
11 Valtteri Bottas 1:32.383 1:32.315
12 Felipe Massa 1:32.562 1:32.380
13 Daniil Kvyat 1:32.645 1:32.623
14 Carlos Sainz 1:32.789 1:32.685
15 Fernando Alonso 1:32.819 1:32.689
16 Jolyon Palmer 1:32.796 1:32.807
17 Jenson Button 1:32.851
18 Kevin Magnussen 1:33.023
19 Marcus Ericsson 1:33.222
20 Felipe Nasr 1:33.332
21 Esteban Ocon 1:33.353
22 Pascal Wehrlein 1:33.561

Hebo les siguientes penalizalizaciones en parrilla:

  • Vettel: 3 puestos qu’arrastraba por una maniobra na primer curva nel GP anterior
  • Raikonnen: 5 posiciones por carmbiu de caxa de cambios
  • Button: 35 por cambiu de PU

Carrera

Pos Pilotu Tiempu Vuelta
1 Nico Rosberg 1:26:43.333 53
2 Max Verstappen +4.978 53
3 Lewis Hamilton +5.776 53
4 Sebastian Vettel +20.269 53
5 Kimi Räikkönen +28.370 53
6 Daniel Ricciardo +33.941 53
7 Sergio Perez +57.495 53
8 Nico Hulkenberg +59.177 53
9 Felipe Massa +97.763 53
10 Valtteri Bottas +98.323 53
11 Romain Grosjean +99.254 53
12 Jolyon Palmer +1 vuelta 52
13 Daniil Kvyat +1 vuelta 52
14 Kevin Magnussen +1 vuelta 52
15 Marcus Ericsson +1 vuelta 52
16 Fernando Alonso +1 vuelta 52
17 Carlos Sainz +1 vuelta 52
18 Jenson Button +1 vuelta 52
19 Felipe Nasr +1 vuelta 52
20 Esteban Gutierrez +1 vuelta 52
21 Esteban Ocon +1 vuelta 52
22 Pascal Wehrlein +1 vuelta 52

Gran Premiu de Xapón 2016 – Previa

Entá col tastu de Malasia na boca, aterrizamos en Xapón, n’una de les carreres más emblemátiques del calendariu y de les más apreciaes por pilotos, equipos y fans. Son munchos los qu’esperen con ganes la llegada d’esti gran premiu, que suel dexar perbones sensaciones d’un añu pa otru.

Anque’l puntu mira ta puestu enriba los dos pilotos lluchando pol campeonatu, ensin duldes quien más protagonismu va tener como equipu nesti gran premiu va ser McLaren. La escudería inglesa cuerre na que consideren la so segunda casa (gracies a la rellación con Honda) ya’l pilotu Jenson Button, igual que Fernando Alonso, tienen una rellación mui estrecha col país. De fechu, Alonso decidió sumar penalizaciones en Malasia pa poder salir ensin torgues a esti gran premiu, tala ye la importancia de la imaxe que dean en pista.

Detrás de Mercedes, Red Bull y Ferrari siguen na so batalla pol segundu puestu del mundial de constructores, mesmo que Force India y Williams pol cuartu. Anque paez que, visto lo visto hasta agora, va ser Red Bull quien triunfe, nel casu del cuartu puestu, nun ta claro entá y les prósimes cinco carreres van ser cruciales pa dambes escuderíes. Force India paez asentada nos puntos con dambos pilotos, lo más importante, demientres que Williams nun consigui algamar esa regularidá vital pa sumar puntos, como víemos el domingu pasáu en Sepang.

Per detrás de dambos, anque bien lloñe, ta McLaren, que como yá diximos llega a Suzuka cola necesidá de facelo bien delantre de tol mundo que va tar sollerte a los sos movimientos. En Fórmula Uno nun se pue fallar si quies tar arriba, y si cuerres nel gran premiu de to casa, paez que menos entá.

Toro Rosso paez tener dexao la so llucha por superar a McLaren, pero nun podemos confianos yá que colos dos pilotos que tienen nes sos files, too ye posible, asina que tendremos de tar pendientes de lo que fagan tamién en Xapón.

Echando un güeyu a la parte baxo la tabla, Haas paez tar cómodu col octavu puestu na clasificación y ensin vese amenazáu por Renault, a venti puntos nel novenu. La batalla pol décimiu sigui ente Sauber y Manor, separtaos namás que por un puntu, un puntu que val un cientu pa equipos como ellos.

Toca madrugar otra vuelta, un poquín más entá que pa Malasia. Estos van ser los horarios:

Vienres, 07/10/2016
Llibres 1: 3:00 AM
Llibres 2: 7:00 AM

Sábadu, 08/10/2016
Llibres 3: 5:00 AM
Calificación: 8:00 AM

Domingu 09/10/2016
Carrera: 7:00 AM

Equí tenéis los datos del circuitu y estos son los neumáticos qu’escoyó cada pilotu pa esti eventu:

japan-neumaticos-2016

Gran Premiu de Malasia 2016 – Análisis por equipos

Nun queda muncho pa ponenos a mirar yá pa Xapón, pero enantes de zarrar el capítulu de Malasia vamos repasar lo que fexo cada equipu’l domingu pasáu nel circuitu de Sepang:

– Red Bull: ensin duldes, los mayores beneficiaos de la rotura de motor de Hamilton. Tuvieron acariciando en dellos momentos el primer puestu en carrera, pero paecía que les sos propies pelees en pista (Verstappen llegó a pidir al equipu que “actuara” pa dexalu adelantar al so compañeru yá que yera más rápidu) diben da-y la victoria al pilotu de Mercedes. Ensin embargu, unes vueltes dempués diben vese premiaos con esa primer posición y con un coche de seguridá virtual que daba a Ricciardo la prioridá d’entrar en boxes, facilitando asina que llueu sólo tuviera de puxar pa facese cola so primer victoria del añu, la primera dende 2014. Verstappen terminó segundu.

– Mercedes: lluz y solombra na escudería alemana. Nun creyemos que quede entá naide nel mundu formuleru que nun sintiera les pallabres de Hamilton sobre lo que pasó na carrera. Los comentarios del inglés nun dexaron a naide indiferente, unos considérenlos una falta respetu al equipu, otros namás una forma de falar y un episodiu más nel xuegu de desestabilización que xueguen los pilotos de Mercedes dende hai bien de tiempu. El casu ye qu’agora mesmo Rosberg y Hamilton tán separtaos nel campeonatu por veintitrés puntos, casi como lo que val una victoria d’un gran premiu. De xuru qu’en Xapón va siguir falándose de Malasia pero nosotros vamos dexalo en que la mala suerte tornó a cebase con Hamilton dexándolu fuera de carrera por rotura d’un motor nuevu, demientres el so compañeru remontaba dende l’últimu puestu por un incidente nel que se vio envueltu na primer vuelta. L’alemán foi capaz de subir al podiu quedando terceru, anque nes últimes vueltes tuvo d’agrandar el marxe que lu separaba de Räikkönen por una penalización de diez segundos por un incidente n’un adelantamientu en pista al finlandés.

– Ferrari: siempre pasa que cada temporada la mala suerte paez cebase con un pilotu. Dalgunos dirán qu’esti añu toca-y a Hamilton, pero a nós paeznos qu’esto ta afeutando-y más a Vettel. L’incidente de la primer curva de carrera dexolu fuera cola suspensión rota, y cola deceición d’otru gran premiu ensin puntuar. El so movimientu en pista foi bastante fuerciáu, y anque sabemos que nun diba cola intención de provocar lo que pasó, sí que ye verdá que foi un error al que nun nos tien avezaos. En Xapón va partir con tres posiciones de penalización. Pel so llau, Kimi Räikkönen acabó cuartu, ensin muncha complicación anque ensin llegar a ser nunca una amenaza pa los tres primeros.

– Williams: el gran premiu de Felipe Massa empezaba yá torcíu na vuelta de calentamientu. Quedábase paráu y tuvo de salir dende’l pitlane. Dende ehí yá nun pudo facer muncho más y terminó décimoterceru. El so compañeru Valtteri Bottas quedó quintu, per delantre los dos Force India a los que yá tienen a tiru de tres puntos nel campeonatu de constructores.

– Force India: con dambos coches dientro de los puntos, Sergio Pérez en sextu puestu y Nico Hülkenberg n’octavu, consiguen mantenese cuartos nel mundial de constructores anque saben que nun puen despistase con Williams a tres puntos. De toles formes, nesta época de la temporada Force India solía amosar una baxada de forma qu’esti añu nun tamos viendo, polo que tienen bien de coses de les qu’allegrase na escudería.

– McLaren: los británicos repiten con dambos pilotos dientro los puntos y una perbona actuación d’Alonso saliendo últimu p’acabar séptimu. Jenson Button viose perxudicáu pol últimu coche de seguridá (pola rotura de Hamilton) que salió al pocu d’entrar a cambiar gomes y benefició a dellos pilotos que veníen per detrás. De toles formes, consiguió acabar novenu y McLaren allóñase cada vegada más de Toro Rosso y consolidando la sexta posición nel mundial de constructores. La siguiente carrera ye en casa asina qu’espérase d’ellos que, como mínimo, repitan lo que se vio’l domingu en Malasia y dambos coches puntúen.

– Renault: col sustu del vienres nel coche de Magnussen (un escape de combustible fexo que’l coche ardiera cuando’l pilotu danés dexaba’l garaxe) paecíanos que tábemos ente un gran premiu complicáu pa la escudería francesa. Y anque foi asina pel llau de Magnussen, que tuvo de retirase por un choque con Kvyat que dañó la parte trasera del so coche, nel llau de Jolyon Palmer taben de cellebración yá que consiguió colase nel puestu diez, sumando asina’l so primer puntu esta temporada, y unu más pa Renault. Nun tenemos claro qu’esti gran premiu faga pol restu la temporada, pero paeznos que yá yera hora que’l pilotu inglés tuviera la so oportunidá de sumar puntos.

– Toro Rosso: nun tuvieron muncha suerte na carrera, Sáinz con problemes dende la salida al apagase-y el coche, y Kvyat col choque con Magnussen, qu’anque nun lu fexo abandonar la carrera, sí condicionó la so posición. Sáinz foi undécimu y Kvyat décimocuartu. Cada vez-yos queda más lloñe la sexta posición del campeonatu de constructores.

– Sauber: cuando dicimos que siempre hai un pilotu en cada temporada col que la mala suerte se ceba, podemos facelo xeneral a un equipu nel casu de Sauber. Anque un puestu doce en carrera pue nun ser gran cosa, ye bastante llogru pa la escudería suiza, qu’esti añu nun ta pasando por una bona situación, yá dende bien pronto na temporada. De toles formes, con Nasr fuera de carrera por problemes (supuestamente col motor, anque dicho cola boca pequeña) entá-yos queda muncho que trabayar, ya’l suañu de puntuar esta temporada cada vez paez más complicáu.

– Manor: bona carrera de dambos pilotos, a los víemos incluso batallar en pista y que nun dexan de cumplir colos oxetivos de terminar carreres (y aprovechar los puntos que caigan). Wehrlein acabó perriba’l so compañeru en décimoquintu llugar, con Ocon décimosextu. El pilotu francés recibió dos penalizaciones por pasase de velocidá nel pitlane.

– Haas: xunto con Hamilton, los grandes perdedores del gran premiu. Grosjean tuvo otra vez problemes colos frenos, como los que nun lu dexaron participar nel gran premiu de Singapur hai dos selmanes, anque esta vez lu dexaben na gravilla. Esteban Gutiérrez pel so llau quedaba fuera por una rueda mal axustada que se soltó demientres el pilotu taba en pista y pola que Haas yá recibió multa. Nes entrevistes Grosjean, casi autoconvenciéndose, insistía en que tolo que la escudería americana tenía conseguío hasta agora taba siendo un regalu porque, siendo’l so primer añu nun pensaben siquiera en puntuar y agora mesmo tienen bien agarrada la octava posición nel mundial. A siguir trabayando.

Gran Premiu de Malasia 2016 – Carrera

Esti fin de selmana nun se nos podíen apegar les sábanes por teníemos cites a primer hora lo mesmo’l sábadu como’l domingu. El sábadu una sesión de calificación ensin munches novedaes tocante a lo que tamos avezaos, anque esta vez toco-y a Hamilton facese cola pole y víemos a un McLaren metese en Q3 ensin que fuera por fallu d’un terceru. Y si nun fuera pola penalización de Fernando quiciabes taríemos falando d’unos primeros puestos por pareyes d’equipu.

Los que decidimos que pagaba la pena madrugar un domingu pa ver el Gran Premiu de Malasia, tuvimos tascando bien de veces los güeyos pa ver si lo que tábemos viendo nun yera cosa del sueñu perdíu.

Y ye que nin siquiera tuvimos d’esperar a la carrera pa qu’empezaran las sorpreses. La primera vieno de la mano de Felipe Massa que nun pudo siquiera dar la vuelta de formación y tuvo salir dende’l pitlane, dalgo que condicionaría dafechu la so carrera, dexándolu fuera de los puntos nel puestu catorce. P’añadir a lo de Massa, Sáinz quexábase de que’l coche s’apagara, pero por suerte pal pilotu de Toro Rosso, foi quién a ponelu en marcha otra vuelta y participar na carrera ensin mayor problema, anque nun pudo metese nos puntos.

Cuando por fin les lluces colloraes s’apagaron, tábemos toos sollertes a lo que podía pasar na primer curva dempués de la recta de salida. Y como vien siendo vezu esta temporada, pasó de too: pasó per detrás, onde Magnussen recibió un golpe de Kvyat na parte trasera del coche que faría al danés retirase unes vueltes dempués; pasó pel mediu, con pilotos como Fernando Alonso alcanzando los puntos dempués de salir últimu; y pasó, sobre too, per delantre. Los protagonistes esta vez diben ser Verstappen, Rosberg y Vettel. Yá nun ye la primer vez que hai hestories ente Vettel y Verstappen esti añu, y un mal cálculu a la hora tomar la curva y el relativu pocu espaciu col que s’atopó’l pilotu de Ferrari, fexo que colisionara con Rosberg de la que peleaba por adelantar a Verstappen. Pal pilotu de Mercedes eso significó trompear y quedar últimu dafechu últimu. Pal de Ferrari, romper la suspensión y retirase.

Ye la segunda vez na que Rosberg se ve obligáu a demostrar que nun ye un pilotu blandu, y qu’elli tamién pue facelo bien entamando dende atrás. Dempués del choque con Vettel, echo la carrera adelantando y faciendo por alcanzar los puestos d’arriba.

Hamilton pel so lláu, pudo ver pelos sos retrovisores lo que pasaba, pero en nengún momentu vio peligrar la so posición, dempués d’una bona salida pela so parte. Cuando la carrera foi asentando, quedó claro que la cosa diba tar ente elli, los Red Bull y quedaba por ver hasta onde sedría quien a llegar Rosberg. Kimi taba ehí, pero nun paecía tener el ritmu suficiente pa ser un peligru pa Hamilton.

Red Bull optó por parar a Verstappen bien temprano, enantes que’l restu de los de cabeza, n’un intentu por colocalu primeru y poder lluchar pola victoria col pilotu de Mercedes. Verstappen aguantó lliderando la carrera, hasta que tuvo de parar otra vez, onde foi Hamilton quien se puso en cabeza otra vez. Dempués d’esto, vimos una batalla bien guapa entre los dos pilotos Red Bull, con Verstappen quexándose de que’l so compañeru yera más lentu y pidiendo que lu dexaren pasalu. L’holandés intentólo, pero Ricciardo plantó-y cara en tou momentu.

Cola pelea de dambos Red Bull, Hamilton siguía metiendo-yos tiempu, y paecía que la balanza diba inclinándose pal so llau. Y foi entonces cuando la cámara de la FOM quedaba fixa nel coche del pilotu inglés y víemos como un fumu yá familiar salía de la parte trasera del coche, xunto con llames. El motor Mercedes del coche de Lewis Hamilton morrió, dexándolu asina fuera de carrera y a los Red Bull como triunfadores del gran premiu, con Ricciardo ganando la so primer carrera dempués de dos años ensin victories.

Demientres, Rosberg siguía la so cabalgada hacia’l podiu, faciéndose col tercer puestu xusto per delantre de Kimi. Foi precisamente n’un adelantamientu a Kimi onde penalizaben al alemán por un toque col pilotu finlandés. Lo que pa munchos foi un incidente de carrera ensin más, significó diez segundos de penalización pa Rosberg, que dende esi momentu lluchó por dexar ente elli y el pilotu de Ferrari un marxe superior a esa penalización. Consiguiólo y el tercer caxón del podiu foi pa él.

Aparte de Hamilton, quedaben fuera de carrera los dos Haas (Grosjean con problemes de frenos y Gutiérrez con una rueda floxa que se soltó del coche y que se traduxo en penalización económica pal equipu), Magnussen pol choque de Kvyat, Nasr con problemes nel motor (anque la xustificación que dieron paez que foi otra).

Hebo munchos pilotos destacaos nesti gran premiu, por exemplu Fernando Alonso que quedó séptimu dempués d’empezar la carrera últimu o Rosberg, cola so recuperación dempués del incidente en carrera. Pero dempués de dieciséis carreres y munchos disgustos, paeznos que la estrella del domingu foi pa Jolyon Palmer, que n’un fin de selmana complicáu pal equipu, consiguió sumar el so primer puntu del campeonatu. Nun tenemos claro que-y valga pa conservar el so asientu en Renault pa 2017, pero dempués de tar varies veces a tiru, por fin llegó’l momentu pa elli de sumar.

Equí vos dexamos tolos resultaos del sábadu y domingu:

 

Clasificación

Pos Pilotu Q1 Q2 Q3
1 Lewis Hamilton 1:34.444 1:33.046 1:32.850
2 Nico Rosberg 1:34.460 1:33.609 1:33.264
3 Max Verstappen 1:35.443 1:33.775 1:33.420
4 Daniel Ricciardo 1:35.079 1:33.888 1:33.467
5 Sebastian Vettel 1:34.557 1:33.972 1:33.584
6 Kimi Räikkönen 1:34.556 1:33.903 1:33.632
7 Sergio Perez 1:35.068 1:34.538 1:34.319
8 Nico Hulkenberg 1:34.827 1:34.441 1:34.489
9 Jenson Button 1:35.267 1:34.431 1:34.518
10 Felipe Massa 1:35.267 1:34.422 1:34.671
11 Valtteri Bottas 1:35.166 1:34.577
12 Romain Grosjean 1:35.400 1:35.001
13 Esteban Gutierrez 1:35.658 1:35.097
14 Kevin Magnussen 1:35.593 1:35.277
15 Daniil Kvyat 1:35.695 1:35.369
16 Carlos Sainz 1:35.605 1:35.374
17 Marcus Ericsson 1:35.816
18 Felipe Nasr 1:35.949
19 Jolyon Palmer 1:35.999
20 Esteban Ocon 1:36.451
21 Pascal Wehrlein 1:36.587
22 Fernando Alonso 1:37.155

Alonso saldría últimu al sumar 45 posiciones de penalización por cambiu d’elementos de la unidá de potencia

Carrera

Pos Pilotu Tiempu Vuelta
1 Daniel Ricciardo 1:37:12.776 56
2 Max Verstappen +2.443 56
3 Nico Rosberg +25.516 56
4 Kimi Räikkönen +28.785 56
5 Valtteri Bottas +61.582 56
6 Sergio Perez +63.794 56
7 Fernando Alonso +65.205 56
8 Nico Hulkenberg +74.062 56
9 Jenson Button +81.816 56
10 Jolyon Palmer +95.466 56
11 Carlos Sainz +98.878 56
12 Marcus Ericsson +1 vuelta 55
13 Felipe Massa +1 vuelta 55
14 Daniil Kvyat +1 vuelta 55
15 Pascal Wehrlein +1 vuelta 55
16 Esteban Ocon +1 vuelta 55
NC Felipe Nasr NT 46
NC Lewis Hamilton NT 40
NC Esteban Gutierrez NT 39
NC Kevin Magnussen NT 17
NC Romain Grosjean NT 7
NC Sebastian Vettel NT 0

Gran Premiu de Malasia 2016 – Previa

Tábemos avezaos a que Malasia fuera unu de los madrugones de principiu de temporada, pero col cambiu de calandariu, atopámosla agora a finales de setiembre. Una de les carreres más desixentes no que cinca a les condiciones del ambiente pero que yá ta empezando a convertise n’un clásicu por méritu propiu.

Dempués de la gran carrera que víemos en Singapur, con un Nico Rosberg más sólidu que nunca, tamos seguros qu’entá nos queda por ver lo meyor. Queden seis carreres y los puntos de diferencia ente l’alemán ya’l so compañeru d’equipu ye simbólica (ocho puntos). Amás, per detrás sigui entá la batalla ente Ferrari y Red Bull, cada vegada más inclinada del llau de los de Milton Keynes, asina como la pelea ente Williams y Force India (con un puntu de diferencia ente dambos a favor de los segundos) y ente McLaren y Toro Rosso.

Pirelli yá avisó que’l reasfaltáu de la pista en Sepang pue complicar les coses a los pilotos, y a los siguidores d’esti deporte salnos una sorrisina cuando se diz dalgo d’esto. Con un campeonatu onde’l meyor equipu lo ye con muncha ventaxa, estes coses son les que-y ponen un pocu d’emoción anque sepamos que, d’una manera o otra, Mercedes va tar nel podiu.

Pa les feches platiaes, esti ye casi una segunda carrera en casa, polo que Mercedes representa en Malasia gracies a Petronas. Anque l’añu pasáu nun tuvieron un gran premiu espléndidu, tamién diximos eso hai dos selmanes en Singapur, asina que de xuru volverán refuerciaos, como suelen facer carrera tres carrera.

El restu d’equipos, ensin duldes, van intentar aprovechase d’esa “debilidá” (siempre cola boca pequena cuando falamos de Mercedes) ya esperamos velos dando guerra como en Marina Bay hai unos díes.

En xeneral, tolos equipos resalten lo caloroso del circuitu, la humedá del ambiente y lo qu’eso supón pa coche ya pilotu. Xente como Fernando Alonso guarden bonos recuerdos de correr equí, con tres victories nel pasáu, pero munchos otros pilotos, por exemplu Jolyon Palmer cuando corría en GP2, nun los tienen tan bonos.

Haas van tener otra oportunidá d’amosar que tán na Formula Uno pa quedase y Gutiérrez tará deseyando por fin romper cola maldición del undécimu puestu pa poder consiguir dalgún puntín en carrera. Col gran premiu d’Estaos Xuníos cada vez más cerca, l’equipu americanu buscará siguir convenciendo a los de dientro y tamién a los duldosos de fuera.

Aterrizamos en Malasia, con madrugón incluyíu. Estos van ser los horarios oficiales:

Vienres, 30/09/2016
Llibres 1: 4:00 AM
Llibres 2: 8:00 AM
Sábadu, 01/10/2016
Llibres 3: 8:00 AM
Calificación: 11:00 AM
Domingu, 02/10/2016
Carrera: 9:00 AM

Y estos son los datos del circuitu y los neumáticos que cada pilotu va a tener disponibles en Sepang:

neumaticos-malaisia-2016

Gran Premiu de Singapur 2016 – Análisis por equipos

Cola mayoría de los equipos yá de vuelta nes sos sedes y colos pilotos desperdigaos pol continente asiáticu ya’l européu, vamos facer un repasu a lo que cada escudería dio de sí nel pasáu gran premiu de Singapur:

– Mercedes: Podemos nomalos los triunfadores de la nueche, anque paeza que ye lo que siempre dicimos, pero teniendo en cuenta que corríen n’un circuitu onde suelen tener más problemes pa dominar, el domingu vímoslos lluchar pa poder pasar perriba de los sos rivales. Cuando’l coche nun marca tanto la diferencia tamién saben lluchar. Nun vamos repetir que la carrera de Rosberg foi de quitase’l sombreru y que Hamilton, anque más baxu, tamién fexo una bona carrera. La llucha pol campeonatu de pilotos sigue más qu’abierta.

– Red Bull: Yeren la principal amenaza pa Mercedes, y asina lo demostraron el domingu. Anque Verstappen nun anduvo mui finu si lu comparamos con Ricciardo, la verdá ye qu’en conxuntu l’equipu respondió a les espectatives que se teníen de la so actuación nesti gran premiu. Les últimes vueltes de Ricciardo intentando alcanzar a Rosberg son de los más reseñable d’esta carrera y cásique de los últimos años.

– Ferrari: Vettel víase torgáu’l sábadu por un problema na suspensión que lu facía salir últimu al nun poder marcar un tiempu competitivu mientres llegaba a box col coche sobre tres ruedes. Paecía que la so carrera taba sentenciada y en Ferrari tirábense de los pelos pensando nun fin de selmana nel que sí qu’había oportunidaes de lluchar polo más alto del caxón, pero conociendo al alemán (y el fechu de que yá lo fexo otra vez) sabíase que nun diba ser tan catastrófico. Y anque les actuaciones de Ferrari siguen sabiendo a poco (cuartu y quintu nesta carrera) teniendo en cuenta les circunstancies pueden respirar tranquilos, anque cola atención puesta nes decisiones a tomar nes estratexes de carrera, que siguen siendo la so debilidá.

– McLaren: A estes altures de la temporada yá vien siendo vezu qu’un McLaren termine la carrera ya’l otru quede fuera enantes de tiempu por problemes de dalgún tipu nel coche: o perda de potencia, o accidente, o lo que se tercie. Nesta ocasión, y por tercera vez en cinco carreres, tocaba-y a Jenson Button. Los incidentes de la salida cebáronse con elli tamién y na vuelta 43 tuvo que retirar el coche pesie a entrar en boxes pa intentar siguir en pista. El so compañeru, dempués d’una perbona salida na que llegó a ser quintu, consiguía terminar séptimu y sumar puntos pa la escudería, que sigue abriendo brecha con Toro Rosso.

– Force India: Dalgo asemeyao a lo de McLaren suel pasa-yos a Force India. Dicíemos na previa qu’esti yera un circuitu que se-yos da bien y Pérez pudo demostralo dempués de salir con ocho posiciones de penalización. Quedó octavu. El so compañeru nin siquiera llegó a la primer curva, y foi’l mayor afeutáu del incidente na salida, onde se convirtió nel rellenu d’un sandwich formuleru que lu dexó fuera de carrera. Pa aliviu de Force India, Williams nun puntuó, asina que siguen tando vivos na so llucha con ellos pol cuartu llugar nel campeonatu de constructores, un puntu perriba la escudería inglesa.

– Toro Rosso: Dempués de munches carreres víemos a Kvyat brillar. Un novenu puestu puede saber a pocu, pero teniendo en cuenta les sos males actuaciones dende que se “mudara” a Toro Rosso, esta carrera, esperamos, pue da-y un emburrión de cara al so futuru. El so compañeru nun pudo imitalu y quedó dafechu fuera los puntos, en décimocuartu puestu con problemes nel MGU-K.

– Renault: Nun tamos avezaos a ver esta temporada’l color amariellu de Renault dientro los puntos, pero Singapur ye una esceición pa too. Magnussen dicía que se-y facía increyible lo bien que diba’l coche y que casi-y sabía a poco’l décimu puestu que consiguió. Esi puntín va vali-yos bien na so defensa escontra Manor nel campeonatu de constructores. Los seis puntos que los separen deberíen ser suficientes pa que Renault asegure’l so novenu puestu. Palmer, pel so llau, anduvo perdíu pelos puestos baxos demientres tola carrera y sigui na cuerda floxo con respeutu a lo que puea pasar col so futuru en Renault. Acabó décimoquintu.

– Haas: Grosjean nun pudo nin salir por problemes col brake-by-wire, y Gutiérrez volvió a quedase a les puertes de puntuar. Ensin duldes foi un gran premiu pa olvidar pa la escudería norteamericana, pero teniendo en cuenta que yera la so primer vez, el fechu de ser casi quien a puntuar tendría de da-yos motivos, a lo menos, pa sorrir un poco. Cada carrera ye un descubrimientu pa ellos, y ta claro que nun van poder triunfar en toes, porque nin siquiera los equipos más consolidaos y poderosos lo faen. Empezaben el campeonatu col oxetivu d’acabar carreres y tán viéndose capaces de puntuar, asina que pue dicise que la temporada de Haas ta siendo bien positiva.

– Williams: Nun ta siendo’l so añu. Ente les carreres floxes que tienen y qu’encima nun paez que la suerte tea del so llau, en Singapur víemoslos fuera de los puntos otra vegada más. Massa a lo menos pudo terminar la carrera, siendo décimosegundu, pero Bottas foi’l tercer afeutáu del incidente de la salida y anque paró y pudo continuar delles vueltes, terminó por abandonar na 35.

– Sauber: Dambos coches terminaron y eso yá ye un llogru pa la escudería suiza. Nun puntuaron pero a lo menos nun se vieron afeutaos por nengún incidente en pista nin nes paraes. Nasr consiguió acabar per delantre’l so compañeru siendo décimoterceru, demientres qu’Ericsson foi décimoséptimu, per detrás de Pascal Wehrlein.

– Manor: Nun foi quiciás el gran premiu más positivu pa ellos. Con dellos incidentes demientres los entrenamientos llibres, paecía que nun diben brillar muncho’l domingu y tuvieron una carrera discreta, anque consiguieron colocar a un Sauber per detrás d’unu de los suyos. Ocon nun lo ta faciendo mal teniendo en cuenta lo que lleva nel coche y les posibilidaes qu’esti ufre, pero queda-yos entá muncho que trabayar. Esi puntín nel mundial de constructores val el so pesu n’oru.

Gran Premiu de Singapur 2016 – Carrera

Nun fin de selmana con más incertidumes d’avezaes nun salimos defraudaos n’absoluto. Nun circuitu onde yá sabíemos que los Mercedes nun son tan dominantes como lo vienen siendo no que va de temporada vimos una carrera na que munchos pilotos sacaron lo meyor d’ellos pa regalanos una carrera d’eses de les que presta ver y revisar pola imposibilidá de garrar de primeres tola acción qu’hebo nella.

Yá’l sábadu, na clasificación, víase al Red Bull de Ricciardo colase p’ente los Mercedes y na primer llinia de salida. Y eso que paecía qu’a lo menos Rosberg esta vez sí qu’acertaba colos botones pa configurar el coche de la forma más afayadiza pa esti circuitu (non ensin llevar un sustu na primer sesión d’entrenamientos) y llevaba la pole. Na otra cara de la moneda, a Hamilton siguía faciendose-y cuesta arriba l’adautación a esti circuitu, pero nada que ver colos problemes del añu pasáu. Toro Rosso asomaba na primer mitá de la tabla demostrando qu’esti nun yera un circuitu onde la unidá de potencia xugaba un papel tan protagonista.

El domingu, la salida del gran premiu foi determinante pa munchos pilotos, especialmente pa Nico Hülkenberg, que foi’l gran perxudicáu. El so intentu d’adelantar posiciones viose torgáu poles ansies de los pilotos que tenía a los llaos y a los que quiciás nun tuvo mui en cuenta a la hora metese, resultando col so coche atrapáu ente ellos dos y provocando que perdiera’l control del mesmu y terminara mirando al sen contrariu y col monoplaza estrozáu. Otra desilusión que sumar a la llarga coleición del alemán esta temporada. De toles formes, nun foi l’únicu que tuvo que llamentar esi accidente: Bottas y Button pudieron aguantar más en pista que’l pilotu de Force India, pero tuvieron de parar bien llueu (na primer vuelta) al vese afeutaos pol incidente, pero dambos tuvieron d’aparcar los coches nel garaxe enantes de ver la bandera a cuadros.

Rosberg nun tuvo solu nin foi una carrera fácil pa elli si non tolo contrario. Ye por eso que ye entá más valoratible lo que fexo. Ricciardo tuvo detrás d’elli tol gran premiu, dende bien ceo, y en nengún momentu dexó de lluchar por la victoria. Les últimes vueltes del gran premiu fueron quiciás de les más emocionantes que tenemos visto nesta temporada: Rosberg tinía la opción d’entrar en boxes pa cambiar les gomes y dir hasta’l final con elles nueves, pero la diferencia con Ricciardo yera pequeña como pa facela funcionar. Asina que decidió tirar, xestionar los diecinueve segundos llargos que tenía de marxe pa llegar hasta’l final, curiando con mimu unos frenos que-yos veníen dando problemes de sobrecalentamientu a les dos fleches platiaes. Na última vuelta, Ricciardo taba a menos d’un segundu y con DRS, pero Rosberg yá tenía la carrera nes manes aplicando en cada xiru la desixencia precisa.

Hai carreres que definen a pilotos. De fechu, hai xente que diz qu’en dellos circuitos estrémense los buenos pilotos de los normalinos. Esti domingu en Singapur pudimos ver a Nico Rosberg pilotando pol campeonatu del mundo. Son munches les voces que se tienen xuntao pa dicir que ye un pilotu que nun lo da, y teniendo al so llau a Hamilton, les comparaciones son odioses; pero’l domingu víemos al alemán xestionar una carrera como la de Singapur, de les más dures (si non la que más) del calendariu, con sangre fría y sabiendo en cada momentu qué pasu dar (llegando incluso a cortar a los inxenieros cuando-y daben datos de la carrera pa siguir concentráu). Asina ye como se ganen campeonatos del mundu. A Hamilton nun-y quedó otra que, dempués de quedar terceru, felicitar al so compañeru. Mereciólo yá dende’l vienres.

Tres d’ellos dos, la engarradiella yera la de Hamilton y Räikkönen. Anque’l so espectáculu quiciás nun foi tan emocionante, tuvo bien entretenío velos adelantase y ye d’aplaudir la estratexa de Mercedes p’adelantalos na parada en boxes, y otra vez movimientos poco claros na escudería Maranello que fexo perder a Raikkonen probablemente una posición por nun entrar primero una vez lo ficiere Lewis. Ye lo bueno que tienen carreres tan desixentes como Singapur, que la superioridá de Mercedes reduzse y vense obligaos a dir más allá de lo rápidos que seyan pa pensar n’estratexes a la hora superar a los sos rivales, y ye ehí onde tienen que demostrar tamién, y tán demostrando que tampoco nun son mancos nesi aspectu.

El restu del grupu de los diez primeros diben ocupalu Vettel, que saliendo últimu consiguió facese col quintu llugar; Verstappen, qu’al contrario de lo que munchos creyíamos, nun brilló tanto como s’esperaba (anque eso nun nos quitó dellos adelantamientos pa enmarcar); Alonso, qu’otra vuelta foi quién a colocar el so McLaren nos puntos dempués d’una bona salida que lu colocaba quintu; Pérez, que dempués de ser penalizáu con ocho posiciones en pista por ignorar les banderes amarielles y por nun reducir velocidá demientres la calificación el sábadu, consiguió recuperase pa terminar octavu; Kvyat, que zarró munches boques esti fin de selmana faciendo un bon trabayu y poniéndose al altor del so compañeru Sáinz que nun tuvo tanta suerte y nun pudo puntuar anque pintaba bien el sábadu; y nel puestu diez, una de les sorpreses de la carrera, el Renault de Kevin Magnussen. La escudería francesa púnxose les piles dempués de que Manor dixera que son el so oxetivu y consiguió sumar otru puntín d’oru.

Per detrás, Gutiérrez, que sigue ensin consiguir metese nos puntos, quedando otra vuelta a les puertes. Massa sedría décimosegundu, n’otru fin de selmana pa olvidar na escudería Williams; Nasr consiguió pasar perriba’l so compañeru quedando décimoterceru, con Ericsson décimoséptimu. Palmer namás pudo ser décimoquintu per delantre los Manor, que quedaron décimosextu (Wehrlein) y décimoctavu (Ocon).

La mayor deceición del día foi la de Romain Grosjean que nin siquiera pudo empezar la carrera por problemes col brake-by-wire qu’impidieron que pudiera siquiera ponese na parrilla de salida.

Equí vos dexamos tolos resultaos del sábadu y domingu:

 

Clasificación

Pos Pilotu Q1 Q2 Q3
1 Nico Rosberg 1:45.316 1:43.020 1:42.584
2 Daniel Ricciardo 1:44.255 1:43.933 1:43.115
3 Lewis Hamilton 1:45.167 1:43.471 1:43.288
4 Max Verstappen 1:45.036 1:44.112 1:43.328
5 Kimi Räikkönen 1:44.964 1:44.159 1:43.540
6 Carlos Sainz 1:45.499 1:44.493 1:44.197
7 Daniil Kvyat 1:45.291 1:44.475 1:44.469
8 Nico Hulkenberg 1:46.081 1:44.737 1:44.479
9 Fernando Alonso 1:45.373 1:44.653 1:44.553
10 Sergio Perez 1:45.204 1:44.703 1:44.582
11 Valtteri Bottas 1:46.086 1:44.740
12 Felipe Massa 1:46.056 1:44.991
13 Jenson Button 1:45.262 1:45.144
14 Esteban Gutierrez 1:45.465 1:45.593
15 Romain Grosjean 1:45.609 1:45.723
16 Marcus Ericsson 1:46.427 1:47.827
17 Kevin Magnussen 1:46.825
18 Felipe Nasr 1:46.860
19 Jolyon Palmer 1:46.960
20 Pascal Wehrlein 1:47.667
21 Esteban Ocon 1:48.296
22 Sebastian Vettel 1:49.116

Carrera

Pos Pilotu Tiempu Vuelta
1 Nico Rosberg 1:55:48.950 61
2 Daniel Ricciardo +0.488 61
3 Lewis Hamilton +8.038 61
4 Kimi Räikkönen +10.219 61
5 Sebastian Vettel +27.694 61
6 Max Verstappen +71.197 61
7 Fernando Alonso +89.198 61
8 Sergio Perez +111.062 61
9 Daniil Kvyat +111.557 61
10 Kevin Magnussen +119.952 61
11 Esteban Gutierrez +1 vuelta 60
12 Felipe Massa +1 vuelta 60
13 Felipe Nasr +1 vuelta 60
14 Carlos Sainz +1 vuelta 60
15 Jolyon Palmer +1 vuelta 60
16 Pascal Wehrlein +1 vuelta 60
17 Marcus Ericsson +1 vuelta 60
18 Esteban Ocon +2 vueltes 59
NC Jenson Button NT 43
NC Valtteri Bottas NT 35
NC Nico Hulkenberg NT 0
NC Romain Grosjean NS 0

Gran Premiu de Singapur 2016 – Previa

Les carreres que nun son mítiques, qu’entá nun se ficieron güecu na hestoria de la Fórmula Uno, tienen d’ufrir daqué a la xente pa qu’añu tres d’añu vaigan al circuitu a veles o tean pendientes d’elles na televisión. Esi ye’l casu de Singapur, que por méritu propiu ta incluyida ente una de les carreres esperaes de la temporada. Quiciás ye polo diferente, quiciás porque suel dar oportunidaes a los d’atrás o quiciás pola demanda que-yos fai a los pilotos y coches, nun sabemos que ye lo que más atrai, pero Singapur ye un gran premiu de los de frotase les manes.

Aterrizamos en Marina Bay cola llucha pol campeonatu de pilotos bien apertada: Hamilton y Rosberg tán separtaos agora mesmo por dos puntos. Esti ye’l circuitu que más duldes llevanta en Mercedes, onde peor lo pasaron l’añu pasáu y onde paez que los nrivales tan más cerca o incluso enriba d’ellos. ¿Detectaríen yá la causa de los problemes del añu?  ¿Sedríen quien a igualo? Amás, tol equipu andará pendiente d’ensayar les salides, dalgo qu’esti añu se-yos ta atascando. Van vese amenazaos de xuru por Red Bull, n’un circuitu nel que van vese más beneficiaos y por Ferrari con ganes de repetir el triunfu del añu pasáu y aselar asina la so necesidá de victoria.

Pela zona media, Williams sigui bregando con Force India pol cuartu puestu de pilotos, y Force India tiende a ser un equipu que funciona bien en Singapur, lleven puntuando dende 2010 y dalguna vez quedaron ente los cinco primeros. Pel so llau Williams tampoco queda atrás en Marina Bay, polo que la batalla ta asegurada.

Más abaxo, Toro Rosso y McLaren van tar tamién engarraos, nel casu de los británicos col conocimientu de que son en Singapur más fuertes de lo que son en Monza. En Toro Rosso empiecen a tar necesitaos de volver a los puntos dempués d’un gran premiu d’Italia bastante negativu pa dambos pilotos y quieren parar la cayida llibre que supón el estancamientu nel propulsor.

Haas aterriza per primera vez en Singapur suponemos que cola intriga de ver si van ser quién a responder a les demandes d’unu de los circuitos más duros del campeonatu. Pel llau de Sauber, siguen reforciándose a nivel de personal, de xuru yá pensando na estratexa pa 2017, pero cola esperanza d’entá poder facer dalgo pa ponese per delantre de Manor, qu’hai unos díes dicíen que’l so oxetivu agora nun ye tanto defendese de Sauber como intentar alcanzar y pasar a Renault nel campeonatu constructores. Tiénenlos a tiru, y Singapur pue poné-yoslo más fácil entá.

Abaxo podéis atopar les gomes que van usar los pilotos pa esti gran premiu y equí tenéis más información sobre esti circuitu.

singapore-tyres-2016

Gran Premiu d’Italia 2016 – Análisis por equipos

Queden menos de dos selmanes p’aterrizar en Singapur, pero entá queden delles coses que revisar en Monza. Vamos echar una güeyada a lo que ficieron los equipos nel gran premiu d’Italia del domingu pasáu.

– Mercedes: Díbemos convencíos de que diben a ser los dominadores de tol fin de selmana ya cuntábemos con que fuere Hamilton quien consiguiese la victoria’l domingu polo visto nes primeres sesiones. Ensin embargu, víemoslu otra vez fallar na salida (paez que nun tien fácil arreglu el problema o problemes col embrague del Mercedes) y a Rosberg aprovechase d’ello. Dempués d’eso, la carrera del alemán foi bien tranquila, demientres que pa Hamilton foi un poco más entretenida, quedando sextu na salida pa recuperar darréu y terminar segundu. Namás dos puntos separen agora a los dos pilotos.

– Ferrari: De vuelta a la realidá del restu d’equipos, Ferrari consiguió dar una alegría a los tifosi con Vettel nel tercer puestu y Kimi detrás d’elli. Nun ye a lo qu’aspiren, pero un podiu en Monza vistíu de rosso siempre paga la pena. Arrivabene comentaba qu’entá nun daben nada por perdío, y paeznos que tien de ser la persona más optimista dientro l’equipu porque nun nos paez que vaigamos a ver coses mui distintes d’equí a final de temporada. De momento, siguen per detrás de Red Bull nel campeonatu de constructores.

– Red Bull: Como ellos mesmo dixeron, minimizaron daños. Nun foi la so meyor carrera, pero teniendo en cuenta que nun corríen n’un circuitu que-yos beneficiare y onde la potencia de la PU yera importante, quedar dientro los puntos yera’l mal menor. Ricciardo foi unu de los protagonistes del gran premiu pol so adelantamientu a Bottas, una de les poques coses vistoses que nos dexó la carrera. Riccardo acabó quintu con Verstappen séptimu.

– Williams: Dempués de tar nel puntu mira pol movimientu de pilotos, Williams consiguía meter dambos coches nos puntos, anque Bottas almitía que taben deceicionaos porque cuntaban con poder alcanzar el podiu. Nun foi asina: elli quedaría sextu ya’l so compañeru Felipe Massa novenu.

– Force India: Siguen batallando con Williams pol campeonatu de constructores y anque vuelven a tar per detrás, nun dexaron de sumar puntos con dambos pilotos. Suponemos que cada vez-yos cueste más facer frente a les posibles meyores que traigan el restu equipos pero nun duldamos que van siguir bregando na so llucha particular con Williams. Pérez terminó octavu y Hülkenberg, décimu.

– Haas: Anque ensin puntos, esta foi una bona carrera pa Haas. Ensin escaecer que por primer vegada consiguieron entrar en Q3 el sábadu con Esteban Gutiérrez, el domingu fueron quien a presentar batalla en pista y quedar a piques de metese ente los diez primeros. Grosjean foi undécimu y Gutiérrez acabó nel puestu trece.

– McLaren: Otros que tuvieron nel puntu mira tol fin de selmana: empezaben la carrera col convencimientu de que nun diben poder sacar muncho de Monza por ser unu de los peores circuitos pa ellos. Puntos nun sacaron, pero Alonso consiguió facer, a última hora dempués de montar gomes nueves a falta dos vueltes, la vuelta rápida de carrera polo que se fexo col troféu col que se premia al pilotu que la consigue en cada gran premiu. Nun fueron too maraviyes, ya l’asturianu víase torgáu nel pit stop, dalgo que nos regaló dalgún qu’otru mesaxe de radio al equipu, y pasáu en pista pol so compañeru. Button terminó décimosegundu y Alonso décimocuartu.

– Toro Rosso: Cuando sintimos falar a Sáinz notamos daqué frustración nes sos pallabres y les ganes de tornar a puntuar de siguío. Monza foi pa ellos unu de los peores grandes premios, y d’eso ye muestra que Sáinz sólo pudiera ser décimoquintu ya’l so compañeru nin siquiera pudiere terminar la carrera.

– Sauber: De xuru qu’a la escudería ya se-yos ta faciendo llarga la temporada. Nasr quedaría fuera de carrera a los pocos minutos d’empezar la carrera por un choque con Palmer y Ericsson nun pudo más que ser décimosextu. Ensin duldes, nun foi un día de sorrises en Sauber. Y yá sumen unos cuantos…

– Renault: Recuperáu del so accidente de va una selmana en Spa, Magnussen pudo acabar la so carrera sólo per delantre los Manor, que nun ye dicir muncho, pero que teniendo en cuenta lo que ta dando de sí la temporada pa la escudería francesa, ye bastante. Palmer quedaba fuera nel choque con Nasr y suma otru gran premiu nel que nun ye quién a amosar de lo que ye capaz en pista. Ta quedándose ensin oportunidaes ya suenen munchos pilotos pa ocupar el so asientu. Esperamos que pueda facer dalgo por compensalo d’equí a payares.

– Manor: Nun foi de los meyores domingos pa Manor, anque’l sábado dexábanos a Wehrlein otra vez en Q2. L’alemán quedaría fuera de carrera por un problema col coche ya Ocon consiguió acabar, anque nun taba demasiao contentu con como fuera’l fin de selmana. Tóca-yos, otru gran premiu más, siguir trabayando.